<font color='#728FCE'>الحلقه السابعة
يقف حميد متصلباً لا يستطيع الحراك...بينما حمده تنزل رأسها وهي مبتسمه....ولكن ماذا تفعل شما وتلك هي الكارثه...تمسك احدى المخدات وتضعها على رأسها محاولة تغطية شعرها....ولكن دون جدوى...حيث تقدم حميد....ليأخذ هاتفه....نظر على الطاوله ولم يجده لكنه لم يستطع ان يسأل احداهن....
حميد:.................
حمده: حميد تدور شي....؟؟؟
وتخرج شما مسرعه تركض نحو الصاله.....لا تشعر ماذا تفعل او ماذا تقول....
حميد: حمده وين تلفوني...
حمده: هههه والله توه هني كان في ايد شمووه...
حميد: شموووه..؟؟؟؟
حمده: هيه شمووه...
حميد: هاي شما اللي كانت هني....؟؟؟
حمده: هيه ليش..؟؟
حميد: لا ماشي بس كبرت بسرعه ما شاء الله واحلوت....
حمده: بدينا.؟؟؟...يالله بسير ..عنك...
حميد: وين تسيرين ابي تلفوني....
حمده: اكيد شموه الخبله من الزيغه شلته وياها...اصبر بسير لها لحظه شوي...
حميد : يالله بسرعه ابي ارد البيت....
تخرج حمده مسرعه نحو المطبخ....
حمده: شما يالخبله وينج...
شما: انا هني بموت من الزيغه...شو تبين راحوا ولا لاء....
حمده: الحمد لله والشكر ..وين تلفون الريال....؟؟
شما: يا ويلي ..............صدج خبله والله مب حاسه هذا هو في ايدي يعلي الموت ما حسيت ولا دريت انه في ايديه الا الحين من الخوف ما حسيت بعمري الا وانا في المطبخ...
حمده : زين هاتي هاتي ....حركات....
شما: ذلفي يالله وتعالي بنسير فوق...ابي اعرف شو صار بالتفصيل....
تذهب حمده نحو باب الخروج وتعطي لحميد هاتفه...وتعتذر...بينما...يبتس حميد بهدوء....
حميد: عادي يا حمده كل شي ييني من شماني عادي...يا حظ تلفوني....
حمده: هه من متى عاد...يالله يالله بسير اول مره اسهر لين الحين سلم على شويخ والبنات....
حميد: ان شالله وانتي سلمي بعد..اقول ما تبيني اسلم على حمد..؟؟؟
حمده: حميدووه فارج مب شغلك...
.................................................. ..............................
وفي غرفة شما...تدخل حمده بعد ان غيرت ملابسها.....
حمده: شموه بلاج جي سطلتي..كل هاه عشان شفتي حميد...
شما: هه وع مب انا اللي تجذبني الاشكال...انا يهمني القلب...
حمده: بس والله حميد تخبل يوم شافج...حتى مدحج...
شما: شو قال...؟؟
حمده: دام انه مب هامنج حق شو تبين تعرفين...
شما: برايج تتحريني بموت واعرف...المهم شو صار بينج وبين حمد شو قلتوا ما قلتوا...
حمده بعصبيه: شو ...شاللي تبين تعرفينه وانتي كنتي ويانا بالحجره...حتى ما خليتيني اقول حق خطيبي كلمه حلوه..
شما: هييييي هااا ...بعد تبين تقولين كلمه حلوه...والله فصختي الحيا....
حمده: هيه بعد شو هاه بيكون ريلي وابو عيالي...
شما: بعد ...زين زين والله ما ادري منو كانت قبل ساعتين ما ادري ثلاث تقول لو على موتها محد يروم يقنعها.....
حمده: كنت خبله ..المهم ..ان شاء الله يكون حميد من نصيبج يا شما...
شما: بعيد الشر....
حمده: انا بسير ارقد ..تعبانه....
شما: برايج والله عطلتيني من شغلي الحين احس عمري بموت من النعاس ...صكي الليت وياج برقد انا بعد...الحمد لله ان باجر الجمعه عسب ارقد ع راحتي....
