أمانينــا ... وأحلامنا ..وين صارت

[الشوق]

الســــلام عليكم ورحمة الله وبركاتـــــه ....

غبت بعد غيبة طويله .. بس الصراحه ما اتوقعتها ... لكن في جعبتي الكثير والكثير .. المهم تبوني والا تبون الغنايم اللي يايبتنها لكم من مواضيع واطروحات ...
بس عن جد لكم وحشه ...
.
.
.
عدنــــــــــــا لصلب الموضوع ...
.
.
لما كنا اصغار .. واتحصلون الواحد يلعب مع عيال الفريج او اهله ... يحلم باشياء ورديه .. وساعات من خلال اللعبه اللي يلعبها اتحصله يحور الامنيه اللي في باله من يوم ما هو صغــير ...

يوم كنا نلعب لعبة المدرسة
اتحصلوني دايما كنت اخذ دور المعلمه ... كنت احب اناقش واحاضر واكتب بالطبشور على السبوره .. وغيري ياخذ المدير والا الطالب ...
.
.
.
ويوم نلعب لعبة المستشفى
ناخذ الادوات والا اتحصلون انا وبنات اختي او بنات اخواني اللي من نفس السن تقريبا ... منهم ما باخذ دور الدكتوره او الممرضه .. واحب اكتب على الروشته .. مال الدكتور خطوط صغيره لان كل ما اروح عند الدكتور اتحصلون خطه ما ينفهم محد يفهم خطوط الدكاتره الا الدكاتره نفسهم ...
.
.
.
ويوم نلعب لعبة العروس والعروسه
اتحصلون نخطب فلان لفلانه وعلان لعلانه ... وانحيرهم لبعض ...
.
.
يعني اتمر السنــــين ... ونكبر مع الايام ... وامنياتنا تتغيــــر ...
يعني ساعات اقول كان خاطري اكون كابتن واسووق طياره .. او مدرسه ادرس العيال ... او دكتورة .. او طبيبة اسنان .. او او او بس ما اتوقعت اني اكون في منصب ثاني غيـــر عن الامنيه اللي اتمنينها يوم اصغيره ..

.
.
نكبر وتكبر احلامنا ..
امنيــــات ما نعرف كيف تتغير .. قد تصيب وقد اتخيب ...
يا هل ترى يوم كنت اصغير .. شو كنتا اتحب اتكون
وشو كان هدفك في حياتك انك اتكون منوا .. واتصير شنوا؟؟
وشو اللي اتغير ....
هالزمن غيــــر من تحقيق حياتك
هل الحياه خلتك اتبدل الامنيه اللي كنت تتمناها ..
هل الناس اتدخلت في اتخاذ قرار كنت تبيه ..

هذا موضوعي لهاليوم ..
شاركوني ... وياكم ... وبمشاركاتكم .. راح اتحلون الموضوع ..
وخلوكم ويايه ولا اتخوزون


تحياتي/ الشــوق
.
.

[فرفوش]

مرحبا اختي شوق والواحات مشتاقه لشوق والشوق صاير كبير هههههه الصراحه الموضوع جميل

راجع لشوقي ولهفتي راجع لموضوعج شواقي

[بنت الدلع]

السلام عليكم

موضوعج يا شوق خلاني اسأل نفسي شو كنت اتمنى اكون وانا صغيره ؟!

بس تصدقين ما حصلت جواب

يمكن اني نسيت .. او يمكن احلامي كانت مبهمه
اياااام والله يوم اكبر همنا هو اللعب والفرح والوناسه

بس كان فيه تسجيل .. مسجلين صوتي يوم كان عمري اعتقد 6 سنين او اقل
يمكن 4 ماحيد والله يسئلوني شو تبين تكونين يوم تكبرين
وارد عليهم ابا اكون دكتوره
(بس للاسف ماعرف وين اختفى الشريط)

لسبب ما كل حد كان يتوقع اني بكون دكتوره
وعلى ايام المدرسه كنت البس كوت ابيض وامشي جدام بابا واقوله بستوي دكتوره فلانه باجر
كبرت واتخرجت من المدرسه .. و كنت في سنه ثانيه في الجامعه
الحريم يتصلون البيت ويوم ارد يقولون هاا ماشالله تدرسين طب صح ؟
وانا اقولهم: لااا !!

وهم لالا بنت الدلع انتي اصلا دكتوره شكلج دكتوره مايستوي ماتدرسين طب

وعن نفسي اول ما اتخرجت من الثانويه سرت وقدمت في كلية الطب بس سبحان الله .. الله ماكتب
والحين احمد ربي الف مره اني مادشيت طب

هل الحياه خلتك اتبدل الامنيه اللي كنت تتمناها ..
هل الناس اتدخلت في اتخاذ قرار كنت تبيه ..

