أحبك حب مايموت

[عين الدماني]

<font color='#728FCE'>الحلقه العشرون...
في غرفة تجارة وصناعة بوظبي...وفي غرفة الاجتماعات كان الكل موجود ما عدا احمد..وللاسف نزل القرار بدون ما يكون حاضر..بس حطوا له ورقه على مكتبه عسب يعرف الخبر...وبعدما وصل احمد ..ابتسمت في ويهه ( طيف ) الموظفه الرئيسيه في الغرفه...واشر لها بايده يرد التحيه..ودخل مبتسم مكتبه...
يلس واول شي مسك ورقه على مكتبه ...
((ألف ألف مبروك على الترقيه))
ابتسم احمد وتهللت اساريره ...من زمان من يوم فارق ظبيه حياته ما ابتسم من قلبه..اخيراً..هذا اقصى ما نقدر نسميه الكفاح في الحياه...
كانت ترقية احمد اكبر دليل على كفاحه رغم الاعاقه..تمت ترقيته من نائب مدير قسم التسويق والمبيعات..الى مدير قسم التسويق والمبيعات..
سبحان الله له في امره ما يشاء يأخذ من مكان ويعطي في غيره..
وهو في غمرة افراحه..دخلت عليه السكرتيره وحطت له ثلاث ملفات ...
السكرتيره: استاذ احمد تقولك الانسه طيف بعد اذنك يوم تخلص تكتب تقرير مفصل عن شغل الطالبات في هالملف...لانه طاف على موعد التسليم فتره طويله ونحن اخر مؤسسه بتسلم تقارير التعليم العالي...
ابتسم لها احمد واشر لها تتفضل من عنده عشان يخلص شغله..وطلعت الموظفه..ورد يقرا الترقيه وهو بيطير من الفرح...ومسك واحد من الملفات وشاف مكتوب عليه..
"شيماء خليفه ناصر / جامعة زايد/ متدربه في غرفة تجارة وصناعة ابوظبي"
حس احمد بشي غريب يغزه بقلبه..حاول انه يكون طبيعي بس صدق احاسيس متناقضه حس فيها وشعور غريب تملكه..
الملف الثاني..
" ظبيه عبدالله مبارك/ جامعة زايد/ متدربه في غرفة تجارة وصناعة ابوظبي"
في ملف ظبيه رفرفت احلام احمد وحط ايده على الملف وردت لباله صورة انسانه حاول يتناساها بس بدون فايده،ابتسم ..ضحك بصمت..رفع راسه يطالع بالسقف ..تنهد بعمق..
شعور صعب تفسيره...حب صامت بدون عتب،همس،احاسيس مدفونه..شعور اغرب من الغرابه ذاتها..انك تحب بصمت..تتالم بصمت..هذي هي قمة العذاب في الحب..
ظبيه كانت يوم من الايام ماليه هالمكان بوجودها..رغم مسحة الحزن في عيونها لكن شوفتها كانت تطيب خاطر احمد..
رغم صمتها اللي كان مؤلم اكثر من صمت احمد نفسه لكن وجودها كان يعني لاحمد الشي الكثير..
في عيونها الف قصه وقصه..كان احمد كل ما حط راسه بينام تذكر وحده من حكايات عيون ظبيه..ويغمض عينه وينام بابتسامه عذبه ..تريح خاطره وتفرح قلبه..
ظبيه يوم كانت تتدرب كانت اذا ابتسمت..مع انه نادراً ما تبتسم..كانت في بساتين حب وورد احمر ودنيا خضرا تتفتح في عيون احمد...تبتسم على محياه ابتسامه رقيقه ..اللي يشوفها يقول ابتسامه عذبه متألمه على شفة يتيم...
احمد الحين غارق من الراس للاقدام ..يستعيد اجمل الاحداث...
لو الاقدار كتب فيها رب العباد الكلام مباح لاحمد...كنت اظن بأنه بيقول ..
" الله يسامحج يا سكرتيرتنا قلبتي مواجع ياما حاولنا نتناسها..."
بس مسكين شو بيده من حيله غير صمته..وابتسامه للرضا ..ودمعه للحزن...
وهو غارق في تفكيره..سؤال حاير في النفوس...
"انتي وين يا ظبيه"
اختفت فجأة بعد موت امها..ما يدري وين راحت..وما هان عليه رغم جراحه يقطع رقم البطاقه اللي عندها..وتم رغم كل شي صار ..يتريا وصبره ما نفذ..
............................
في بيت مايد انتقلت ظبيه من عالم لعالم نقدر نقول احسن منه بشوي..
ما تقبلت مايد ابد في البدايه ورغم كل شي وكل التنازلات اللي كان يسويها بس ظلت ظبيه بعيده عنه قلباً وقالباُ ...
كانت ظبيه رغم ضعفها وقلة حيلتها...قويه في ويه مايد وما كانت تبين له أي عاطفه مع انه ريلها...ام مايد حست بهالشي وتمت تنغز ولدها بالرمسه..
بس مايد من حبه لظبيه كان ساكت ولا يرمس ابد..ما تهون عليه لا هي ولا امه..بس شو يسوي ابتلى وصار بين نارين..
يمكن عطف مايد وحبه وحنانه لها حسسها شوي بالامان..واقدر اقول انها بدا ينسيها حب احمد..
لانه صار واجب عليها تخلص له كزوجه وتنسى هذاك لانها في ذمة ريال ثاني...
صح ان ظبيه شوي كانت تعاني من جفاف معاملة ام مايد لها بس كانت تصبر..مب لاي شي بس لانها انسانه عودت نفسها على الصمت..
ولانها في قرارة نفسها عرفت ان مايد مستحيل يفضلها على امه لو شو ما صار..
وفي الصاله مره في بيت مايد....كانت ظبيه ترفع الصحون عن الارض بتوديها المطبخ..وام مايد يالسه ما تسوي شي..
مر مايد بعد ما غسل ايده بعد الغدا..وقام يشل ويا حرمته الصحون.....وسارت ظبيه صوب المغسله..ومايد رد الصاله...
ام مايد: اشوفك قمت بشغل البيت..ما شي حريم...ولا انت تحت شورها..؟؟
مايد مبتسم: الله يهديج يا امايه حرمتي لازم اساعدها بعد..هي مب خدامه لازم نتعاون كلنا بشغل البيت...
ام مايد تطالعه بنظرة احتقار: مب منك انت..منها هي اللي ممشيتنك على كيفها....
