أحــلى صــدفة(( بقلم سفير الأحلام))

**شماسي** · 01-12-04 ||, 02:20 AM

اتصل هزاع على ريم

هزاع: السلام عليكم ورحمة الله

ريم:..

هزاع: على راحتج اذا ما تريدين تتكلمين انا بقول الي عندي وبسكر..

قالها كل شي ...وهو يتكلم سمع صوت صياحها الي كانت تحاول تخبيه..

بعد ما انهى كلامه قالها: الحين انتي على راحتج بعد الي سمعتيه توقفين مع حمد او تتخلين عنه في وقت حاجته لج والله مابتلاقين حد مثله يحبج هالحبه كله انتي تسوين نظر عينه لو اوصف حبه لج ما بقدر اوصف لو نصه انتي غيرتي اشياء واايد في حياته بحبج له ارجووج لاتتخلين عنه..

بعدها سكر عنها قعدت تصيح من الخاطر الحين عرفة السبب الي خلى حمد يقولها الكلام هذاك كله ادركة انه من كثر ما يحبها ما يريدها تتعذب لو صار له شي لاسمح الله وحاول بكل الطرق يبتعد عنها ...لكن وين تقدر تنساه وهو خطف كل شي فيها قلبها عقلها ما تقدر لحظه تنساه معاها في كل مكان ..تسمع صوته وتذكر ضحكته..اتخذت قرار انها ما تتخلى عنه وانها تسوي المستحيل عشان يشفى من المرض ..

مرت الايام وعبود تحسنت حالة عبود وطلع من المستشفى ..راجت ريم صوب عبود وكلمته وطلبت منه انه ما يزعل منها وانها ما كانت تقصد انها تزعله ..سامحها وقالها انه قدر ومكتوب الي حصل له..

مها كلمت اخوها سيف وخبرته بقرار ريم انها مب موافقه على الخطوبه لانها تعتبره مثل اخوها اول شي عصب سيف وتكدر خاطره لكن مها ما خلته يطلع من عندها الا بعد ما طيبت خاطره ..وقالت له انه ما يبين زعله لعبود عشان ما يتعب لان الي صار له بسبب انه يفكر فيه كيف بيوصل له الخبر وخاف على مشاعره..داس على قلبه سيف وكتم مشاعره وحاول يتصرف عادي عشان ما يبين لاي حد الي بقلبه..

سيف دخل على عبود لقاها قاعد مجابل الدريشه ودموعه على خده بعد ما طلعت من عنده ريم..

سيف: السلام عليكم

عبود مسح دموعه حتى ما ينتبه له سيف لكن سيف كان يعرف عبود اكثر من روحه: عليكم السلام..هلا وينك

سيف : كنت عند مها قالت لي كل شي

عبود: شو قالت لك

سيف: قالت لي ان ريم رافضه الخطوبه

..قاطعه عبود: هذي ياهل ما تعرف بتوافق يوم بنرجع البلاد

سيف: عبود انا احترم قرار ريم والزواج قسمه ونصيب...يمكن صح الي تقوله ريم انها تعتبرني مثل اخوها ....انا احبها مثل اختيه يمكن يوم طلبت اخطبها كانت لحظه حسيت انه ممكن أي حد يخطبها ويبعدها عنا ومانقدر نشوفها..

عبود: انت متاكد سيف ان حبك لريم حب اخوي

سيف بعد فترة سكوت: هييه..اقول شو رايك نطلع الكوفي

عبود حس ان سيف يريد يغير الموضوع وينهيه للابد: اوكي

طلعو الكوفي وحاول سيف يكون عادي وينسى الموضوع جدام عبود عشان ما يكدر خاطره وهو توه طالع من المستشفى يحتاج لراحة البال..