حمده: تصبحين ع خير شماني...
شما: وانتي من اهله ....
.................................................. ..
اليوم الجمعه والبيت هادئ الكل نائمون....تستيقظ نوره مبكره...تلعب مع فاطمه ابنة اخيها...وتخرج ام هزاع من غرفتها...
ام هزاع: ما شاء الله نواري اليوم ناشه من وقت....
نوره: انا رقدت امس بدري لاني كنت مصدعه وفرصه اليوم عسب العب ويا فطامي من زمان ما لاعبتها...تري والله هزااعوه فديته موصني عليها...
تتنهد ام هزاع وتغرورق عيناها بالدموع....ثم تتنهد بعمق اكبر...
ام هزاع: فديت هزاع انا والله ما يسوى البيت بدونه ..من يومين ما دق بس والله قلبي ينغزني عليه...
نوره: لا يمه لا تحاتين والله ما فيه الا العافيه...
ام هزاع: ان شاء الله يا بنتي...بس اقول حصه نشت ولا بعدها...؟؟
نوره: هيه نشت سارت صوب الميالس...تييب دلال القهوه اللي هناك تقول البشاكير ما يابنها البارحه عقب ما ساروا بيت عمي...
ام هزاع: سار ت لين الميلس .؟؟..حرام عليها والله...حامل بالشهر السابع وسايره لي صوب الميلس جن ما شي بشاكير ....ليش ما سرتي عنها...
نوره: هي قالت لي انتبهي لفطامي بسير صوب الميلس لو قالت لي ييبهن جان يبتهن....
ام هزاع: كلكن ما فيكن خير....
وتتجه ام هزاع نحو المطبخ بينما تنزل حمده...ومعها شما...والساعه تشير الى الثانيه عشر ظهراً.....
ام هزاع: بدري جان رقدتن بعد شوي...اقول حمدووه عروس وانتي ليش راقده لين الحين كنتي سهرانه على شو...؟؟
شما: ما كنت سهرانه عقب بخبرج شو صار والله يمه بتموتين من الضحك عليه...
ام هزاع : ما ريد اعرف سيري انتي ويا حمدوه طبخن الغدا...لاعت جبودنا من طبيخ البشاكير...
نوره:هههههههههههه الله يعينكن...
شما: اوهو عاد يمه شو هاا...؟؟؟ الحين نحن نأجز عسب نرتاح ونيلس وياكم ولا نسير للبصل و المطبخ...يمه الله يخليج والله مشتهيه من ايدينج اكل...
ام هزاع:خل عنج الدلع...انا ما بدش المطبخ سيري انتي...ويا حمدوه سون الغدا...عنبو بنات شكبركن ما تبن تدشن المطبخ....
تدخل حصه الصاله تحمل في يديها صحوناً ثقيله احضرتها من مجلس الرجال.....وتسرع ام هزاع لحملها بدلاً عنها....
ام هزاع: يا حصه يا بنتي كم مره قلت لج ما في داعي تسوين كل هالشغل عيل ليش يايبين البشاكير نحن...؟؟؟
حصه: لا والله يا خالتي ملانه ما اعرف شو اسوي وامس اخواني ما ظهروا من هني الا 12 بالليل والبشاكير رقوود قلت اكيد ما نظفن صوب الميلس...وسرت انا...
ام هزاع: الله يعافيج يا حصه ويسهل عليج...سيري ارتاحي فديت ويهج لو درى هزاع والله ليذبحنا انج يالسه تحوسين بالبيت ..قري بحجرتج...
شما: شعليج يا حصوه مدلعينج مب نحن سايرين نكرف بالمطبخ...من صباح الله خير...
حمده: هههههه الله يغربل ابليسج يا شموه يالله بنسير نخبص لهم أي شي...
شما: هيه والله بنسوي شي يلوع بالجبد عسب محد يطلب منا شي....
تركض فاطمه نحو امها....وترفعها للاعلى.......تصرخ ام هزاع....
ام هزاع: نزليها البنت ثجيله ...انتي كيف تفكرين يا حصوه هاللي ببطنج امانه...خافي ربج ذابحه عمرج بالشغل....
