<font color='#728FCE'>الحلقه الثانيه عشر
الساعه السادسه وقت المغرب..البيت مرتب والحلويات موضوعه على طاولة مجلس الحريم بعنايه فائقه...ورائحة البخور...تعطر اركان البيت...حصه تنزل للاسفل لتستقبل اهلها...
وام هزاع من المطبخ للصاله ..الى مجلس الحريم...ثم تصعد للاعلى الى غرفة شما ونوره....
ام هزاع: شما لا ترقدين بيت عمج سالم بيونا ...
شما: لا والله وانا شعلي والله انا برقد ما تشوفيني من 8 الصبح والحين المغرب حرام عليكم مب وقته والله..
ام هزاع: لا ترقدين فديتج عقب البنات بيزعلن....
شما:ليش منو اللي بيي فيهن...؟؟
ام هزاع: كلهن ما تدرين اختهن ربت ولازم يووونا كلهم...
شما: ادري بهن هذيل ما يزورنا غير في المناسبات....
ام هزاع:بس سكتي خليج احسن عنهن وبعدين والله بتستانسين وياج رويض حلاة القعده وياها...
شما:ادري انها فنانه بس ما احبها مرات..وايد تخق علينا...
ام هزاع: تحملي فديتج الا هي كم من ساعه....
شما:اوكي امايه بقوم اتسبح واصلي عشان خاطرج بس...
ام هزاع:الله يجبر بخاطرج يا شما....
وفي الجانب الاخر من البيت ...حمده لم تخرج من غرفتها..وام هزاع في الاسفل لوحدها مع الخادمات....وتذهب الى مجلس الحريم لتجد حصه هناك...
حصه: وايد تأخروا...
ام هزاع: ما عليه البيت بيتهم بأي وقت ...
حصه: بس مب حلوه الحركه وايد تأخروا امي قالت عقب المغرب او المغرب بنصلي عندكم...
ام هزاع: اشفيج مستعيله....وبعدين الليل طويل وباجر اجازة..الا اقول ما رمستي هزاع..
حصه:خالد قال بيشوف لي شو السالفه اليوم...
تطل نوره على المجلس..
نوره:امايه شوفيني جي مبينه حلوه....؟؟؟
ام هزاع: ما شاء الله يا نوره عروس...تقولين للقمر قوم بيلس مكانك..
حصه:نواري روعه عليج اللبس والله ما شاء تعرفين ما يبينج ياهل يعني جي شابه حليوه...
نوره:وييييييييييه فديتني جاااان استحي والله...
حصه:بتستانس عليج امايه وايد تحبج والله....
نوره: يا ويلها لطيفه اذا ما يت كل مره تسوي خيانه فيني ولا تيي وانا يوم امايه تسير اروح بيتهم....
حصه:عمتيه ..نحن قبل ما كنا جي ..كنا دوم نتزاور و 24 ساعه ويا بعض...بس من كبروا الشباب فبيتنا وبيتكم قمنا ما نزور بعض شرات قبل...
وقبل ان ترد ام هزاع بثواني معدوده....يرن الجرس....وتسرع الخادمه لفتح الباب....
ويدخل الضيوف...الى مجلس الحريم......( وهم كالتالي ومنهم شخصيه سوف تبرز في باقي اجزاء القصه)..... (ام منصوروالدة حصه,روضه و لطيفه اخوات حصه )...
روضه اكبر من شما بعامين واصغر من حمده بعامين ايضاً...ولطيفه بعمر نوره.....لا تهم الشخصيات الاخرى بقدر ما سوف تبزغ معنا شخصية روضه التي ستلعب دوراً هاماً في تغيير معظم مجريات القصه..(.بس بدون زعل)..روضه لم يبقى لها سوى عام واحد وتتخرج من جامعة زايد..لكنها فضلت ان تأخذ استراحه في هذا الفصل لذلك قررت ان تتوقف عن الدراسه شهران أي (نص كورس)لتعاود الدراسه في بداية العام القادم..قمة في الجمال وتفوق حصه اختها جمالاً..متفوقه دراسياً...ولكن مغروره نوعاً ما رغم انها تتمتع بطيبة شديده....وروح مرحه...
تنزل شما وتدخل على الضيوف في المجلس وتسلم عليهم....وتأخذ الاحداث مجراها بينهم..
