سلطان ومريم

**القلب المحتاس** · 01-06-03 ||, 11:40 PM

ثانكس على القصه ,,,

بس بليييييييز ما وحشتك لا تبطي واااايد اوكيك,,..:dd:

<img src="http://oasis.bindubai.com/emoticons/blush.gif" border="0" valign="absmiddle" alt=':b:'>

**ماوحشتك** · 02-06-03 ||, 02:43 AM

هاااي ... شحالكم ..

 في الليل في غرفة الضيوف كانن حصه وروضه ومريم قاعدات يسولفن
مريم: قولن وانا افتش في الحجرة شو لقيت
حصه: شو لقيتي
مريم: صبري براويج
وتطلع من تحت الشبريه الدفاتر
مريم: هاه شو رايج
روضه: يخرب من متى حشا تراث
حصه: مب قنالج تيودينهن لنا
مريم: هيه وأنا خليتهن تحت الشبريه
حصه: هذي دفاتري من عشر سنوات قبل لا اتزوج أحمد
مريم: حتى دفتري من عشر سنين
روضه: أنا دفتري من ثمان سنين أول ما انخطبت حق حمد
حصه: هاتي مريامي أشوف دفترج
مريم: روحي ولي ما اريد فيه أسرار
روضه: اي أسرار لو تعطين خليفه يقراه بيفهم اللي فيه
مريم: لا والله
حصه: هيه كل اللي فيه حق سلطان تقصدين فيه سلطان منوه ما يدري حتى أحمد ريلي يعرف
مريم: قولي والله شدراه ... انتي حالفه ما تقولين حق حد
حصه: منوه قالج إني قلت حق حد
مريم: شدراهم عيل
روضه: ماما يوم ما طعتي تتزوجين سيف ولد عمي محمد قبل سنتين كلهم عرفوا انج ما تبينه لأنج تبين سلطان
مريم: ما سمعت هالكلام
حصه: منوه بيي يقولج هالشي ... انتي ما تيين بوظبي عشان تعرفين
روضه: بيوت عمومتي في بوظبي كلهم يعرفون
حصه: وبعدين وياج انتي ... يعني صح سلطان أخوي بس والله حرام عليج اللي تسوينه في نفسج .. ما يستاهل كل هذا
روضه: مريامي عمرج الحين 27 بعد كم شهر بتدخلين الثمانية وعشرين متى بتلحقين تعرسين وتيبين لج ولد أو بنت
ومريم ساكته ما ترد
حصه: شوفي كلنا أصغر منج وعرسنا وعندنا عيال ، ما تم حد في العايله كبرج ما معرسه
مريم: ومحد في العايله لا كبري ولا أصغر مني عندها ماجستير بعد
روضه: شو يعني عندج ماجستير البنت أهم شي لها الستر ولا الشهاده تحصيل حاصل
حصه: لو انتي ما تشتغلين وتقعدين في البيت هلج بيصرفون عليج كثر راتبج في الشهر مرتين لو تحبين
مريم: اقول يوم بتلقن لي ريل تكلمن جيه .. الحين ما فيه حد
روضه : ويوم بيي الحد ندريبج ما بتوافقين
مريم: على شوه أوافق ... أتزوج واحد ما يعرفني ولا أعرفه شوه خذوه وغلوه السالفه .. اوكي يلعن أبو الحب بس تعتقدين إني بنجح يوم أتزوج واحد بس يريد يتزوجني لنه شافني وغني حلوه ولا أتزوج عشان أكون ديكور في البيت حالي حال كنبة أو كرسي يتزوجني اللي أخذه عشان أييب له عيال بس وله حياة خاصه ثانية أهم مني
روضه: شو هالكلام
مريم: الكلام الصدق
حصه: يعني حتى سلطان لو بغاج ما بتزوجينه
مريم: لكن سلطان لا قال يبغيني ولا حتى يفتكر في السالفه ..
روضه: حمار
مريم: لا مب حمار ، يوم يبغي يعرس بيقول حق خالوه تدورله حرمه ، وكالعاده بدور له وحده من أهلها مثل ما يوزت راشد وسعيد
روضه: زين بنقولها تخطبج انتي حق سلطان
مريم: بذبحج انتي حالفه ما تكلمين في هالموضوع
حصه: وبتخطب له وحده صغيره وحلوه وما داخله الجامعه
روضه: مريامي حلوة ماشاء الله عليها وكل ما تكبر تحلو أكثر
مريم: الله يجبر بخاطرج بنت خالي
حصه: هو لو يعرس ونفتك كنا يمكن قدرنا نقنعج تعرسين
مريم: شدراج
روضه: ما بيكون عندج أمل
مريم: هاهاها يمكن أنتحر
حصه: هاهاها تسوينها صايره جوليت
روضه: بس روميو حمار ما يفهم

يوم الجمعة ... الساعة خمس العصر ... خليفه ومريامي قاعدين جدام باب الفيلا بعد ما راحوا هل بوظبي كلهم
مريم: آه يا خليفه .... راحوا وراحت روحي وياهم
خليفه: يا حليلج ... أقول صيحي صيحي عشان أصيح وياج ... ولا أقول صبري بروح أييب كلينكس
مريم: تدري إنك بايخ ... ما أدري شو مقعدني وياك
خليفه: أنا أدري محد في البيت غيري تقعدين وياه ... بس الحين بفكج من ويهي وبذلف
مريم: على وين ان شاء الله ... ودني بيتنا أول ... صارلي يومين عندكم
خليفه: تحلمين أوديج ... شو نسيتي يوم كنتي تقعدين بالأسابيع
مريم: اقول كلمت سلطان ... قايل بيرجع أمس من سويحان ... واليوم الجمعه وما رجع
خليفه: في بوظبي بيت عمي محمد ... كلمته اليوم الصبح ... قال انه بيرجع اليوم بس ما يندرابه
مريم: أها ... زين بتوصلني البيت
خليفه: بوصلج ... بس بروح قبل مشوار ويوم برجع بوديج أوكي
مريم: على شوه هالعباله... بخلي الدريول يوديني
خليفه: استريحي ... لا دريول ولا غيره يوم برجع بوديج ... أريد أسلم على عموه
مريم : اوكي بترياك ... بقعد مع الشيبان شوي

