<font color='#000000'><span style='font-size:15pt;line-height:100%'><span style='color:red'>الجزء االثــــــــــــــــــــا ني عشـــــــر</span></span>
<span style='color:darkred'> الممزر- 1991
في لحظة، كانت هند موجودة وياهم.. واختفت فجأة.. وصلها أبوها البحرين ورد على نفس الطيارة.. وتفاجئ الكل بخبر سفرها اللي محد توقعه..
أول ما سمعت شما الخبر من أمها، راحت بيت عمها حمدان وسألت خالوتها سعاد عن السالفة.. كانت شما خايفة وايد على هند وشكل سعاد مول ما كان يطمن.. سعاد كانت تعبانة وعيونها حمر.. وقالت لشما انه هند راحت تدرس برى لأنه نسبتها ما تدخلها جامعة العين ولا أي جامعة ثانية في البلاد..
شما: خالوه أنا كنت ابا ادرس في جامعة العين وما خليتوني .. معقولة تخلونها هي تسافر برى؟؟
سعاد: هاذي رغبة هند وما رمنا نردها..
شما: بس هنادي عمرها ما حبت الدراسة وكانت مستانسة انها بتقعد في البيت..
سعاد: والله عاد هي غيرت رايها وابوها وافق..
شما (وهي لين الحين مب مقتنعة): انزين خالوه هي وين راحت تدرس؟
سعاد: ما اعرف..
استغربت شما..: معقولة خالوه ما تعرفين؟
تنهدت سعاد، كانت صج تعبانة نفسيا ومالها خلق ترمس أي حد: شما قلت لج ما اعرف وخلاص..
شما: انزين عندج رقمها.. ابا اكلمها..
سعاد: اقول لج ما اعرف وين راحت تدرس وتقولين لي عطيني رقمها..؟؟ صج ما عندج سالفة ..
وقامت سعاد وراحت حجرتها.. وتمت شما يالسة في الصالة فترة تصيح وهي تحس بفراغ كبير في داخلها.. هند كانت اكثر من مجرد اخت بالنسبة لها .. ليش سافرت من دون ما تخبرها أو حتى تودعها..؟
وعقب يومين تأكدت شما انه في شي جايد استوى لأن أمها قامت ما تروح بيت عمها حمدان ولا تتصل بهم.. بس شو هالشي اللي قطع كل العلاقات بينهم وبين اقرب الناس لهم.؟؟؟ فديتج يا هند.. وين ديارج الحين .. انتي اللي ما تطيقين اتمين لحظة بروحج ومن دون اهلج.. كيف بتستحملين الغربة وشقاها؟
أول ما عرف مانع انه هند سافرت حس بذنب فظيع.. وكأنه دمر حياة بنته.. كانت صدمة كبيرة بالنسبة له.. كان متوقع انه حمدان يرد يرمسه في سالفة سلطان وهند .. وحتى لو ما رمسه كان مانع بروحه بيسير له وبيخبره انه سلطان بيخطب هند وبيستر عليها.. بس انه الأمور توصل لها المرحلة..؟؟ هذا اللي ما كان متوقعنه..
وفي الشركة.. راح مانع لمكتب حمدان وهو حاس بإحراج وخجل من موقفه السلبي وياه.. ما كان له ويه يجابل اخوه العود.. بس كان يعرف انه اذا ما راح واعتذر له الحين.. عمر العلاقات اللي بينهم ما بترد شرات قبل..
أول ما شاف حمدان مانع داش عليه المكتب.. حس بظيج كبير.. بس في نفس الوقت ما بغى يبين له انه غير مرغوب فيه وابتسم له وهو يسلم عليه.. ويلس مانع وعيونه في الأرض..
مانع: ليش يا بوراشد..؟ ليش سفرت هند؟؟
حمدان: أحسن لها تبتعد يا بوهزاع.. أنا جذي مرتاح..
مانع: بس يا اخوي البنية ما تهون .. خليتها في الغربة بروحها ورديت عنها..
حمدان: هند مب بروحها هناك.. أنا مستحيل أهد بنتي الا وانا متأكد انها بتكون بين ناسها واهلها..
مانع: ليش انت وين وديتها..؟
تنهد حمدان.. وتذكر انه مرته ما تباه يخبر أي احد.. ورغم هذا قال: وديتها البحرين عند ثريا بنت خالة سعاد..
مانع: زين سويت يا خوي
حمدان: يا مانع ما ابا أي حد يعرف مكان هند.. وخصوصا سلطان..
مانع (اللي بدت عيونه تدمع): سامحني يا اخوي.. انا اللي المفروض اتحمل المسئولية كلها.. ولدي هو اللي غلط وهند ياهل وينقص عليها بسرعة..
حمدان (بنبرة حادة): مانع!! أنا قلتها قبل وبرد اقولها الحين.. هزاع جذاب.. وبنتي هند وسلطان ما غلطوا.. واذا عندك أي شك في هالموضوع .. ما بيني وبينك كلام عقب اليوم..
استحى مانع بس غصبن عنه كان مب مصدق الا كلام هزاع.. شو مصلحة ولده انه يتبلى على أخوه؟ .. وبعدين هو شافهم بعيونه وفي بيته..بس عشان ما يخسر اخوه العود قال: خلاص يا اخوي.. اللي تشوفه.. وما راح افتح هالموضوع وياك مرة ثانية..
