دروس الاسـطـوري

[بوميثه]

اوووووووووووووو ..

الاسطوري صار دكتور جامعي لحقو عليه ..

ياويلي ويلاااااااااه ..

وينهم ناس احم احم خلهم يجوفون الي اجوفه ..

ياحيك اخويه ..

بس اخيج عااااااااد انته قلت حق الناس الي ماعندهم شغله (( انا 24 ساعة مجابل الكتب ))

داش هالكلاس بس حذه مروور الكرام ..

بس فديتك تسلم لي على هالمعلومات الصغيرونات الكبيرونات بمعناهن ..

وصدق يباااالي اتتددرم ( هع هاوي دراما ) ..

وطال عمرك انته طريت ارسطو ..( ونسيتني انا .. الله يسامحك )

تسلم اخويه على ما طخطخت يمناك الغالي ..

ولا تحرمنا من يديدك وابداعك الرهيب ..

كل احترامي ..



الكــــــــــــــــــــــ ـــــــــــــــــــــل ثابت ( هههههههههه وينهم العسكرية )

[الاسطوري]

هــــــــــلا ..

السلام عليكم .. شحالكم شخباركم إن شاء الله طيبين .. كيف كان البريك ؟ وكيف حسيتوا المحاضرة
الماضية سهله ولا صعبه وإذا في حد مب فاهم يتفضل يسأل قبل مانبدأ في
المحاضرة الثانية هاااا محد يبى يسأل على العموم
المجال مفتوح في أي وقت
ونسيت أعطيكم توصيف المساق وبتحصلون على البلاك بورد موجود واللي عنده مشكله في اليوزر أو
الباسوورد يراجع قسم الإرشاد وبيساعدونه والساعات المكتبية بتكون يوم
الأحد والثلاثا من الساعة 2 الظهر للساعه
4 في الرسايل
الخاصة وللحالات الضرورية هذا رقمي 9999999 واللي بيطرش مسج أتمنى يكتب اسمه واسم
المساق عشان اعرفه واللي عنده اي استفسار يأجله لنهاية المحاضرة
لأن وايد تأخرنا والمحاضرة هاي
دسمه شويه

المحاضرة الثانية

"نشأة الدراما"

اختلفوا المؤرخين حول هذا الموضوع وتعددت الآراء ولكن معظمهم قالوا إن نشاة الدراما لها علاقة
وثيقة بعبادة الاله (دينيسيوس) لأن المسرحيات ماإنعرضت إلا في أعياد هالاله
كـ طقس من طقوس عبادته وكانوا طبعا يعرضون
كل من التراجيديا والكوميديا
ويرجع أصل التراجيديا إلى (الاثرامبوس) وهو عبارة عن نوع من الرقصات الغنائية تقوم بها
الجوقة أي (ممثلين بزي معين) بمصاحبة الناي وهذا مثل ماقلنا يكون في
مهرجانات وأعياد الاله دينيسوس وكانوا
أفراد الجوقة
يرتدون أثناء تلك الرقصات جلود العنز (تراجوس) ومن هني أطلقوا على أفراد الجوقة إسم
تراجودي أي المغنين العنزيين وأطلق على الأغنية نفسها إسم تراجوديا
أي الأغنية العنزية وهي الأصل في كلمة
تراجيدي ، وطبعا
من أول اللي كتبوا عن التراجيديا هو (ثيبس) اللي يتعبر أبو التراجيديا وكان هذا في القرن
السادس قبل الميلاد وكان مصدر التراجيديا الاساطير اللي تدور حول
الشخصيات القديمة والالهه في التاريخ
اليوناني القديم

شباب وعوا ذنيني أشوفه راقد لا يكون يتحرى عمره في البيت ، دكتور السموحه بس أمس
كنت سهران شويه ، وعلى شو سهران ، دكتور كنت سهران
على منتدى واحات بن دبي عشان
أنزل موضوع عن تجربتي ويه المعاقين ، انزين بس لازم ترتب أولوياتك وماتخلي
شي يأثر على شي قوم روح أغسل ويهك وتعال
عشان تتنشط


انزين الحين بندخل في الكوميديا واللي هي عكس التراجيديا ولكن هني الموضوع محوط بالغموض
أكثر من التراجيديا ولكن الأرجح بإن البدايات كانت في الأزمنة القديمة تكون
في حفلات ومهرجانات معروفة بإسم (كوموس)
ويكون على شكل
جماعات مرحة راقصة ويلبسون أردية ساخرة تمثل وحوش او طيور عشان يخفون ملامحهم
وهالاحتفالات تكون تكريما لبعض آلهة الاخصاب وعلى رأسهم دينيسوس
اللي رمسنا عنه في التراجيديا ، وكانت الكوميديا
القديمة أسلوبا للتعبير عن
التهكم والسخرية والهجاء وعقب بدت تناقش بعض المشاكل الخاصة بالناس من خلال طابع المرح
ويعتبر (أرسطو فانز) رائد الكوميديا وأنوه عشان محد يخربط بإن هالشخص
يختلف عن أرسطو اللي رمسنا عنه في
المحاضرة الماضية