يشوفون سيارة سلطان داخله من الباب الرئيسي للبيت وهم قاعدين جدام باب الفيلا
خليفه: لو طرينا مليون مب أحسن كنا تجاسمناه .... وخذتلي اكس فايف ... ولا رنج من اليداد
مريم: هاهاهاهاه.. ويا ويهك ... يا الطماع ...
وينزل سلطان من السيارة ويتجدم صوبهم
سلطان: السلام عليكم ... شو راحن البنات
خليفه: راحن ... ومعصبات عليك ... قرضنك قراض ... اليوم خذت انت كل حسناتهن ... هذا إذا عندهن حسنات
سلطان وهو يبتسم : أوف أكيد هاي حصه
خليفه : من غيرها .... بس روضه ونوره شاركنها ...
سلطان: وانتي مريامي ما قلتي شي
مريامي : وانا شلي خص ... انت وخواتك تتواسوون
خليفه: حليلها مريامي ... تقولهم يمكن انشغل ... لا تحكمون لين ما تعرفون
مريامي ونظراتها على خليفه باستهزاء : هاهاهاها تستخف دمك حضرتك
خليفه: هاهاهاها قولي والله ما قلت
مريامي: سخيف ... اقول ما قلت بتروح تعر الحين ... اقول روح احسلك عشان ترد بسرعه وتوصلني البيت
سلطان: ليش ما تقعدين
مريم: عندي شغل باجر
سلطان: الدريول موجود بيوصلج وين ما تبين
مريم: أغراضي وقشاري كله في البيت
سلطان: كلميهم يطرشون اللي تبينه
مريم: أريد أروح بيتنا ... ما أرتاح الا هناك
خليفه: سبحان مغير الأحوال
مريم وهي اطالع خليفه : بتروح ولا أروح ويا الدريول
خليفه: جنج تروغيني من بيتنا
مريم : يا الله وبعدين وياك
خليفه: اوكي اوكي

وهنيه سلطان يدخل البيت عنهم ... بعد ما حس إن مريامي ما تريد تكمل الحوار وياه ...وبينه وبين نفسه كان يفكر ... غريبه بعد مامر على زواج روضه ست سنوات ... بعد ليلة عرس روضه ولين اليوم مب قادرة تنسى أو تسامحه ... يا ترى كم كثر تحتقره ... وتكرهه .... طيب إذا هيه تكرهه هالكثر ليش ما تقول وتريح الجميع وترتاح... وليش هو ما يقولهم إنها ما تحبه وإنهم يتوهمون هالشي ... يمكن ما يريد حد يدري إنها ما تحبه عشان ما ياخذها حد ... بس هذا عقاب لها هي والمفروض يعاقب نفسه ما يعاقبها هيه لأنها ما غلطت عليه كثر هوه ما غلط عليها وهانها

في صالة البيت ... مريامي قاعده ويا حرمة خالها وخالها ... يسولفون عن البوش والعزب ينزل سلطان بعد ما غير ثيابه وتسبح
بو راشد: انت متى رجعت
سلطان: رجعت من ساعه الحين
ويورح يسلم على أبوه وأمه
أم راشد: وين بت أمس
سلطان: رحت بيت عمي محمد ويا عبدالله
أم راشد: وشحالهم هناك عمك وعمتك والعيال
سلطان: الحمدلله محتشرين عشان عرس عبدالله ... بعرس بعد ثلاث شهور
أم راشد: متى حددوا ... لين قبل يومين ما تكلموا في السالفه .. كلمت جليثم حرمت سلطان قالتلي ما قالولها
سلطان: أمس راحن الحريم واحددن كل شي .. واليوم المسا بيروح عمي محمد يكلم عمي سلطان
بو راشد: منو من بنات سلطان بياخذون
سلطان : نوره ...
أم راشد: تستاهل .. ماشاء الله عليها مرحبانيه وطويله وتقاطيعها حلوة
سلطان: أذكرها يوم كنا صغار ... يا حيه لقاله حرمه مزيونه
أم راشد: ياللا انت عزم وبنلقالك أحلى منها إن شاء الله
وهنيه يفز قلب مريامي ... وتحس انه لونها تغير ... من القهر أو يمكن من الضيج.... وتلتقي عيونها بعيون سلطان ... اللي عقد حياته يوم سمع كلام أمه
سلطان : لا تدورين ولا عندج خبر ... بعدني مب متفيج حق ويع الراس
بو راشد: العرس ويع راس ... ما تدريبه انت وبنت عمتك هذي ... ما ادريبكم شو في راسكم لا انت تريده ولا هي تريده
مريم: خالي فيني أنا على واحد يقعدلي لا تروحين لا تيين ... لا تكلمين وشو تسوين ... أنا في بيت أبوي ملكه على راحتي اللي ابغيه احصله... بلا ويع راس
سلطان وعيونه في عيون مريامي: صدق بلا ويع راس .. اقول مريامي ترى عبدالله موصني أخبرج العرس بعد ثلاث شهور ... إذا بتزهبين بتفصلين ولا بتسوين شغلات الحريم هذي
مريم: زين يوم قلتلي ... هذا بعد إذا كفى الوقت أفصل شي محترم يستاهل
سلطان: حشا ثلاث شهور ما يكفن ...
مريم: على حسب يمكن ويمكن
سلطان: انتن الحريم ما تعاين ... ما أدري حق شوه .. هي كندوره تلبسنها ليله وحده ... وبعد فوقها عباه لازم ثلاث شهور يفصلها الخياط
مريم: اسمه فستان ... والعباه تنعق في خيمة الحريم ...
سلطان: والحريم شو يبن بلبسكن ... الواحد هب بلبسه ... بحشمته وطبعه ... وخاصه فساتين هاليام ماشي حشمه بالمرة ... ما يحتاي تلبسن روحن بليا ثياب
مريم: ياخي يوم بتعرس قول حق حرمتك لا تفصل فساتين ولبسها ثوب وكندورة وطرشها الأعراس ... وبعدين يا أخ سلطان أبوي راضي وأفصل بفلوسي أو فلوس أبوي ...
ويطالعون بعض بنظرة تحدي ... والجو مكهرب بينهم ... وبو اشد وأم راشد يبتسمون

أم راشد: اللي بدق الباب اييه الجواب .. محد قالك تدخل في اللي مالك خص فيه
بو راشد: ول يا بنت مطر .. ثرج قويه محد يروملج
مريم وعيونها في عيون سلطان: الضعيف يتاكل حقه خالي
سلطان : أنا طالع تبون شي
بو راشد: لا تتأخر .. وهالله هالله في السواقه الزينه
ويطلع سلطان من البيت وهو مقهور من مريم 

                            <table style=filter:blur> ماوحشتك </table>

**ماوحشتك** · 02-06-03 ||, 02:47 AM

<img src="http://oasis.bindubai.com/emoticons/biggrin.gif" border="0" valign="absmiddle" alt=':D'>  

