<font color='#F660AB'>اسمحيلي اختي حصلت جزئين و حبيت اضيفهن
الحلقه الثانيه والعشرون...
تمت ظبيه في بيت اهلها ...ومايد ما سار لها ابد ولا دق ولا تخبر عنها ولا أي شي ..وسارت ظبيه الطيبه المسكينه ..معانده وملزمه على رايها وبس..
احمد وعيسى حاولوا فيها قد ما يقدرون..بس كان ردها الدائم..
" جحيم ابويه ولا عذاب عمتي ام مايد"
..وقامت ظبيه تعاند في كل شي وكأنها تنتقم من حياة الظلم اللي عاشتها مرتين في الناس اللي حواليها...
الناس بدت تلاحظ تصرفات ظبيه الغريبه...وتعلمت ظبيه كلمة "لاء" ولا قامت تسوي لاي حد سالفه..
الزم ما عليها تسوي لنفسها ولابوها اللي قامت تهتم به اكثر عن قبل خصوصا بعد ما كبر...
بو سيف رغم كل الظروف اللي ضده وكل شي منجلب عليه سواء من عياله ولا من هله ولا من بنت اخوه وحرمة ولده مريم..
بس ما زال متماسك وقوته للحين فيه..ابد ما انتهت نزعة الشر اللي بداخله..وتم رغم كل شي ظالم متجبر...بس لين متى..؟؟
عيسى واحمد ما قاموا يسوون له سالفه...ويعاندونه اكثر..لا والمصيبه الاكبر انهم متفقين على شي بس منتظرين الفرصه متى تحين..
وفي بيت بو سيف....ظبيه يالسه في الصاله مع مريم ...
مريم: ظبيه انتي متى ناويه تردين بيت ريلج مب حلوه بحقج تمين هني...وين كل العرب بيرمسون عنج..هاده بيت ريلها وهي حامل...
ظبيه: خلهم يرمسون محد عاد يهمني خلهم يشبعون رمسه..مليت انا من كثر ما اراعي مشاعر الناس ومحد يهتم بمشاعري...
مريم: بس مايد ما سوا شي وتعرفين انه شاريج ويحبج..ومب عشان كلمه وكلمتين تهدين بيت ريلج..تراج صرتي ملزومه...ومب بكيفج تسيرين حياتج...
قامت ظبيه من عند مريم ...
ظبيه: انصحي عمرج اول...اذا بتدخلين سوالف الدين في الموضوع...
رمسي عمرج اول وقولي لي هل الشرع حلل لحرمة الاخو تتصرف في بيت اهل ريلها مثل ماتبا وتمشي بكامل زينتها جدام اخوان ريلها ..
وترفع صوتها وتتحكم في كل شي ولا جنه في البيت رياييل...
هني مريم سكتت وسارت ظبيه حجرتها وصكت ع روحها الباب...الحين ظبيه غير عن اول بدت تحس بكل اللي يصير حواليها بس في وقت متأخر..
حوالي العصر يعني على الساعه 5:30 تلبست ظبيه...وطلعت الصاله...وابوها كان يالس يشرب شاهي لروحه...سارت وهوت على راسه وحبته ويلست عداله..
ظبيه: شحالك ابويه...
بو سيف: مثل ما تشوفين من ردي لأردا ...
ظبيه: بسم الله عليك شو تحس عمرك تعبان..؟؟
بو سيف: لا مب تعبان بس حال اخوانج مب عايبني...
ودخل احمد الصاله...واشر بو سيف لظبيه انها تسكت وتغير الموضوع...
احمد: سلام..
ظبيه : وعليكم السلام..
احمد: متى بتردين بيت ريلج...؟؟
ظبيه: يوم بحس اني ابى ارد برد..بس الحين مب سايره...
احمد بعصبيه: مب بكيفج يا ظبيه هذا ريلج وانتي ملزومه فيه...خلي عنج هالشغلات البايخه...
بو سيف: اسكت بس من متى صرت وصي عليها...مالك شغل فيها..
احمد يكلم ابوه بإحتقار: اسكت اسكت انت اللي مالك شغل فيها...والله ثم الله لولا هالنفس اللي ببطنها واحتراماً لوجودها لافرك في الشارع...
وكان على الارض صينيه فيها اكواب الشاهي طيرهن احمد بريله وتناثر الشاهي على ظبيه وبو سيف ...وسار حجرته وصك على روحه الباب...
ظبيه: ابويه لا تعصب عادي هاه ريال وطايش و...
بو سيف وهو يبعد ايد ظبيه عنه بقوه: فارجي انتي الثانيه الله لا يوفقج انتي وهو....
وقامت ظبيه بسرعه الظاهر ان ابوها رد لحالته الجديمه...وسارت تتلاحق على عمرها وترحم اللي ببطنها قبل لا يستوي به شي..
