<font color='#728FCE'>الحلقه الثامنه والعشرون
وعقب ليلتين من زيارتهم..في ميلس الرياييل في بيت بو هزاع...كان منصور وحمد وحميد وخالد وهزاع وعمهم سالم موجودين..
وسوالف عن الشغل والعمال والمزرعه...والدنيا والعيد وكل شي..
لين ما دخل الموضوع في الجديه..ورمس ابو منصور..
ابو منصور: يا هزاع الحين الكلمه كلمتك والشور شورك..وانت ريال البيت بعد الوالد الله يرحمه..
هزاع: لبيه يا عمي...انت امر بس..
ابو منصور: والله بغيت ارمسك بسالفة حميد وشما..الولد شاري البنيه ويبي يخطبها بأسرع وقت..
هزاع وهو مرتبك: والله اللي تشوفه يا عمي...
وهني خالد ما قدر يمسك عمره وتدخل بسرعه...مع انه مب معارض لزواج حميد من شما..
خالد: والله يا عمي شما ابويه الله يرحمه رمسها وقالت له اللي تشوفه..بس عن سالفة الخطبه الحين اقول خلنا نشاور البنيه اول..
ابو منصور: بس البنيه مالها شور..وابوك الله يرحمه قبل يتوفى بيومين مرمسني بالتلفون و رحب بنا بأي وقت..
هزاع : ما عليك من رمسة خالد يا عمي ..انا برمس شما اليوم..وبرد لك خبر جريب بإذن الله..
ابو منصور : على خير ان شاء الله..
............................
وفي الليل عقب ما ساروا اهلهم ..كل واحد طلع حجرته..وسار هزاع غرفة شما ويلس وياها...
هزاع: شما عمي سالم اليوم رمسني ..وخطبج لحميد...
شما ارتبكت وما درت شو تقول..
هزاع: ليش ساكته..انا قلت لهم بسأل شما وعقب برد لكم خبر..
شما بتردد: شو تبيني اقول..؟؟
هزاع: والله يا شما انا جي اعطيج فرصه تقررين...
شما: سواء قلت هيه ولا لاء..جي ولا جي بتخلونه ياخذني الحين ولا بعدين..
هزاع: شو افهم من هالرمسه..انج موافقه وما في داعي للتأجيل..
شما: ممكن تعطيني فرصه شوي افكر..
هزاع: على راحتج يا شما..مع اني سمعت ان ابويه رمسج وانج وافقتي..
شما: هيه رمسني وقلت له الشور شورك..بس يا هزاع ما ادري احس بشي غريب..
هزاع: يا شما يا حبيبتي ..حميد والله شارنج بنور عيونه..ومستعد يضحي بكل الدنيا عشانج والله..انا لو مكانه حميد هذا ما بفكر فيج ولا باخذج..وانا احس انج ما تبيني..بس شوفي هو كيف متعلق فيج ولا هامنه شي..
شما: ادري..
هزاع: انا يا شما كنت احب حصوه قبل اخذها وكنت ادري انها تحبني..وتبيني..بس والله ما احس عمري حبيتها كثر ما احس حميد شارنج..ويحبج..
مع انه متأكد مليون بالميه انج ما تبينه ولا تحبينه..
شما تبتسم: والله ما ادري شو اقولك يا هزاع...
هزاع: فكري بالموضوع وعقب ردي علي بس بسرعه ما ابي اعلق عمي اكثر عن جي..
وطلع هزاع من عند شما ..اللي قامت على طول صوب دفتر جديم وطلعت منه ورقه كان حميد عاطنها لحمده عسب تعطيها شما عقب ما توفى ابوها...ومع ان لها وقت طويل بس حمده ما عطتها شما الا يوم العيد..وكانت قصيده طويله وايد..بس كان اكثر شي يعجب شما فيها هو ..
مقطع من القصيده..
يا شيخة الزين كله جيتك لملمي همك***ابعدم هموم قلبك وانحر احزانك..
قصــــايدي بين كـــل الورد بتشمـــك..***شقاوتك..ضحكتك..ر تك وجنانك..
تهون كل الجروح ان يــــــــــات يمك***ويشرف ابواب صدري زلة لسانك...
انا حبيبك..ولد عمك..ابوك..امك***ابخسر الكون كله واكسب احزانك..
يلست شما تفكر مع نفسها..وحست بحب حميد الكبير..ومر طيف خليفه جدامها وحست انها بس يالسه تضحك على عمرها..
وحست كيف ولد عمها شارنها..وبدت شما تحس بإحساس غريب صوب حميد ما اقدر اقول انه حب..بس يمكن استلطفته..ورحمة حاله..ولو انه بين فتره وفتره يشغل بالها..
وخصوصاً كلما قرت هالشعر يكبر حميد بنظرها وتحمد الله ان حد يحبها هالكثر في زمن انعدم فيه الحب...
بس بعدها متردده وما تدري بشو ترد على هزاع..!!!
..................................................
في ليلة الخميس في اخر ويكند قبل المدارس تبدا وتنتهي اجازة العيد..كان خالد بيفجر تلفون خليفه وهو ما يرد عليه ..هني خالد حس ان في شي وطرش مسج يقول فيه..
( ما اعرف شو مستوي بك بس تراني ياي العين اليوم)
وبسرعه قبل يمسح خالد التقرير اتصل به خليفه..