 في الليل في بيت مريامي .. مريامي ومها حرمة حمدان قاعدين في الصالة
مريم: مها عبدالله ولد عمي محمد بيعرس بعد ثلاث شهور
مها: والله ... يا حليله بياخذ بنت عمج سلطان
مريم : هيه بياخذ نوره ... تعالي وين نفصل فساتين حق العرس
مها: شفتي عرض روبير أبي نادر الأخير ... عنده أشياء حلوه
مريم: حتى عبدمحفوظ مبدع
مها: شوفي نتصل في الأثنين في لبنان ونخليهم يطارشولنا موديلات بالفاكس ونختار اللي يعجبنا
مريم: والقياسات
مها: نطرشها بالفاكس
مريم: والبروفه
مها: امممممم لازم بروفه
مريم: وإذا ما كان مضبوط القياس
مها: اممممم شو يعني ندور حد هنيه نفصل عنده
مريم: على الأقل ندور حد عنده مشغل هنيه
مها: شرايج نروح لبنان ثلاثة أيام
مريم :هاهاها قولي والله ... منو يودينا
مها: حمدان
مريم: تحلمين ... ما بيطيع
مها: بقوله
مريم: وعيالج يا حلوه والمدرسه
مها: نروح ويك اند ... وعيالي عمتي بتسدهم
مريم: شوفي أنا باجر الصبح ... بتصل في روبير أبي نادر وبقوله يطرش لي موديلات على فاكس الشغل
مها: لا فاكس البيت
مريم: خليني أكمل كلامي
مها: كملي .. بس فاكس البيت مب الشغل عشان أشوفهن
مريم: لا حول ولا قوة إلا بالله .. زين فاكس البيت ، وبنتنقى منهن اللي يعجبنا ... وبقوله نباهن يزهبن قبل العرس ... وبنطرش له القياسات ... والبروفه كلمي حمدان طاع كان بها ما طاع ... بنخليه يطرشهن ويا حد من المشغل نجربهن ونردهن وكله بحسابه
مها : صح والله ... زين .. بس السعر ياماما
مريم: ماعليج فستاني بسده بروحي وفستانج بيسده حمدان
مها: واذا حطلي لميت وماطاع يزيد إذا طلع بزياده ما بفصل عنده برد على نيكولا جبران في بوظبي
مريم: انتي قوليلي بس وأنا براويه ما يطيع ... والله انتي مب أقل من حرمة ناصر وحميد ... بخلي ابوي يدفع حق الفستانين ما عليج
مها: ترومين بنت مطر ... بس وين نورة وأسما عند منوه بيسون فساتينهن
مريم: ما عرف ... ما كلمت حد
مها: قوليلهن إنا بنفصل عند روبير عشان ما يزعلن بعدين ويقولن ما قلنالهن
مريم: ما عليج منهن إذا سئلن بقول لو انهن ما بيسئلن ... بعدين هن من سكان العاصمه ... أدرى منا بالموضه والأناقه ... خليهن ... نحن حليلنا مال العين بدو شدرانا في اللبس
مها: هاهاهاها ما تيوزين مريامي عن سوالفج
مريم: هاهاها ماعليج منهم .. غريبه الساعة 11:30 وأمي وأبوي دخلوا يرقدون شو عندهم مب عادتهم
مها: يستعيدون ذكريات الشباب خليهم
مريم: هاهاهاها شو تقصدين هم شواب بخبرهم باجر عليج
مها: هاهاها ... تعالي سلطان شحاله ... وشحال بكرتج
مريم: بكرتي ما عليها كلام ... مزيونه وشكلها بتكسر التيم بس خليهم يركضونها
مها: يا حافظ ... وولد خالج
مريم: ولد خالي .. شفته في العزبة وبس ... بعدين من يوم الأربعاء لين الجمعه في سويحان وبوظبي ... ويوم رجع رجعت البيت
مها: بس ما صار شي .. لقاء .. اعتراف
مريم: لا والله فلم مصري نحن ... لا ما صار شي ... وبروح أرقد أحسلي عندي دوام باجر ...
مها: لا والله واتم بروحي
مريم: ريلج وين
مها: عند ربعه
مريم: اعطيج نصيحة إخت تحب اختها
مها: هاتي قولي يا ام العريف
مريم: روحي فلي شعرج ... وصبغي ويهج ... وخطي هالعيون ...ويا ريت تلبسين عدسات زرق ... خضر أو عسليات ...
مها : ايوه أيوه وبعد
مريم: وآخر شي لبسي قميص نوم أحمر أو أسود ... هذا كله ياخذله ساعه لين ما تسوينه
مها: زين وبعدين
مريم: إذا أخوي ما وصل خلال هالساعة ... اتصلي فيه قوليله حمدان الحق مريامي أغمى عليها وعمي وعمتي راقدين وما أعرف شو أسوي وبيي وهو يسوق الف في الساعه
مها: ايوه عشان أنفد ريلي ... ويوم أيي يدوس في بطني ويردني بيت هلي
مريم: هاهاهاها صح بيكرهج ساعتها ... خلي نفسج تصيحين بعمق ... وقوليله تضاربت ويا مريامي وسبتني
مها: بيقولي روحي حلي مشكلتج وياها بروحج
مريم: هذا أخوي ما عنده سالفه
مها: أقول احترمي نفسج لا تقولين عن ريلي ما عنده سالفه
مريم: طالع هاي ... وأنا اللي قاعده احل مشكلتها .. أقولج اتصلي فيه وقوليله مصختها إن ما رجعت خلال عشر دقايق بقفل باب القسم عنك ... ونام في الصالة خل عمي يوم يطلع يصلي الفجر يشوفك
مها: اممممممممممممممم هذا الكلام ممكن ينفع
مريم: عيل ياللا يا شطورة روحي سوي اللي قلتلج عليه .. أنا بروح أرقد
مها: أوكي يا أم العريف تصبحين على خير

وتطلع مها من الصالة رايحه حجرتها ... أما مريم فتبند ليتات الصالة والمدخل وتقفل الباب الرئيسي للفيلا لأن حمدان يدخل من الباب الجانبي ... وتروح حجرتها

