انته الوحيد اللي له القلب سلمت..

[المزيوونه]

<font color='#EE9A4D'>بعد انتهاء الغداء ... اتجه الجميع لأخذ قيلولة .. وفي غرفة مهره الحمراء ..

غاية : ها بتتصلين فيه ؟

مهرة : لا بعدني ما زدت خبال .. خلاص انسي السالفه ..

غاية : لا تنسين انج وعدتيه ..

مهرة : إنتي ما تحسين إنج غادية محراث شر ؟

غاية : لا والله ما قصدت شي .. بس أحس به لايق عليج ..

مهرة : ليش شفتيه قياسي ؟؟

غاية : ههههههههههههههه تنكتين بعد .. اتصلي خلينا نشوف شو يقولج ..

مهرة :.......................





فيصل يكاد يحضن الهاتف ... وهو في شارع جميرا .. كالعاده .. يرن هاتفه .. ويشوف الرقم .. فتتوهج عيناه وتشتعل كالنار .. تعكس حرارة الشوق التي تسكن جوارحه ..



فيصل : هلا وغلا ..

مهرة : السلام عليكم أخوي

فيصل : وعليكم السلام ورحمة الله وبركاته .. حي هالصوت

مهرة : عفوا أخوي بس ممكن تخبرني باللي استوى ؟

فيصل : سمعيني يا مهره .. أنا انسان سيده وعمري ما حبيت ألف وأدور.. صدقيني عمري ما فكرت إني أسوي هالشي بس إنتي جذبتيني .......

مهرة : أخوي ممكن تتكلم بأدب مثل ما أنا أكلمك

فيصل : والله غصباً عني ..

مهرة : اسمحلي عيل بسد الخط .. ولا عاد تتصل ..

فيصل : مهرة .. ليش انتي قاسية ..

مهرة : يالله فمان الله

فيصل : والله لو سديتي الخط .. بتسمعين فيني خبر .. تراني في الشرع ويالسه أسوق ..

مهرة : انته شو تبا منّي ..؟

فيصل : .............................

مهرة : ألو..

فيصل : ممكن تهيدين وتريحين أعصابج لأني أبا أكلمج بهدوء ..

مهرة : شو بغيت .. مالك شغل بأعصابي

فيصل : مهاري ...

مهرة : .....................................

فيصل : لا تردّين ... يكفي أسمع أنفاسج ..

مهرة : انته صدق اللي يعطيك ويه تقول تخوره ..

فيصل : لا حشا ما قصدت .. بس لا تسكرين عني ..

غاية وبصوت منخفض جدا ..(بِس بِس شو قاعد يقولج) .... مهرة ترمقها بنظره وتشير بيدها للانتظار..

مهرة : أنا لازم أسكر ألحين اسمحلي مشغوله ..

فيصل : الله يخليج يا مهرة .. لا تحرميني منج .. والله ما تدرين غلاج وقدرج عندي .. عطيني فرصه وخلي الأيام تثبتلج ..

مهرة : فمان الله

فيصل : الله يحفظج..

غاية : عنبوه ما بغيتو ..

مهرة (ودموعها على خدها الغض) : غاية

غاية : بلاج ؟ بسم الله الرحمن ....

مهرة : ليش خليتيني اتصل ؟ ... قالي أشيا وايده ..تخوف

غاية : شو يعني بيخطفج ؟

مهرة : انا مب يالسه أمزح وياج ..

غاية : ولا انا يعني خبرج السالفه ولا لا ..

مهرة : لا

غاية : سبج ..؟

مهرة : لا

غاية : انزين شو قولي ...

مهرة : لو طوّلت وياه زياده جان قال ... أحبج

غاية : وراسي عندج ؟ ........ ولا لالا .. لا تحلفين براسي .... وراسج ؟

مهرة : والله

غاية : الللللللله .. وجان بتعرسين

مهرة : غايوه اسكتي .. انتي ما تدرين شو السالفه .. وشو بعرّس .. متفيجه تراج

غاية : ليش دام ان رمسته صدق .. أكيد هو يباج..

مهرة : لا تفتين .. هو ماقال يباني ..

غاية : خلّيه .. بيقولج بعد كم يوم ..

مهرة : لا أصلاً أنا ما بتّصل..

غاية : عن الدلع .. يمكن صدق يحبج ..

مهرة : ..............................

غاية : يا غبية لا تضيعين الفرصه من إيدج .. الريّال وسيم وما عليه كلام ومبيّن عليه ولد عرب وناس.. وشكل السالفه صدق

مهرة : مادري........

غاية : لا تدرين ...
مهرة : خلاص طبّي السالفه هذي ...</font>

[المزيوونه]

<font color='#EE9A4D'>مهرة .. تسكنها الرغبة الملحه في كل ثانية .. لا تنحني عن مسار التحليق بدربه .. لا يتزحزح صوت فيصل وصورته عن بالها .. ماهذا الشعور الذي ملأها ..؟؟.. أهو الإعجاب أم أنه أكبر من هذا ..



فيصل يفسّر مشاعره في تدفّق نبراته بقوة من حنجرته ليصرخ وهو في سيارته بعيدا عن المسامع .. "يعلني أفداج يا مهره" ويكررها مع نبضات قلبه .. مع دورة دمه وتنفسه .. مع حركة كل عضو في جسده ..يحبها .. بل مجنونها



وتبدأ بذرة الحب تنمو بين فيصل ومهرة .. تسقيها مهرة من طهرها .. ويسقيها فيصل من وفائه وعطائه.. أروع ما عهدته البشرية من قصص الحب .. وكيف والعاشقين تسكنهما الرغبة لاتمام مسيرة الحب العذري .. الطاهر .. بظل يجمعهما في كنفه ويجسّد زاويته .. وأركانه .. بأعذب المواقف .. وأجمل اللحظات...