الناس اللي حوالي لهم تأثير كبير على الشي اللي ابا اسويه
بس تأثيرهم ما يتعدى النصايح و تجربتهم في الحياه
يعني الحمدالله ما واجهت حد جبرني على تخصص معين
بس في تخصصات مانصحوني بها وقالوا ما بتفيدج في حياتج

على سبيل المثال وايد كنت حابه ادرس هندسه .. بس الجامعه الي دشيتها ماعندهم هالتخصص
ويوم كنت ابا ادرس في جامعات ثانيه الله ماكتب

شي ثاني .. كنت وايد حابه ادرس Art & Design
بس هالتخصص اغلبيتهم قالوا لي مستقبله مب مضمون ومن هالكلام

فآخر شي اتجهت لتخصص ابد ماكان على الحسبان و مول ما اتخيلت اني بدرس هالشي

يمكن البيئه المحيطه تأثر في قراراتنا
ويوم الواحد يبا يفكر ويخطط لمستقبله يفكر بمنظور ثاني
يعني عن نفسي يوم كنت في سنة 2006
فكرت باجر بعد 5 او 6 سنين يوم بتخرج شو الشي اللي بيكون مطلوب اكثر شي
وشو الشي الي بيحقق رغباتي وبكون مرتاحه فيه

هيك يعني

[الشوق]

هلا فرفووش .. هلا باخوي
تدري انتوا لكم وحشه بش شخصيتك القديمه احلى وارقى
ممكن اتخبرني عن سبب هالقناع
ع العموم حياك يااخوي .. في اي وقت في انتظار ردك بككل شوق من خويتك الشوق

تحياتي
.
.
دكتورتنا بنت الدلع
لمــا يرسم الانسان خط ... من يوم هو صغيـــر
يحاول ان يتماشى مع واقع افكاره واحلامه ..
لكن يوم ينظر احيانا على قولتج لخمس سنين قدام ..
ساعات اتحصلين الاحلام اللي اتمنيتيها او التوقعات ممكن ما اتصير من اساسه
لان يمكن اتكونين ربة منزل بدال الحلم اللي فكرتي فيه بعد خمس او سنين
يعني اتخيلي
اتخليتي عن حلمج علشان اتحققين ذاتج في شي ثاني وفي النهايه ما يستوي واتكوني مربية اجيال
.
.
.
تسلمين يالغاليه على التواجد الاكثر من رائع
ودمتى بحب

[بنت الدلع]

^ صح كلامج
تعرفين انا عن نفسي ان شاء الله اخلص دراستي الجامعيه قريب واتمنى اني اكمل واخذ الماستر
بس اذا من عقب الماستر مارمت اداوم عادي عندي ايلس في البيت واربي عيالي
بيتي اهم من كل شي ثاني
بس على الاقل اجرب طعم الشغل مال سنه سنتين بعدين ايلس في البيت
حلاته والله الواحد يرتاح ويدلع نفسه لول
بس اهم شي ما اييني الاحساس اني بطاليه وعديمة الفايده >.<

وانتي؟ كلمينا عنج يالشوق

[مزن هتان]

و عليكم السلام و رحمة الله و بركاته
نورتي يالغاليه

حلم حياتي مستحيل انساه او انه يروح عن بالي يعني صج
يصيبني حزن لما اتذكر اني انحرمت منه بسبب أشوفه صغير جدا
و من يوم أنا صغيره كله أكون المدرسه "المعلمه".

كبرت و كبر معاي حلمي و حبيت مادة التاريخ من دخلت أول إعدادي، كملت مرحلة الثانويه
و دخلت أدبي عشان هـ الماده. بس أمي عارضت الجامعه اللي قررت أكمل فيها و أنا مارضيت
بالبديل، لين يومي هذا احب امسك كتاب التاريخ و اشرح لـ خواتي.

و كانت عندي رغبه اني أحقق رغبة أبوي و أدخل إعلام
بس قالي لا تضغطين على نفسج لأنه عارف شخصيتي وايد و بسرعه أتوتر و أرتبك
"أبوي يتمنى وحده فينا تكون مذيعه أخبار"

أمي تدخلت و عارضت و أحس صج صج للحين اتحسس من الموضوع
لمن ينطرى "مثل لمن يسألوني مزن شو من شهايد عندج"

شكرا الشوق عـ الموضوع

[طفلة من هذا الزمان]

أعتقــد أن أمانينا تبدأ كبيــرة .. كبيــــــرة جــدا .. و تصغر يوما بعد يوم .. إلى أن تحين ساعة الإختيــار و القــرار ..

