أحبك حب مايموت

**عين الدماني** · 09-06-03 ||, 05:12 PM

الحلقه الأولى..

الجو كان شديد الحرارة ..والريح عاصفه وحاره ومغبره ..في موجة جويه عاصفه مرت بها البلاد لاول مره منذ ست سنوات..وبعد هالعاصفه اللي خربت البيوت الصغيره واقتلعت الاشجار ..واجتثت اعمدة الانوار من الشارع..هطل المطر اخيراً وارتوت بوظبي بكبرها بأمطار الرحمه في امطار لم تشهدها الدوله منذ امد طويل..
في هذه الاثناء لم يشغل ظبيه أي شي عند دراستها..وتمت قاعده في حجرتها ما هزها منظر الجو وما حبت تضيع أي لحظه على نفسها من دراستها..وكل شوي تدخل عليها امها عشان تغير جو وتنزل مع اهلها عشان تشوف المطر كيف بلل الدنيا بعد جفاف دام سنين طويله...
ام سيف: ظبيه يا بنتي انزلي وشوفي الدنيا شوفي الرحمه ..يا بنتي الناس مب مصدقه وتدعي ربها..
ظبيه دون ما ترفع راسها عن الكتب والاوراق اللي في ايدها وكأنها بتاكلها اكل..
ظبيه: اسفه يمه عندي اشياء اهم..باجر ما بيقول لي الدكتور كيف كان شكل المطر ..ولا بيسألني عن فرحة الناس ..خليني هني احسن..
ام سيف: يا بنتي ارحمي حالج والله ما يرزا هاللي تسوينه بحياتج..عيشي مثل الناس..
ظبيه: امايه فديتج عندي شغل وايد..يعلني ما خلى مب متفيجه للمطر ..ادعيلي بالتوفيق..
وقبل ما تطلع ام سيف..
ام سيف: الله يسهل عليج يا غناتي ويوفقج للي فيه الخير..ويعوضج بدل هالتعب براحه العمر كله..
وطلعت ام سيف وبقيت ظبيه بالحجره..
كان البيت الصغير اللي مكون من سبع حجر..لناس على قد حالهم مكتفين باللي الله عطاهم...غرفة ابو سيف وام سيف..وثلاث غرف نوم ثانيه لاخوان ظبيه وهم سيف وعيسى و احمد..وغرفة ظبيه وميلس الحريم وميلس الرياييل..
سيف اكبر واحد وعمره خمسه وعشرين سنه مب متزوج مخلص دراسه من جامعة الامارات..وعيسى عمره ثلاثه وعشرين مخلص دراسه في التقنيه.. وعقبه ظبيه وهي في جامعة زايد..عمرها واحد وعشرين باقي لها سنه ونص وتتخرج..واخر العنقود احمد بعده يدرس في مدرسة خليفه بن زايد العسكريه الجويه في العين..وعمره سبعة عشر سنه..وما يزورهم الا يوم الاربعاء والخميس ويوم الجمعه يرد العين...وهاي ثالث سنه له في المدرسه الجويه..وعقبها بيتخرج..
.............
المطر بعده ينزل وما وقف وابو سيف يالس يطالع من دريشة الميلس وينادي على ام سيف..
ابو سيف: يا ام سيف اختربت زراعتي عاث فيها المطر ..وغرقن الشتيلات اللي توني زراعنهن...
ام سيف تبى تسوي عمرها فاهمه وهي تمثل الانصدام: بسم الله يا بو سيف شاللي استوى بك ...
ابو سيف: سيري يا حرمه انتي ما تفهمين شي...
سيف يضحك: اها ابويه وحليلك ليكون بس خرب اللي سويته..؟؟
ابو سيف: هيه والله يا ولدي تعبي وشقايه ضاع هدر ..
ويصرخ ابو سيف فجأه..
ابو سيف: سيف سيف الحق شوف النخل طاحن ..
ام سيف مره ثانيه: أي نخل يا بوسيف.؟؟
سيف : امايه سكتي لا يفلعنا ابويه الحين...
وطلع عيسى من حجرته...
عيسى: بحياتي كلها ما شفت مثلكم عنبو اللي يشوف يقول اول مره تشوفون مطر..ياخي استهدوا بالله..