خالد: ما شاء الله ساعه يالس ادق ويوم طرشت لك اني بيي مسرع ما دقيت عشان ما ايي..
خليفه: السلام عليكم..
خالد: وعليكم السلام..
خليفه: شحالك..
خالد:وليش جي ترمس بدون نفس..وجن حد مصفعنك وبتفج حرتك فيني..
خليفه تم ساكت ولا عرف كيف يرد على خالد وحس انه منقهر منه ووده يمسكه ويصفعه لين ما يقول بس..
مب عشان أي شي بس عشان برود خالد ..واللي حارقنه اكثر كيف خالد يقدر يخبي بقلبه كل هالفتره....وقرر خليفه ان يتم ينغز خالد بالرمسه يمكن يحرق دمه ويرمس..
خليفه: متضايج..
خالد: من شو لا تقول من سالفة بيت عمك ..جبدي لاعت والله..
ابتسم خليفه وتم يمثل على خالد الضيجه: هيه والله..طفروني..خلاص انا كنت هالفتره محطم عسب جي ما دقيت لك..
خالد مرتبك: ليش شو استوى..
الحين خليفه بدا يحس بأي شعور يخبيه خالد لانه صار فاهم السالفه...
خليفه: اففف ابويه جابرني ..وخلاص قرروا كل شي جريب بإذن الله..
خالد بصوت شوي مرتفع: شو اللي جريب..؟؟
خليفه: ليش معصب..
خالد استحى وما درى شو يقول: لا عادي والله ..
خليفه: بملج عليها الاسبوع الياي..والعرس في شهر 7..
سكت خالد..وخليفه تم مبتسم..وهو يقول في خاطره..
" طول هالوقت وانت مخبي بخاطرك واونك قوي...خلك قوي وبشوف شو اخرتها معاك"
خليفه تم ينغز خالد بالرمسه..لين ما بند خالد من عنده وهو محترق..ويلعن اليوم اللي حب فيه ميثا..
............................
ميثا كانت عايشه في جو ما تنحسد عليه ..من الخوف والرعب..وما قدرت تظهر من حجرتها ولا تشوف أي حد وما كانت تبطل الباب الا لاخوها ناصر..اقرب انسان لها بالدنيا واكثر واحد فاهمنها...وفي عصر يوم الجمعه وباجر المدارس..دخل ناصر على ميثا ولقاها يالسه ترتب فايلاتها...
ناصر: شحالج ميثوه..
ميثا مبتسمه: بخير الله يسلمك...
ناصر: هاه ان شاء الله النفسيه مرتاحه..
نزلت ميثا راسها وما عرفت شو تقول..ورفع ناصر راسها بإيده وتم يكلمها ويسولف وياها وكان من كل هذا يبي يوصل لشي ..
ناصر: بعد كل هذا ابي اقولج..شي وودي تكونين صريحه وياي..
ميثا : زين..
ناصر: ممكن افهم سالفتج ويا خليفه من اولها لاخرها..
ميثا: ما شي ..ليش هو شو قالكم..
ناصر: ما شي بس عمي سلطان يا عند ابويه وقال له جدام عبدالله وسعيد واخوان خليفه ان ميثا ما تبي خليفه ومب مرتاحه له وهو بعد ما قدروا يتفاهمون..وبس ..
ميثا: شو قال ابويه..؟؟
ناصر: ما شي بس سكت وقال خير ان شاء الله..بس ما تضايج من عمي ولا تكدر خاطره ابد وعرف ان السالفه قسمه ونصيب..
ميثا: عيل ليش عبدالله سوا جي فيني..
ناصر: تنك ما تعرفينه يعني..بس للحين ما رديتي علي شو سالفتج ويا خليفه..؟؟!!!
ميثا: كل اللي قاله خليفه صح ميه بالميه..ولا قال كلمه وحده جذب..
ناصر: زين زين..تحريتج قلتي له شي ما شيات..
ميثا: مثل شو..؟؟!!!
ناصر وقد نهض من مكانه...: لا ماشي...
وقبل ان يخرج من غرفتها ..
ميثا: ناصر ..
ناصر: لبيه..
ميثا: انت بتوديني الجامعه باجر..
ناصر: من عيوني ..ليش جي زايغه مستحيل اخلي هالغبي يوصلج..
ابتسمت ميثا ..
ميثا: فديت روحك يا ناصر ويعلني ما خلى..
.......................................
خالد تم يدق على ميثا ويطرش مسجات ولكن بدون فايده خصوصاً عقب ما عرف من شما ان البنت انقطعت اخبارها..وهني قلبه وقف من الزيغه عليها..وتم يحاتي ويحاتي بدون فايده...وقال بخاطره ما شي امل الا باجر وبشوف شماني شو تييب لنا من اخبار من الجامعه...
وشوي وهو يرمس عمره الا تلفونه يدق...
" غريبه هاه رقم حميد الخبل شيبي هذا بعد"..
خالد: هلا والله...
حميد: يا حيه المهلي ..
خالد: علومك حميدوه..
حميد: علوم خير ..انت وين..؟؟
خالد: امم انا فوق جبل حفيت..
حميد: خيبه تخيب العدو..وانا اقول انك هني ببوظبي..
خالد: لا اقص عليك والله انا هني في بوظبي شرا الخبل ادور في الشوارع ما ادري وين اسير..انت وين وانا بييك..