مرت الايام ورجعت علاقة ريم بحمد تتجدد لان ريم ما تخلت عن حمد في البدايه كان ما يرد عليها ويحاول يجبرها تنساه بتصرفاته لكنها متسكه فيه ومستحيل تتخلى عنه وهنيه ادرك حمد اكثر ان ريم تحبه حب ما بيلاقيه عند أي شخص ثاني وهذا الشي عطاه حافز يرجع يكمل علاجه بعزم انه يشفى من المرض ويتزوج منها بعد رفضها سيف ما بيكون هناك عائق ثاني جدامه..

انتهت الاجازه ورجعت ريم الامارات هي واهلها ...وابو ريم خبر اخوه بقرار ريم طبعا في البدايه تأثر لكن اقنعه سيف الي كان دايم ماسك نفسه جدام الكل ان الزواج قسمه ونصيب ورفض ريم مابيغير شي من علاقتهم كأهل ..

ريم كانت تحاول تتحاشى سيف لانها حست انها جرحته برفضها كانت تعرف سيف واايد وتقدر تعرف الي بخاطره من كلامه تعرف متى يكون زعلان او متضايق من شي ..مره كان سيف داخل غرفة عبود ومها عنده اما عبود كان طالع عنهم مرت ريم سمعت كلام سيف
لمها: والله يا مها اني احبها وكل ما اشوفها تعذب ما اقدر افكر اني اتزوج انسانه غيرها

مها: يا سيف لازم تفكر بعقل ريم مستحيل ترضى تتزوجك انت عارف شكثر هي تحبك مثل اخوها

سيف تنهد: بس انا ما بتزوج لحد ماتزوج واشوف عيالها

مها: حرام عليك ارحم حالك انت مب شايف نفسك في المرايه

سيف: انا طالع

مها: سيف فديتك دير بالك على نفسك والله انك غالي

قام سيف وحبها فوق راسها وطلع عنها ..ريم ركضت غرفتها قبل ليشوفها..سيف وهو طالع مر على جدام غرفة ريم وقعد يطالعها وبعدها نزل وراح بيتهم..

مرت الايام وحمد في تحسن في حالته والمرض تقريبا بدا يتلاشى بفضل الله واصراره على الشفاء..ابو حمد عرف بمرض حمد وحزن واتكدر خاطره لكن هزاع فهمه ان كل شي انتهى وما في داعي انه يشل هم وانه بيرجع البلاد بعد اسبوعين ووصاه ما يخبر ام حمد ..

حمد قال لريم انه راجع البلاد بعد اسبوعين وانه قرر يقول لابوه يخطبها له..

بدا دوام ريم في التقنه وانشغلت بالدراسه لانها اخر سنه الها ..

وعبود نفس الشي انشغل بالدراسه..اما سيف الي كان كل لحظه يذكر انه ما بيتزوج ريم يزيد عذابه ويضيق خاطره ..حاول بكل قدرته يشغل نفسه بالشغل وما يعطي نفسه لحظه للراحه كل همه الشغل صار حتى ما يفكر بريم تغيرت حياته ما صار مثل قبل ما يسولف واايد ولا يضحك واايد ولا يسوي مغالب كل ما يشوف ريم ينحرق قلبه ..

الكل لاحظ التغير الي فيه سيف بس ما حد تجرأ يقول له شي الا عبود ..

عبود يكلم سيف: سيف والله حالك مب عاجبني

سيف: ليش شو فيني

عبود: انت مب شرات قبل

سيف: ما حد يبقى على حاله

عبود: انت واايد متغير

سيف: انا ما تغير فيني شي

عبود: كل هذا بسبب ريم

سيف لف ويهه عن عبود: شو رايك نطلع نتمشى على البحر في غنتوت

عبود يأس ان سيف يعترف له بأي شي : اوكي

سيف: شو رايك ريامي تطلع معانا

عبود استغرب من سيف: ليش

سيف يحاول يرجع الامور مثل قبل ما يخطب ريم : شو رايك نركبها الجتسكي نسوي فلم رعب..