دخل بو سيف حجرته ..وظبيه وقفت عند باب حجرتها... ويلست تدور ببالها هالحياه اللي تعيشها..وما تدري شو اخرتها في هالدنيا...وهي تفكر دخل عيسى..
عيسى: بسم الله الرحمن الرحيم..الله يا كافي...ليش واقفه جي عند الباب مثل الفقيره البائسه...؟!!!
ظبيه: ولا انا شو اصلاً..؟؟ صدقك فقيره وبائسه..هب الا تشبيه والله انك ما قلت الا الصدق..
عيسى: زين غناتي شو مستوي...؟؟
ظبيه: ابويه واحمد...
عيسى: الله يغربله من شيبه والله هب مصطلب انا اقول من زمان بسوي شي بس اتريا واقول اعقل يا عيسووه اخاف الا يتغير ابوك..بس ذيل الكلب بيتم طول عمره عوي..
ظبيه: استح ع ويهك يا عيسى عيب ترمس عن ابويه جي..
عيسى: زين يا الام تريزا...وشو بعد...يا ام المبادئ انتي...؟؟
ظبيه تضحك: هه ما شي بس هذي حالنا من شقا لشقا...
عيسى: زين ظبيه عندي لج اقتراح...
ظبيه:هاه شو..؟؟
عيسى: شو رايج تسيرين على بيت بو حمدان عيب ما سرتي لهم وما يدرون انج هني عندنا بالرحبه..ولا نسيتي اللي سوته لج بنتهم يوم عرسج..؟؟
ظبيه: ولا عسب شو متعدله انا والله اني ييت بقول لابويه بس احمداني الله يهديه خرب علي..
عيسى: يالله سيري رخصتج معاج وسيري عليهم...
ظبيه: الحين بسير لهم...
..........................
سارت ظبيه بيت بو حمدان...وكانت متعدله وغير عن المرات اللي كانت تسير لهن فيها....
وعلى الباب تدق بس محد فتح...وتمت تدق وقبل لا ترد فتح لها الباب... المزارع مالهم..
عبدالرحيم: تفضل ماما في بنات داخل...
ظبيه: علياء هني..؟؟
عبدالرحيم: هيه في هني بس في حرمه داخل هذا بيت ماما شيخه وبيت ماما اميره...
ظبيه مستغربه: وانا شعرفني فيهم المهم ما علينا ..
وسارت ظبيه داخل البيت...ودقت باب الصاله...وطلعت لها عايشه وبنت اختها ريما.....اول ما شلت ظبيه غشوتها ..انصدمت عايشه ...
عايشه: ظبيووووووه والله اني مب مصدقه اللي اشوفه...
ظبيه: هلا والله فديتج والله ولهت عليكن...
ورحبت بها ودخلتها الصاله وشافت ظبيه سهيله وفاخره بنات خالة علياء واسماء ...
شموس اول ما شافت ظبيه سارت صوبها ولوت عليها ويلست عدالها...وعايشه عرفتهم على بعض..
فاخره: شايفتنها من قبل عندكم...
عايشه: هيه صح والله احيد يوم حفلة سلطاني ولد شويخ...
ويلسن سوالف وضحك وعن العرس ..وكل شي ..وسارت شمسه فوق بتخبر علياء عن ظبيه...وفي غرفة علياء...
شمسه: علايه...انتي بزي ولا شو...؟؟
علياء: اذا تبين شي مني انا بزي واذا بس الا رمسه انا مب مشغوله..
شمسه: تطمني مابا شي منج...بس انزلي تحت عندنا ناس...
علياء: زين يا شموس يا اختي اللي ما تفهم ..كم مره قلت لج الا هن بنات خالتي واختي عقب بنزلهن ما شي كلافه...
شمسه: لاء في غيرهم...
علياء: من ..؟؟ ريلج عبدالرحيم..؟؟
شمسه تتمصخر:هاهاها ضحكتيني بس بايخه...يالله فزي من طولك يختي وسلمي على ظبيه عندنا...
علياء مبتسمه ومبطله عيونها: لا تقولين يا شموس والله ان طلعتي تخرطين علي شو بسوي فيج من عجايب الدنيا..
شمسه: اذا كنت جذابه بغسل الصحون اليوم مع البشاكير...واذا صدق طلعت ظبيه هني..بنسير دبي باجر...
علياء: دام انج راهنتي على دبي يعني صدق موجوده...بس اسمحيلي انا ما اقبل الرهان....
وقامت علياء ويا شموس ونزلن تحت اول ما شافت علياء ظبيه سارت صوبها على طول ولوت عليها...
علياء: جني مب مصدقه اللي اشوفه...ظبيه انتي هني ..؟؟
ظبيه: لا صدقي انا هي بشحمي ولحمي...
علياء: فديتج والله قطعتينا تحريتج نسيتينا..وقلت سلت بالعرس وما بتيينا..
ظبيه: افا عليج يا علياء ما عاش اللي ينساكم...