ام سيف تبي تسوي عمرها تعرف شي: ما تدري شو صار فينا يا ولدي يقول ابوك ان البرق حرق الزرع..
يفتح سيف عيونه وعيسى تم ساكت ..وابو سيف بعده يطالع الجامه ويضرب كف بكف..
انفجر سيف ضحك...وعيسى تم يطالعه واخر شي الاثنين ما قدروا يمسكون عمارهم ونقعوا ضحك..
عيسى: امايه ما شاء الله الصواريخ ببلاش تنقعينهن...
سيف مب قادر يرد على عيسى وناقع ضحك...
سيف: بطني والله ما روم ههههههههه...
ام سيف: على شوه تضحكون يالمفلع انا شاللي قلته غلط..انا بس قلت اللي ابوك قاله..
............
هدت الريح شوي وخف المطر..ودخلت ام سيف المطبخ تسوي العشا..وعقب دشت عليها ظبيه تساعدها..طبعاً حالتهم الماديه ما كانت تساعد انهم ييبون خدامه..وكل شي كان على راس ظبيه وامها من تنظيف البيت وغسيل الصحون وترتيب كل شي..وكانت ظبيه على الرغم من كل هذا ما تتأخر ابد في دراستها وعمرها ما كانت الا من المتفوقات..على الرغم من الظروف الصعبه اللي تمر فيها...
المهم حطوا العشا ويلسوا يتعشون جبن وزيتون...على الارض..في صالة البيت اللي كان شوي سقفها ويطيح عليهم من كثر ما هو متشقق ومتصدع من المطر والهوا..
عيسى: يعني ما شي اكل الا هذا..كل يوم جبن وزيتون ..عنبو لاعت جبدي والله..
سيف: احمد ربك يا عيسووه وقل الحمد لله غيرك يتمنى اللقمه تطيح ببطنه مره بالاسبوع..
عيسى: الحمدلله انا شبعت..
ام سيف: ما تعشيت يمه وين ساير.؟؟
ظبيه: اللي مب عايبنه اكلنا يدور له على بيت ثاني..
وطلع عيسى مع ان المطر ما وقف بس بعد اخف شوي..
طلعت ظبيه حجرتها وتمت تكمل فايلها وترتب اوراقها..ودخل عليها سيف..
سيف: اكيد مشغوله..
ظبيه مبتسمه: لاء بس الحين بخلص يالسه ارتب الفايل..
سيف: وعقب شو بتسوين.؟؟
ظبيه: مادري والله ما عندي أي فكره..
سيف:شو رايج نسير نشوف شي بالتلفزيون..
ظبيه: ما حب التلفزيون..ما شي يعجبني فيه..
ويدخل عيسى...متضيج..
عيسى: افف والله لين متى بنتم عايشين على هالحال..
سيف: شو فيك..؟؟
عيسى: التلفزيون مب طايع يشتغل ..جنه الريح جلعت الدش من مكانه..
سيف: يا ربي شو هالحاله..؟؟
ظبيه:عادي تحملوا مكتوب لنا هالعيشه...
وطلعوا من عند ظبيه وخلصت اوراقها ورقدت...
.............
في الجهه الثانيه كان بيت خادم اخو ابو سيف..بخير ولله الحمد وما صار به شي..لانهم كانوا ساكنين في منطقه مثل العالم والناس ..وبيوتهم مب شعبيه جديمه مثل بيت ابو سيف..كان في البيت ام مايد يالسه مع بنتها مريم ..في صالة البيت الكبير ...
مريم: وحليلهم بيت عمي اكيد طاح البيت فوقهم..
اما مايد:مب منهم من عمج الزطي..اللي بيموت عالفلس..
مايد بعصبيه: انتوا شفيكم بتموتون حش في الناس..
ام مايد: ما قلنا شي جذب..
مريم: امايه مب حب في عمي ولا في بيته..كل هاه عشان حبيبة القلب ظبيوه..
مايد: هيه حبيبة القلب ..حد عنده مانع..
ام مايد: امحق حبيبه..يا شين ما حبيت يا مايد..
وطلع مايد معصب من عند امه ومنقهر من طريقة كلامها عن بنت عمه وحبيبة القلب اللي بيموت عليها...
...............