عبود :هههههههههههههه اوكي

اتصل سيف بريم استغربت ريم الاتصال..

ريم: الوو

سيف: السلام عليكم

ريم: عليكم السلام مرحبا

سيف: شحالج

ريم: بخير وانت

سيف: تماام ..اقول

ريم: امر

سيف: انتي فاضيه الحين

ريم: هييه ليش في شي

سيف: هييه بنروح نتمشى انا وعبود على البحرفي غنتوت قلنا لازم تروح معانا ريامي الحلوه

ريم تريد سيف يسولف معاها مثل قبل وتريده يعرف انها تعتبره مثل اخوها..

ريم: الله يستر اكيد ناوين على شي

سيف: ههههههههههههه لا

ريم : متأكد

سيف: هييه ههههههههه اقول اجهزي الحين بنمر عليج

ريم : منوو قال اني بروح

سيف : انا قلت هههههه

ريم: لااا ما بروح قبل ما تكتبون تعهد تردوني سالمه لاهلي

سيف: اوكي ههههههههههه مع السلامه

ريم : مع السلامه

سيف خبر عبود بكل الي صار تم يضحك عبود

عبود: والله لخليها تين هههههههههه

سيف: هههههههههه لا مب لهدرجه يحليلها

طلعو سيف وعبود مرو على ريم وراحوو صوب البحر قعدوو يسولفون ويضحكون وكل واحد يعلق على الثاني سيف مره كان يوقف بصف عبود ربيعه ورفق عمره ومره في صف ريم بنت عمه وحبيبت قلبه..

عبود يعصب على سيف يوم يدافع عن ريم ويسوي عمره زعلان..

ركبو الجتسكي وتمت ريم تصارخ شوي وبتصيح من الي سواه فيها عبود

ريم: والله انا قلت ان وراكم شي

سيف: ههههههههههههه قلت لج اركبي معايه لكن انتي عنيده خلي عبود الحين ينفعج

ريم وهي تصرخ: عبود نزلني بركب مع سووواف

سيف وهو بيموت من الضحك على شكلها: لااا الحين ما ينفع

ريم: اذا ما بتنزلني بنط في البحر

حس سيف ان ريم تتكلم جد بتنط في البحر وهو يعرف انها ما تعرف تسبح

سيف: عبود نزلها خلها تركب معايه وغمز لعبود على انه بيكمل المهمه

عبود: ههههههههههههههههه اوكي

ركبة ريم مع سيف في البدايه كان يسوق بسرعه بطيئه لكن بعدين اسرع مسكت فيه بقووه ترجته يوفق ما هنت عليه وقف نزلوو من الجتسكي وهم يضحكون

ريم وهي معصبه: هذي اخر مره ارحو معاكم مكان

سيف : خلاص لاتزعلين بس حبينا شوي نلعب معاج

ريم وهي تركب السياره: يالله الحين رجعوني البيت

عبود: ههههههههههه ريامي نمزح معاج ردي نقعد شوي نسولف

ريم: ما اريد بترجعوني ولا اركب تاكسي

سيف: افاا عليج والله ما تركبين التاكسي

ريم: يالله عيل رجعني البيت

سيف: لا ما نبروح البيت لازم نراضيج

ريم: اريد البيت

سيف: فديتج عن الزعل شو رايج انتعشى برا

ريم: ما اريد

عبود: اوكي انا موافق

سيف: ما حد طلب رايك انا اكلم ريامي

عبود يسوي نفسه زعلان

سيف: ازعل عادي بس اهم شي ريامي ما تزعل

ريم قعدت تضحك على شكل عبود او ما خلص سيف كلامه:هههههههههههههه

عبود: منوو قعدج اضحكي

سيف: شو رايج الرضوه عشوه برا على حساب عبود

ريم: اوكي هههههههههه

عبود : لا اسف على حسابك

سيف: هههههههههه لا على حسابك

بعد العشى قعدو يسولفون شوي وبعدها رجعو البيت ..