حصه: بس عاد يا خالتي وايد تدلعيني البنات جي بيكرهوني....
ام هزاع: ما عليج منهن.....خلهن يتعلمن شغل البيت ما بينفعهن عقب الا هو....
وتنصرف ام هزاع نحو حجرتها فيما تصعد حصه للأعلى ......
.................................................. ........................................
.........
وفي العصر حوالي الساعه الخامسه ....بينما يجلس ابو هزاع في فناء البيت الخارجي...يشرب الشاي مع ام هزاع ونوره وحمده..
ابوهزاع: انا بسير باجر المزرعه وبتم هناك اسبوع...
ام هزاع: خذني وياك....والله من زمان ما سرت صوب المزرعه ولا شفت الدنيا هناك بليوا....
ابو هزاع: لا لا ما في داعي عقب بنسير كلنا الحين مب وقته تمي ويا البنات وحصوه منو تبين يتم وياهن....
نوره: خذني انا وياك والله انا المظلومه اللي محد يطلعني....
ابو هزاع: زين زين يصير خير ...المهم انا ساير باجر المزرعه لا تأذن امكن وايد....
حمده: ان شاء الله يا بويه....
ام هزاع: انا بسير الحين داخل .....المغرب قرب بسير اتوضا واصلي لي ركعتين....
حمده: تريي يمه بسير وياج...
ابو هزاع: وين شمووه محد يشوفها مختفيه...
نوره: شموه تعدل حجرتها وتبخرها....لان ربيعتها ميثا بتييها....
ابو هزاع: من ميثا هذي..؟؟؟
نوره: بنت بو سعيد اللي ساكنه جريب من بيت عمي سالم في المناصير....
ابو هزاع: هيه هيييه عرفتهم..
نوره: بسير ابويه بساعد شماني اكيد تبي شي....
ابو هزاع: حتى انا بسير بتوضا عسب اسير المسيد....
.................................................. ......................
وفي غرفة شما كل شي مرتب و رائحة البخور تعطر ارجاء الغرفه...
حمده: يا سلام يا شما شو كل هالزين...يا ليت لو تيي ميثا كل يوم عسب تنظفين حجرتج وتبخرينها...
شما: هههههههه حمدوه والله لو تدرين شو سويت بتموتين من الضحك....شوفي كل شي ..الملابس والاوراق والشنط وكل شي عقيته جي داخل الكبت ...
حمده: هههههههههههه وانا اقول كيف خلصتي المقبره هاي اللي يبالها على الاقل اسبوع في نص ساعه...
شما: شسوي والله ما شي جدامي الا هالحل...
حمده: تبيني اسوي لكم شي ما شيات....تراني فاضيه....
شما: لا فديتج البشاكير خلصن كل شي..
طرقات على الباب....
خالد: ممكن ادخل...
حمده: تعال يالمؤدب محد هني...
شما: هلا خلادي شحالك...
خالد: يالله اموت يوم تقولين خلادي يا شما...ليت اللي ببالي تناديني خلادي...
شما باستخفاف: كل ما قلنا بيعقل ..تخبل اكثر ...وبعدين وياك انت...
حمده: خليه يا شما والله خالد نور هالبيت مهما يسوي ما عليه عتب...
خالد يستظرف: يعني مينون صح...تقصدين جي..؟؟
شما:ههههههههههههههههههه
حمده: هههههههه الله يخليك والله ما اقصد جي اقصد شو ما سويت يعجبنا ولا نتضايج منه...
خالد: فديتني والله..حمدوه تعرفين الكل هني قدرت اكسب رضاهم وبحياتي كلها متوفق ويا الناس ..الا انسانه وحده مب راضيه تتقبل مني أي شي ودايما تستخف فيني مع اني مب لهالدرجه ثقيل......
شما: خالد لا تقول جي يعلني افداك والله ..ادري انك تطريني ...بس والله ما عليك كله ولا منه احب اتحرش فيك لانك مول ما تسوي لي سالفه....
تأتي نوره مسرعه من الخارج....