هااا كيف للحين متابعين بسلاسه ولا تحسون الكمية وايد ، حلم الطفولة : لا دكتور
الكمية بسيطة كمل كمل مندمجين وباقي وقت على نهاية
المحاضرة ، اوكيه بكمل


الحين بندخل في موضوع ثانـي وهو بدايات المسـرح واختلفوا الناس بعد في هالموضوع وظهرت
نظريتين الأولى تقول بإن البدايات ظهرت في الطقوس اللي كانت تحتفل بإنتصار
قوة الحياة على الموت يعني لأنهم عايشيـن
وماماتوا يحتلفون على
أساس إنهم منتصريـن للحين اما النظرية الثانيـة فـ تقول ان النشـأة كانت من خلال الطقـوس اللي
يكرم فيها الموتى لينال الأحياء الأبدية وطبعا مانقدر نجزم ما إذا كانت إحدى
النظريتين صحيحه والثانية لأ ، وبعض المؤرخين
يأكدون ان الدراما كانت موجوده
في مصر في الفترة مابين سنة 4000 إلى سنة 3000 قبل الميلاد واللي أوحى بالشي هذا الرسوم
الفرعونية اللي جرى تفسيرها على إنها تمثل الكهنة وهم يرتدون أقنعة على شكل
حيوانات ويقدمون عروض بالاهرامات وهناك اتفاق على
أن قصة (ابيدوس) مثلت فعلا في
مصر وهي تروي قصة مقتل (اوزوريس) وبتر وتشتيت أعضاء جسمه ولكن للحين ماحصلوا نص
المسرحية وهذا اللي يخلينا نرجح ان بدايات المسرح كانت يونانية وان اللي
صار في مصر ماهو إلا بدايات صغيرة وماخذت
الشكل الفني التكنيكي

هني تكون محاضرتنا اليوم إنتهت وأتمنى تكون المعلومات خفيفه عليكم واللي عنده أي
سؤال أو إستفسار يتفضل وقبل ماأنسى من المحاضرة اليايه أبى كل واحد
يكون عنده كتابه لأني أشوف وايدين لا دفتر ولا كتاب
ولا قلم يعني ولا جنهم طلبة
جامعيين


أشوفكم المحاضرة اليايه
مع السلامه

الاســـطـــوري
أخوكم

[بنت الدلع]

استاذ الاسطوري ممكن اتكلم ؟

اكيد ممكن ^^

جيز كيك :
الحبكه هو المكان الي تتأزم فيه الامور
وهو شي اساسي في تغيير احداث القصه
والقصه بدون حبكه مابيمشي حالها ابدا

[بنت الدلع]

المغنين العنزيين

ههههههههههههههههههه
حلوه هذي

يعطيك العافيه استاذ على الشرح الوافر
بس المشكله وااااااااايد اظيع في المثلثات مالك ^_^

[الدلووووعة]

شكرا استاذ عالشرح
باجر برد اراجع على الدرس مره ثانيه ^_^

يله بنات نشو بنسير عدنا بريك ^_^

[الجديدة]

ما شاء الله عليك يا الاسطوري
محاضرات جدا نافعة لاني معظم هالكلمات اعرفها بس ما اعرف اصلها
راح اكون معاك في الكلاس نستفيد منه
خاصة انه فيه اشياء مفيدة جدا

بانتظار بقية المحاضرات
الله يعطيك العافية على هذا الجهد

[الاسطوري]

هــــــــــلا ..