.................................
رغم الفتور العاطفي بينها وبين ريلها..بس كانت ظبيه على قد ما تقدر تحاول ترضيه وتلبي له رغباته..ولا ترفض له امر..
مايد يحس بالهم بقلبه ما يدري شو يسوي...محتار فيها وما يدري كيف يكسبها.....
مايد: ظبيه ...
ظبيه: لبيه...
مايد: ما شي...
سكتت ظبيه ولا قالت له شي..
مايد: ظبيه انتي ليش تكرهيني...؟؟؟
كلمات مثل حمم البراكين..نزلت على راس ظبيه...صح انها طبيعيه بالنسبه لشعورها...بس ما ظنت مايد يرمسها بهالاسلوب..ما توقعته بيحس باحساسها...تلومت بعمرها..
بس تمت تكابر ولا بينت له..وحاولت قد ما تقدر انها تخلي ملامح ويهها طبيعيه...عشان ما يحس انها تأثرت من كلامه....
مايد: ردي علي دخيلج خاطري اعرف شو السبب...؟؟احس ما بينا شي...احسج بس جثه وياي بلى روح...اكلمج ولا تردين الا بكلمتين...وانتي مرات بين ايديه وانتي معاي بكل لحظه ..وانتي يالسه عدالي...حتى وانتي بحضني...احس بيني وبينج بلاد وجبال ودنيا وعالم..احسج بعيده عني وااايد...ظبيه انا ما اتذلل لج ولا اهين النفس..بس انا شاريج بالعمر وما بتخلى عنج ابد..احاول ارضيج بكل الطرق..بس انتي تمين بعيده...ودي اييب لج الارض بكبرها بكفي واقولج تراها ما تسوى ارض تحطين قدمج فيها يا ظبيه..الله يحنن قلبج علي هاللي بقوله....
وانسدح مايد على الشبريه...وما عرف شو يقول اكثر..وخلى بقلب وبال ظبيه الف سؤال وسؤال..ما تدري شو تقوله...حست بشي غريب..ما تقدر تقول حبته..بس كسر خاطرها..تمت تطالعه وتلف نظرها عنه..ما تعرف بشو ترد...تبغي تقوله شي بس ما تدري من وين ولا وين تبدا...شلت عمرها وسارت على الكنبه اللي في الحجره ويلست بعيد...حط راسه هو واتلحف وتم يتجلب ما يدري شو يسوي..اخر شي قام وتلبس وطلع....
..............................
في بيت بوسيف....سيف يالس ويا مريم في الصاله ...ودخل عيسى واحمد من الحوش...ويلسوا وياهم...
عيسى: وين ابويه ياسيف...؟؟
سيف: بحجرته...
احمد: لين متى ..؟؟
مريم: من يوم سارت ظبيه وحالته حاله...
احمد وهو يطالع مريم بنظره حاده: اكيد لازم يتحسر عليها...مب شويه اللي كانت تسويله ظبيه..كانت عينه اللي يشوف بها..وروحه وعمره كله اللي عايش به...
عيسى: فديتج يا ظبيه والله ولهنا على حسج...
مريم: تقدرون تسيرون لها... البيت بيتكم...
سيف: شو رايكم نسير لها اليوم...
مريم: لا اليوم لا..لازم نعطيهم خبر قبل..يمكن امايه تعبانه وما تروم للضيوف...
سيف: هيه والله صدق...
سار احمد وعيسى فوق صوب حجرهم...
احمد: يا حظي فيك يا سوااف...قاصه عليك هالذيبه...
عيسى: قصر حسك لا يسمعنا ما فينا على الحشره....
احمد: ما سمعتها شو تقول اونه سيروا لها متى ما بغيتوا...حشى عليه هب ساير وذيج الغوله هناك...والله اني زغت منها يوم بطلنا باب السياره ليلة عرس ظبيه...
عيسى: ههههههههه الله يغربلك حتى انا بعد..الا اقول احمداني ما تذكرك بحد...؟؟
احمد: ههههه هيه والله تعرف تذكرني بمنو...؟؟
عيسى: منو..؟؟
احمد: تحيد ذاك الفلم المصري اللي مثلت فيه مديحه يسري..وعمرو ذياب...وكان عندهم ياهل مضيعينها...وحرمه اختطفتهم..دبه وجي تروع...ما حيد اسم الفلم ولا الحرمه...
انفجر عيسى من الضحك....
عيسى: ههههههههههه غربلك الله هاي اسمها( امنا الغوله)..اسميها شراتها بالضبط...
احمد: هيه والله....اييييه يا ظبيه افتكيتي من ابويه الحين من يفكج من امنا الغوله....
عيسى: شو رايك نخطبها حق ابويه..ونسير انا وانت بوظبي ونستأجر لنا شقه...ونخلهم يناسبون بعض..وتطيح بجبد سيف ومريم...
احمد: ههه والله فكره...يالله بنجرب...
عيسى: وحليلك يا بويه..ما عرفت قيمة ظبيه الا يوم فارقتها...محبوس بحجرته..محد درى عنه....
...........................
في الليل الساعه عشر ونص...مايد بعده ما رد من الطلعه اللي طلعها من العصر...وظبيه يالسه في الصاله..دخلت عليها ام مايد...وبندت التلفزيون...
ام مايد: قومي لا بركةٍ فيج ريلج من العصر مب هني وانتي يالسه لي على التلفزيون..ما دريتي عنه.....
ونشت عنها ظبيه وسارت حجرتها...وحطت راسها بترقد...وتمت تفكر بامها واهلها..وكل شي ومر الوقت وما حست فيه...وطلعت من الحجره وسارت صوب الصاله والمطبخ...ولقت الليتات مبنده...وام مايد رقدت....وشافت الساعه 12:30 ومايد بعده مارد...حست بنغزه في قلبها..وسارت تدق على تلفونه بس لقته مغلق...
ردت تدق مره ثانيه وثالثه ورابعه بس بدون فايده...طاح قلبها من الخوف...ويلست في الصاله تترياه....وطول الوقت ووصلت الساعه 1:45 ومايد مارد...على طول ظبيه سارت حجرتها وتمت تصيح وتصيح...خافت توعي ام مايد وتتوحش عليها...