شما: رويض قومي بنسير الصاله هني حشرة حريم ويهال...ولا تبين تيلسين ويا اختج...؟؟
روضه: لا... قومي والله يايه بقول..واختي عقب بيلس وياها...هي بتيينا قبل ما هزاع يرد...
شما: يالله قومي نظهر...
ام منصور: ما شاء الله وين سايرات...؟؟
شما: ما بنسير مكان عمووه هني بس بالصاله...
نوره:يالله لطوووف بنسير حجرة المكتب بنسير نلعب شوي...
شما: هيه بالمره خربي البنت بالكمبيوتر...
روضه:لا لا شو تخرب اختيه..نحن من بونا عندنا كمبيوتر...يعني لا تتحرين لطيفه ما تعرف شي...
شما بإستغراب: انا ما قلت جي كيف تفهمين انتي..المهم قومي الصاله....
وفي الصاله..احاديث وتنبيش بالماضي..وضحك وذكريات...وتنزل حمده من الاعلى....
شما: الحمد لله على السلامه يا عروس..الناس بيروحون وانتي توج نازله..
حمده: هلاااااااااااااااا رويض لا لا مب مصدقه انتي هني...
روضه:هلا شحالج علوم اخبار..
حمده: بخير الله يسلمج واخبارج انتي...
روضه: والله ما شي الحال انتي اللي اخبارج هاه ما بتشتغلين...
حمده وبدلع: لا ما اريد اشتغل ..انا وحمد متفقين..
روضه بغرور:فديت حمد خويه يعرف يقنع...
شما: شو قصدج..حووو هم متفقين لا أثّر عليها ولا شي...خلي عنج السوالف...
حمده: المهم برايكن انا سايره عند عمتيه ...بس اقول تعالي شموه شوي المطبخ...
وفي المطبخ....
حمده:اففففففففففففف والله بنفجر منها بس ابي اسوي روحي عاديه غصب..
شما: عيل شو تقولين عني انا اللي يالسه وياها بعدها ما بدت والحين بيبدا شغل الطاخات ..تريي شوي...
حمده: حاولي تكوني عاديه وياها ما فيني توصل رمسه لحمد...
شما: وخير يا طير من درا عنه حمد هذا..
حمده: جب ..انتي ما دريتي عنه انا اللي ادري..ويهمني رايه..وبعدين لا تاخذين وياها وايد يمكن توصل لحميد...
شما: لا تخليني اسوي شي لا تحمد عقباه انتي ويا حميد..لا بصراحه جرحتيني ..من حميد يكون الا ...من قوم اللهم يا كافي ولا يعني لي أي شي...
حمده: يالله سيري لها بتلاقينها تتحرطم الحين.....وانا بسير اسلم على عمتيه عقب بيدش حمد بييلس وياي شوي..
شما: شعليج شعليج...بس هاه ما وصيج لا تموتين وهو يرمس...
حمده: زين زين يالله سيري بسرعه...
وفي الصاله.....
روضه:تأخرتي وايد ليكون مشغولات بس...؟؟
شما: لا لا بس تبي تسألني شي عن خالد...
روضه تبتسم:خاااااالد ...وحليلله..من زماااااااان ما شفته...والله احيد اخر مره يمكن شفته وانا في اول اعدادي ...خيبه عمر من الزماااان...
شما:خيبه من اول اعدادي ..!!!؟؟؟ الحين وين خالد تغير لو تشوفينه ما شاء الله عليه ريال والنعم جمال واخلاق ورجوله يعيبج والله ما عليه رمسه...شيوخي الملامح,حسين الرمسه...
روضه:حليله والله .. شرات طبايع اخويه حميد والله...
شما وقد قلبت ملامحها:حميد!!!! لا لا غناتي خالد ماله شبيه..
روضه:خلي عنج السوالف ...لا تسوين روحج مب مهتمه ...اصلاً حميد حاشر ابويه الا يرمس عمي عسب يخطبونج...متخبل عليج والله..
شما:نعم..؟؟؟!!! لا حبيبتي انا ما افكر بالعرس الحين وراي دراسه وشغل....