وبعد مرور ثلاثة أشهر على قصتهما التي لم يتجرأ كلاهما قط على زعل الآخر.. وفي إجازة الصيف تحديدا ...



مهرة : ألو

فيصل : هلا يا أغلى من مر على الخاطر ..

مهرة : هلا حبيبي ..

فيصل : عيون حبيبج يالغالية .. شخبارج ..

مهرة : الحمد لله .. شخبارك انته ..؟

فيصل : أنا بخير .. دام اني اسمع صوتج ..

مهرة : تسلملي والله .. حبيبي بغيت أستأذنك في شي ..

فيصل : يا غرامي إنتي تامرين أمر مو تستأذنين .. آمري يعلني أفداج

مهرة : فديت روحك لا عساني أخلا منك .. بغيت أصبغ شعري لعرس اربيعتي يزيوه..

فيصل : يا حبيبتي .. إنتي ما تدرين إنج بطبيعتج .. جاذبية ؟

مهرة : مليت من لونه .. أحب أغير .. ممكن ولا لا ..

فيصل : وفصّولج يرفض لج طلب .. اللي بتسوينه وتشوفينه يريّحج سويه ولا تديرين بال .. دامج مرتاحه .. بس أي لون بتسوينه ؟

مهرة : تسلم يا أغلى إنسان في حياتي .. واممممممممم يلين الحين ما قررت بس يوم بقرر ان شالله بخبرك..

فيصل: تسلمين يا حلوة .. حبيبي أنا رايح لعبدالعزيز المستشفى ويوم بظهر عنه برد أدق لج

مهرة : ان شالله ... الله يحفظك..

فيصل : فمان الله ..



عبدالعزيز .. في المستشفى الأمريكي .. بدأ جلسات العلاج الكيماوي منذ نحو أسبوع بسبب التكاثر الغريب للخلايا المسرطنه التي قد تؤدي إلى انفجار الدماغ لولا تدخّل الأطباء بالعلاج المناسب ..



فيصل : مرحبا ..

عبدالعزيز : هلا فيصل .. حيّاك

فيصل : ها ماشالله .. ان شالله اليوم أحسن..

عبدالعزيز : وهو مر علية يوم وانا كنت فيه أحسن .. الحمد لله على كل حال ..

فيصل : ياخي ليش انته دومك جيه متشائم .. ان شالله بتظهر من المستشفى وانته بأتم عافية وصحه ..

عبدالعزيز : يمكن هالكلام قبل بس ألحين خلاص .. تراني أتريا يومي ..

فيصل : عوذ بالله من إبليسك .. شو هالرمسه .. إنته ريّال مصلّي وخايف ربك .. أقولك حد مر عليك يابلك حلاوة مني مناك..

عبدالعزيز : هههههههههههه هيه شوف تحت الطاولة .. في سلال حلاوة .. من قوم بوجاسم والشامسي والرميثي ..

فيصل : هيه حلاته هالويه يوم يضحك ... وهم متى مرّوك ..؟

عبدالعزيز : اليوم الضحى .. حتى الوالده كانت موجوده عندي ..

فيصل : أها ......

عبدالعزيز : فيصل

فيصل : آمر ...

عبدالعزيز : أنا من أسبوع ما كلّمت مناية .. وهي أكيد تحاتيني .. خايف عليها تسوي شي بعمرها ..

فيصل : ليش انته صدق تحبها ..؟

عبدالعزيز : فيصل كفاية شهرين تخلي مكانتها في قلبي كبيره وانا قطعتها مره وحده .. ما اعرف شو أقوللها ..

فيصل : اتصل فيها .. وصارحها ..

عبدالعزيز : ياليتني أقدر .. أحس إني بحطّمها .. كفاية إني خدعتها من البداية وما خبرتها عن مرضية ..

فيصل : يعني وانته صاحي هي تحبك .. ما راح تتخلى عنك وانته مريض .. كلمها وماراح تخسر

عبدالعزيز : ظنّك جيه ..

فيصل : عيل ...


عبدالعزيز أُعجِب بفتاة عرفها عن طريق النت .. منذ شهرين .. وهي إنسانه خلوقة ومن عائله ميسورة .. استمرت علاقتهما إلى أن دخل عبدالعزيز المستشفى ، وبدأ جلسات الكيماوي ..

فيصل : عزوز وين تلفونك ..

عبدالعزيز : مغلق من اسبوع واليوم فتحته ووصلنّي 12 مسج و 7 بريد صوتي .. ما قدرت أفتح ولا رساله أنا متأكد إنهن منها ... ورديت اغلقه .. ما أقهر الرمسه اللي ممكن تكون موجوده فيهن..

فيصل : عزوز اتصل هب زين تسوي بالبنية جيه..

عبدالعزيز : ان شالله

فيصل : يالله الغالي انا اترخّص عنك .. بمرّك خلاف ان شالله ..

عبدالعزيز : بحفظه ..

فيصل : شي في الخاطر ..؟

عبدالعزيز : سلامتك .. فداعة الله..

فيصل : فمان الله</font>

[المزيوونه]

<font color='#EE9A4D'>وبعد ان خرج فيصل من غرفة عبدالعزيز وبعد تفكير عميق تناول عبدالعزيز هاتفه من الدرج المحاذي لسريره .. ويتصل على محبوبته منى ... من دون أن يقرأ أي رساله ..



عبدالعزيز : ألو السلام عليكم

منى : (تغرق في بحرٍ من الدموع)..