وبينها وبين نفسها...( ليش يا ربي ليش ...وينه هذا وين سار...بسم الله عليه من ظنوني ليكون بس صار فيه شي...والله ما اسامح نفسي ابد..كله بسببي اللي يصير لو اني ما عاملته بهالطريقه ..جان ما ظهر من البيت وهو متضايج...الله ياخذني يارب ...وتخليه يا رب و ما يستوي به شي...)
وتميت تصيح من قلبها...لين ما غفت وهي تصيح.....
وشوي وصل مايد ودخل الحجره ولقاها يالسه على الارض ويهها حاطتنه على طرف الشبريه..ومغطيتنه بايديها..واستغرب منها هالشي اللي مسوتنه...بس قرب منها وهزها شوي .. بكل بحنان رقه...
مايد بهمس: ظبيه ...ظبيه...
رفعت راسها وبطلت عيونها شوي ما رامت اكثر من مد النظر..كانن متورمات من الصياح....
مايد بحنان ورقه: حبيبي قومي انسدحي عدل..مب زين ترقدين على الارض بعدين بتتعور رقبتج...
هي بعدها مب مستوعبه شي....وهو سار عنها يبدل ثيابه ويشل سفرته والعقال....ويوم تأكدت انه هو مايد بلحمه جدامها...قامت لين عنده ..
ظبيه وهي مثل الياهل لف وشافها واقفه وراه...وشوي وتنفجر ...ودموعها مثل البحر على ويهها...واول ما لف..عقت عمرها بحضنه..وانفجرت صياح....
لوى عليها وهو مستغرب..بس ابتسم مع انه ما يدري شو السالفه..وهي لاويه عليه مثل الياهل بعدها مب مصدقه انه موجود...وتعلق فيه اكثر واكثر..وتدفن ويهها قد ما تقدر في حضنه..تأكد لنفسها انه صدج موجود جدامها...
مايد: حبيبي شو فيج انتي تعبانه...؟؟
ظبيه وهي تصيح: ليش تأخرت ليش...خفت عليك...
مايد شكله ما استوعب شي وخاف على ظبيه..مب مصدق اللي اذنه تسمع...وهي تصيح بحظنه وتكمل باقي كلامها...
ظبيه: رفجة عليك لا تتأخر مره ثانيه والله قلبي مات من الخوف والله دخيلك يا مايد ما بقى لي الا انت..
مايد بغى يموت مب حاس الا وهو يضمها حيل لقلبه يحسسها بحنانه وبالامان...دمعت عينه مب مصدق ولا مستوعب...
مايد: اسف حبيبتي ..ما دريت الا اليوم اني اهمج...
وسارت ظبيه وغسلت ويهها ويلست عنده وهو يسولف لها ويضحك ويغير جو...لين ما هدت...
مايد: شو رايج اغني لج...
ظبيه: من زين صوتك...
مايد: افا تونا كنا حلوين شو استوى بج...
استحت ظبيه: يالله غني بسمع صوتك...بس ما حيده حلو...الله يصبرني...
مايد: احم احم.....
وغنى له .." لي بنت عم ما وطت درب الادناس..ما دنست يوم النسا يدنسني..ضربتها وانا اح...."
ظبيه قاطعته: هييه انت شو ضربتها وطلقتها ..ماحب هالاغنيه...لا تفاول علي بالشر....
ضحك مايد وتموا سوالف وعقب قاموا يرقدون.....
..................................
وفي غرفتهم يالسين ...
ظبيه: مايد مرت فتره انا ما شفت فيها اهلي .. فديتك بسير اليوم عندهم..
مايد: حق شو تسيرين اذا يبونج بيون يسلمون عليج..
ظبيه مستغربه: بس انا بعد ودي اسير البيت واشوف ابويه..واتطمن على احمد واسلم على اخواني ..
مايد : خلاص العصر بنتفاهم ان شاء الله...
ظبيه تمت بحجرتها وطلع مايد من الحجره وسار الصاله يلس يجلب القنوات ما يعرف شو يسوي واخر شي وقف على قناة السعوديه الاولى وخلاه على صلاة الجمعه منقوله من مكه...
ويته امه ويلست عداله...
ام مايد: ليش يالس هني لروحك...وين هالذيبه عنك..
مايد مبتسم: حرام عليج هاي مهما كان حرمتي وبعدين يمه فديتج ما سوت شي وحليلها الطوفه بترمس وهي ما بتقول شي...
ام مايد: مسكينه...والله محد مسكين الا انا...هي بتسكت بس الله يعلم شو بيطلع من وراها...
مايد: خلاص افرحي بترتاحين اليوم منها...
ام مايد وتغيرت ملامحها: ليش ان شاء الله انت وهي وين سايرين....؟؟؟
مايد: ما بنسير مكان بعيد...وبعدين كنت بشلج ويانا بس انتي ما تحبين تروحين له..بوصلها بيت اهلها...
ام مايد: لاء ماله داعي حق شو تسير بيت اهلها..يلسوا هني ما شي سيره..
مايد: بس انا وعدتها...
ام مايد: والحين منهي امك انا ولا هي..ومن اللي بيهمك رضاها..انا ولا حرمتك..
مايد ساكت ولا همسه...
ام مايد: انت خلاص طلعت من شوري وما عاد تسمع رمستي من عرست ويبتها البيت عندنا...ولا جني امك اللي سهرت عليك وربتك...ويت وخذتك مني جاهز مجهز...
سمعت ظبيه صوت ام مايد وكان عالي ومسموع وواضح...ويلست بالحجره ولا طلعت...
وشوي وقام مايد ولا رد على امه..
واذن العصر وقامت ام مايد بتصلي وسار مايد المسيد ورد حجرته...وشاف ظبيه منسدحه علىالشبريه...يلس عدالها..وهي قامت وعدلت يلستها...
مايد يحاول يسوي نفسه عادي قد ما يقدر ولا وده يقول لظبيه كلمه تجرحها..
ظبيه: ليش ساكت...؟؟
مايد يطالع فوق ويقلب نظره بكل مكان: امم ما ادري شو اقولج...
ظبيه: عادي مب لازم اسير خلاص يوم ثاني ان شاء الله....
ما استغرب مايد ان ظبيه تعرف لان صوت امه كان مسموع لكن اللي استغربه كيف تنازلت بهالسهوله...
مايد : ظبيه حبيبي عادي وعد بنسير صوبهم مره ثانيه...
وقامت ظبيه بتسير تصلي وهي تمشي وبصوت مب واضح: ان شاء الله جريب...
.................................</font>

