<font color='#728FCE'>الغفو اختي شمــــه و عشان خاطرج بحط بعد جزء مع انه دلوعة الشاشه وصلتنا لين الجزء الأول من الحلقه السادسه.. انا الحين بحط الجزء الثاني منها..
---------------------------
الحلقه السادسه الجزء الثاني
بعد صلاة المغرب حضر الضيوف والذي في حقيقة الامر ..هم اخو ابو هزاع...و زيادةً على ذلك فهم ايضاً اهل حصة زوجة هزاع وحمد ذالك الخطيب المرفوض هو اخو حصه..وفوق كل هذا فإن حصه لا تعلم شيئاً عن رفض حمده لاخيها...وفي غرفة حمده....يخرج خالد بعد ان اقنعها وخرج منتصراً....
وفي غرفة الضيافه المخصصه للرجال..يوجه ابو هزاع احدى الخادمات بتعديل فناجين القهوه والحلويات بوضعيه معينه...ثم ينصرف تاركاً الامر لها ليدخل المنزل من الباب الاخر وينادي على ام هزاع ثم يصعد للاعلى ليذهب مباشرةً الى غرفة حمده..
وبطرقات حانيه وخفيفه على الباب...
ابو هزاع: حد هني من العرب..
حمده: لبيه لبيه ..
وتنهض حمده بسرعه وتفتح الباب ...
حمده: هلا بويه هلا شحالك تعال ادخل هني ...
ابو هزاع: الله يسلمج...وين ايلس من بين هالعفسه ...
تبتسم حمده بخجل : تعال هني ابويه هالمكان مرتب......
ابوهزاع: زين يا حمدووه زين...تدرين ليش ياي انا عندج الحين وهاد ميلس الرياييل....
حمده: هيه.............
ابو هزاع: شو قلتي يا بنتي وشو عذري حق عمج بو منصور...والله ما عندي أي عذر عسب ارده..بس انتي فهميني يا بنتي ليش ما تبينه وانا والله بقتنع...
حمده تتنهد و بصوت مغاير للعاده..: خلاص يا ابويه اللي تشوفه ..
ابو هزاع: لاء انا ما بجبرج على أي شي ما تبينه...وهذي حياتج وانتي حره فيها...بس والله ابي اعرف عسب اقتنع...
حمده: لا فديتك يا بويه..انا راضيه باللي تشوفه انت وما في حد بيكون اقرب لي من حمد ولد عمي بس انا كنت شوي متحسسه من الموقف...
يقبلها ابو هزاع على رأسها ويحضنها بقوه.....
ابو هزاع: الله يرضى عليج يا بنتي ويوفقج دنيا واخره....والله هذيل بناتي اللي ابيهن جي..وما اريد اسمع منهن الا هالرمسه بس ان شاء الله تكوني مقتنعه وقلبج راضي...
حمده: اتطمن يا بويه وما يصير خاطرك الا طيب والله اني راضيه ومقتنعه بعد...
.................................................. .................
وفي المجلس وبعد ان حضرسالم ابو العريس ومنصور وحميد و العريس حمد....يمتلئ المجلس بالرجال وينهض خالد لتقديم القهوه .....يجلس خالد بجانب حمد..
خالد: يالله شو هالكشخه....من قدك اليوم...ومتدهن بدهن عود بعد...زين زين لو تخطب كل يوم عسب تتدهن بدهن عود..لوعت جبودنا بريحتك...
حمد: بحياتي كلها ما شفت حد متفيج شراتك حتى في اصعب اللحظات..
خالد: هههههههه اصعب اللحظات...ليش اصعب اللحظات...؟؟؟ ثانويه عامه هي ...عيل شو تقول البنيه ...؟؟
حمد: اسكت والله اني شرا البنيات اليوم زايغ....ما ادري احس اني مردود بالخيبه شرات كل مره...
خالد: يمكن عاد محد يدري بس تفاءل بالخير يمكن يكون عند ابويه رد يفرح خاطرك...
حمد: احلف يا خالد...والله شكلها عندكم العلوم الزينه...
خالد: انا ما قلت شي قلت اتريا ابويه يمكن عنده علوم زينه...ما قلت في علوم زينه....
حمد: زين اقول ...قم اذلف من ويهي هناك...تنكد علي الليله من اولها انا روحي ما يحتاي....
خالد: زين بذلف بس ما اشوفك تناديني عقب.....بسير انا عند الكباريه ش للي باليهال وصدعتهم..
ينهض خالد ويخرج من المجلس نحو البيت الداخلي .............
خالد: وين امي ........امايه.....
ام هزاع: لبيه يا خالد هاه شتبون....
خالد: شو هاه وين العشا والله متنا من اليوع....
