<font color='#728FCE'>الحلقه الثلاثين الجزء الثاني
مرت الايام وانقضى اول نص شهر في الاجازه..والاوضاع مثل ماهي...وحميد حاشر العالم..محد خطب الا هو..والاجازة شكلها كريهه..وما بيسافرون هالسنه..وخالد اكثر وقته في البيت ما شي طلعات..وهزاع اغلب الوقت في ليوا..يشوف الشغل عقب الوالد الله يرحمه....وفي بيت بوهزاع...في الصاله..
نوره: والله حرام عليكم هاللي تسوونه فينا...ياخي طلعونا والله ملينا..
ام هزاع : وين تبين تطلعين..؟؟
نوره: أي مكان..ابي اروح البحر ولا المول ولا البر ولا الحديقه ولا أي قلعه من قلعات ابليس..
يضحكون..
خالد: لا هني ولا هناك..احلى شي قعدة البيت..شوفيني ريال ويالس في البيت...
ام هزاع: وليش ما تسير ويا ربعك..
خالد:كلهم يرفعون الضغط محد فيهم ينفع..عقب ما عرس خليفه التنك وسافر احس بالملل والله..
شما شي قبضها بس طنشت هالاحساس وغيرت الموضوع: الله يعين على هالملل..
نوره: انتي اسكتي اونه الله يعين خلاص بتفتكين وبتعرسين..وحميد بيطلعج وين ما تبين لو تقولين له ابي اسافر المريخ..
شما: عافانا الله من الحسد..
خالد يضحك: بدت البنيه تخق علينا وبعدها ما عرست الله يعين عقب...
حصه: لا مايحتاي تراهم اجتمعوا الاثنين..حميد وشما..وكلهم نسخه من بعض في الصفات..الله يعين اهلي عليهم..
نوره: ههههههههههه بس مهما كان فيهم من غرور...يتم حميد مالها شبيه بين الرياييل بصراحه والله اتمنى ياخذني حد مثل حميد..
استحت شما..وام هزاع فرحانه ومبتسمه..وهم يتكلمون فجر خالد قنبله محد توقعها...
خالد: امايه ابي اعرس...
فرحت ام هزاع وما قدرت تمسك عمرها...
ام هزاع: الساعه المباركه يمه الله يفرحك..والله تحريت اني بموت ولا بسمع منك هالكلمه..
استانست شما وحصه ونوره..واخيراً خالد طلع من الازمه وقرر يعرس..
خالد: امايه ما سألتيني منوه ابي..؟؟
ام هزاع مبتسمه: منو بعد..اكيد ميثا بنت حميد..
خالد: لا يمه من قال..
هني الكل التزم الصمت ..ونزلت الرمسه على شما مثل الصاعقه ومحد عرف شو يقول..وتضيجت شما منهم ولا تدخلت بس تمت تطالعه بنظرة اسف...
ام هزاع حاولت شوي تكون لطيفه وياه ...
ام هزاع:ع راحتك يمه ..بس ما قلت لي تبي منو ترا ما فيني صبر ..انا ما صدقت قلت لي اخافك تغير رايك عقب...
الكل ينتظر يسمع من هاي اللي يبيها خالد وفضلها على ميثا اللي وقف في وجه الناس كلهم عشانها...
خالد مبتسم بثقه: بصراحه يمه اخاف اهلها يردونا..
ام هزاع: وليش يردونا وين بيحصلون احسن عنك..انت بس ارمس من هي..
خالد: بصراحه يمه انا قررت احقق رغبتج واتزوج..وابيج انتي تسيرين تخطبين لي الشيخه ميثا بنت حميد..
وابتسمت ام هزاع وتغيرت ملامح نوره وشما وحصه..واستانسوا...
شما: صدج انك راعي حركات غبيه يا خالد...
خالد:هههههه حرقت اعصابكم..
نوره: والله انا زغت..
حصه: هاه خالد يعني ما تعرفن حركاته...
وتموا يسولفون ..واكثر واحد ارتاح من السالفه هي شما اللي حاولت قد ما تقدر ما تقول لميثا شي...وتخليها مفاجأه..لكن الحين الدور الياي على من؟؟؟
اكيد على اهل ميثا اللي محد يدري شو بتكون ردة فعل اخوانها وخصوصاً عبدالله...