[شمس دبي]

<font color='#000000'>القصة غاية في الروعة بس كملييييييييييها &nbsp;
<img src="http://oasis.bindubai.com/emoticons/mad.gif" border="0" valign="absmiddle" alt=':angry:'> <img src="http://oasis.bindubai.com/emoticons/mad.gif" border="0" valign="absmiddle" alt=':angry:'> <img src="http://oasis.bindubai.com/emoticons/mad.gif" border="0" valign="absmiddle" alt=':angry:'>
بليييييييييز <img src="http://oasis.bindubai.com/emoticons/down.gif" border="0" valign="absmiddle" alt=':dd:'></font>

[بن دبي]

<font color='#000000'>الله يسامحج يالكاتبه ،حني عليها دوم يالشيخه عين الدماني لين ماتنخ لمطالبنا وتكمل القصه أدريبج مابتقصرين فيها يالشيخه</font>

[رمال دبي]

<font color='#F660AB'>يارب &nbsp;الكاتبة تكمل القصة &nbsp;نحن نتظر القصة بفارغ الصبر وحاولي مثل ما قالج اخوي مقاتل الصحراء &nbsp; بلييييييييييييييييييييييي ييييييييييييييييييييييييي ييييييييييييييييييييييييي ييييييييييييييييز<img src="http://oasis.bindubai.com/emoticons/down.gif" border="0" valign="absmiddle" alt=':dd:'> <img src="http://oasis.bindubai.com/emoticons/down.gif" border="0" valign="absmiddle" alt=':dd:'></font>

[عاشقة الكتب]

<font color='#000000'><span style='font-size:13pt;line-height:100%'>ا<span style='color:orange'></span>لقصة واااااااايد حلوه
بليييييييييييييييييييز <img src="http://oasis.bindubai.com/emoticons/down.gif" border="0" valign="absmiddle" alt=':dd:'> <img src="http://oasis.bindubai.com/emoticons/down.gif" border="0" valign="absmiddle" alt=':dd:'> &nbsp;كملووووووووووووووووها<i mg src="http://oasis.bindubai.com/emoticons/mad.gif" border="0" valign="absmiddle" alt=':angry:'> <img src="http://oasis.bindubai.com/emoticons/mad.gif" border="0" valign="absmiddle" alt=':angry:'></span></font>

[عين الدماني]

<font color='#728FCE'>شمس دبي: أول ما تكملها الكاتبة أنا بكملها... <img src="http://oasis.bindubai.com/emoticons/wink.gif" border="0" valign="absmiddle" alt=':;):'>

مقاتل الصحراء: لا توصي حريص اخوي.. انا دوم أحن عليها و معورا راسها..

رمال دبي: أفاا عليج.. أكيد بحاول... و شكرا عالإتظار

عاشقة الكتب: أنشاالله أختي بس السالفه يبالها طولة بال... &nbsp;<img src="http://oasis.bindubai.com/emoticons/sad.gif" border="0" valign="absmiddle" alt=':('></font>

[القلب المحتاس]

<font color='#000000'>مرحبا
كمليووووووووووووووووووووو وووووووووووووو &nbsp;القصه والله بموت من القهر انا <img src="http://oasis.bindubai.com/emoticons/mad.gif" border="0" valign="absmiddle" alt=':angry:'></font>

[كبيرة بعيوني]

<font color='#EE9A4D'>ثانكس عين الدماني وفي انتظار الباجي <img src="http://oasis.bindubai.com/emoticons/blush.gif" border="0" valign="absmiddle" alt=':b:'></font>

[عين الدماني]

<font color='#728FCE'>القلب المحتاس: أنا ودي أكمل القصة اليوم قبل باجر...


ريماني: welcome sis... انشاءالله ما بيطول الإنتظار..</font>

[شمه]

<font color='#F660AB'><img src="http://oasis.bindubai.com/emoticons/rock.gif" border="0" valign="absmiddle" alt='???'>
يا الله نتريـــــا..


