<font color='#728FCE'>الحلقه الرابعه عشر
في الجامعه ميثا متضايقه لا تتكلم على غير العاده...تنتبه شما ان ميثا غير طبيعيه اليوم...
شما: ميثاني شو فيج متضايجه..؟؟
ميثا: ما ادري والله احس اني مب مرتاحه ما اعرف احس شي مب زين بيصير...
شما: بسم الله الرحمن تعوذي بالله من ابليس...شو فيج؟؟
ميثا: والله ما ادري احس بضيجه...ودي بعد اصيح...
شما: مستحيل تحسين بهالاحساس مني والدرب اكيد في شي مضايجنج...
ميثا: لا والله ما في شي..
شما: افا نحن الاسرار من بينا مرفوعه...تخبين علي...
ميثا: عن الاستهبال من متى اخبي عليج...
شما: قولي ليكون انخطبتي...تريني بذبحج....
ميثا: لا والله يا حسره منو..ابويه وعبدالله اخويه ما خلوا حد ما ردوه..جي احس عمري ما بعرس..ولا حد بيخطبني من كثر ما يردون خلق الله ..شكله ويهي عايبنهم وما يبون يفارجونه...
شما: هههههههههههه والله حالتج حاله..... مستعيله على العرس...
ميثا: لا والله بس انتي فتحتي السالفه..
شما: لا تحاتين العرس وايد..انتي محد بياخذج غير اخويه خالد...
تتغير ملامح ميثا ويبدو الخجل واضحاً عليها...ولا ترد...
شما: عسب جي احذرج لو وافقتي على حد...
ميثا: لا تقولين جي وتعلقين قلبي ...مستحيل يستوي هالشي...
شما: من قالج...؟؟
ميثا: ما ادري بس احساس...
شما: عيل سكتي...
ميثا: تعرفين انا ما خبرتج شي...وما سألتيني ليش ابويه ما يبي ييوزني لحد...
شما: لا والله ما قلتي لي...
ميثا: تعرفين عمي سلطان اللي في العين...
شما: لا ما عرفه..
ميثا: عقب برمسج عنهم..هذيل ما عندهم بنات بس عندهم 8 شباب...اربعه منهم معرسين واربعه بعدهم...
شما: وبعدين...
ميثا: نحن وياهم متقاطعين...يعني جي بين ابويه وعمي زعل ...وما يرمسون بعض...بس ابويه مع هذا يرفض كل اللي يتقدمون لي...ويقول انه جد قرب بخليفه ولد عمي سلطان..ومستحيل يرده...
شما: يعني انتي مخطوبه؟؟؟!!!!
ميثا: لا لا مب مخطوبه بس يعني جي تفهمين من رمسة عمي ان حيرني لولد عمي...اما سالفة خطبه ما خطبه والله ماشي...بس ابويه الله يهديه..
شما: ابوج متمسك بوهم...كيف يربط مصيرج بواحد ...مقطوعه كل سبل التواصل بينكم...يعني هم متضاربين الحين وبينهم زعل...وما يندرى متى يتراضون...ومصيرج متعلق بينهم...اسمحيلي اقولج ان ابوج ما يعرف يفكر...
ميثا: وانا قلت جي بعد بس لنفسي...ابويه يقول مصيرهم يتراضون...وما بياخذج حد غير اللي طلبج وما بفضل حد على ولد عمج...
شما: ما عليج منه مصيره يقتنع ان هاللي يسويه غلط...بس والله عندي فكره شو رايج ارمس امايه تخطبج لاخويه خالد..وبنشوف ردة فعل ابوج..خصوصاً ان ابوج يعرف عمي سالم...يعني شبه قرايب...
ميثا: لا لاء يا شما..الا خالد...مستحيل والله تعرفين هاه اجمل شي بحياتي ...والله ...عسب جي ما ابي حد يقطع اللي بينا...لو ردكم ابويه بكره عمري...وبخسر خالد والله ادري...
شما: سكتي بس اونه بيردنا..ليش حبيبتي اول ما بيلاقي حد احسن عن خالد وبيحشم ابويه...
ميثا: ابويه ما حشم عيال خوالي...كيف انتوا اللي ما تقربون لنا...