عبدالعزيز : الله يخليج حبيبتي لا تصيحين ..

منى : انته ما تحس ؟

عبدالعزيز : خلّيني أفهمج الموضوع لا تظلميني ..

منى : شو اللي تبا تقوله .. اسبوع ولا حتى تطمّني عليك ، مالك عذر ؟

عبدالعزيز : مناية ممكن تعطيني دقايق أشرحلج موقفي .. وخليني أكمل كلامي كله من دون ما تقاطعيني الله يخلّيج

منى : تفضل .. لكن من ألحين أقولك أنا رافضه كل أعذارك .

عبدالعزيز : منى .. إنتي مؤمنه بقضاء الله وقدره ..

منى : ............................ (بدأ القلق يعتريها .... وبدأت ترتجف من الخوف)

عبدالعزيز : عبدالعزيز اللي انتي تحبينه مريض .. وهب أي مرض .. كنت حاب أقولج من أول يوم عرفتج فيه .. لكن خفت إني أخسرج .. شخصيتج وايد جذابة .. وأنا فعلا حبيتج من كل قلبي لكن القدر يمنع إن علاقتنا تستمر..

منى : (وموجه من البكاء الهستيري) شو صاير ؟ ..... شو فيك

عبدالعزيز : يا منى .... أنا فيني سرطان بالراس ..

منى (وبأعلى صوت تمرّدت على الواقع) : لا مستحيل مستحيل ... الله يخليك قول انك تكذب قول .. الله يخليك .. ما بقولك شي لأنك تأخرت وغبت هالمده بس دخيلك غيّر رمستك ..

عبدالعزيز : والله يا مناية ودي .. لكن هذا واقعي .. والحمد لله راضي بقسمة ربي ونصيبي .. مناية .. مابغي أعذبج ويايه زياده .. اعتبريني انسان يتريّا الموت وانسيه أو خلّي الذكرى معاج لو ما بغيتي ....

منى : مستحيل انساك ومستحيل أخليك .. أنا احبك يا عزيز أحبك..

عبدالعزيز : أنا بعد أحبج .. بس والله إن راحتج عندي أهم من راحتي .. لازم نبتعد وانتي نصيبج راح ييج وبياخذج اللي يستاهلج .. هب اللي جذب عليج من أول ما عرفج..

منى : اسكت .. والله اني مابرضى بغيرك .. انا احبك انته ومالي غيرك صدقني فراقك موت ..

عبدالعزيز : يا حبيبتي .. خلاص .. مستحيل أغير كلامي .. أنا ما أتريا يلين تتصلين ويقولولج إن عزيز توفى ..

منى : الله يخليك ... لا تعذبني زياده ..

عبدالعزيز : ولها السبب المفروض إني أخليج .. فمان الله يا حبيبتي ..

منى : لا أرجوك ..

عبدالعزيز : والله أحبج والله .. فمان الله



منى (لم تستطع التفوه بأي كلمة لأن عبدالعزيز أغلق الهاتف وقرر أن لا يُفتح وأن تبقى منى في صدره ونبضاته حتى تنفصل الروح عن الجسد .. وتبقى ذكراها الغاليه للأبد) فهو ينتظر الموت .. ويهرع لتوديع الأحبه





توالت الأيام والحب بين فيصل ومهرة يترعرع وينمو كأنه طفلٌ ينمو في كنف والديه..

أما غاية ومحمد فقد عقدا قرانهما منذ فتره بسيطه .. فهم على وشك إتمام مراسم الزواج التي ستكون خلال الفترة القادمه البسيطه ..</font>

[المزيوونه]

<font color='#EE9A4D'>في منزل مهرة .....
محمد : مهروه .. مهروه ..

مهرة : هااا .. شو تبا حمود .. يالسه أسوي كيك ..

محمد : تعالي شوي الصاله ..

مهرة : نعم شو بغيت ...

محمد: شوفي هالفساتين .. وايد حلوة صح ..

مهرة : روووووعة بس لمنوه ؟

محمد : طبعا حق حرمتي ..

مهرة (وقد انتابتها غيرة): الله يالدنيا .. نسيتني يا حمّود .. ها وبعدك ما عرّست

محمد : أفا . .. منو قال .. إنت الغالية والأصل .. ههههههههههه اللي يسمعج يقول عنج حرمتي الأولى

مهرة : لا ارتاح .. بس كنت أتحراك زاقرني عشان شي ثاني .. يالله بسير اشوف كيكتي عن تحترق

محمد : سيري سيري .. وخلي شوي حق حرمتي بمر عليهم خلاف .. أقولج بتسيرين ويايه ..؟

مهرة : هههههههه ويا راسك .. بسير متولهه على غايوه من زمان ما شفتها ..

محمد : تكونين جاهزة .. عالساعه 7 المغرب .. بمر عليج عقب ما صلاة المغرب...

مهرة : تمام أفندم

أم مهرة : شو عندكم اسمعكم بتظهرون ؟

مهرة : هيه .. ولدج بيوديني بيت الحرمه..

أم مهرة : قرة عيني ، يعلني أشوف عيالكم قبل ما أموت ..

محمد : ياربي ياميه .. الله يطول بعمرج ويخليج لنا .. بتشوفين بطوي وخلوف كلهم يرابعون يدّام عينج ..

أم مهرة : ان شالله يبلغني بعيالك وعيال مهرة ..

مهرة : يالله بسير أشوف الكيكه أكيد احترقت ..

في منزل غاية ....
مهرة : هلا بعروستنا الغالية ..

غاية : هلا وغلا بالغالية بنت الغالية .. شخبارج

مهرة : الحمد لله ربي يسلمج..

