<font color='#000000'>و هذا الجزء الثالث و انشالله يعيبكم
شما : حموووود أركض ....خولوووه خلج واعية ..
شما : رشود هات ماي .. ماي بسرعة ..
راشد : انزين .. انزين ..
حمد على الدري يركض حجرة شما و يدور الجهاز مال خولة ...يلقاه و يوديه ...ويوم نزل يلست شما تركب فيه طبعا عقب ما نششت خولة و قومتها بعد ما كثرت الطراقات و رششت المياه على ويها ..و هي تركبه كسرت جزء منه من الزيغة ... ساعتها يدخل سعيد ..
سعيد : السلام عليكـــ .... شو مستوي ... خولوووه بلاج ؟!؟!
شما : مادري .. أزمة ربو . تعال ركب الجهاز بسرعة ..
سعيد : في جزء منه خربان ...
راشد : ما بغى يخترب إلا الحينه ... سووا شي ..
شما : حمد ... حمد .. وينك ..
حمد واقف وراهم مب قادر يقرب منهم خايف يستوي شي حق خولة .. مب قادر يقترب لأنها بدون وقاية و ما يبغي يحطها في موقف محرج ..
شما : حمد في وحدة من هالسدات في حجرتيه بتحصل الدوا اللي شراة مال امييه .. سر اركض هاته ..
حمد: وين ... اي سدة اي مكان ...
شما :صوب الباب ....
خولة : خلاص ..أنـ..ـا ..بخـ..ـير ..
يربع حمد حجرة شما و يدور في السدات و ينبش ... و يطالع .. ما لقى ..بجى له سدتين ما فتحهن ....فتح الأولى نبشها ما لقى فيها شي .. طاحت من هاذي السدة صور ...صور شما اخته لابسة فستان و مسوية تسريحة و كاشخة ... حذالها .. حذالها ..خولة شاف صورتها .. تجنن ما كان يتوقعها جذه ..جميلة ..ملجة سالم على عليا اختها..انطبعت صورتها فباله .. فجأة افتكر انها تحت و بحاجة للدوا فتح اخر سدة و لقا فيها الدوا نزل يركض ..
حمد : شما يودي ... خذي ..
شما : خولة ..اخذي الدوا ...
خولة : اقولكم انا بخير ..بخير ..
سعيد : اخذي الدوا ...بخبرج قومي بوديج المستشفى ..أنا بسير اشغل السيارة و انتوا هاتوها ..
راشد : اوكييه ...شمو وين عبيكن بييبهن لكم ..
شما :فوق ورا باب حجرتيه ..
سعيد يطلع من صوب ... و راشد من صوب ما يتم غير شما و خولة و حمد ..
شما : ليش ما تاخذين الدوا ...
نزل راشد و على الدري سمعهم ....
خولة : انا بخير أزمة و عدت .. و المستشفى ما له داعي من الأساس ...
حمد يفتن على بنت عمه خولة : خولووووه اقولج اخذي الدوا ..و بسج لا تكابرين ما فينا يستوي عليج شي ...و المستشفى بتسيرينه ..
تنصدم خولة من رمسة حمد .. هب متوقعة .. فاجأها .. حمد اللي ما كانت تسمع منه شي غير السلام عليكم .. ذاكرتي .. وين شما .. حطوا غدا ..تمت ساكته ... ضايقها اسلوبه ..و راشد ما صدق اللي تسمعه أذنه طول حياته حمد كان جاف في معاملته مع بنات عمه اللي فسروا تصرفاته على اساس انها تكبر ..و غرور ..
أما حمد .. فهو هب مستوعب اللي سواه .. هب عارف شو اللي خلاه يتصرف جذه و تكون ردة فعله جذيه .. اكتشف لحظتها خوفه عليها ..تم واقف مسمهر..سرحااااان ..و ضايع ..دخل سعيد: يالله تعالوا ...
خولة نشت من مكانها : سعيد انا بخير برقدلي شوي .. و بستوي زينة و سيرة المستشفى مالها داعي و قلنا أزمة و عدت عشان أنا اطلعت خاري في الرطوبة ..
شما : خولة هالمرة ما كانت مثل المرات القبلية لازم تسيرين ...
سعيد : خولة فديتج .. قومي خلينا نسير .. و الله احسن لج ..
خولة : لا استهدوا بالله و ايلسوا اتغدوا ... و اذا كنت تعبانة وايد بخبرك ..