و نجد أنفسنــا نقف على مفتــرق الطــرق ..


أعتقــد كذلك أن أطفــال الأمس مختلفين تمــاما عن أطفــال اليــوم ،، في زمننــا كنا ننشد الوظـائف التي تمنحنــا رضــا الآخرين و المقام الإجتمــاعي .. أطفــال اليوم يسألون كم راتب الوظيفة الفــلانية (ولا يمكن بس أخويي- 12 سنة - المادي الوقــح )

طفلـة كذلك .. حلمت أن تكون طبيبة .. كانت لدي وجهـة نظر أردت ان أثبتهــا لأحداهن .. وعارض جدي الحبيب سفري للخارج .. توجهت للشريعة و القــانون - حلم مازلت أحن إليه أحيــانا - وفكرت بجدية أن أعيد البكالريوس - عقب قلت عن خفة العقل و استخـــارة كانت الفيصل في قراري و مساري الوظيفي اليـــوم ،،

أحيــانا أفكر ،، هل الاستخارة هي السبب أم الظروف .. أو أنني كنت جبــانة ووضعت اتخـاذ قرار بأهمية هذا القرار بيد غيري !!

أبـــدا لن نعرف .. سوى أنهــا أقـــدار ومكتوبــــة


عدتي و العــود أحمــد عزيزتي ،،

[الشوق]

دمعة العين ...
السبب في اختياري لهالموضوع ...
ام احيانا يوم كنا اصغار في السن اتذكر ... يوم كنا نلعب ...
كان كل واحد من الاهل الاولاد يختارون بنت خاله /خالته / عمه / او عمته .. انها راح اتكون له في المستقبل ..
بمعني كانوا دايما يقولون فلان لفلانه وعلان لعلانه ...
ويوم كبر فلان وفلانه ... اتحصلون القرارات الطفوليه اندثرت مع كبر سنهم ..وكل واحد اختار لعمره شريكة حياه اخرى ..
ونضحك على الذكريات هذي ..
.
.
.
أما اذا اتكلمت عن احلامي العمليه ..
من اسبوع تقريبا كانت عندي مقابله .. في احد الدوائر الحكوميه ..
فالموظف سالني : الشوق
شو وظيفتج قلته :اعلام ..
قالي اعلاميه وتشتغلين في البنك ...
شو انسوي .. حال الدنيا ... قدر الله وما شاء فعل ...
احب الاعلام والاعلانات واحب اكون متفاعله مع الجمهور .
.
.
.
عملي في البنك .. اكسبني كيف اتعامل مع العملاء ..
وكيف احل مشاكلهم ..وكيف اسوي كنترول بيني وبين الموظفين وبين العملاء.
.
.
بنت الدلع :) امنياتي ولت ..في المجال البنكي ..
بس تبون الصراحه ... خاطري احققها في يوم ...
.
.
يمكن مع الايام ليش لا ..
.
.
.
تحياتي / الشوق

[حلم الطفوله]

السلام عليكم

هل كيف ما شاركت بهالموضوع من قبل !!


حلوووم شو بتصيرين يوم بتكبرين ؟

دكتوره


وعقب كم سنه !! حلوووم شو بتستوين يوم بتكبرين ؟

دكتوره


ولما وصلت للثنويه انصعقت بالرفض التام للدكتوره حلم إلي حلمت فيها

الرفض كان من جميع الأبواب !! فكل الطرق صارت لا تؤدي إلى روما

يمكن هالرفض خلاني أعاند أكثر بمستواي الدراسي

ليش أدرس وحلمي ما بيتحقق !! ليش أدخل علمي وأتعب نفسي

عاندت بنفسي !!


لما وصلت الثنويه العامه قلت لنفسي ستوووووووووووب

بسج عناد يا بنت

تخرجت بنسبه حلوه !! وقلت لنفسي الحين بدخل تخصص أحبه

بعد اتفاجأت برفض تام لكل التخصصات إلي حطيتهن !!

بصراحه صابتني خيبة أمل كبيره ....الكل خذلني بهالفتره

واستويت معلمه مثل ما خططولي ... بس ما كنت متقبله هالشيء بتاتا

بس الحين أحب وظيفتي على الرغم من التعب إلي فيها

صح أحيانا تقبضني غبنه يوم أتذكر حلمي الجديم !! بس أقول الخيره فيما اختاره الله

وتقبضني غبنه أكبر يوم أشوف عيال إخواني دخلوا بتخصصات هم عارضوني فيها

بس بعد أقول الحمد لله على كل حال

وهيك يعني


أحلامنا حلوه حلوه ... بس الواقع ماله مثيل

[طير الحب]

السلام عليكم

أحلامي قيد التنفيذ...

