<font color='#000000'>الجزء التاسع
---------------
---------------
حمد : قوول ..
راشد : اللي ما تعرفه ..إنه خولة ما عرست لأنه رافضة أي واحد و ما تبى غير ..واحد لوح اسمه ..حمد ..
حمد : راشد .. انته تعرف شو يالس تقول ...
راشد : و جيه ما عرف شو يالس اقول ..بابا .. لا تقوليه ما تحبها .. سمعت عبد الرحمن ولد عمييه عبيد بيرد يخطبها ..مرة ثانية إن ما سويت شي تراها بتاخذه ..ما اقص عليك ..
حمد : شدراك انها بترد تاخذه ...
راشد : حمدوووو ..تراها ربيعة خولة ... و تقولها كل شي ...تدري ..اسمع..
راشد : حمد تحيد الحادث اللي استوى قبل سنين ..يوم تدخل حضرتك غيبوبة 3 مادري 4 أيام ..
حمد : و دخل السالفة هاذي بموضوعنا ...
راشد : حمووود ..صدق انك هب من البشر .. خوالي يا حمد استوتلها أزمة قوية و طاحت و في المستشفى حول الأسبوع عشانك.. خفت من عقب ما قلنالها إنكم بخير ما كانت تعرف إنك في غيبوبة ...مسكينه .. يوم درت إنك نشيت من هالغيبوبة كانت تي و تطل عليك .. من بعيد ..و فليل محد يدريبها ..بس كنت أنا دوم اشوفها ...حتى شمووووه تدري بكم .. بس ماقدرت تسوي لكم شي لأن خولوووه حساسة و انته رخام من برودتك ...
حمد : يوم خولة خلصت الثانوية .. كنت مابغي اسير اخطبها لأني أعرف أنه خوالي لها طموحاتها .. انته شفت نسبتها .. كله ولا يوم قالت بتدرس طب ..
البنية تبا تشتغل تبا تعيش حياتها و أنا الصراحة لو خذتها ما ابغيها تشتغل ...
راشد : حمد ..خولة كانت مستعدة حتى تهد الدراسة عشانك ...
انصدم حمد صدمة حياته يوم سمع رمسة راشد .....
راشد : بلاك ... عرفت يا حمد وين تفكيرك وصللك .. شو كان بيصير في دنياك لو انته رمست ؟؟؟؟
حمد : شيصير بدنيانا ..لو رمسنا...
راشد : على الشو نويت ؟؟؟
حمد : راشد ..رد العين ...
راشد : اشو ؟؟؟
حمد : رد العين ...ابغي ارمس ابوييه في موضوع مصيري ...
راشد : هااا ..ما بغيت ...اشوى ما مشينا وايد .. يالله قبل لا تغير رايك ..
و يلف راشد و يرد العين ....
و في بيت بو سالم ....
راشد : السلام عليكم
ام سالم : هاذي اللي مطرشتنك وراه ..وين سرتوا ؟؟؟
حمد : امييه استهدي بالله ما سرنا مكان .. في الفريج ...
بو سالم :اشو بلاكم ؟؟؟
حمد :ابويه ..بغيتك ...
ام سالم : و أنا ؟؟؟
حمد فخاطره ( تنكت امييه بعد): انتو الثنينة ...
بو سالم : خير ؟؟
حمد : ابغي اخطب .. خولة بنت عمييه سيف ...
ام سالم :لااااه .. توك عايف العرس و لا تباه ...
بوسالم : اسكتي يا ام سالم .. خليني أفهم السالفة ..
حمد : ابوييه ابغي خولة ..محد غيرها ...
بو سالم : بتخطب على خطبة ولد عمك ....
حمد : ابوييه .. خولة ردت عبدالرحمن و اسأل شما .. ردوه من زمان ..
بو سالم : همممممم.. دام انهم ردوه ..بنشوف ابوها ...
حمد : ابوييه .. الله يخليك بسرعة ..باجر ..
ام سالم : توك ما فيك عالصدعة ...
حمد: أمايه هذاك أول .. و الأول تحول ...
ام سالم : سبحان مغير الأحوال ..
بو سالم :و لا يهمك يا حمد .. باجر انشالله قم دق حق حميد و خبره انه بنييهم باجر ..
راشد : انشالله ابوييه ..
حمد : يرمسني انا أنا ..بلاك ؟؟
راشد : الله الله يا زمن مادري منو توه يستهبل عمره ...
حمد : جب جب جب ..يلله ..هب باجي إلا انته ...
و بالباجر ... الظهر ..خولة ياية من الدوام و تشوف البيت مشتل و حالته حالة .. تسير عند أمها ..ما تعبرها ..شما مشغولة في المطبخ ..نجول هب طايعة تخبرها و لا تقول شي ...