شما: انتي سكتي وخلي كل شي علي...بس بعد صبري ما اقدر اسوي شي لين ما نخلص من عرس حمده....
ميثا: والله ما ادري شو اقولج...سوي اللي تشوفينه يا شماني برايج...
شما: يالله عاد فرفشي واضحكي ما في شي يرزا زعل ميثاني في الدنيا..
ميثا: تصدقين وايد متلهفه على عرس حمدووه..ما ادري ليش...
شما: عيل شو تقولين عني انا اللي بتخبل والله...بعدين ونااااااااااسه بتكون والله ...
ميثا: هيه والله بشوف خالد بعد...
شما: هيه والله لو ما تيين يبيفوتج نص عمرج عاد خصوصا خواني وقت اليواله ما عليهم رمسه خصوصا خالد زين منج اذا ما طحتي ...
ميثا: لا تخبلين بي اخاف اموت قبل لا احضر من فرحتي...
وبذلك استطاعت شما انت تغير الجو الكئيب الذي كانت تحس به ميثا...ومن يقدر على ان يفهم ميثا غير شما....
.......................................
في البيت حوالي التاسعه تذهب شما الى غرفة خالد..وتستأذنه بالدخول...
خالد: ما اقدر اصدق شو تنازلتي تدخلين كوخي الصغير...لا لا جان تلحفتي ولا لبستي لج ملابس خاصه..عشان الوقايه من الجراثيم اللي بحجرتيه..
تجلس شما على طرف السرير: تراني رايقه ع الاخر...عسب جي ما برد عليك...المهم شخبارك وعلومك ...
خالد: والله بخير ...اللهم يا كافي ليكون هذا الهدوء اللي قبل العاصفه...شعندج اليوم هاديه على غير العاده...
شما: يعني انا ما اعيبك الا يوم اكون معصبه....
خالد: لا دخيلج خليج جي حلوه...
شما: زين زين ..تعرف انا يايه عندك وبدخل بالموضوع على طول...
خالد: انا عرفت ان السالفه فيها انّ...
شما: امم زين بعد يا فطين...المهم خلادي بغيت اسألك شي...
خالد: هاه شو قولي ...الله يستر...
شما: شو رايك بربيعتي ميثا...
خالد: ....شو فيها...ما فيها شي...
شما: خل الاستغباء وارمس صدج وياي..بذمتك انت الحين من صدج تحبها...
خالد : من قال...
شما: خالد خلك مره وحده جدي ارمس وياي انت من صدج تحبها ولا مثل عوايدك....
خالد : اممم تبين الصراحه .....
شما: يا ليت...
خالد: ماشي خيارات...
شما:صدج انك متفيج وانا ما عندي سالفه...
خالد:حوو بلاج نمزح نحن ..ولا كل شي تبينه ع البراد...
شما: ارمس زين...
خالد: هيه والله احبها....وحتى افكر ارمس هلي عسب اخذها....
شما بفرح: احلف يا خالد....
خالد: والله العظيم....انا هالمره جاد والسالفه ما فيها لف ودوران...
شما: والله هاللي كنت يايه اسألك عنه....الحمد لله ريحتني....
خالد: ليش بشو كنتي تفكرين....
شما: خلاص فديتك والله جي انا ارتحت عيل بخليك الحين....بسير ارقد وراي دوام باجر...
خالد: الحمد لله والشكر...
بعد ان خرجت شما ..ارسل خالد رساله الى ميثا....
خالد( لو عشقتج يا بوظبي مو عشان انج فريده....بس عشان ان فيج اللي هوى قلبي يريده)
ميثا( خذها عهد...لو غبت ..لو رحلت..وابطيت..غلاك لا يمكن...فوادي يمله)...
وبينما يحاول خالد ارسال رساله الى ميثا...يرن هاتفه...
خالد:هلا والله وغلا ومليون مرحب في ذمتيه ولا يسدن...عد ما بيني وبينك وعد ما بين بوظبي والعين ولو انه شويه...
خليفه: هههههههههههههه يا مرحبا بك والله..هاللي انت فالح فيه...الرمسه بس...اما انك تدق ولا تتعب عمرك وتسأل ما فيك فايده والله...