...........................................
يوم الاربعاء..حميد كان في بيت عمه محمد الله يرحمه..ياي يسلم على شما...واستغربوا الكل من حركة حميد اللي صار له شهرين ونص خاطب شما..ولا عمره زارها واشمعنى اليوم...
خالد: شمووه تعالي حميد يبي يسلم عليج..
شما: ليش ان شاء الله حق شو ياي..
خالد: والله ما ادري تخبريه..
وسارت شما تتلبس وحطت شيلتها على راسها..وهي نازله من فوق...
فاطمه: عمووه شما وين سايره..
شما: بسير عند ريلي..
فاطمه: انتي ما عندج ريل..
شما: بلى عندي..
فاطمه: وليش ما تروحين بيت بروحج عند ريلج ...
شما: ليش يالهرمه يالسه على راسج..؟؟
فاطمه: انا بروح معاج..
شما: تعالي...
وشلت شما فطيم الدبه وياها لين الميلس..ودخلت على حميد وسلمت عليه من بعيد...ويلست...وسارت فاطمه وسلمت علىخالها..وقعدت عنده..
حميد: شحالج يا شما..
شما وهي مستحيه: بخير الله يسلمك..شحالك انت..؟؟؟
حميد: الله يسلمج ان شاء الله والله بخير ولله الحمد..
شما:..........
حميد: اكيد مستغربه ليش ياي...
شما: لا عادي البيت بيتك في أي وقت..
حميد: يالله فطيم سيري عند امج حصوه وقولي لها خالي حميد يسلم عليج ويقولج( اقبضي رسول السلام عندج)...
طبعاً فاطمه ياهل وما تفهم السالفه..وبتسير تقول لامها..وهاه معناته انها تمسكها عندها لانها هي رسول السلام عشان الحبيب ياخذ راحته..
فاطمه: زين ..
وقامت من عنده...وقبل تطلع..
فاطمه: خالي حميد...انت ريل عمتي شما..
ابتسم حميد: من قالج..؟؟
فاطمه: هي قالت لي..تعالي بنسير عند ريلي حميد..
شما هني ودها الارض تنشق وتبلعها او تبلع فطيم الملسونه...وكان خاطرها تقوم تصفعها ولا تسوي أي شي..وانجلب ويهها احمر...وما قدرت ترفع راسها..وطلعت فطيم...
حميد مبتسم ومتشقق ...جنه مسوي دعاية معجون اسنان...
حميد: صدق اللي قالته فطيم..
شما وهي مستحيه: ياهل من ياخذ برمستها..
حميد: بس فطيم بعد تفكيرها صغير ما اظن تييب الرمسه من عندها..
شما بالغصب تتكلم: والله على راحتك لو تبي تصدق ياهل..
حميد مبتسم وميت على الخجل اللي فيها: زين ما علينا.. انا ييت اقولج اني بسافر وحبيت اسلم عليج واشوفج قبل اسير..
انتفضت شما وجنه عقرب لسعتها....وطار المستحى من الصدمه..
شما بصوت عالي شوي: ليش.........؟؟؟!!!!!! ;؟؟؟
استغرب حميد من تصرف شما وما توقع تعطي الموضوع أي اهميه..
حميد مبتسم:بسير لندن عندي شوي شغل بس ما بتأخر اسبوعين بالكثير..
شما بحزن: شو اسبوعين والله وايد..
حميد خلاص شوي ويغمى عليه مب قادر الحبيب...وتم يتحرك في مكانه مثل الملسوع...
حميد: ان شاء الله بحاول ارد بسرعه...
وقام حميد وقامت شما..وقبل يطلع كانت شما ماشيه قبله لين عند باب الميلس..ويوم بتظهر..
شما: حميد انتبه لعمرك..وان شاء الله تروح وترد بالسلامه..
حميد: الله لا يحرمني منج..اكيد بنتبه لعمري ..دامج وياي..
وطلعت شما والدمعه ماليه عينها وسارت حجرتها فوق...
..........................................
اليوم هو الخميس ام هزاع يالسه تتجهز عقب المغرب ..والساعه الحين 7:00 وخالد حاشرنهم...ومستعجل..