سعيد :.. لا حول و لا قوة .. بتسيرين ..
خولة : سعيد .. فديتك .. و تتطالعه بنظرة طفولية ما يقاومها
سعيد : مثل ما تبين ...
تنش خوله عسب تثبتلهم انها بخير و تغرف حق سعيد و حمد .. و هم واقفين يطالعونها ..
خولة : هذا لك يا حمد .. دياي .. سمج .. أكيد سمج .. و هذا صحنك ..سعيد خذه .. وتقوم ..
شما : طول حياتج عنيدة ...
تسير خوله حجرة شما و تطيح على الشبريه عسب ترتاح ... و تفكر في رد فعل حمد .. اللي كانت غريبة .. و اللي زعلت منها .. بس ما حبت تبين زعلها منه بأنها غرفتله غداه ... أما تحت عالسماط ...
سعيد : بلاك يا حمد ؟!
حمد : تتوقع هي زينه الحينه ... أنا ما دانيها المواقف اللي مثل جه ..
سعيد : ما دام قالت انها زينة .. صادقة ..لأنه خولة ما تهزها الأزمات اللي مثل جذه .. و صدقني خوالي تعرف اشو يالسة تسوي ..
حمد : حتى ولو ..كان لازم تغصبها تسير المستشفى .. تتطمن عليها و إلا هي هب اختك ...
سعيد : عفانا الله في حياتك ما شفت أزمات ربو ؟!؟! بخبرك .. وين شما ..
شما : هلا ...امر ..
سعيد: ما يامر عليج عدو بس لا تخلين خوله تذاكر اليوم طلعيها من الحجرة .. ثرها الحالات ما تيها إلا من التوتر و الخوف من الإمتحانات ..و لأنه عليوه و نجول محد عنها ...
حمد : خلاص أنا بطلعكم اليوم ...
راشد :اقترح نطلع طلعة جماعيه ...
حمد : انته ايلس افتح لك كتاب ...
شما : حرام عليك يا حمد تراه و الله يذاكر ..
راشد : فديتج والله اختيه فاهمنتني ..
سعيد : لا بنطلع كلنا يمعة .. بنسير مكان حلو ... وين تقترحون ..
حمد : بخبركم بنسير بو ظبي ... البحر ..
سعيد : اشووووه؟! تبغي ابويه ييني من المانيا هو و حميد و يغسلوني..
حمد : لا مسوي حسابي بوديهم مكان ما في حد ...شو قلت ؟!
سعيد : انزين ..دام انه ما في حد ..
شما : انتو طبختوها لكنه ما خبرتوا خولة ... ما ظنتي تسير ...
راشد : ليش؟!
شما : جيه وين تتحرون بوظبي .. فرة حصا .. خولة ما بترضى مكان بعيد خاصة انه ما باقي على الإمتحانات غير 5 أيام ..
راشد : لا بترضى ... أنا بخليها ترضى بأساليبي الخاصة ...
سعيد : راونا شو بتسوي يا بو الأساليب ...
راشد : متى بتطلعون ؟!
سعيد : عقب الصلاة ...
راشد : خلاص ..
عقب ما خلصوا غدا .. يلسوا يفكرون كيف يرفهون عنها .. سار راشد عسب يشوف شو راي خولة في الطلعة .. اللي كانت يالسة بتفتح كتبها عقب ما غفت و هي طايحة تفكر عالشبرية في حمد و في امها اللي تولهت عليها و في عليووووه و نجوول...
راشد : طق طق طق ... ممكن ادخل ...
خولة : منو راشد ... تفضل ..
راشد :خولة داخل عليج طالبنج طلبه قولي تم عشان خاطرييه لا اتفشل ...
خولة : خير ... قول ..
راشد : تم ؟!؟! ...
خولة :......... تم ..
راشد : اخوج و اخويه سعود و حمود بيطلعون و يبونا نحن نكون وياهم و شمو بعد ..أنا قلت ما بسير عسب المذاكرة يعني ما ابغي افوت و لا دقيقه ..بسسس..
خوله : هههههه لااااااه ...انزين وين بيسيرون ..
راشد : انتي قلتي تم...
خولة : وين ؟
راشد : بيسيرون ... البحر ...
خولة : لا يكون العين جزيرة و انا مادري ...
راشد : بوظبي ...