ريم كانت واايد فرحانه لانها حست ان سيف رجع مثل قبل يسولف ويضحك..

سيف حس براحه ما عرف شو سببها وشعور غريب ..

مرت الايام ورجع حمد الامارات شفى تقريبا من المرض بس كان عنده موعد للمراجعه بعد 3 اشهور..عطوه مجموعه من الادويه يكملها في البلاد ويستمر على كورس من العلاج في مستشفى اتوام

ام حمد : انور واسفر البيت بك ياولدي

حمد لوى على امه وحبها فوق راسها: والله تولهت عليج

عويش: وووووول يالغلى

حمد :ههههههههه بعدج تغارين ماعقلتي

ام حمد : كل الناس بتعقل الا عويش

دخل عليهم ابو حمد: مرحبا الساع بالغالي

قام وسلم على ابوه وحبه فوق راسه..قعدو يسولفون

بعد فتره لاحظت ام حمد وعويش ان حمد احيانا تعبان وما ياكل واايد والادويه الي في غرفته الي يحاول يدسها عنهم شوو هذي؟؟؟...
مره كانو قاعدين يسولفون..

ابو حمد : يا ولدي لازم تخبر امك عن الي صار لك

حمد : بعدين ابوي

ام حمد : باسم الله عليك شو صار لك ياحمد

حمد: بعدين بقولج

ام حمد: فديتك والله الحين اريد اعرف

حمد: فديتج لاتخافين ما شي انا بروح ارتاح الحين بعدين بخبرج

قام حمد وراح غرفته يرتاح..ام حمد اصرت على ابو حمد يقولها السالفه خبرها بمرض حمد وانه بدا يتعافى الله ستر ان كان في بدايته وصاها ادير بالها عليه وما تزعله قعدت تصيح واكنت عويش موجوده سمعت كل شي قامت غرفتها وقعدت تصيح لحد الصبح وتفكر باخوها..

حمد يفكر في ريم كل لحظه وماتفارقه دقيقه وكل يوم يزيد حبه وتعلقه فيها ومانقطع عنها دايم يرسلها رسايل ويسولف معاها ما تمر ساعه بدون رساله من عنده او من عندها ..

مر الكورس الاول ونجحت ريم بتفوق وبدت عطلة الربيع سافر حمد يكمل العلاج وريم ما طلعو مكان في بيتهم ..

سيف تغير حاله وادرك ان حبه لريم هو حب اخوي بعد صراع دام شهور وهو يحاول يفسر الشعور الي يحس به ورجعت علاقته بريم كأخت تقوى حست ريم براحه كبيره لانها قدرت تغير سيف وترجعه مثل قبل وافضل ..

حمد خبره الدكتور ان المرض راح نهائيا عنه بس حذره من الزعل..
الدكتور: والله ياحمد انا مستغرب كيف المرض راح عنك بسرعه

حمد: الحمدلله

الدكتور: انت اغرب حاله عندي

حمد: كل هذا بفضل الله

قعد يسولف مع الدكتور وعطاها مواعيد في الصيف للمراجعه بس ..اول ما طلع من عند الدكتور ارسل رساله لريم وبشرها ..

رجع حمد البلاد وهو طاير من الفرحه لانه الحين يقدر يحقق حلمه ويخطب ريم بعد تأكده انه شفى نهائيا ..

بدا الكورس الثاني لريم في التقنيه وكان كورس التخرج..

عبود كان دايم يتشكى من الدوام وانه خلاص يريد يترك التقنيه ويشتغل في شركة ابوه لكن الكل رافض طلبه..

حمد يسولف مع امه..

