<font color='#728FCE'>الحلقه الثلاثين الجزء الاول
خالد في الميلس يتريا خليفه...ويوم وصل حط له الفواله وقرب القهوه..ويلسوا سوالف وضحك مع ان خالد مرتبك ومبين بويهه كل شي...ووصل الموقف الاشد خطوره.وفتح خليفه السالفه لخالد..اللي وده الموت ياه ولا يعيش لين ما تيي هاللحظه..وتناقشوا بالموضوع بجديه..وكل واحد سمع الثاني للاخير..وخبروا بعض شو الي مستوي..وقال خالد لخليفه كل شي من يوم وصل ميثا لين ما عرف انها خطيبته من امه اللي يت عرس اخته حمده..
وقال خليفه كل شي لخالد من يوم سمع من ميثا ..وتندم وايد واعتذر لخالد على انه ما حس فيه طول هالفتره..بس كل واحد منهم يلس يلوم بعمره لين ما انتهى الموضوع وانهاه خليفه ..
خليفه: خالد يوم انك شاري البنيه ..هي الحين مب محيره لحد سير اخطبها من اهلها..
خالد: شو تقول يا خليفه..والله لو اسير اخطبها الحين ليجتلونها اخوانها..يا حبيبي اللي ما يفهم بيفهم...
خليفه: شسالفتك..!!!
خالد: انا صدق احبها ..بس مب احبها مني والدرب انا افكر قبل اسوي أي شي..واحط مصلحتها قبل مصلحتي..يا خليفه لو سرت اخطبها الحين..بتقول الناس شو السالفه..ولد محمد تقدم لها قبل وردوه لانها محيره لولد عمها..فسخ ولد عمها الخطبه وما مر اسبوع او اسبوعين الا وولد محمد رد وخطبها..لا يا بوك انا ما رضى ترمس عنها الناس..
خليفه ما رمس وتم مبتسم..
خليفه: عشت يا خالد والله ريال والنعم بك..والله لو ان لي اخت ما بدي ريال عليك وراس الغالي بو خليفه..
خالد: واااااااااااااااااااي فديتني..
خليفه: بدينا بالخرشه شو حركات البنيات هاي...
وتموا يسولفون ويضحكون...لين ما روح خليفه عقب صلاة العشا...
................................
هزاع يالس في الموتر..يسمع الاغنيه اللي كانت شما تسمعها لميحد..( يوم افكر) ...وسرحان والافكار تلعب براسه..لين ما ذكر حميد..اتصل به..
هزاع: السلام عليك..
حميد: هلا هزاع وعليك السلام والرحمه..
هزاع: شحالك والعلوم عساك الا بخير..
حميد: والله عايشين ..هاه اخبارك انت واخبار اهل البيت..
هزاع : امم والله تمام..
حميد حس ان هزاع بيقول له شي مب زين وشاف هاه من طريقته بالكلام..
هزاع: بلاك صخيت...
حميد: لا..اا لا ما شي...!!!!
هزاع: حميد بغيت ارمسك عن شما..
حميد بإرتباك: بشر يا هزاع دخيل والديك لا تحرق اعصابي..خلاص ما روم امثل اني عاقل اكثر عن جي ما فيه صبر..عادي قل لي انها قالت لاء بس ارحمني من التفكير..
هزاع: هههههه الله يهديك يا حميد..ليش كل هاه ..ان ما صار نصيب مع هاي الله يوفقك مع غيرها..
حميد: المهم خلصني و ارمس شو قالت لك..
هزاع: انا ما حبيت اقول هالرمسه لعمي..انت سير وقول له والله مالي ويه يا حميد...
انقبض قلب حميد وحس بالموت ..وضاق صدره وحس عمره مب رايم يتنفس...وسكت ولا رد على هزاع بكلمه..ووقف موتره على طرف الشارع..لانه ارتبك...
حميد: ارمس عادي ابي اسمعك...قول اللي بتقوله..
هزاع: والله يا حميد ما بنلاقي شراتك..بس البنيه مادري بلاها صاده عنك..ما تبي..
حميد: على الله صار خير يا هزاع الله يوفقك اليميع..
هزاع: وعسى ان تكرهوا شيئاً وهو خير لكم...
حميد دارت به الدنيا وما قدر يتخيل انه بيعيش اكثر من جي..
هزاع مبتسم وغامضنه الريال ومب عارف كيف يقوله اللي صار..وحس من صوته ان منهار..