<img src="http://oasis.bindubai.com/emoticons/inlove.gif" border="0" valign="absmiddle" alt=':lov:'>
شمــــــــــه</font>

[شهوووودة الأمورة]

<font color='#728FCE'>فديت ظبية انا ..
لو سمحتي أختي عين الدماني ممكن اتكملين لنا القصة والله متشوقة أبي أعرف شو بصير بسررررعة</font>

[عين الدماني]

<font color='#728FCE'>الحلقه الواحده والعشرون
وبعد نص سنه من زواج ظبيه..مرت هالست شهور مثل الجحيم اللي كل يوم يزيد بنظرها بينها وبين ام مايد...ومايد بين نارين ما يدري يرضي من ولا من...مع انه يدري ان ظبيه لا يمكن تعترض او تشكي ..بس بشكل ملحوظ كان مايد صاغر لاوامر امه...وما يرفض لها طلب..
وفي ليله من الليالي كانت ظبيه راده من العياده اللي جريب بيتهم بروحها...قريبه وسارت لها مشي..واول ما دشت البيت..لقت ام مايد في ويهها...
ام مايد: هاه من وين يايه.... ان شاء الله شبعتي دواره..؟؟؟
ظبيه: السلام عليج عمتي...
ام مايد: ولا عليج سلام ولا رحمه من الله...مب منج انتي من هالخديه اللي مخلنج على راحتج..ما يدري داخله طالعه ما درى عنج وين...
ظبيه: الله يسامحج يا عمتي انا توني راده من العياده وين بسير يا حظي ..من كثر العربان اللي اعرفهم...
ام مايد: خل عنج هالمسكنه اللي انتي فيها...لا تسوين عمرج طيبه ..وين كنتي..؟؟
ظبيه مبتسمه: عمتي الله يهديج ان شاء الله..ويحنن قلبج علي..فديتج عمووه..انا اليوم ابشرج اني حامل واخيراً بتشوفين احفادج وبتغدين يده...
تغيرت ملامح ام مايد وما عرفت بشو ترد...يمكن فرحت او ما عرفت بشو تكون ردة فعلها بس اكيد استانست لولدها ...وصدت عن ظبيه وسارت حجرتها...
........................
في الصاله الكبيره وعلى الكنب بطرفها...راشد يالس يجلب المجله اللي على الطاوله...ودخلت عليه عايشه وشمسه....ويلسن عنده...
شمسه: راشد متى بنسير دبي..ولهت على خوالي...
عايشه: هيه والله صدقها شموس..متى بنسير...؟؟
راشد: ما ادري تشاورن وعقب ردن لي خبر...كلمن علايه اختكن..
شمسه: وانت ليش ما ترمسها ...ولا مب اختك بعد....؟؟
عايشه: الله يهديك بس بعدك شال بخاطرك على سالفة بنت جيراننا...وين هاه زمن ولى ونسيناه...
راشد ما تكلم والظاهر بعده ماخذ وايد بقلبه على علياء اخته...حاط في باله انها قصت عليها وما نفذت له اللي بغى منها..وتم يقول بنفسه انها بس سايرته عشان يبعد عن ظبيه..
شمسه: ولهنا على ظبيه من يوم عرسها ما شفتها...خايسه نستنا...
عايشه: سمعت بنات يقولن انها تيي تزور اهلها بس ما تبات عندهم..
راشد نش من مكانه: زين انا بظهر الحين تشاورن علىسالفة خوالي وعقب ردن علي...
وطلع راشد وتمت شمسه وعايشه في الصاله...
شمسه: لين متى بيتمون متضاربين...هو وعلايه والله انا طفرت منهم...
عايشه: خلهم يوم يشبعون بيرضون...
شمسه: بس علايه مطنشتنه ولا راضته...
عايشه: انتي غبيه ولا تستغبين..ابى افهم...؟؟ هي شو سوت له عشان تراضيه..اصلا هي تباها من الله عسب يصطلب مب كل ما تمنته عينه وصله...
شمسه: جي يعني....
وسارت عايشه فوق عند عليا ولقتها يالسه في حجرتها...تعدل اوراق خاصه بالبنك...
علياء: مشغوله مابا حد يزعجني ..
عايشه: زين يا سيدة الاعمال الاولى ..بس نبى نسير دبي عند خوالي ..وراشد مب طايع لين ما نشاورج...
علياء: وليش ما يقول لي هو بنفسه....؟؟
عايشه: مادريبكم تخبريه وهو بيقولج....
علياء: سيرن لروحكن انا هب سايره وياكن عندي شغل...
عايشه: ما بيطيع الا اذا ييتي ..دخيلج عليوه لا تخربين علينا...
علياء: سيري انتي وشموس واسامي وحرمة ناصر وعيالهم...
عايشه: ما بيطيع ادري به الا اذا ييتي ويانا..يالله علايه بس عاد خل عنج العناد..بنسير كلنا رباعه دبي..وجان ما بغيتي تباتين عند خوالي..سيري بيت ختيه شواخي ورقدي عندها...ريلها مسافر المغرب...
علياء( تتأفف): زين يا عويش الحشره سيري والله عطلتيني وعقب بفكر....
وتدخل شمسه...
علياء: الحمدلله والشكر زيادة الخير خيرين...انتي شو تبين بعد..؟؟
وتلوي شمسه بدلع على علياء وتحبها على ويهها: فديت اختيه العوده انا اللي محد شراتها ومحد يسواها...فديت علايه يا ربي فديتها بروحي...
عايشه:هههههههههههههههههه
علياء وهي تحاول تسوي عمرها معصبه بس مبتسمه شوي: بدت المصالح...
شمسه: كلهن بنات العرب ما يسونج يا علايه انتي غير البشر غيرهم كلهم...
وتغني شمسه" انتي غير الناس عندي انتي عندي شي كبير..كيف بصبر وانا شايف ناس من حولك كثير..."