خولة : نجلووووووه خبريني اشو يالس يستوي .....
نجلاء:خولة مادري .. قومي عني ...هب فاضتلج ...مشغولة ..
خولة : مشغولة بالشو ؟؟؟
نجلاء : تبين العلوم تخبري واحد من اخوانج ..روحي ما اعرف ..قالولي اشتغلي و انتي ساكته ...
تسير خولة عند أمها ..
خولة : أمايه ..بلاج هب معبرتني ..محد معبرني ...تراني بسير حجرتيه و بقفل على عمرييه الباب و لا برمس حد...
ام حميد : خير ما تسوين ...
خولة : أماييييييييه!!انزين دقوا عليه ما برد عليكم ...زعلت و لا تزقريني ..
بو حميد : خولة ..تعالي بلاج تضاربين الهبوب الهابة ...
خولة : ابوييه ..محد معبرني اسألهم منو ياينا ..ما يردون عليه .. ابوييه فديتك انته اللي بتخبرني ...
بو حميد : انتي بعدج تحوطين بثيابج ...توج ياية من الدوام ..
بو حميد يتهرب من الإجابة .. خولة : هييه ابويه ... هي اكتشفت طبعا انه يتهرب ..
بو حميد : سيري اتسبحي و غيري ثيابج و انزلي اتغدي و يصير خير ...
خولة : ابووووويه ..دخيلك مالي غيرك ..خبرنييه ...
بوحميد : خولوووووووه سيري ..بسير عندي شغل ...مشى ابو خولة .. و هو يرمس عمره ..
أما خوله تتحرطم ..يا ربييه من وين يايبيني ..من الشارع لااااا بديت اشك ..أنزين رمسوني خبروني اشو السالفو اشولها هاذي اليولة كلها ؟؟؟
بسير اتسبح و اغير ثيابيه .. و ارقد لي ساعتين احسن لي من مجابل ويوه ناس ما يبوني ..
تسبحت خولة و صلت و اتسدحت شوي عشان تريح ....يرن مبايلها ..
حمده : مرحبا مرحبا يا حي هلا و الله بخولة ...
خولة : هلا حمده .. شحالج ..
حمده : خولوووه ...شو تسوين ؟؟؟
خولة : ما شي اتحرطم ... حمدووووووه انتي اللي بتيبين الأخبار ...
حمده : أنا ؟؟؟؟
خولة : حمدووه اشو يالس يستوي في بيتنا ..محد معبرني ..مسويلي مقاطعة تقولين منتجات أمريكية ..
حمده : انتي يالسة في بيتكم ..و تبيني أعرف اشو يالس يستوي عندكم .. كيف تستوي هاذي ؟؟؟ خبريني ؟؟؟
خولة : دقي حق ... رشوووووووووودج ...
حمده : هااه .. ادق له ألو ..رشوودي ..اشو يالس يستوي بيت عمك ؟؟ تبينه يهدني ..قولي ما تدانيني ..و تبيني افكج من ويهي ...
خولة : شمووووه هب طايعة تقولي شي ..بمووووووت ..بينفجر لي عرج في راسي لو ما عرفت ...
حمده : بسم الله عليج ... بخبرج بدق له و برد ادق لج .. و لو ما دقيت اعرفي اني ما ادري عن السالفة شي ..
خولة : اوكييييه ..يالله باااااااي ...
تسكر حمده عن خولة و تدق على طوووول حق راشد ...
حمده : السلام عليكم و الرحمه ...
راشد : و عليكم السلام ..هلا ...
حمده : شحالك ..
راشد : بغيتي شي ؟؟؟
حمده : هااااا..شكلك هب فاضي ..
راشد : لا فاضي ...
حمده : لا برد ادق لك عقب ..
راشد : بتقولين اشو تبين ...و إلا لا ..
حمده : راشد بلاك ؟؟
راشد : ما شي ...خير..عندج شي ...
حمده : راشد ...
حمده تتنهد : فمان الله ..
راشد : حمده ...
حمده : راشد ... مع السلامة ...
تبند حمده و تدق حق خولة ..عسب تشغل تيلفونها و ما يدقلها راشد ...
خولة : ها حمدووووه ..ما خبرج ..
حمده : خولة دقيتله .. يرد عليه يوم ارمسه ..تقولين يرمس حد هب طايجنه .. من عرفته ما حيده رمسني جذه ...
خولة : شو قلتيله ...
حمده : و الله ما قلت شي ..ما عطاني فرصة ... بس سلمت سييده قالي ..بغيتي شي ؟؟...
خولة : بلاااااه ؟؟
حمده : مادري ...يا ربيييه و الله ما سويت شي ؟؟؟
خولة : ما عليج ... بيرد يدقلج و هو ندمان بس الحينه بيتغلى ..