حميد: برايك يا هزاع..بخليك الحين بسير اودي لطيفه العياده شوي تبعانه..
هزاع: حميد..بقولك رمسه ووصلها لعمي..
حميد: ان شاء الله..
هزاع: خلاص خبر عمي ان البنيه وافقت وتعالوا في أي وقت...ومبروووك مقدماً يا حميد والله صبرت وايد..
ما رد حميد...بس حس بشعور اكيد صعب على مثلي يشرحه...وتذكرون يوم ياته رساله من شما كيف استوى..عاد اليوم الله يعلم اذا ما تقدم لروتانا عسب ينزل شريط يديد...
شق الحلج ولا رد وتم صاخ..
هزاع يضحك: حميد حوو ليكون بس اتوفيت...
حميد يضحك والدمعه ماليه عينه: الله يخس عدوينك يا هزاع والله قلبي بيوقف من الفرحه..دخيل والديك لا تقول انك تقص علي..
هزاع: والله العظيم انها قالت هيه من خاطرها ولا حد جبرها..
حميد: يالله في وداعة الرحمن ورفجة بو خليفه لسير اذبح قعود الحين...
هزاع: حووو نط عرجك.اثقل يا حميد..اللهم سكنهم وساكنهم..
وبند هزاع من عند حميد..وما في داعي تعرفون شو صار بهزاع اللي تم مستانس ويضحك..وارتاح وين حط مصير اخته ومن الريال اللي يثق فيه...وارتاح وحس لاول مره من يوم مات ابوه انه سوا شي يريح نفسه ويرضي ابوه وامه..
.............................................
((...بعد اسبوع...))
شما يالسه في حجرتها تتعدل وحمده وياها...ونوره يالسه تسحي شعر فطيم..اليوم خطوبة شما ..البيت مجلوب فوق تحت ..حبيبتهم شما..حبيبة المرحوم بو هزاع..وعيون خالد وهزاع..اقرب وحده لنوره وحمده..اليوم خطوبتها..لازم كل شي يكون مختلف..لان هاي بتكون شما .مب أي حد...
ام هزاع الدنيا مب شالتنها من الفرحه..ويالسه طول اليوم تعدل وتسوي وتبخر..وتستقبل ودنيا وحشره(عارفين الخطوبه كيف تكون)..وحصه طبعاً يالسه تساعد ام هزاع بكل شي..مب هي اخت المعرس ..والعروس اخت ريلها وبنت عمها...
وفي غرفة البنات..
شما: حق شو تبيني احط ميك اب ..يا بوج بس ثواني عقب بيظهر الريال هب مطوّل...لا تجبريني اسوي شي ما ابيه..
حمده: بس سكتي الله يخليج انتي ما تفهمين شو يبون الرياييل..
شما: ما فيج حيله يا ام الخبره..
نوره: ما في داعي يا شما بس بيدش حميد يوم بيطلب يشوفج وعقب بيظهر ليش تسوين ميك اب..
شما: قولي لاختج خليها تفهم بس مشكله التنك..
حمده: طفرتني والله شو فيكن خلاص هب حاطين ..
نوره: اصلاًحميد روحه متخبل سواء السالفه فيها ميك اب ولا لاء..
ويضحكون كلهم بس شما ماتت من المستحى..
...............................
عقب صلاة العشا وصلوا الرياييل من الصلاه ..وفي الميلس..حميد يالس على جمر..وكل شوي يالس يدق خالد ..
حميد: يالله متى بنسير داخل..
خالد: تراك عيفتنا الدنيا ..عنبو الي يسمع ماخذ برنسيسه ولا شيخة هب الا شما بنت محمد..
حميد: اسكت لا اطيرك بستين كف شو يسون الملكات والبرنسيسات جدام ظفر من ظفور شماني..
خالد: اااخ يا قلبي ..مستوي شاعر الحبيب..
حميد: لا تغير الموضوع يالله متى بندش..
خالد: اصلاً هزاع مب راضي تدش عندها..
حميد: جب يالله هزاع ماله راي..
خالد: ههههه هزاع هو ولي امرها يا حبيبي..
وتموا يسولفون وخالد يلعوز حميد ويطفر به..
بس في ميلس الحريم..روضه يالسه ويا شما وطفرتها من كثر ما تسولف عن خطيبها ذياب وشما مب متفيجه لين ما وصلت حمده ويلست عدالها..وما كان حد موجود غير ام هزاع وبناتها وام منصور وبناتها وبيت خال شما وبناتهم ووحرمة عم شما اللي ساكنه في بدع زايد بس ما عندها عيال ولا بنات..يعني الحفله على بعضها كانت عائليه..