علياء: من متى انتي عند اهلج..؟؟
ظبيه: من ثلاث اسابيع وبتم عندهم وبطوّل...
استغربت علياء من كلام ظبيه بس فهمت في النهايه انه اكيد في شي بينها وبين ريلها...
فما حبت تسألها جدام اهلها والبنات وتمت تتريا أي فرصه عسب ييلست لارواحهن وترمسها على راحتها.....
ويوم أذن المغرب كلهن سارن يصلن ...واشرت علياء لظبيه انها ما تقوم..وعقب ما سارن للصلاه كلهن...
علياء: الغاليه تعالي بنصلي في حجرتي...
ظبيه: لا فديتج انا بسير اصلي في البيت ما فيني على ابويه ...
علياء: بس شوي وبننزل...
طلعت ظبيه مع علياء فوق ودخلن حجرتها وصلن وخبرتها كل شي من اول ما تراضت مع مايد لين سالفة امه...
علياء: انتي الغلطانه يا ظبيه...
انصدمت ظبيه من رد علياء الغريب واللي توقعتها بتوقف معاها في كل شي...
علياء: مهما كان ومهما صار هذا ريلج..انتي ملزومه فيه..مب أي شي يصير في يوم والثاني..
وانتي مزهبه شنطتج وشارده بيت اهلج زعلانه...يا ظبيه يا غناتي هذا ريلج يعني العون والسند والصاحب والحبيب ..
هذا ظهرج وابو عيالج..هذا اللي بتتسندين على ظهره لا كشرت سود الايام....مالج غنى عنه..
ظبيه: ويرضيج اللي امه تسويه...؟؟
علياء: غناتي..هاي مهما كان امه ومستحيل يهون فيها عسب حرمته...صح انج دنياه كلها بس لا تنسي هذي امه...
انا ما اقولج تقبلي الاهانات ..بس كوني اذكى منها وسايسيها وخذيها بالطيب ما تدرين ترا بعضهن شرا اليهال ما تيي الا بالدلال والطيب...
يا ظبيه مايد يحبج وشارنج لا تبيعيه برخيص...
ظبيه: ما ادري شو اقولج...
علياء: لا تقولين شي بس فكري في البيت عدل..وحطي ببالج ان هذا ريلج ...
ومصيرج يوم من الايام تردين لها لو شو ما استوى...ربج باجر تييبون عيال ويتعدل الجو...
ظبيه: ما شي فايده ..علياء انا حامل..تحريت امه بتتغير عقب الحمل بس والله زادت...
علياء مبطله عيونها: يالخايسه وليش ما قلتي لي من قبل...الحين انا طلعتج لين فوق تبيني اتوثم فيج يالدبه..
مبرووووووك والله اني مب مصدقه..فديتها ظبيه يا ربي بتستوين ام ...والله اجمل شعور...
ظبيه: الله يستر ما يندرى شو مخبيه لنا الايام..
علياء: زين يا ظبيه..عشان خاطر هاللي في بطنج قومي...وسيري صلي لج ركعتين في البيت ...
وتذكري ان الله سبحانه وتعالى قال في حديث على لسان الرسول صلى الله عليه وسلم..بس انا مب حافظه الحديث نصاً بس هو بما معناه...
انه لو بيخلي انسان يسجد لانسان جان خلى الحرمه تسجد لريلها...وبعدين انتي طلعتي من بيت ريلج بدون رضاه..
والحرمه اللي تظهر من بيت ريلها بدون اذنه تلعنها الملائكه لين ما ترد..وانتي اذا خسرتي الراحه في دنياج اشتري رضا لله في اخرتج...
تنهدت ظبيه عقب رمسة علياء وراحت البيت..وفكرت في الموضوع...والله العالم شو بتقرر...
......................
في بيت بو مايد...كانت ام مايد مب مقصره في ولدها تحرضه على حرمته...وتضيق صدره منها...
كانت حاقده عليها وتبى تذوقها الويل..ودوم تحن عليه وتترس قلبه حقد عليها...
ام مايد: لو انها مسويتنلك سالفه جان ما ظهرت من البيت بدون شورك...
مايد ساكت ما يرمس...
ام مايد: مب مهتمه ويالسه في بيت ابوها الله العالم شو تسوي من عمايل..طلقها وفك عمرك...
انصدم مايد من رمسة امه..وما عرف شو يرد عليها...
وفي نفسه" لا لا اطلق ظبيه...؟؟مستحيل ظبيه غناتي لو شو ما استوى ورغم كل شي مصيرها ترد لي..."
وهم يسولفون دق جرس البيت وقام مايد يفتح الباب وطلعت له مريم اخته يايه تزورهم..وسلمت على مايد عند الباب...ولا بند مايد الباب يتحرى ظبيه وراها...
مريم: بند الباب يا حظي فيك...محد ورايه تتريا منو ...خلها ويا عيال جيرانهم...