يمكن في طفولتي كنت أحب دور المعلمة...وكبرت وتغير تفكيري انجبت أطفال ومارست دور الأم المعلمة معاها...يمكن بمرة سألتني زميلة دراسة يو أقعد أشرح لهم...وايد أسلوبج حلو في التدريس ما فكرتي تصيرين مدرسة عند المؤلات لكن أحب أني أطبقها على أعيالي فقط لأني أنا أحب الدرساة وما بيتوافق التدريس مع متابعتي لدراستي..


المهم أحلامي الحالية كثيرة وسأكتب بعضها....

اصدار كتاب يحمل كل ما دونته على مدى اكثر من 10 سنوات

فتح مشاريع متفرقة أتمنى أكون سيدة أعمال تدير مشاريعها من منزلها.

أكون سيدة مجتمع وأقدم خدمة لهالوطن...الطموح كبير لكن الأولوية لمنزلي وأطفالي(لأني أحلم بأسرة نوعا ما متوسطة العدد)...أحاول أبدأ أسوي خطط لخدمة المجتمع وأقدمها للأصحاب القرار...


التخرج بإمتياز...ادعولي صحتي ما عادت تساعد هالسمستر...خبصتها شوي بس في مجال أحافظ على مستواي

[طير الحب]

حلم الطفولة...لو أنا منج كنت برجع الحين وبحقق أحلامي...يمكن أشياء وايد وقفوا ضدي فيها...حقهم كنت أول بنت ...بس حاليا وبوقوف زوجي لجانبي أحاول أنبض غبار الحلم قدر ما أستطيع...


وسبحان الله يوم يرزقج ربج بصديقات ذهب يكونون سند في هالحياة...


من فترة قالي دكتور يدرسني يقول مثلا مرة نبا نقابل الدكتورة فلانه يطريني انا قلت له ان شاء الله قالي ماشيء بعيد على رب العالمين وحطيته هدف

كنت اتناقش ويا صديقاتي انه عقب هالشهاده بنحاول نكمل لحد الماستر على الاقل وهذا يحتاج ثلاث سنوات اضافيه قالولي مب يكون يكون عندج ماستر وراتبج فوق 50 الف ما تسوليني سالفه..قلت لهم منو انتوا ما اعرفكم...هههههههههههههه

حلو الواحد يحلم والاحلى انه يحقق احلامه وصدقيني ما بزعل لو ما تحقق حلم بزرعه في عيالي اذاربي عطاني عمر..


أحلموا...وانتصروا لأحلامكم....وما أجمل أن يضعوا في طريقنا حجرة عثرة ونقفز من فوقها...شكرا لكل الإحجار التي وضعت في طريقي...وشكرا لكل الورود التي كنت اجدها بعدما أقفز...أحبكم في الله

[دموع قلم]

وعليكم السلام ورحمة الله وبركاااااتــــه ,

مرحباااا بج شوااااقنا ,
طولتي الغيبة :D



هيه صدقج يوم كنا صغار أحلام , والحين أحلام ثاااانيــة !
اممم يوم كنت صغيرة كنت أحلم أستوي دكتورة ,
يمكن اللي حولي كانو يقولون لي هالشي ,
أو يمكن كنـت اتحرى عمري دحيحة في الدراسة !
وين المنصوري؟؟ وحليلة كان يتحراني صدق دحيحة
ويوم كنت صغيرة ماعرف شو اللي يناسبني أصلا ,

بس الحين خاااطري أكون كـل شي !
اتعلم كـــل شي وأسوي كل شي وأكون كل شي ^^

ولكـــن ,,
ليــس كل ما يتمناه المرء يدركه , فتجري الرياح بما لا تشتهي السفن

بس بعد أحــااااول كثر ماقدر اتعلم كل شي ,
أصلا يوم ننوع في التعليم ونعرف كل شي أحلا
بنت مثالية, زوجة مثالية, طالبة مثالية , سيدة أعمال مثالية , داعية إسلامي مثالية , أم مثالية ......... تغير جزء من العالم بشكل مثالي بعد يستوي
وعن التخصص ,الحمـــدلله الحين عرفت شو اللي يناسبني ويناسب شخصيتي واخترت تخصصي على هالأساس ^_^



تثلميييــن شواااقنا ,
عساج دووم بعافية :)

[الشوق]

لي عودة على نفس الصفحه