وتموا ضحك وسوالف لين ما وصلت الساعه 11:30 وحميد في الميلس ما بقى فيه روح تقولون يالس على جمر ولا خلاص جنه الدنيا بتنتهي..
حميد: خالد تراني طفرت والله ..عنبو متى بسير اشوفها..
خالد: اذا طفرت تقدر تروح البيت وعقب يوم تسير الطفره منك تيي مره ثانيه..
ويقرب منهم هزاع..
هزاع مبتسم: حميد فضحتنا بين الرياييل يالس تتحرقص اللي يشوفك يقول حاطين لك على الكنب مسامير عنبو..اثقل شوي..
خالد:هههههههه والله هزأوك..
حميد: يا هزاع بعدين مب وقت هالخطبه الاجتماعيه الحين..ياخي طفرتوني ..بسرعه..
هزاع: بسرعه على شو..
خالد: يبي ييلس ويا شما شويه..
هزاع:ما شاء الله احلامك كبيره ..يالله يا بوك يوم تملج تعال كل يوم وحياك..
حميد بعصبيه: يا سلام اشمعنى حمد وحمده..
خالد: لان اسماءهم متطابقه لكن حميد وشما ولا يخصه ..
حميد: والله ما عندي سالفه يوم اييلس عندك..يالله يا خي طفرتونا متى بسير داخل..
خالد: صج ان شما ما عندها سالفه يوم عطتك ويه..
ويذهب هزاع للداخل وينادي على شما..
وفي غرفه قريبه من مجلس الحريم..تدخل شما..
هزاع: تبارك الرحمن شو هالزين يا شما..
شما مبتسمه: شو تقصد يا هزاع ..ما شفتني قبل حلوه الا اليوم..انا اصلاً من يومي شيخة المزايين..
هزاع: زين اقول ..سيري لبسي وقايتج حميد ذل كل العرب اللي في الميلس تقولين عقرب لاسعتنه..
شما مستحيه: زين بسير الحين..بس قل لحميد لا يطول لاني والله بموت من المستحى..
وتروح شما حجرتها فوق وتلبس وقايتها وتنزل بعد ما تحجبت زين..
وفي الميلس هزاع ينادي على حميد من بعيد..وينزل خالد ويا حميد لين داخل ..
حميد: اففف متى بنوصل الصاله..
خالد: الله يخسك يا حميد عنبو مب خطبه..خوفي لو انك تبي العرس الخميس الياي..
وفي الغرفه اللي عدال ميلس الحريم..دخل حميد ويلس ..يتريا شما..وشما ميته من الخوف والمستحى في حجرة حصه..
شما: والله مب رايمه اوقف احس ريولي مشلوله..
حمده: شعور طبيعي..
حصه: افديت حميد خويه والله تقولين حد مسوي له عمل متخبل الريال..يقول لي هزاع فضحهم بالميلس..
ويدخل خالد...
خالد باستنكار يحاول يخفي ضحكته: شما دخيل والديج ارحمينا وانزلي له ذلنا الريال..
حمده وحصه بيموتن من الضحك..وشما زاد الخوف فيها..ونزلت مع خالد و عند باب الحجره..وقفت شوي ومسك خالد ايدها ودخلها..ويوم شافها حميد وقف وانهبل..
خالد: الحين الساعه 11:50..عندك عشر دقايق..الساعه 12:00 انا بيي اوكيك ..والحين اشبع ويكفي مذله ويا هالراس..
شما تمت واقفه وبعدين يلست على الكنبه..بس بعيده شوي عن حميد..اللي تم مبتسم لخالد بس ما رد عليه وطلع خالد بس خلىالباب مفتوح...
حميد هني اختفت كل الشجاعه والحماس اللي فيه..وتم متصلب ولا عرف يتكلم..وضااااااااااااااااا ااااع الكلام..
اما شما ما يدري بحالتها الا رب العالمين..ولا واحد فيهم تكلم ولا قال شي...لين ما احترق حميد وما رام يصبر..
حميد برمسه متقطعه: ش..شحالج يا شما..
شما شوي وباقي تدفن ويهها في الارض: بخير..
ورد حميد وسكت مره ثانيه..وحميد كل شوي يطالع الساعه والوقت قرب يخلص وهو ما يدري وين راح الكلام اللي استوا له سنين مجهزه عسب يقوله لشما..