انصدم مايد من رمسة مريم ومسكها من ايدها وفي عيونه سؤال دون ما ينطق...
مريم: زين تعال داخل ما تبيني اسلم على امايه...
مايد: لا تقولين أي شي من هالرمسه جدام امي...
مريم: اففففف زين...
وسارت مريم وسلمت على امها بس مريم شرات امها يموتن في المشاكل...
ما رضت تسكت وكانت تبى امها تسمع كل شي ...ولا احترمت رغبة مايد...ويوم امها يابت طاري ظبيه...رمست...
ام مايد: شو تسوي هالذيبه عندكم...مب ناويه ترد بيت ريلها...
مايد: امايه صكي الموضوع...
مريم: وانا ليش يايتنكم...الا عندي سالفه...
مايد: مريم بعدين...
ام مايد: شوفي كيف لاعبه براسه...حتى ما يبيني اسمع شو بتقولين..الله لا يبارك فيها...
مريم: سمعي امايه...هالحرمه مب هينه تعرفين ان شغالة جيراننا يتني قبل يومين..
وقالت لي ان ولدهم يحبها وكان قبل كل يوم يطرش لها ورد مع اخته الصغيره...انا روحي استغربت كيف خواته كانن مطيحات ببيتنا 24 ساعه..اوننهن يحبنها...
ام مايد: الله يلعنها الخايسه...ليكونن هذيلاك اللي زفنها وتمن وياها على الكوشه...
مريم: هيه امايه...
مايد يصارخ: جذب كل هالرمسه جذب.,..انتوا شفيكم تبون تدمرون حياتي...ليش يا مريم ليش الجذب...هاي حرمتي وام عيالي ...
مريم: جانك ما تبى تصدقنا دق راسك بالطوفه...
واذا بغيت تتأكد سير تخبرها ما كانت ببيتهم امس من العصر لين قرب اذان العشاء...
وانت ولا كأنك راعي الحلال تستأذن منك...مثل الطوفه مالك أي قيمه تتصرف على كيفها...
ام مايد: قلت لك لا تهين نفسك وطلقها بس انت ما بغيت الا ترابع وراها وتييب لك فضيحه....فكنا من شرها...
مريم خافت من هالسيره: لا امايه شو طلاق بعدين تأثرون علي انا وريلي...
ام مايد: بسم الله عليج انتي بنت ناس ومتربيه...بسم الله عليج شو تشبهين عمرج بالخايسه...
وقام مايد وطلع من البيت...ما يدري وين يسير تايه في ارض الله وكل هم الكون بقلبه..ما يدري شو يصدق ولا يصدق...وده لو الموت يي ويخطف روحه ويفكه من الدنيا...
"معقوله ظبيه المسكينه الطيبه تسوي كل هذا....الحين انا عرفت ليش كانت تكرهني.."
الشيطان بدا يلعب براس مايد والله العالم شو بيسوي....
...................
في الليل ظبيه تمت تفكر في مايد وكيف تعتذر له عن اللي صار..وفكرت في كلام علياء...وان مايد يحبها ومالها غنى عنه ومصيرها ترد له...كانت بتدق لها ييها بس الوقت كان متأخر وما بغته يمسك خط من بوظبي للرحبه...بس قالت بتدق وبتسلم عليه وتقوله انها ولهت عليه.....
وسارت صوب حجرة احمد وطلبت تلفونه ودقت حق ريلها...
مايد: الو...
ظبيه بهمس: السلام عليكم..
مايد وجنه شي قبض فواده ونزعه من مكانه: وعليكم السلام والرحمه...
ظبيه: شحالك حبيبي..
مايد: ظبيه..؟؟؟
ظبيه: عيل تتريا اتصال من وحده ثانيه..ما شي الا انا اللي بدق لك...
مايد: اشوفج تنازلتي...؟؟
ظبيه: مب تنازل ..انت ريلي وما بيني وبينك هالرمسه وما بخلي أي شي يخرب من بينا...
مايد كان متقطع من داخل بس يبى يسوي عمره مب مهتم: اها جي يعني..
ظبيه: شو فيك ترمسني ببرود..
مايد: هه يوم شبعتي تذكرتيني...
ظبيه منصدمه: شبعت من شو...؟؟
مايد: انتي ادرى...بس بقولج شي واحد...انا مب سبير عندج ..يوم ما تبيني يتيني ومتى ما مليتي سرتي بيت اهلج...سمعي يا ظبيه..خلج هناك احسن لج انا مالي حايه فيج...
ظبيه: انت شو يالس تقول...؟؟
مايد: اللي تسمعينه...انا ما بطول معاج..بس اباج تعرفين ان اللي ترمسينه ريال هب المارد اللي في المصباح..لا انا خدامج ولا خدام اهلج...
ظبيه: انت مب صاحي والله...
