شو رايكم في .. تركيا ؟؟

[وحي القلم]

السلام عليكم و رحمة الله و بركاته

(( ما عرفت وين أحط الموضوع.. :kcl: ))

بس بغيت أسألكم عن تركيا.. حد منكم سارلها في آخر سنتين ؟؟ :kkk:

لانه الى سمعته أنه وايد زادوا فيها الحراميه عقب حرب العراق

:no0:

فقلت بتأكد

..
و السموحه
وحي القلم

[شمعة أمل]

ماعرف عن الحراميه
بس
ابويه الحينه في الطياره راد من تركيا ^_^

تركيا وايد حلوه وأثريه .. لكن فيها مرض انفلونزا الطيور + زلازل < اجوف انه هالشيئين اخطر شي =s

[وحي القلم]

انفلونزا الطيور بعد !!

ما ادري ليش مصرين عليها :sadwalk:

..

[الشحية]

الصــــراحه تركيا وايد حلوه أنا سايرلتها السنه اللي طافت ..
وكل منــطقــه أحلى عن الثــانيه ..
وفي منــاطق محد يسيــرلها من الســياح بس وايد حلوه بالنسبه بــــــــــالي ..
( خاطري أســـيرها هاي الســنه * ) << أميـــه أتقولي عشـــاقه لول ..

بس مثـــل ما قالت شمعة أمل فيها انفلونزا الطيور ,, زلازل <<< زيغه الصراحه ..

والسموحــه منج ..

[وحي القلم]

الشحيه

شو المناطق الحلوه الى سرتيلهن في تركيا ..؟

و السموحه عالمغثه :kcl:

[شوق القلوب]

الســـلام عليـــكم..

يااا هلا والله بصـــديقتـــي .. :ice:

أنا بعد أبـــويه الحيــن في الطيــاره ساير تركيــا ..!!

عنده شغل طبعاً.. يعني مب سفرة سياحه..

..

كان خاطري اسير وياه.. لانه وااااايد يمدحونها ..

اسئلي حلمي الجميـــل.. هي سايرتلها.. و يمكن اتسيرلها السنه :bow:

اتواااعدوا هنااااااك

[تحفه]

زينه .. بس انا ماحبيتها .. في طبيعه و متاحف ( يعني حق سوالف الكبار )
اسواقها عاديه .. و مافيها ملاهي وايد ^^ عسب جي يوم سرتها ما حبيتها


بس احلى شي السياكل والخيول هناك

[حلم الطفوله]

السلام عليكم ورحمة الله وبركاته

إختيه وحي القلم ...تدرين ؟ إنتي ثالث شخص اليوم يسألني عن تركيا !:kkk:

تركيا كبلد سياحي رهيييييييييييييييييييييبه واااااااااااايد جنة الله بالأرض من خضارها

كافي انج تلعبين بالملاييين لعب ...لأنه عملتها بالمليون

وتركيا من قسمين تركيا الأوروبية وتركيا الآسيويه يفصل بينهم جسر كبير...

من فترة عشر سنين تقريبا كانت أكثر الأماكن السياحيه بس من خمس سنين وعقب الزلازل

والانفجارات صارت هالبلد جدا غاليه لأنه عملتها صارت اليورو والدولار ! والناس يخافون على

عمارهم لأنه الزلازل والتفجيرات ما تنضمن للحين بس الأعمار بيد الله وإلا شو رايج

كسياحه وآثار .... تركيا كلها أثريه والجوامع إلي فيها تستحق إنج تزورينها ...عدهم الجامع الأزرق والجامع ؟نسيت شو اسمه ...هذا بتشوفين فيه تفاصيل حياة الأتراك من جدور ولبس لين الدبابات .....وبعد بتشوفين قسم خاص فيه شعرة الرسول -صلى الله عليه وسلم-

كطبيعه تركيا تتكون من مجموعة جزر أنصحج اتزورينها أكيد ...طبعا الرحلة تكون إنج تركبين بسيارتج بالسفينه لمدة ساعه مثلا ....