علياء: لا البنيه سالفتها مب سهله..وتغني بعد...&#33;&#33;&#33;
عايشه: لازم بعد شغل مصلحه...
علياء: شمسه قولي شعندج بسرعه لاني مب فاضيه....لا تمين تلفين وتدورين قولي بسرعه كل اللي تبينه...
شمسه تستهبل: ومن قالج اني بغيت شي..انا بس ييت احبج واقولج اني بسير حجرتي ارسم..وحبيت اني اسلم على اختي العوده...
علياء: زين يالله انتي واختج المحروسه عويش قومن من عندي ..وراي الف شغله وشغله...
شمسه: علايه...
علياء: قررتي تتكلمين شكلج...
شمسه: دخيلج تعالي ويانا دبي والله ان راشد ما بيخلينا الا اذا ييتي ويانا...
علياء: قولي جي من البدايه وفكينا...
شمسه: والله ما فيني صبر دخيلج علايه والله ادري اني ما هون عليج ولا يطاوعج قلبج اني اتم وهي بخاطري رفجة نسير دبي متى ما تبين...
علياء: شموس عقب نتفاهم سيري ويا عويش الحين...
عايشه: يالله شموس خلاف بخبرج شو قالت لي علايه..الحين بنخليها تكمل شغلها..
شمسه وهي بتطلع من الحجره: علايه غناتي فكري بالموضوع عدل ما يهون عليج تكسرين بخاطريه...
علياء: زين بس سيري عني الحين...
..............................
في صالة بيت بو سيف...احمد يالس يرمس بالتلفون...وعيسى يقلب القنوات...يطلع بو سيف من حجرته..ويسحب واير التلفزيون...
بوسيف: شتبى بالقنوات انت خربت ازرار الجهاز وانت احولن عيونك من زود ما تجلب بهالقنوات...قم حجرتك وارقد ابرك لك..خسارة كهربه عالفاضي...ماشي شغله..
احمد: الحمدلله والشكر...
عيسى وهو مغيض: احمد تعال معاي فوق ابيك بسالفة ضروريه..
وقام احمد وخلوا الصاله باللي فيها لابو سيف...
احمد وهو راكب الدرج: اشبع بالبيت لروحك مصيرك تشوف اللي شفناه..
بو سيف: فارج فقدت هالويه ان شاء الله ...يالله يال........
بند بو سيف ليتات الصاله وسار حجرته وبند الباب...وفوق في غرفة عيسى...يالسين وعيسى مغيض...
عيسى: والله خاطري اجتله اففف مليت منه لين متى ونحن بنتم جي...
احمد: الحمدلله للحين ما تحرش فيني ..اباها من الله عشان اسنعه زين...
عيسى: والله اني كارهنه من الخاطر...
احمد: بدري عليك هالشعور جان صبرت شوي...
عيسى: احمد براسي فكره شو رايك بها...؟؟
احمد: شو..؟؟
عيسى: باجر الصبح بنش من الساعه 7 عندي لك مكان (إنما ايه) بتتخبل عليه...
احمد: ليكون بتوديني بيت الغوله..بصراحه انا اخاف...
عيسى: هههههه لا ما بوديك بيت الغوله..مكان احسن منه بوايد...وبتستانس...
احمد: عيل يالله نرقد ورانا مهمه باجر..
عيسى ( وهو يطالع بنظره غريبه مع ابتسامه خبيثه): هه الا مهمه..حبيبي ورانا مهمه انتحاريه ويا انا يا انت يا بو سيف...
.................................
الساعه 1:20 بعد منتصف الليل...على صوت راشد الماجد....
"يا خسارة وقت في حبك قضيته ..ضاعت احداثه هدر طول الليالي..روح انا ماني بمتحسف بعادك ..بس اعزي من بيرضى بك بدالي.."
كان احمد يالس في حجرته..يسمع ويفكر وما عنده أي شي غير هالموضوع..يبى يطلع البنت من تحت الارض غصب طيب..تفكيره مب راضي يقتنع ان كل اللي يسويه غلط وان فكرةاللعب بمشاعر بنت اكبر غلط..والغلط الفادح هو انه يتمادى في الغلط...
ابد مع انه انسان عاقل وفاهم ومتعلم وكل فرص الحياه توفرت له..وعوضه رب العالمين بدل نعمة الكلام..الف نعمه ونعمه...المنصب وحب الناس..والتوفيق في حياته وهذا اهم شي...صح انها اشياء ما تعوض ولكنها تشغل النفس عن الاحساس بالنقصان....بس شعوره مب راضي يقتنع ان ظبيه صارت ضرب من ضروب الخيال ومصر على انها تكون له وانه يوصل لها باي طريقه...
........................
في المطبخ في بيت مايد...ظبيه يالسه تغسل الصحون ..ومايد واقف يسولف وياها..ويضحكون...
مايد: ظبيه بسير لامايه وبشوفها..اكيد بتعصب لو ما سويت لها سالفه...
ظبيه: حشى مب عمه هذي عديله...
مايد: هاه حبيبي شو قلتي..
ظبيه: لا ما شي بس قلت وحليلها سير تطمن عليها..
مايد: فديتهم يا ربي اللي يتنازلون...
وطلع مايد وسار لامه...
ظبيه تتحرطم: مب منك..منها هي..اكيد تلاقي نص عرب الفريج يبون يغيرون السكن من هالشارع...حشى مب حرمه..شخيرها واصل خورفكان...
وسار مايد لامه...ودخل حجرتها...
ام مايد: اخيرا عطتك الاذن تييني...اشوفك ما بغيت تيلس وياي..
مايد: افا عليج امايه والله اني من الصبح اقول بمر عليج..وبعدين كلنا نفس البيت..
ام مايد تسوي عمرها تصيح تبى تكسر خاطر مايد...
