<font color='#728FCE'>الحلقه الرابعه عشر
مرت الايام والليالي واحساس ظبيه بدا ينحرف وشخصية احمد المغروره الهاديه..المتعاليه على الكل بدت تسكن بالها وخافت ظبيه من هالشعور بس ما قدرت تحدد للحين شو هو بدن المتدربات اللي مع ظبيه يلاحظون تصرفاتها الغريبه..وكشعور أي بنت في بنت مثلها حسوا بالميل اللي تميله ظبيه لاحمد..وكان شعور طبيعي ان أي بنت تحب هالانسان الغامض اكثر حتى عن ظبيه...ولاحظن بعد ملامح ظبيه كلما طروا احمد..
شيماء: ظبيه لا تحاولين تعطين لاحساسج أي فرصه يحب هالانسان والله غيرج جرب وتعذب...
ريما: مب غيرج والله واحسن مني ومنج وطلعن يجرن اذيال الخيبه...
شيماء: فكري بالموضوع عدل...الاهتمام والحب ما نوهبه لاي شخص وبكل سهوله...
وما تكلمت ظبيه...وانصدمت كيف الكل بدا يلاحظ واللي زادها غرابه كيف كانت شفافه لهالدرجه..
....................
وفي بيت بو حمدان علياء سرحانه تفكر في ظبيه...وفي اللي صار وماتدري باي شي تفكر ..وبينها وبين نفسها...
" ليش يا راشد والله عمري ما حاتيت حد بعد وفاة امايه كثر شموس اختي غير ظبيه.."
وقطع التفكير صوت عايشه...
عايشه: خلاص يا علياء هوني على عمرج ما استوى الا خير...
علياء: أي خير اللي تتكلمين عنه...يا بنت الناس البنت ما دشت بيتنا ولا شافتنا من متى ومالي ويه اسير بيتهم...
عايشه: اتريي وخلي كل شي على الله...البنت مشغوله بالتدريب عيني خير من الله ..اول ما تخلص التدريب اذا ما يتنا شوفي شو يصير...
علياء: افففففف يا ربي اففف من الخاطر...
........................
في غرفة ظبيه..يالسه ترتب ملابسها وتدور علىثوب مثل الناس تلبسه باجر..عشان في وفد بيي المؤسسه..وتبي تكون هاه شوي بمنظر لائق...
ودخل عليها عيسى...
عيسى: ظبيه انزلي تحت بسرعه امايه تعبانه مب رايمه تقوم يالله ظبيوه...
انفجعت ظبيه ونزلت ركض مسرعه عند امها..ولقتها تتنفس بسرعه وتبكي بكاء الم..وابو سيف واقف..
بو سيف بخوف: يا ربي يا ام سيف قومي شو هالمرض اللي ياج قومي توكلي على الله الدوا ما منه فايده اذا الله كاتب لج المرض...
عيسى: ابويه ممكن لو سمحت وتكرمت نوديها المستشفى...
بو سيف: سيارتي خربانه...
ظبيه بعصبيه وخوف: يالله يا عيسى اتصل بسيف خله يودينا يالله..
عيسى: ظبيه سيف في بوظبي مب جريب منا ...يالله سيري البسي عباتج امايه شكلها تموت والله ..
تمت ظبيه تصيح وشاف بو سيف الموقف صار اخطر مما يتصور..وسار يربع صوب الموتر وشغله..وقالهم يالله وروحوا كلهم...
في الجهه الثانيه كانت علياء طالعه بسيارتها وباب بيت بو سيف مفتوح وشافتهم قابضين ام سيف عيسى وظبيه ويساعدونها تركب السياره...
وعرفت ان ام سيف تعبانه...
وصل بو سيف مستشفى الجزيره ودخلت ام سيف العنايه المركزه في حاله يرثى لها...كانت الساعه 5:30 العصر ..وتموا بو سيف وظبيه وعيسى في المستشفى لين الساعه 12:40 ولا في أي مؤشرات ولا حد قال لهم أي شي والدكاتره واحد يدخل والثاني يطلع..
والدنيا تدور بظبيه والخوف يرجف بظلوعها...وخوف فقدان امها شبح مستولي على افكارها..وفكرة انها تعيش وحيده بهالكون بدون حبها الاول والاخير ..بدون النبض في قلبها وبدون مصدر الامن والسعاده فكره كانت تخلي دموع ظبيه مثل المطر...