**المزيوونه** · 09-06-03 ||, 05:40 PM

يحيك الا الحلقه الاولى حاط ... واصلين الحلقه 20 الناس <img src="http://oasis.bindubai.com/emoticons/tounge.gif" border="0" valign="absmiddle" alt=':p'>

**عين الدماني** · 09-06-03 ||, 05:50 PM

السلام عليكم ....

قصه روعه من تأليف "شوق أبوظبي" ((نفس كاتبة قصة شما و أنا)) حبيت انكم تقرونها وتقولون رايكم فيها <img src="http://oasis.bindubai.com/emoticons/smile.gif" border="0" valign="absmiddle" alt=':)'>

**عين الدماني** · 09-06-03 ||, 07:23 PM

الحلقه الثانية..
اليوم الثاني في الصبح قامت ظبيه وتلبست ثيابها وعباتها المصكره..وتحجبت وتغشت عقب..وتمت تتريا الباص برا عسب يوصلها الجامعه..ويوم وصل الباص ركبت ويلست تسولف ويا ربيعاتها اللي من نفس منطقتها واللي معها من 13 سنه من اول ما درست في المدارس لين ما وصلت الجامعه...
وخمسة عشر دقيقه وهم واصلين باب الجامعه..
بدت الكلاسات وظبيه اول وحده في الكلاس ولا همسه ولا نفس تسمع وكأن محد في المحاضره الا هي..وعقب ما يخلص كلاسها تتم يالسه على كمبيوترها تتعلم على برامج الكمبيوتر وما تحتك وايد مع البنات..وما عندها غير ربيعتين وايد قراب لقلبها وهم ريم ودانه.. مع ان الكل يحاول يتقرب منها لطيبتها وحسن اخلاقها واسلوبها الراقي في التعامل مع البنات..طبعاً الكمبيوتر ما كان ملكها الشخصي..بس بالايجار يعني اول ما تتخرج لازم ترده للجامعه..لان ظروف ابوها صعبه وايد وما تسمح له يشتري لها الجهاز وهو غالي طبعاً..عليها هي واهلها..
وفي الكلاس اللي هي يالسه فيه دشن عليها بعض البنات اللي تعرفهن..
احلام: ظبيه يالله قومي بنسير نتريق..
ظبيه : لا مالي نفس..
امل: ليش مالج نفس..تريقتي في البيت..؟؟
ظبيه: هيه..
وهي والله لا تريقت في البيت ولا شي بس كلام...ما تبي تروح وياهم..
احلام مبتسمه: خلاص ظبيوه انا بسير اتريق وعقب ابيج تفهميني شي مب فاهمتنه...عادي ما عندج شي؟؟
ظبيه: افا عليج تامرين امر..
احلام: ما يامر عليج عدو يالغاليه..
امل : وين ريم ودانه عنج..؟؟
ظبيه: ما ادري بهن عليهن كلاسات...
مر الوقت وحضرت ظبيه كل الكلاسات..وفهمت ربيعتها كل شي..وصلت الساعه خمس وروحت البيت..واول ما وصلت البيت..لقت امها يالسه في حوش البيت مع ابوها..وسلمت عليهم..
ابو سيف معصب وويهه معتفس : ظبيوه يالنحيسه ما شفتي شو استوى..
ظبيه مستغربه: بسم الله يا بويه شو مستوي ..؟؟
ام سيف: سقف حجرتج طاح على الغرفه باللي فيها..
ظبيه مندهشه: بسم الله يمه شوتقولين..؟؟
وتعق الشنطه باللي فيها وتركض صوب حجرتها...اللي بس يمكن توسع شبريتها والكبت..مثل ال store..وقبل توصل فتحت الباب ولقت الحجره مدفونه تحت سقف البيت..ويلست على ركبها..
ظبيه: يا ربي شو اسوي ..؟؟ اوراقي وكتبي ودفاتري...شو اسوي بدنياي..
ابو سيف: هاللي تحاتينه ..؟؟ اما الثياب والذهب ما فكرتي فيه..
ظبيه مستنكره: هذا يا بويه مال فاني ماله اساس..بس علمي وينه من بيعوضني اياه..؟؟ وبعدين شو هالذهب اللي ترمس عنه..؟؟ من متى انا عندي ذهب..؟؟
ابو سيف: فقدت هالويه يا ربي..
وتدخل ام سيف:هاه يا بنتي شو اللي لقيتيه..؟؟
ظبيه: امايه لا تزيديني...عندي بروجكت انا يالسه اشتغل عليه نص شهر ..والحين ما ادري بلاقي بقاياه ولا لاء..
ام سيف: مالنا ذنب يا بنتي ..الله يهدي الحكومه..
وتركت ام سيف ظبيه تتحسر على شغلها وتعبها...
ظبيه وهي شوي وتصيح.." اشمعنى حجرتي انا ليش انا بالذات..؟؟ليش مب حجرة احمدوه اللي مافيها شي...اه يا ربي شو سويت عسب يكون حظي نحيس..."
............
بعد اسبوع من الخراب في المنطقه اللي تسكن فيها ظبيه واللي استوى في البيوت..بدت الناس تعدل في بيوتها..وتحاول ترمم اللي تهدم ..وتحط خشبه على خشبه وتعدل سقف البيت ..وترد الباب المكسور ..وتعدل سور البيت الخشبي اللي تهشم..
كان عيسى راد من عند الشباب..بسرعه للبيت يربع..ويشوف ابوه يالس في الزراعه يعدل ويرد كل شي مكانه ويسقي..وهو لابس قميص ووزار وواقف برا..
عيسى: ابويه ابويه وينك..؟؟
ابو سيف: هاه شعندك ويعاه ليش تصارخ...؟؟
عيسى: ابويه يقولون الشيخ زايد الله يطول بعمره امر بتوزيع مساكن شعبيه للمتضررين وكل اللي بيوتهم خرابه شراتنا...
ابو سيف : انت شو تقول..؟؟ من صدجك تتكلم..؟؟
عيسى: هيه والله ابويه يقولون اليوم مكتوب في الجرايد...
ابو سيف: خل عنك الجرايد ما تييب الصدق ابداً
عيسى: ابويه بسير اشتري الجريده بأكد لك السالفه..
ابو سيف: أي جريده واي خرابيط ..حق شو تدفع روبيتين عسب اوراق ..يا بوك شف لك أي واحد عاق الجريده عدال بيته واقراها من عند حد من ربعك..
عيسى: حشى عليه..عنبو يا بويه شو هالقحط..؟؟
ويسير عيسى بسرعه داخل ويغير كندورته المتعفسه ويلبس كندوره مب انظف عنها وايد...ويطلع..
ابو سيف: وين ساير يا عيسووه..وين متلبس شو تتحرى الصابون ببلاش...كل شوي وانت مبدل كندوره من وين بنغسل لك...
وينصرف عيسى مطنش ..هذربة ابوه الزطي اللي بيموت على الدرهم...
................

**عين الدماني** · 09-06-03 ||, 08:58 PM

الحلقه الثالثة..