نوره: شماني شماني ....ميثوه وصلت ...
شما: والله!!!!
حمده : يالله يا خالد ما نبي نشوفك اختفي عن الانظار بس ساعه ...
يحاول خالد ان يخفي تعابير وجهه التي كللها الفرح...يسعى جاهداً ان يخفي ابتسامة فرح ارتسمت على وجهه.....
خالد: زين انا بسير حجرتي ومب ظاهر لين ما تيي شما وتقول ان ميثوه راحت البيت....انا ولد مؤدب صح..؟؟؟
شما: ههههههههه استظرف بعدين اعرفك ما تيوز ...بتيلس بالحجره..؟؟؟اقص ايدي لو يلست فيها 10 دقايق...
حمده: يالله عيب البنيه تتريا برا..
نوره: لا هي الحين يلست ويا امايه بالصاله...تتخبرها عن علوم اهلها...
.................................................. ..................................
في حجرة خالد...يلقي بنفسه على سريره...يرن هاتفه.....
خليفه: السلام عليك يا شيخ...
خالد: وعليكم السلام والرحمه يا حيهم والله يا حي هل العين اللي ما ينشافون...
خليفه: دخيلك اسكت والله واصل حدي منك....عنبو مبند تلفونك 24 ساعه...
خالد: شسوي يا خليفه من قلة البخت...صار لنا شهور ولا مزيونه تدق على تلفوني....
خليفه: هههههههه الله يقطع سوالفك انت بعدك للحين...
خالد:هه وانت من متى عقلت ان شاء الله...
خليفه: شحالك وعلومك عساك بخير...
خالد: والله تمام بس تدري يا خليفه ودي اخبرك شي ...بس متى بتيي بوظبي...
خليفه: انا الحين في بوظبي ولا ليش داق لك من زين ويهك.....
خالد: لا تقول يا شيخ...؟؟ ليكون بس تباني اطلع وياك...
خليفه: عيل شو...؟؟
خالد: اسمحلي ما اقدر واليوم بالذات عندي ظرف طارئ....
خليفه: خير ان شاء الله...
خالد: خليفه شو رايك تيي عندي البيت..ولا حد وياك من الاهل..؟؟؟
خليفه: هو فعلا حد وياي من الاهل بس ف بيت ناس مودينهم خلاص بمر عليك بس ما بطول عسب ارد اييبهم...
خالد: خلاص حياك انا ف البيت اترياك...
خليفه : تم ربع ساعه وانا عندك.....
.................................................. ........................................
......
وفي غرفة شما...نوره وحمده وشما وميثا متجمعات......
ميثا: والله وناسه يا حيكن ليت عندي خوات شراتكن...
شما: لا والله الوناسه عندج انتي بروحج ودلع على كيف كيفج...محد يقول لج أي شي عايشه على هواج...
ميثا: بس عاد لا تضحكيني امحق حريه...صح دلع بس ع الفاضي...تعالي شوفي يوم اضيّج محد يدري عني..والله لروحي وبس...
حمده: والله صراحه يوم يكونن عندج خوات احسن من يوم تكونين بروحج وناسه سوالف البنات...
نوره: هيه والله انا كنت بموت لو ما كانن حمدوه وشما وياي....
شما: ههههه الله يخليكن من متى هالحب اللي نزل عليكن.....
حمده: شموووه انا بسير اييب العشا هني زين...
نوره: وانا بنزل اساعدج بعد...
ميثا: لا لا ما في داعي تييبن العشا لين فوق والله عيب شو بتقول خالوه ام هزاع عني...
شما: عادي والله امايه ما تقول شي...
ميثا: لا والله ...ما بي بننزل نتعشى تحت شرات كل مره...
شما: خلاص حمدوه عقب شوي بنزل نحن تحت..بس بنسولف ..حمدوه يوم تخلصون طرشي حد من البشاكير...
حمده: زين والله مستويه اليوم جرسون تبين بعد شو....؟؟
شما: لا لا امزح معاج فديتج.....