عيسى تعب من كثر ما هو واقف واتصل به سيف يتخبره وين اهل البيت ..وبعد ما عرف سار لهم المستشفى ..
وطلع الدكتور وكان شكله مرهق...وطالعهم بكل اسف ...وحطت ظبيه عينها بعينه بكل لهفه وخوف تتريا الكلمات تنساب من بين شفتيه...
الدكتور: وايد تأخرتوا الحرمه ياتها جلطه و...
وقبل يكمل كلامه صرخة ظبيه في ويهه : لااااااااااااااااااااا امايه ما ماتت دخيل والديك احلفك باللي رفع فوقك سبع سموات لا تقول انها ماتت..دخيل والديك رفجة عليك براس كل غالي..لا تقول ان امايه ماتت...
لوى عيسى على ظبيه يحاول يهديها..وهي تنتفض بين ايديه....
الدكتور: الله يطول بعمرها الوالده بعدها عايشه ما ماتت.. بس الله يعينها الجلطه سببت لها شلل نصفي...
مسك بو سيف راسه ودارت به الدنيا...ويلس على اقرب كرسي وسار الممرض ييب له ماي عسب يهدا شوي..
عيسى: بس ظبيه خلاص امايه موجوده لا تفاولين عليها بالشر...
بو سيف: لا اله الا الله...
ظبيه: ابويه ابى ادخل عندها دخيلك...
عيسى: لا يا ظبيه اتريي عليها شوي..عقب بندخل عليها باجر باذن الله..
بو سيف: انشلت الحرمه الله يعينا بس..الحين من وين بنييب لها كرسي متحرك ب 250 درهم...؟؟!!!؟؟
............................
مرت ايام وام سيف بالمستشفى وظبيه ما سارت الدوام..ومع ان امها تعبانه وحالتها صعبه بس صورة احمد ما فارقت خيالها ثانيه وحده...وفي غيبتها عن التدريب كل هالفتره تأكد لها شي واحد هو ان هالشوق ما يي من فراغ ..واخيرا اعترفت ظبيه لنفسها..ولاول مره تحس بهالشعور العذب ..ولاول مره يشدها الحنين لانسان..ولاول مره ظبيه تبتسم وهي تفكر وتحس بلهفه لحد..ولاول مره تحس انها تبي الشمس تطلع وانها تتريا باجر على احر من الجمر...
اعترفت ظبيه لنفسها وتأكدت هالمره من صدق انها...
" حبت احمد"
..........................
بعد فتره ردت ظبيه للتدريب وما بقى غير اسبوعين وينتهي...وحست ظبيه بالمراره انها ما بتشوف احمد..وبترد للجامعه..ومستحيل تلتقي بهالانسان باي وسيله..وفي اول يوم داومت فيه من يوم مرض امها....دخلت وسلمت علىشيماء وريم...
ريم: الحمد لله على سلامة الوالده...
شيماء: ما تشوف شر الوالده ان شاء الله..
ظبيه مستغربه: مشكورات ما تقصرن الشر ما ييكن الغاليات...بس كيف عرفتن..
ريم: ربج عاد...!!!
وهن يتكلمن دخلت الموظفه الكبيره عندهن وسلمت...
الموظفه: ظبيه تعالي معاي المكتب...
وسارت ظبيه وهي خايفه ما تدري شو بتقول لها هذي وتمت تحاتي ايام الغياب ولا تدري كيف تعتذر...بس بتشرح ظروفها انها كانت اكبر من انها تدوام...ومشت ظبيه في الممر اللي تحبه ووصلت قريب شوي من غرفة السيد احمد..ودخلت مكتب الموظفه ..
الموظفه: تفضلي يلسي ...
ويلست ظبيه....
الموظفه: ظبيه الحمد لله على سلامة الوالده ما تشوف شر..
ظبيه: الله يسلمج...انتي كيف عرفتي...؟؟
الموظفه مبتسمه: انا ناديتج عشان اخبرج كيف عرفت...
ظبيه: تفضلي...
الموظفه: ظبيه نحن عندنا هني بالغرفه النائب احمد تعرفينه...صح انه شوي متكبر بنظر الناس اللي ما يعرفونه بس صدقيني انسان قمة في الاحترام..والذوق وطيب وكل الناس تشهد بأفضاله...وانا حبيت اقولج ان السيد احمد كان متابع بنفسه ايام غيابج عن التدريب اول بأول وكان يجري اتصالات مع المستشفى اللي فيه الوالده..يتطمن على حالتها الصحيه..
