<font color='#000000'>الجزء الثامن
--------------
--------------
و في يوم من الأيام ....كان عامر متواعد مع حمد ..
عامر : لين متى يا حمد ..و انته تقولي ما تعرف شو تسوي ...
حمد : عامر ..
عامر: حمد .. لو انته تحبها و تباها جان ما توانيت في يوم انك تخطبها .. شوفني أنا الحينه عندي عيال و انته بعدك إلا مادري و ما اعرف ..
عامر : تم ساكت جذيه و خلها تطير من ايديك ...
حمد : ................
عامر : يالبرود اللي عندك يا اخي .. يجتل الواحد ...بييك اليوم .. و الله و بتقول ..عمّور قال انزين ...تتحراها بتترياك تريتك سنين بس الحينه اول ما اييها حد بتروح و لا بتعبرك ..
حمد : لا تقول جذه ..اعوذ بالله من فالك ..
عامر : عيل استو ريال و خلنا نفرح بك .. جذه و نفصل كنادير يديدة ..و نسير أنا و انته الطواش و نزهب حق العرس ..
حمد : هههههههه .. انشالله يا بو .. بو شو نسينا.. اشو سميت بجرك ؟؟
عامر : احم احم .. بو محمد ..
حمد : انشالله يا بو محمد ... فالك طيب ..
في بيت بو حميد ...
ام حميد : خوالي ... خولة ...
خولة : نعم امييه ...
ام حميد : خولة بخبرج بسير بو ظبي بيت خالتج فاطمة بزورها مرة ولدها طالعة من المستشفى مربية ...بتسيرين ويايه ....
خولة : هييه امييه وين ما بتسيرين وياج ..بسير ..
ام حميد : خلاص عيل اخوج حميد بيودينا ...عقب العصر بنطلع بنيلس يومين و بنرد ...
شما : خالوه .. عمييه سيف يباج ...مسولج تيلفون ..
ام حميد : خير ..بسير اطالع بلاه ابوج ...
شما : خوالي صدق بتسيرين بوظبي ...
خولة : هييه بسير بغير جو شوي ..آآآآه ..
شما : سيرتج بوظبي ما بتغير شي في الموضوع ...
خولة : ولو ... ما عليه من حد .. على فكرة بخبرج شي ..
شما : قولي ...
خولة : أنا كبرت و اللي في عمري كلهن عرسن و ما بخفيج يا شما ..اللي بييني باخذه و انا أقولج ...
شما : خولة حمد ما بيسوي مثل سعيد ... لو بيسوي مثله جان سوا يوم ياج عبد الرحمن .. و يوم يووج هل سويحان ..
خولة : منو قالج اني بعبره بس جنه ما يبا يرمس ..برايه هو عليي و على عمره با ييديه جنى ...
شما : لا تظلمينه ..
خولة : ما بايديه حيلة ...
شما : تتحرين عمرج بتنسينه ...
خولة : شما لا تضغطين عليه ... بسير اجهز عمرييه ..
تقوم خولة و تسير حجرتها .. و اطلع خولة مبايلها و ادق حق ربيعتها ..حمدة اللي ظلت معاها من الثانوية ...و اللي ملج عليها راشد اخو حمد ..
خولة : مراحب ...
حمدة : هلا و الله ببنت الكتبي .. شحالج ..
خولة : والله الحمدلله ..شو العلوم ؟؟
حمدة : و الله بخير .. شو تسوين ...
خولة : ماشي ..بخبرج بسير بوظبي يومين .. اليوم و باجر و برد بالجمعة ...
حمدة : بتهدين العين .. شو مودنج بوظبي ...
خولة : بسير عند خالوه يومين .. مرة ولدها مربيه ...
حمدة : هييه ...شخبار القلب و المحاني؟؟
خولة : على الحال نفسه .. تدرين من اليوم و رايح بنساه .. بس يكفيني اللي فيني و هب ناقصة تعّني ..
حمدة : ليش؟؟!!