مرت ثلاث ايام ويت البلديه تسوي فحص للمنطقه وتشوف الاضرار والبيوت..وحطت الارقام على البيوت..عسب تبدا الاجراءات وتسوي اللازم...وطلع الخبر صدق..ووقف ابو سيف الزطي الشغل في تعديل بيته..وما عاد صار يشتري أي شي ..وكلما قالت له ام سيف هات وهات قال.." الله يطول عمر بو خليفه بيعطينا بيوت يديده"..
وظبيه بصوب والعالم كله بصوب..مشغوله بكل شي وعادت البروجكت المطلوب منها باقصى سرعه..وانشغلت عن سالفة البيت اليديد اللي بيعطونه لهم..وكل همها في دراستها..
وفي البيت طلعت من حجرتها...
ظبيه: ابويه ..
ابو سيف: هاه..
ظبيه: راعي الباص يبي فلوسه ..
ابو سيف وكن حيه لدغته: أي فلوس..؟؟
ظبيه: الحين استوى لك اربع سنين تدفع وتقولي أي فلوس..اكيد يبي فلوسه ..
ابو سيف: زين زين عقب مب الحين..
ظبيه: انا اخر وحده بدفع دايماً كالعاده..ممكن هالمره في الوقت..؟؟
ابو سيف : اقولج زين مب وقته خليني اشوف التلفزيون...
وسارت ظبيه عند امها وما لقتها...وعرفت انها اكيد سارت تسلم على حد من الجيران...
.....................
بعد يومين وصل الخبر لكل الفريج وعرفوا ان البيوت بدت تتوزع وكل حد يسير يشوف اسمه وين حطوه من البلديه...وسار بو سيف هناك وعرف انهم طيروه اخر الدنيا وعطوه بيت في الرحبه...المهم الريال انهبل وما صدق خبر وقالوا له يي عقب يومين ويوقع استلام البيت والتنازل عن البيت الجديم واستلام المفاتيح..ومرت ايام واستلم ابو سيف مفاتيح البيت اليديد..
ام سيف: الحمد لله رب العالمين الله يطول بعمر بو خليفه ما قصر ما خلى شي ما سواه..
ابو سيف: هيه والله الله يطول بعمره ويخليه لنا يا رب..
عيسى: بس وايد بعيد المكان ابويه..
سيف: هيه والله صدج وانا ما ابي افارج جو بوظبي متعود عليها..
ابو سيف: لا لا احسن هناك عسب ما تأذوني كل شي وتبون السوق...
ام سيف مستغربه: جييه ما شي سوق هناك..
ابو سيف: لا لا في سوق تطمني احلى سوق في كل شي زين..
عيسى: ههااااي مال قوم بو عبود اميه مال الشغالات...
سيف: متفيجين والله...وين ظبيه..
ابو سيف : بحجرتها...
ام سيف: يالله يا بو سيف بنسير نتشرى اغراض للبيت اليديد..
ابو سيف انجلب ويهه: شو اغراض انتي ..وهاللي بهالبيت وين نوديه عنبو ..انتي بس تبين تخسريني..
ام سيف: هالسامان اللي في هالبيت بس خرابه شو تبيني اسوي به..
ابو سيف: الحين وبعدج ما استلمتي البيت تقولين خرابه عيل لو سكنتي فيه اخافج ما تعطينها ويه ولا ترمسينا مول..
عيسى: ابويه هدي اعصابك ليش معصب...
وتموا سوالف لين مااذن المغرب عقب كل واحد سار يصلي...
................................
ويوم الخميس ابو سيف يالس يحط الاغراض والاكياس في الموتر ..والناس واقفين حذا البيت عسب يودعونهم لانهم خلاص اخر يوم لهم في هالبيت...وظبيه يالسه تناول احمد وعيسى شنطهم الصغيره..وهم يالسين يعدلون..وصل مايد وكل الشوق بعيونه...
مايد: افا يا عمي وين رايحين..جي تخلونا وتسيرون بليا سلام ولا كلام..
ابو سيف: والله يا مايد بيتنا مب غريب انته تدله..يوم تبي تسلم تعال في أي وقت..ولا الوالده بعدها ما تخليكم..؟؟
مايد وهو مستحي: شو هالرمسه يا عمي افا عليك بس..انت عالعين والراس...ومالنا غنى عنك..
سيف: مايد تعال داخل ...
ودخل مايد وتم يساعدهم..وهو يالس يشل وويب اغراض من داخل..كان يتلفت يمين ويسار يبي يشوف ظبية قلبه..وغزال حياته..
وطلعت ظبيه وما تدري ان مايد هني..وشافها وشافته..و اول ما تلاقت عيونهم ببعض صدت عنه ظبيه..وناداها..
مايد: السلام عليج يا ظبيه..
ظبيه: وعليك السلام..
مايد: شحالج يالغاليه...؟؟
ظبيه: اللي تشوفه..ما شاء الله تنزلت تيي تزورنا..
مايد: افا عليج يا ظبيه شو هالرمسه اللي تقولينها..وبعدين لو يرتفع راسي على العالم كله..انا كلي والله لج ..
ظبيه وهي تكلمه بكل غرور: لا بويه مافي داعي لكل هالمجاملات..
مايد: الله يسامحج يا ظبيه والله دنياي كلها ولا تيي شي بدونج...بس مع الايام بتعرفين ان مايد صدج يحبج من كل قلبه..
ودخل عيسى..
عيسى: مايد وينك عنبو ساعه لين ما توصل..
مايد وهو منحرج: سوري والله بس لهيت اسلم على ظبيه..
عيسى مبتسم: مادام السالفه فيها ظبيه ..عليك السلام مب شايفين منك خير..
وتموا يساعدون بعض لين ما ركبوا كلهم السياره..
الكل كان يعرف ان مايد يموت في تراب ظبيه..والكل يعرف انه مستعد يبيع الكون باللي فيه عشان رضاها..بس شي واحد كان الكل يجهله ..ويستغرب منه ..الا وهو صد ظبيه عنه وليش نفسها عايفتنه ..مع انها تقدم لها اكثر من ثلاث مرات بدون ما يمل..حتى اخوان ظبيه ياما اقنعوها بس ما رضت وتمت معانده ومصره على انها ما تاخذ هالشخص لو شو ماصار..والسبب مجهول..
...............

**عين الدماني** · 09-06-03 ||, 08:59 PM

الحلقه الرابعة..