روضه:أي شغل ..!!! الله يخليج والله هذا ويهي اذا اشتغلتي كلمتين من هزاع اخوج وبتيلسين في البيت...
شما: ما برد عليج ما ادري شو تتحرينا مسوين معسكرات في البيت..وكل شي بالقوه...
روضه: حبيبتي تتحرينا ما سمعنا ان اخوج خالد حرمج من الدراسه كم يوم والله يعلم شو السبب..
شما باستغراب وخجل: من قالج ؟؟؟ اصلا محد قال هالرمسه اان كنت غايبه فتره عسب اختج حصوه كانت بالمستشفى...
روضه:المهم خلينا من هالرمسه ..ما قلتلج...منو يا عندنا الاسبوع اللي طاف...
شما بقرف: لا ما قلتي لي ..ليش انا وين اشوفج..؟؟
روضه: تعرفين بيت محمد بن سعيد...اللي في العين ..
شما: هيه عرفتهم شفيهم...
روضه: ولدهم سعيد يا وخطبني من ابويه ..بس ابويه ما طاع وقال البنت بعدها صغيره وتكمل دراستها...
شما بضجر: هيه وحليلج صغيره...وليش رفض ابوج وين بيلاقي احسن من عيال بو سعيد..
روضه: امي تضايجت وايد بس ابويه قال انه يستحي من عمي بو هزاع لو يوزني لولد ناس غرب ...وعيال عمي اقرب لي ..
شما بقهر واضح: هيييييييه والله صدج رمسة عمي سالم ما عليه زود...
روضه: وبعد ما خبرتج عن بيت بو سلطان اللي ساكنين في البطين...
شما وهي تكاد تنفجر من الضحك: هييييييه دريت بهم...اكيد خطبوج لولدهم مايد...
روضه: هييه والله رمسوا اخويه منصور بس ما طاع...
شما: الله يعينج....اقول لاعت جبدي من هالسوالف ممكن نغير الموضوع...
روضه: برايج ..الا اقول حمد خويه ما دخل..؟؟
شما: بالميلس يتريا خالد....
روضه: ليش خالد مب هني ...؟؟؟
شما: لا مب هني اصلا ما ييلس خالد بالبيت...
وبعد ساعه من الوقت وحوالي الساعه الثامنه يدخل خالد الصاله يدندن..." الله يهنيك بي والله يهنيني والله يديم الغلا ما بيني وبينك...ساعة اشوفك يزين الكون واشوف كل المحبه تنطق بعينك..."...
تهتف شما: حووو خالد عندنا عرب بالبيت ما تعرف تدق البيبان....
وتغطي روضه وجهها بشيلتها...وتقف لتسلم على خالد.....
خالد: ليش من عندنا...؟؟
شما: بيت عمي سالم...وهاي رويض ما بتسلم عليها....؟؟؟
خالد: هلاااااااااااااااا والله برويض بنت عمي من متى مب شايفنج والله عمر...
روضه بخجل: هلا خالد الله يعافيك شحالك....
خالد بخير الله يسلمج...وين ما شاء الله من متى مقاطعه بيتنا...عنبو نحن اهل والسلام واجب..
روضه: من كثر ما تيي بيتنا انت الحين...
خالد: جااااااان تحرجني والله....المهم اخبار الدراسه واشحال دنياج...
روضه: بخير الله يعافيك....
خالد: الا اقول محد من الشباب ياي وياكم.....؟؟
روضه: نحن اليوم عشانا عندكم...وكل اهل البيت هني عدا منصور اخويه وحرمته بدبي....وابويه مع عمي بو هزاع بليوا ...
خالد: والله الساعه المباركه يوم بيت عمي سالم عندنا بالبيت ..عيل استريحي انا بسير عند حمد وحميد بالميلس وقبل بخطف على عمتيه بسلم عليها....
روضه: برايك....
.................................................
وفي المطبخ..
خالد: شما الله يغربلها...هاي رويض...؟؟ انا ما اقدر اصدق...؟؟
شما باستنكار شديد: وليش ان شاء الله مب قادر تصدق ....ليكون شفت الليدي ديانا وانا ما ادري...؟؟
خالد: تخسي وتعقب الليدي ديانا شو تسوى جدام جمال رويض والله ما شاء الله عليها ملكة جمال الله يغربل عدوينها...