في غرفتها قعدت مريامي تفكر في الكلام اللي نقال في بيت خالها ... إذا كلام حرمت خالها عن زواج سلطان خلاها تحس وكأن سجين تقطع في قلبها فكيف إذا تزوج ... ليش تحب إنسان ما يحس ... ليش تحب إنسان أناني ما يفكر إلا في نفسه ... أوكي يمكن زواجه يعورها في الأيام الأولى ومثل ما قالن بنات خالها ... بعدين تقدر تتأقلم مع الوضع ... وبعدين وياه ولا هو شو يخصه ... إذا هيه تحبه وما تقدر تتحكم في قلبها ... ليش عيالنا ما يعرفون يحبون وتفكيرهم سطحي .. ليش سلطان ما يقدر يحبها
ويقطع عليها تفكيرها صوت مبايلها يرن واسم خليفه طالع على الشاشه وترد عليه وهي تبتسم
مريم: الو
خليفه: هلا هلا والله بأغلى مريامي في العالم... هلا بنور هالبلاد ... هلا بأحن بنت عمه في الوجود
مريم: الزبده شو تريد ... الساعه 12 وربع باجر ورانا دوامات
خليفه: حشا عافانا الله عوفه ... على منوه طالعه خالي حبوب وخالوه حبوبه ... لا يكون ينتقل بالعدوى
مريم: هاهاها خلوف
خليفه : مريامي
مريم: عونك يا بعد طوايف مريامي ... عونك يا عيون مريامي
خليفه هاهاهاها تصدقين جدامي دوار كنت بدخل فيه ... ما أصدق صبري اتأكد إني متصل في مريم بنت مطر ... ولا أقولج بروح جبل حفيت الحين صبري
مريم: ليش تروح حفيت
خليفه: بنتحر بعق نفسي من فوقه ... بعد هالكلام الحلو شو أريد من الدنيا
مريم: هاهاهاها ... يوز عن سوالفك هاه وقول شعندك
خليفه: ماشي تولهت عليج قلت أسلم ...
مريم: حشا اليوم المغرب شايفني .... مسرع ما ولهت علي
خليفه: غاليه بنت مطر ما تدرين بغلاج
مريم: مشكور فديت روحك .. بس قول شو تريد
خليفه: خدمه بسيطه
مريم: شوه
خليفه: دراجه بانشي
مريم: هاه دراجه شوه
خليفه: كلمي ابوي ... توسطيلي
مريم: ليش
خليفه: الدراجه
مريم: انت قلتله
خليفه: أيوه .. أول طاع وبعدين ماطاع
مريم: ليش ما طاع
خليفه: قالي خذها بروحك
مريم: زين خذها بروحك
خليفه: حلفي بس انتي ... البيزات ماما ... إذا ما عطاني من وين بخذها
مريم: اهاااااا
خليفه: كلميه ...
مريم: كم تريد ؟ أقول صبر شوي حمدان على الخط الثاني برد عليه وبرجع لك
وترد على الخط الثاني
حمدان: مريامي رقدتي
مريم: لا حبيبي أكلم خليفه على الخط الثاني بس برقد ليش
حمدان: شو فيها مها ... ليش خليتيها بروحها
مريم : هاهاهاها ليش هيه ياهل اقعد احرسها بعدين انت ريلها مب انا
حمدان: زين قعدي عندها لين ما ارد .. هذي خبله أخافها تقفل الباب عني صدق
مريم: اقول حمدان .. أنا بدلت ثيابي وفي الفراش متلحفه برقد ... الحق على حرمتك لا تقفل الباب أنا شفتها اليوم كانت مغيضه... وقالت في خاطرها تبيتك برع
حمدان: اهووووو .. شو هالحاله ... زين ياللا برايج تصبحين على خير
وتبند عن حمدان وهي تبتسم وترد حق خليفه
مريم: الو .. هاه خليفه
خليفه: شو يريد حمدان
مريم: يتخبر عن مها ... أقولك شرايك اتييني باجر الضحى المكتب ... ونتفاهم ... وما يصير خاطرك إلا طيب
خليفه: تم يا بنت العمه .. باي تصبحين على خير
مريم: وانت من أهل الخير
وتبند عن خليفه .... وترقد ............
في مكتب مريم الساعة 10:30 يدخل عليها خليفه
خليفه: السلام عليكم ... ممكن لو سمحتي نظرة
مريم: هاهاهاها وعليكم السلام ... تفضل يا أخ خليفه أي خدمه أقدر أقدمها لك
خليفه: والله عندنا شكوى
مريم وهي عاقده حياتها تحاول تكون جديه: على منوه بالضبط
خليفه: موظفه عندكم اسمها مريم بنت مطر بن صالح ...
مريم: شو سوت
خليفه: اممممممم أقول كلمتي ابوي
مريم : لا ما كلمته
خليفه: كلميه عاد مريامي ... تدرين ابوي ما يردلج كلمه
مريم: خليفه هذي دراجه
خليفه: مريامي أعرف لا تخافين علي
مريم: سلطان يدري
خليفه: وليش ... لازم يدري
مريم: يعني أعرف رايه أخوك أكبر منك
خليفه: عندي راشد وسعيد خوان أكبر منه
مريم: اوكي خليفه بكلم خالي
خليفه: ياللا كلميه الحين
مريم: الحين خالي في المكتب .. بكلمه العصر
خليفه: قولي والله بتكلمينه
مريم: والله بكلمه ... أفا عليك وعدتك أنا
خليفه: زين أنا أصدقج مريامي ... وأثق في كلمتج ... وأدري إنه إذا كلمتيه يومين وبيعطيني أخذ الدراجه
مريم: والدراسه خليفه
خليفه: شو فيها
مريم: أخاف تهملها
خليفه: لا تخافين علي ... سبع أنا أعجبج
مريم وهي تبتسم : زين يا سبع ... تريد تشرب شي لا تقول علينا بخلا بعد
خليفه: لا ماشي وقت بروح الجامعه عندي محاضرة بعد عشر دقايق
مريم: اوكي حبيبي الله يحفظك .. مع السلامه
خليفه: باي .. كلمي ابوي لا تنسين
مريم: ما بنسى
ويطلع خليفه من مكتب مريامي .... وبعدها بشوي رن تيلفونها الموبايل واسم مها على الشاشه
مريم: الو
مها: الو يا حلوة ... أحلى صباح لأحلى مريامي
مريم: اوووووووه شو السالفه هالكثر مبسوطه
مها: بعد ربج ... كلمتي لبنان
مريم: لا الحين بكلمهم ...
مها: ياللا شو اتريين
مريم: زين قوليلي شو قالج أمس حمدان ... أو بالأصح وين بات
مها: هاهاهاها لا والله صدقتي اني بقفل الباب عنه ...
مريم: قلت يمكن بعد
مها: وهالساعه اللي قعدت أحوفر فيها في ويهي تضيع هباء منثورا ...
مريم: شو قال
مها: ما بقولج أسرار زوجيه
مريم: لا والله .. دوري غيري يعطيج نصايح
مها: هاهاها كلمي المصمم الحين وبعدين بقولج
مريم: قلتيله عن الفستان
مها: اووووه لا نسيت ما طرا على بالي اقوله
مريم: يا حافظ وشو طرى على بالج عيل ... حق شوه قلتلج تسوين كل هالأشياء
مها: يا خبيثه
مريم: اقول لا تقوليله ... أنا بفصلج الفستان هديه من عندي
مها: اووووووووه شكرا بس شو المناسبه
مريم: اممممم متى عيد الأم
مها: امممم بعد ثلاث شهور
مريم: زين بمناسبة عيد الأم
مها: زين يا بنتي مشكورة .. كلميهم الحين
مريم: اوكي ... بس يكون في معلومج أبوي بيدفع
مها: المهم من عندج هديه
مريم: هيه
مها: زين ياللا باي
مريم: باي

وبعد ما تبند عن مها تكلم المصمم في لبنان وتتفاهم معه على كل شي وتعطيه رقم فاكس البيت عشان يطرش الموديلات على الفاكس .. وترد تتصل في مها
مريم: الو مها
مها: هاه شو سويتي
مريم: كلمته وبيطرش لج الموديلات .. وقال بيطرش من مشغله حرمه عشان البروفه ... وحتى القياسات إذا بغينا ... بس قلتله بنطرش له القياسات
مها: ومن وين بنطرش القياسات
مريم: حرمة أخوي الحبوبه بتكلم نيكولا وبتقوله يطرش قياساتنا على الفاكس مالنا عشان نحن نطرشهن بعد ما نتنقى
مها: منو حرمة اخوج هذي
مريم: حرمة أخوي هذي إسمها مها
مها: اهااااا زين لأنها طيبه بتسمع كلامج ... ياللا باي بروح اتريا الفاكسات
مريم : اوكي