تظهر حمده وتبقى شما وميثا فقط بالغرفه..وبينما يتبادلان اطراف الحديث تقوم ميثا امام المرآه تريد ان تنظر الى شكلها...ثم تلعب ببعض الحاجيات فوق الطاوله....
ميثا: الللللللله شموه منو هذا الغاوي....؟؟
شما: هههههه منو الغاوي نحن ما عندنا غاويين...تقصدين منو فيهم ..؟؟؟..في ثلاث صور احلى واحد فيهم ابويه فديت روحه....
ميثا: لا خليه هذا عرفته انا اطري هذا....
شما: شو لون البرواز ما شوف تقصدين منو..؟؟
ميثا: هذا يعلج يا ربي اللي حاطه عليه صورة سبال بالطرف....
شما: هههههههه ومن عندنا سبال غير خلووود...
ينبض قلب ميثا بسرعه حينما سمعت اسمه وتغير شكلها...لم تستطع كبح جماح شعورها....تتضارب فيها المشاعر لم تعد قادره على النظر في الصوره ...هناك شئ ما يؤلم احساسها...احست انها خفيفه تستطيع الطيران .....الهي انه الحب لا تدري متى يزورك او يخطف انفاسك....
شما تصرخ: حوووو يا خبلوووه وين سرتي من ساعه اكلمج...؟؟
ميثا: هاه...هيه شو الحين يبونا ننزل للعشا...؟؟
شما: بسم الله الرحمن الرحيم...من طرا العشا ..اكيد انتي يوعانه...
ميثا: لا والله .....
شما: عقب العشا ابيج بسالفه خطيره....
.................................................. .
الحلقه السابعه الجزء الثاني...
في مجلس الرجال في بيت ابو هزاع...خليفه مع خالد في المجلس....يستأذن خالد لاحضار القهوه.....وفي البيت...
شما وميثا وحمده ونوره وحصه في الصاله...يتبادلن اطراف الحديث...يدخل خالد الصاله دون استئذان... لا تسعفه قدماه كثيراً امامها ...من التي امامه ؟؟..انها ميثا التي سلبت منه العقل والتفكير....يتبلد احساسه في تلك اللحظه لا يستطيع رفع عينيه من وجهها الملائكي الصبوح.....
حصه: هاه يا خالد اش تبي ...نحط لك العشا الحين....
وبحركه سريعه ...تغطي ميثا وجهها....وتنزل رأسها للاسفل......
خالد: اسف والله ما ادري انكم يالسين هني....حصه...اذا خلص العشا سووا لي تلفون...بيي اخذه ...
نوره: فديت اللي يستحون انا بس....
شما تحدث نفسها" امحق حركات والله براويك يالطفس."
ميثا تكاد تجن...الحراره في اطرافها ارتفعت...تحدث نفسها" فديت هالويه يا ربي..والله قمر 14 ..مالوم البنات لو تعلقن فيه يخبل يا حلاته ولا الصوت يا ربي عليه يقطع القلب.."
شما: ميثوه تعالي بنسير فوق ابيج بسالفه....
نوره: يالله حمدوه بنسير نودي القهوه صوب الميلس....
حمده: ليش من هني..؟؟؟
حصه: سيري يا حمده ساعدي نوره هذا خليفه ربيع خالد...
تلتفت شما بسرعه نحو البنات في الصاله وبصوت غير طبيعي : خليفه..؟؟!!!!
حصه: هيه خليفه...ليش تعرفينه..؟؟
تسحب شما ميثا من يدها مبتسمه: نحن مب سايرات فوق انا بتم هني لازم اشوف خليفه هذا....
حمده: اش تبين به..؟؟
شما: بس جي فضول لازم اشوفه....
نوره: كيف بتشوفينه وخالد وياه....
شما : بشوفه بطريقه واي طريقه بس بشوفه....وخل خالد يولي شدراه والله ولا بيدري...
حمده: تحذري يا شما تري والله خالد ما يعصب وان عصب اتقي شره....
شما: بس بس عاد ميثوه تعالي بنسير ميلس الحريم عسب اقولج اللي ببالي...وعقب بنظهر برا يوم يطلع خليفه اشوفه...