شما: وانت كيف شفتها وهي متغشيه...
خالد:هههههههههه انتوا بنات هالايام تغشيكن والعدم واحد...بس بصراحه ما توقعت رويض احلوت بهالشكل...وينها ووين حصوه اختها...
شما: الله يعين ...صراحه جبدي اليوم لايعه من كل شي...وبيني وبينك والله اني احلى عنها...
خالد:هههههههههههه وانا اقول ليش البنيه شوي وتنفجر من القهر....
شما: على شو يا حسره...
خالد:مالت عليكن كلكن لو شو ما وصل جمالكن محد تيي بظفر حبيبتي...
شما تتنهد براحه: ومن هاي تعيسة الحظ؟.؟
خالد وقد انصرف لخارج المطبخ دون ان يلتفت اليها: خلي عنج الاستغباء...
ويظهر خالد متجهاً نحو المجلس...وترجع شما للصاله....ويرجع خالد من فوره....
خالد : شما وين حمده...؟؟
شما: عند الحريم..ليش...؟؟
خالد: قولي لها حمد يبي يسلم عليها....
شما: لحظات وبزقرها ...بس انت خله يدش الحجره اللي حذا الميلس...لان ما شي حجر فاضيه ...داخل....
خالد: اوكي بس بسرعه..
وفي الحجره الخارجيه....تدخل حمده على حمد...ليقف مرحبا بها....
حمد: يا حيا وسهلا يا مرحبا والله يالغاليه...
حمده: مرحبا بك يا حمد شحالك...
حمد:بخير وعافيه ربي يعافيج..شحالج انتي والعلوم..وين انتي ووين هالغيبه..؟؟
حمده: وين يعني والله في البيت....انت اللي ما تنشاف ولا تسأل...
حمد: والله اسمحيلي يا حمده ادري اني مقصر بس شسوي والله قلة الحيله..ودي لو ارمسج كل يوم بس والله ما يستوي ادق لج على البيت...
حمده: ما عليه يا حمد مسموح ...المهم اخبارك ...
حمد: بخير وعافيه...دامني اشوفج...
حمده:....................
حمد: حمده....
حمده: لبيه...
حمد: حمده ما روم اصبر ...دخيلج خلينا نملج قبل الاجازه...وافضل والله في اجازة العيد...
حمده: والله ما ادري يا حمد مب جنك مستعيل...
حمد: تعرفين والله يا حمده تمر علي ايام ودي اسمع صوتج..وتدرين بعد اني ما روم ازورج متى ما بغيت البيت...يعني تعرفين بنات عمي كبار و مب من الحشمه اني كل يوم والثاني عافد عليكم...لكن لو ملجنا ..اروم اطلع لج تلفون ومتى ما ابي اسولف وارمسج ما بيردني شي ...فكري معاي شوي ...
حمده: والله يا حمد ما يدري باللي بالقلب الا الله..على العموم اللي تشوفه انا اشوفه...بس لا تييب لي طاري العرس...لاني والله ما حس عمري مستعده اعرس الحين..
حمد وقد بدا الضيق بادياً عليه : على راحتج واللي تشوفينه..اهم شي اني اضمن لو رمسة ابويه ان نحن نملج..ما بيتعذر فيج عمي ...
حمده:خلاص تطمن من هالناحيه...
حمد:الله لا يخليني منج...
حمده: ولا منك ان شاء الله...حمد..انا بظهر الحين عيب والله عمووه بتزعل بتقول ما يلسنا وياها...
حمد: مستعيله...
حمده:حرام عليك والله ودي ايلس بس تعرف ما فيني على الاحراجات...
حمد:ع راحتج غناتي تحملي على عمرج..
حمده: و انت بعد تحمل على عمرك...
حمد:ديري بالج على حمدوه تريها مهمه عندي...
حمده: من عيوني يا حمد...وانت بعد دير بالك على حمد تراه بعيوني..
حمد: بس دخيلج ابي ارقد اليووم لا تخليني اسهر للفجر..
حمده:ههههههه يالله برايك يا حمد..
حمد:ربي يحفظج...
.................................................. ...........