حمده : مادري .. انتي بعدج قافله على عمرج ..
خولة : يت نجلووووه ادق عليه .. عسب الغدا قلتلهم ما ابغي ..مع اني اتقطع من اليوع ...
حمده : ادريبج ما بتتحملين بتنزلين تاكلين ..
خولة : لا مسوية حسابي .. في شوكلاطة في الحجرة ..تصبيرة لين عقب ...
حمده : اوكييه بخليج الغالية بسير ارقد شوي ...لا تنسين تخبريني اشو استوى عقب ..
خولة : اوكيه حبيبي ... يالله باااااي ...
بندوا عن بعض .. حمده بندت مبايلها و أغلقته و خولة بعد بندته و سارن هنتيناتهن يرقدن .. و لا عبرن حد و لا حتى سألن في حد .. و قبل المغرب ..
ام حميد : خولة ..خولة .. خولوووه قومي بسج من هالرقاد ...
خولة و هي نص واعية : هااااااا ..اشو تبون ؟؟؟ توكم ما تبوني .. خلوني ارقد ...
ام حميد : حميد .. تعال .. تعال قوّم اختك .. بيأذن المغرب ...
حميد : امييه قومي شوي أنا بواعييها ...خولوووه و صمخ جلاب ... قومي افتحي الباب ...
خولة تفتح الباب : خير .... اشو ؟؟!!
حميد : خولة قومي صلي و انزلي يبونج ...
خولة : و أنا ما ابغي حد .. ما جني ييتكم الظهر و لا عبرتوني جنه مسوية شي ...سر لأني هب ناقصة حد وراسي يعورني ...
حميد :بخبرج ما عليه منج بتنزلين يعني بتنزلين ..لو بنزلج بالبجامه اللي لابستنها ..يالله ..
خولة : عفانا الله وين حقوق الإنسان .. بخبرك سر و فكني بس ...
حميد : بوقت لج 10 دقايق ما طلعتي ..بدخل عليج ...
خولة : تروم انته ...امييييييييه شوفيه ...
ام سالم : حميد ...
خولة فخاطره .. يالله هذا اللي قدرتي عليه ..
تدخل خولة و تصلي اللي عليها و تبدل ثيابها و تتطلع ..نزلت ما ترمس حد إلا جان ابوها رمسها و إلا امها بغت شي ..حتى لو بغوا شي تسويه و هي ساكته ..
بو حميد : بلاااج من نزلتي و انتي مبوزمة و حالتج حالة ...
خولة : ما شي ..
بو حميد : حتى انا مقاطعتنيه ؟؟؟
خولة : لا ترمسوني ما ارمس حد ... من كبيركم لين صغيركم ...مقاطعتنكم ...
بو حميد : نهون ؟...
خولة : هنت عليكم ! ..
حميد : خولووه يالله اعدلي ويهج تراج مب شي يوم انتي جذه ...
خولة : محد طلب رايك ...
سعيد : حشى علينا .. بلاج ؟؟ فترة و عدت خلاااص عاااد...
خولة : لا ما عدت .. تبون شي ..عندكم شي .. شكلكم ما عندكم شي ..بسير حجرتيه ..بخبركم لو زلزال بيستوي لا تزقرونيه انزين يالله ..فمان الله
شما تيود خولة : خولوووووه يالله ..عن هالحركات ...
خولة : انتي انتي ..انتي لا ترمسيني .
شما : حتى انا ماخذه مني موقف ؟؟؟
خولة : انتي أولهم ..
سعيد : خولوووه ..يالله عاد عن مرتييه شوي شوي عليها ...
خولة : قلت ربيعتيه بتخبرني اشو بلاهم هل البيت ..حتى هي ما خبرتني ..
حميد : تعالي بنخبرج انزين ....
خولة : ما ابغي اعرف ..زين ..
بو حميد : لا حووووول ..خولة تعالي تعالي ...
خولة : خير ابوييه ؟؟؟
بو حميد : سلمج الله .. كنا مشغولين بيية قوم عمج محمد ...
خولة : هاذي اليوله كلها عشان قوم عمييه بيون .. و خير يا طير ياما يونا ..اشو اللي تغير الحينه عشان ما اعرف يعني ؟؟؟
حميد : يالدعمه .. احيدج فهيمه ..
بو حميد : خولة...قومي تعالي ... ياخذ بوحميد خولة و يسير بها حجرته ....
يتبع اليوم <img src="http://oasis.bindubai.com/emoticons/tounge.gif" border="0" valign="absmiddle" alt=':p'> <img src="http://oasis.bindubai.com/emoticons/tounge.gif" border="0" valign="absmiddle" alt=':p'>
شمس دبي</font>
رد مع اقتباس
مواقع النشر (المفضلة)