ام حمد: متى بشوف عيالك ياولدي

حمد فرح ان امه فتحت السالفه: ان شاء الله بتشوفينهم

ام حمد: اريد اشوفهم قبل ما اموت

حمد: باسم الله عليج بتشوفينهم وبتربينهم بعد

ام حمد: انت اشر وانا بروح اخطب لك

حمد: امي انا في باله وحده ومن زمان في خاطري

ام حمد استانسة : والله خبرني منوو بنته بروح باجر اخطبها

حمد ابتسم: بنت سيف بن محمد

ام حمد: ريم اسمها

حمد: هييه

خبرت ام حمد ابو حمد ان حمد قرر يزوج ويردهم يخطبون له بنت سيف بن محمد
وافق ابو حمد وفرح ان ولده بيناسب نااس فيهم خير..قالها تتصل بام ريم وتحدد معاهم الوقت الي بيزورونهم فيه وقاله بعد انه هو بيسير معاها..

حمد ما خبر ريم انهم في نهايه الاسبوع بيروحون يخطبونها بس قالها في مفاجأه الها في نهايه الاسبوع..
حمد كان ينتظر اليوم الي بيروحون فيه صوب احر من الجمر لا يعرف يرقد ولا ياكل من يوم حدوو اليوم الي بيروحون فيه..

اتصل سيف بريم: السلام عليكم

ريم: وعليكم السلام

سيف: شحالهم الحلوين

ريم: تماام وانت

سيف: تماام

ريم: الله يستر هالمره شو ناوي عليه بعد هههههههههههه

سيف: لا ما شي بس كنت اريد اخذ رايج بشي

ريم: شوو خير

سيف: ترا ما حد يدري بالسالفه بس حبيت تدرين انتي اول ودحه واريد رايج فيها

ريم: قول

سيف: انا قررت اخطب

ريم ما صدقة الي سمعته فرحة من قلبها: والله مبروووووووووووووووووك

سيف: ريحتيني والله كنت على بالي بتعصبين مني

ريم: ههههههههههههه منو تعيست الحظ

سيف: ودج قولي من الي ابوها راضي عنها

ريم: يالله عاد قولي بسرعه بمووت اريد اعرف

سيف: ههههههههههه ما بقولج

ريم: فديتك سوواف

بعد ما لعوزها واثار فضولها قالها: اريد اخطب نوره بنت خالتي

ريم: وووووووووواااااااااوووووو ووو والله تستاهل ...خطر ثرك عرفة تختار

سيف: يعني اتوكل واكلم الوالد

ريم: ما يحتاي تفكير اذا تريد مساعده جاهزه

سيف: هههههههههههه حرب هي

ريم: هههههههههههه

سيف: تصدقين شعوري هالمره غير مب مثل يوم كنت اريد اخطبج

ريم:..........

سيف: اسف ما كان قصدي

ريم: لا عادي الله يهنيك ويوفقك

سيف: آآمين..اقول

ريم: امر

سيف: لاتخافين اول شي بدور لج معرس مسكين الله يعينه بعدين بتزوج هههههههههههههههههه

ريم: هين الي بياخذني يا حظه يحب يديه مجلبه

سيف: قولي مسكين مب يا حظه ههههههههه

ريم: ان ما قلت لنوره رفضي سوواف

سيف: لاااا فديتج ريامي انتي حبيبتي لاتقولين لها شي امدحيني جدامها خليها توافق

ريم: ههههههههههههه

قعدت تسولف معاه ...بعد ما سكر عنها راح صوب امه وخبرها انه يريد يخطب نوره بنت خالته افرحت امه واايد ...قالت له بتكلم اختها وبتخبرها ..

مرت الايام وافقو على خطبة سيف بسرعه لانهم ما بيلاقون واحد شراته ريال وماينعاب.. اليوم بيروح حمد يخطب ريم مب مصدق نفسه من العصر وهو شال البيت فوق تحت ..

حمد: يالله امي بنتأخر

ام حمد: باسم الله عليك شو نتأخر تونا مصلين العصر

حمد: انزين روحي تلبسي

ام حمد: بعد صلاة المغرب بنروح

قعد حمد يتحرطم وعويش تضحك عليه وتعلق على شكله ..