ورد ونطق مره ثانيه..
حميد: شخبار الدراسه وياج..
شما بينها وبين نفسها" صدج انك متفيج"
شما: زينه الحمد لله..
وردوا سكتوا مره ثانيه..
حميد: شما
ما رفعت شما راسها بس بصوت واطي قالت: لبيه..
هني صاحبكم حميد انتفض وشك انه ساكن في تركيا من الهزه اللي اهتزها...وتم يبطل عيونه ويغمض ..مب مصدق عمره..
وتم يرمس عمره بس بخاطره...
" لاااا..والله اليوم انا بيستوي فيني شي..قالت لي لبيه...ارجوك يا ربي قلبي مب قوي لدرجة انه يحتمل كل هالصدمات..عادي اطلع الحين من هني واسير ادعم بيتنا"
تكلم حميد: شما والله الدنيا مب شالتني من الفرحه...
ابتسمت شما وبصوت ما يسمعه الا اللي الله معطيه الصحه: وانا بعد..
هني حميد اختل عقلياً وحس وده يقوم يكسر اليدار ولا يجلب الكنب بالحجره..ووقف ورد وقعد..مب عارف شو يسوي بعمره..
حميد بفرحه والكون كله مب واسعنه: حلفي يا شما..
شما ساكته ولا رفعت راسها من الارض من الخوف..والمستحى ولا درت كيف طلعت منها هالكلمه...
وقبل يكمل حميد كلامه دخل خالد...
خالد:يالله يالامير انتهى وقت سندريلا..الساعه الحين 12:10 عطيتك عشر من عندي...
عصب حميد ووقف ولا قدر يبرد قلبه في خالد لان شما واقفه..وانقهر من خالد اللي حس بس انه يبي يقهره ولا يخليه ييلس ويا شما..
وطلعت شما وقبل تطلع كانت تبي تقضي على اخر نبض حياة في حميد ..
شما بحيا على دلع: حميد تصبح على خير..
مسكين حميد والله انهار الليله بما فيه الكفايه..وتقطع من الوناسه.. حميد: وانتي من اهل الخير..
وابتسم خالد وارتاح وعرف ان شما مرتاحه وما تسوي شي غصباً عنها..
.................................................. ......
مرت الايام بسرعه..وخالد ينتظر ويفكر ومب عارف كيف يخطو الخطوه الاولى..ويتخيل عمره وهو ساير بيت ميثا يخطبها من اهلها واخوانها اللي في يوم من الايام رفضوه..
وتم تعبان نفسياَ من كثر ما يفكر ..حتى خليفه اللي كان دوم وياه بالحلوه والمره..قطع عنه هالفتره لانه مشغول بترتيبات عرسه مع بنت خاله اللي حبها وفاز بحبه وياها..وحس ان الدنيا ظالمه وان محد خسر فيها غيره هو ..وتم يسولف مع عمره..
" يا حيك يا خليفه خذت اللي تبي والله طولت وانت تعاني واليوم الله فتح عليك..وحمد ولد عمي خذ حمده عن حب ولا حد نغص عليهم...واخر شي حميد صبر والله وقدر يصبر ثمان سنين... ولا راح صبره على الفاضي..ونال اللي تمنى...بس انا ليش يا ربي خسرت الانسانه اللي احبها..مع انها صارت حره ومب مخطوبه بس احس عمري ما روم اخطبها واحس عمري كل ما ييت بسوي شي في اشياء ما افهمها تردني"
كان خالد متردد ومتوتر..ومب عارف كيف يتصرف ..ومع هذا ما فتح قلبه لاي حد ولا قدر يصارح أي انسان حتى حمده ولا شما ما قدر يقولهم شي..
......................................
خلصت الجامعه والاجازه الصيفيه الممله بدت...وعرس خليفه عقب اسبوع ..وميثا يالسه تتجهز عسب تحضره..وهي يالسه مره في حجرتها...
" سبحان الله من يدري كنت يوم من الايام بكون انا العروس هاليوم..صدق ان دوام الحال من المحال..وهذي انا خسرت اثنين لا انا اللي قبلت في خليفه وخذاني..ولا خالد اللي تقدم لي مره ثانيه..صدق محد مصيبته مثل مصيبتي..اييه يا خالد وانا والله اللي تحريتك تحبني من الخاطر ومستعد تسوي أي شي علشاني..بس معذور ترى كرامتك فوق كل شي ومن حقك ما ترد تخطبني من عند هلي اللي ردوك...خسرتي يا ميثا والله..ولا مب هاي المصيبه بس الكارثه اني قريب بخسر شما اللي بتروح عني وبتعرس...الله يعيني بس.."