المناظر فيهااااا رهيبه فلا تنسين الكاميرا

ومن هالجزر... جزيرة الأميرات .... طبعا بتركبين عربه يجرها حصان وبتشوفين بيوت الأميرات وقبورهم:bow:

جزيرة يلاوا .... فيها عيون الماي الحاره والشلالات ... وأسواقهم حلوه ورخيصه فاتشروا من هناك

جزيرة بورصه .... رهيييبه وخصوصا بالشتاء كلها ثلج ...وحتى بالصيف بارده وخصوصا بأعلى الجبل وحلاته بإنج من توصلين يعطونج مشاوي وتشوينها بروحج ...طعمها رهيييب
صح وفيها تلفريك ... يعني ما يستوي توصلين بورصه وما تركبين تلفريكهم
ومنطقة الشلالات بعد لا تنسين تسيرينها ....

منطقة بحيرة( أفنت) ...هاي بين اسطنبول وأنقره ...ساعتين بالسياره ...رهييييييييبه بمعنى الكلمه يعني مثل جبل حفيت تلفين بالسياره ساعه كامله وتنبهرين بالمناظر والمزارع وبالقمه بتشوفين البحيره
وبعد فيه عربة يجرها حصان بتعرفكم على المكان ....

باسطنبول ... أنصحج تسيرين منطقة المزارع والتركيين بيستضيفونكم فيها وما بيقصرون وياكم ...

وفيه مركزين أغلب العرب يزورونهم ...مترووو ...وأك مركز ... وعدهم كارفور بعد:unlock:

ولا تنسين تسيرين السوق المصري .... بعد ما تتجولين فيه وتتشرين ...وانتي طالعه بتشوفين محل للقهوه التركيه امجابل محل مواعين ....قهوته رهيبه اشتري من عدهم

الترفيه ...فيه حديقه مفتوحه للكبار وللصغار ...فيها مكان مخصص لركوب لخيول والعاب لليهال طبعا مب الكترونيه ومطاعم مفتوحه....بس الحديقه وسيعه ورهيبه

وفيه الحديقة الزجاجيه بأتاليا .... هاي كلها الكترونيه ووايد حلوه ....

بس الأتراك جافين بمعاملتهم فلازم يكون وياكم دليل سياحي يعرف عربي ....

وتحملوا من شناطكم ولا ادشون بالزحمه وااااايد .... واتحملوا من اليهال عن يضيعون ورحله سعيده

إن تذكرت شيء زياده بخبرج إن شاء الله ....

[لمّــاح]

مرحبا ..

حلم الطفوله ماخلت شي ماشاءالله :harhar1:

تركيا حلوه .. بس وايد حراميه فيها .. !!

حتى بيزاتهم لازم تتأكدين منها لأنهم ساعات يزيدون الاصفار الي في النوط :puppyeyes:

عموما هي حلوه و بورصه الشواب مطيحين فيها

[حلم الطفوله]

السلام عليكم

اخويه لمااااح راعي سدرة الصبار

شفت عاد حلم خبيره .... لو مب منقووود جان استويت مرشده سياحيه

بس تدري من سنتين قللوا الأصفار ! الحين عرفت السبب ! تزوير أونه ! صدق إنهم حراميه

خبرنا عن الأماكن إلي سرتها بتركيا يمكن نستفيد بعد يا لماح:smartass:

[الشحية]

أختي وحي القلـــــم .. >> أختي حلم الطفولــة ما قصرت ...
قالت اللي كنت بقوله ,, ووفت عني ..

لمّــاح : صدقت والله الحرااميـــه واايديين أهناكي ..


بوظبي ( أم خدود ) : شكلج ما شرقي ولا غربتي في تركــيا ..
فيها مراكــز ,, وفيها ملاهـــي وايـــــد ..
أغلبيت المناطق اللي سرتها فيها ملاهــــــــي و وعن الاسواق مكودة وايد عنهم ..
وأسوااقهــم وايد حلوة ..



