السلام عليكم ورحمة الله وبركاته
آنسه توتر
انسانه شاءت الأقدار والصدف الثجيله إلي يبالها ضرب ساعات ...إنها تجابلني بدوامي دوووم ...
يعني لزقة عنزروت ما تفج ؟؟ مهما حاولت ...نووووووو ويه ...وراي وراي ..ياربي حتى بالبريك وراي
هالآنسه توتر....دوووووووووووم متوتره وتوتر إلي ما يتوتر ......إلا تزيد من توتره
وازيدكم من الشعر بيت لو تبون
متشائمه لأبعد الحدود .... انسانه غريبه عجيبه ...تشوفينها تعتقدين إنها العقل كله
تكلمينها ...تزيدج اكتئاب وتوتر وتبتدين ساعتها تشكين بنسبة التشاؤم إلي زادتها بشخصيتج...
تقولي: خاطري أتفاءل مثلج ....اللهم لا حسد ...كنت بقولها دشي الواحات وبتتفائلين؟
تدرون ؟؟ قلتلها إياها بويها كم مره ؟؟ إنتي واااااااااايد متشائمه ..طبعا بأسلوب حلو وما يزعل
استانسي... حبي الحياة عشان تحبج ... ركزي بدوامج وانسي توترج إشويه ...بس لا حياة لمن تنادي؟؟
وأخيرا ...واليوم تحديدا ...نطق الحجر ...الحجر طبعا أنا ؟
المهم ...لقيت الحل بس ما بخبركم؟!
دريول باشا
صدق إنه باشا ...........ومن حقه يرفع راسه وخشمه وراتبه والعلاوات وبدل السكن ويمكن يكون له الحق بالقروض ومنح الإسكان ؟ الله يستر بس
لدريول باشا هو المسؤول الرسمي عن توصيل لعيال لمدارسهم وشيل شنطهم لباب الفصل تحديدا
وهو الراعي الرسمي والشخص المناسب لأخذهم لاماكن الألعاب في المولات ...بالتعاون مع الليدي ميري طبعا
هو المحتكر الرسمي لأسواق الخضره والسمج ويفاصل بالسعر بس الزياده كلها بجيبه
لدريول باشا ...طول لسانه على أربابه ... بس الحاجه بنت حرام ؟؟ بنصبر ...وين بنحصل دريول شراته يعرف البيت أكثر من أصحاب البيت...
وبعدين المثل يقول : اصبر على مينونك لا إييك أين مثله ؟؟ تدرون منطق غريب عجيب
صدق إنه باشا والاجر على الله
ثقافة على الدنيا السلام
انتقلنا من ثقافة العقول لثقافة العيون ؟؟
انتقلنا من شمس الأربعاء وانتظار ماجد وموزه ورشود وكسلان وزكيه وشملول ...
لموقع بلي ستيشن وآخر ألعاب دمار العصر ... بس تفق ونط ولف ودور...
وكل هذا وانته يالس بمكانك وبتجيم اللعبة بسرعه
ركز ركز ركز ....وأكيد بتلبس نظاره من كثر ما تركز ....لانه النظاره دليل على تميزك باللعبه؟
قصة آخر الليل ودروها .... لأنه سندريلا اعتزلت الفن وصاحبة الرداء الأحمر كلاها الذيب هي ويدتها والكل نساهم ...لأنه يقولون والله أعلم إنه حمارة القايله وهي لعبة بليه ستيشن اليديده ستكتسح الأسواق قريبا
الموضه الحين ... حط ام بي سي 3 الغير مشفره بس مدمره طشونه وانته والخير رباعه؟؟
رضاء اطفالكم ودمار أخلاقهم هدفنا ...اتصل الآن وانتظر .... لأنه كله بأجره...
ولا تخبرون أهلكم عشان ما ينازعونكم!ويمنعونكم من الاتصال فينا...
إليسا فاشن
لا تحتارين وادورين على آخر صرعات الموضه لسنة 2007...
تفضلي وزوري الجناح المصري والسوري بالقرية العالمية ...بتلقين فستان إليسا وجلابية نانسي وبيجامة روبي وزنوبة هيفاء....بس لا تشترين إلا بآخر يوم عشان تضمنين الخصومات النهائية
ولا تنسين تواكبين الفاشن الإماراتي بالعبايه والشيله الوطواطيه أقصد عباية الفراشه:alien
ترى الوارات محدوده والمتر بألف بس ببداية الاكتتاب عقب بينزل لخمسميه كحد أدنى...
حتى الأسهم رابعه ورانا هنا؟ قلبي ويا المساهمين شدو حيلكم ؟ ولا يهزكم نزول الأسهم ...
خلكم رياييل وما تهزكم ريح ..أقصد تسونامي الأسهم
إمارات بلا مواطن ؟؟
عموه : ليش ما أشوف مواطنين ببلادنا ؟؟ هالكلام قاله لي بالصيف
حلم: أغلبيتهم مسافرين ...صيف وتدري إنه الحريم والرياييل ما يصدقون يشردون من الحر
عموه : تدرين من الصبح وأنا أراقب السيايير وتمنيت مواطن يمر بسيارته...مستحيل
حلم : راقدين العصر ....تعبانين من الدوام والشغل ويريحون بالبيت ويا عيالهم ؟صدقوا عاد
عموه: كله سعوديين .... وين الإماراتيين .... شكلها لبلاد ما فيها غيرنا ...
حلم: ... بخاطرها طبعا ...نحن الوافدين ببلادنا...
قلتلك شغل ودوام وسفر وأسهم وعقارات مشغولين الله وياهم
عموه : يقولج عدد سكان الإمارات --مليون ؟؟
مكتوب بكتابنا لا تعاييني ( شافني أعاييه الظاهر)
وينهم ؟؟ كلهم مسافرين ؟؟
حلم : فديتك الغالي شو بلاك ماكل بعمرك ؟؟ يوم بتكبر اشتغل بالتعداد السكاني واتاكد روحك من عددنا
صدقني بيزيدون عقب أسهم اتصالات كل واحد بيحط أربع ...عشان الاتصالات تكرم ألف عين
تدرون ...شر البلية ما يضحك
مواقف شبه يوميه ...شخصيات تمر مرور الكرام ولكنها حتما تترك انطباعا بقلوبنا ...أحداث وقائع حتما استوقفتكم .... موضوع مفتوح ...حط كل إلي بخاطرك بس بلا تحديد وبلا تجريح ...
ونصيحه أخويه ....ابتعدوا عن آنسه توتر وربعها ...ما إيي من وراهم إلا مثل هالمواضيع المتوتره
ااا
رد مع اقتباس
مواقع النشر (المفضلة)