مرت اخر شهور الجامعه وظبيه يالسه تتجهز للاجازه والفكه من الدوام الصدعه..وعقب ما خلص الدوام في الجامعه وبدت الاجازه..وكلهم في البيت على اعصابهم كل يوم والثاني سايرين وضاربين درب للرحبه عسب ينظفون ويعدلون..واخر شي ام سيف ما قدرت تتحمل ..
ام سيف بعصبيه: شو هاه يا بوسيف انت تبي تموتني انا حرمه كبيره ما روم للشغل وكسرة الظهر..عنبو ما تحس انت...؟؟
ابو سيف: ليكون ان شاء الله تبيني اخم ولا امسح الارض..؟؟
ام سيف: خل عنك هالسوالف ..اناابي خدامه..؟؟
ابو سيف وجنه حد طعنه بسيف: خدامه؟؟!!! شو تقولين انتي ..حق شوه تبيني كل اخر شهر اعطيها 600 من كثر فلوسي..
ظبيه: مب لازم تييبون وحد اندنوسيه ولا فلبينيه..خلكم على وحده هنديه ولا سيلانيه...هذيل ما ياخذن غير 450..
ابو سيف: 450 .؟؟ حق شوه من كبر البيت ولا شو بيسون..؟؟ليش لا لا مب لازم...
ام سيف: عيل والله انا مب مسويه شي خلاص خاف ربك انهد حيلي..
ظبيه: ابويه ليكون تبي تييب شغاله تدفع لها خمسين درهم..
يدخل سيف وعيسى...
عيسى: يالله ابويه ابي الموتر..
ابو سيف: ليش ان شاء الله..
عيسى: بعد حق شو ؟؟ بنسير نييب احمد من عند موقف باصات الجويه ..
ابوسيف: وين هاه؟؟
سيف: في الشهامه..
ابوسيف: وليش ما يركب تاكسي ويي.لازم تخسروني بترول..
سيف: ابويه ييب المفتاح وفكنا...
كان ابو سيف بخيل لابعد الحدود ..يموت على الدرهم ويحس الدنيا ماتستاهل حد يدفع لها...وكانوا اهل بيته عايشين عيشة مش ولا بد...ويوم انتقلوا بيتهم اليديد بدوا تأثيثه بأثاث بيتهم الجديم مع كم من شي يديد من سوق المينا..
وبدت ام سيف تتعرف على الجيران..واول عايله تعرفت عليهم..هي عايلة ( عبدالرحمن بن هزيم) وكانوا معروفين في الشعبيه بإسم ( بيت بو حمدان)..المهم هالعايله كان لها وزنها وقيمتها في المجتمع ..عيالها ماخذين ارقى المناصب..وناس ما شاء الله مرتاحين ..عندهم مزارع في كل مكان وبيوتهم منتشره من السلع لين الفجيره وخورفكان وكلباء..يعني من طرف البلاد لطرفها الثاني..عندهم خمس بنات وثلاث اولاد ..وابوهم مب موجود في البيت..اربع وعشرين ساعه يتنقل من مكان لمكان عسب اشغاله اللي ما تنتهي..
المهم البنات اول ما سارن بيت بو سيف عسب يتعرفن على الجيران اليداد..تعرفن على ظبيه..البنت الطيبه الهاديه اللي ما يخصها في الدنيا...وكانن خمس وهن علياء اكبر وحده حالياً في البيت..تشتغل في البنك الوطني..عمرها 24 سنه..متخرجه من جامعة الامارات..وعقبها عايشه تشتغل في الديوان ..عمرها 22 سنه..وبعدها اسماء عمرها 21 سنه اول سنه في كلية التقنيه..واخر العنقود شمسه عمرها 10 سنين في صف خامس ابتدائي..وطبعاً ما ننسى اكبر وحده فيهم كلهم وهي شيخه اللي معرسه وعمرها 28 سنه وعندها خمسه عيال ما شاء الله..اما الاولاد فهم حمدان مب معرس وعمره 32 سنه..رجل اعمال كبير..وعقبه ناصر 26 سنه موظف في وزراة الاعلام..معرس مع انه اصغر من حمدان وعنده ولدين...وعقبه راشد اللي عمره 24سنه وهو تؤام عالية مخلص ثانويه ويشتغل مؤقتاً في مؤسسات ابوه للمقاولات..لين ما يحصل له وظيفه مرموقه مثل باقي اخوانه..
المهم في ميلس الحريم اللي ما يوصل لمستوى غرفة الحارس في بيت بو حمدان..كانن البنات يالسات مع ظبيه اللي كانت مستحيه منهم..ومب متعوده على هالناس..ودخلت ام سيف وسلمت عليهن...
ام سيف: شحالكن يا بناتي..
عليا: الحمد لله خالوووه ..انتي شحالج..
ام سيف: بخير الله يسلمج..الا اقول ليش ما يبتوا الوالده نتعرف عليها..
عليا بإبتسامه باهته: الله يرحمها يا خالتي..
تغيرت ملامح ام سيف وحست انها استعيلت بسؤال البنات..المهم غيرت ظبيه الموضوع..
ظبيه: وشخباركم بعد..
عايشه: بخير والله ..قولي لنا يا ظبيه شو تدرسين..
وتمت ظبيه تسولف وياهم...وتعارفوا على بعض تعارف سطحي ..ويوم اذن المغرب استأذنوا...
عليا: ما نوصيج خالوه لازم ظبيه تيي تزورنا..
ام سيف: ان شاء الله غناتي ...
شمسه: ما عندكم بنات صغار..؟؟
ضحكوا كلهم..
ام سيف: لا والله فديتج ما عندي غير ظبيوه وثلاث اولاد..
وسارن البنات بيتهم...وظبيه سارت ويا امها عشان يصلن المغرب...
.........................
في بيت بو حمدان في غرفة عليا...منسدحه على شبريتها ..وتفكر بعمق...وبينها وبين نفسها....
" ظبيه...غريبه هالبنت...اللي يشوفها يقول انسانه ولا يخصها بالدنيا ..على نياتها..بس اللي يتأمل نظرة عيونها يلاقي فيها الف شي وشي ..وحكايات مالها اول ولا تالي...احسها عايشه في عالم غامض..كلماتها تطلع بصعوبه..وما تحب تتكلم وايد.."
دخلت عايشه....
عايشه: شو تسوين..؟
عليا انقطع حبل افكارها...
عليا: ما شي يالسه افكر...
عايشه مبتسمه: والله اني حاسه انج تفكرين باللي افكر فيه..
عليا: ظبيه...
عايشه: حتى انا والله..
عليا: ما تحسين في شي هالبنت مب طبيعيه..احسها كلتة من الغموض...
عايشه تضحك: ليكون تبين تكتشفينها..
عليا قامت من على الشبريه ووقفت عدال المنظره..ومسكت صورة امها..وتنهدت..
عليا: مهما كانت تخبي ..هي محظوظه اكثر منا على الاقل عندها ام ونحن ما عندنا ...
عايشه: شو هالكلام يا عليا..مب انتي اللي تقول هالرمسه..عيل شو تبين شموس الياهل تقول..
عليا: ما علينا..الا اقول البشاكير حطوا العشا ولا بعدهم...
عايشه: بسير اشوف...
.....................