خولة : رويشد .. جنك تخبلت ...
راشد : ششششش .. انتي قلتي تم و بنات الأصول ما يردن في كلامهن ..إلا جنج إلا تبين تفشليني جدام الشباب ...
خولة : ما عاش اللي يفشلك .. بس اسمعنييه ما اروم ورايه منهج لازم خلصه ...
راشد : يوم واحد ما بيأئر .. قومي عشانييييييييييه .. و إلا ما لي خاطر عندج .. توج اتقولين مثل اخوج ...
خولة : عشانك بس .. لو غيرك ياني جان ما سرت ...
راشد : مشكورة يا بنت العم ... عشتي و الله ..
خولة : تبغي شي بعد ...
راشد : هييه تنشين و تغيرين و تنزلين ويايه ..
خولة : انزل ...و أنا وراك ..
ينزل راشد و هو تحت يسألونه ....
سعيد : ها شو قالت ...
راشد : خبرتك اني ما برد لك بخفي حنين ..يا حبيبي اعجبك .. هاذيه نازلة وراية ...
حمد : شو هالاساليب ...
راشد : يا خي هذاا فن ...
شما : انزين يا بو الفنون ... ما بتغير هالجلابية اللي لابسنها من البارحة ...
راشد :وين من البارحة بعد انتي ...ويييه فشلونا .. اليوم الصبح لابسنها ...
راشد طلع عشان يسير و يبدل و تتدخل خولة ....
سعيد : ها خولة انشالله استويتي بخير ؟!؟!
خولة : الحمدلله ...
حمد : سلامات ..
خولة : وين راشد ...
شما :بيبدل و بلحقنا ...
راشد : أنا ييييت .. منو اللي يسأل عني ؟؟
شما : خوالي ...
راشد : فديتني .. سألوا عني ناس حلويين ..
سعيد : رشووود .. تغازل اختيه و أنا جدامك ...
راشد : سر لا ..توها تقولي انا مثل اخوها الصغير .. قطعت عليه الأمل ...ماشي أمل .. لو بغازل فيها من اليوم لين باجر ...
سعيد : زين سويتي فيه .. ما ينعطى ويه ...
حمد : بخبركم قوموا ..خلونا نطلع ...
سعيد :أنا باخذ اختيه و بنت عميه بركبهم ويايه ...
حمد : و انا منو بيتم لي ؟!
راشد يصفّر و يطالع الصقف ..:احم احم أنا منو بيركبني ؟!و إلا اسوق بروحي ...
حمد : لا لا تسوق بروحك و لا شيات ..اقولك اعشق الراحة .. بتي ويايه ..مخي مخبق اخليك تسوق بروحك ..لين بوظبي ..اذا هي ساعة انته بتسويها ثلث ساعة ...
راشد : انزين .. مشينا ...
سعيد : مشينا ...
و في السيارة ... حمد و راشد ساكتين ما يرمسون ..أما عند سعيد فكلهم مرتبشين على سوالف و ضحك و رمسة ... و مسجل و أغاني و حالتهم حالة ..
خولة : سعيد ربشتنا اقصر عليه شوي ...
شما : الله ..ميحد .. و الله فنانة هالأغنية ..
سعيد : هاذي شما تباها .. بخليها ...
خولة : سعيد ..مبايلك يرن ...
سعيد : هاذا راشد ...
راشد : الو .. سعيد .. شخباركم ..
سعيد : هلا .. بخير الحمدلله ..بلاكم؟؟
راشد : ما شي اطمن عليكم رقدتوا و إلا واعيين ..
سعيد : لا واعيين ..
راشد : شكلها حالتكم احسن عن حالتي ..
سعيد : عسى ماشر ..
راشد : حمد بيجلطني ..لا يرمس و لايسولف .. المسجل مب مخلني افتحه ...مادري بلاه ؟!؟!
سعيد : حليلك .. حالتك مستعصية ..
راشد : اخبرك ما خليت واحد من الربع ما دقيتله ..بس عشان ارمس و اهذرب وياه ..
سعيد : عطني اياه برمسه ..
راشد : اصبر ...
حمد : هلا ...
سعيد : مرحبا .. بلاك انته ويا راشد .. خف عليه انته مطلعنه تريحه من هم الدراسة هب تكبت عليه ..