.......................................
في العصر ام هزاع يالسه في الصاله ويا حمده اللي زارتهم من يومين والليله بتروح بس تتريا حمد يوصلها...ودخل خالد ويلس وياهم وتموا يسولفون ..بعدين ام هزاع تمت تطالع خالد وهو يسولف ويلاعب مهاري بنت هزاع...
ام هزاع: خالد
خالد: لبيه..
ام هزاع: اشوفك ما بغيت تعرس..وهاي روضه اللي ما تبيها عرسها عقب شهر..وين البنيه اللي تبيني اخطبها لك..
خالد: ما فكر بالعرس الحين خلينا من هالسالفه يمه..
حمده: بس نحن نبي نفرح فيك..
خالد: هذي شما بتعرس بتفرحون فيها..خل عنكم الطمع تبون تفرحون فرحتين..
ام هزاع: شو تقول يا خالد ترى مهما كان كل واحد فيكم له فرحته الخاصه..وبعدين يا يمه انا بغيت اشوف عيالك قبل اموت..
خالد: بسم الله عليج يمه بعد عمر طويل ان شاء الله..
حمده :ان شاء الله..
ام هزاع: زين ما قلت لي يا خالد اختار اللي تبي لو كانت من تكون بخطبها لك بس انت اتنقى من بنات العرب اللي تعيبك ..
خالد: لو تكون من تكون...؟؟
تبتسم حمده..
ام هزاع مبتسمه بحنان وطيبةالدنيا كلها بعيونها: حتى لو تبيني اسير اخطب لك بنت حميد الحين بسير والله..
ابتسم خالد وحس ان امه فاهمتنه وقام وحبها على راسها ولوى عليها..
خالد: الله لا يخليني منج ..فديتج يمه ..
ويصعد خالد للاعلى..
حمده: فديتج يمه والله ريحتيه يوم رمستي هالرمسه..
ام هزاع: ما بقى لي غيركم اذا ما سويت اللي يرضيكم ويفرحكم ..كيف تبيني افرح..
حمده تقوم وتحب راس امها: فديتج يمه الله يعطيج طول العمر والعافيه...
......................................
اسبوع ثاني مر من الاجازه...وحميد ذل ابوه ذل ..محتشر يبي يملج ..بس ابوه مب مستعيل ويقول اصبر عالناس شوي ..بس من يقدر له ..
حمد: ابويه يالله خل حميد يملج ع شما عنبو ذلنا مذله ما يسوى عليه هاللي يسويه بعمره..
حميد: افا عليك يا بويه اهون عليك اتم جي..
ابومنصور: والله ما ادري بس بنسير وبنشوف..عطني فرصه ارمس فيها هزاع..
ومر يومين ورمس ابو منصور هزاع اللي ابدا استعداه وفرحته بالخبر ورحب بهم في أي وقت...
وقرب الموعد وتحدد موعد ملجة شما على حميد...اللي تخبل ومب قادر يتريا كل هالفتره..طبعاً شما انشغلت وايد وقامت تجهز عمرها وانشغلت وايد عن ميثا اللي نفسيتها تعبانه واااااايد عقب ما حست انها خسرت كل شي ولد عمها وحبيبها وقريب ربيعتها وتوأم روحها اللي بتعرس وبتخليها..
كل يومين شما ونوره وحصه في دبي ويا هزاع وخالد ...ويتناوبون بين فتره والثانيه عسب يخلصون الاغراض والحجز وكل شي لانهم متأكدين هالمره اذا ملج حميد على شما انه بيحدد موعد العرس في نفس الوقت وعقب الملجه على طول...
طبعاً شما خبرت ميثا بكل شي ..وفرحت لها من الخاطر مع انها مثل ما قلت وايد متضايجه هالفتره..
...................................
مرت الايام سريعه وشما بدت تستعد ...وحست الايام جريبه خلاص..وفي ليله من الليالي كانت نوره نايمه ..وشما ما ياها الرقاد..ويالسه طول الليل تفكر...
(بشو تتوقعون يالسه تفكر؟؟ )
كانت منسدحه على الشبريه وتتجلب ولا دلت الرقاد وين..وكل ما يت عينها بتغمض لفى طيف الغالي بو هزاع وحرمها من الرقاد..ومخدتها لو قدرت تشتكي هالليله اشتكت..من كثر ما خيستها بالدموع ..وما عرفت ليش طيف الغالي ما فارقها ابداً..
