<font color='#000000'>السلام عليكم .....

فواقي: بنت حلوة وطيبة واايد بس اذا حرجت ههه لا يحوشك تدرس في جامعة زايد وعمرها 19 سنة
ريم: بنت حلوة بس مب أحلى من فواقي طيبة لكن حساسة واييد (اخت فواقي) وعمرها 17 سنة في ثاني ثانوي
شوق: اخت فواقي وريم الصغيرة وعمرها 9 سنين ...
بدر: اخوهم وعمره 22 سنة وهو يعتبر ريال البيت في غياب ابوهم المستمر..(بحكم شغله)
الام: طيبة وحبوبة ومتعلقة في عيالها بشدة .. وهي من الكويت ..
الوالد: سمعته طيبة في البلاد.. اماراتي الاصل بس دومه مسافر بحكم الشغل..

فواقي: ريموو يالله قومي مالنا خلق .. الحين امي تيي وتصارخ ..
ريم: ايه والله بس امي شقالت؟؟
فواقي: قالت بدلوا ملابسكم خلنا نطلع .. بنتغدى في بيت عمي..
ريم: اووهوو ماحب بنات عمي دمهم ثقيل حددده..
فواقي: ايه والله بس شنسوي هذيله اهلنا .. لازم هالمجالات.. ياني افتقدت بنات خالاتي الي بالكويت باقيلنا ثلاث شهور عالسفر..
ريم: اي لا تذكرني .. وورانا امتحانات ولوعة جبد .
وبعد خمس دقايق دشت الاخت شوووق كالعادة من دون لا ادق الباب..
شووق: يالله ريمو يالله فواقي امي معصبة اتقول ان ماطلعتوا ياويلكم ..
ريم وفواقي مع بعض: حبيبتي امي والله دوم على هالحالة ..
واتنش فواقي واتبدل ثيابها بسررعة .. واطالع المنظرة .. وتتغزل بعمرها واتغني " ما كنك الا الليل للعاشقين .. وما كنك الا الوصل ما بين الاغراب .. " ووقفت واتذكرت شي رسم البسمة على شفاتها ...
وتضحك ريموو عليها ..
وعقب ما خلضوا وغيروا ثيابهم .. ظهروا علطول....

في الدرب..

فواقي: ماما يعني لازم انروح بيت عمي؟؟
الام: طبعا .. استحي على ويهج .
ريم: افف خربوا علينا يوم الخميس..
الام: انتوا ليش جذي هذيل اهلكم؟؟
ريم : اهلنا والنعم .. بس بنات عمنا ما نحبهم ..ولا يحبونا ..
الام: ليش؟؟
فواقي: والله مادري بس حتى انا ماحبهم
الام ( تبتسم): ماعليه صبروا عليهم شوي تراهم ما خذوا عليكم عدل من عقب ذيج القطاعة
فواقي ( وهي مب مفتنعة): يمكن ..
وتشغل فواقي عيضة ( يا ناعم الصوت) واتذكرت ربيعتها مريوم وابتسمت بسمة بينت اسنانها الحلوة المصطفة بترتيب..

في بيت العم ...

عليا بنت عمهم الكبيرة عمرها 23 ومب متزوجة ..
فاطمة عمرها 21 وهي بعد مب معرسة ..
وامهم من السعودية لكن ابوهم من الامارات ..
استقبلتهم حرمة عمهم بابتسامة ولا اوسع .. ودخلت فواقي كالعادة لابسة احلى لبس ولفتت نظر الي يالسين في الصالة.. وعقب دشت ريم وهي مبتسمة (الله عالزيف) ووراهم شووق والوالدة ..
حرمة العم: هلا والله وغلا بفواقي هلا بالطش والرش..
فواقي: هلا خالتي شحااالج؟
حرمة العم: بخير حبيبتي وانتي؟؟
فواقي: الحمدلله تمام
وصدت حرمة العم صووب ريم ..
حرمة العم: هلا ريم .. شحالج؟
ريم: بخير..

كلن استغرب من تصرفات مرت العم تجاه فواقي.. كانت اتهلي بها وترحب بها من الخاطر..
ومحد يعرف السبب الا فواقي ..
يلسوا عالغدا كلهم بنات العم وبنات عمتهم .. ضحك وسوالف..
وعقب الغدا.. سارت فواقي الحجرة عند بنات عمها ولحقتها اختها ريم..
فواقي: هلا ببنت العم .. قوليلنا شو اليديد وشو القديم ؟
ردت عليا: ماشي يديد ولا قديم ..
ومن عقبها خيم صمت قصير..
وقطعت هالصمت ريم وقالت: فطووم شو رايج نفتح الكمبيوتر وساعديني ابي اسوي لي توقيع..
فاطمة: جربي افتحيه بس ماظني يشتغل..
ريم اتضايجت من الوضع..وقالت: اوكي عن اذنكم بسير تحت عند امي والحريم..
فطوم وعلياء : اذنج معاج ..
اما فواقي فاكتفت بالصمت .. وكان ودها اتسير مع اختها .. بس قالت في نفسها"انا لازم اغيرهم لازم نستوي ربع"
وماقدرت تكسر الصمت.. وبدت اتغني.. " اضحك معي ياعذب الانفاس وامر على قلبي وتدلل بالحب كون انسان حساس من دون لا تشره وتزعل"
واخيرا قالت فطووم عقب صمت طويل ماعرفت فواقي اتحدد مدته: صووتج حلو ماشاء الله ..
فرحت فواقي وقالت: مشكورة ..
قالت فطووم : ههههه العفو بس لا اتصدقين عمرج ..
فواقي قالت وهي تمزح: وليش انا شو ناقصني؟؟
ماردت عليها فطووم وظل سؤال فواقي معلق... وفواقي ماهتمت ولابغت اتعرف الجواب..

واتمنت فواقي في هاللحظة انها تلحق اختها ريم .. لكن ما نزلت لألف سبب...

********</font>