خالد: افا جي انا بزعل....خلاص زعلت..
خليفه: بوظبي جزيره...وحوالينها بحر شكبره اشرب منه لين ما تقول بس...
خالد:هههههههه الله يغربلك...شحالك ...اخبارك ...
خليفه: بخير الله يسلمك...والله تمام اخبارك انت علوم دنياك...شخبار بوظبي وجوها والله تولهنا عليها...
خالد: توب التوب ما عليها رمسه...وانتوا علومكم علوم العين واهلها...
خليفه: والله بخير ولله الحمد...ولو ان الجو شوي حار عندنا تعرف الصيف قرب...
خالد: هيه والله ...الهم اخبارك يالطيب...
خليفه: ما شي اخبار ولله..العلوم من صوبكم...شخبار حبايبك...
خالد: والله بخير ما عليهم رمسه...عذبتني يا خليفه عذاب...
خليفه: دامك تحبها هالكثر...ليش ما تخطبها من اهلها...
خالد: تصدق والله افكر جي...ابي انهي حياة العزوبيه مع اللي اختارها..
خليفه: هيه وعقب بتودرنا...
خالد:افا عليك...من قال ....وانت بعد مب ناوي تعرس...
خليفه: والله شو اقولك ولا اقول...الاهل الله يهديهم...
خالد: شو ما يبونك تعرس...
خليفه: الله يهديك بس منو ما يبي عياله يعرسون....
خالد: عيل شو السالفه....
خليفه: ماشي بعدهم متمسكين بسالفةان بنت العم لولد العم...ولا مايوز ياخذ غير بنت عمه...
خالد: ليش يبون ييوزونك بنت عمك وانت ما تبي...
خليفه: شقول لك بس....تعرف ان ابويه مرمس عمي من يوم عمرها 15 سنه...عسب اخذها...
خالد: خيييييييييبه وشو تتريا...
خليفه: الظروف النحسه...عمي وابويه...مقطوع اللي بينهم من اربع سنين...ونحن معلقين جي...وغامضتني بنت عمي والله....
خالد: ليش انزين ...انت ما تبيها...
خليفه: خطبوها لي بس كلام...وانا ما اعرف شي...المهم عروس...بس الحين كل شي تغير..مسكينه والله مظلومه معاي...تعرف ان كل الشباب اللي بعمرها بعايلتنا واللي اكبر عنها...تقدموا لها..وما طاع عمي يقرب بهم...عسب ان ابويه متكلم فيها قبل وقرب بنا...
خالد: افكار حجريه...والحين انت رمس ابوك وقل له..انك تبي تعرس وانك ما تبي تتريا بنت عمك...وحبال الوصل مقطوعه من بينكم...
خليفه: انا لوعت جبد ابويه من كثر ما رمسه..بس اضرب بحديد بارد..ولا درى عني....وعلىفكره انا والله ما ابيها..ولا هي داشه مزاجي..وانا ما ابي الا بنت خالي وهي تبيني يعني انسانه انا واثق من مشاعرها صوبي...لكن بنيه ياهل بعيده ولا ادري تبيني ما تبيني خاطبينها وعمرها 15 سنه..بعدها ما طلعت من البيضه..ويبوني اخذها هاللي مب داش مزاجي....انا ريال جاد بحياتي...وانسان واقعي...وهي وحيدة اهلها...ودلوعه اكيد وانا ما اتحمل هالنوع من البنات...
خالد:خليفه...لا تقول جي يمكن البنت تغيرت وهي اللي متمسكه فيك..وانت تتحرى ان ابوها اللي ما يبيها تعرس...يمكن هي اللي تترياك...
خليفه: لا يا بوك انا عارف كل شي...
خالد: شو رايك نخلي حد من العرب اللي عندنا هني يصلحون من بين ابوك وعمك...ترى فضيحه يتمون جي..
خليفه: ما بقى حد ما حاول فيهم...لو هو عمك سالم...تدخل من بينهم بس بدون فايده...
خالد: وليش شو دخل عمي سالم من بينهم..؟؟؟
خليفه: ترى عمي حميد جار عمك سالم...يعني الباب بالباب....