حمدان (بتردد): مانع.. أبا منك خدمة..
مانع: تفضل يا خوي..
حمدان: أباك تغير أرقام تيلفوناتكم .. كلها.. ما ابا هند تتصل بسلطان.. أباها تنساه..
مانع: ان شالله.. ألحين اسير اغيرهم..
حمدان: تسلم يا خوي..
مانع: أفا عليك يا بوراشد.. انته تامر أمر..
وطلع مانع وراح الاتصالات على طول عشان يغير ارقام بيتهم.. ويلس حمدان في مكتبه .. مب عارف يركز في شغله ولا عارف يتخذ أي قرار.. حتى توقيعه نساه.. كانت هند شاغلة كل تفكيره.. ودعى ربه من كل قلبه انها تكون مستانسة وتعودت على الوضع هناك...
موزة من يوم صارت السالفة وهي تعبانة .. بس من سمعت انه هند سافرت وهي مب رايمة تسكت.. أربعة وعشرين ساعة صياح .. كأن اللي راحت بنتها هي.. حست بخسارة كبيرة.. خسرت العلاقة الطيبة اللي بينهم وبين بيت بوراشد.. خسرت ثقتها بولدها اللي تحبه أكثر من أي واحد ثاني من عيالها.. وخسرت هند..
كانت تشفق على سلطان اللي من هذاك اليوم المشئوم وهو حالته حالة ولا يقعد وياهم بالمرة.. كله في حجرته وما ياكل ولا يرضى يبطل الباب لأي احد.. وراحت له موزة يوم عرفت انه هند سافرت عشان تطمن عليه.. ودقت الباب أكثر من مرة بس ما بطل لها.. سلطان كان قاعد ويسمع امه وهي تدق الباب بس ما قام يبطل لأنه ما يبا يشوف أي احد.. بس يوم سمعها تصيح وتترجاه .. تنهد وقام وبطل لها الباب.. وأول ما شافته موزة صاحت من خاطرها وحظنته..
تعاطفت وياه على طول.. ولدها تغير وايد.. شكله تعبان ومريض.. سلطان القوي اللي الضحكة ما كانت تفارق ويهه .. يتغير شكله بهالسرعة ؟؟
ابتعد سلطان عن حظن امه بحزن ويلس على الشبرية وعيونه في عيونها .. في نظرته كانت هموم وصدق كبير.. وللحظة.. حست موزة بقلب الأم اللي عمره ما غلط في احساسه .. انه سلطان صادق في اللي قاله.. بس ابعدت هالفكرة عن بالها على طول.. هزاع بعد ولدها .. ومستحيل يتبلى على اخوه.. مستحيل أي انسان يوصل لهالمستوى من الانحطاط..
موزة: سلطان يا غناتي بس حرام عليك اللي تسويه في روحك.. البنية خلاص راحت والسالفة محد درى عنها..
سلطان: ما يهمني لو الكل درى عنها لأنها جذب...
موزة: خلاص يا سلطان اللي صار صار..
سلطان: اللي مب راضية تصدقينه يا ام هزاع انه ما صار ولا شي.. كل اللي استوى كان في خيالكم وبس..
يلست موزة جدامه وحطت راسها على ريوله وهي تصيح.. كان ودها تصدقه.. هذا ولدها وهي اللي ربته وتعرفه أكثر عن أي شخص ثاني في هالدنيا.. بس هند كانت من يومها شيطانة وهزاع ماله مصلحة يكذب.. كان ودها كل شي يرد شرات قبل.. بس هالشي صار حلم بعيد.. وصعب انه يتحقق..
مسح سلطان على شعرها وسألها برجاء أخير وكله أمل انها تصدق وياه: أمايه .. وين راحت هند؟
كان سلطان يتريى اتصالها لين الحين بس للأسف.. مع انها سافرت من أمس لين الحين ما دقت له..
موزة: ما اعرف يا ولدي..
سلطان: امايه الله يخليج خبريني انا متأكد انج تعرفين..
اعتدلت موزة في يلستها وحطت عينها في عينه وقالت: ما اقدر اخبرك يا سلطان.. أبوك مشدد عليه ما اخبرك..
سلطان: أمايه هاذي هند.. بنتج.. هند اللي تحبج اكثر عن امها.. هند اللي عمرها ما قصرت وياكم.. ترضين لها كل اللي صار؟؟
موزة (بحزن كبير): لا يا سلطان .. الله شاهد عليه اني اتقطع من داخلي بس مب بإيدي شي.. والله مب بإيدي شي اسويه..
سلطان: خبريني بمكانها..
موزة: ما أقدر يا سلطان..
سلطان (والدموع في عينه): زين طمنيني عليها .. الله يخليج امايه بموت ابا اعرف عنها أي شي..طمنيني عليها .. ما اتصلت بيت عمي حمدان؟
قامت موزة وطلعت عنه.. كانت مب قادرة تتحمل تشوف سلطان يصيح.. ويترجاها وهي مب قادرة تساعده.. أما سلطان.. فقعد يتريى التيلفون.. حياته كلها متوقفة على هالاتصال.. وما راح يطلع من حجرته قبل ما تتصل به هند.. مهما تأخرت بيترياها.. مستحيل هند ما تدق له.. مستحيل تنساه.. وتتخلى عنه عقب كل اللي مروا به ويا بعض..
