<font color='#EE9A4D'>تعشوا وبعد هذا رجعوا لبيوتهم .. وفي غرفة فيصل .. استرجع شريط ذكرياته .. لما حط الرقم لمهرة .. ويقول في خاطره .. أوصل لج وين ما كنتي ..



في الضحا .. ومع نسيج لامع من اللون الذهبي الذي تتسلل إلى كل غرفة في كل منزل ... فيصل يغط في نوم عميق ..

ومهرة وغاية يستعدين للخروج إلى التاون بجميرا ..



مهرة : يالله غاية بسج من المكياج .. من صباح الله خير .. الحين الساعه 11:00 اتأخرنا

غاية : اللي يسمعج مول ما يخصّج .. إنتي وعيتي قبلي .. اصبري

مهره : حشا كلتني بلسانها .. إنزين أنا بترياج في السيارة ..

غاية : أوكيه

مهرة : صباح الخير اماية

أم مهرة : صباح النور هلا أميه .. وين ماشاالله..

مهرة : بنظهر أنا وغايوه ويزيوه بنتريق في التاون .. ويمكن نمر ميركاتو .. البارحه تقولي يزوي إن بعض المحلات مسويه تنزيلات..

أم مهرة : ويا منو بتسيرون ؟

مهرة : أميه أنا مكلمه حمود وقالي بيخليلي سيارته بودمعه

أم مهره : اتحملوا على اعماركم وعن السرعه .. ما أوصيج

مهرة : من عيوني يا أحلى عيون ..



وبعد تقبيلة حارة بين عيني الأم تذهب مهرة إلى السيارة .. بانتظار غاية .. وتستمع لدبي اف ام ..

وتسرح لبرهة .. تفكر في ذالك الشخص الذي أخذ من وقتها الكثير "تفكيراً"..وشوي تفتح غاية الباب

غاية : اتأخرت ؟

مهرة : لا عادي .... ضارية .... يعني هب شي يدي عليج ..

غاية : هههههههههه انزين اتصلت يزوي وتقول انها ما تروم تي ويانا ؟

مهرة : غريبه .. ؟ أول مره ..

غاية : لا صخّي متوفي عندهم واحد من انسبتهم..

مهره : ايوااا .. حليلها .. الله يرحمه ومنو اللي متوفي عندهم ..

غاية : اعتقد ابو ريل اختها ..

مهرة : عيل لازم نمر عليهم نعزيهم

غاية هيه ان شالله باجر بنمر..

وتنطلق مهرة بالسيارة متوجهه إلى التاون سنتر ، بعد أن وصلوا هناك .. أخذوا مقعد على الزاوية ..



غاية : روعة .. محد ويانا

مهرة : الواحد يحس براحته جيه

غاية: هيه والله صدقج .. آخر مره يينا فيها ماعرفنا ناكل من كثر الشباب ..

مهرة : شو تطلبين ؟

غاية : اممممم تيراميسو وواحد عصير فراولة و كرواسون ..

مهره : وأنا بطلب لي واحد موكا اسبيشال مع بلاك فوريست كيك..



تمسك مهرة بالجريده وتبدأ في تقليب صفحاتها ..



غاية : مهرة ..

مهرة : هلا

غاية : انتي حافظه رقم فيصل ليما ألحين ؟

مهرة : ليش ؟

غاية : حافظتنه ...

مهرة : غايوه رقمه وايد سهل .. لو تعدّينه على ياهل حفظه ..

غاية : ليش ما تتصلين فيه وتسئلينه ليش سوا هالحركه ؟

مهرة : اتخبلتي ؟ اشلي فيه ؟

غاية : والله صدقيني انتي تفكرين فيه .. والدليل إن في السيارة كلمتج كم مره وما انتبهتي لي ..

مهرة .......................................

غاية : ها كله وتقولين ما تفكرين فيه ؟

مهرة : انزين شو أقوله ..؟

غاية : قوليله بس أريد أعرف انته متعمد هالحركه ؟ ولا قاصدنها ..؟

مهرة : ........................................

غاية : ها شو قلتي ؟

مهرة : لا لا لا .. ما يخصني ما بتّصل ..

غاية : كيفج



تغرق مهرة في تفكير عميق .. (ليش ما اتصل .. هو فعلا انسان جذاب ووسيم واحس من اخلاقه انه محترم بس صدق ليش سوا هالشي )</font>