خالد: اها ..فهمت...بس تصدق ما عرفه والله...
خليفه: والله ميئوس منهم مستحيل يفهمون....
خالد: عافانا الله ...الشيطان لاعب بروسهم....
خليفه: شنسوي بس...امرنا بيد غيرنا..وهذيل مهما كان اهلنا ما نروم نردهم ولو مب في صالحنا...خلاص يا بوك...
خالد: الله يكون بعونك والله لو بيدي برمس ابويه يرمسهم ..عيب هاللي مستوي على الاقل مب ع سالفة بنت عمك..لو على الاقل يتراضون...مب حلوه جدام العرب...
خليفه: ما في داعي تتعب شيبتك ع الفاضي..ناس ما يفهمون...
خالد: الله يعين..
خليفه: برايك خالد والله بس حبيت اسلم عليك...على الاقل نتطمن بس خذتنا السوالف ورانا دوام باجر...
خالد: مشكور والله واسمحلنا على التقصير...وان شاء الله انا ياي العين جريب...
خليفه: منوره من الحين من سمعت انك بتييها...
خالد: الله يسلمك ويخليك..
خليفه: يالله في وداعة الرحمن...
خالد: الله يحفظك..
........................................
وبعد اسبوع..انتهت نوره من الامتحانات.....البيت في اوج استعداداته لعرس حمده...التصليحات...والتعديلا ت...الاسواق ..هواتف المصممين من دبي التي لا تتوقف..التغييرات في كل شي كل يوم....وفي الصاله...
حصه: يالله حمده تأخرنا...
حمده: يايه خلاص بس بعدل وقايتي...
حصه: بسرعه ما اريد فطيم تشوف اني طالعه..بسرعه ابطينا على هزاع...
نوره: ودوني وياكم...
حمده: نحن مب سايرين نلعب....
حصه: ما بنطول بس بنسير نقايس الفستان ما شي وقت ونحن وايد متاخرين..وبنشوف اذا خلص ولا لاء...
حمده: وبعدين بنييب فساتينكن انتي وشماني بالدرب ونحن رادين...تري دقينا وقالوا خلصوها...
نوره: اوهو والله ملانه شلوني...
حمده: نوره عن الدلع خلي بالج من فطيم ومهاري...
نوره: اففففففففف....
تخرج حمده وحصه....مع هزاع الى دبي....لاحضار الفستان وشراء البقيه الباقيه مما تبقى...من احتياجات حمده......وبعد ساعه من ذهابهم تعود شما للبيت....
شما: حوووو محد هني وين الناس...
نوره: تعالي هني انا في الصاله....
شما: السلام عليكم..
نوره: وعليج السلام...
شما: وين امي...
نوره: اذا ما لقيتي امايه بالبيت ..عرفي انها في ميلس ام سعيد..راعية السوالف...
شما: هههههههههههههه قولي ميلس القرض والحش وانتي الصادجه...
نوره: شفتي حمدووه السخيفه وحصوه راحن دبي ولا خذني...
شما: ادري خبرتني حمده امس انها بتروح...وكنت بسير وياها...بس خالد ما طاع قال ماله داعي...
نوره: اففففففف منه كله يتحكم فينا....
شما: برايج انا سايره اغير ثيابي وارقد...خلي بالج من اليهال...عن تضرب فطيم مهاري...
نوره بتأفف: زين ...على اخر عمري مربيه....
...............................
مرت الايام سريعه...انتهى الدوام في الجامعه...الجميع متفرغون للتسوق والاستعداد...اللحظات حاسمه وقريبه...بقي من الزمن يومان.......
شما بالصاله والبيت خالي لا يوجد به غيرها هي ونوره....وبنات هزاع....تتصل شما بميثا...
شما: هلا والله بالغلا كله هلا بميثااااااااااااااااااني.. .
ميثا: اهلين....اشوفه ما وحى لج تدقين ولا تردين...خلاص جن محد عنده عرس الا انتوا....
شما: والله سوري غناتي ادري اني مقصره...
ميثا: يالله شسوي الله بلاني فيج لازم اتحمل...شحالج...
شما: بخير وعافيه..شحالج انتي...