ام هزاع: وليش تصارخ يعني نحن شذنبنا...يوم تبون العشا جان طرشتوا حد يقول ولا دقيتوا تلفون...
خالد: زين يمه خلصتوا ولا اسير وعقب بتحطونه..
ام هزاع: لا والله جانك تبينا نحطه الحينه بنحطه تراه زاهب...
خالد: عيل تريي شوي بسير ازقر حميد يساعدني...
حصه: نوره ظهري فديتج ولا سيري لبسي وقايتج حميد اخويه بيدش يساعد خالد...
نوره: لا ما عليه انا اصلاً بسير فوق....
ام هزاع: يالله يا خالد سير ازقر حميد وتعالوا بنكون خلصنا....
خالد: ان شاء الله يمه..
.................................................. ......................
وبعد العشاء يتجه ابو هزاع نحو الصاله في المنزل وينادي على حمده ...
ابو هزاع: حمده تعالي ...
حمده: هاااااه بويه ...
ابو هزاع: سيري لبسي وقايتج حمد ولد عمج بيدخل هني يسلم عليج....
حمده بخجل: لا يا بويه ما في داعي خله عقب الملجه..
ابو هزاع: لا يا بنتي ولد عمج مصمم الا يسلم عليج ..مستانس والله...
يدخل خالد بسرعه...
خالد: يالله عاد يا حمدوه بعدج ما خلصتي ...الريال بيموت علينا برا....
حمده بخجل: بسكم عاد والله بموت من المستحى...خلاص صبروا علي شوي....
صعدت حمده بسرعه نحو غرفتها وغيرت ملابسها......ومرت بعد ذالك على غرفة شما....وبطرقات سريعه عليها....
حمده: شما شما لحقي علي والله بموت...
شما: اوووه ليش ويهج جي شرا الطماط ليكون سلمتي على حمد ولا خبرتيني....
حمده: صدج انج فاضيه..يا خبله سيري ...تعالي وياي ابي حد يآزرني...بموت لو نزلت بروحي..
شما: ههههههه لا والله من وين عطيتيني تصريح صدج خبله شو تبين خالد يذبحني....
يدخل خالد غرفة شما....
خالد: حمده مصختيها عاد وينج الريال بيروح عيب والله ...شو يالسه تسوين هني فغرفة هالخبله...تاخذين دروس خصوصيه...؟؟
حمده: خالد الله يخليك خلها تنزل وياي والله بموت من الزيغه....
وتضحك شما....
خالد: شو تخبلتي انتي لو قلت لها تدخل وياج ما بيخلينا حميد وبيقول يبي يدخل بعد....
شما: وع وع وع اذا دخل هذا انا ما بدش....
حمده تسحب شما من يدها....
حمده: يالله ما فينا على هالسوالف نزلي يالله تاخرت...
شما: شو لحقتي تتولهين....؟؟
حمده: صدج انج قليلة ادب انا مب متفيجه اتجادل وياج....
شما: ههههههه شوي شوي يكفي سحب شو والله احس عمري عنزه وانتي تسحبيني جي...صبري بييب وقاية امي وبدش...
حمده: يالله بسرعه...انا بدش ميلس الحريم وخليهم ييون هناك...
شما: ان شاء الله يالعروس.....
...............................................
وفي مجلس الحريم تدخل شما لتجد حمده تضئ انوار الغرفه...وتقوم بتعديل احدى الوردات على الطاوله...
شما: هه بدينا بالحركات يعني تبينه يدش واونج تعدلين الورد عسب يمدحج يقول ربة بيت سنعه....
حمده: شموووه بس عاد والله انج وايد تتمصخرين عليه....
شما تصرخ: يا ويلي وصلوا يلسي يلسي وين اندس والله بموت...حمدووه وين اندس ...
حمده بخوف وارتباك: سيري ورا الباب واتريي لين ما يظهرون...
شما: شو تقولين واذا صك حمد الباب عليكم وشافني وراه شو بيقول...
حمده: بس جب ما يروم يصك الباب واحنا لروحنا ...اندسي يالله وصلوا...
تسرع شما خلف الباب وتحاول جاهده ان تختفي عن انظارهم.....ويدخلون نحو الغرفه خالد وحمد واخوه الذي يصغره حميد......وفي اخر المجلس تجلس حمده وهي تكاد تموت من الخجل...تعلو وجنتيها حمرةٌ شديده...وتنظر للأسفل...
حمد : السلام عليكم ....
حمده: وعليك السلام يا حمد...
خالد: شحالج يا حمده...
حميد: انت شعليك يا خالد صدج لقافه...
خالد: شو شعلي هاي اختي ما تشوف كيف مستحيه لازم اغير شوي الجو....