**القلب المحتاس** · 02-06-03 ||, 06:00 PM

مشكور اخوي على القصه ,,,

ونتريا التكمله >>  <<<img src="http://oasis.bindubai.com/emoticons/blush.gif" border="0" valign="absmiddle" alt=':b:'>

**بنت المطر** · 02-06-03 ||, 07:44 PM

وين التكملة وين  <img src="http://oasis.bindubai.com/emoticons/face83.gif" border="0" valign="absmiddle" alt=':cre:'>  <img src="http://oasis.bindubai.com/emoticons/face83.gif" border="0" valign="absmiddle" alt=':cre:'>

والله العظيم حرام <img src="http://oasis.bindubai.com/emoticons/face83.gif" border="0" valign="absmiddle" alt=':cre:'>  <img src="http://oasis.bindubai.com/emoticons/face83.gif" border="0" valign="absmiddle" alt=':cre:'>

**بن دبي** · 02-06-03 ||, 07:49 PM

يله مااقدر اصبر يله ابا التكمله<img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/rock.gif" border="0" valign="absmiddle" alt='???'>

**القلب المحتاس** · 03-06-03 ||, 02:46 AM

وينك ماوحشتك؟؟ <img src="http://oasis.bindubai.com/emoticons/mad.gif" border="0" valign="absmiddle" alt=':angry:'>

**البنت الدلوعه** · 03-06-03 ||, 05:16 AM

القصه حلوه واااااايد
بس كانت النهايه حلوه

ومشكور مره ثانيه

<img src="http://oasis.bindubai.com/emoticons/smile.gif" border="0" valign="absmiddle" alt=':)'>

**القلب المحتاس** · 03-06-03 ||, 07:53 PM

ما وحشتك شو سالفتك يالله كمل القصه ؟  <img src="http://oasis.bindubai.com/emoticons/mad.gif" border="0" valign="absmiddle" alt=':angry:'>

**البنت الدلوعه** · 08-06-03 ||, 06:56 PM

اسفه ماوحشتك  بكمله بدالك
لان مايقدرون ينطرون
اوكي
<img src="http://oasis.bindubai.com/emoticons/biggrin.gif" border="0" valign="absmiddle" alt=':D'>

**البنت الدلوعه** · 08-06-03 ||, 07:11 PM

بعد ما رجعت مريامي من الدوام .. وتغدت هي وأخوها حمدان ومها وقاعدين يشربون الشاي
مريم: مها وين الموديلات ما شفتهن
مها: في مكتب عمي صبري بروح أييبهن لج .. بعد عشان حمدان يتنقالي
وتروح تييب الفاكسات من المكتب
حمدان: موديلات شو
مريم: فساتين .. حق عرس عبدالله ولد خالي محمد
حمدان: متى بيعرس ؟
مريم: بعد ثلاث شهور
حمدان: ومن الحين تفصلن ... حشا شو بتفصلن بخيوط الذهب والفضه
مريم: حمدان لا تبدا الله يخليك .... الشي الزين ياخذله وقت
وتدخل مها في يدها الأوراق ... وكاتلوج فيه تصاميم روبير ابي نادر ....
مريم: شي عيبج ....
مها: أيوه أثنين عجبني .. بشوف راي حمدان فيهن
مريم: عطيني أشوف
مها: دوج ... حمدان شو رايك في هذا
حمدان: شو هذا ... بالذمه هذا لبس
مها: شو فيه
حمدان: شرايج تروحين متفصخه أحسن ما يحتاي تلبسين
مريم: حمدان العرس حق الحريم بس
حمدان: حتى ولو في شي اسمه حيا
مريم: نقدر نقوله يعدله ويصك الفتحه ويبطنه عند البطن
حمدان: يا حافظ عليكن حريم بن صالح ... وكلكن بتلبس جيه
مها: حبيبي الموضه جيه
حمدان: يا حبيبتي أغار عليج
مريم: اوكي حرمتك غار عليها ... بس أنا بفصل ما عندي حد يغار علي
حمدان: انتي كيفج
مريم: اوكي ... وخل حرمتك تكون أقل وحده في العرس .. خلهم يقولون حرمة حمدان ما تعرف تلبس وريلها مقصر عليها ... وما ندريبه على شوه ماخذنها وشو عاجبنه فيها
حمدان: يخسون يقولون عليها كلمه
مريم: ليش الناس بتقول اللي تشوفه
حمدان: والحين الفستان يغير
مها: طبعا ... عيل شو تريدني البس ...
حمدان : أقول سوي اللي تبينه مرخوصه
مها: فديت روحك حبيبي ... أدري ما أهون عليك
حمدان: زين الحين حبيبي وفديت روحك ومن الصبح ساكته ومخليه مريامي تسرطني بلسانها
مريم: هاهاهاهاها شو أسوي ما تهون علي حرمة أخوي حد يقول عليها كلمة ... أنا ما ألبس وهيه تلبس
مها: فديت روحج بنت مطر ... علني ما خلى منج ... هذا من طيب أصلج
حمدان: خلفنه فيلم هندي ... زين وكم تبين حق الفستان
مريم: لا هديه من عندي
حمدان: زين والله وفرتي ... بس أنا شو بتيبيلي هديه
مريم: احمد ربك بسوي الفستان حق حرمتك
حمدان: هاهاهاها اقول انتن قعدن وأنا بروح صوب العزبة شوي ... وبمر عزبة عمي أسلم على الشباب هناك
مها: اوكي حبيبي هالله هالله في نفسك ولا تتأخر
حمدان: وين أحمد بوديه وياي خله يتعلم من الحين
مريم: وسلطان ليش ما توديه
حمدان: هاهاها بعده صغير يوم بيكبر شوي ياللا من رخصتكن
ويطلع حمدان وتكمل مريم ومها تصفح المجلة والفاكسات ويختارن الفساتين ... ويطرشن الفاكسات بقياساتهن ... وكلمت مريم المصمم وقالتله اللي يبنه والتعديلات على الموديلات

مريم: بعد شهرين بيخلصن الفساتين
مها: زين الحمدلله والمكياج وين نسويه
مريم: أتوقع إنهم هناك يحجزون دولا تعدل العروس
مها: وانتي
مريم: انا بحجز في مورا في دبي بخليهم يطرشولي العين رانيا او جوزيت
مها: ليش ما بتين قبل يوم العرس
مريم: لا مافيني .. بعدين ما بنحجز الحين ... بنتريا لين ما يقولون متى العرس بضبط وبحجز قبله بشهر
مها: اهااااا أنا ما أدري وين بسوي لأني يمكن أروح بوظبي مع حمدان قبل العرس بكم يوم ... تدرين دوم الرياييل عرسهم قبل
مريم: أنا بحجز لج ما عليج
مها: اوكي مب مشكله