وفي مجلس الحريم شما وميثا فقط متواجدات...
ميثا: شموه زيغتني شو فيج قولي والله قلبي يرجف من الصبح...
شما: ميثا بقولج شي انا اعرف انج منجذبه وايد حق خلادي ...
ميثا: شما ....شو تقولين...انا ااا...انا...
شما: عادي انا وانتي اكثر عن خوات والله اني احسج اقرب لي من حمدوه...بس لاني احبج بصارحج...خالد اخويه ما يناسبج ولا انا ما ودي تكون حرمته غيرج...بس خالد اخويه لعاب وما يستقر على بنيه...شو تتحريني برضى على ربيعتي شي مب زين..
ميثا: لا تقولين جي...
شما: الا بقول...سمعي يا ميثا اذا حسيتي بعمرج القدره انج تتحملين الحياه وياه هذا في النهايه قرارج...لكن انتي حره صدج ما اكذب خالد حنوون فوق ما تتصورين وحساس وفي صفنا نحن البنات ولا يظلم مول...بس مشكلته مشكله....
ميث بصوت هامس: فديته يا ربي...
شما: هاه..؟؟؟
ميثا: لا ما شي ...المهم شماني انا ما بزعل من رمستج بس الحب مب باختياري على العموم بينا رمسه ثانيه خلاف...بس اقول...الحين ابي ادق حق امايه تييب لي الدريول عسب ارد الوقت تأخر وانا ابي ارد عسب ارقد....وباجر دوام مثل ما تعرفين...الا اقول شو سويتي بالغياب اللي عندج....
شما: هيه والله صدج بخبرج بعدين عقب من بينا رمسه ثانيه....
ميثا: شماني انتي مب زعلانه مني..
شما: لا فديتج مب زعلانه ولاشي بس عقب بتقولين شموه قالت...
ميثا: الايام من بينا....وانا واثقه من اختياري....بعدين خالد ما يدري...يعني حب من طرف واحد...
شما: هو ما يدري بس تبين الصدج هو بعد وايد متحمس لج..كل ما يبت طاريج تخبل علي...
ميثا بفرحه جنونيه..: لا تقولين والله بموت الحين لا ترمسين جي بتخبل...روحي متخبله من شفته اليوم....
شما: يالله هوني على عمرج يا حبوبه
.................................................. ..............................
غادرت ميثا ..بعد ان ودعتها شما...وبينما خالد يسترق النظر من مجلس الرجال...ليرى ملاكه وهي تغادر بيتهم....رجع الى المجلس....
خالد: ااااااااااه يا خليفه خبلت بي...
خليفه: هههههههههههه كم مره تتخبل يا خويلد بالشهر...
خالد: عيل والله اني اول مره احس بهالنار اللي بيوفي...
خليفه:سلامتك ما تشوف شر...الله يصبرك بس...
خالد: ويصبر الجميع....
يرن هاتف خليفه...يستنتج خالد انه من اهله...ثم يغادر لبضع دقائق حتى يأخذ خليفه راحته...وبعد ثواني قليله...
خليفه: يالله خويلد انا استأذن الاهل يبون يردون مثل ما تشوف الوقت متأخر وباجر دوامات...والعين مب جريبه...
خالد:لا والله افا بس ما يسلنا والله....
خليفه: مره ثانيه ان شاء الله...
خالد: بحفظ الكريم يالغالي....
في طرف البيت وبجانب الزراعه ومن مكان يكاد يراه الخارج...تسحب شما اختها حمده ويختفين بين الاشجار ...حمده بطبيعةالحال معارضه ولم يعجبها ما تفعله شما ولكن ماذا تفعل امام عناد شقيقتها الجميله شما....التي تكاد تموت وترى من هذا الذي يسمى خليفه....
يخرج خليفه نحو الباب...يبتعه خالد...وبعيداً عن الباب يودع خالد خليفه مسـتأذناً منه لكي يرجع للداخل...يرجع خالد ويمشي خليفه نحو الباب...وفجأة تصرخ حمده...
وماذا يكون موقف شما...