---------------------------
في بيت حمدان بن ظاحي.. كانت سعاد ما تطلع من حجرتها بالمرة وأم جمال هي اللي صارت تهتم بالبيت وبالعيال.. كانت سعاد حاسة انها تخلت عن بنتها.. وبدل لا تصدقها وتدافع عنها.. لصقت بها التهمة أكثر ويابت لها الشبهات.. كان قرارها متسرع واحساسها بالذنب يذبحها.. وفوق كل هذا حمدان ما رمسها من يوم رد من البحرين.. كأنها هي السبب في كل اللي صار.. مب جنه سلطان هو اللي جنى على بنتها وعليهم كلهم..
قامت سعاد وشلت سماعة التيلفون واتصلت بثريا في البحرين.. وعقب ما رن التيلفون فترة.. ردت ثريا..
ثريا: ألو؟؟؟
سعاد: هلا ثريا.. شحالج.؟
ثريا: من.. سعاد؟؟ هلا والله حبيبتي .. أنا بخير الله يعافيج.. انتي شحالج؟
سعاد: الحمدلله يا ثريا.. هند شحالها؟
ثريا : أيّ عليها (فديتها بالبحريني).. تجنن بنتج.. والله حبيتها أكثر من بناتي..
حست سعاد بنغزة في قلبها.. احساس كبير بالغيرة غمرها..وقالت: وهي مرتاحة وياكم..؟
ثريا: إيه اليوم رحنا شارع بوكوارة واشترينا جلابيات وشغلات وايده.. استانست وايد هند والحين نايمة..
سعاد: يعني ما اقدر ارمسها؟
ثريا: لا ما تهون عليه أقعدها من نومتها.. دقي عليها باجر.. وبتكلمج..
سعاد: خلاص ثريا.. بخليج الحين .. وديري بالج عليها.. تراها غالية..
ثريا: أفا عليج يا سعاد.. لا توصيني على بنتي..
وبندت سعاد واحساسها بالتعاسة والذنب يزيد.. هاذي ثالث مرة تتصل بثريا عشان تكلم هند.. وما تحصلها.. كانت متأكدة انه هند تتجنبها وما تبا تكلمها.. بس لى متى؟؟ لى متى بتم زعلانة عليها؟؟ سعاد تولهت عليها ومحتاجة انها تكلمها..
وفي هاللحظة رن التيلفون مرة ثانية.. وكان الرقم غريب.. فردت.. واتفاجأت يوم شافت انه المتصلة موزة مرة مانع..
موزة: ألو؟
سعاد: موزة؟؟
موزة: هى انا موزة.. سعاد نحن لازم نتفاهم..
سعاد: انتي من وين متصلة؟ أول مرة أشوف هالرقم..
موزة: مانع غير كل أرقام بيتنا.. حمدان طلب منه يغيرهم..
سعاد( ارتاحت لأنها تأكدت انه هند ما بترمس سلطان): وشو تبين الحين؟
موزة: تولهت عليج يا ام راشد..
سعاد (بجفاء): تولهت عليج العافية.. اسمحيلي انا مشغولة الحين..
وبندت في ويه موزة اللي يأست خلاص انه العلاقة بينها وبين سعاد ترد شرات قبل..
حتى راشد وناصر ما كانوا يعرفون سبب سفر أختهم المفاجئ.. وكل اللي سمعوه هو التفسير اللي محد صدقه.. انها راحت تدرس برى لأنه نسبتها منخفضة وايد.. كان راشد محتار وايد واخته غامظتنه.. حاس انها انظلمت وهو بعده ما يعرف أي شي.. وناصر كان يحاول ينكر في داخله انه اشتاق لها.. اشتاق لحشرتها ولسانها الطويل.. وكان بيموت ويعرف السبب اللي خلاهم ينفونها .. وكل اللي يسمعه من أهله تفسيرات واهية حتى اليهال ما يصدقونها.. وأخيرا ..السبب الحقيقي سمعوه من هزاع..
هزاع كان هاليومين يشع من الفرح.. نشوة الانتصار خلته يحس بفخر باللي انجزه وبالفكرة العبقرية اللي محد يروم يطعن فيها.. أخيرا تحقق مراده وطاح سلطان من عيون اهله.. الصورة المثالية اللي كانت لسلطان في عيونهم تحطمت بشكل غير قابل للترميم.. هذا سلطان اللي كانوا يحطونه في عيونهم ومهما سوى يتم حبيب الكل.. هذا هو اليوم وحيد.. وكئيب.. عالمه غرفته ودموعه وبس..
وفي نفس الوقت تخلص هزاع من هند اللي كانت صج قاهرتنه بغرورها ودلعها الخايس.. يستاهلون اللي ياهم.. اثنيناتهم كانوا متكبرين.. يطالعون العالم من برجهم العاجي بكل تكبر وغرور.. خل يتكبرون الحين وهم في نظر الكل حثالة.. ومجرمين..
ولأول مرة من شهور.. نزل هزاع من الطابق الثامن في الشركة للطابق السادس ويلس ويا عيال عمه حمدان .. يخبر راشد وناصر بالسبب الحقيقي اللي خلا هند تسافر..
هزاع: أنا قلت لازم تعرفون.. انتوا اخوانها واقرب الناس لها.. حرام يخشون عنكم كل اللي صار..
ناصر كان ساكت من الصدمة والخجل.. وطلع من مكتبه ما يدري وين يروح.. بس راشد هو اللي كان يغلي في داخله ويرتجف من القهر..