حميد: لا تييني ولاشي الحين بسير اصلي المغرب عقب بسوي لك تلفون..
خالد: وين الاقيك..؟؟
حميد: امم ما ادري والله..شو رايك على شاطي القرم..
خالد: اوكيك..اشوفك هناك عقب الصلاه..
وسار حميد يصلي ..وخالد نفس الشي...وكان حميد اقرب للمكان اللي قال لخالد عنه..واول ما خلص الصلاه سار ويلس هناك يتريا خالد لين ما وصل..وسلم عليه وتموا يسولفون..وضحك ولو ان حميد كان شوي متكدر..وحس خالد من شكله هالشي..
خالد: بلاك جي !!! ويهك مب عايبني شفيك ليش متضيج..
حميد ما يدري من وين يبدا: ما اعرف شو اقولك..
خالد كان يرمس وهو يمزح يبي يطلع حميد من جو الضيجه اللي كان فيها: ارمس وما عليك انا راعيها يا حميد..نسيت اني خالد شيخ مزايين بوظبي..واي وحده مب طايعه لك انا اييب لك راسها..
حميد: والله انك متفيج.. مالت عليك انت وكل البنات الا اللي في بالي..
خالد: ههههه العوق فيها ...هذي هي اللي في بالك شو سوت بك..
حميد: ما تباني يا خالد ما تباني..وش اسوي بحياتي ودي انسى واهاجر من البلاد وارد والاقيها معرسه وعندها درزن عيال..عسب افقد الامل ولا اتم جي معلق..
خالد يستهبل : افا منو هاي اللي ما تستحي..خبرني وعطني رقمها بأدبها لك..
حميد: ادب نفسك اول وخل عنك هالسوالف البايخه ادري انك فاهمني عدل..شو اسوي بك..
خالد: اوكي شو تبيني اسوي لك يا حميد..هاي احاسيس ومب قادر اقنع شما فيها وانت عارف هالشي..واذا كنت يايبني هني عسب هالسالفه ما عندك سالفه..شو تبيني اسوي اسير عند شما واقول لها حبيه غصب طيب..
هني حميد ما قدر يتحمل وقام وشكر خالد على اسلوبه الحلو..وتم يقول في نفسه.."انا الحين ياي عنده ابي اخفف على نفسي واسمع كم كلمه طيبه وما دريت اني جي بسمع هالرمسه..الله يسامحك يا خالد تحريتك بتحس فيني.."
....................................
اول ما رد خالد البيت لقى الكل في حجرهم..ومر وسلم على امه وطلع فوق..وعقب ما بدل ثيابه سار حجرة شما ولقى نوره راقده وشما تقلب في اوراقها وتتسمع لها اغاني في اللابتوب..وناداها من بعيد عسب ما يزعجون نوره..وقامت له شما وظهرت برا الحجره..
خالد بهمس: تعالي حجرتي عقب ما تخلصين..
شما: بيي الحين خلصت خلاص..
خالد: سيري بندي اللابتوب..
شما: شعليك انت يالله تعال وين تبينا نسير..
خالد: اممم شو رايج نسير المارينا كافيه ..ولا اقول هافانا كافيه احسن..
شما: الله فكره حلوه..
كان خالد يتمصخر على سؤال شما " وين بنروح" وهي بعد تمت تستهبل..
خالد: يعني وين بنروح اكيد حجرتي ..يعني انا ما ظهرتج الصبح بطلعج الحين انصاص الليالي..
وساروا حجرة خالد..وتموا يسولفون وطروا ميثا..وكيف خالد يالس يحاتيها..
شما: وليش اللقافه انت ليش حاشر عمرك البنيه بتعرس..
خالد: انتي جب ولا كلمه..من قالج بتعرس..اصلاً خليفه ما يبيها..
شما: وانت شدراك...
خالد: هو قالي..الا على طاري خليفه نسيت اقولج شي ..اليوم كنت ويا حميد..
ابتسمت شما: والله انك.......الحين شدخل حميد بخليفه ..؟؟
خالد: هاه شو هالابتسامه ليكون وانا ما ادري.........!!!
شما: شو كنت تسوي ويا حميد..
وخبرها خالد السالفه كلها...بس تفاجأ من ردة فعلها وانصدم..يوم شافها حرجت واتوحشت عليه..
شما: انت بأي حق ترمسه جي...تتحرى الريال ما عنده مشاعر واحاسيس..ولا ما فيه قلب..ولا تتحرى بس انت اللي تعرف تحب..ليش جي تعامله ..وتشوه صورتي بعينه..وتخليني اكون جدامه انسانه بدون احساس..ليش يا خالد ...؟؟!!!
خالد مب قادر يرمس من الصدمه ولا عرف شو يرد عليها ..وتم يطالعها...وهي منفعله وما سكتت ابداً..
شما: والله صرت تألف من عندك..انت ما تخاف ربك..الحين الريال بيتم سهران طول الليل يفكر..وقلبه محروق ..والله يا خالد اول مره تكون بليا احساس..
خالد وهو مصدوم: حوووو خبله ..شو ياج..تعالي عطيني كف بتأكد انا صاحي ولا نايم..يمكن انا احلم وانا ما ادري...سبحان مغير الاحوال..شو ياج..!! تري عادي اقوم ابطل الدريشه واعق عمري من فوق...شمووه الخبله من متى قمتي تحسين بحميد..الريال استوى له اكثر من ثمان سنين متخبل من يوم عمرج 12 سنه ..وعمرج ما سألتي ..وبين ليله وضحاها تتغيرين ..لا اكيد السالفه فيها إن..