ام مايد: خلاص يا مايد لقيت لك حرمه تهتم بك وانت تنشغل بها..وانا محد لي في هالدنيا الا انت..حتى اختك مريم سارت ولا نشدت عني...واليوم اشوف هالذيبه بتاخذك مني...
مايد: افا عليج من قال ..انتي الاصل يمه ولا غيرج...بس بعد هذي حرمتي وام عيالي..ولا تنسين انها حامل..ولازم لها رعايه خاصه..وما شي شغاله يعني كل شي على راسها...
ام مايد: زين خلك وياها والله عمري ما برضى عليك...
مايد ما عرف شو يرد على امه...وحبها على راسها وصدت عنه...وطلع وسار عندظبيه...
وسار صوب المطبخ وما لقاها...ورد صوب حجرته...بس ما لقاها بعد...
مايد"اكيد سارت صوب الحمام.."
وشوي ودخلت ظبيه...وشافت ويه مايد معتفس ومتضيج..وحست انه فيه شي...ويلست عداله...وهو يالس على طرف الشبريه ومتسند بايديه وماسك راسه..
حطت ايدها على كتفه....ونزلت راسها لين ما شافت ويهه..وابتسمت...
ظبيه: شو فيه حبيبي زعلان...منو اللي مضيج به ومن اللي مزعلنه...
رفع مايد راسه وابتسم لظبيه: من اللي يضيج خاطره و ظبيه بالدنيا...
ظبيه: بس شكلك متكدر...شو فيك ليكون بس عمتي قالت لك شي..
صد مايد شوي بويهه..ولا تكلم...
ظبيه: زين انا قلت لك من البدايه حاول ترضيها وما عليك مني انا فاهمتنك عدل..وادري انك تحبني..بس هي المشكله فاهمه اني باخذك منها..فالافضل يا مايد انك تتم وياها اكثر...عن تتحرى اني احرضك عليها..
مايد: لا يا ظبيه ..انا اذا بينت لامي اهتمامي فيها واهملت حقج علي..ما بتعطيني يوم من الايام أي فرصه اني اعطيج ابسط حقوقج...
ويتنهد بعمق...وتسكت ظبيه...
مايد: احس عمري بين نارين ...يا رب ارحمني...
ظبيه: انا مب نار..ولا طلبت منك شي...هاي امك وتفاهم وياها..وعمري ما فكرت احط راسي براسها...
مايد: ادري والله ادري...بس بعد اتم معلق بين طرفين...ولو انج ما رمستي بس انا من داخلي اتعذب..
..............................
بدت المشاكل تزيد بين ام مايد وظبيه..وتزيد المشاحنات ومحد محترق قلبه في السالفه غير مايد...اللي وده الموت ولا يشوف اللي يشوفه..وبعد فتره طويله ومايد في دوامه...
ظبيه تسوي الغداء...وخلاص شبه مستوي...يعني تقريبا الساعه 1:30 الظهر ...سارت وهي متأخره بتصلي الظهر وتتسبح قبل ريلها يوصل البيت...
عقب ما ظهرت ظبيه من المطبخ دخلت ام مايد بس ظبيه ما شافتها....كانت ظبيه طابخه صالونه وعيش ابيض..الغداء اللي يحبه مايد...
وفي تصرف لا مبالي وخالي من الانسانيه...فتحت غطا الجدر ام مايد وحطت لها شوي في صحن صغير..وعقب شلت الجدر اللي طابخه عليه ظبيه الغداء وصبته كله فوق مغسلة الصحون....وسارت صوب حجرتها بسرعه ومعاها الصحن اللي شلت فيه الاكل وصكت ع روحها الباب ولا كنها سوت شي...
في غرفة ظبيه خلصت صلاتها وحطت شوي ميك اب عشان ريلها وتعطرت عقب ما خلصت الغدا..وسارت تفرش سفرة الاكل في الصاله...
ودقت على عمتها الباب...
ظبيه: عمووه...يالله تعالي الحين بيوصل مايد قومي يالله بنحط الغدا...
وطلعت ام مايد ويهها معتفس ومسويه روحها تعبانه...
ام مايد: شو طبختي اليوم..؟؟
ظبيه: صالونه وعيش ابيض...اللي تحبينه انتي ومايد...
ام مايد: الحمدلله كنت بقولج الضحى ان خاطريه فيه...
ظبيه تتحرطم" هه ما همني الا انتي..والله اني بس مسويتنه عشان ريلي..ولازم اقص عليج شوي.."
ام مايد: هاه شو قلتي ...شو بلاج تتحرطمين..؟؟
ظبيه: لا ما شي بس اقول اهم شي عندي اسوي اللي يعجبج...
ودخل مايد وشاف ظبيه واقفه ترمس امه وهي يالسه في طرف الصاله عند باب حجرتها....ووابتسم من خاطره...
مايد: السلام عليكم ورحمة الله وبركاته...
ظبيه وام مايد: وعليكم السلام والرحمه...
ويهوي على راس امها وحبها ...
ووقف عدال ظبيه...ولف ايده على كتفها....
مايد: الله يصلح ذات بينكم ان شاء الله...
ظبيه: امين...
ام مايد: سيري حطي الغدا ريلج تعبان ..وراد من الشغل هالك...
ظبيه: ان شاء الله عمتي...
وسار مايد صوب حجرته وظبيه سارت صوب المطبخ......اول ما دخلت شافت جدر الصالون فاضي والاكل كله في المغسله...حطت ايدها على ويهها....وصرخت...
وسارت صوب الصاله بسرعه ولاول مره....
ظبيه: انتي شو عندج من احساس ..؟؟؟انتي من شو مخلوقه ما تحسين انتي ما تفهمين ...؟؟ خلاص طفح الكيل معاج....
ام مايد تصارخ وترفع صوتها: ماااااااااااايد الحق على حرمتك ....
وطلع مايد بسرعه من حجرته مب مصدق اللي يسمعه...وشاف ظبيه يالسه تصارخ في ويه امه....وامه مسويه روحها مب فاهمه شو الموضوع...
مايد: ظبيه بس عاد شو مستوي...