**بن دبي** · 09-06-03 ||, 10:28 PM

السلام عليكم
الشيخه قصتج واااايد حلوه اول مره اقرا قصص  لاني مالي بالعاده اقرا ابد
،انتظر تكلمت القصه بفارغ الصبر،انشالله تكتبينها عن قريب،
اتمنالج كل توفيق (مقاتل الصحراء):)

**شمه** · 09-06-03 ||, 11:04 PM

قصـــــه فنــــــانه..
يا الله نتريـــا تكملتهــــا ..
والله استانست على قصه شمـــه و ميثـــــا..و زعلت لانها خلصــت ..
الحين ظبيــــه ..يا الله كمليهــــا.

<img src="http://oasis.bindubai.com/emoticons/inlove.gif" border="0" valign="absmiddle" alt=':lov:'>
شمــــــــــه

**عين الدماني** · 09-06-03 ||, 11:09 PM

اختي المزيوونه: قبل كل شي أنا وحده هب واحد.. بس عادي مالومج يمكن elnick name معنا مب واضح...  <img src="http://oasis.bindubai.com/emoticons/biggrin.gif" border="0" valign="absmiddle" alt=':D'>  اسمحيلي... <img src="http://oasis.bindubai.com/emoticons/blush.gif" border="0" valign="absmiddle" alt=':b:'> و القصة واصله الحلقة ال 20 في منتدى ثاني لنهم حاطين القصة هناك قبل.. لكن أنا هني توني باديه أحط القصة و مب حلو اني أحطها كلها لين الحلقه ال 20 مره وحده أولاً لنها طويله و ثاني شي مب كامله و الكاتبه شكلها بتتأخر لين ما تكملها و أنا ماحب أتأخر على اللي يقرون القصه لنهم بهالطريقه بيملون من الإنتظار... و اعذريني لكن هذا رايي...

أخوي مقاتل الصحراء: أشكرك جزيل الشكر لأنك قريت هالقصة و صدقني الأجزاء الباقيه بتعيبك أكثر و أكثر و اذكر كلامي هذا.. القصة هاي قصة رائعه بمعنى الكلمه و مؤثرة جدا... و انشاءالله ما بطول عليكم في الحلقات...  <img src="http://oasis.bindubai.com/emoticons/smile.gif" border="0" valign="absmiddle" alt=':)'>

**عين الدماني** · 09-06-03 ||, 11:10 PM

الحلقة الخامسة..
مرت ليالي وايام و وبيت بو سيف ساكنين في بيتهم اليديد ومرت الاجازه كالعاده ببطء..وفي ليله من ليالي الصيف في الصاله..
سيف: ابويه...
ابو سيف: هاه شعندك..
سيف: أبي اعرس..
ام سيف بفرح : صدج يا ولدي والله انيه مب مصدقه اللي تقوله..
ابو سيف: من وين بييب لك مصاريف العرس...؟؟
سيف: انا بدبر عمري والله يخلي صندوق الزواج...
ابو سيف: ومنو تبي..؟؟
سيف: مريم بنت عمي..
ابو سيف: مالت عليك وعلى شورك..
ام سيف: ليش شو بلاها البنيه ما فيها شي ما شاء الله جمال واخلاق ..ما تتبدل..
سيف: مب ماخذ غير مريم والله معارض يخبرني لاني مستحيل اعرس لو ما خذيتها..
ابو سيف : محد بيعارض بس الله يعينك على امها...
سيف: والله انا ما باخذ امها باخذها هي...
وقام سيف من عند اهله وهو معزم يخطب مريم لو شو ما استوى..
........................
في ليله كانت ظبيه في بيت جيرانهم..اول مره تزورهم...وكانوا وايد مستانسين عليها..وفي صالة البيت الفخمه..كانت ظبيه مبهوره من كل شي..من الثريات اللي متدليه من سقف البيت ..الى الارض المتقنه في فنون النحت..وكانت نظراتها البسيطه..تدور في البيت..متعجبه من كل شي..
عايشه: ظبيه وين سرحانه؟؟
ظبيه بارتباك: لا ما شي هني يالسه اطالع..ماشاء الله بيتكم غاوي...
عايشه: تسلمين الغاليه....تفضلي كلي شي...
ظبيه: مشكوره الغاليه مابي شي..
وتدخل عليهم عليا...وتسلم على ظبيه...وتموا سوالف وضحك لين ما قامت عايشه داخل وتمت عليا ويا ظبيه..وكانت تتكلم وياها بكل صراحه على عكس ظبيه اللي طول الوقت ساكته واذا رمست ما تقول شي مهم..
عليا: ظبيه تصدقين والله ما ادري ليش خاطري اتعرف عليج اكثر عن جي ونكون قراب لبعض ..
ظبيه ببرود: اللي تشوفينه يا عليا..وان شاء الله نستوي اكثر من خوات...
وشوي ويرن تلفون عليا...
عليا مبتسمه: يا مرحبا وعليكم السلام..
وتمت سوالف وظبيه يالسه ولا كأن الموضوع يعنيها...لين ما بندت عليا..
عليا: سوري والله هاي كانت ربيعتي والحين بندت من عندها..
ظبيه:لا عادي ..
عليا: عندج موبايل..؟؟