مايد: لا انتي اللي مب صاحيه ..انا الحين صاحي ومبطل عيوني عدل...قبل انا كنت مب صاحي يوم كنت مخدوع فيج...
ظبيه: انت شو اللي غيرك...
مايد: بخليج الحين ...
وصكر التلفون في ويهها...مايد كان متقطع مب مصدق كيف رمس ظبيه بهالطريقه..وهو وده الارض تبلعه ولا تجرحها النسمه...بس غصباً عنه..مجرد احساسه بخيانتها يخليه يسوي أي شي...
ظبيه في الطرف الثاني عايشه في جحيم مب مستوعبه ولا شي من اللي سمعته...مب مايد اللي كانت ترمسه قبل شوي...
" لا لا شكلي كنت مغلطه في الرقم..مستحيل يكون مايد...مايد ما يرمسني جي.."
بس فعلاً هذا كان مايد بعد ما شحنته امه واخته مريم على ظبيه...وخلن الشك يدخل في حياتهم...
..........
مرت فتره طويله يعني تقريباً اسبوعين بين مايد وظبيه...مايد عايش في جحيم وظبيه على نار...ما يدري كل واحد فيهم شو يسوي...ظبيه تبى ترد لريلها...وريلها عايش في اوهام اخته وامه.....
وفي المغرب دق احمد على ظبيه الباب....
ظبيه: ادخل يا احمد....
احمد دخل وصك الباب وتسند على الباب بس ما طول...
احمد: ظبيه ابى اقولج شي...
ظبيه وتغير شكلها وحست شي يقبض قلبها: ليكون شي استوى بمايد...؟؟
احمد: لا بخير ما فيه الا العافيه....بس..
ظبيه: بس شو لا تحرق اعصابي....؟؟
احمد: ظبيه مايد طلقج.....
........................
<span style='color:darkred'>الحلقه الثالثه والعشرون...
عقب ما قال احمد لظبيه ان مايد طلقها...ما قدرت تستوعب أي شي...
ظبيه وشكلها مستغبي على الاخر: احمد...شو قلت..؟؟
احمد يتنهد: اللي سمعتيه....
ظبيه: احمد دخيلك هالسوالف ما فيها مزح...
احمد قرب منها وحط ايده على كتفها: الغاليه هوني على عمرج وخافي الله في هالنفس اللي ببطنج..
ظبيه طاحت على الارض بقوه ومسكت راسها وصرخت: لييييييييييش يا مايد ليش...
حطت ويهها على الارض في وضعية السجود وتمت تصيح وتصيح....واحمد قلبه متقطع عليها...وسمع عيسى الصوت من الغرفه ودخلها بسرعه...
عيسى: ظبيه بسج عاد ما يسوى عليج اللي صار...ظبيه انتي تحملين روحين قومي وارحمي الروح اللي ببطنج اذا ما تبين ترحمين عمرج...غناتي الله يعوضج بخير ان شاء الله...
احمد: ظبيه بس عاد....قومي يالله..
ظبيه تصيح ودموعها على خدها نهر جاري: كيف اهونها يا عيسى كيف...هذا ريلي وابو عيالي ...والله لو ادري انها بتوصل لهالدرجه ما سويت شي ولا طلعت وتميت خدامه ببيت امه...
عيسى معصب ويطالع احمد: وانت يالغبي ما حصلت تقولها الا الحين يعني ما فيك صبر...زين جان ترييتني بنكلمها باسلوب ثاني...
احمد متلوم بعمره: زين اشدراني انه يبى لها مقدمات....
عيسى: بسرعه سير هات لها ماي...روحها بتطلع من الصياح...
وسار احمد يربع صوب المطبخ بييب لها ماي...وشوي وتدخل مريم...
مريم تمثل الصدمه: شو فيها ظبيه..شو بلاها يا عيسى...
عيسى وهو منقهر: لا ما شي بس تعبانه شوي...
مريم: ظبيه ادق لسيف يي ياخذج العياده...؟؟
عيسى: ماله داعي نحن بنوديها لو محتاجه تسير....
مريم: والله قلبي يعورني عليها...حرام الياهل جي يتأثر...
عيسى: مشكوره مريم ما تقصرين يا بنت العم...
ويدخل احمد واول ما شاف مريم انجلب ويهه....
احمد بكل قلة ادب: ممكن تطلعين برا لو سمحتي مالي خلق اشوف ويهج النحيس...
مريم: شووووووو..؟؟
احمد: اللي سمعتيه...كل اللي مستوي باختي من سبتج انتي والغوله...بس والله يا مريم ما يردني عنج انتي واهلج غير الموت لو يستوي في اختي شي...
مريم طلعت بسرعه خايفه من كلام احمد...
عيسى يضحك رغم الحاله اللي هم فيها: الحين اتحمل اللي ييك من سيف...
احمد: برايه اصلا انا اتريا شي من الله...
وهدت ظبيه شوي...ويلست على الشبريه ويلسوا احمد وعيسى عندها....