شما و خدودها مورده..ومب قادره تركب جمله وحده: يا غبي السالفه مب سالفة حب ولااي شي ثاني ..بس حرام مهما كان انت جرحته وحطمت قلبه..
خالد يتمصخر: ااااخ يا قلبي...
شما: والله انك سخيف..شو هالحركات والله زعلتني منك...
وطلعت شما من عند خالد بس ما كانت زعلانه ..لكن حال حميد حاز بخاطرها...وتركت الف علامة استفهام في راس خالد اللي تم طول الليل يفكر شو سالفتها...
................................
اول يوم دوام بعد العيد...شما يالسه في الميلس بالجامعه تتريا ميثا لين ما توصل..وعقب ساعه بيبدا كلاسها هي وميثا..وشوي الا والحبيبه شرفت..
وسلمت على ميثا..
شما: انتي وين عنبو دارج اسبوع كامل ما رمستج..
ميثا مبتسمه: أي اسبوع الا هم ثلاثة ايام..
شما: لا والله وهاه شويه..
ميثا: قدرتي تصبرين عني اكثر من ثمان شهور..والحين تستكثرين علي ثلاثة ايام..
شما عورها قلبها يوم سمعت رمسة ميثا ..وحست انها تنغزها بالكلام وتلومها ما عرفت ليش فتحت هالسيره مره ثانيه..
شما: شو دخل هالرمسه الحين..
ميثا: سوري والله مب عارفه شو اقول اعذريني مب مركزه والله..
شما: شوفيج عسى ما شر...
ميثا: تعالي بنسير مكان فاضي..
شما: يالله بنسير Z-Auditorium ..فاضي ومحد فيه.. (Z-Auditorium./ يعني مسرح الجامعه)
ميثا: اوكي يالله..
وسارن هناك..ويسلت شما وميثا يسولفن..لين ما تخبرتها شما شو سالفتها وليش قطعت يومين وليش ويهها متكدر..طبعاً ميثا مستحيل تخبي على شما..وخبرتها كل شي من يوم رمسة خليفه قبل العيد ويوم زارها لين ما وصلت عند عبدالله يوم ضربها ..
هاللحظه بس شما ما كانت ويا ميثا وحست كبر الحب اللي تحبه ميثا لخالد..وكيف تضحي وتتحمل..في وقت وزمن الناس كلها فيه تقول نفسي نفسي..
وتمت شما مبتسمه وعقب قالت لها..
شما: تأكدي يا ميثا دام الحب بقلبج وصل لهالدرجه عمر خالد ما بيفرط فيه..ولو شو ما صار انا يا ميثا اللي مستحيل افرط فيج ..ومستحيل في انسانه في هالكون كله تستاهل خالد اخويه غيرج..
ميثا: شما انا خبرت خليفه بكل شي وقلت له ان خالد يبيني...
شما : وشو كانت ردة فعله..
ميثا: اكيد انصدم..
وتمت شما تخفف على ميثا وتوعدها ان كل شي مستحيل يضيع وان حبها لازم يوم من الايام يتم بطريقه ترضي كل الاطراف..ولو ما وفق الله بينهم..بس بيتخلد كل اللي بينهم..وطلعن يتريقن بعدما طيبت شما خاطر ميثا...
.........................................
الحلقه التاسعه والعشرون
ردت شما من الجامعه وطبعاً يابت وياها اخبار ميثا لخالد..احتارت تخبره كل شي ولا تقول له نص الرمسه..وما تدري شو بتكون ردة فعل خالد..واستغربت من اصرارها بالجامعه انها تقوله..ويوم ردت البيت ترددت...وقالت بينها وبين نفسها "بسوي حد لكل هالتردد ..حمدوه فديت روحها محد بيسمعني غيرها"...واتصلت بحمده..
شما: وهاي هي كل السالفه يا حمده شو رايج..
حمده: والله هالبنت بصراحه ما ادري شو اقولج..ترى هالتنك خلووود ما يستاهل اللي سوته..
شما: ليش ان شاء الله دامها تحبه عادي بنظرها أي شي تسويه عشانه..
حمده: بس حرام والله بيموتها اخوها..
شما: بس بتصبر لانها تحبه..
حمده: وييه فديت حمد ريلي..
شما: شو دخل حمد الحين..
حمده: لا ما شي بس تذكرته..
شما: متفيجه...!!! المهم ما قلتي لي شو اسوي..
حمده: اكيد قولي لخالد كل شي ..خليه يعرف هالبنت من أي معدن..
شما: والله ذهب غالي يا حمده..
حمده: هيه والله صدقتي..
شما: يالله بخليج بسير اصلي المغرب وبرقد توني راده من الجامعه..
حمده: سلمي عليهم ..في وداعة الرحمن..
شما: ربي يحفظج...حمدوووه..
حمده: لبيه..
شما: سلمي لي على حميد..
ضحكت حمده..وعرفت اللي بخاطر شما..ودرت ان هاليوم ..بيي بيي..وان شما مصيرها تحس فيه لو شو ما صار..
.................................................. .