بعد المغرب كلمت مريم خالها أحمد عشان الدراجه حق خليفه ،
مريم: خالي حبيبي يرضيك اتم الدراجه في خاطره ولدك ، بعدين كلهم عيال عمومته وخواله بدراجاتهم إلا هوه، ايون العين عشان الدراجات وخليفه من العين ما عنده يقول حق هذا وهذا يعطيه شوي وأبوه يقدر ياخذله وحده وما ياخذله
بو راشد: يا بنتي مب سالفة بيزات أنا أخاف عليه ما تدريبه إنتي خليفه وغلاته عندي
مريم: حبيبي تدري انته اللي مكتوب على الجبين لازم تشوفه العين والآجال انكتبت من قبل لا ينولد وتنولد ... عشان خاطري خالي لا تخليها في خاطره
بو راشد: عشان خاطرج إنتي بس ولا لو ما توسطيله ما كنت خذتله
مريم: مب عشان خاطري بس ،بعد لأنه ولدك حبيبك وما يهون عليك يطالع العيال عندهم وهوه لا
بو راشد: غلبتيني يا بنت مطر .. حاظر بناخذله الدراجه
مريم: فديت روحك حبيبي انت، ياللا بخليك الحين سلم على خالوه
بوراشد: وانتي سلمي على هلج
مريم: ان شاء الله يوصل ، مع السلامه
وتبند التيلفون وتتصل في خليفه تبشره
مريم: الو
خليفه: هلا مريامي ، بشري شو سويتي كلمتيه
مريم: كلمته، أول مرة خالي يكون عنيد جيه ما رمتله
خليفه: أفاااااا يعني ماشي دراجه
مريم: لا ماشي دراجه، يقولك كلم سلطان
خليفه: الله يخليج إذا ابوي مره ما طاع سلطان الف مره ما بيطيع
مريم: هاهاهاهاها أقص عليك ، روحله بيعطيك تاخذ الدراجه
خليفه: ويا ويهج، طيحتي قلبي
مريم: طالع هذي مشكورة اللي تقولي اياها .. الحين بكلمه بقوله لا ياخذ لك
خليفه: لالا لالا لا أسف والله أسف ومشكورة ما تقصرين ...ياللا شي في خاطرج أنا عند ربعي
مريم: سلامة راسك، بس يا خليفه هالله هالله في نفسك لا تخليني أندم إني توسطت لك
خليفه: فالج طيب يا بنت مطر
مريم: فالك ما يخيب ... ياللا باي
خليفه: باي

قبل العرس بأسبوع في مريامي وأمها ومها وحمدان قاعدين في الصالة في بيتهم العصر يتقهوون
مها: عمتي ما كلمتي بيت عمي سلطان تتخبرين إذا يبون شي حق العرس يوم الخميس
أم حميد: كل يوم أكلمهم ، ماقاصر عليهم شي
مريم: زين انتي متى بتروحين
أم حميد: بروح يوم الأحد .. انتي ما بتروحين وياي
مريم: لا عندي دوام شو يوديني من الأحد ، يوم الخميس بلحقكم
حمدان: ويا منوه بتقعدين في البيت لين يوم الخميس ، أنا باخذ اجازة يوم الأربعاء والثلاثاء بروح بوظبي
مريم: بقعد ويا أبوي في البيت
أم حميد: ابوج بيروح بوظبي يوم الأثنين .. إلا جان تروحين بيت خالج أحمد وتيين مع خالتج موزه لأنها قالتلي بتي يوم الأربعاء الصبح حق المكسار وبترد العين، ويوم الخميس بتي العرس
مريم: أحسن بعد ، لأني صراحه حاجزة في الصالون ايوني العين مب بوظبي
حمدان : خلاص روحي بيت خالي أحمد وتعالي ويا سلطان أو خليفه لا تين بوظبي ويا الدريول
مريم: ما بيي بروحي حتى لو ويا الدريول بتكون خالوه والبشكارة ويانا
حمدان: بعد تركبين بزينج وفستانج ويا الدريول
مريم: زين وإذا راحوا هم بعد قبل .. شو نسوي
حمدان: كلمي خليفه وبيرجع لج العين ... الحين خليفه طايربج بعد ما توسطيله حق الدراجه ، لو تبين عيونه بيعطيج،
مريم: هاهاهاهاها لا والله
حمدان: اقول توسطي لي عند خالي أريد غزيل
مها: نعم نعم نعم منوه غزيل هاي بعد
مريم وحمدان وأمهم يضحكون على مها
مها: ليش تضحكون
أم حميد: ما شفتي غزيل يا بنتي
مها: ليش شو فيها
حمدان: اوف مزيونه والعيون كلها عليها
مها: يا حافظ
مريم: ما عليج منهم هذي بكره عند خالي ماطاع يبيعها عليهم ولا يعطيهم اياها
مها: اهااااا حسبالي بعد
حمدان: مدام عندي القمر مالي ومال النجوم ... انتي عندي واطالع غيرج مينون انا
مريم : ياسلام لو سمحتوا احترموا شعور العوانس أغار
مها: هاهاهاها
حمدان: مريامي إذا مها قمر إنتي الشمس اللي ينور هالقمر
ويضحكون كلهم على كلام حمدان

في يوم العرس في بيت بو راشد كانت مريامي اتلبس بعد ما خلصت مكياجها وتسريحه لأن أم راشد قالتلها إنهم بيطلعون بعد المغرب وما تريد تتأخر عشان ما تأخرها وياها وبعد ما خلصت لبست عباتها وشيلتها وطلعت الصالة
أم راشد: خلصتي مريامي
مريم: هيه خالوه، منوه بيودينا
أم راشد: ولا سلطان ولا خليفه ، ما أدريبهم واحد فيهم بيرجع وبيودينا
مريم: ما كلمتيهم خالوه
أم راشد : لا اتصلي في واحد فيهم شوفي منوه يانا
وتتصل مريم في خليفه
مريم: الو خليفه وين انت
خليفه: وعليكم السلام بين عمتي أنا في بوظبي
مريم: خليفه الساعه سبع شو تسوي في بوظبي منو بيودينا العرس
خليفه: شوي شوي سلطان طالع الحين من ساعه راجع لكم ، بيوصل الحين هوه بييبكم
مريم: وليش ماييت انت شو اتفقنا نحن
خليفه: ما طاع يخليني أضرب خط ما يأمن في سواقتي ما تعرفينه انتي نحس
وتسمع سياره تهرن برع عند الباب ...
مريم: اسمع حد يهرن جنه وصل برايك بخلي روز تودي شنطتي السيارة
خليفه: وين بتباتين
مريم: بيت خالتي لطيفه
خليفه: وليش ما تباتين عندنا أو عند حد من خوانج
مريم: أمي هناك قاعده وبقعد وين أمي ما تقعد ولهت عليها
خليفه: زين برايج ياللا باي
مريم: باي
وفي هاللحظه يدخل سلطان يشوفهم وكانت أمه في حجرتها .... وتتلاقى عيون سلطان ومريم
سلطان: زهبتوا ياللا عشان نروح
مريم: هيه ، بس خالوه في الحجرة بزقرها وبطلع
سلطان: أنا بدخل أشوفها ، روحي انتي يبيلي كندوره من فوق بغير هذي اللي علي
مريم: زين تريد شي ثاني بعد
سلطان: لا
ويدخل عند أمه ومريامي مغيضه عليه ، وتروح تييب له الكندورة وبعد ما بدل طلعوا هو ومريامي وأمه والخدامه

