<font color='#728FCE'>والحين بحطلكم الحلقه الحاديه عشر
في الصباح تستعد نوره للذهاب للمدرسه...وتتناول الافطار مع خالد....يصعد خالد للاعلى ويستأذن بالدخول الى غرفة شما لكنها لا ترد...يحاول ان يفتح الباب...يفتح الباب...ويدخل....يجلس بجانبها....
خالد: شماني ...شماني....
شما بصوت متعب: هاه شو خلني ارقد راسي يعورني...
خالد: شما يالله انا ساير الدوام ..بسرعه تاخرتي على الجامعه....
شما باستغراب تنهض بسرعه: شو تقول...؟؟
خالد: اللي سمعتيه...يالله بسرعه دوام نوروه بيبدا عقب شوي...
تنهض بسرعه غريبه وتلوي عليه بدون ما تحس...: لا خليت منك يا خالد..كنت ادري اني ما هون عليك...
خالد: ما تهونين عليه بس تأدبي مره ثانيه وياي..ولا تعيدين اللي صار...
شما: يالله يالله وخر عني بسير اغير ملابسي واصلي بسرعه اكيد ميثا بتطير من الفرحه بسوي لها مفاجأة....
يبتسم خالد ويحدث نفسه وهو خارج..."لو تدرين انه لولاها جان انتي راقده للحين..فديت ميثاني اانا"
........................
في جامعة زايد في ال Z Building ...تدخل شما احد الصفوف التي اعتادت هي وميثا ان يجلسن فيها وتضع اغراضها هناك...وتبحث عن ميثا...تقوم بتشغيل جهازها المحمول....
الساعه تشير الى 8:30 وميثا لم تصل بعد...تستمر شما بالانتظار وتشغل نفسها بمعاينه بريد الهوت ميل...وبعد طول انتظار صرخه كبيره عند الباب..ترفع شما رأسها وتصرخ بفرح..
شما: ميثوووووووووووووووووووووو وووووووووه
ميثا: والله كنت حاسه انج بتييين ...
تسلم شما عليها ويجلسن لسرد احداث اليومين الفائتين.....
شما: والله تولهت عليج اففف شو تسوى الدنيا بدونج...
ميثا: هههههههه جي بصدق عمري سكتي بس والله امس ما ياني رقاد من كثر ما احاتي...
شما: فديتج واللله طمنيني بعد علوم اخبار شو اخبار الكلاسات..شو صار ما صار في غيابي تولهت على الجامعه والله..
ميثا: والله كل شي اوكي ..الكل يسألني عنج....الا اقول ما قلتي لي كيف اقتنع خالد (استهبال)...
شما: تصدقين والله ما ادري انا البارحه عقب ما رمستج رقدت والبيت كان هادي ومب معقوله ان امايه رمسته..بس ياني اليوم الصبح هو اللي وعاني وقال يالله خلاص سيري بغيت اتخبل...
ميثا: قلت لج والله طيب ما يفكر بشر بس...وبعد ابي اعرف ليش ما يبيج تسيرين الجامعه...
شما تضحك: ههههههههههههههههه معقوله اني ما خبرتج ولين الحين ما تعرفين...
ميثا: ليش ..؟؟؟!!! تحيدين متى اخر مره شفتج فيها...
وعندما تنتهي شما من سرد الحكايه.....
ميثا: ههههههههههههههههههههه الله يغربلج يا حمدووه صدق ياهل....
شما: سكتي بس محد توهق غيري ..وهي ما عند خالد شي عسب يقهرها فيه...
ميثا: تبين الصدق انا لو مكانج بحب ايدي ورا وجدام واصلي ركعتين لو عندي اخو يقول لا تسيرين الجامعه....
شما: ليش ان شاء الله ومستقبلي وطموحي و12 سنه كرف بالمدرسه وين اوديهن؟؟!!!!؟؟؟
ميثا: أي كرف اللي ترمسين عنه شو في اختج حمدوووه كرفت في جامعة الامارات لين ما قالت بس وتعذبت اكثر عنج وهذا غير المسافات اللي كل اسبوع من بوظبي للعين وشوفي اخرتها خلصت وما اشتغلت.....