ما قالت شما لخالد أي شي..وخلت الايام تمر على راحتها..وكل ما نشدها خالد عن ميثا..ترد عليه بجمله تحرق قلبه..
" تتجهز للعرس"
المهم هناك في مكان بعيد ..عن شما وميثا وخالد وحصه وهزاع وحمده..كان في انسان عايش بهمومه محدٍ درى عنه..ما يدري شو يسوي بحياته..
وكل يوم تطيح براسه فكره..ولكن بدون فايده..لانه لروحه وكل ما حاول يبتسم ولا يضحك..يكتشف ان حبيبة قلبه ما تدري عنه ..او نقول داريه عنه بس مب هامنها..
يحاول قد ما يقدر ينساها...بس كيف ينساها وهي اللي علمته الحب..وعلى شعورها وحبها اللي ربى بقلبه من يوم هم صغار..لين ما كبرت غناته وصارت من اجمل جميلات الدنيا..وصار من عشقه لها يألف القصايد..وكانت هاي هي اخر قصيده كتبها حميد لشما..عقب قرر انه ينسى كل شي..وقرر انه يعطي حمده هالورقه ويقول لها تعطيها شما..ويعتذر منها على كل شي ..مع انه ما جد اذاها بحياته..بس حس انه ضغط عليها وايد بحبه وحسسها انها بتصير ملكه..وحرمها من التفكير بأي شي ثاني..غير انها تتخلص منه..لانه في نظره انه كان كابوس بحياتها..وهو مستحيل يضيج بخاطر غناته..وهني حميد يبي يضحي..بكل شي حتى راحته على حساب ان حبيبة قلبه ترتاح وتعيش حياتها بحريه..
وكتب اخر قصيده..تقطع القلب واللي ما عنده احساس بيحس فيها...
وحيد مدري من اللي عاد يفقدني!!!***ان رحت للناس ولا طولت بغيابي..
وعن دمعة القلب تكفى لا تنشدني***بأسبابك الحب..والحرمان بأسبابي..
اهديت لك روحي..وانت بالفراق تهددني***ما تدري اني رميت القلب لاحبابي..
هذا انت ناوي على المجهول تفردني***ياللي ذخرتك لغدر اعداي واصحابي..
ان كنت حتى انت في لاماك تحسدني***وشلون ذاك العذول اللي توصى بي..
وعطى الورقه لحمده..اللي وصلتها لشما..طبعاً شما انصدمت من يأس حميد وتضيج خاطرها وما عرفت شو تسوي عسب تريح قلبه..وما ياها النوم ذيج الليله..وتمت تفكر فيه طول الوقت...وحست شو يعني العذاب بالحب..
" انا جربت القهر والعذاب وبعد الحبيب..ليش اضيج بولد عمي وليش اكدر خاطره..ليش احرمه من شي هو يحبه..خلاص انا انتهى حلمي وصار خيال..ليش اموّت حب حميد ليش...؟؟؟ "
وقامت ومسكت ورقه وقلم تبي تكتب قصيده..تتحرى كل من حس بالحب قدر يألف قصيده..وشافت ان السالفه صعبه وايد..ومسكت اقرب مجله وتمت تدور وتتنقى بيت شعر تطيب فيه خاطر حميد..بس ما لقت ابداً وتمت تدور لين ما حصلت اللي تبي...
..............................................
في بيت ميثا الكل يالسين يتعشون..الا ميثا..وعقب ما خلصوا كانت يالسه بحجرتها ودق الباب ..
ميثا: دش يا ناصر..
ودخل الحجره وصك الباب واول ما لفت شافت عبدالله ..صح انها خافت بس بنفس الوقت حاولت تسوي عمرها قويه..وطالعته بنظرة حقد..
ميثا: اطلع برا ..خير شو تبي ..!! بقى شي ما سويته..ليكون بس ياييب لي هالمره سكين وتبي تذبحني نفس ما قلت حق ناصر..
عبدالله وهو مبتسم: افا يا ميثا ما توقعت هالرمسه منج..
وقرب منها وطلعت فوق الشبريه ..عسب ما تبيه يقرب منها..
ميثا: لا تحاول تمثل علي دور الطيب اللي يقتل القتيل ويمشي في جنازته..فكني من ويهك عندي امتحانات الميدتيرم ومب ناقصه عوار راس بصراحه ابي انجح...
عبدالله: هاللي تشوفينه..يعني ما بتسمعيني..
ميثا بعصبيه: لاء واطلع برا انا مب اختك ولا انته اخويه..وما بينا غير اللي مكتوب في الاوراق جدام الناس..مب انا سودة ويهك وسمعتك بين العرب خلاص خلنا جي احسن لا تعرفني ولا اعرفك..
وطلع عبدالله من الحجره وحمدت ميثا ربها انه ما سوا شي ..لانها من عقب المجزره اللي استوت في العيد صارت تخاف حتى من ابوها..
ظهر عبدالله من البيت..وتم يفكر في رمسة ميثا..ويقول بخاطره..
" ليش انا سويت جي..الحين ما تنفع كلمة ليش ولا ترد اللي صار..بس ما عليه اعرفها ميثا طيبه ومصيرها تنسى اللي صار..بس والله جرحتني رمستها اللي قبل شوي..من متى ميثا ترمس جي..والله ان العنف ما يولد غير التمرد..خسارة التعليم اللي تعلمته والاربع سنين اللي درستنه برا..صدج انها بدون فايده فيني.."