وطلع من الشركة والغيظ مب مخلنه يشوف الدرب جدامه.. راح بيت عمه مانع ودش البيت من دون ما يسلم على موزة وشما اللي كانوا يالسين في الصالة.. وركب الدري وبطل باب حجرة سلطان بكل قوته..
سلطان في هاللحظة كان راقد، وأول ما تبطل الباب التفت بسرعة عشان يشوف منو اللي تجرأ ودش عليه الحجرة بهالطريقة الهمجية.. بس قبل لا يحدد ملامح هالشخص حس بلكمة عنيفة على ويهه.. وبكل صعوبه بطل عينه وشاف انه اللي واقف جدامه راشد..
كان راشد يصيح من القهر.. وقال وهو يأشر بإيده على ولد عمه اللي كان متجمد في مكانه من الصدمة: انته من اليوم مب ولد عمي ولا اعرفك يا سلطان.. ما أبا أشوفك في بيتنا ..ولا أباك تكلمني في الشركة.. ويوم بترد اختي من السفر .. ما أباك حتى تطالع في ويهها.. انت فاهم؟؟
خلص راشد رمسته وطلع من الحجرة.. واصطدم وهو طالع بموزة اللي كانت ياية تركض عشان تلحق على ولدها.. بس قبل لا تقدر تطمن عليه.. صكر سلطان الباب وقفله بالمفتاح..
حاول سلطان يخبي التعاسة اللي في قلبه عشان لا يزيد من هموم أمه..بس مهما حاول كانت ملامحه تفشي سر معاناته.. كان ويهه لوحة من الألم.. خطوطها دموعه اللي يذرفها كل ليله بروحه وهو يفكر بهند والأحداث اللي غيرت مجرى حياتهم هم الاثنين.. صار سلطان يعري بشكل واضح جدا.. عقب ما كانت اعاقته ما تبين بالمرة.. كان محتاج انه يسمع صوتها.. يطمن عليها.. ليش محد راضي يخبره بمكانها..؟؟ وهي ليش ما اتصلت لين الحين؟؟ كان يبا يطمن انها بعدها تحبه.. ولين الحين تترياه.. آاااااااااااه يا هند.. وينج؟؟ ريحيني من حيرتي اللي عايشنها.. ليش ما اتصلتي للحين؟؟ ليش؟؟
نهاية الجزء الأول
-------------------------------
الجزء الثاني
-----------------------
البحرين:
وصلت هند البحرين يوم 26-7-1991 ، كانت هاذي أول مرة تسافر فيها في حياتها كلها..وبدل لا تحس بالسعادة والإثارة، كانت حاسة بغصة وكبت كبير.. طول الرحلة اللي استمرت 45 دقيقة.. وهي ساكتة.. حاول حمدان يرمسها أكثر عن مرة بس هند كانت مصرة انها ما ترد عليه.. وفي النهاية يأس وسكت عنها..
أول ما نزلت الطيارة.. حست هند وهي تمشي في الممر الأبيض اللي يربط الطيارة بالمطار انها تعبر الجسر اللي يفصل بين ماضيها ومستقبلها.. حزن كبير غلف قلبها وخوف من المجهول واللي ممكن تواجهه هني مع ناس -رغم انهم أهلها- بس عمرها ما شافتهم وما يربطها بهم أي شي.. ولا إراديا حطت إيدها في إيد أبوها ومشت وياه .. وخلصوا إجراءاتهم بصمت.. كل واحد فيهم همومه أكبر من انها تخليه يرمس بشكل طبيعي.. ويوم وصلها عند المواقف وشاف ثريا وريلها أحمد واقفين يتريونهم.. راح حمدان وسلم عليهم..وعقب ما رمس وياهم شوي ..
حمدان: يا ثريا هند بنتج.. ما اوصيج عليها..
ابتسمت ثريا وقالت: ما يحتاي توصيني على بنتي يا حمدان.. هند في عيوننا..
وهني حظن حمدان هند وقال لها: هند.. تحملي على عمرج حبيبتي.. وهاذي بطاقة البنك.. متى ما تحتاجين بيزات اسحبي منها..
اطالعت هند البطاقة اللي في إيد أبوها .. وتنهدت ومشت عن أبوها من دون ما تاخذها.. ووقفت حذال السيارة تتريى ثريا وأحمد عشان يروحون.. مب البيزات هي اللي هند تدور عليهم في هاللحظة.. كل اللي تحتاجه هو ان ابوها يغير رايه ويردها البيت.. بس.. لا بيزات ولا أي شي ثاني ممكن يرد لها اللي راح واللي بتفقده وهي بعيد عن الناس اللي تحبهم ويحبونها..
انصدم حمدان من تصرفها.. وعطى البطاقة لثريا.. اللي وعدته انها تكلم هند وتقنعها تاخذ البطاقة.. ورد حمدان المطار لأنه رحلته بتكون الساعة 10 .. يعني عقب نص ساعة..
ما نزلت ولا دمعة من عيون هند وهي تودع أبوها اللي رد البلاد على نفس الرحلة.. وركبت سيارة ثريا وريلها أحمد.. وسلمت عليهم بخجل وتجاهلتهم طول الدرب من المحرق لمنطقة الرفاع الشرقي.. اللي ساكنة فيها ثريا وريلها.. وسرحت في عالمها الخاص وهي تراقب الشوارع اليديده عليها .. كانت البحرين مختلفة تماما عن دبي.. وعلى طول ، حست هند انها مخنوقة.. وغمضت عيونها عشان ما تفضح الدموع اللي بدت تتيمع فيهم..