خولة : كنت لو يطلبني عيوني .. قلتله أنا فدوتك ..بس لي فات الفوت ما ينفع الصوت ..و أعترفلج كنت غلطانه .. غلطيت يوم حبيته ..ما حطيت في بالي إنه ..إنه ..
حمدة : خولة كملي .. ما حطيتي في بالج انه خواف ...
خولة : هاااه.. خواف؟؟!! ...شو تقولين ..
حمدة : المفروض تعرفين إن حمد خواف ..يخاف من المسؤوليه ..
خولة : حمدة هو ما يعرف اني أحبه ... و أنا ما اعرف إذا كان حتى يفكر فيه غير اني بنت عمه ..
حمدة: خولة ليش ما ترمسينه ..
خولة : هااااا.. تبيني اسير اقوله أنا أحبك انته شرايك ؟؟!!
حمدة : لااااااه .. حلوة هاذي انته شرايك .. صبري خليني أفكر لج بخطة جهنمية ...
خولة : قولي يام الخطط .. شاقني فنج ...
حمدة : خولووووه ببند عنج سيري بوظبي وردي بتلقينها جاهزة ..
خولة : بتفصلين و إلا بتطبخين انتي !!؟؟...
حمدة : إلا طبخة بسويلج ...
خولة : بديت أزيغ و الله ...من رمستج ..
حمدة : ما عليج شو في شو بسوي ..يالله الحينه فمان الله ..
خولة : فمان كريم ..
خولة يالسة ... تفكر .. مرت ليالي العمر ما بنت ما يصير نعلنها قطاعة ..أدمنت بك وبحبك أدمنت مالي عالصبر استطاعة ..أصون الغلا لا هنت لا هنت .. حرام تسعى في ضياعه .. ياليتك في حالي تمعنت و آنست شوقي و اندفاعه ..شف كيف صرت كيف أنا كنت كله من أسباب الولاعه .. ياللي على قلبي تسلطنت مدخل عليك الله راعه قلب يصونك لو تمننت شاريك ولو الغير باعه ..
ام حميد تدخل على خولة الحجرة : خولة ..وينج يالله انزلي اتغدي .. ورانا درب ..
خولة : انشالله اميييه .. يالله ياية بس بصلي ...
ام حميد : يالله بارك الله فيج ...بسرعة ..
صلت خولة و نزلت تتغدى و من عقب الغدا .. و يوم يو بيطلعون ..ياهم حمد عند الباب كان يبغي طارق ..فسلم ..
حمد : شحالج خالوه .. شخبارج ؟؟عساج بخير ..
ام حميد : بخير الحمدالله شحالك انته ..انشالله بخير ..
حمد : و الله بخير الحمدلله ...
حميد : ما بتسلم على بنت عمك ؟؟؟ هاذي خوالي بس شارية أدب ...
حمد : ههه .. السلام عليج خولة ..شحالج ؟؟
خولة : بخير الحمدلله ..انته علومك أخبارك ..شو مسوي ..
حمد : و الله ..الحمدلله ..من متى ما ييتونا ... نسيتوا الدرب ؟؟
ام حميد : لااااه آفاا عليك بس ...يالله عاد عقب ردتنا من بوظبي بنييكم ...
حميد : ها حمد وهقت عمرك ..امييه عزمت عمرها على عشى عندكم ..عاااد بخبرك هب تسود ويهك ..نبغي عشوة حلوة هااا..
حمد :خالوه تامر بس ...يالله اسمحولي ..
حميد : ادخل طارق يالس في المنامة .. سرله ..
حمد : يالله ..فمان الله ...
كل واحد يذهب لحال سبيله .. و يسير المكان اللي يبا يسير له ..وغابت خوالي عن العين 3 أيام ..
حمد في البيت يشل شلة من شلاته ...