عيسى: فديت هالويه يا ربي...محد يستاهل دموعج غناتي والله...
احمد: بس عاد من قدج ظبيوه يتفدونج....
ظبيه تمت ساكته ولا تكلمت ..بس ردت تصيح بصمت ودموعها ينزلن على ويهها...
احمد يبى يغير جو: بل عليكن يالحريم...درامات ماي من وين تييبن هالدموع..؟؟
يضحك عيسى: الريال بحياته كلها ما يصيح الكميه اللي تصيحها الحرمه في المره الوحده....
احمد: هيه والله ..اول مره اخوي يقول شي صح...
وتبتسم شوي ظبيه على سوالف اخوانها رغم كل شي...
وشوي وباب الحجره يتبطل بكل قوه و من يطلع يا ترى...؟؟؟
::
::
::
بو سيف دخل عليهم وهو متوحش...وويه معتفس وكل غضب الكون بعيونه....ماسك خيزرانه في ايده....اول ما شافه عيسى واحمد وقفوا وظبيه عدلت يلستها....ما يدرون ناوي على من هالمره...ويا وقرب صوبهم ورفع ايده يبى يبعد احمد وعيسى وانكشف الموضوع...
بو سيف: وخروا عني بجتلها مسودة الويه...اخر عمري بنتي مطلقه...والله العالم شو مسويه...
عيسى: ابويه اذكر الله...
بو سيف: وخر لعنة الله عليك انت ما فيك غيرة على خواتك....قم هناك والله لكسر راسها الضايعه ما لقت من يربيها...
احمد خلاص انتهى صبره ...ما بقى فيه ذرة صبر...وبشعور لا ارادي تفجرت كل ايام القهر...وانتهى وقت الضيم وبينه وبين نفسه قرار سريع ينهي فيه معاناته ومعاناة اخته واخوه من تجبر هالوحش في صورة انسان...وفي نهاية غالبا ما تكون على شكل رغبة انزرعت طول السنين في نفس عافت الحياة وتشربت القهر والضيم وقسوة الدنيا..وبحركه سريعه...انتهت فيها كل معاني الانسانيه...وقتل الابو كل مشاعر الرحمه والحنان من قلبه...وانتزع فيها الابن كل حقوق الاب ونسى وصية الله فيه الوالد...
مسك احمد ابوه وبكل قوه في جسمه الملئ بعنفوان الشباب وسحبه صوبه ويهه وطيره اخر الحجره...وطاح بو سيف في منظر أليم تنكسر له النفوس على ظهره....
الريال الكبير ما يمشي عدل ..اكل الدهر وشرب على بقاياه الباقيه في عمره....كيف جسمه المتهالك يحتمل طيحه مثل هذي..؟؟!!!؟؟؟
وقف احمد برهه وتم يطالع ايدينه وشو سوت...وبلع ريقه...بس بو سيف ما تحرك....
عيسى مبطل عيونه مب مستوعب ولاشي ...مستحيل عيونه تصدق كل اللي صار جدامه....
بوسيف بدا يأن ...تخيلوا...واصوات همهمه تطلع من خبايا جسمه المتهالك.....مب قادر يتحرك.....اييييه يالدنيا...هذا اخرة العمر.....
وبحركه سريعه قامت ظبيه من على الشبريه.....وبصرخة انسانه ظلمتها الحياة وخذت منها وبخلت بالعطا: ابوووووووووووووووووووويه ......!!!!!!
ومسكت ايده تساعده ييلس عدل على الارض...بس بو سيف ما قدر يتحرك...وما قدر حتى يتكلم..وحاولت فيه ظبيه لين ما يلس.....واول ما حس عمره فيه شوي شده انه ييلس....
وبكل قسوة الانسان يوم يتجبر وينسى انه الله فوق كل جبار...وبصدمه غير متوقعه....يلف على ظبيه ويمسكها من شعرها....وسبحها بالقوه الباقيه في جسمه...
هني عيسى طفح به الكيل وسحب ظبيه من بين ايدين ابوه....وطلعها من الحجره وسندها على كتفه وهي منهاره...وطلع احمد من الحجره بس بو سيف ما قدر يقوم...وصك عليه احمد الباب من برا...وظبيه تصيح وتصارخ وانجلب البيت لمأساة....ومن هني وهناك وويهدون عيسى واحمد فيها...لين ما انتهى كل نبض للطاقه والروح تعبت من الانتظار....
وانسابت ظبيه من بين اياديهم انسياب الماء على صفيح الزجاج....
طلع احمد صوب سيارته وشلها عيسى السياره وعلى عيادة الشهامه...
ابو سيف يتلوى من الالم في الحجره..واحمد بند الباب وخذ المفتاح وياه...محد قريب من الباب ويسمع همهمات بو سيف..مريم فوق وسيف بعده ما رد من عند الشباب...