حميد: امحق ويه...صدج ملقوف ...انا والله لو كنت مكان حمد لعطيك على ويهك....
خالد: هههههههههه يالله بنيلس وياكم شوي عقب حمدووه الديايه بتسير ترقد...
حمد: ممكن لو سمحتوا تظهرون شوي.....؟؟؟
خالد: افا عليك....
حميد: انا بتم وياك شوي...
حمد: حميد مب وقت المصخره عمي بيعصب الوقت متأخر...
ينهض حميد وخالد ليخرجا...
حمد: خالد ممكن تصك الباب....
وبسرعه وخوف وتردد تصرخ حمده بفزع غريب...
حمده: لا لا لا ياخالد لا تصك الباب.....
ينظر اليها حمد وخالد بإستغراب شديد...من ان تكون هذه حمده التي لا تستطيع رفع رأسها خجلاً والان تصرخ وبقوه وبفزع غريب...
خالد: بلاج شو من شو متروعه....
حمده وبخجل شديد هامسه بخجل..: لا ما شي بس لا تصك الباب ابي اسمع امايه لو نادتني...
حمد: خالد على هواها لا تصك الباب بس اذلف انت ويا هالتيس....
خالد: على امرك...
يخرج خالد وتبقى حمده مع حمد ...
حمد: شحالج يا حمده...
حمده: بخير وسهاله ...شحالك انت...
حمد: بخير ربي يسلمج ...
حمده: الحمد لله...
حمد: تعرفين يا حمده ما ادري بشو ابدأ ولا اقدر اسولف ..احس لساني معقود...كل اللي اقدر اقوله انج ممكن تتخيليني اسعد انسان في هالدنيا....
حمده:...............................
حمد: حمده لا تسكتين خليني اسمعج...عسب لو ظهرت من هني وانتي ما رمستي يمكن اكره عمري....
حمده بخجل: شو تبيني اقول....؟؟؟
حمد: خلا ص تكفيني هالكلمه...ما بتخليني ارقد يكفي اني سمعت صوتج....
حمده: وايد تبالغ....
حمد: ما بقول غير الله يسامحج...انا ابالغ ..؟؟؟ مصيرج تعرفين مع الايام شكثر احبج يا حمده...
حمده: مااعرف شو اقول بس الايام بتثبت لي كل شي...
حمد: هيه والله صدقتي...حمده انتي لا تدرسين ولا شي ...وادري تبين تشتغلين...بعد كل هالتعب...بس شو رايج نملج في اجازة الصيف عقب ما يأجزون....
حمده: الشور شوركم انت وابويه وعمي...
حمد: انا ما يهمني غير رايج.....
حمده: انا رايي من رايك ولا ازيد عليه والشور شورك انت...
حمد: يعلني ما خلى منج يا حمده...والله حبج كل يوم في قلبي يزيد....
حمده تكاد تموت من الخجل.:..............
حمد: خلاص يا حمده انا بروح...ديري بالج على نفسج...وانا بعلكم كل يومين بتلاقيني هني...
حمده: افا عليك يا حمد البيت بيتك...
حمد: بس عقب بتملين وبتقولين...اففف منه متى بيفارج واخاف تقولين لعمي يغير بيتكم...
تضحك حمده....
حمد: فديت هالضحكه يا ربي....الله لا يحرمني منها....
يخرج حمد....وتبقى حمده في الغرفه....ثم تظهر شما ..وترمي نفسها على احدى الكنبات...
شما: اففف والله اني كنت بختنق....يا ويلي مت من الزيغه...
حمده: اااااااه ما صدقت راح كنت ميته من المستحى...
شما: يا ويل حالي عليك يا حمد ولد عمي ..ثره رومانسي وانا ما ادري...؟؟
حمده: الله يغربلج تميتي تتسمعين بكل شي....
شما: سكتي بس انتوا تسولفون وانا ذايبه ورا الباب...
حمده: هههههههه الله يقطع سوالفج يا شمووه والله انتي نكته....
وفي اثناء حديث حمده ...يرن هاتف ملقى على الطاوله في المجلس......
شما: تلفون منو هذا ..؟؟؟
حمده: ما ادري...
شما: يمكن تلفون حمد نساه هني...
حمده: لا لا مب تلفونه مب هاه نوعه شفته تلفونه غير مب جي...شوفي رقم منو ....؟؟
شما: حشى عليه لو اموت ما ارد....
حمده: بسير ازقر خالد ......هيه يمكن تلفون حميد...
وبينما تتجادلان حول من يكون هذا هاتفه....يدخل حميد دون استئذان وبسرعه....لتفاجأ حمده وتصدم شما...ويبقى حميد متصلباً في وسط المجلس....
.................................................. ........................................
...................</font>
رد مع اقتباس
مواقع النشر (المفضلة)