"بوميثه"

حيا الله الطالب المستجد ، مابغيت تسجل عندي ماده وييت والله يابك وياك الموت ياتارك الصلاة لا
سوالف وياك أنا مافرق بين حد وحد والقردنه ماتفيد وياي كل واحد
ومستواه اللي بيحدد درجته مب سوالفه
واسلوبه أو غيره
وعن هالمحاضرة تراها خفيفه تتسلى فيها عقب الدوام مايبالها وايد والبروجكت في النهاية بيكون
سهل ان شاء الله بس انت حاول تلتزم بالحضور تراه اهم شي عندي عشان
مايفوتك الشرح (اللي مادري يقول في
مسآئل وانا مادري)


"بنت الدلع"

خذي راحتج وحلو انه يكون في تعاون بين الطلبه ويساعدون بعض عكس بعض الشطار اللي حتى
شرح كلمه يستخسرونها في ربعهم عشان محد اييب درجه مثلهم
او على منهم ولاتستعيلون
ان شاء الله في المحاضرات اليايه بتكون المعلومات احلى بس اهم شي الواحد يراجع اول بأول
عشان الماده ماتتراكم عليه وعن طريقة كتابتي تعودت
عليها شو اسوي


"الدلووووعة"

لا شكر على واجب وانا والمبنى والادارة وكل اللي يشتغلون موجودين هني عشانكم ولولاكم
ماكانا ولا بنكون وعاد لازم تقدرون قيمة الدراسه وتعطونها حقها وانا
لازم اشرح وافهم واعيد عشان يكون
راتبي حلال


"الجديدة"

إن شاء الله بشرح لكم أغلب الأشياء اللي تخص الدراما بس طبعا خطوة خطوة لأن الكمية بيتاخذ
وايد محاضرات وهالشي يتطلب متابعه دايما عشان ماتتراكم الكميه مثل ماذكرت
قبل واذا حسيتوا بإن في شي مافهمتوه خبروني وبشرحه
وبوضحه مره ثانيه وشاكر لج
تواجدج الطيب


الاســـطـــوري
أخوكم

[خيال الحب]

الطالب: خيال بن الحب

الرقم الجامعي: 2002000000

عاش دكتورنا الاسطوري ..

مشكور دكتور على هذي المحاضره

دكتورر كم رقمك عشان نتصلك >>> قردنت اهل العين


دكتور تامرنا على شي ماتبا شي من الكانتين

وبانتظار يديدك ^____^

[خيال الحب]

عيبتني المحاضره الثانــيه..

يعطيك العافيه دكتور

دكتور متى الكوز

[الاسطوري]

هــــــــــلا ..

"خيال بن الحب"

مادري أحس إنك دارس عندي قبل وحرمنـت ولا ؟ على العموم انا سجلت اسمك وبجيـك على الكشف
الاخير ولازم تكون مسجل عندي واذا الشعبة مغلقه برفع لك السقف وعن
الرقم تراني حاطنه فوق وماعليك امر هات لي
وياك جبن سليس وقوله
يحط دقوس وكابريسن منجا اذا تقدر اوني عاد ماتشـرط ويسعدني ان المحاضرة عيبتـك واتمنى تكمـل
ويانا وعن الكويز تراني بخبركم قبله بفترة وفي النهاية بوهقكم وبخلي كل واحد يختار
فيلم نكون شايفينه ويطلع منه كل الاشياء اللي بشرحها
عقب ولا ترا مابنجحكم


اللي يبى يحضر ترانا بناخذ ألوان الدراما
في المحاضرة اليايه


الاســـطـــوري
أخوكم

[خيال الحب]

يوم الاحد بناكل جبن سلايس وكابريسن برتقال >>>للاسف الشديد

ياحيك انته يا دكتور

لا دكتورر هذاك اخوي التوام كان عندك

وعن الافلام..هيي زين عشان نستفيد عدل من المحاضره..

ونحن بانتظار المحاضره اليديده ^__^

[تنينه]

دكتوووور دكتوووور انا عـندي سؤاال صغنوني ممـكن بس شوي خارج عن نطاق الدرامـا ممكن

[الاسطوري]

هــــــــــلا ..

"خيال الحب"

الله يعينك محد قالك تدخل هالتخصص جان ييت صوبنا وافتكيت من
الهم والغم وتصوير الاوراق والمذاكره
وحياك دوم

"تنينه"

حياج اختي آمري مايحتاي تاخذين اذن ترانا يالسين نسولف مب وقت
المحاضرة بس لاتدورين سؤال توهقيني فيه
تراني إعلامي صغيرون



الاســـطـــوري
أخوكم

[تنينه]

ههه لا دكتور سؤال ما يـخصه بالإعلام

هممم بـغيت اعرف دكـتوور كييف هـاجه تـظهر رمستـك على شكل هرم ولا مثلث مجلوب كيف جي اتسوو ؛؛ شي خاصيـه يعني ولا كييف مـن أول ما دشيت الواحـه وانا أبى أسألـك بس انسـى لول

[الملهم]

فهمت الدرس 70% ..
وان شاء الله باجر بعد بقرا الدرس وبفهمه مرة ثانيه ..
الدرس مشوق وجميل .. شرحك احسن عن اساتذة التاريخ المملين .. ^__^