شما: انتي ما تعرفين الحشره اللي حاشره البيت فيها..وبعدين تعالي حمدووه طموحها وايد كبير ...ومب بس هذا يكون في علمج ان اصرارها فضيع للشغل بس مشكلتها انلعب براسها... تحب حمد ولد عمي اكثر من أي شي بالدنيا وهلي واهله محيرينها له من وهم صغار...
ميثا: وشو يعني هذا...شو دخل حمد بالسالفه وبطموح حمده..؟؟؟
شما: تعرفين الرياييل ما يصدقون يسيطرون على الحرمه..بس حمد ولد عمي ما صدق ان حمدوه وافقت وهات يا خرط...وما ادري كيف كسر جماح رغبتها واقنعها انها ما تشتغل......وشوفي الحين ما تسأل ولا تدري بتشتغل ولا لاء.. وكله تفكر بالعرس ...
ميثا: احلى كلام والله....الوحده تنستر ببيت ريلها وشلها بالدراسه وويع الراس...
شما: بس بس خلي عنج السوالف صدج ان مخج مصدي ..
ميثا: هههههههههه الا اقول متى بيبدا كلاسنا...
شما: يالله بنسير الكلاس...بيبدا عقب ربع ساعه خلينا نشل قشارنا...لين ما نوصل المبنى الثاني بيكون بقى خمس دقايق...
ميثا: يالله...بنسير..
.............................................
وفي البيت...حصه تحاول الاتصال...بهزاع لكنه مغلق منذ الامس..وبدون فائده...
تذهب لغرفة حمده....
حمده: هلا حصوه تعالي هني ...
حصه: حمده قلبي مب مرتاح هزاعي مبند تلفونه من امس...
حمده: لا تشغلين بالج يمكن انه مشغول وايد..عقب هو بيسوي لج تلفون...
حصه:حلفي انتي بس ..بشو مشغول انا والله من رديت ما رمسته ولين متى بنتي بتم جي بليا اسم...
حمده: لا تحاتين وايد اليوم الثلاثاء تريي يومين عقب وبيي ابويه وهو بيتصرف...
حصه: انا ما اتريا عمي شو بسوي به ..انا ابي ارمس ريلي..
حمده: هههههههه ريلج وتفاهمي وياه ...شعلي انا لو مبند تلفونه..؟؟
حصه: انا بسير عند عمتيه ابرك لي من مجابلج..الله يعين حمد خويه عليج بس..
حمده:هههههه ضحكتيني والله وبعدين حميدووووه يحصل له الشرف...
حصه: أي شرف الله يخليج..ترومين تقولين هالرمسه جدامه...
حمده بخجل : لا والله ما روم...
حصه: يالله حمده بسير عندي بناتي ...فطامي والثانيه المظلومه بسميها(بدون) لين ما يسمونها...
حمده: حليلها بتتعقد يوم تكبر...
حصه:ههههههههه يالله تعالي بنسير حجرتي ولا عند امج...
حمده: يالله...
.................................................. ........
في شركة ابو هزاع...خاالد يقرا الجريده ..تدخل عليه احدى الموظفات تحمل ملفات المراجعين...يصرفها خالد...
خالد:شليهن مب مسوي شي اليوم لايعه جبدي خليهن حق باجر ما عندي وقت..
الموظفه: بس المراجعين حشرونا...
خالد: والله مب متفيج اللي مب عايبنه يدور له مكان ثاني يتحرون نحن ما ورانا غير اشغالهم...
الموظفه:بس ابو هزاع بيزعل لو رجع والشغل مب منتهي...وهاي الملفات صار لها اكثر من شهرين عندنا..
خالد:يالله ..هلكتيني تراج..سيري وشلي الملفات وانتي ساكته ويوم يوصل ابويه قولي له كل شي...
تنصرف الموظفه ....ويتذكر خالد موعد احضار نوره من المدرسه..ويخرج...وفي الطريق يشتري بعض الحلويات لنوره و فاطمه..يتجه نحو مدرسة نوره ..وفي السياره..
نوره:باجر الاربعاء احلى يوم والله ...
خالد:............
نوره:بلاك جي ساكت مب عوايدك...
