<font color='#000000'>حبيت أنقل لكم هذه القصه الخياليه وإن شاء الله تعجبكم مثل ما عيبتني:
الشخصيات وهم:
ناصر:وهو البطل الرئيسي...شاب في مقتبل العمر23 سنه..
خوله البطله الرئيسيه..عمرها 18 سنه...ثانويه عامه وماشاء لله شطورة...وخجوووووووله
محمد:إربيع محمد من يوم هم صغار
هنادي:إربيعة خوله الروح بالروح خطيبة محمد..طبعها مرح جدا..
حارب: أخو خوله الكبير..وهو الولي عليها عقب وفاة امه وابوه...
أسما:زوجة حارب...وهي إخت سارة الكبيره
خلود إخت حارب الصغيره...عمرها 7 سنوات ووايد تشبه خوله...
ضاعن :ولد عم حارب وخوله...وقبل هدايته كان عدو ناصروما يحبه...لكن بيصير فيه شي عقب..
سيف:إربيع ناصر ومحمد وولد خالة سارة وأسماء
حصه:إخت سيف
الجزء الأول:
يوم الخميس اللي كان يمثل يوم عام لزيارة القريه العالميه..دخل ناصر وأصدقائه القريه فقال سيف:أقولكم تراني ماأروم أمشي من اليوع...مشو بسرعه طوفوا جدامي خلونا ناكل لقمه..
يرد ناصر وهو مبقق عيونه:ماشاء الله عليك ماتشبع إنت دومك يوعان...وعلى قولتك أسوي رجيم..
محمد وهو يضحك: أي رجيم...خل يحمد ربه انه رام يلبس الجينز(طبعا الشباب متجنزين عشان بيركبون الألعاب)
في القريه المصريه:
ساره:أمي بسرعه عاد تراني مليت ..
الأم:صبري...شوفي الجلاليب شو حلاتهن..
سارة وهي تتأفف:امايه..انتي ماتشبعين من الجلاليب...عيل هذيل اللي بالترولي حق منو شارتنهم؟؟حشى مب درزن نحن..
الأم:حسبي الله على إبليسج...لي أنا ولكم انتوا ولبنات خالوتج وحليلهم...شوفي شوفي شحلات الجلاليب اللي بها المحل..
سارة:لاحوووووووول...وسارت الأم صوب المل وخلت سارة تتحرطم...
أسماء:هه هه هه ساروه أمي وينها؟؟؟
سارة:دوج دوج الماي عن تطيحين علينا..
حصه:وحليلها ها كله من السوري...أقولج ماشفتيها وهي تكاسر الريال خسرته 50 درهم هههههههههههه...
أسماء عيل أخليه يقص عليي...المهم أمي وينها؟؟
سارة:أمج طايحه في هالجلاليب...الناس يتطورون ونحن بعدنا على الجلابيه..
حصه:صدقج الكل قام يلبس قمصان نوم ونحن على نياتنا..
أسماء(طبعا هي معرسه):عيب عليكن خلو هالقمصان حق ريايلكم مب أحين تلبسونهن..
سارة:سيري سيري عند امايه تراج معرسه وخالصه..
أسماء وحصه يضحكون على رمست سارة..
ـــــــــــــــــــــــــ ـــــــــــــــــــــــــ
ـــــــــــــــــــــ
محمد:هاه سيف ترست كرشتك ولا لأ؟
سيف:الحمد لله أخوي ...آه الحين إرتحت..
محمد:صدق الله يعين اللي بتأخذها..
ناصر:لاياحمود حلات سيف وهو مدبب جي..
ويلسون يتضحكون وياهم الجرسون وخذ منهم الحساب ونشوا الشباب يتحوطون..
وهو ماشين طاحت عين سيف على الكنافه وقال لهم :شرايكم نحلي؟
محمد:اف منك محد يروم يظهر وياك....حشى درام مب بطن..
سيف (وهو مغيظ):الله وأكبر...مب يالس اكل على حسابك أنا...
ناصر:حووووو... انتوا بس عاد فضحتونا..بعدين ترى كله ولا سيف..مع انه اسمه مايليق عليه ههههههههه...طوفوا يلسوا على الطاوله وانا عازمنكم..
سيف وهو شاق الحلج:هيه هذيل الربع ولا بلاش والنعم بونويصر..
وسار ناصر عسب يطلب..
ـــــــــــــــــــــــــ ـــــــــــــــــــــــــ
ــــــــــــ
في الجهة الثانيه:
الأم:أقول بنيات خل نيلس مكان تراني تعبت..
سارة:هيه أنا بقولكم...سارة الحلوة عازمتنكم على صحن كنافه(إنما إييييييه)
أسماء وهي ميوده بطنها:كنافه يالزطيه يلاماعليه مقبوله..
سارة:بس بس مب الحين العشا عقب عقب..
الأم:سيري امايه سيري اطلبي..