خالد: يالله يمه بسرعه الناس بيرقدون وعيب ندخل عليهم اخر الليل..
ام هزاع مستغربه: وين بيرقدون الساعه 7 انت شو فيك اليوم مستعيل..
حصه: معرس الريال لازم يرتبش..
خالد: بس الله يخليج لا تحكمين على شي قبل يستوي..
ام هزاع: عين خير من الله فديتك..
وطلعوا...خالد وهزاع وام هزاع...وساروا بيت ميثا..ويوم وصلوا لقوا ابو سعيد في الميلس..مع ناصر وعبدالله..ودخلوا الرياييل عليهم وام هزاع سارت صوب الحريم..
يلسوا وياهم وتموا يسولفون ..ناصر على طول طلع من الميلس بيسيير ييب القهوه..بس كان حاس ان السالفه تخص ميثا...
ومع السوالف والكلام الحلو واستعادة طاري بو هزاع والذكريات الحلوه والمره...وصل هزاع للي يبي..وفتح السالفه..وذكر لهم انهم سمعوا ان بنتهم مب مخطوبه ومحد محيرها الحين...ابو سعيد ما تردد ولا قال أي شي يوضح الرفض او الموافقه..بس اللي شوي خلى الموضوع يبين انه حاد هو رد عبدالله..اللي ما كان في محله..
عبدالله: انتوا ليش مصرين على اختي ..؟؟
هزاع باستغراب: والله الريال شاريها ..ويبيها تكون حرمته..ما فيها شي...
تم خالد يطالعه بحقد ولا رد عليه ..بس حس خالد ان السالفه هالمره نفس اللي قبلها بس بعذر اسخف من اللي قبل...
وتموا يسولفون واخر شي تكلم بو سعيد..
ابو سعيد: خلاص يا هزاع على خير ان شالله خلاف نرد لكم خبر عقب ما نشاور البنيه..
خالد: على خير ان شاء الله..
هزاع: خلاص انا اتريا اتصال من سعيد ولا ناصر..
وطلعوا من بيت ميثا ..بس خالد كان متضايج وتندم على هاللي سواه..وتمنى انه ما سار..بس ام هزاع تمت تخفف عليه..وتقول له يعين من الله خير..
..................................
مر اسبوع وشما تتسوق وما خلت مكان ما راحت له مع هزاع تتشرى اغراض العرس..مع انه ما تحدد بعد..بس كانت مستانسه على السالفه..وتعرف انها بتستوي في هالاجازه او في اجازة الربيع...بس مع هذا كانت دوم ويا ميثا وما قطعت عنها...وعلى طاري ميثا في يوم من الايام طلع لها عبدالله حجرتها...واستأذن انه يدخل عليها وفتحت له الباب ورمسته بدون نفس..
ميثا: خير في شي..
عبدالله: مب جي الناس ترمس ...ميثا ابيج بموضوع ضروري...
ميثا: بسرعه انا مشغوله بسير بيت ربيعتي..
عبدالله: زين بنيلس شوي عقب انا بوصلج..
ميثا: لا مشكور الدريول موجود..
عبدالله: زين يلسي ابى ارمسج والله شي مهم..
ميثا: يلسنا ..هاه شو الموضوع..
عبدالله: ما عرف من وين ابدا لج بس ما ادري اذا عندج خلفيه عن الموضوع..
ميثا شوي تغيرت : أي موضوع..
عبدالله: الاسبوع اللي طاف ولد محمد يا وخطبج مره ثانيه..
ميثا وتغير شكلها وبدا واضح: زين ويعني..
عبدالله: انا ييت هني مب عشان أي شي بس ابي اسألج انتي تبينه ولا لاء..كلمتين وبإختصار..
ما ردت ميثا وخافت لو قالت هيه يقوم لها ولا يشك في الموضوع..وسكتت..
عبدالله: ردي ..
ميثا: شو اقول..
عبدالله: قولي تبينه ولا لاء..
ميثا: والله الشور شور ابويه مب شوري انا..
عبدالله: يعني عادي عندج اذا رفضنا ولا وافقنا..
ميثا: على راحتكم..
كانت ميثا ترمس من ورا خاطرها وهي محترقه..تبي تقول هيه ولا تبين أي علامة رضى بس مب عارفه كيف..