خالد: طفران والله طفران...
نوره: وانا بعد والله..اقول خالد عندي فكره شو رايك فيها يمكن يطير الطفر...
خالد:قولي يالله بس ان طلع في السالفه مول ما مول بفتح الباب وبفرج بالشارع...
نوره:بسم الله الرحمن من ياب طاري المول الحين..اقول لك شو رايك انا وانت وشماني وحمدووه نسير البحر اليوم بروحنا..
خالد: تصدقين فكره..وشو رايج نفرج هناك..ونفتك من افكارج اللي مثل ويهج...
نوره:شو يعني مب عايبتنك الفكره..؟؟؟
خالد: ما شي عندي بنات يسيرن البحر...الحمد لله الخير وايد واللي تبي تتسبح بنسوي لها مسبح خاص في البيت...
نوره: اهو وووه...من قالك الحين بنسير نتسبح ...نحن بس نبي نشوف الطبيعه...
خالد: سيري الحوش ابويه تارسنه زراعه..طالعي الطبيعه مثل ما تبين....
نوره: حرام عليك انتوا كله حابسينا بالبيت...
خالد:يالله يالله نزلي وراي شغل يعل الدريول الماحي ما شي الا يسير ليوا ويا ابويه مشغليني عندكن دريول على اخر عمري...
تنزل نوره متجهه نحو البيت....وينزل معها خالد...وتصله نغمة المسج......
ميثا( محبتكم وسط قلبي ..بدم القلب اسقيها..فلا الايام تنسيني ..ولا الساعات تمحيها)..
خالد: فدييييييييييتها يا ربي شو اسوي بعمري...
نوره: هيه شو بلاك نحن عند الباب لا يسمعك حد من الجيران...
خالد يغير الموضوع: لا بس تخيلت شكل بنت هزاع الصغيرونه فديتها مثل القمر تشبهني..
نوره: الحمد لله والشكر...
ويتجهون للبيت.......
خالد: السلام عليكم
ام هزاع: وعليك السلام والرحمه..
نوره: هلا امايه شحالج...
ام هزاع: بخير غناتي سيري بدلي وحطي راسج لين ما يحطون الغدا....
نوره: ان شاء الله امايه..بس اول شي بسير اشوف البيبي..
خالد: ههههه حليلها هالبيبي ولا احسن يسمونها المعقده ما شي اسم....
ام هزاع: حرام عليكم بتعقدون امها...
تنزل حصه من الاعلى ....تحمل ابنتها الصغيره وتمسك بيد فطامي...
حصه: هلا خالد
خالد: فدييييتها يا ربي والله متخبل عليها ..امايه والله اني لازم ارد الشركه الحين بس خليتها عسب اشوف هالقمر...
ام هزاع: محد قبض ايدك انت بس أشر ونحن نخطب لك...
خالد: لا امايه انتوا ما بتخطبون ولا شي انا البنت اللي ابيها بختارها لروحي ما ابي حد يتنقى لي...
ام هزاع: مب عايبنك اختيارنا...بس لا تتحراني بخطب لك وحده مغازلنها بالشارع...
حصه: لا عمووه خالد مب من هالنوع...
خالد: هيه فديتني انا برئ تصدقين امايه البنات هن اللي يرقمني يوم اظهر برا..
ام هزاع: هيه فديتك تصدق جني ما اعرفك ..؟؟؟
ويضحك الجميع....
حصه: خالد من امس يوم ردينا وانا ادق على هزاع تلفونه مغلق...
خالد: انا بشوف لج اياه اليوم بس الحين اترخص امايه...بسير الدوام..
ام هزاع: الله يحفظك...
يذهب خالد وتجلس حصه مع ام هزاع....
حصه: هييييييييييه عمتيه زين اني ذكرت...تري اهلي بيييون اليوم كلهم...
ام هزاع: يا حيهم والله الساعه المباركه يوم ييونا بيت بو منصور....
حصه: اخويه حمد رمسني قال بيون عندنا عقب صلاة المغرب وبالمره بعد هو ياي عسب يشوف حمده...
ام هزاع: يا حيهم والله زين ذكرتيني عسب ننظف البيت ونجهز الفواله عقب المغرب....