ظبيه وهي تصارخ: تخبرها شو مسويه..حشى جني ماكله حلالها ولا جاتلها حد من اهلها...تخبرها شو سوت ..قل حق امك شو مسويه في الغدا...
مايد: امايه شو مستوي....؟؟؟
ام مايد ببرود : ما ادري بها خرفت الحرمه...انا من الصبح يالسه ما ظهرت من حجرتي...ما ادري حتى عن شو ترمس..
مايد: ظبيه ممكن تهدين وافهم الموضوع....؟؟
ظبيه: خلاص يا مايد طفح الكيل انا ما روم اصبر اكثر عن جي ..اذا انت مب قد انك توقف امك عند حدها...ردني بيت ابويه..وفكني وعش وياها وبالعافيه عليك انت وهي...
مايد مصدوم: ظبيه شو هالرمسه..؟؟
ام مايد: من زينج محد يباج والله وفرقاج يوم عيد...بنت فقر منتي شايفه خير...
ظبيه: ما يخصج فيني ...شوفي عمرج اول ..مينونه انتي والله...سير عالج امك بدل ما هي منغصه علينا حياتنا...
مايد عصب على الاخر ولاول مره مسك ظبيه من ايدها وطالعها بنظره حاده: احترمي نفسج هذي امي ومالج حق ترمسين عنها...ولا تعطين عمرج أي صلاحيه ترفعين صوتج في ويهها....
ابتسمت ام مايد ابتسامة انتصار وشلت عمرها وسارت حجرتها....
ظبيه تجمدت وما عرفت شو ترد على مايد بس سحبت ايدها من ايده...وسارت هي الثانيه صوب حجرتها...
يلس مايد في الصاله وهو بيموت من التعب توه واصل من الدوام...وحط ويهه بين ايديه ...وتم متلوم شو سوى بغناة الروح ظبيه..بس بعد ما كان يرضى امه تنهان جدامه...
" يا ربي شو هالحياه..؟؟ وين اسير وين اروح...هذي امي وهذيك حرمتي..تعبت يا ربي ارجوك دلني على درب الصواب..."
في حجرة ظبيه يلست تصيح وتصيح مب مصدقه ..مايد اللي يحبها حب مجنون..محفور في قلبه من الطفوله...حارب الكون كله وفاز بقلبها...اخر شي يخذلها ويتخلى عنها في امس الحاجه له..
من قهرها تمت تصيح وتصيح ..وقامت ترتب اغراضها...وحطتهن في شنطتها وطلعت الصاله...ودقت التلفون ومايد يالس وهي ما تشوفه..
ظبيه: السلام عليكم..
احمد: هلا والله ومليون مرحبا وسهلا ولا يسدن وان زادن شوي لا باس....
ظبيه: شحالك احمد..؟؟
احمد: بخير وسهاله الغاليه علومج غناتي والله اني ولهت عليج...
ظبيه:انت وين الحين..؟؟
احمد: هني في بوظبي ويا عيسى ..بنرد الحين البيت ..تبين شي..؟؟
ظبيه: هيه مروا علي ...بسير وياكم...
احمد مستغرب: الحين.؟؟
ظبيه: هيه الحين وبسرعه....
احمد: شي مستوي..؟؟
ظبيه: اوووه عاد يا احمد ما في شي بس تعال وخذني بسرعه...
وبندت ظبيه من عند احمد وسارت صوب الحجره وشافت مايد في الصاله بس طنشت وسارت ولبست عباتها تتريا احمد اخوها....وقام مايد ودخل عندها...
مايد: بتسيرين بيت اهلج..؟؟
ما ردت ظبيه وتمت ساكته وتطالع الارض...
قرب منها مايد ويلس على ركبه عدالها....وتم يطالعها وهو متندم على اللي صار...
مايد: ظبيه لا تسيرين ..الله يخليج...
ظبيه: اشبع بالبيت انت وامك ما ريد اعيش هني...يوم تتخلص من تسلطها تعال خذني من بيت اهلي وانا ما برد قبل يستوي هالشي...
نزل كلام ظبيه مثل الخناجر في قلب مايد...متألم بدرجه فضيعه ..ومسك عمره ما يسوي شي..وعارف عمره انه غلط...
ظبيه: انا توني راد من الدوام راعي حالتي ..ابى ارد الاقي حرمه تضحك بويهي ...وبيت كله راحه ينسيني هموم الشغل.وشو لقيت غير الهم والغم وويع الراس...
ما ردت عليه ظبيه...وشويه ويدق جرس البيت ويقطع كلام ظبيه ومايد..
ظبيه: انا بسير اكيد هذا احمد....
وشلت شنطتها...وطلعت وصكت الباب...ومايد وراها...يتقطع من الحزن اللي في قلبه ما يدري شو يسوي بحياته....
وخلت ظبيه البيت لمايد وامه ..ما يندرى شو اخرتها وياهم.....
.................................</font>

[بن دبي]

<font color='#000000'>يالله شو هالاحداث اللي صارت والتكلمه كالعاده متى انشالله الشيخه عين الدماني
أذيتج صح بس ماعليه لما تخلص القصه بتفتكين من صدعتي ،ماوصيج قوليلها تعبتينا يالكاتبه كملي بسرعه ما بقت فينا أعصاب دخيل والديج كمليها</font>

[القلب المحتاس]

<font color='#000000'>مشكوره اختي على التكمله ونتريا الباجي.. <img src="http://oasis.bindubai.com/emoticons/blush.gif" border="0" valign="absmiddle" alt=':b:'></font>

[كبيرة بعيوني]

<font color='#EE9A4D'><img src="http://oasis.bindubai.com/emoticons/down.gif" border="0" valign="absmiddle" alt=':dd:'> &nbsp;هلكت وانا اتريا .. لووووووووولز<img src="http://oasis.bindubai.com/emoticons/tounge.gif" border="0" valign="absmiddle" alt=':p'></font>