حمد : اشو تباني اسوي به ؟!؟
سعيد : بخبرك بنمر المزرعة وقف موترك هناك و اركب ويايه انته و رشود ...
حمد : بتزدحم سيارتك ...
سعيد : ما عليك شي مكان إلا انتو ثنينة هب جبيلة ..
حمد : على رايك ....
و بعد دقايق يركب راشد و حمد ويا سعيد و خولة و شما ..في هاذي اللحظات بتتعرف بنت عم حمد عليه .. و بتعرفه حق المعرفة ..حمد من النوع الحبوب و المسالم اللي ما يؤذي أحد .. طيوب ..يوم كانت خولة ترمس عنه ويا اخته كانت شما دوم ادافع عنه .. و تشرح لها انه يخاف من العلاقات ..عشان جذه ما يقرب من حد إلا اذا عرفه زين ..ممكن نقول حذر في علاقاته و اجتماعيته ..قضوا طريجهم و هم مستانسين و عقب ما انفتج شوي وياهم حمد و اندمج و خذ على خولة شويه .. و تفاعل مع السوالف و النكت شافت فيه خولة انه انسان حبوب .. ومرح . بدت هي بعد تاخذ عليه ..
سعيد : دقايق و بنوصل ..
خولة : زين لأني مليت من اليلسة على هالكرسي ...
راشد : و أنا بعد ...
شما : هييه بس ما انكر ان انا استانست في الدرب ...
حمد : و أنا بعد ...
راشد : لو ما نقذتني يا سعيد مادري اشو كان بيستويلي ويا حمد ...
حمد : يزايه مودنك ...
راشد : مودني على عيني و راسي لكنه كابت عليه أنا إذا ما هذربت لي نص ساعة و سولفت ..أموووووت ..
كلهم يضحكون ...... يوصلون و يبركن سعيد السيارة ... و ينزلون و يفرشون لهم حصير .. و ينزلون الجاي و القهوة اللي سوتهم مالا على عجل ..
شما : خولوووه .. سيدة يلستي .. قومي قومي .. بنلعب في الماي شوي ...
خولة : يالله ..
راشد : اتريوا بيي وياكم .. بنتمشى عالسييف ..
ساروا و تموا يلعبون بالماي ... كان الهوا عليل و نسماته روعة روعة روعة ... سايرين و رادين ...
راشد رد عند الشباب ...
حمد : جيه رديت عنهم ...
راشد : لاعت جبدي من سوالفهم ...
سعيد : هههههههه ..
راشد : تضحك ..ها سر امشي وراهم دقيقتين .. بتلقاهم يخبرنك قصة حياة عايلة بأسرها .. إلا بنتهم ما دري شو بلاها وولدهم عرس و ما ياب عيال ..و لا خلهن يرمسن عن عرس و إلا ملجة ..
حرييييييييم .. خسا لله سوالفهم ..
حمد سمع كلمة ..ملجة .. تذكر صورة خولة اللي انطبعت في ذاكرته ..ما صدق انها ترجع له ..و يفكر فيها ...
خولة و شما يمشن على البحر و صوب الماي ...
شما : محلاته المكان .. يجنن عرف سعيد يختار ...
خولة : صدقج رووووووووعة
شما : في اشو يذكرج البحر ...
خولة : في اللي بعيد عني .. و ولهت عليهم ...قوم امييه .. امييه ..ابويه..حميد .. طارق .. نجول و علايه ..
شما : و أنا بعد ...
يسكتن شوي ... شما : محلاته البحر لو كنتي تحبين ..
توقف خولة .. بس شما تكمل دربها عقب تنتبه حق خولة ...
شما :بلاج؟!
خولة : شو قلتي ...
شما : افرضي انتي تحبين ..و اللي تحبينه وياج ...و يايين البحر
خولة : شمووووووه شو تخربطين ...
شما : ما اخربط جد ...
تلف خولة و تشوف الشباب يالسين و فخاطرها عن منو ترمس شما .. راشد اخوها .. حمد اخوها منو ترمس عنه .. تشوف سعيد و تفتح عينها عدل ..
تفهم خولة منو تطري شما ...
خولة : شموووه .. سعييييييييد ؟!؟!؟
شما : ...........
خولة : ردي ..
شما :...
خولة : من عيونج .. تحبينه .. و هو ما يدري ..حليله اخويه ما يدري ان في ناس مولعين به اهنه
شما تغني : معاه يتم انسي و انسجامي و بدونه حالتي حالة شجية ...و حبي له تسبب في غرامي و نفسي له هديه..