محمد : وأنا محد يسلّم علية ؟

غاية : اسمحلي والله .. شخبارك ..

محمد : بخير وانتي شخبارج يا أحلى عروس ..

غاية(ووجهها يشع احمراراً) : الحمد لله ...

مهرة : عاد هب يدّامي استحي ..

محمد : ههههههههههه العروس بروحها مستحية ..

غاية : تفضّلو .. حيّاكم الله ..

بو غاية : هلا هلا .. اشحالك ابوية وشحال الأهل ( ويدخل في حوار عميق مع محمد)

أما غاية ومهرة .. ذهبن إلى غرفة غاية .. للتحدث في أمور العرس ...



غاية : مهروه .. شحال فيصل ..؟

مهرة : الحمد لله .. على أحسن ما يرام ..

غاية : ليش ما يي يخطبج دام هو يحبج ..

مهرة : كلمني في الموضوع من فترة .. ومادري .. ليش نستعيل .. ؟

غاية : لالا........ يقولج "خير البر عاجله" واحس مافي أي سبب يخلّيج تأخرين

مهرة : ماعرف شو أقولج .. بشوفه ..

غاية : انزين تعالي براويج الأغراض اللي اشتريتهن ..

غاية : مهروه بتمرين علية الإسبوع الياي ؟

مهرة : من عيوني .. بس وين بتسيرين ؟

غاية : تسلم عيونج حبيبتي ..سلامتج بس حاجزة موعد بروفة مكياج في صالون مورا وبحجز للتصوير ..

مهرة : صح يقولون استيديو العروسه جنان ..

غاية : هيه تراني بسير احجز عندهم..

مهرة : فديتج والله اني فرحانة لج من كل قلبي ..

غاية : يالله عسى نفرح فيج وبفيصل ..

مهرة : الله يسمع منج يا غاية .
----------------------------
وعند عودة مهرة إلى منزلها .. تتصل في فيصل ... عشقها الأبدي ... الذي زرع في كيانها نبات الحب ..
مهرة : مساء الحب ..

فيصل : هلا حياتي.. ولهت عليج ..

مهرة : أنا أكثر ..

فيصل : هاا .. إن شالله مرتاحه .

مهرة : الحمد لله ..

فيصل : شو فيج مهاري ؟

مهرة : ماشي .. بس أفكر في أخوي وغاية .. عرسهم بعد اسبوع ونص ..

فيصل : ...... هالشي مضايقج ؟

مهرة : لا بالعكس .. الله العالم شقد أنا فرحانه لهم من كل قلبي

فيصل : ونحن ..

مهرة (وابتسامه ملأت ثغرها) : شو نحن ؟

فيصل : ما تبيني ؟

مهرة : .............................

فيصل : مهاري .. خلي عرس أخوج يتم على خير .. وان شالله فيصل بيي يخطبج ..

مهرة : أحبك والله أحبك ..

فيصل : فديت روحج غناتي ..

.........................................

فيصل : أقولج مهاري لحظه يايني خط ..

ويرد على الخط الثاني ...

عبدالعزيز : ألو ..

فيصل : شو فيك عزوز .. بلاه صوتك متغيّر ؟

عبدالعزيز : أريدك تمر عليّة ضروري ..

فيصل : ياينك .. بسم الله الرحمن عليك ..

.......................................

فيصل : مهاري .

مهرة : هلا فيصل ..

فيصل : قلبي منقبض .. عزوز متصل وصوته رايح مول .. بسير له وبتصل بج خلاف ..

مهرة : خير اللهم اجعله خير ..

فيصل : ان شالله خير .. فمان الله حبيبي

مهرة : بحفظه..



-----------</font>

[المزيوونه]

<font color='#EE9A4D'>في المستشفى الأمريكي .. يندفع فيصل بكل سرعته إلى غرفة فيصل .. خطواته تسابق الريح .. يقف في وجهه الدكتور ويقول انه في غرفة العناية المركزة.. ويمنعه الأطباء من دخول الغرفة.. ولكن بعد اصرار فيصل دخل الغرفة ..



فيصل (والدموع تحتقن في جفونه): عزوز .. لا إله الا الله شو بلاك ..

عبدالعزيز (وابتسامه تعلو شفتاه): فيصل .. اتصلت في الربع واحد واحد .. واستسمحت منهم .. وانته اغلاهم .. عشان جيه طلبت شوفتك ..

فيصل (وقد بدأت نبرته تميل للحزن والأسى): عزوز ماعليك شر .. ان شالله بتقوم وبترجع لنا بالسلامه ..

عبدالعزيز (وهو يتألم): خبرني الدكتور إن الخلايا صارت نشطه .. وإنهم ما يقدرون يسيطرون على الوضع .. وبتبدأ بالانقسام خلال الساعات اليايه.. سامحني يا فيصل لو زعلتك في شــ ـ ـ ـي ... و..........

فيصل : لا حول ولا قوة إلا بالله .. لا حول ولا قوة إلا بالله ..

عبدالعزيز : .................................................

فيصل : عزوز .. دخيلك رد علية .. لا تروح عزوز ................. لا حول ولا قوة إلا بالله .. لا حول ولا قوة إلا بالله



ويدخل الطبيب مسرعاً .. يسيطر على الوضع .. القلب يعمل .. ولكن الدماغ ينزف بسبب انفجار خلية سرطانية فيه .... رحمه الله ... وانتقل في تلك الساعه إلى رحمة الله تعالى .. انتقل عبدالعزيز إلى جوار ربه ..أشهد أن لا إله إلا الله .. وأشهد أن محمداً رسول الله ... كلمات تمتم فيها فيصل .. فقد أعز أصدقائه وأعز أخوانه ..