ظبيه: لاء..
عليا: اوكي سوري..
ظبيه: لا عادي..بس اقول انا الحين بسير المغرب اذن وما ابي اكون برا البيت عقب الغيبه..
عليا: دخيلج ظبيوه تعشي ويانا والله كل ليله بروحنا ..الله يخليج..
ظبية: لا والله ماروم امايه تترياني..اسمحيلي الغاليه..
وروحت ظبيه البيت...وتمت عليا تفكر فيها..
..............................
مرت ليالي وايام وظبيه ملانه ما تدري شو تسوي في الاجازه..وقرفت من حياة البيت وامها كل شوي وعافده على حديقة الشريعه..وعرفوهم الشرطيات هناك من كثرن ما يسيرن...وفي ليله من الليالي ظبيه يالسه تقلب التلفزيون..ودخل ابوها...وهو ماشي في الصاله بند التلفزيون..
ابو سيف: ما شي اخبار وما شي مهم حق شو مشغله التلفزيون..يعني خسارة كهربا ..صدج انج بدون مسؤوليه...
ظبيه ساكته ما رمست وابوها سار عنها...وقامت وظهرت للحوش..ويوم فتحت الباب...دخلت البيت سياره مب غربيه عليها وردت البيت بسرعه...
ظبيه: امايه بيت عمي بو مايد هني..
ام سيف: يالله يا ظبيه على المطبخ...
ظبيه: ان شاء الله امايه..
وعقب ما دخلوهم ميلس الحريم..وسوالف وضحك ومريم مع ظبيه..وام مايد مع ام سيف..وكل وحده حاقده على الثانيه من الحريم..بس البنات عادي..
ام مايد: ما شاء الله بيتكم وايد حلو..
ام سيف: مشكوره يا ام مايد..
ام مايد: من وين ماخذين الاثاث..؟؟
ام سيف تبي تسوي روحها متطوره غصب ولا تفهم في هالسوالف...بس فضيحه هالحرمه..
ام سيف: والله ابو سيف ما شاء الله عليه ما ياخذ الا من هالمحلات الغاويه..مادري شو يسمونها....هيييه تذكرت ماخذين الاثاث من ماكدونالز ...الحمد لله يوم تذكرت وايد غاوي هالمحل ..وكل شي عندهم غالي..
ام مايد روحها ما تفهم شي: هيييه زين زين انا بعد سمعت فيه.. وايد زين ما شاء الله...
وقامت ظبيه ومريم وطلعن الصاله يسولفن وهن ناقعات ضحك...
ودخل احمد عليهم...
احمد: السلام عليج يا مريم..
مريم: هلااا احمدووه شحالك..علومك وعلوم الدراسه..
احمد: يالله عم ندفش على قولة الشاميين..
مريم: ما بتسافر هالسنه..؟؟
احمد: لا والله ماروم ..عندي كسر في ايدي..وعطوني ترخيص..
مريم: احسن لك والله..
ويدخل سيف وعيسى ومايد..وتعدل مريم وظبيه شيلهن..
الشباب: السلام عليكم..
ظبيه ومريم: وعليكم السلام..
سيف: شحالج مريوم..؟؟
مريم: بخير الله يسلمك شحالك انت..؟؟
مايد: اخبارج يا ظبيه.؟؟
ظبيه: الحمدلله..
عيسى: فديتني محد هني سلم عليه..
ويضحكون..
عيسى: زين عادي ايلس وياكن..؟؟
ظبيه: لا طبعاً
وطلعوا كلهم من الصاله ما عدا البنات...
مريم: افديته سواافي والله كل يوم احبه اكثر عن اللي قبله..
ظبيه: خل عنج هالسوالف..؟؟
مريم: ظبيوه شو فيج انتي عنبو اللي يشوفج يقول عيوز عمرها مادري كم..والله حاله..يا بنت الناس ارحمي حالج..
وشغلت ظبيه التلفزيون عشان تسكت مريم بنت عمها وحطت فيلم اجنبي على قناة mbc
..................................

**عين الدماني** · 09-06-03 ||, 11:18 PM

هلا والله اختي الغاليه شمــه... ماشاءالله عليج متابعة للقصص.. <img src="http://oasis.bindubai.com/emoticons/wink.gif" border="0" valign="absmiddle" alt=':;):'>  مشكوووووووووره لنج قريتي هالقصة و مثل ما قلت قبل هالقصه بنفس مستوى قصة شمه و أحلى بعد... تصدقين أنا شراتج وايد اظيجت لنه قصة شمه خلصت.. <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/down.gif" border="0" valign="absmiddle" alt=':dd:'>