راحو ابو حمد وام حمد وحمد بعد صلاة المغرب صوب بيت سيف بن محمد..
 
دخلو لقو سيف بن محمد وعياله وكان سيف بعد موجود سلموو قعدوو يسولفون

حمد ما خبر ريم انهم الحين في بيتهم قاعد يخطبها..

ابو حمد فاتح ابو ريم بالخطب ورحب ابهم ابو ريم وقالهم لازم نشار والبنيه وانهم بيردون عليهم بعد ما يشاورونها قعدوو يسولفون بعدها استأذنوو..

سيف اول ما سمع انهم يريدون يخطبون ريم ارسل الها مسج(( ريامي خلاص لاتزعلين لقيت لج تعيس الحظ الي وافق يتزوج هههههههههههه))

نفس الشي ارسل الها عبود وقعدوو يضاحكون لانهم قعدو يتخيلون شكل ريم اول ما تقرا الرساله بتعصب ..

بعد ما رجع ابو ريم من الميلس كانو معاه عبود وسيف طبعا ما يريدون شي يفوتهم ..اول ما طالعتهم ريم قربت عليهم تحلفت الهم ..وهم يضحكون عليها..

ابو ريم : ريامي

ريم: لبيه

ابو ريم : تعالي غرفتي اريدج

ريم: ان شاء الله

طلع ابو ريم غرفته..اما عبود وسيف كانو يضحكون ويعلقون على ريم

سيف: روحي صوب عمي بسرعه رجعي نريد نعرف شوو قرارج

ريم مستغربه اكيد في شي يعرفونه عبودد وسيف ولا شو الي بيخليهم قاعدين في البيت الحين مب من عوايدهم: شوو وراكم انتم

عبود: ماشي هههههههههه روحي ورجعي بسرعه

طلعت ريم وراحت عند ابوها في غرفته..

قالها ابوها ان حمد خطبها وانه ريال ما يتنعاب وقالها ما تقوله رايها الحين تفكر في الموضوع وما طول مثل هذيك المره ..

طلعت ريم من غرفة ابوها وهي مب مصدقه نفسها من الفرحه اخيرا بيتحقق حلمها وبتزوج حمد لااا مستحيل اكيد انا في حلم ..طلعت ودخلت غرفتها لقت رساله من عند حمد((( حبيبتي شوو رايج في المفاجأه))

ريم(( احلى مفاجأه))

حمد(( شو قلتي لابوج))

ريم(( ما بقولك))

حمد(( ليكون مب موافقه...بموت لو ما وافقتي))

ريم(( اموت انا قبلك))

حمد(( يعني موافقه))

ريم(( تصبح على خير حبيبي ..ههههههههههه))

سيف وعبود ينتظرون في الصاله حسووا ان ريم طولة وهي اصلا قاصده طلت على طول غرفتها وخلتهم تحت في الصاله ينتظرونها..

سيف: والله لتشوف لوهي الحين في غرفتها

عبود: قوم خلنا نروح نشوفها

راحو الطابق الثاني لقوها في الغرفه قعدوو يفكرون شو يسون فيها لانها خلتهم ينتظرون تحت في الصاله ..
 
عبود: شو رايك نبند عليها الكهربه ونخليها تحوس ادور من يشغلها والناس كلها راقده

سيف: اوكي

راحو قطعو الكهربه على غرفتها وطلعو من البيت ..صرخه اول ما بندت الكهربه وحست بخوف راحت ادور عبود وسيف في الصاله لكن ما قلت حد اتصلت فيهم لكنهم طنشوها..