خولة : شموووووه من متى ؟؟
شما : بخبرج بس ما تيبين سيرة حق حد ...
خولة : ارمسي ..
شما : من أيام الثانوية ...
خولة : وساكته ... يا ربييييه و انا ما دري ..
شما : يأشرون لنا خلينا نسير ...
خولة : شموووه ...
تتجدم شما خولة و تمشي عنها لين عند اخوانها ...
سعيد : خوالي .. يالله بنروح ...
خولة : تونا يايين ..
سعيد : ماروم أتأخر .. ورايه شغل بسير المزرعة ابويه موصني امر اطالع جان يبون شي ...
خولة : امري لله مع اني استانست ...
سعيد : الحمدلله المهم انتي ....
يروحون كلهم و يردون العين ... عند المزرعة يركب راشد ويا حمد و البنات وياهم ..
خولة : سعيد دقلي ... و مر لا تقطعني ..
سعيد :و لا يهمج ..كم خوالي عندنا ..
يردون البيت ...و على دري البيت .. شما و وراها راشد .. وبعدهم .. خولة وراها حمد .. و تفرقوا ..اللي سار يتسبج و اللي بيلحق على صلاة و اللي عنده شغل ...
شما : خوالي بدش قبلج اتسبح ...
خولة : اوكييه .. بسير اييب التيلفون من تحت ابغي ادق حق طارق ..بسأل عنهم صار لي 4 ايام من رمسيتهم ؟!...
شما : خلي حمد يدق لج ...
خولة :اوكييه ...
و في الصالة تشوف خولة حمد ...
حمد : بغيتي شي ...
خولة : حمد لو تسمح ادقلي حق قوم امييه ..
حمد : انشالله .. اييب حمد التيلفون و يدق لهم المرة الاولى ما ردوا المرة الثانية ردت عليها عليا ...
عليا : الووووووو
خولة : علاااااااايه .. هلا و غلا ..
عليا : خولووووو .. فديتج مرحبا يا حي .. اتولهنا عليج ليش ما دقيتي ...
خولة : انشغلت بالمذاكرة ...
عليا : اتذاكرين و إلا مشغولة في رشوووووود ..ها
خولة : بسج تنغزين فيه و الله رشود مثل اخويه ...
عليا : ابووووووويه هاذي خولة ..
بوحميد : هاتيها برمسها ..
خولة : هلا ابويه السلام عليك .. شحالك شخبارك انشالله بخير..
بوحميد : هلا بملح حياتي ..و عليج السلام احنا بخير عساج بخير ..
خولة : ابويه متولهة عليك وايييييد .. ما وحشتك حشرتيه ..
بو حميد : وحشتنييييه و و انتي بعد لج وحشة ..
بوحميد : شخبار الدراسة .. و عيال عمج شخبارهم وياج .. قاصرنج شي .. بواجعهم لو مب مهتمين فيج ..
خولة : قاصرني يا بويه انتو .. و عيال عميه هب مقصرين ويايي ..
بو حميد : سعود وينه عنج ...
خولة : بوييه سعيد عنده امتحانات .. توه كان عندي .. و قال بيسير المزرعة بيشوف جان يبون شي ..
بوحميد : هااا زين زين .. عاد سلمي على عيال عمج ..
خولة و الدموع في عينها : يبلغ .. انته سلم على حميد و طارق و اميييه قولها ولهت عليها و على نجلووووه بعد .. وينهم ..
بوحميد : نجلاء و امج سايرين السوق ويا طارق ..
خولة : هيييه .. ما بطول عليك ..
بو حميد : هييه الغالية تحملي على عمرج تراه ما بقى شي عالإمتحانات ...
خولة : انشالله ابوييه ..
بو حميد : فمان الله ...
خولة : فمان الله ...
تبند خولة التيلفون و تعطيه حمد ... و تمسح دموعها بعيد عنه ...
خولة : مشكور يا حمد .. ابوييه سلم عليك ..
حمد : خولة ..
خولة : هلا ..بغيت شي ..
حمد : خولة أنا اسف ..
خولة : لا و لا يهمك ...
* * * * * * *
يتبع
اختكم شمس دبي</font>
رد مع اقتباس
مواقع النشر (المفضلة)