---------------------------



في سيارته عاد يائساً .. وفي هاتفه 5 مكالمات لم يرد عليها ... مهرة الغالية .. ما تبّقى له من بعد أمه ..



فيصل : ألو ..

مهرة (وفي عينيها عبرة): حبيبي شو فيك ؟؟

فيصل (وهو في حالة هستيرية.. بين عالم الحقيقه والغيبوبة): مهرة .. الغالي راح .. عزيز توفى ..

مهرة (وهي تبكي): لا حول ولا قوة إلا بالله .. أحسن الله عزاك .. عسى ان شالله يرحمه

فيصل : مابقى لي حد يا مهره غيرج .. دخيلج لا تخليني .

مهرة: يا فيصل إنته حياتي اللي ما أقدر أعيشها بدونك ..

فيصل : انزين بخليج الحين لازم أعزي هله وربعنا .. وبتصل بج بالليل

مهرة : ان شالله .. الله يكون في عونهم هله





بعد أيام العزاء السوداء التي مرت على فيصل وكأن ثقلها جبلٌ على قلبه .. برحيل عزيز .. برحيل أعز الأعزاء..

مرّ شهرين على هذه الحادثه .. وبعد أن انتقلت غاية إلى بيت محمد ..قرّر خطبة مهرة ..

---------------------------



يتصل في مهرة الغالية ... وهي تتابع جداولها في مطلع العام الدراسي الجديد ....



فيصل : مهرة حبيبتي

مهرة : هلا فصّول شخبارك حبيبي

فيصل : مهره .... عندي لج بشاره ..

مهرة : خير إن شالله ..

فيصل : إن شالله خير .. اليوم ان شالله أول ما أرجع من الدوام .. بكلّم الوالده عنج .. وبنزوركم على الأسبوع الياي

مهرة (وتعلوها الفرحه حتى إنها ضحكت بصوت عالي): جد تتكلم فيصل ... والله هب مصدقه..

فيصل : صدقي حبيبتي ... وأخيرا ..

مهرة : فديتك والله ...

فيصل : فديت روحج .. يالله حبيبتي أخليج وبدق لج خلاف ..



----------------------------</font>

[المزيوونه]

<font color='#EE9A4D'>في الدوام ....



فيصل : السلام عليكم ...

زملائه في المكتب : وعليكم السلام ...

فيصل : شخباركم شباب ؟

زملائه : الحمد لله كلنا بصحه وعافية ..

سالم (أحد الموظفين في القسم): فيصل ..

فيصل : هلا ..

سالم : وصلك ظرف من المدير يباك توقّع عليه ..

فيصل : وشوهو ؟

سالم : والله ماعندي فكرة .. هذوه ها .. اقراه ..

فيصل (ومنصدم غير مصدق): حلقة دراسية في استراليا لمدة شهرين ..

سالم : مبروووك ... تصدّق .. مختارين بس المتميزين .. بالبركه بالبركه

فيصل : أي مبروك .. أنا بعرّس وماقدر أسير .. بعتذر ..





ويتجه فيصل بعصبية إلى مكتب المدير ..

وبعد طرقات على الباب .....



فيصل : السلام عليكم

المدير : وعليكم السلام والرحمه

فيصل : اشحالك بوحمدان

المدير : الحمد لله ربي يسلمك .. اشحالك انته ؟

فيصل : الحمد لله .. الله يخليك

المدير : ها وصلك الخبر ..

فيصل : هيه .. بس طال عمرك .. أنا ما أقدر أسير .. أنا بعرّس

المدير : بس الأوراق توقّعت من الوزير.. ورفعوهن لاعتمادهن من الشيوخ واعتقد اليوم بيوصلن .. اسمحلنا الغالي .. والله لو ندريبك ان جان ما طرشناك

فيصل : بس ليش ما شاورتوا ...

المدير : الاختيار كان من مجلس الإدارة .. وهذي الحلقة تنمي من موهبكم وعليها علاوات

فيصل : بس أنا ماريد

المدير : اسمحلي ياخوي والله .. ما باليد حيله

فيصل : خلاص .. فمان الله والسموحه

المدير : بالحل الغالي .. فمان الله



فيصل يندفع بخطوات يائسه ... وفي خاطره يتذمّر من الحياة .... " ليش كل اللي أريده ما ألاقيه .. ليش العذاب ها كله .. هل هو قدري إني أعيش بعيد عنها ؟.. ليش لما انفتحت الأبواب في ويهي ...؟ ترد تتسكر .. الله ييسّر ويستر "



-------------------------------------



بعد أن عادت مهرة إلى المنزل ..... من أول يوم في ثاني اسبوع لها في الكلية ...



مهرة : مرحبا أماية ..

أم مهره : هلا وغلا .. اشحالج اميه ؟

مهرة : الحمد لله .. إلا وين أبوية ؟

أم مهرة : تعرفينه مجابل الرياييل في الميلس ..

مهرة : إنزين يالغالية .. بسير أطيح لي ساعة في الغرفة .. بريّح ووعيني خلاف

أم مهرة : تغديتي .؟

مهرة: الحمد لله ....

أم مهرة : يالله توكلي .. صح اتصل محمد ويقول انهم بيوصلون الاسبوع الياي ...

مهرة: متولهه عليهم .. بدقلهم خلاف ..



وتدخل مهرة غرفتها وترتمي من التعب على سريرها .... تتناول هاتفها وتتصل إلى فيصل..



فيصل : ألو ..

مهرة : هلا حبيبي ..

فيصل : ها حبيبي ..