وبعد ما وصلوا بوظبي
سلطان: بتروحون العرس على طول ولا اوديكن البيت
أم راشد: أنا عقني في العرس ووصل مريامي بيت خالتها لطيفه تنزل قشارها من السيارة وتنزل روز
سلطان: ان شاء الله
وبعد ما ينزلون أم راشد العرس تركب مريامي عدال سلطان عشان يوصلها بيت خالتها
مريامي: هاه سلطان شو عرس الرياييل
سلطان: زين الشباب ماقصروا يالوا لين الصبح أمس
مريامي: حلو
وشغل سلطان الاف ام وسكتوا لين ما وصلوا بيت خالتها في المرور ونزلت روز ونزلت شنطة مريم، وقبل لا تدخل البيت
سألها سلطان: أترياج ولا
مريم: لا بروح ويا أمي والبنات من هنيه
سلطان: على راحتج
وفي هاللحظه طلع ولد خالتها الكبير ظاعن ونزل سلطان يسلم عليه
ظاعن: هلا والله بولد خالي عاش من شافك وين هالغيبه
سلطان: موجود انت اللي ما تطيحها العين، وينك ما شفتك أمس في العرس
ظاعن: ما اتخرت هناك سلمت على خوالي وعلى عبدالله وطلعت كان عندي شغل ... ويلف على مريامي ويسأل سلطان: منوه وياك ؟
مريم: أنا مريم بنت مطر شحالك ظاعن بالمرة الظاهر انك نسيتنا
ظاعن: مريم تبغين الصدق حلويتي وايد ما عرفتج ... صارلي أكثر من عشر سنين ما شفتج
مريم: قالك سلطان الظاهر انك زاعلتها العين
ظاعن: لا بس تدرين عشر سنوات وأنا أدرس برا ويوم رجعت مسكت شغل الوالد وانزحمت
مريم :يعني الحين نقولك يا دكتور ظاعن
ظاعن: دكتور بس مب عليكم .. وين ليش مب في العرس
مريم: قلت بروح ويا البنات من هنيه
ظاعن: البنات كلهن في العرس محد في البيت إذا تحبين بوصلج
سلطان: ماعليه ظاعن أنا بوصلها ما بنعطلك انت
ظاعن: منو قال بتعطلني بالعكس والله
سلطان: لا برايك أنا بوصلها
مريم: إذا انت مشغول سلطان برايك بروح ويا ظاعن
سلطان: لا بوصلج برد بيت خالي محمد عند الشباب هناك
مريم: اوكي شكرا ظاعن بيوصلني سلطان
ظاعن: على راحتج دومه سلطان المفضل على الكل
مريم: هاه شو
ظاعن: أقصد عيال خالي أحمد
مريم: هاهاها مع السلامه ظاعن
ضاعن: مع السلامه خلينا نشوفج
مريم: بتشوفني الليله وباجر .. برد أبات هنيه
ظاعن: إذا ما شالج البيت تشيلج عيونا
مريم: تسلم يا ولد خالتي
سلطان: ياللا مريامي مع السلامه ظاعن
ويسلم عليه ويطلعون من البيت .... ظاعن أكبر عيال خالتها لطيفه عمره 32 سنة وما تزوج لأنه كان يدرس في أمريكا وما رجع لين ما خذ الدكتوراه وبعد ما رجع مسك شغل ابوه ، ومعروف عنه إنه شاعر ما ينغلب في الشعر
وفي السيارة
سلطان: ليش ما تباتين بيت أخوج ناصر أو حميد
مريم: أمي بيت خالتي وأنا بقعد وين أمي ما بتقعد
سلطان: وعمتي ليش مودرة بيوت عيالها ورايحه بيت ختها
مريم: والله ختها وما عندها خوات غيرها متولهه عليها
سلطان: زين انتي قعدي بيت أخوج أقرب لج من خالتج
مريم: سلطان مالك خص ابات وين ما أريد ، ابوي راضي واخواني راضين اوكي
سلطان: أنا أسف إني تدخلت في شي ما يخصني
مريم: اعتذار مقبول وغير الموضوع
سلطان: ما يحتاي وصلنا ، والحين بتنزلين
مريم: اوكي باي سلطان
سلطان: باي
وتنزل مريم العرس وهي معصبه على سلطان

والبقية تاتي

**البنت الدلوعه** · 08-06-03 ||, 07:12 PM

داخل خيمة العرس كانت مريامي تحترق من القهر بسبب الكلام اللي قاله سلطان .... وطبعا سلمت على حريم خوالها وخالتها وأمها عند باب الخيمة ووقفت تتكلم ويا أمها وخالتها

مريم: أميه مها حرمة حمدان وبنات خالي أحمد وين
أم حميد: شوفيهن داخل صوب الكوشة
أم ظاعن: شو هالحلاة كلها مريامي ... ولا يمكن لأنا ما نشوفج هنيه
مريامي : عيونج الحلوة خالتي ... بعدين تدرين انتي دوامي متعب والويك اند خواني ايوون العين .. وين نقدر نروح مكان
أم ظاعن: ماشاء الله ردج زاهب ... ما تنغلبين ماشي إلا نيوزج واحد من هل بوظبي عشان ما تلقين عذر
مريامي: لا لا لا خالوه .. أنا مثل السمجه إذا طلعت من العين أموت ..
ماشي غير هوا العين اللي يرد الروح
أم ظاعن: قولي ما تبينا
مريامي: علني أفداج خالوه عيوني لج طال عمرج ...
ومن بعيد شافت حصه ومها حرمة حمدان يأشرولها
مريامي: عن إذنكم بروح أشوف البنات هناك
أم ظاعن: هاهاهاها محد غيرج بنت ولا كلهن حريم وأمهات الحين
أم حميد: شو نسويبها يا وخيتيه ما تريد .. وبعد ما نروم نغصبها
ام ظاعن: بييها نصيبها إن شالله