سارت سارة وأسماء تفكر انه الناس يحلون عقب العشا مب قبله..
المهم سارت سارة وكان ناصر موجود هناك فوقفت بعيد شوي عن ناصر...
ناصر شاف سارة وقام رد ورا عسب تتجدم هي...ففهمت ساره وتجدمت وقالت في نفسها(صدق انه ولد أصول)...
البايع:أهلين تورتي بطلتك..آمريني
سارة:لوسمحت بغيت 3 كنافه وصحن بسبوسه...
البايع:ايه علة راسي ...تفضلي لملك وراح أجيب لك أحلى صحن كنافه...
سارة:والحساب:
البايع:40 وكرمال عيونك35...
سارة وهي تتطلع البيزات جان يطيح شي من بوكها ما انتبهت...عطته البيزات وردت مكانها..
ناصر وهو يطلب تذكر...شاف شي طاح من شنطتها...نزل ولقطه...وأول مايشوف اللي بيده...يتيبس مكانه من اللي شافه...ويهه ولا ويهه القمر...عيون ولا عيون المها..تم مبحلق في الصورة...
البايع:خيو...بتآمر على شي تاني؟؟؟
ناصر:لاسلامتك...ويعطيه البيزات ويشل الصحن...وهو يمشي يفكر في الصوره يردها ولا لأ؟؟؟
حط الصحن على الطاوله وسأل محمد :عيل وينه الدب؟؟
محمد:سار يسلم على قوم خالته...وما إنه يصد ناصر صوب الطاوله اللي كان عندها سيف..إلا ويلمح البنت المتغشيه...
وقال في نفسه:أوووووووه زين اني ماسرت ولا وين بدي ويهي من سيف!..
قطع حبل أفكاره محمد:نصور بلاك ماتاكل مممممم وايد لذيذة الكنافه..
ناصر:لابس أتريا سيف....ويضحك محمد ويقول له:ماعندك سالفه..
رد سيف وتم محمد يغايظه...وناصر يضحك بس مو من قلبه لأنه باله ويا الغزال اللي شافها..
خلونا نظهر من القريه..
في بيت حارب..
حارب:حطي حواطه اليوم أسماء ونسيتي ريلج؟
أسماء:ماعاش اللي ينساك...في وحده تنسى ريلها الغالي..
خوله:بس بس بعدين تغزلو...هاه أسماء خبريني طبعتوا صورتي على الميداليه؟
أسماء وهي خايفة ومرتبكه:منو؟؟
خوله:سارة أختج عطيتها صورتي اليوم في المدرسه وقلت لها خل تطبع لي إياها على الميداليه..
أسماء:ما أدري بها بس ماعليه باجر ان شاء الله بتصل بها..
وتنش أسماء...وتسير الحجرة وتتصل في سارة..
أسماء:حسبي الله عليج يا سارووووه...ألحين شو أقول حق خوله أنا؟
سارة:واللي يسلمج لا تزيديني هم...روحي مب ناقصه ما أعرف شو أقول لها يوم السبت..
أسماء: عيل أنا شو أقول اللي أخوها ريلي؟!!!
سارة: لا تحاتين...عندج صورتها؟عطيني إياها وبسير باجر ويا أبويه القرية وبطبع لها هناك..
أسماء:لا بعد تبين صورتها عسب تضيعينها!! المهم خلاص وانتي سايره باجر مري عليي وبعطيج إياها..
سارة:فديت إختي اللي وياي على الخط..
أسماء:بس جب ...يلا سيري ذاكري..وسلمي على أمايه..
وتسكر أسماء عن سارة..
ـــــــــــــــــــــــــ ــــــــــــــــــــ
في حجرة ناصر:
ناصر وهو منسدح على بطنه ...ويطالع الصوره ويجرب الصوره من عيونه أكثر وينجلب على ظهره..وقول :آآآآآآآآآه بس لو أعرف منو إنتي؟؟
وتم على هالحال أسبوع كامل...حس انه بدأ يحس بمشاعر حلوة..بمشاعر أول مره يحس فيها...تم يفكر شو يسوي..كيف بيتعرف عليها ...بس فجأة ترن رتن...رن موبايله
محمد:مرحبا
ناصر:يامرحبا الساع...هلا والله ببوجاسم..
محمد شحااااالك يالقااااااااااطع؟؟
ناصر:حالي...آآآآآآآآآه من حالي أنا...
محمد:لالالالالالا من متى يا الكتوم؟؟
ناصر:محمد دخيلك ساعدني تراني تعبان..
محمد(حس انه السالفه صدق وخطيره بعد):انت تامر يالغالي..
ناصر قال له السالفه كلها..
محمد:والله شو أقولك...بس يمكن أنته إنعجبت فيها..
ناصر:إلا قول إنجذبت لها وتعلقت فيها....ياريال أباها...
محمد:متأكد من اللي تقوله...بعدين تعال انت ما تعرف اسم البنت ولا منو هي؟؟
ناصر:هي بنت خالة سيف..