.................................................. .
وفي الجامعه الساعه الرابعه عصراً.....ميثا وشما في المحاضره....والاحاديث بينهن لا تنتهي....لكن على الاوراق...
شما( مليت يالله ابي اطلع)..
ميثا( باقي ساعه كامله لين ما يفارج)
شما(ميثا رمسيه قولي له يكفي استاذ نحن تعبانات)
ميثا(لا والله شو تعبانات هاي بعد..عسب انا ارسب اخر الكورس)
شما( الله يخس العدو والله روحي بتطلع الله لا يسامح اللي مسوي جدولي ..الاحد والثلاثاء اخس يومين..كلهن لين خمس)
ميثا(الله يصبرنا على هالجامعه)..
شما(زين على الاقل قولي له يعطينا بريك عشر دقايق)
ميثا(ليش كله تحطين علي ليش ما تقولي له انتي)
شما( بس انتي ما منج فايده)..
تنشغل شما بالمحاضره ...وتحس ميثا بإهتزاز في حقيبتها الصغيره...تخرج الهاتف...لترى رسالتين...
خالد( أعذرني لا بدا مني قصور..ما تجاهلتك ابد لا ولا هو غرور..بس ظروفي عيت معي تدور)
خالد(شوق اللقا زاد حرّه...يا ليت اشوفه بس مره..واهديه روحي بخيره وشره)...
وتناجي ميثا نفسها بعد ان تنهدت بعمق...."ويل حالي منك...شاللي بيصبرني اعيش باقي العمر وانت بعيد"
شما(شو يالسه تسوين..؟؟)
ميثا(ما شي بس اخويه عبدالله مطرش مسج يقول انه عند الباب يبيني اظهر..)
شما(هه وحليله قولي له مطولين خله يسير له المول لين ما تيي خمس)
ميثا(لا لا خليه يتنقع شوي)
شما(ههههههه برايه)
ميثا(باقي نص ساعه يعني 30 دقيقه من القهر والملل)
شما(والله برايه انا بحط راسي ما روم والله مليييت)
ميثا(صار لج ثلاث ايام مب مداومه وهذا اول يوم ومن الحين تحسين انج مصدعه لو انتي مثلي كل يوم بالجامعه فديتني وصابره على كل الصعوبات)
ينتبه الاستاذ ان الملل قد اصاب طالباته..ثم يعرض عليهن ان يستمر معهن خمس دقائق اخرى ثم يتركهن...فيرحبن بالقرار المتأخر..وما ان انتهى حتى خرج فهو الاخر يبدو منهكاً..
ترتب شما وميثا حاجياتهن...ويستعدن للخروج..وفي الحمام..
ميثا: الو هلا عبدالله..
عبدالله: خلصتي ...يالله ظهر ي انا عند الباب..
ميثا:يالله برايك...
شما: وصل..؟؟
ميثا: هيه شو رايج تيين ويانا...بيعيبج اخويه عبدالله راعي سوالف..
شما:حووو شو تقولين ...هو عرض سيارات ولا شو....؟؟
ميثا: بسم الله سكتي لا ينط لج عرج..امزح عافانا الله عوفه ...
شما: ادري بس انا قلبي ما اسمح لحد يتعدى عليه...هذا فيه ناس ولا غيرهم يسكن الفواد...
ميثا:وحليلج والله ولا يدري عنج شماني اعقلي....
شما: مصيره يعرف بطريقه او اخرى...
ميثا: على قولتج من بينا الايام بظهر ...عبادي بيحشرني ...سلمي على خالوه ام هزاع والبنات وحبي لي البيبي على خدها ...
شما: ان شاء الله وانتي سلمي بعد..
............................................
قررت احطلكم هالجزئين اللحين علشان اعرف انها الويكند وتبون تقرون وتعرفون احداث القصه وانشالله الجزء عشر الثاني بنزله هالليله كله ولا زعلكم تراني ما اقدر عليه...........
---------------------------------
اليوم انشاءالله بحطلكم خمس حلقات بس مب مره وحده...:)</font>
رد مع اقتباس
مواقع النشر (المفضلة)