وتخليهم مريامي وهي تبتسم لهم ... وتمشي بين الطاولات وكأنها أميرة ... جمال .. عيون ... شعر ... طول ... وجسم ... وكل الحريم يطالعنها ... وما كانت هي مهتمة لأنها تدري السبب اللي يخلي الحريم بطالعنها لأنها مريم بنت بن صالح الوحيدة العانس في بنات بن صالح كلهن ... بس ما كان الموضوع يهمها أبداً ... مثل ما يقولون الواثق من نفسه يمشي ملكا بين الناس ....
أما الخيمة فكانت من أروع ما يكون ... من ثلاث شهور وهم يركبونها ، وديكوراتها من شركة فرنسية ... يعني شي متعوب عليه ... الحلويات في كل مكان ومن كل مكان في العالم ... والسيرفس ممتازة .. والمقهويات من شركة الدلة ... وحتى الكوشة مسرح مب كوشة من كبرها .... والفرقة تغني من ورا الكوشة ..
وخطفت من عدال حريم يوم شافنها

قالت وحده فيهن : من بنته هذي
الثانية: هذي بنت مطر بن صالح ...
الأولى: شو تقربلهم اللي معرسين
الثانية : بنت عمتهم ... العروس والمعرس يصيرولها عيال خوالها
الأولى: هيه ... من بنته بنت أم ظاعن
الثانية: لا بنت أم حميد حرمة مطر ... هذي مريم ما عندهم بنية غيرها
الأولى: ومنوه ماخذنها
الثانية: مب معرسة
الأولى: ليش ، كم عمرها محد محيرنها
الثانية: لا بغوها عيال بن صالح بس هيه ما بغتهم ... عيال عمومتها وعيال خوالها .... كملت دراستها عندها ماجستير وتشتغل
الأولى: وليش مخلين بنتهم تشتغل، عيزانين عنها
الثانية: لا بس هيه اللي بغت تشتغل، وأبوها مخلنها على هواها بلا عرس ، وشغل تشتغل

وطبعا مريامي ما سمعت هالكلام لأنها كملت طريقها صوب بنات خوالها، وحريم خوانها
وبعد ما سلمت على بنات خوالها وحريم خوانها قعدت عدال حصة وروضه ومها

مها: ليش اتخرتي خالتي موزة وصلت قبلج
روضه: صدق سلطان يابكم ؟
مريم: أيوه الملقوف اخوج يابنا ... (ولفت صوب مها) رحت بيت خالتي أول نزلت ساماني وييت العرس
روضه: لو سمحتي أخوي مب سخيف ... حمدي ربج إنه يابج
مريم: حشا عوف عافانا الله ... جنه مغصوب مب هوه اللي قال حق خليفه لا ايينا عشان هوه بييبنا
مها: ليش نزلت أغراضج بيت خالتي ما بتباتين ويانا
مريم: وين ؟؟
حصه: أهااااااا ما خلى خليفه اييكم يعني رد من بوظبي العين عشان اييبج مخصوص .. شو هالتطور
مريم: لا يا حبي رد عشان اييب أمج ... مب أنا
مها: متاكده
مريم: بلا سخافات اللي يسمعكن الحين بيصدق ... لو ما تعرفنه النحس العود في العايلة... لو يوزعون لقب ملك نحاسة العالم بياخذه هوه .. لا سوري مب العالم بس الكون بعد
حصه: هاهاهاهاها زين وانتي ملكة نحاسة الكون والمجرات كلها تتناسبون
مريم: سكتي سكتي الله يخليج ... محد ينافسه ولا حتى أمج (وتلف صوب مها) وتسالها وين بتباتون انتي وريلج
مها: بيت حميد .. تعالي ويانا
مريم: قشاري بيت خالوة
مها: كلمي تريزا خدامة خالتج خليها تطرش شنطتج بيت حميد
مريم: صح وبالمرة اتخلي روز تروح بيت خالي أحمد هنيه
مها: اوكي ياللا اتصلي ..
مريم: صبري ما قلت حق أمي
مها: عادي ما بتقول شي عمتي
مريم : زين خلاص

وتتصل في الخدامة وتخليها تطرش أغراضها بيت حميد أخوها ... ما تدري ليش ما باتت بيت خالتها مع إنها كانت مقررة تقعد هناك، هل لأنها ضعيفه جدام سلطان وما تريد ترد له كلمة ... ولا لأنها فعلا شافت إنه كلامه صح المفروض تقعد بيت واحد من خوانها ...

وبعد ما خلص العرس وطلع عبدالله مع عروسته وراحوا دبي برج العرب .. وخفة زحمة الحريم وما بقى غير حريم وبنات قوم بن صالح في الخيمة

أم حميد: ياللا مريامي جان بتروحين وياي
مريم: لا أمايا بروح ويا مها بيت حميد عند خواني ولهت على عياله وعليه
أم ظاعن: شو الظاهر انج ما تبين اتيين بيتنا
مريم: لا خالوه بس خواني يبون يشوفوني
أم راشد: أفاااا شو هالمخوة بنت مطر بتودريني أرد البيت بروحي تعالي وياي خوانج ويا حريمهم وعيالهم ... وأمج ويا ختها ... تميت الا أنا ويا الرياييل
مريم: يكفي إن خالي أحمد عندج شو تبين بعد
حصه: أفاااا اميه شو هالرمسه ... بخبر عليج خليفه وسلطان .. عشان ما يردونج العين
روضه: بعدين لو تبين أنا وريلي بني نقعد عندج
حصه: وأنا بعد .. ولا أقول بني عندج بليا رياييلنا إذا مريامي بتي ويانا
مريم: أفااااااا وكل هالكشخه والتعديل ... ورياييلكم ما يشفونكم .. خسارة البيزات عيل
أم ظاعن : هاهاهاها ما تيوزن عن سوالفكن انتن بعدكن ما كبرتن
روضه: عموه نحن نكبر وحبنا يكبر معانا
مها: صح فيلم هندي هوه

الباقي تاتي

**القلب المحتاس** · 08-06-03 ||, 08:42 PM

متى( الباقي تاتي ) <img src="http://oasis.bindubai.com/emoticons/tounge.gif" border="0" valign="absmiddle" alt=':p'>

صيييييييييييييييييو طاااااااااااااااااااخ خخخخخخخخخ

**Just kidDinG**

**بنت المطر** · 11-06-03 ||, 02:44 AM

وين التكملة وين <img src="http://oasis.bindubai.com/emoticons/face83.gif" border="0" valign="absmiddle" alt=':cre:'>

وين التكملة وين <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/face83.gif" border="0" valign="absmiddle" alt=':cre:'>

اين هي .. <img src="http://oasis.bindubai.com/emoticons/man4.gif" border="0" valign="absmiddle" alt=':man:'> <img src="http://oasis.bindubai.com/emoticons/man4.gif" border="0" valign="absmiddle" alt=':man:'> اين

اين هي.. <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/man4.gif" border="0" valign="absmiddle" alt=':man:'> اين

فكينا عاد الله يرحم والديج ذليتينا

والله والله القصة حلوة <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> بس .........

وين التكملة وين <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/face83.gif" border="0" valign="absmiddle" alt=':cre:'> <img src="http://oasis.bindubai.com/emoticons/face83.gif" border="0" valign="absmiddle" alt=':cre:'>