ميثا: والله تمام..غريبه اليوم ما سرتي السوق..
شما: لا مب سايره..عقب المغرب...الحنّايه...بتيي البيت تحنيني انا ونوره...
ميثا: اها وحمده...؟؟؟
شما: لا حمده سارت ويا حصوه دبي...عسب يخلصن كل شي خاص بحمدووه البديكير والمنيكير...وبيتحنن هناك...
ميثا: ذكرتيني والله بسير الصالون بعد شوي بتحنى....
شما: انتي حاجزه...؟؟
ميثا: لا بس عادي ما بتكون زحمه...
شما: شدراج يا غبيه هذا موسم اعراس....
ميثا: يعني لا اسير....
شما: تعالي ويانا نحن بس ثنتين وبنخلص بسرعه...
ميثا: تقولين جي....؟؟؟
شما: هيه يالله تعالي محد بالبيت غيري انا ونوره...امي سارت ويا ابويه يتشرون ...
ميثا: اوكي بخليج الحين بسير اقول لامايه...اذا بتخليني ولا لاء...
شما: اترياج...
ميثا: مع السلامه..
شما: فمان الله...
أذن المغرب وقامت نوره وشما للصلاه....وبعد نص ساعه وصلت ميثا....سوالف وضحك...الى ان وصلت المحنيه....
شما: ميثاني يالله انتي اول...
ميثا: لا والله انتوا ....شو عرس اختكن انتن اول عقب انا...
نوره: يالله شما انتي اول وعقب ميثاني وانا اخر شي عسب اتم ميوده اليهال....ومن تخلص ميثا بتكون حنة شماني جفت وترومين تمسكين مهاري...
شما: ما شاء الله طلع عند اختيه مخ ...نواري والله اول مره تعرفين تفكرين.....
ميثا: يالله تحني وانتي ساكته....اقول نواري عطيني مهاري...
تحمل ميثا ...مهره وتلاعبها...وتلعب مع فاطمه ايضاً....وبينما هي مشغوله معهن...تصلها رساله على الهاتف....تترك مهره وترى الرساله...
خالد(غلطان اللي يرسل لك رساله...المفروض انه يجي لك عاني...ويضمك حيل لاحضانه...)
تتغير ملامح ميثا...ويتغير لونها...وتلاحظ شما ذلك....
شما: هاه شعندج اشوف ويهج تغير...ليكون تحبين من وراي...
ميثا: هههههههه لا والله...
شما: بلاه ويهج احمر وازرق واخضر....
ميثا: ههههههه والله ماشي....خليج بحالج احسن...
كانت شما تعلم ان ميثا تحب خالد بجنون...لكنها لم تكن تعلم ان هناك بينهم تواصل بالهاتف...
ترسل ميثا رساله اخرى.....
ميثا( خايف اتواضع...يكسرني تعاليك...قلت اتعالى كسر قلبي تواضعك..)...
خالد( شو يالسه تسوين)
ميثا( سؤالك غريب..انا يالسه الاعب مهاري بنت اخوك هزاع)
خالد( شو اللي وصلها بيتكم!!!)
ميثا( انا اللي ف بيتكم...)
خالد(حلفي قولي والله)...
ميثا(والله..ليش شو تبي تسوي...ليكون بس تبي تيي)
خالد(لا والله كيفي بيتنا)
ميثا(حرام عليك والله تحرجني جدام شما)
خالد( ثواني وانا عندكم...)
ميثا( ليش انت وين)
خالد(توني راد من العين...سرت اعزم ربيعي خليفه على عرس اختي)
ميثا(ليش من يكون ان شاء الله تتعنى له لين العين ..يعني ما يكفيه تلفون)
خالد(لا والله ما يكفيه هاه سبيشل والله)
وتقطع شما حديث ميثا وخالد الودي....
شما: يالله يا ميثا دورج..
ميثا: وااااااااااااااو روعه والله.....
شما:يالله عاد الحين كل شي ولا بياض ميثاني والله اروع حنا باحلى ايدين بالدنيا...
نوره: بس بس خلصونا يتغزلن الحبايب فاضيات...
شما: يالله يالغيره....