وحست بضيقه في صدرها وانها ما تقدر تتنفس..وطلعت من الحجره ..ودقت على خالد الباب اللي كان بعده سهران..
ودخلت عنده..
خالد: شماني شوفيج ..
شما وعيونها ممتليه دموع: ابويه..
تنكد خالد يوم قالت شما هالكلمه..وتمت يهديها ويسولف عشان تنسى..بس الضيقه ما راحت..
شما: ما ادري بلاني طول الوقت وهو على بالي..مب قادره انام..
خالد: افديتك يا بويه والله..
وامتلت عين خالد بالدمعه..ويوم شافته شما انصدمت بحياته كلها ما شافته يبكي ..وندمت انها فتحت الموضوع وتمت تسولف وهي اللي خاطرها ضايق بس عسب تنسيه..
ومع ان الوقت مب مناسب فتحت معاه موضوع ثاني..
شما: اقول خالد بغيت اسألك شي بس اوعدني تقول الصدق..
خالد.: ان شاء الله..
شما: بذمتك انت بعدك تحب ميثا..؟؟
ما تكلم خالد وصد بويهه بعيد عنها...
شما: افا يا خالد والله لو جوابك كان لاء..بس بصراحه انا لو مكانها ما بحب أي ريال هالكثر لان الرياييل فعلاً ما يستحقون الحب..وميثا تستاهل اللي يصير فيها الحين..
خالد: بس سكتي الله يخليج..
شما: والله اني اذكر اني قلت لها خالد اخويه ما يصلح لج بس هي الله يهديها توهمت بالحب ...وحليلج ياميثا والله انتي الوحيده اللي فينا طلعتي خسرانه..خسرتي حبيبج وولد عمج..
كان خالد مسوي روحه عادي وهو يتقطع من داخل مب قادر يسكت شما وهي تقطعه بالرمسه..ومب قادر بنفس الوقت يدافع عن نفسه وماله حجه جدام الناس وشما وميثا ..وشو اللي مانعنه الحين لا يتقدم لها..كان الكل يشوف في تصرف خالد انانيه ومحد حاس فيه..واستأذنت منه شما وروحت تنام..
حس خالد من كثر ما يفكر ان ميثا مجروحه منه وانه ظلمها ...وما قدر تضحيتها ولا كان قد اللي سوته عشانه..وتم يلوم بعمره ..وما قدر يرقد ومسك تلفونه وفكر يتصل فيها..بعدين تراجع وطرش لها مسج وكان متأكد انها راقده بس حب يطرش لها عشان اذا قامت شافت الوقت الي طرش فيه وعرفت انها في باله حتى بأنصاص الليالي...
خالد(لو انك جمره تحرق كفوفي منك ما مليت..لاضمك دوم في صدري واسوي نفسي ما حسيت)
خالد(لو سمعت حد ينادي والصوت كله حزن ..لا تلتفت وراك تراه قلبي يمشي وراك..)
وحط راسه وتم يفكر ..في ميثا واللي صار من يوم عرفها مروراً بكل الاحداث..وكيف ضحت وسوت المستحيل عشان تفوز بقلبه ووقفت في ويه اهلها واخوانها كلهم عشانه هو بس..واخر شي خذلها ولا فكر يسوي لها أي شي يبين لها كيف هو ممتن لهالحب الكبير..وقطع تفكيره نغمة المسج..
ميثا(اغليت ناس ما سألوا ولا حبوا ولا دقوا..مشكلتي ابيهم بس ليتهم عني نشدوا)
استحى خالد وحس شي قبضه بقلبه يوم شاف المسج...ولما استحى ما كان من المسج..بس استحى من تقصيره فيها..وكيف هي متمسكه فيه لاخر اللحظات..وكملتها ميثا بالمسج الثاني اللي ما قدر يتحمله..
ميثا(قلبي الوافي ما يتحمل الغيبه...طلبتك قول: تم...خلي روحي لروحك قريبه)..
خالد( القلب يجبرني عليك انت بالذات ولا العرب واجد وغيرك مزايين)
ميثا(انت البخور اللي تطيب به الدار ..وغيرك حطب والكل بالفرق داري)
ووقفت ميثا وخالد ورقد كل واحد فيهم..ورد الصمت سيد الموقف ومحد يدري شو بيصير فيهم عقب..</font>
رد مع اقتباس
مواقع النشر (المفضلة)