كانت الموظفه تتكلم وظبيه في عالم ثاني ما يعلم فيه الا رب العباد...وقلبها يدق بسرعه وحست ان ظلوعها مب قادره تمسكه وكأنه بيطير من لهفتها وشوقها....
الموظفه: واللي ابيه منج يا ظبيه انج تروحين ولا كأني قلت لج شي وتشكرينه على اللي قدمه واللي سواه...وكأن كل شي من نفسج...
ظبيه بينها وبين نفسها...
" لا توصيني على اللي زرعت حبه بالحنايا..."
وقامت ظبيه وطلعت من المكتب وتمت تفكر متى تروح له...ويلست تشتغل في الملفات وترتب الاوراق...ويوم شدها الشوق لشوفة غاليها...قامت بتروح له وقلبها يرفرف في صدرها والدنيا مب شالتنها من الفرح...وسارت بالممر متجهه لمكتب السيد احمد..
ودقت الباب دقات خفيفه....وفتحته شوي وشافته وحطت عينها بعينه....تنتظر منه كلمه يقولها ..تنتظره بس يقولها تفضلي..واول ما شافها وقف مكانه وتم يطالعها بنظره غريبه ..ولاول مره انكسرت كل الحواجز من بينهم وابتسم احمد...ونزلت ظبيه عيونها للارض وقلبها زاد نبضه...يدق بسرعه بسرعه...تتنفس بسرعه ..ما قدرت خلاص..جسمها بدا ينتفض...وايديها ترتجف...هذا هو احمد اللي الكل يتكلم عن غروره..ابتسم لها واذاب كل اللي كانت تعتقد انها اسوار تبعدها عنه...لاول مره تشوف ظبيه ابتسامة احمد اللي أشر لها تيلس على الكرسي المجابل لمكتبه....
ظبيه تبلع ريقها وبكلام متقطع: ا..اأأنا ..ب..بس حب..حبيت ..اشكرك على كل اللي سويته بغيبتي واهتمامك وسؤالك عن امايه ..ما تقصر...
احمد ساكت ولا قال شي ومد لها ورقه ...مسكت ظبيه الورقه وكانت مكتوبه بالكمبيوتر..
" اختي العزيزه..اسمحيلي على التقصير...ولكنني معاق لا اتحدث.."
صعقت ظبيه...وحست اطرافها انشلت..وتجمد الدم بعروقها...وفتحت عيونها....تمت الورقه تنتفض في ايديها...وتم احمد يطالعها وهو يدري انها اول ما تقرا الورقه بتقوم وبتطلع وبتصك الباب مثل كل بنت حبته يوم من الايام....
بس ظبيه ما تحركت..وتمت تطالع بالورقه وبدت دموعها بتلقائيه...تتساقط على الورقه...انصدم احمد ولا قدر يسوي أي شي...حاول يلفت نظرها باي طريقه بس ظبيه ما رفعت راسها..وتم يكتب في ورقه بسرعه ومد ايده..
" لماذا الدموع ما لهذا خلقنا...اكرمنا الله بالعقل فلا ضرورة للحديث..الحمدلله الذي جعلني انساناً ناجحاً في حياتي..فهاأنا ذا وصلت لما وصلت اليه بدون حاجتي للكلام"
مسحت ظبيه دموعها واعتذرت له...وتمت تطالعه بكل اسى وفهمت هالانسان شو يخبي ...وحست لاول مره انها تحتاج وجوده بجانبها...وكيف كانت دايما تفكر تنهي حياتها بسبب ابوها وعيشتها التعيسه...ولكن بعد ما شافت احمد وصبره على الدنيا واللي حرمته منه..اشتعلت في قلبها شموع امل...ورفعت راسها وابتسمت لاحمد..
ظبيه: الله يعطيك العافيه ...
وبكل تلقائيه قالتها لاول مره ..لاول مره تطلع من ظبيه كلمه حلوه لانسان غريب...
ظبيه: صدق من خاطري تمنيت اني اسمع صوتك...!!!!
طالعها احمد بحنان وابتسم واستأذنت هي وطلعت ...وتم احمد يفكر في ظبيه بس هالمره تفكير مختلف...تم يفكر بظبيه بصمت ولاول مره يفكر احمد بينه وبين قلبه...
..........................</font>
رد مع اقتباس
مواقع النشر (المفضلة)