...............................................
في صالة بيت بو منصور( سالم) حمده يالسه تقلب القنوات وشوي ويدق التلفون ..
حمده: هلا حميد..
حميد: حمده الله يخليج خلي حد من البشاكير تبطل لي الباب لي ساعه متنقع بالشمس..
حمده: ههههه شمس الساعه 6 المغرب ..الله يهديك يا حميد..
وسارت حمده وزقرت البشكاره..كانت حمده من خاطرها تحب حميد..ودوم توصي شما عليه..ولو انها تدري انه من سابع المستحيلات ان شما تحبه..بس كانت توصيها على الاقل تروف بحاله..لانها كانت حاسه كيف حميد مستعد يبيع الكون ويكسب رضى شما..
دش حميد الصاله ..
حميد: حمده وين العرب وين البيت خالي..
حمده: البنات سارن ويا الدريول عند ربيعة روضه ..وعمووه في بيت خالتي نوره..
وقام حميد يبي يسير صوب المطبخ..
حمده: حميد وين ساير تعال ابغيك بسالفة مهمه..
حميد: مب متفيج بسير ارقد راسي روحه بينفجر من عمج ومزرعته خبل بي جن محد زرع الا هو..
حمده: ههههههه بس والله مهم اللي بقوله..شي يخصك..
حميد: بعدين بعدين..يوم انش..
حمده رمست حميد وهي تنغزه عسب يسمعها وتدري انه بيتخبل لو درى شو بتقول له..
حمده: اوكي خلاص برايك بس ظهر التلفون من حجرتك بدق لاهليه عسب اقول لشما انك اجلت الرمسه لين ما تنش..
ورد حميد ووقف جدام حمده مثل الياهل..وجسمه يتصبب مب رايم ييود عمره ..جنه اسم شما يوم انطرى برد قلبه ..وحرق حاله بنفس الوقت..
حميد: اقول حمده ما فيه رقاد قولي اللي عندج..ما تهونين عليه غمضتيني..
حمده تضحك: اااخ منك غمضتك ..؟؟ ولا عشان بعض الناس بس..
حميد: دخيل اهلج ودخيل حمد لو تحبينه قولي ما فيه صبر شو صار..
حمده: ما شي مهم بس رمستها امس بالتلفون وقالت لي سلمي على حميد..
حميد وهو شاق الحلج: قالت سلمي على حميد...؟؟
ويلس حميد عند حمده وتم يستعبط..
حميد: زين قولي شو اللي ياب طاريي عندكن..زين كيف كيف قالت سلمي على حميد..وبعد من اللي بدت ترمس عني قبل يالله قولي..زين يوم قالت سلمي على حميد كيف حسيتي من صوتها..تتمصخر ولا من صدق..واقول هي يوم كا....
قاطعته حمده..
حمده: حووووووووو تحقيق هو...قلنا لك سلمت يعني كيف بيكون السلام ..قالت سلمي على حميد شرات كل الناس..
حميد: من قالج شرات كل الناس والله طار الرقاد من عيني ..قولي لي بعد شو سولفتوا..؟؟
تضحك حمده: عن الخبال يالله سير من عندي ابي اشوف الفيلم على راحتيه..
وقام حميد وهو الود وده يكسر الطوفه..ولا بخاطره يطلع الفريج ويصارخ بأعلى صوته " والله احبها"...وقبل لا يظهر من الصاله..
حمده بإستهبال: حميد نسيت شي عندي لك امانه..
حميد: خير شو تبين ويا ويهج بعد..
حمده: عيل والله لخليك تصطلب يا حميد ما شي سير يالله..
حميد: برايج..
حمده: والله انه من عند شماني..
حميد يرد بسرعه: والله اني مب قاصد يالله حمده عن الخبال شو والله تقولين..
حمده: ما ريد اجلب ويهك..
حميد: وغلاة حمد خويه تقولين...
ابتسمت حمده ومدت ايدها وعطت حميد ورقه كان بيقطعها من اللهفه ومب عارف كيف يفتحها من الخبال..وظهر حوي البيت صوب سيارته ويلس فيها...وخلى باب الصاله مفتوح..وحمده تمت يالسه تطالع الفيلم ..
فتح حميد الرساله وكانت مكتوبه على ورقة دفتر عاديه..بخط ايد عادي مب حلو ولا بشع..فيها قصيده مكتوب..عليها من فوق..
" انا بحياتي كلها ما فكرت اكتب شعر ..ولا اظني بقدر وانا تحريته شي سهل..على العموم ولو انه مب شعري بس اتمنى يكون شي من اللي بقوله وصل لك"
القصيده..
اللي مضى تسواه واللي بعد جاي..
مهما حصل يا حميد ما ياخذونك..
غالي وعديتك عن الكل مشكاي..
والله ما يقف من الناس دونك..
ربي شبكني بك ودنياك دنياي..
حبيبتك في حبها ما تخونك..
امشي على شانك ولو طال ممشاي..
وكل المشاعر والعواطف يبونك..
هاي الابيات انا تنقيتها عشانك ..مب انا اللي كتبتها بس ياليت توصل لك شي ..وسوري لاني غيرت شوي فيها ترى انا اللي حطيت اسم حميد...المهم برايك الحين ويا ليت تعيبك القصيده ياليت.."
وكتبت في اخر الرساله اسمها..