عبدالله: ميثا الريال عطى ابويه مهله لين اليوم او باجر..فكري عدل وشوفي انتي اذا مرتاحه خبريني عسب اشوف لج الموضوع..
ميثا حست رمسة عبدالله ريحتها شوي بس تمت حذره..
ميثا: انت شو رايك..
عبدالله: ناس والنعم..بس رايج يهمني..
عبدالله كان يرمس مع ميثا بكل طيبه..يمكن كان يحاول يستلطف ميثا عقب اللي صار..ويكسب ودها من اول ويديد..
ميثا : ما ادري عقب برمس ناصر وهو بيخبرك..
عبدالله: ميثا انا حاس انج تبين هالانسان...وما ادري ليش قلبي يقولي انج موافقه..ما عليج خلاص خلي الموضوع علي ولا تحاتين انا اللي بمسك لج السالفه..
حاولت ميثا قد ما تقدر انها ما تبين لعبدالله انها مستانسه...بس غصب عنها ابتسمت...واستحت لين ما تاكد لعبدالله موافقتها...
عبدالله: عيل خلج هني انا بسير لابويه وبقول له انج موافقه شو رايج..الريال يبي رد ابويه اليوم..
ما توقعت ميثا يكون عبدالله اخوها هو اللي بيفتح وياها الموضوع اول شي..وتوقعت ان اول سبب بيعارض زواجها من خالد هو عبدالله اخوها..بس عبدالله يمكن ندم على اللي سوى ويمكن كلامها اخر مره معاه عور له قلبه شوي..المهم في النهايه انه حس..
ميثا: اللي تشوفه يا عبدالله..
وطلع عبدالله من عندها وهي مستانسه وهو بعد..
........................................
هزاع يالس في حجرته ويا حصه..وهي يالسه تلبس فطيم ..يسولفون ودق تلفونه ..
سعيد: مرحبا..
هزاع: هلا والله ومليون مرحب..
سعيد: شحالك يابو حميد..وشو علومكم..
هزاع: الخير فيك ..والعلوم من صوبكم..
سعيد: والله ما شي يديد..بس حبينا نسلم ونبلغك سلام الوالد.ونرد على الموضوع اللي بينا..
هزاع: وصل السلام الله يسلمك..سلم على الوالد وبشرنا ..
سعيد: خلاص تعال ويا الاهل في أي وقت والف مبروك مقدماً ...الوالد قرب بكم..
هزاع: الله يبارك فيكم ان شاء الله وعسى هالعرس يكون بداية رابط دم من بينا..
سعيد: على خير ان شاء الله..
هزاع: موعدنا الخميس الياي...
سعيد: يا حيهم والله..في وداعة الرحمن..
هزاع: ربي يحفظك..
وبند هزاع من عند سعيد وخبر حصه بالسالفه كلها..طبعاً حصه ما صدقت خبر وسارت على طول وخبرت شما..اللي بغت تطير من الفرح...وراحت لتلفون البيت على طول واتصلت بخالد ورد عليها......وخبرته السالفه كلها..طبعاً خالد ما يحتاج كان بيموت من الفرح وما قدر يمسك عمره وحلف الا يسوي لشما اللي تبيه للبشاره اللي بشرته بها....
وقاموا البيت يستعدون للخميس الياي....
........................................
اليوم الاربعاء....حميد رد من لندن...وعرفت شما انه رد ويلست على نار تترياه يزورها بس ما بينت ...بس حميد ما مر عليها ولا زارها..ولا حتى اتصل بحد من اخوانها...ولا حتى فكر يزور اخته حصه ويسلم عليها..طبعاً شما عصبت ولو انها ما تبي حد يعرف بس كلهم حسوا..وحلفت انه لو زارها الحين ما تظهر له..
شما يالسه في غرفتها مع نوره..
شما: والله انه سخيف حتى ما قال لي انه وصل..
نوره: حرام عليج توه واصل شو ما تبينه يرتاح..
شما:زين يتصل يسلم ويرقد ما قلت له يزورني..هو يدري ان انا يالسه احاتيه..
نوره: الله يرحم ايام اول..
شما: اسكتي زين..