... قلي متى يا بعد عمري تجيني .. قف الزمان و لا تعطف جنابك يا من تساوي بالغلا موق عيني ..حرام تخلف هقوة اللي يهقابك ..لا يا أمل قلبي و رجوى سنيني..وش فايدة عمري إذا ما حظا بك ..دونك حياتي جوها ما يزيني ..يا تعسها يا نحسها في غيابك ..ترى العنا من بعتني مشتريني .. و اليوم قلبي من العنا التجابك ..امطر بوصلك روض قلب حزيني ..كل رجاي امطر مخايل سحابك .. رد انتعاش الود يا شوق فيني ..جود بصخا عطفك لمن ما صخابك ..همسات صوتك يارجايا تحييني .. و العمر لو هو مكدر بها بك.. من غيرك انته بالحيا يعنيني ..موتي جفاك و راحتي في اقترابك ..هاذي مشاعر صادقة يا ظنيني حب و غلا و اخلاص خل وفابك ..
راشد : حمد ...
حمد : هلا ..
راشد : انته يالس اهنه و قوم امييه يخططون لمستقبلك ...
حمد : هاااااااه .. شو السالفة ؟؟؟
راشد : يبون ايوزوونك .... وييييه انته آخر من يعلم .. يوم المعرس ما يدري عيل العروس شجايل ...
حمد : جيه الدنيا ما فيها قانون .. قوم عني جذه خلني اسير اطالع اشو يسوون ...
راشد : تعاااااااااال ..وين ؟؟
راشد : عفانا الله ...يرن مبايل راشد ...
راشد : هلا و غلا ..هلا و مليون مرحب ...
حمدة : هلا ..بو سنيدة شو يالس تسوي ؟؟؟
راشد :ماشي ..يالس ويا هالعايلة ..ما يعلم فيها غير ربج ..
حمدة : ماييت تتغدى عندنا اليوم ..
راشد : شو مسويين ؟؟؟
حمدة : انته قووول ...أنا مسوتنه ...
راشد : محمر ..
حمدة : شدراااك ؟؟؟
راشد : حمدة من ملجت عليج و انتي تغديني محمر ...
حمدة : جنه ..جنه في ناس اهنه فشلوووني .. رشودي يعني اشو تباني أطبخ لك يعني ..هالشي الوحيد اللي اضبطه عدل عدل ...
راشد : ولا يهمج يا حبيبتي ..بيي اتعشى عندكم ..بس دخيلج بدون محمر ...
حمدة : انته اطلب بس .. بسويلك اياه لو يكلفني عمري ...
راشد : لااااااه كله ولا عمرج .. لو كلفج عمرج ..منو بيتم حق رشودج ؟؟؟
حمدة : فدييييييييييييت رشودي .. ياليت ناس بس يحسون ...
راشد : بعدهم هاذيلا الإثنينة ...
حمدة : راشد ..حمد ليش يسوي جذيه ؟؟؟
راشد : حمدة ..أمييه تبى تيوزه لو ما سوى شي خلال يومين ...
حمدة : خلال يومين ... اصلا خولة قالت اذا حمد ما سوى شي ما بتترياه ...أصلا هو شو مصبرنه ؟؟؟
راشد : علمي علمج ....
حمدة : اوكييه ...فديت رشود ..ولد بو رشووود لو سمحت ممكن أهدك الحينه .. و اسير لأنه في زلازل يالسة تستوي في بيتنا ..
راشد : بسم الله عليج ..اوقفي تحت الباب عسب ما يستوي عليج شي ..
حمدة : فديت اللي متروعين عليه ... يالله بو سنيدة ... وداعة الله ..
راشد : بحفظ الكريم ..الغالية ..
و تحت في بيت بو سالم ....
ام سالم : انته اسمعنييه ..ما بتخسر شي ..
حمد : آمري يام حمد ..قولي ..
ام سالم : محد غير خبربرك رشود سار يربع يخبرك ..اسمعنيه ..بنسير نشوف البنت بس .. و إذا عيبتك ..عاد يصير خير ..
حمد : امييه ..لا تغصبيني ...ما ابغي من برا ...
ام سالم : من برا منو قال باخذلك بنت ولد عموه ...
حمد : خيييييييبة تخيب بليس وين سايرة بعيد ..اماييه فديتج استريحي .. ماروم على الصدعة .. و هب وقته الحينه ..