طبعا ثريا كانت حاسة بالظيج اللي هند حاسة به.. ومع انها ما تعرف شو اللي خلا اهلها يطرشونها تدرس هني.. بس في داخلها كانت متأكدة انه السبب جايد.. وسكتت عنها وما رمستها الا يوم وصلوا البيت..
كان بيتهم .. قصر صغير.. تصميمه رائع وأثاثه من أجمل ما يكون.. اللي جذب هند للبيت .. أنه في دري خارجي يوصل للصالة اللي فوق.. وتلهفت رغم حزنها عشان تشوف ديكوره من داخل.. ثريا لاحظت اعجاب هند بالبيت وابتسمت لها وقالت: تصميم البيت هذا يبناه من بلجيكا.. وتلعوزنا وايد لين لقينا مهندس يعرف ينفذ التصاميم..
هند (بخجل): هى ماشالله وايد حلو..
ثريا (وهي تضحك): هنادي.. ممكن أناديج هنادي؟
هند: هى أكيد ممكن خالوه..
ثريا: لا تناديني خالوه .. أحس اني عيوز.. هههههه .. ناديني ثريا.. تراني مب وايد عودة..
ابتسمت هند: ان شالله ثريا..
ثريا: هنادي انا ما ابيج تحسين انج غريبة.. اعتبري نفسج في بيتكم.. صدقيني ما بتحسين بفترة الدراسة هني وبتستانسين وايد..
في هاللحظة ياهم أحمد وقال وهو يضحك: انتوا عيبتكم الوقفة هني. ؟ مب ناوين ادشون داخل؟
ثريا: خلاص بندش.. ياللا هنادي..
ودشوا كلهم البيت وهند بدت تحس بارتياح خفيف لأنه ثريا حاولت تتقرب منها وباين عليها طيوبة وايد..
كانت هاي أول مرة تشوف فيها هند ثريا وأحمد، رغم انه امها ترمس ثريا في التيلفون دوم.. بس هند ما فكرت ولا مرة انها تشيل السماعة وتسلم عليها.. اللي ريح هند انه ثريا تختلف عن امها اختلاف كلي.. كانت ثريا حبوبة وايد وتحب تضحك وتسولف.. وأول ما شافت هند، حبتها على طول..
عقب مرور ساعتين.. ما تعودت هند على ثريا وريلها.. وحبتهم هي بعد.. أحمد كان دبدوب وسوالفه حلوة وثريا نفسه بالضبط.. اثنيناتهم من الوزن الثقيل.. وعندهم توأم.. نادية وندى..وقدر أحمد انه يخليها تضحك مع انها كانت مكتئبة في داخلها..
ومع انه هند كانت تعبانة من السفر.. بس يلست تسولف وياهم للساعة 12.. ونست همومها لفترة..بس طول الوقت كان سلطان في بالها وتفكر متى بتقدر تدق له.. وتخبره بمكانها.. أكيد الحين يحاتيها .. وفي هاللحظة حست بكآبة وتعب واستأذنت منهم عشان تروح ترقد..
ويوم سارت بترقد.. دشت ثريا الحجرة وياها.. ويلست على الشبرية..
ثريا: هند؟
هند: ها ثريا..
ثريا: ان شالله مرتاحة ومستانسة ويانا؟
هند( تبتسم بتعب): الحمدلله .. والله ما قصرتوا ويايه..
ثريا: أفا عليج يا هند.. ما تعرفين شكثر انا مستانسة انج بتمين ويانا.. تعرفين بناتي صغار وانا محتاجة لوجود شخص كبير ويايه هني.. شخص اقدر اسولف له واحس به فاهمني.. وان شالله نقدر نكون ربع وخوات..
تأثرت هند بكلام ثريا.. وهي بصراحة وثقت فيها من اللحظة اللي شافتها فيها..
كملت ثريا كلامها وقالت: هند.. ممكن نكون صريحين ويا بعض؟
هند: صريحين؟
ثريا: أنا ادري انه ييتج هني لها أسباب.. ومع اني ما احب اتدخل او ارز بويهي على قولتكم في الامارات.. بس الله يعلم انج دشيتي قلبي يا هند.. أحس بج صج قريبة مني .. وما اباج تعانين بروحج وانتي في هالعمر..
هند: لا .. لا تحاتين.. ثريا انا ييت هني بناء على رغبتي الخاصة.. محد جبرني..
ثريا: وعشان جي كنتي زعلانة من ابوج ولا حتى ودعتيه؟؟
انحرجت هند.. وما عرفت شو تقول..
ثريا: عموما انا ما بجبرج تخبريني أي شي وانتي الحين اكيد تعبانة من السفر.. بس اتمنى تفتحين لي قلبج يا هند.. اعتبريني اختج العودة.. وانا اوعدج انج ما راح تندمين..