نوره: شو بتلبسين باجر..
شما: اللي لبسته في ملجة حمده..
نوره: وانا بعد...بس ما كلمتي ميثا..
شما: لا والله..
نوره: اكيد مب شالتنها الدنيا من الفرحه..
شما: طبعاً..
..........................................
اليوم الخميس وعقب المغرب كل اللي في بيت بو هزاع متلبسين ومخلصين وخالد حاشر الدنيا...
خالد: يالله اخرتونا الناس بيرقدون..
ام هزاع: أي رقاد هاللي الساعه 7 المغرب..
حصه تضحك...
شما: ما تذكرين يوم بيسير يخطب اول مره قال نفس الرمسه..الظاهر اهل ميثا يوم يدرون ان خالد بييهم يرقدون بدري...
نوره: هههههههه الظاهر جي...
وتطلع فاطمه من بينهم...
فاطمه بدلع يالسه تدور بفستانها: شوفوني انا احلى وحده..
نوره تضحك..
شما: امحق حلى...
هزاع: تعالي يا فطامي ياللي منج يغار الروز..
ويضحكون كلهم..
خالد: اوهوووه مب وقت الضحك يالله بسرعه...
هزاع: اثقل شوي ..مستوي لنا اليوم حميد الثاني..
شما: نعم نعم...كأني سمعت حد رمس عن ريلي...
ويضحك خالد..
هزاع يتمصخر: يا غبيه لا تقولين ريلي لين ما يملج عليج..
وكل واحد ركب موتره وساروا صوب بيت ميثا...
................................
في بيت ميثا دخلوا اهل شما ويلسوا في ميلس الحريم..طبعاً شما هاي اول مره تدخل بيت ميثا..وتموا ضحك وسوالف وشوي رقيص...واغاني لين ما حطوا العشا...وعقب ردوا نفس قبل..
شما : ميثا اخيراً
ميثا: سكتي بعدني خايفه..اخاف اكون احلم..
شما: لا يا ميثا والله صدق..
ميثا: فديتج والله...ما تخيل عمري بيي اعيش وياج..
شما تضحك: لا بويه ما بتعيشين وياي ..بتسيرين ويا ريلج..وبكون انا في بيت ريلي..
ميثا: هيه شخبار حميد ..رد من لندن..؟؟
شما: سكتي الله يخليج لا تذكريني فيه..
ميثا: لحقتي تزعلين منه..
وتمن يسولفن ويضحكن لين ما يت البشكاره وقالت لميثا ان ناصر يناديها في الصاله...وطلعت ميثا ..
ناصر: سيري لبسي لج شيله الريال يبي يشوفج..
ميثا: لا لا مب الحين..
ناصر: يالله بلى استهبال بسرعه..الناس تبي تروح..
وطلعت ميثا فوق...
خالد دخل من الميلس صوب غرفه قريبه من الصاله اللي في البيت الداخلي وتم يتريا ميثا وكان هاي اول مره بيشوفها عن قرب..وبيكون وياها لروحه...طبعاً كان مرتبك..وخايف..
ودخل عليه ناصر...ودخلت ميثا وياه..ويلست على الكنبه لاهي بعيده ولا قريبه من خالد...وطلع من عندهم ناصر...
خالد ما قدر يتكلم ولا قال أي شي...بس تم يطالعها وهو وده يموت ولا يتخيل عمره يوم من الايام يخسر هالانسانه...
ميثا كانت ميته من المستحى ولا قدرت ترفع راسها...
خالد: شحالج..
ميثا وهي منزله راسها: الله يسلمك...
خالد: واخيراً...
ميثا ما قدرت تتكلم ولا عرفت شو ترد عليه...بس ودها الوقت يطول...
خالد: والله بعدني مب مصدق هاللي يصير...
ميثا: ولا انا...
خالد:صبرتي وايد..وضحيتي اكثر..
ما قدرت تتكلم ميثا ..بس اللي يقول انها مالكه الكون كله بيكون مقصر في حقها...
ومضت الليله على احلى ما يكون بين احلى حبيبين..اللي صبروا ونالوا اللي يبونه...وتحدد موعد الملجه بيكون الخميس الياي...</font>
رد مع اقتباس
مواقع النشر (المفضلة)