ام سالم : جنك تبغي تشّوب وانته تتريا ..
حمد : أمايه ...لو عزمت أنا بروحي بييج و بقولج اخطبيلي فلانة انزين ...يالله فمان الله ...
يطلع حمد و لا يعبر حد و يرض بالباب من وراه ...وهو يتحرطم ...
أم سالم :تعال وين ساير ...
راشد : بلاج امييه ؟؟؟
أم سالم : سر ورا اخوك ...عن يتخبل هذا بعد ..اركض وراه ...
راشد : انشالله ...
حمد : راشد رد هب ساير مكان بحوط في الفريج ...
راشد : قم بركبك بنطلع في كلمتين ابغي اقولك اياهن ...
حمد : هااا ..يعني ما يستوي اهنه ...
راشد : لا قم قم .. خلنا نسير .....و يركبون الإخوان الثنينة و يطلعون و يسيرون درب العين دبي ...
حمد : رشووود اتخبلت وين بتوديني ..
راشد : بنسير دبي .. عشان نرمس و إذا ما عيبتك رمستيه ..اعقك في بر دبي و ارد عنك العين و ترد مشي ..
حمد : اشو كنت بتقول ...
راشد : اصبر عندي خط .. ألو ...هلا هلا و الله ..
حمده :هلا .. و غلا و مليون ترحيبة ...راشد فديتك ..
راشد : عيونه ..
حمده : بخبرك بنطلع ..أنا و امييه و خواتييه ..
راشد :وين؟؟بدوني ...
حمده : لو يستوي جان زين بس عيب ...بسير وياهم نسلم على حرمة طالعة من المستشفى ...
راشد : سؤال متعلق بموافقتي ...
حمده :قوول ؟؟
راشد : فيه خطابات في المكان ...
حمده : هااااااه ..مادري ..لا
راشد : سيري ..بس لا تكشخين وايد .. ما اروم ادور لي وحدة ثانيه ..
حمده : ههههههههاي ..جيه سايرة عرس..هههههههه
راشد : شوي شوي تراني يالس اسوق ..اشو عيبتج ؟؟؟
حمده : حلوة ...
راشد : بخبرج عااد هب ارد ما القاج .. و إلا نسيتي العشا ...
حمده : آفااا عليك .. تعال و شووف اشو بدعت لك ..
راشد : خلاص عيل بنشوف ..
حمده : انته وين ؟؟؟
راشد : أنا .. ساير دبي ...
حمده : من ورايه ..دبي ..ماعليييه بخبرك يود عمرك ها ...و اتحمل ..تراني أغار ...
راشد : تخافين أغازل وحدة عليج و آخذها ..
حمده : هااااا لأجتلك و أجتلها وياك ..
راشد : خخخخخخخخههههههخخخخخخ ... يعلني فدا اللي يغارون ...
حمده : سر و تعال و عقب بنتفاهم ..يالله راشد فمان الله ..
راشد : ويييييييييه زعلوا زعلوا .. ما عليه أنا أعرف شجايل أراضيهم ...يالله فمان الله ..
يبند راشد التيلفون و يطرش حق حمده مسج .. و يرد حق حمد و يكلم رمسته ...
راشد : حمد اشو تتريا ؟؟؟
حمد : هااا .. ترمسني ؟
راشد : لاه ..مادري منو ويانا .. اقولك اشو تتريا ...
حمد : اشو ؟ شو اتريا ؟؟
راشد :يعني بالعربي الفصيح .. جني يالس ارمس هندي و اخويه ثقافته عربية ... حمد انته تبغي خولة ..ليش ما ترمس عمييه ..
حمد : هااا .. رشود ...
راشد : يالله عاد عن هالحركات ..بخبرك شي ..انزين ..
يتبع عن قريب
شمس دبي
<img src="http://oasis.bindubai.com/emoticons/smile.gif" border="0" valign="absmiddle" alt=':)'></font>
رد مع اقتباس
مواقع النشر (المفضلة)