باستها ثريا على خدها وطلعت عشان تخليها ترقد.. بس وين بييها النوم وافكارها عند سلطان.. ؟ وفي اللحظة اللي واجهت فيها هند وحدتها.. حست بزلزال من الألم والغضب بداخلها.. وتفجرت الدموع من عينها .. تغسل فيهم كل شوقها واحساسها بالظلم والقهر.. ما كانت تعرف انه الفراق بيكون مؤلم لهالدرجة.. وحست بوحدة فظيعة.. اشتاقت لشما.. وأم جمال.. اشتاقت لهم كلهم.. حتى اسحاق الدريول يا في بالها هاللحظة..
وسلطان.. يا ترى شو يسوي الحين؟؟ ومتى بتقدر تسمع صوته.. ؟ وتطمن عليه.. وهي تفكر بهالافكار.. رقدت هند .. على أمل انها تدق لسلطان يوم بتنش من الرقاد..
نشت هند الساعة 12 الظهر.. على صوت دقات على باب غرفتها.. وبتكاسل شديد.. وقفت وراحت تبطل الباب.. كانت ندى بنت ثريا.. عمرها 12 سنة.. ابتسمت هند أول ما شافتها.. من أمس وهي متخبلة عليها.. مع انه نادية اختها التوأم.. بس ندى فيها شي يميزها عن توأمها.. ندى لونها برونزي غامج.. وفي عيونها لمعة شطانة ما حستها هند في اختها اللي طول نادية الرقيقة الخجولة..
ابتسمت ندى اول ما فتحت لها هند الباب وقالت: صح النوم..
هند: ههههه... أدري رقدت وايد..
ندى: خلاص بسج نوم تولهنا عليج..
هند: خلاص عطيني دقايق أغسل ويهي وأسناني وأبدل ثيابي..
ندى: لا.. انتي روحي اغسلي ويهج وانا بقعد ارتب اغراضج..
ابتسمت هند وقالت: لا حبيبتي ما بتعبج ويايه.. انا برتبهم بروحي بعدين..
ندى: لا لا لا .. لا تناقشيني .. أنا برتبهم لج.. لا تخافين اعرف ارتب..
هند: هههههههه.. انا ما قلت انج ما تعرفين بس والله ما ابا اتعبج..
ندى: ياللا عاد خليني ارتبهم لج.. ويوم بحتاجح في شي انتي بعد لا تقصرين..
ضحكت هند من خاطرها وحظنت ندى .. وقالت لها: فديت روحج والله انج عسل.. خلاص رتبي اغراضي .. بس على شرط..
ندى: شو؟؟
هند: تخبريني من وين لج هاللون اللي يجنن.. أمج وابوج واختج ماشالله يشعون من البياض.. انتي شقايل صرتي برونزية جي؟
ندى: ههههههه.. أنا يا مدام هند .. أموت في البحر.. واهلي للأسف ما يحبونه.. عشان جذي اروح ويا رفجاتي .. وهذا هو السبب..
هند: حتى انا احب البحر.. الا اعشقه مب بس اموت فيه.. خذيني وياج يوم بتروحين..
ندى: ممممم... خلاص باجر بوديج.. بوديج أحلى مكان رحتي له في حياتج..
هند: والله؟ خلاص .. وعد؟
ندى (تبتسم): وعد..
ابتسمت هند وهي تشوف ندى تبطل شنطتها وتطلع ثيابها عشان ترتبهم.. وراحت الحمام عشان تغسل ويهها وهي تحمد ربها اللي خفف عليها مصيبتها ورزقها بهالناس الطيبين..
وهم يتغدون ، جتلهم أحمد من الضحك بسوالفه اللي ما تخلص وكانت هند مبهورة بلهجتهم البحرينية الحلوة .. وتبا تتعلمها بسرعة..
هند: أحس لهجتكم وايد مايعة..
ثريا: هههههههه .. مايعة؟
هند: هى نفس اللهجة اللبنانية..
أحمد: والله احسن من لهجتكم اللي ما نفهم عليها الا بطلوع الروح..
هند: لا والله؟ الحين شو اللي ما تفهمه في رمستنا.. ؟؟
أحمد: ههههه .. هاذي انتي قلتيها.. شو رمسة بعد.. الناس يقولون كلام مب رمسة..
ندى: ابوي تذكر يوم رحنا دبي الصيف اللي طاف وسألنا هذاك الريال عن مكان البرادة؟
أحمد: إي أذكر.. هههه يحليله كان يحسب انه البرادة ثلاجة وودلنا على محل الكترونيات
ضحكوا كلهم وهند شرات الأطرش في الزفة.. وسألت باستغراب: ليش البرادة مب هي نفسها الثلاجة؟
ندى: لا يا ذكية.. البرادة يعني البقالة.. الدكان على قولتكم..
انصدمت هند: بقالة؟؟؟ ألحين البرادة معناتها بقالة؟؟ يوم اقول لكم رمستكم مايعة..
وجذي كانت قعدتهم .. كلها سوالف وضحك.. واندمجت هند وياهم ولقت عمرها عقب الغدا تلعب ورقة ويا نادية وندى وثريا.. وأحمد راح يرقد.. واستانست لأبعد الحدود وهي تنافس ندى ف شطانتها..
العصر .. كانت هند وثريا وندى ونادية يالسين في الصالة يطالعون التلفزيون.. وفجأة قالت نادية: امي شو رايج نطلع؟
ثريا: وين تبين تروحين عيوني؟
نادية: انتي وعدتيني توديني بوكوارة..
ندى (بحماس): إيييييي إيييييي امي بنروح بوكوارة الله يخليج..