**عين الدماني** · 09-06-03 ||, 11:18 PM

الحلقه السادسه...
مرت ايام وايام ..وتعرف سيف على حمدان ولد عبدالرحمن بن هزيم..وتقرب منه مب عشان شي بس عشانه ولد جيرانهم..ومع ان حمدان كان اكبر عن سيف بس استلطفه وايد وقرب منه..وبعد فتره الا وحمدان بواسطته موظف سيف في وحده من شركات النقل والتوزيع مال ابوه..وبدا سيف يشتغل شوي شوي ..وبسبب اخلاصه وجديته في شغله..
كان حمدان كل يوم يرفع من مقامه ويعلي راتبه لين ما تغير حال سيف وصار ما شاء الله عليه ريال والنعم ...
وفي الحوش في البيت ابو سيف يالس على الحصير في عز الحر ّ..يهوي عمره بكرتون عصير..
سيف: ابويه شاللي حادنك تيلس في الشمس..عنبو سير شغل المكيف وايلس..
ابو سيف: وليش ان شاء الله الجو الطبيعي احلى..
سيف: لا و الله الزط احلى عنه...
ابو سيف: شو تقول..؟؟
سيف: لا ما شي ابويه بس بغيت اقولك اني ابى اشتري لي سياره يديده..وابغي اسير بموترك لين ما تنقى لي اللي ابي..
ابو سيف: خلني اسير وياك والله بختار لك شي زين..
سيف: لا تتنقى ولا شي انا ابشتري لي البي ام اليديده..اللي ب 350,000
انصرع بو سيف وكان عادي ينتحر ولا يشل طابوقه من الارض ويدق راسه فيها..
بو سيف : شوووه تقول 350,000 تخبلت انت ولا شي ياسك يالخبل ..وين عقلك؟؟؟ عنبو عدوينك هاي بتأمن حياتك انت وعيالك 300 سنه..انا روحي من يوم انخلقت لليوم ما صرفت 350,000 تسير تعقهن لي على موتر..
يضحك سيف: ابويه شفيك انا ابي اعيش حياتي...
ابوسيف: يا ولدي استهدي بالله واشتري لك كورولا ابرك من هالمدري شو تسمونها..الله يهديك والله صكيت قلبي..تمزح انت صح..هييه تمزح...؟؟؟
سيف بجديه: لا بويه ما امزح شو امزح والله باذن الله بشتريها عيال الناس مب اقل عني..
ابوسيف: اذلف يا ويه الفقر وانا تحريتك ريال طلعت لي من عيال الفقر اللي مب شايفين خير تبي تعيش عالديون والنكد..فقدت ويهك..
سيف: ابويه يالله انا ساير الوكاله تامرني بشي...
ابو سيف: في قلعة ابليس..
...........................
كانت ظبيه يالسه تخم حوش البيت الكبير بروحها ..وظهرت ام سيف وشافتها وسارت تخم وياها...
ظبيه: امايه سيري مب زين عليج الغبار...؟؟
ام سيف: وانتي بعد يمه مب زين عليج انا مب احسن عنج..خلني اساعدج شوي..
وتمن ينظفن مع بعض..
دق جرس البيت...والباب مشرع للاخر...اللي يشوفه جي يقول هاه بيت الضيافه ما يدري شو البلاوي اللي داخل...ويشوفون شغالة بيت بو حمدان...
سويتي: السلام عليكم ماما..
ام سيف: وعليج السلام..
وتناولها صينيه كبيره...
سويتي: هدا من عند ماما شيخه...؟؟
ظبيه: منو شيخه؟؟
سويتي: هدا اليوم يجي من بدع زايد..ويجيب هدا ..هي بنت كبير مال بابا عبدالرحمن في خمسه ولد ما شاء الله...
ام سيف: زين يمه تعالي تقهوي عندنا
سويتي: هههههه لا ماما مشكوره ما يريد انا في شغل كثير اليوم..
ام سيف: زين شو هاه اللي مسويتنه في شعرج عنبو عوفتينا بريحته..
تضحك ظبيه وهي متفشله..
سويتي : شو يقول هادي عجووز..؟؟
وراحت شغالة بيت عبدالرحمن وسارت ظبيه المطبخ وفتحت الغطا وشافت بيتزا شكلها يموت من حلاتها..
وخلتها وظهرت..
.............................
وفي الليل رد سيف وعيسى واحمد من برا ويلسوا محشترين يبون العشاء...
ام سيف: شو تبون من عشا...
عيسى يضحك: انا ابي الطبخه الشهيره..جبن وزيتون...
احمد يقطع السالفه : امايه وين ابويه..؟؟
ام سيف: بحجرته يصلي...
ظبيه: ارمسوا شو تبون من عشا...
ويطلع ابوسيف يتنفس بسرعه...
ابو سيف: خربتوا عليه صلاتي الله يغربلكم ...شو تتنقون من عشا الله يخس العدو تروا السمنه مب زينه ع صحتكم وانتوا شباب...وانتي ياللي اونج تدبرين وتفهمين حق شو تتخبرينهم اذا يبون عشا ولا لاء..وهالقرص اللي حاطينه بالمطبخ ..منو بياكله..؟؟
ظبيه: أي قرص..؟؟
ام سيف: ليكون بس هاه اللي من بيت بو حمدان..
ابو سيف: ما ادري من وين بس ما بتتعشون الا هو..عنبو وليش نعقه الزباله...
عيسى: برايكم انا بطلب لي من برا....يقولون هني في كافيتريا اسمها الفنان ...زين اكلهم...
سيف: حق شو الكافيتريا بنسير نطلب عشا من المحطه...
احمد:لا هالفكره ولا هاييج..احسن شي نتصل بفطاير الخليج في فرع في الشهامه...
كانوا العيال بس يبون يرفعون ضغط ابوهم..اللي كان عادي يقتل نفسه من القهر..
ابو سيف: كافتيريا بعينك انت وهو ولا ما تعشيتوا غير القرص اللي في المطبخ..
وحطته ام سيف على السفره وتعشوه...وعقب كل واحد سار حجرته..
...............................
في اليوم اللي عقبه طرشت عليا ورقه ويا الخدامه حق ظبيه..ويوم عطتها ظبيه...فتحتها ..
" ظبيه شحالج..سوري على هالطريقه البدائيه..بس حبيت اقولج تعالي اليوم بيتنا عقب المغرب مسوين حفلة عيد ميلاد حق بنت اختيه شويخ..يا ليت تكونين موجوده.."
استحت ظبيه وحست ان ما عندها سالفه يوم ان عليا تطرش رساله وفي لحظة قهر شافت ابوها...
ظبيه ولاول مره ترمس ويا ليت رمست مثل الناس..
ظبيه: ابويه شو فيك ما تحطلنا تلفون في البيت...
ابو سيف وويه انجلب وتلون: شو تقولين؟؟؟ تلفون؟؟؟ حق شوه تلفون..؟؟ معرسه ولا مخطوبه ولا شو عندج تبين تلفون ولا منو متوله على ويهج ..منو تبين تسألين عنه..ومن يفكر فيج..يالله والله ان سمعتج تعيدين هالرمسه لا تنضربين ضرب الحمير...
ظبيه مشت وودرت ابوها ..من القهر وهو دش حجرته ...
وسارت حجرتها...وفتحت الكبت تبي تشوف الملابس وتشوف شو بتلبس اليوم..ويلست تطالع وتتفرج على البياخه اللي مصفوفه ..ويلست تقول
" انا شو بيوديني اكرم لي ولكرامتي ما سير..حق شو افشل عمري اكيد هلهم بيون كاشخين..ما فيه على الفضايح مب سايره...اووه بس هاي عليا بتزعل..شو تبي مني هاي لزقه استغفر الله.."
وصكت الباب وتمت منسدحه لا شغل ولا مشغله..وتفكر تروح ولا لاء..
.................. .........