<font color='#728FCE'>.... شوق بوظبي (كاتبة القصة) ............
•°±°•معلومات خاصه عن القصه ...من وراء الكواليس •°±°•
القصه خياليه 100% من تأليفي..
ما فيه أي شي صار بالواقع ابداً غير الطريقه اللي مات فيها ابوهزاع وهي حادث فعلاً صار في ابو ربيعتي الله يرحمه..
طريقة حمل حصه وولادتها واللي صار معاها ..كله من افكار اختي المعرسه ولا انا اشدراني بهالسوالف...
القصه تنكتب من شهر رمضان..وتميت اكتبها وما خلصتها الا في اربع شهور..
اول مكان انعرضت فيه القصه هو منتدى ولد العين..
انا ما اعرف كيف يخطبون وشو يقولون ولا شو يستوي...بس اشكر اختي المها اللي فهمتني بعض التفاصيل..
كنت مرات عشان اخلص جزء من الاجزاء اسهر لين اليوم الثاني واسير الدوام مواصله..
اغلب اللي قارينها من منتديات ثانيه قروها خلال هالاسبوعين ..
اكتشفت ان في بنات قروا القصه في ليله وحده كامله..
في حياتي ما قريت القصه كامله ورا بعض..بس اقل جزء قريته يمكن فوق 6 مرات...
ما بكيت ولا مره يوم كتبت القصه بس انفجرت مره وحده من خاطري يوم مات بو هزاع كنت يالسه افكر واكتب وانا اصيح واوقف شوي عسب اخذ نفس ...(لوول قاصه على عمري والله)
في رسايل وايده كانن يوصلني من ناس ما اعرف كيف يابوا ايميلي وكلها اعجاب بالقصه..وفي ملايين اضافوني عندهم واستانت عقب ما خلصت القصه ما ادري كيف هالناس تدش ولا حتى تسلم..ولا بعضهم خلاص ما يدشون خير شر..( لوول الله يطول عمر اللي اخترع لهم البلوك والديليت)
مجاملات فضيعه فاقت الخيال وصلتني..اكبرها( ان واحد قال لي يوم من الايام اسمي بيتدون مع نجيب محفوظ..عادي كنت ذاك اليوم افتح الدريشه وانتحر)..
خلال كتابتي للقصه سويت اكثر من مره فورمات للكمبيوتر..بس الحمدلله طلعت سليمه( الله يخلي اللي اخترع ال Floppy)
انا فاشله في الرياضيات وما شاء الله في عباقره من ربعي ما يفوتهم شي...اكتشفوا بلاوي في القصه..الا وهي..ان مره حصه قالت لهزاع اتغيرت علي 360 واكتشتف ان هالنسبه يعني انها ما تغير مول .ولازم اقول 180 درجه..وبعد شي ثاني خليفه قال لميثا انا دوم اقول ميثا عندها 16 اخو نحن ثمانيه وانتي واخوانج اربعه..واكتشفت ان 8+4 يساوي 12 وما ادري كيف قلت في القصه 16..عادي اعذروني ادبي اشدراني بالرياضيات..( لوول من يومي فاشله فيها)
بعد شي ثاني في ناس غاويه مشاكل قالوا لي كيف ميثا يوم الملجه وقبل الخطبه تطرش مسجات حق خالد..( اصلاً عبدالله كسر تلفونها) ( لوول سؤال محرج)..
بعد في فضيحه ثانيه..يوم شما قالت لميثا انا اعرف ان بينج وبين خالد مسجات..في وحده غاويه تفشلني ( تبي تعرف غصب طيب كيف عرفت شما)..<<( وانا اشدراني بكل تفاصيل حياتهم)..
اغلب اللي قروا القصه ما عيبتهم الحلقه الاخيره..وقالوا ان كل شي صار فيها بسرعه وان ما فيها حوار صريح ولا اعترافات...وما كانوا يبونها جي...وما كانت بمستوى الحلقات اللي طافن..(انا لروحي اصلا ما كنت ابي هاي تكون النهايه..بس انجبرت عشان قرائي اخليها سعيده..لان الحزينه يكون دايماً لها طعم ثاني)
على فكره القصايد اللي في القصه مب من تأليفي للامانه يعني القصيده الاولى كتبها حميد لشما من تأليف مشعل عبيد بن سيال شاعر سعودي..والقصيده اللي كتبتها شما لحميد..هي من تأليف شاعره خليجيه اسمها ريم الصحراء..وانا حطيت اسم حميد ولا هي كانوا حاطين فيها اسم شوق بدل حميد..
ووحده من القصايد يعني الثانيه اللي كتبها حميد لشما قبل الاخيره يوم كان يائس وودعها..من تأليف واحد اسمه نادر العماني ..واسم القصيده( اسال القلب)..واخر قصيده ما ادري من كاتبها ولا اعرف أي شي عنها غير اني لقيتها في الايميل بالصدفه وغيرت فيها شوي على كيفي..( لوول يا ويلي لو كشفوني)
ما في داعي احكي لكم شو صار معاي في وزارة الاعلام يوم سرت احفظ حقوق القصه باسمي..شو صار..والله بلاوي ..تحريت السالفه سهله..الله يخليكم لحد يسير يحفظ حقوقه..(لوول السالفه فيها سجن)..
أخيرا وليس اخراً لا تعصبون علي..في قصه يديده حالياً قاعده اكتبها..بعنوان" أحبك حُبٍ ما يموت"..بس بعدها مطوله لين ما اخلصها...وان شاء الله تعيبكم ولا تكون بمستوى شما وانا الضعيف..لاني مبتدئه وابي الكل يوقف معاي ويشد على ايدي..
كلمه من الاعماق...للجميع...
( يعلني ما خلى ولا عدم )
*********************</font>
رد مع اقتباس
مواقع النشر (المفضلة)