مهرة : غريبه ما دقيت لي اليوم .. ولا تبا مهووورة هي اللي تتصل ؟

فيصل : فديت روحج

مهرة : شوفيك حبيبي ..

فيصل : بقولج شي مهاري ودخيلج افهميني ..

مهرة : طيّحت قلبي .. شصاير ..؟

فيصل : حبيبتي .. اليوم وصلني ظرف .. عندي دورة لاستراليا لمدة شهرين

مهرة (تبدأ في البكاء): ......................

فيصل : حبيبتي دخيلج .. والله دموعج غالية .. لا تتضايقين

مهرة : شو ما اتضايق .. بتروح عني وما تباني اتضايق ؟

فيصل : حبيبتي والله ما بيدي شي ..

مهرة (وهي في بكاء مرير): الله يحفظك ان شالله

فيصل : مهاري .. تراني بعدني أباج .. لا تتحريني اني بتنازل عنج بهالسرعه ..

مهرة : لا تخليني فصّول ..

وبعد نصف ساعه من الحوار ... مهرة تصيح .. وفيصل يحاول يهديها ..هدأت الأمور وتفاهما على كيفية الاتصالات بتكون بينهم ..

فيصل: مهاري متوله عليج تصدقين .. كم مرة كنت ابا اشوفج لكن الظروف مول ما تساعد .. أبا قبل ما أسافر أشوفج

مهرة : حتى أنا متولهه عليك ... متى بتسافر فيصل ..

فيصل : بعد باجر .. على طيارة الصبح .. يعني ماشي وقت ..

مهرة (عادت للصياح): .......................

فيصل : يا حياتي .. ليش الصياح .. أنا هب ساير بحارب ... ساير أدرس ..خلاص اسكتي ولا ما بتصل بج من هناك

مهرة : ان شالله حبيبي .. "تروح وترجع بالسلامه"

فيصل: متى بشوفج؟

مهرة : باجر زين.. عقب ما أظهر من الكلية .. يعني عالساعه 5 ونص ..

فيصل : حلو .. شو رايج تيين بحر جميرا ..

مهرة : خلاص اتفقنا ...

فيصل : تصدقين ..

مهرة : ...............

فيصل : أحس إني كسبت ملاك .. يسوى الدنيا ومن فيها ...

مهرة : حبيبي والله ..



---------------------------</font>

[المزيوونه]

<font color='#EE9A4D'>في اليوم التاي ... مهرة : تلبس أحلى لبس عندها .. واختارت أن يكون اللون أزرق ... لون اللقاء .. اللون الذي لطالما عشقته ... ووضعت اللوحه التي رسمتها لفيصل في ظرف .. واشترت له مجموعه من العطور الراقية المغلفة بأغلفة باريس غاليري .. وآخر ساعة لمجموعة جيفنشي الرجالية ... ووضعتها في سيارتها ...



أما فيصل ... فقد فضّل أن يكون للقاء لونا آخراً ... دخل إحدى المحلات الكلاسيكية واشترى لها سكارفات من شانيل وبولغري .. وخاتم ألماس من مجموعة داماس "الفراشة" وساعة أكوا مارين .... من مجموعة محمد صديقي وأولاده..



كل منهما .. يبذل الغالي والنفيس .. يرخص كل درهم من أجل لقاء يستمر لدقائق ...
يوم اللقاء
تتفجّر البحار شوقاً .. وتحن الأمواج للقاء الشاطئ .. تحذف بنفسها بأحشان شاطئ الحب .. هناك .. وعلى ثرى شاطئ جميرا يقف .. فيصل .. بانتظار مهرة ....

مورسيدس بيضاء .. تتوجه من الشارع الرئيسي إلى الشاطئ .. وقلب فيصل يخفق بسرعه .. تقف السيارة .. فيتقدّم لها فيصل ويفتح الباب .. ويمسك بيدها ليجعلها تشعر وكأنها أميره .. يقبّل يديها .. بحنان ..

الوقت .. تُشرف الشمس لأن تنام على سطح البحر ..

المكان .. ذرّات الهواء الذي يتنفسه كل من مهرة وفيصل فقط ...

الزمان .. يقف لبرهه .. يتأمل هذين الحبيبين ..





فيصل : مهرة .. أضمج بقلبي .. إنتي أغلى من سكن نبضي .. أهواج

مهرة : فيصل ..

فيصل : عيون فيصل..

مهرة : لا تحرجني ..

فيصل : عندي لج مفاجئه ...

مهرة : وعندي لك مفاجئه ...



وكل منهما يتوجه إلى سيارته ويظهر هداياه ..



مهرة : ليش مكلّف على عمرك ؟

فيصل : انتي يعني اللي قصّرتي ؟؟؟؟

مهرة : تستاهل عيوني ..

فيصل : ومهره تستاهل روح فيصل .. تفداج تفداج روحي يا بعد روحي ..

مهرة : فديت روحك

فيصل : أحبج

مهرة : مهرة بعد تحبك ..



ويضع يديه على شفتيها .. يمنعها من الكلام ... ويتوجه إلى سيارته .. ليضع شريط ..

فيصل: حبيبتي إسمعيها .. وخلي نبضي بنبضج .. ودمّي يختلط بدمّج ..



لا يزعلك يا نظر عيني غيابي .. الغلا في القلب ما تشوفه عيونك .... إن كنت مشتاقٍ انا شوقي عذابي .. قلبي الولهان بنظراته يصونك .................................................. ...........







مهرة : تروح وترجع بالسلامه ...

فيصل: تسلمين يا أحلى عروسه .. صدقيني أول ما أرجع على طول راح أخطبج .. والملجه والعرس باليوم اللي عقبهن..