وبعد ان تناولوا العشاء ..جلس الجميع بالصاله...يتبادلون الاحاديث..ثم دخل خالد ليخبرهم ان حمد يستدعيهم...للخروج...وانصرفوا بعد ان عرضوا على حصه الذهاب معهم لكنها اعتذرت ووعدتهم بزيارتهم مره اخرى قبل وصول هزاع....
وبعد ذهابهم ..التهى الجميع بتنظيف البيت ..وصعدوا الى غرفهم...للنوم.....
الساعه الواحده بعد منتصف الليل.....في غرفة حصه...الهاتف يرن وحصه تحاول ان تهدي ابنتها التي لم تتوقف عن البكاء....تنهض مسرعه..انها النغمه الخاصه والمميزه لها...
حصه: الو مرحبا وهلا والله..
هزاع: هلا هلا غناتي...شحالج...
حصه: مب بخير انت وين من امس وانا ادق ولا ترد كل هاه مشغول...؟؟
هزاع: والله ان تلفوني ما ادري بلاه مخترب توي من ساعه ساير اييب لي واحد يديد...شكل البطاريه احترقت....
حصه: المهم اخبارك علومك..اشوفه ما وحى لك تسمي بنتك ولا مب داري عنها..؟؟
هزاع: انتي تنقي واختاري شو تحبين اذا عيبني بوافق عليه...
حصه: ما شي معين ببالي ...شو رايك بروضه او عفرا...
هزاع: لا لاء كل شي ولا روضه..ما اداني اختج رويض خير شر...
حصه:هههههههههههه ليش بسم الله شو دخل اختي روضه بالاسم...
هزاع: ما احب بنتي تطلع شراتها...تحيدين شو كانت تسوي يوم كنا صغار...كله تمط شعري وتسحب اذنيه...والحين شوفي النتايج جني خفاش من طول اذنيه...
حصه:هههههههههه بس الحين رويض تغيرت صارت من عرايس بيتنا عقل ورزانه وجمال... وذيج ايام اول...
هزاع: يالله تنقي اسم ثاني بسرعه عشان يوم السبت ابي خالد يسير الجوازات والطب الوقائي ..ابيه يخلص اوراقها...
حصه: ما شي ببالي والله...يالله انت اختار...
هزاع: شو رايج نختار واحد من هذيل تنقي انتي...نوره,شما,عفرا,ساره...
حصه: بصراحه كلهن مو شي...الا شما وعفرا...وانا افضل عفرا لان عمتها بالبيت شما وما يستوي ثنتين شما...
هزاع: لا لا مب عايبني عفرا...ابي اسم غير عناداً فيج...
حصه:اوهوووه يالله عاد...ما عندي شي انت اختار..
هزاع: شو رايج بسلامه والله هالاسم روعه....
حصه: يعني مقبول ولو ان روضه بخاطري اكثر...
هزاع: لا دخيلج تكفينا روضه المربوشه ببيت عمي سالم...
حصه: الحين تقول مربوشه ليتك تشوفها والله يا هزاع الف من يتمناها...
هزاع: خلاااااااص انا مكتفي ...عندي حصووه بالدنيا..شو رايج نيوزها خالد اخويه...
حصه: عيل شو اصلا عمي وابويه متفقين ان روضه من نصيب خالد وهو من نصيبها اذا الله راد....
هزاع: يالله بس بنشوف راي الريال ما بنغصبه...وبعدين خالد بعده طايش تريوا لين ما يعقل...
حصه: المهم..انت متى ناوي ترد...
هزاع: بصراحه انا افكر اتم سنه وشوي بعد...
حصه:شوووووووووووووووووووو
هزاع:اللهم يا كافي روعتيني ..امزح امزح خلاص باقي اسبوعين وانا راد...بإذن الله...
حصه: ان شاء الله...هاه خلاص قررت نسميها..سلامه...
هزاع: تبين الصدج انا فكرت ويا ببالي الحين اسم...انا قررت مهره وبس...
حصه: مهاري وايد روعه كيف ما خطر على بالي....
هزاع:اوكي خلاص انا بدق لخالد الحين برايج حصوه فديتج وتصبحين على خير غناتي...
حصه: وانت من اهله تحمل على عمرك فديتك...
هزاع: في وداعة الكريم...
حصه: ربي يحفظك...
.......................</font>
رد مع اقتباس
مواقع النشر (المفضلة)