مرت الايام ووافقة ريم على الزواج من حمد بعد ما اتصل فيها سيف وخبرها عن حمد انه ريال والكل يمدح فيه وانها لازم ما ترفضه ..من البدايه هي كانت بتقول انها موافقه بس حبت ان ما يلاحظ حد انها تحب حمد ما كانو يعرفون انها تتنتظر اليوم الي بيجمعهم ببعض..

حددوو يكون زواجهم بعد ما تخلص ريم الكورس بيكون في نهاية شهر 6 بس حمد اصر انه يملج عليها في بداية شهر 6 حتى يرتب كل شي للسفر..

اما سيف كان مشغول بخطوبته ويريد يزوج شان الحرب يريد يزوج مع ريم لكن ابوه رفض قاله انه بيزوجه شهر 9 قعد يتحرطم ..لكن كان فرحان ان ريم بتزوج لانه كان شال هم منوو بيتزوج ريم اذا هو تزوج نوره هو يعرف ان الكل يتمنى يتزوجها لكن ما حد يتأجر وخطبها لان سيف ولد عمها والكل على باله انهم مخطوبين لبعض..

حمد يجهز للعرس ومحضر مفاجأه لريم في ليله زوجهم..

في يوم العرس ريم مب مصدق نفسها تحس نفسها عايشه في حلم ما تريد تقوم منه ..اخيرا بتزوج بحمد..وصلت الي بتسوي لها المكياج وكانت حاجره عند افخم الصالونات وفستانها عند اشهر المصصممين ..
طلعت احلى من القمر الكل كان منبهر من جمالها..

اما حمد كان مرتبش ما يعرف شو يسوي طبعا عبود وسيف ما خلوه في حاله..

طلعت ريم في الخيمه وكانت تمشي على نغمات موسيقى كلاسيكيه وكل اليتات مبنده و الدخان واليزر..

كل الموجودين انبهرو بطلتها الي كانت رووعه..الكل مستانس رقيص وغنى ...حمد كان بيموت يريد يدخل ما خلوه يدخل الابعد الساعه 12 اول ما دخل ما قدر يتحرك من مكانه مب مصدق ..مطه عبود مشى على الكوشه وقف جدام ريم وشل الطرحه عن ويها وحبها فوق راسها..همس في ذنها (( احبج انا في حلم ولا علم))

بعدها قعدو يتصورون ..وعلى طول سافرو باريس يقضون شهر العسل كانت هذي المفاجأه الي محضرها لريم ..لكن المفاجأه الحقيقيه انهم لقو عبود وسيف معاهم في نفس الطياره..

سيف ازوج وعاش سعيد مع نوره والله رزقه بنت سماها ريم..

و عاشو ريم وحمد احلى ايام حياتهم سعداء مع بعض الله رزقهم بولد سمته سيف وبنت سمتها شيخه.. 

النهـــــــــــــــــــ� �ـــــــــااية .. <IMG src="http://oasis.bindubai.com/emoticons/fa56.gif" border=0>

(( انششاء الله عجبتكم القصـــــــــــــــــــــ ـــة )) .. <IMG src="http://oasis.bindubai.com/emoticons/fa47.gif" border=0>

السموحه منكم .. <IMG src="http://oasis.bindubai.com/emoticons/fa46.gif" border=0>

شماسي .. <IMG src="http://oasis.bindubai.com/emoticons/fa35.gif" border=0>

**بن دبي** · 01-12-04 ||, 07:21 AM

لووووووووووووووول احلى قصه مشكوره حبيبتي على القصه<IMG src="http://oasis.bindubai.com/emoticons/smile.gif" border=0>

**العنونه** · 02-12-04 ||, 06:43 PM

مشكورة اختي

**شماسي** · 03-12-04 ||, 07:19 AM

راعية الزين مروورج الاحــــلى عيووني , العفووو .. <IMG src="http://oasis.bindubai.com/emoticons/wink.gif" border=0>

العنونه االعفوو حبــــــوبه .. <IMG src="http://oasis.bindubai.com/emoticons/blush.gif" border=0>