حمده: واااااااااي صرصور الله يخسج يا شموه...
خليفه: بسم الله الرحمن الرحيم من وين ياي الصوت....
يخرج خليفه مسرعاً نحو الخارج....
شما: يعلج يا ربي الموت الحين هذا صرصور والله ان سمع خالد اليوم بيقرون على روحج الفاتحه...
حمده: شسوي كله بسببج..انتي يبتيني هني...
وتنهضان فيما يخرج خالد مسرعاً نحو مصدر الصوت وبحركه تلقائيه تخرجان حمده وشما من خلف الزراعه المحاذيه للباب....
خالد بعصبيه شديده: من اللي صارخت فيكن...
شما: منو اللي صارخ..
حمده بخوف.: خالد شو فيك..؟؟
خالد: بسرعه من اللي صارخت فيكن...قبل ما اسوي شي اندم عليه عقب...
شما: شفيك من صرخ ...انت شو يالس تقول...
خالد: شما انجبي وطبي لسانج بثمج...من اللي صارخت يا حمدوه...
حمده وهي ترتجف : ما ادري ما ادري...
خالد: حمده تعرفين لو عصبت شو بسوي احسن ترمسين ...كيف ترضين علي هالصوت يطلع وربيعي هني لا وبعد في الحوش ياليت يوم طلع...رمسي يا حمدوه...
شما: خالد...
خالد: انتي سكتي بس وبعدين ليش يالسات هني...شموه والله ان ما رمستن ما تطبين الجامعه وانتي برايج...
ينصرف خالد مسرعاً نحو الداخل....
حمده: شفتي كنت ادري انه بيعرف...
شما: كله منج انتي يعني الحين ذبابه ما ادري بعوضه استوت صرصور...الله ينكد على عدوينج نكدتي علي فرحتي....
وفي البيت ............
يدخل خالد المطبخ ..وحصه موجوده...
حصه: شفيك يا خالد معصب...
خالد متجهاً نحوالثلاجه: لا ما شي...
حصه: كيف ما شي والله شكلك متضايج.....
خالد: سيري تخبري بنات عمج شو مسويات مسودات الويه......الشرهه مب علي ولا على شما الشرهه على حمدوه اللي نقول عاقله...امحق ويه وعقل...بس والله ان ما ادبتهن ما كون خالد...بعدهن ما شافن الويه الاسود مني...هذيل مب ويه احترام ولا حشيمه...
حصه: بسم الله شو مستوي...؟؟
خالد: الخايسات يصارخن بالحوش وخليفه هني شو بيقول عني وخواتي انا في الحوش وهن يعرفن ان في ريال بالميلس...
حصه بخبث: والله يا خالد ما ادري شقول لك بس تحذر على خواتك..وخصوصاً على شموه...
خالد باستغراب: ليش شو فيها شما مسويه شي..؟؟؟
حصه: لا لا مب مسويه شي بس تعرف بنيه وطيش البنيات....
خالد: حصوه في شي ولا لاء..
تدخل حمده المطبخ وعندما ترى خالد بالداخل...تخرج مسرعه.....
يصعد خالد للاعلى والظنون تغزو رأسه...بما تقصده حصه زوجة اخيه....
.......................
في غرفة حمده شما والحديث له بقيه...
شما: ما ادري احس في مصيبه بتستوي...
حمده: كله من تحت راسج....
شما: ما ادري والله ...
حمده: لا وازيدج من الشعر بيت....كان خالد ويا حصوه بالمطبخ شو يضمن لج انها ما قالت له...هاي محد يأمنها ولا يأمن الحريم بشكل عام...
شما: تخسي وتعقب تقوله شي هذي...
حمده: سكتي بس اذا قالت شي تستاهلين انتي اللي يبتي الرمسه لعمرج ليش تقولين جدامها..انج تبين تشوفين منو خليفه ما ادري منوهذا...؟؟؟
شما: خليها ترمس وشوفي شو بييها...بسير ارقد انا وانتي خبريني لو شي استوى باجر...وراي دوام..
..............................</font>
رد مع اقتباس
مواقع النشر (المفضلة)