وينج يالقوه ...وينك يالجبروت....هذي هي بذرة الشر اللي انزرع في قلب عيال بو سيف...استوت وكبرت وصار عودها قوي...اشتدت...وصارت شرور الدنيا تعلمهم كيف يعضون الايد اللي لو مهما قست فلها السمع والطاعه....علمتهم الدنيا القاسيه..كيف ينكرون اهلهم...وخلتهم ينسون انهم اصحاب الفضل الاول في وجودهم....
ايييه يالدنيا ومن يدري عن بوسيف....يالس بروحه ..ماله حد خسر كل شي....الحين بس يتذكر مقوله ...
" اذا دعتك قدرتك على الناس فتذكر قدرة الله عليك"
بو سيف الجبار الطاغي المتمرد...العاصي والظالم....بروحه لا ولد ولا بنت ...بس هاللحظه وهو يتعذب وبتلوى من الالم...لاح له طيف الغاليه...بس مع هذا تم يخدع نفسه ويكابر...بدون فايده....
...................
في المستشفى او بالاحرى في العياده.....دخلت ظبيه على الدكتوره...اللي علىطول شخصت حالتها.....لاحمد وعيسى...
الدكتوره: عندها هبوط حاد بالدم...الظاهر انها تعاني من مشاكل صحيه كتير...
عيسى: والياهل ؟؟؟
الدكتوره: حالته صعبه جداً نقص غذاء وجفاف فضيع...
احمد: والحل..؟؟
الدكتوره: انا حولتها على مستشفى المفرق...وان شاء الله يتابعون حالتها....
عيسى: ومتى نراجع بها...؟؟
الدكتوره: من بكره ان شاء الله....
وخذ احمد ظبيه وعيسى وردوا البيت....وفي الدرب....
احمد: يلعن شكله الهرم....
عيسى: احمد بس عاد عيب عليك والله...اللي سويته مب شويه...
احمد: هه على فكره الباب مصكر عليه...
عيسى: الله يغربلك...شو تسوي انت..؟؟؟
احمد: خله يموت....
ظبيه بصوت متقطع: عيسى اسرع شوي...ابويه في الحجره والباب مبند...انا سمعتكم...يا ويلكم من الله...
احمد: جب انتي مالج خص...
عيسى: احمد انت ما تفهم خله يولي ما بيعيش اكثر من اللي فات...
ظبيه: لو شو ما سوا يا احمد بنتحمله...بدونه وبدون رضاه ما بنشم ريحة الجنه...
سكت احمد ....ووصلوا البيت ...وفتح عيسى الباب...وشاف ابوه يتلوى في الغرفه...والعرق يتصبب من جسمه...
عيسى: احمد بسرعه هات ماي بارد واي قطعة قماش...
احمد: خدامك انا...فقدت هالويه...عيل اذا جي انت بتسوي...كيف بتسوي في اللي قلت لي عنه...
بو سيف وهو يقطع الرمسه: انا براويك يالهرم بجتلك والله...
احمد: اسمع انتوا بس...والله انه قطو بسبعة ارواح...
وشل احمد ظبيه ووداها حجرته وصكر الباب ...
احمد: نامي على شبريتي...وانا بنام على الارض...عندي مفتاح للغرفه مع هذا محد يأمن على حياته....
ظبيه: وعيسى ...؟؟؟ وانت وين رايح...؟؟
احمد: ارقدي وانا بصكر الباب من برا...ويوم برد بفتحه....
وفي الغرفه الثانيه...سحب عيسى ابوه على طرف الفراش وشغل له المكيف...ولحفه...وسار عنه....وفي الصاله...
عيسى: احمدووه...
احمد: شو .؟؟
عيسى يتنهد: خلاص باجر بنسوي اللي قلت لك عليه....الظاهر خلاص انه ما يروم يتحرك وهذا المطلوب...
احمد: توك كنت مترحم عليه...
عيسى: شكله رايح فيها...احنا يالله يالله باختنا ...بعدك تبانا نهتم فيه..شاللي كالفنا عليه...
احمد: افففف اخيراً...بس يالله متى بيي باجر...
عيسى: بنش الصبح....من وقت قبل ظبيه تحس ما فينا على حشرتها...
احمد: وشو بنقول حق سيف...؟؟
عيسى: هه هو يباها من الله اصلاً...
احمد: يالله برايك انا بسير ارقد وعلى فكره ظبيه..بترقد عندي...ما يندرى ينش هذا ويسوي فيها شي...
عيسى: اوكي تصبح على خير...
احمد: وانت من اهله...
ما قدر احمد يرقد وتمت صورة امه مطبوعه في باله...تم يفكر ويفكر...وقلبه محترق...وكاره الحياة والناس...يحس انه منبوذ في المجتمع...وده ينتقم من العالم....ما يدري كيف...شغل الليت وشاف ظبيه راقده...وقام صوب الكبت...وفتحه وطلع منه وقاية امه...بقى فيها شوي من ريحتها الغاليه...ودفن ويهه فيها..وتنهد...