"شمــــــــا"
حميد تصلب مكانه وجنه حد راشنه بإسبريه..ومب رايم يتحرك..وشوي والعقل ما رام يثبت اكثر عن جي...ومسك الرساله وحضنها بقلبه وتم يحبها ..وهو يقول..
" افديت هالورقه افديتها والله هاي يايه من عند شما..يكفي انها يوم من الايام كانت بين ايديها...يا ربي شو اسوي بعمري والله بتخبل ..عادي اسير ادعم لي بعمود واموت"
وشغل المسجل بالسياره وعلى عالصوت لاخر شي..وحط اغنية حمد العامري...وحوي بيتهم بتتفلع الطوف فيها من الصوت...وحمد العامري يغني بطول صوته اغنية..
" لا ما نسيتك"..
وحميد تخبل ونزل يرزف في الحوش لروحه وهو وده يطير من الفرحه..والبشاكير سارن يربعن كل وحده تنادي الثانيه ..وزقرن حمده اللي طلعت من باب الصاله وتمت تضحك على حميد...
حمده: اللهم سكنهم مساكنهم ليكون شي ياسك يا حميد الخبل...العقل نعمه والله..
وحميد مسوي اكبر طاف..وتم يرزف وطلع فوق النيسان ( مب سيارته بس سياره يسيرون فيها العزبه)..وتم يرزف فوقها وكلما خلصت الاغنيه تم يعيدها والبشاكير مب شايفات خير ناقعات ضحك على باب الصاله...لين ما يت امه مسرعه من برا...
ام منصور: حميد والصمخ فضحتنا بين العرب يا مسود الويه قصر على الرادووو...
واكبر طاااااااااف والله...ولا وقام الحبيب ييبس...وحمده تضحك من خاطرها..ودخلت امه عندها وتمت تتخبرها شو هالخبال اللي ياه..بس حمده قالت انها ما تدري..والحبيب بعده يرزف..ودخل حمد وشافه ..وطلعن زيرانه وقام ويا اخوه مع انه ما يدري شسالفه...
وام منصور: يا حمد يا حميد سود الله ويووهكم قصروا على الرااادو فضحتونا ...يمدحونه العقل يا حمد ...
وخلصت الاغنيه وركب حميد سيارته ويعطيه ذاك الريس اللي حرق الارض..وروح محد يدري وين سار يكمل خباله..
" هذا وبس يته من شما رساله..الله يعينها لو ملج عليها ولا عرس بها..عادي يشترك في فرقة فنون الامارات ويتم يرزف ليل نهار...!!!
حليله صبر وايد وتم يتريا سبع سنين من بيصبر كل هالفتره.."
......................................
شما يالسه بالحديقه اللي فبيتهم...وشوي الا ويدخل خالد ومعاه هزاع..ويسلمون عليها وعقب يدش هزاع ويتم خالد..
خالد: شو استوى ما قلتي لي...
شما: سالفة طويله خلاف اخبرك..
خالد: متى ما فيه صبر يالله قولي..
شما : اووه مب متفيجه خلني يالسه اكمل رسمتيه شو رايك باللوحه..
خالد: مثل ويهج..رمسي يالله عاد..
شما: مستعد تسمع أي شي وكل شي بدون ما تقاطعني ولا تأذيني وانا ارمس..
خالد: اوكيك ..
وعدلت شما يلستها وحطت اوراقها وبدت لخالد السالفه من الالف للياء..وتمت تخبره بكل التفاصيل وهو ساكت بس يسمع..ويوم خلصت..
شما: وهذي كل السالفه يا ولد اميه وابويه..
خالد ساكت ما قال شي بس حط راسه بين ايديه ونزل للارض..ولا رمس ولا قال شي وقام وشل عمره وركب موتره وهو توه داخل ..حتى شما ما قالت له شي لانها كانت تدري بالحاله اللي كان فيها..ولا حبت تسأله وخلته على هواه لانها تدري انه بيرد وبيقول لها كل شي..
.......................................
خليفه يالس في حوش بيتهم...يتسمع في الاف ام..كانوا حاطين محمد عبده.." الله عليها عوّدت"..وشوي ويرن تلفونه..بس استغرب من الرقم اللي ياه...فتح خط بوظبي ..
44/02 ..ورد عليه خليفه..
خليفه: مرحبا..
ميثا بصوت خفيف: مرحبا يا خليفه انا ميثا..
خليفه: هلا ميثا شحالج..
ميثا: بخير..اسمع يا خليفه انا ارمسك من تلفون بيتنا..بس بقولك شي وببند..
خليفه: هاه عسى ما شر..!!!
ميثا: خطاك الشر يا خليفه..بس بغيت اقولك ترى خالد درى اني خبرتك..ما ادري ليش احس عمري خايفه..
خليفه مبتسم: تطمني ميثاني ..انا اعرف اتفاهم وياه لا تشلين بخاطرج..
ميثا: الله يسلمك يا خليفه هاه عشمي فيك..
وبندت ميثا من عند خليفه...وعلى طول دق خليفه لخالد..بس ما رد عليه..وتم يدق ويدق بدون فايده..جان يطرش له مسج..
" رد علي بسرعه ولا تستهبل موضوع ضروري بغيتك فيه"
خالد كان يشوف التلفون وهو يرن جدامه بس مافيه قوه يرد..حس قلبه يضعف وماله ويه يجابل خليفه ربيعه..