ثريا: زين زين شوي شوي على روحج بينط لج عرج.. أصلا انا كنت ناويه اروح هناك اليوم عشان اخذ لي جلابيات..
هند: شو هذا بوكوارة؟؟ مول؟
ثريا: لا.. وييه أحلى من المولات.. ما بتحسين بحلاته الا ساعة ما تكونين هناك.. بس مب الحين.. عقب صلاة المغرب بيكون أحلى..
ابتسمت هند وهي تحس بالإثارة وقالت: خلاص .. عقب صلاة المغرب بنسير له ..
في هاللحظة رن التيلفون.. وقامت ثريا ترد عليه.. كانت سعاد المتصلة.. تبا تطمن على هند.. هاذي ثاني مرة تتصل.. الصبح اتصلت بس هند كانت راقدة..
ثريا: ألو؟
سعاد: السلام عليكم ورحمة الله وبركاته..
ثريا: وعليكم السلام ورحمة الله وبركاته.. هلا والله بنت خالتي.. شحالج؟
سعاد: الحمدلله الغالية انتي شحالج؟
ثريا: الحمدل لله بخير.. حمدان شحاله.. ؟
سعاد: الحمدلله .. يسلم عليج..
ثريا: الله يسلمه..
سعاد : هند وينها.. بغيت اكلمها..
ثريا: إي لحظة خل اناديها..
وراحت ثريا صوب البنات ونادت على هند: هند.. أمج على التيلفون.. تبي تكلمج..
تظايجت هند وبين على ويهها .. واشرت على ثريا انها ما تبا تكلمها.. فاقتربت منها ثريا وهي مستغربة وقالت لها بصوت واطي عشان ما تسمع بناتها: ليش حبيبتي.. أمج تبي تطمن عليج.. روحي كلميها..
هند: ثريا الله يخليج قوليلها اني راقدة.. ما اريد ارمسها..
ثريا: وتقولين بعد انه مب صاير شي وانج يايه هني برغبتج.. مبين وايد هالشي..
هند: ثريا عشاني الله يخليج مب وقته الحين..
ثريا: ما بي.. أول تقولين لي شو سالفتج وياها.
هند: والله بخبرج.. بس مب الحين عقب..
تنهدت ثريا وردت للتيلفون : ألو سعاد؟
سعاد: هلا ثريا..
ثريا: اسمحيلي حبيبتي هند بعدها راقدة..
سعاد: معقولة راقدة للحين؟
ثريا: إي تدرين امس يحليلها كانت قاعدة للساعة 1 وبعدين تعبانة من السفر..
سعاد: خلاص.. أنا بدق لها عقب..
ثريا: اوكى.. وانا بعد بكلمها عشان تتصل بج..
سعاد: مشكورة ثريا ما تقصرين..
ثريا: العفو الغالية انا ما سويت شي..
وبندت ثريا التيلفون .. وقررت ما تناقش هند في هالموضوع الا يوم يردون من طلعتهم اليوم.. ما تبا تخرب مزاجها وهي ما صدقت انها اندمجت وياهم..
عقب صلاة المغرب.. تلبسوا كلهم وطلعوا في سيارة ثريا..وأحمد راح المقهى عند ربعه.. كانت هند متلهفة انها تشوف هالمكان اللي كل حد متخبل عليه.. وانصدمت يوم وصلوا.. كان سوق جديم.. شارع باتجاهين .. رصيفه متكسر.. وعلى الجانبين محلات ومطاعم مبانيها جديمة وايد.. تقريبا سوق شعبي.. بس الشي المميز فيه كان الزحمة الفظيعة.. والجو اللي تضيفه على المكان.. أحدث السيارات واحلاها كانت رايحة رادة من دون هدف في هالشارع.. كل واحد يستعرض سيارته بغرور.. وابتسمت هند غصب وهي تشوف لوحات السيارات.. اللي من قطر واللي من السعودية واللي من الكويت.. وقالت لثريا: شو عندهم الشباب .. مسيرة؟
ثريا: ههههههه .. لا حبيبتي .. هاذي حالتهم كل يوم عقب المغرب.. يتجمعون ويستعرضون سياراتهم.. خلاص تعودنا على هالشي كل يوم..
هند: بس جذي من دون سبب؟
ثريا: إي.. ناس فاظية..
ندى: امي وقفي سيارتج بنمشي..
نادية: لا لا امي لا توقفين والله استحي..
ثريا: لا ما بنمشي.. ما يصدقون الشباب يشوفون بنات.. وبعدين هاذيلا مب أي شباب .. والله لا يقطعونا بتعليقاتهم..
ومشت ثريا بسيارتها ببطء شديد بسبب الزحمة ووقفت عند المحلات اللي تبا تسير لهم.. هند استانست وايد وياهم.. وخذت لها جلابيات من السعفة.. ومن الغريب.. وقبل لا يروحون خذولهم بيتزا للعشا وردوا البيت.. وطول الوقت في السيارة وهم مرتبشين.. ومزاجهم رايق ع الآخر..
عقب ما رقدوا ندى ونادية .. طلعت ثريا من غرفتها وراحت غرفة هند .. ودقت الباب وهي تتمنى ما تكون رقدت.. هند كانت قاعدة تكتب في مذكرتها ويوم دشت ثريا.. حطت المذكرة على صوب وابتسمت..
ثريا: أخاف ازعجتج ؟
هند: لا فديتج .. لا أزعجتيني ولا شي.. تعالي ايلسي حذايه..