" امايه فديت روحج الغاليه..سامحيني بس غصباً عني كل اللي بيصير.."
وسار واتلحف وشكله هالمره رقد............
...
الصبح دقات خفيفه على الباب ونش احمد على طول وفتح وشاف عيسى...
عيسى بهمس: يالله انت شو تسوي للحين...الساعه 8 متى تبانا نوصل....
احمد يتنهد: بديت اخاف....
عيسى: بسك يالله سير تلبس وتحمل عن تحس ظبيه....
احمد بخوف: اوكي...
وسار احمد وتلبس وهو يحس جسمه يرتجف...شعور غريب...
" شو بلاني خايف جي...مب انا اكثر واحد كنت متشجع لهالسالفه..."
ودخل عليه عيسى...
عيسى: يالله قبل تنش ظبيه....وصكر الباب لين ما نخلص ويوم بنطلع...افتحه...
احمد: زين بسك انت والله احس اني ابى ارقد في الحمام من الخوف...
عيسى يضحك ضحكه غريبه باهته: زين يالله ...
وطلعوا وصك احمد باب الحجره بالمفتاح عشان ظبيه ما تطلع...
وساروا صوب حجرة بو سيف بكل خوف وتردد...وبطل عيسى الباب وشافه راقد....وهني احمد ما قدر يتخيل اللي بيستوي....وطلع برا الغرفه...
وطلع له عيسى معصب: الله ياخذك شو فيك انت...يالله ما شي وقت...ورانا درب طويل...
احمد: ما ادري خلاص يا عيسى هونت ما اقدر والله...خايف...
عيسى: فقدت ويهك يالله تحرك...
ودخل احمد وعيسى وشلوا بو سيف وهو حس فيهم بس ما يروم يسوي شي ...الظاهر طيحة امس مأثره عليه....
بو سيف برمسه متقطعه: شو تسوون ..؟؟ وين سايرين....؟؟
احمد: يالوهقه هذا شاللي موعنه اللحين...
عيسى: انا ادري....
وحطووه في السياره..وركب عيسى جدام واحمد عداله...وفروا ابوهم ورا......وسارو ا صوب بوظبي...وبو سيف يتحرطم طول الدرب....
بو سيف: وين سايرين..؟؟
احمد: العياده شكلك تعبان...
عيسى: هيه ابويه بنسير العياده...
ومر الوقت في الدرب.....لين ما وصلوا.....ويوم وصلوا كانت في لافته عريضه على المكان.....ما انتبه لها بو سيف..بس نزلوه من السياره ...ودخلوه وهو يتحراه المستشفى...
ما كان حد موجود في الممرات....حطوه في ممر في هالمبنى بس داخل وتوهوه عسب ما يروم يظهر....وروحوا.....
احمد: ابويه هني بترتاح وايد...
عيسى: اتضارب مع العرب اللي هني..ترا مب من شيم الرياييل يستقوون الا على اللي من عمرهم..وانت هني كلهم من مستواك وعمرك...
احمد: وانت يا بويه اللي اجبرتنا نسوي جذي..وانت اللي يبت لعمرك....
بو سيف: انت وياه شو تقولون؟
ويوم سمع عيسى حس حد ياي من الممرات...ربع هو واحمد وطلعوا من هالمكان....
وفي المبنى مرت وحده من الموظفات وشافت بو سيف....
الموظفه: الوالد انت شو تسوي هني..؟؟
بو سيف: مب هذا المستشفى..؟؟
الموظفه: منو اللي يايبنك...؟؟
بو سيف: عيالي وقالوا لي اني تعبان ويابوني هني المستشفى...بس ما ادري بهم وين ساروا...
تنهدت الموظفه وما عرفت شو ترد: لا اله الا الله...
ونادت على اثنين من العاملين وسارت وبطلت ملف يديد....وحطوه في حجره مع ناس مثله وايدين....
وانكتب في ملفه....انه ضيف دائم للمركز ينضم لقافلة الاباء اللي تبروا منهم عيالهم وحالة بو سيف منتشره وايد وصارت جديمه بالنسبه للموظفين في...
" مركز رعاية ودار المسنين"
ومرت الايام وبعد الفحوصات اللي سواها المركز لحالة بو سيف طلع ان عنده كسر في الحوض ناتج عن طيحه قويه...على ظهره....وصار مقعد وطريح الفراش.....
وظبيه ما يدري بحالتها غير باريها....عقب ما عرفت كل شي من اخوانها....
وزادت حالتها من سئ لاسوأ ...والله وحده المستعان وما يندرى شو بيصير عقب...وشو حالة ظبيه ومايد واخوان ظبيه....
اما بو سيف فنهايته مبينه...
.........................</span></font>
رد مع اقتباس
مواقع النشر (المفضلة)