مهرة (وقد احمر وجهها خجلا): خلاص فصّول والله استحيت

فيصل : فديت اللي استحى انا



وبدون سابق انذار .. سحبها فيصل من يديها . وضمها إلى صدره .. بكل عشق .. وهو يهمس في قلبها .." أحبج ..وأموت بثرى أرضج .. مهرة أنتي لفيصل وفيصل لج ..برجعلج يا حبيبتي "



وبعدها يفترقان بوداع حارق .. وبعد أن اطمأنت الشمس عليها وعلى انتهاء مدة اللقاء .. هرعت إلى البحر لتنام وتستكين .. وتغوص في أعماقه .. أما الأمواج .. انسحبت إلى البحار لتعلن انتهاء لقائها بالشاطئ .. والسماء تلوّنت بالسواد .. وبقى الرمز غامضاً .. هل سيكون بعد هذا الوداع .... فراق ..أم .. وفاق





سافر فيصل .. ومهره .. غارقة في دموعها .. متألمة من الداخل كما تألمها من الخارج .....





وبعد مرور اسبوع من سفر فيصل .... وفي منزل مهره ....





أم مهرة : يا امايه .. انتي الحين عروس .. وفي ناس مكلميني .. يبونج حق ولدهم..

مهرة : لا يا اماية مابا أعرس ألحين ..

أم مهرة : ليش يا أماية شو اللي ما يخليج تعرسين الحين .. خلاف ترى محد بياخذج..

مهرة : أماية مستحيل .. انا بعدني صغيره .. ليش تبون تيوزوني ؟

أم مهرة : انزين انتي شوفي الريّال .. تراه ولد أياويد..

مهرة : اماية .. مابا ...

ويدخل بو مهرة : السلام عليكم ورحمة الله وبركاته ..

أم مهرة : وعليكم السلام هلا بو محمد

بو مهرة : شصاير شفيكم صوتكم واصل للشارع ..

أم مهرة : بنتك .... تقول ما تبا تعرّس ..

بو مهرة : الريّال توه موجود عندي .. وكلمني وقلت له ان نحنا ما عندنا مانع ..

مهرة : أبوية .. انا ما ابا .. ليش تغصبوني ..

بو مهرة : لا أماية .. محد غصبج على شي .. الريّال ما ينعاب ..ومافي داعي للرفض



مهرة تترك أبوها وامها وتدخل غرفتها تصيح ..

هل هذا الوعد الذي قطعته على فيصل ....... هل ستكون لغيره .. يبقى السؤال حائراً في ذهنها .....</font>

[المزيوونه]

<font color='#EE9A4D'>بعد يومين من الموضوع ... يعود محمد وغاية من السفر .. يدخل البيت وام محمد في الصالة ..



محمد : السلام عليج يالغالية والله ولهت عليكم (ويقبلها على رأسها ..)

ام محمد : هلا أبويه ولهت عليك العافية .. شخباركم وشو علومكم

غاية : هلا خالوه (وتلوي على خالتها ..)

ام محمد : فديت روحج يا أماية شخبارج

غاية : لاخليت منج خالوه .. الحمد لله أنا بخير كلنا بصحة وعافية .. وين عيل مهره .. وعمي بو محمد ؟

أم مهره : مهره في غرفتها ، وبو محمد في الميلس ..



محمد : .. غاية .. روحي ناديلي مهاري وخلاف بسير اسلم على الوالد ..

غاية : ان شالله ...



وتطرق غاية الباب على مهرة ...



غاية : مهره مهره .... افتحي الباب

(وتفتح مهره الباب وهي مندفعه بكل شوق باحضان غاية .. وهي تبكي)

غاية : شوفيج باسم الله عليج ..؟

مهره : ولهت عليكم والله ..

غاية : انزين يالله روحي الصالة .. محمد يباج

(تركض مهره صوب الصاله .. وتلمح أخوها من بعيد ..): فديت هالويه والله

محمد : فديتج والله شخبارج ... ليش جيه ناحله ؟

أم مهره : يعني ما تعرف دلعها .. ولا تطيع تاكل ..

محمد .: صدق ؟؟؟ ما عليه بهزب لج اياها خلاف ..

غاية : ليكون تسوين رجيم ؟

مهره : لا حرام .. أنا آكل بس اماية ما تشوفني

محمد : ما عليه ......... يصير خير





ويتجه محمد إلى الميلس .. يسلم على أبوه وعلى الرياييل ... وبعد ما فضى الميلس ... يلس الأبو ويا ولده محمد .. وكلمه عن اللي خطب مهره .. وبغى يعرف رايه ..

محمد : يابوية دامها ما تبا خلّوها ..لا تجبرونها على شي ما تباه

بومحمد : بس الريّال ما ينعاف ..ولا ينعاب ...

محمد : أبويه عادي .. لا تنسى هاي وحيدتك ولازم تدلعها .. لا تقسي عليها ..

بومحمد : أمري لله ...

وبعد مرور شهرين .... على مدرجات مطار دبي الدولي.. يتنفس هواء الإمارات إنسان غاب شهرين وكأنه غاب سنتين ... ليس عن الأرض .. ولكن عن من يسكن هذه الأرض .. تحديداً .. مهرة .. تلك العاشقة .. التي ضحّت بالنفيس والغالي .. ضحّت انتظاراً لمحبوبها ......... غاب عنها وانتظرته .. وعاد إليها وضمته

قد ضربا أروع مثال للحب الطاهر الذي لا يعرف اليأس ... الحب الذي لم يدركه البعض إلا كلمةً دون إحساس ..

ياريت كل من حب يصدق ....