السموحه منكم

[ذنـيـنـي]

نحن كنا نعسكر في "يلوا" يوم كنا صغار,
كنا نيلس هناك شهر و نص او شهرين

طبعا ما اذكر شي فيها لأننا كنا صغار و ما نسير غير الملاهي الصغيرة الي صوب البحر خخخخخ
كنا انسير و انرد على ابويه نطلب منه الحمرا "النوط الاحمر مالهم" بس لا تسألوني كم قيمة النوط الي اتكلم عنه
والله انها ايام حلوة,,

في خاطري اسيرلها مرة ثانية

[ولد الشحوح]

انا ساير تركيا اربع مراااااااااااااااااااااات
بلد ما عليها كلام خاصة للعوايل .....
نحن نعسكر شهر فبورصة من وجهة نظر عايلتنا انها احلى منطقة
يلوا حلوة بس مب مثل بورصة
بورصة هادية فيها حديقة فيها العااااااااااااب وفيها السوق المسقوف ومول تجاري عندكم يبل تطلعون عليه بالدرج ( رياضة ) والشلالات و التلفريك وااااااااايد أشياء حلوة وشعب بورصة ما في احسن منهم غير عن اسطنبول انا انصح فيها ودليل على ان تركيا بلد حلو جوفوا عدد الخليجيين اللي هنااااااااااااك .... خاصة عالمطاعم لووووووووووول نحن ما نحب الزحمة نطلع كل اليوم الساعة 11 فليل للحديقة عندنا مكان بروحنا بعيد عن الحشرة وفيه العاب لليهال ونيلس لين الساعة 2 فليل
نصيحة اللي وده يقوي علاقته مه أهله يسير هناك وطلعوا ويا بعض ويلسوا سولفوا وخذو راحتكم محد له خص فحد
هيه نسيت فبورصة عندكم شارع اسمه شارشمبا كل يوم اربعاء عندهم سوق خضار طازج والله روعة
ارد اقوووول مافي غير بورصة مافي غير بورصة لا مترجم ولا دليل والله عيش المغامرات هناك ... انا واخوي نطلع نتمشى لين ما نتعب وما نعرف شقايل نرد وندور ندور لين نرجع ....
اندمجت فالموضوع لوووووووولول
ا ل س م و ح ة

[وحي القلم]

أول بادي.. أشكر كل الى ردوا عليّه :)

اربيعتي شوق القلوب :ice:

مشكووره
و ما شا الله عليها حلم الطفوله
ردت قبل ما أسألها



بوظبي

مشكوره اختيه
المهم اتكون طبيعتها حلوه



حــلـــم الطـــفـــوله

مشكوووره و الله هذا الى كنت أبغيه
شجعتيني عالسيره
انزين بسألج.. جد سرتي طربزون ؟
شو رايج فيها إذا سرتي .. حلوه ؟
ايقولولي فيها شلالات أظني



لماح

مادري و الله..
أنا ربيعتي قالتلي أنه وايدين الحراميه فيها
بس بعد أظني أنه على حسب الأماكن الى اتسيرلهن
عشان جيه قلت بسأل أحسن
و حلم الطفوله ما قصرت :)



الشحيه

مشكوره اختيه و ما قصرتي



ذنيني

حتى أنا سرتلها
بس بعد نسيت كل شي..
مشكور اخويه



ولد الشحوح

مشكور اخويه
و ان شا الله بنسير بورصه



..

و السموحه
وحي القلم

[حلم الطفوله]

السلام عليكم

شو سالفتج إنتي وشوق ؟ هاي صديقتي وهاي ربيعتي:kkk: فضول العيايز اشتغل

المهم الأخت الصديقه وحي القلم

طرب زون؟ يمكن اعرف هالمكان بس ما أعرف اسمه بالضبط ؟

أتمنى أكون فدتج بالموضوع ....وننتظر انطباعاتج لما تردين ...والله يحفظج وين ما سرتي