<font color='#EE9A4D'>غاية : انسان تافه شو تتريين من وراه ؟ أكيد ما تمت غرفه في المستشفى إلا ودخلها وسوى نفس الحركه

مهرة : حرام عليج تسيئين الظن فيه "إن بعض الظن إثم"

غاية : نعم يختي .. أيوه أيوه أولي أولي إنك حبيتيه حبّتين ....

مهرة : شو حبيته إنتي مينونه ولا ما عندج سالفه..

غاية : أقولج هو حلو ..؟

مهرة تنهض وتتناول الصورة التي كانت ترسمها وتعرضها على غاية.. عيون غاية شوي وتظهر من مكانها ..

غاية :.. غربلاته محلاته ..هذا هو ؟

مهرة : إنتي شلج في الريّال تغربلينه ؟؟؟

غاية : ههههههههه بس ولد الذين .. حلو .. ماقالج اسمه

مهرة : بلا .. اسمه فيصل ..

غاية : حافظ عليه .. مهرة صارحيني ..نحنا شرات الخوات قبل لا أكون بنات خالة .. إنت معجبة فيه؟

مهرة : أكذب عليج لو قلت لج إنه ما جذبني .. أو انه ما يجذب ..

غاية : بس ألحين خلاص انتي اصلا ما بتقدرين توصلين له ..

مهرة : غايوه عطاني رقمه..

غاية : عيل جيه السالفه .. أثاريج طايحه وياه سوالف وأنا مادري ..

مهرة : لا خس بليسج .. والله ان من دخل وانا اقوله إظهر برع .. لكنه قال ببرر موقفي وتم يلخبط..

غاية : لا تصدقينه .. ترا ها كله خربطان ..

مهرة: مادري ياغاية .. ماعرف ليش وايد أفكر في السالفه ..

غاية : من زادج راسمتنه.. أقولج كم رقمه خليني اهزبه ..

مهرة : لا والله شو تبين في الولد .. خليه بحاله ، ما يخصنا فيه

غاية : يروم عيل يرقّمج هاا .. هاتي رقمه لا أدقدق على الخلق ههههههههه

مهرة : أنا مادري كيف أخوي حبّج هههههههههه

غاية : ههههههههه ويا راسج ، وليش ما أنحب ؟

مهرة : فديت روحج تنحبّين ولا جان ما حبّج أخوي .. يالله إنخمدي باجر بنظهر من البيت..

غاية: وين تبين تسيرين بعد ؟

مهرة : يمكن نروح تاون سنتر في خاطرية موكا وبنمر على يزيوه ..

غاية : ول .. بتصككنا لين جميرا ..

مهرة : ليش شو وراج ريل بتطبخيله غدا ..ههه

غاية :ههههههههههه ويا راسج .. بس ما بنسير الصبح على الأقل الضحى

مهرة : يصير خير .. متى ما قمنا ، تصبحين على خير

غاية : إنتي ارقدي أنا بكمل القصه :: وتصبحين على خير .. حشا صرف على الفاضي من متى والنت شغّال ولا حد يستخدمه

مهرة : ههههههههه تذكريني بأميه عليا – الله يرحمها - يوم تتحرطمين..

غاية : هي والله – الله يرحمها – كانت تموت فينا انا وانتي .. وتقول دوم هذيلا بيظهرن مثل التوم .. ياليت مهاري عندي أخو .. وأيوزج إياه..

مهرة : لالالا إنتي عرسي انا مابا ..

غاية : خلج ويا فيصل ههههههههههههه

مهرة : يوزي عنّي .. تصبحين على خير

غاية : وانتي من اهله ..نوم العوافي ..

مهرة : اتصلي في السكنية يزيوه .. بتاكلنا لو ظهرنا من غير ما نخبرها

غاية : لالا أدريبها بتصل وبخبرها ..</font>