يلست ثريا وقالت وهي تبتسم لهند: ندى وناديه صاروا يحبونج اكثر عني
هند: ههههههه.. وانا بعد صرت اموت فيهم..
ثريا: لا أنا اغار منهم..
هند: فديت اللي يغارون .. لا تحاتين.. انتي مكانتج محفوظة
سكتت ثريا وقالت عقب صمت: بعدج مصرة ما تخبريني؟
هند: شو اللي تبين تعرفينه؟
ثريا: كل شي.. أبا اعرف من هي هند.. عشان اقدر افهمها..
هند: مب لازم تفهميني يا ثريا..
ثريا: بالنسبة لي مهم هالشي وايد.. انتي صرتي وحدة منا وفينا..ولا بعدج تعتبرين نفسج غريبة؟
هند: ثريا انتي شو اللي تقولينه..؟ والله اني اعتبرج شرات اختي بالظبط.. وندى وناديه اموت فيهم.. حتى احمد ما قصر ويايه.. ..
ثريا: عيل ليش مب راضية تفتحين لي قلبج؟
تنهدت هند وقالت: زين.. بخبرج.. انتي اللي طلبتي هالشي وانا ما يخصني لو رقدتي وانا بعدني اهذرب..
ثريا: ههههههه.. جربيني وبتشوفين..
وخبرتها هند بكل اللي صار لها هي وسلطان.. من اليوم اللي رد فيه سلطان من أمريكا لين وداعهم في منتصف الليل.. وضاعت هند في ذكرياتها.. تحكي وهي تعيش كل اللي استوى لحظة بلحظة.. وثريا يالسة جدامها متكية على المخدة.. تسمع قصتها بكل حزن وتعاطف.. وحظنت هند اللي بدت تصيح وحاولت تهديها..
ثريا: يا بعد عمري يا هند.. واله ما تستاهلين اللي ياج..
هند: ثريا محد صدقني.. معقوله الثقة تنعدم في لحظة؟؟
ثريا: ما توقعت ابد انه حمدان العاقل يتصرف جذي.. سعاد.. ممكن اتوقع منها بس حمدان .. لا.. تدرين يا هند .. لو انا مكان امج.. كنت بروح بيت مانع وبمسح فيهم الأرض.. يخسون يرمسون عن بناتي ويشككون في تربيتي لهم..
هند: هذا اللي صار يا ثريا.. كلهم تخلوا عني..
ثريا (بحنان): هنادي.. انا واقفة وياج من الحين.. واقول لج مرة ثانية اعتبريني امج.. وصدقيني ما راح تندمين..
هند: أدري فديتج.. والله ادري اني مستحيل اندم..
فجأة .. ابتسمت ثريا وقالت: ياللا نروح الصالة نتصل بسلطان..
تفاجأت هند.. ومن الفرح حست عمرها تطير للصالة.. وشلت التيلفون واصابعها تدق الارقام بكل حذر عشان ما تغلط.. وتمت تتريى النغمة بكل توتر.. بس للي فاجأها انه رقم غرفته مقطوع.. ردت تتصل مرة ثانية وثالثة..
هند: ثريا.. الرقم مقطوع.. مستحيل يكون مقطوع..
ثريا: لا حاولي مرة ثانية.. الشبكة دوم تكون مشغولة في هالوقت..
حاولت هند مرة ثانية بس ماشي فايدة..
هند: بدق على رقم الصالة..
ثريا: ياللا
دقت هند بس للأسف كان نفس الشي.. مقطوع..
تنرفزت هند ع الآخر ودقت بيتهم عشان تتأكد انه الشبكة مب مشغولة وانقهرت يوم رن التيلفون..
بندت هند بسرعة وردت تتصل برقم سلطان.. بس ماشي فايدة..
هند: غيروا ارقام بيتهم.. انا متأكدة انهم غيروها..!!
ثريا: لهالدرجة ما يبون أي اتصال بينج وبينه.؟؟
هند: لهالدرجة واكثر.. انا متأكدة انه هاذي فكرة امايه..
ثريا: بعدج يا سعاد حقودة وغيارة..؟؟ من يوم كنا يهال وهي جذي..
هند: شو أسوي الحين يا ثريا؟؟
ثريا: لا تحاتين.. بنلاقي حل.. الحين روحي نامي وباجر بنفكر في هالموضوع.. خلاص حبوبة؟
هند: خلاص..
راحت ثريا ترقد ويلست هند في الصالة.. وقالت وهي تتنهد: آاااه يا سلطان.. والله اشتقت لك.. محتاجة اسمع صوتك.. أحس انك بعدك موجود في حياتي.. أحس بعمري بعيده وايد .. بيني وبينك بحور ومجرات.. فديت قلبك أكيد يحاتيني.. يالله تحفظه وتجمعني به يا رب..
بعيد عن البحرين.. وفي دبي.. كانت الساعة 2 فليل.. والكل في بيت مانع راقد.. الا العيون..اللي تعودت على السهر.. ترقب رنين الهاتف.. وتنظر بحزن.. لكلمات انكتبت قبل كم يوم على الجدار.. هي كل اللي تبقى له من اغلى انسانة على قلبه..
نهاية الحلقة الثانية عشر
اختكم
ماوحشتك</span></font>
رد مع اقتباس
مواقع النشر (المفضلة)