مِثْل ما تحضن كفوف الشمس أطراف اللهيب

تاطي جمراتي طَرَف شالي وتشعل به حضنها



في وسط أهلي وخلاني وأنا كني غريب

في مجرات الكواكب توّهت نجمة مدنها



شوف هذاك النظام اللي مشى من دون ريب

فيه نجمات وشموس وفُلْك يتعاقب زمنها



مثلها مثل النظام اللي من احساسي يصيب

ما يصادِفه الخلل لــــــو بعد فرحتها شجنها



بلل شفاه اللقا .. واروي ظما خافق يغيب

وادخل بــ عين الزمان وبدّل بذاتي حزنها



هذي شمسٍ تشرق بصحب الليالي ما تعيب

والليالي في أرق حتى تخايَل نور منها



في لقانا البارحه كان الوصل قلبٍ خضيب

سلهمت عينك حبيبي دمعةٍ تملا جفنها



في هوانا حب طاهر مثله الغيث الصبيب

من سماه لأرض صحرا يغسل بروحي وطنها



بعدها يلفي السكون .. وحب عذري به يطيب

من جروحٍ .. من همومٍ .. خذ بقايا الفرح غنها



خذ بقايا العمر "لجلك" علّمه حكم النصيب

علّمه وإن باح همه .. ادفن جروحي وكفنها</font>

[المزيوونه]

<font color='#EE9A4D'>وفي إشراقة يوم الواحد والعشرين من شهر إبريل للعام ألفين وثلاثه .. في قاعتي راشد ولطيفه يتوجه معازيم مهرة وفيصل للمباركه ..

فيصل في عرس الرياييل... يرزف رزف .. ما رزفه ريّال ..

يتهامس مع النجوم ... موتن حرّة "خذت القمر"

ومهره .. في غرفة الفندق .. تاخذ آخر صورة .. لتنزل للقاعة ...

وفي دخلتها ................. اغنية راشد الماجد تهز القاعه

وجمالها ... يهز الحضور ..



(حد منكم شاف في الدنيا بدر .. مقبلٍ يمشي ومن حوله بشر – من حلاه بيبث للناظر ضياه .. إن ظهر للناس ولاّ ما ظهر – هذا ماهو بدر ليلٍ يختفي .. مع طلوع الصبح و بزوغ الفجر .. أو بدر يصبح بعد مدة هلال .. هذا بدرٍ مكتمل طول الشهر ....................لا إله إلا الله ........عالنبي محمد .. ويالله صلّو عليه)



غاية على يمين مهره .. وأم مهره على يسارها ... يرتبون مشيتها .. وام فيصل .. تيبّب .. والكل في كرنفال .. تحت ضو الهلال ........


بعد مده .. يصل المعرس .. ويدخل القاعه ... يقبّل العروس "مهره" بين عينيها .. ويقف على يمينها ..



فيصل : فديتج واخيرا تحقق حلمي وابتسمت لي الدنيا

مهره : ...............................

فيصل : شو حبيبتي ..شو فيج

مهره : ماشي ......... بس أحبك

فيصل : خوفتيني ... فديت روحج غناتي ...




وعلى بوابة الفندق .. يركب فيصل سيارته المورسيدس .. وتجلس بجنبه عروسه .. متجهين لقضاء ثلاث ليالي في برج العرب .. ومن ثم .. المسير إلى أسبانيا .. لقضاء أحلى شهر عسل ...

فيصل : يا أحلى عروس .. في خاطري أغنيلج .. ويبدأ يغني مع عبدالمجيد ..............

يا أرض احفظي ما عليك .. حبيب قلبي حظر ..

اليوم طالع قمر في طلّتك يا سلام .. حلاك غير البشر وأخذت مشي الحمام

شفتك وضاع الكلام ضيّعت حتى الغزل .. اعذرني والله جمالك ما خلاّ فيني عقل

وقّفت قلبي بسحرك .. ياروحي والله ستر..

ياعيني عالابتسامه تمشي وسهامك تصيب .. اللي يشوفك يقول : يا"بختي" راع النصيب

مهره : تسلم لي يا أغلى انسان .. تراك انته الوحيد اللي له القلب سلّمت .............

وتنتهي الكلمات .. ولكن يبقى حبر الحب ... نازفاً





oO..( النـــــــــــــــــــهاي ـــــــــــــــــــــة)..Oo</font>

[المزيوونه]

<font color='#EE9A4D'><span style='color:crimson'>شكلها ما عيبتكم</span><img src="http://oasis.bindubai.com/emoticons/rock.gif" border="0" valign="absmiddle" alt='???'>

توبه احط قصص</font>

[القلب المحتاس]

<font color='#000000'>لا بالعكس يالمزيونه القصة واييد روعه ونتريا منج المزيييد انشالله <img src="http://oasis.bindubai.com/emoticons/tounge.gif" border="0" valign="absmiddle" alt=':p'></font>

[المزيوونه]

<font color='#EE9A4D'>زييين بعد <img src="http://oasis.bindubai.com/emoticons/tounge.gif" border="0" valign="absmiddle" alt=':p'></font>

[كبيرة بعيوني]

<font color='#EE9A4D'>هلااااااا المزيوووووونه..
لا افا عليج القصة روووووووووعه..بس اسمحيلي.. من كثر القصص هالايام
مب قادرة الحــــــــــق..ونشوف منج كل يديد ان شالله <img src="http://oasis.bindubai.com/emoticons/smile.gif" border="0" valign="absmiddle" alt=':)'></font>

[المزيوونه]

<font color='#32CD32'>فديتج والله... باذنه انشالله <img src="http://oasis.bindubai.com/emoticons/blush.gif" border="0" valign="absmiddle" alt=':b:'></font>