حس بالمستحى وخليفه يدق ..قال بنفسه" اكيد يبي ينشدني عن السالفه والله ما روم ارد عليه ما فيه..ويل حالي شو هالمصيبه اللي حطيت عمري فيها.."
وتم خليفه يدق يدق وبدون فايده...لين ما ييأس وقال..
" اخر مره بدق وبس واذا ما رد والله لسير له لين بوظبي"
ودق وطول يدق ..ولحد رد عليه..وقبل يبند رد عليه خالد...
خليفه: لا والله تو الناس..ماا شفت كم مس كول..
خالد بارتباك: هلا خلووووف شحالك..
خليفه: خلوف بعينك ..تبي تقردني يالحبيب..جاوب ليش ما ترد..هذا وانا قايل سالفه مهمه..لو اني ما رمست شو بتسوي..؟؟
خالد بينه وبين نفسه" هه مبينه من اولها والله"
خالد: لا ما شي بس كنت في الجمعيه ولا نزلت الموبايل من الموتر..
خليفه: عذرك جاهز يا خالد ما تضيع عمرك...الا اقول انت وين ...ابيك بموضوع ضروري..
خالد في نفسه" بدينا..المواضيع المهمه هاي تسبب لي عسر هضم"
خالد: امر تدلل انت بس تأشر شو بغيت مني يا اغلى خليفه بالكون..
خليفه: الله الله يا غازي القصيبي خبلت بي..بس ابيك بموضوع متى اروم اشوفك..
خالد: أي وقت يعجبك..
خليفه شو رايك..باجر ..
خالد: بس باجر الاثنين من اللي منا بسير للثاني ..
خليفه: انا ماخذ اجازه وبنتقابل باجر باي مكان تبيه...
خالد: اوكيك بس حق شو الاجازه.
خليفه يبي يقهر خالد: هههههههه معرس وحياتك ورانا اشغال الدنيا..
خالد وطبعاً صوته متغير: اهاا صدج والله نسيت..على العموم باجر فبيتنا اترياك..
خليفه: على خير ان شاء الله..
....................................
في العصر وخالد يالس يتريا خلفيه في الميلس...دخل هزاع عليه...
هزاع: خالد اليوم وعدي مع عمي عسب سالفة شماني..
خالد: وشو بتقوله..؟؟
هزاع: ما دري بس شما ما ردت للحين..
خالد: سير لها يا هزاع وتفاهم وياها..
هزاع: بشوفها الحين..
ويظهر هزاع ويسير صوب حجرة شما..
هزاع: شما انتي هني...؟؟
ومحد رد عليه..وفتح الباب وشاف شما يالسه تقلب البوم صور فيه صورها من يوم صغيره مع اخوانها وابوها...وحاطه سماعات ويالسه تتسمع اغاني ..
ودخل هزاع ويلس على الارض عدالها..وتم يتفرج وياها على الالبوم..
هزاع: شمووه شو يالسه تسمعين..
وشلت شما السماعه من اذنيها..
شما: امم اسمع ميحد شو رايك تسمع...
وحط هزاع السماعه وسمع اغنيه عورت له قلبه..
(اشوفني يا زين مدرج ع المماتي..ماني مقضي هالشهر خلي محالي..من روح روحي لك اجدم تعزياتي ..اوصي بالسلوى وعلى الله الاتكالي..واغرس على قبري زهور يانعات..واقرا عروحي الفاتحه والتعزيات..ما همني فقدان روحي والحياة..لانسان له موته ترى ع كل حالي..)
ونزل هزاع السماعه..ما حب يرمس بس قال..
هزاع: مااااا فيك حيله يا ميحد..
شما: شوف هالصوره يا هزاع...
هزاع: الله صورتيه حلوه وانا ياهل..
شما: خالد احلى عنك بوايد..
هزاع: افاااا زعلتيني ...
شما: انت كنت درام وتضربنا وايد يوم نحن صغار..
هزاع: اليوم انا ياي اشوف النتايج..شو قررتي...؟؟
شما: قرار شو..!!!
يبتسم هزاع: شماني هب وقته عمي مب ياهل كل يوم وانا اقوله عقب..شو اقوله اليوم يبي مني رد..
شما ما عرفت شو ترد على هزاع..بس ويهها كان احمر..ومرتبكه..ونزلت راسها للارض..
هزاع: اعتبر هالسكوت رضى ولا خجل..ولا اعتبره رفض مع خوف..
شما: شو تشوف يا هزاع..!!
هزاع: انتي يا شما اللي بتعيشين وياه..مب انا... فكرتي بما فيه الكفايه خافي ربج..حميد مب أي ريال..والله كل البنات يتمنن نظره منه..وهو لو تشوفينه يوم يظهر برا..ما يعطي حد ويه..ولا يعرف والله سوالف المغازل..مب شرات حمد وخالد اخوج..هالريال جنه انخلق بس عشان يثبت لج انه مخلص و وفي العمر كله..
شما تتنهد: الشور شورك يا هزاع...
هزاع مبتسم: هاه موافقه...!!
شما وهي مستحيه مووت وبهمس يالله حد يسمعه: هيه...
قام هزاع وحبها على راسها وسار يدق لحميد قبل يرمس عمه..
..........................................</font>
رد مع اقتباس
مواقع النشر (المفضلة)