ميثا: وحليلج نواري تغمضيني مرات...
نوره: بس تحني وانتي ساكته.....
انتهت ميثا وشما ونوره....الساعه تشير الى العاشره مساءً.....ولم يصل احد للبيت حتى خالد....ولا ابو هزاع وام هزاع...
ميثا: يالله انا بسير والله وايد تأخرت...
شما: يلسي الله يخليج والله ملل..نواري رقدت ..وبنات هزاع رقدن بعد...ما شي شغله...
ميثا: بس انا بعد تعبانه....
شما : يلسي الله يخليج...
ميثا: اوووه عاد هاي شما من يروم يقول لا...
شما:فديتج والله....ادري مب عشاني بس عشان خلادي...
ميثا بخجل :صدج متفيجه...
شما: والله يا ميثا ما اعرف أي اخبار عنه...ولا ادري حي ولا ميت....موجود بالبلاد ولا مسافر...
ميثا: منو هذا...؟؟
شما: اخر مره يوم شفته بالبيت...وخلاص ما عرف عنه شي...
وتتنهد شما بعمق...
ميثا: يا بوج طبيه...شتبين به والله انج موهومه وايد...
شما: برايه المهم اشوفه لو من بعيد لو ما درى فيني....
ميثا: يالله يا حميد يا حليلك والله يغضمني ...
شما: ليش....؟
ميثا: بقلبه حب كبير لانسانه عاشقه لغيره...ويالله والله اني حاسه فيه...
شما: مصيره ينسى....
ميثا: يقوله اللي ما يدري بلوعة الحب...
شما: اها يا عاشقه انتي حاله خاصه...
ميثا : الله يعين..
شما تغني: لو جيت اعاتب...ترى ودي و ما ودي...معتاد قلبي ..انا يعاتب...معازيبه....ولا ريد اوضح ..واكشف للملا سدي...بعض الخفايا اذا تتوضح مصيبه..
ميثا: ما فيه حيله ميحد....
شما تكمل الاغنيه:وش تبغي اكثر عطيتك كل ما عندي ...من حب من شوق من اخلاص من طيبه....خليتك تقول يالمزيون من قدي...في قلبي اللي غديت اغلى محابيبه...
ميثا: جلبيتها مرقص....
شما: مستانسه...
ميثا: يالله ابي اروح فيني رقاد...والله...
وفي نفس اللحظه يدخل ابو هزاع وام هزاع...وتسلم ميثا على ام هزاع....بينما ينصرف ابو هزاع...
ميثا: يالله خالوه انا اترخص...
ام هزاع: يلسي ويا شما....
ميثا: لا خالوه وايد ابطيت ع البيت..تلاقين امايه الحين تحاتيني...
ام هزاع: من بيوصلج...
ميثا: الحين بدق للدريول...
ام هزاع: سلمي على اهلج وايد...وهاه لا تنسون لازم تيون العرس...
ميثا: افا عليج خالوه...انا وامايه من اسبوع..نتجهز واخر شي ما تبينا نيي...نحن بنوصل حتى قبلكم....
ام هزاع: فديتج والله غناتي....
تصل ميثا رساله تقطع الحديث.....وقبل ان تفتحها...
ام هزاع: يالله فديتج سلمي على الوالده...انا بسير عنكن فوق...
ميثا: تسملين خالوه واصل السلام...
تقرا ميثا الرساله....
خالد( انا جدام بيتنا...بعدج موجوده)..
لم تستطع ميثا الرد عليه...لوجود شما....غطت وجهها...وبقيت واقفه في فناء البيت تنتظر السائق مع شما..
يدخل خالد...ثم تتنحى ميثا جانباً...متفادية النظر اليه.....
يمر..خالد لكنه لا يستطيع النظر.....وبينه وبين نفسه" الحين هاه وقته يا شما يالسه هني...عافانا الله منج عوفه...مثل العظم بالبلعوم"....
يصل سائق ميثا....وتذهب....
بينما خالد يراقب من الاعلى...وبتأفف شديد من اخته شما...التي حتى من النظر قد حرمته...
" حليله خالد يغمض"...
.....................</font>
رد مع اقتباس
مواقع النشر (المفضلة)