محمد:منو قالك...نحن شدرانا انه البنات اللي كانوا ويا سيف هن بنات خالته...ولاتنسى انه حاط عينه على بنت من بنات خالته...
ناصر:خلاص أتصل بسيف وتأكد..
محمد:لالالالا...انت شو تقول...اصبر ويصير خير خلنا نتأكد أول...
ناصر: أنا مليت من الصبر إلا الصبر مل مني...
فجأة...ناصر:حمووووووووووووو وووووووووود
محمد: شوي شوي ...صمختني...
ناصر وهو مستانس: حموووووووو دد دد اسمها.. خولة بنت فلان الفلاني...
محمد وهو فاج حلجه:صدق انه عصر لسرعه...ولا جاسك شي اللهم سكنهم في مساكنهم...
ناصر:جب هو أصلا مكتوب ورا الصوره...
محمد:عاد إسبوع ما أدري أكثر الصورة عندك وتوك تعرف انه اسمها مكتوب ورا الصوره..
ناصر وهو ينسدح والصوره في إيده:من حلاتها ما يا في بالي أجلب الصوره..
محمد: هههههههههههههه وحليلك بديت تحب...
ناصر:إلا أموووووووت بها...حمود لو إني غالي عليك إسأل حرمتك عنها..
محمد:خلاص تم ...كم من نصور عندنا...يلا في أمان الله...
ناصر:ولي يسلمك لاتبطي..
ـــــــــــــــــــــــــ ـــــــــــــــــــــــــ
ــــــ
يتصل محمد في هنادي اللي مالج عليها...
هنادي وهي ناشه من الرقاد: ألو...غصب طلعت منها...
محمد: السلام عليكم
هنادي وهي تحج عيونها وتتثاوب: وعليكم السلام...
محمد:وايد عليج...المهم هذا وأنا قايل لج لا ترقدين لأني بتصل...
هنادي:حبيبي لأني كنت تعبانه تعرف المدرسه وبلاويها...
محمد:مسموحه حبي وسلامتج من التعب...المهم فتحي وياي عدل لأني بقولج شي خطييييييييييييييييييير...
تفز هنادي من مكانها: كلي آذان صاغيه..
محمد خبرها كل السالفه...طار النوم من عينها:إنت متأكد من الإسم؟؟؟
محمد:هيه متأكد..
هنادي وهي متضايجه: انزين ماقال لك شقايل شكل البنت؟
محمد:أممممممممم اللي أعرف إنها سحرته من أول نظرة...هيه وصفها لي بس نسيت..
هنادي وهي تتأفف:أسميييييييييك...أنا بوداي وانت بوادي بس إصبر شوي...
ويابت صوره عندها وتمت توصف له...
محمد:هيه هذي مواصفاتها...هنوده تعرفينها؟؟؟
هنادي وهي متردده:أأ...ما أعرف...ماأعرفها...لا لا لا ما أعرفها...
محمد وهو رافع حياته: هنوده حبيبتي بلاج؟؟؟
هنادي:لا لا ما بلاني شي بس...
محمد:بس شو ؟؟ رمسي مابآكلج!!
هنادي: هي إربيعتي روح بالروح..
محمد وهو مو مصدق: صدق فديتج أنا...
هنادي: حماده بس قول له مايسوي شي بالصوره خله يعطيك إياها واللي يسلمك..
محمد:لاتحاتين حياتي..أدري بج خايفه عليها..بس صدقيني ناصر ما عنده هالسوالف...ريال ويعرف الأصول...
هنادي:الحمد لله ريحتني...
سكر محمد عن هنادي وعلى طول اتصل في ناصر...
ناصر:وينك ياريال..
محمد: ماشي كنت أخبرها السالفه..وبعدين لا تنسى يعني خذتنا السوالف شوي..
ناصر : شوي!!! المهم بطوفها لك...هاه بشرني شو تعرفها ولا لأ؟؟
محمد:لا
ناصر: إحلف؟
محمد: هيه
ناصر:حموووووووود لاتلعب بأعصابي قول الصدق..
محمد بخبرك بس بتعزمني باجر على العشا في ميركاتو..
ناصر: موافق...حتى لو ببرج العرب..إنت بس ريحني...
محمد: البنت الله يسلمك إسمها خوله بنت فلان الفلاني...وهي بثالث ثانوي يعني 18 سنه..وهي عايشه عند أخوها العود ...لا والأحلى من جي انها إربيعة حرمتي روح بالروح...ولا مب محيره لحد...وإحمد ربك إنك ما اتصلت بسيف ولا جان صدق طحت من عينه..
ناصر وهو يحس انه بيوصل السما السابعه من الوناسه...مو مصدق اللي يالس يسمعه عرف كل شي عن الغزاله اللي شافها...ومب باجي إلا إنه يصيدها...
ناصر:بو جاسم إسمعني...أنا من باجر ان شاء الله بسير عند إخوها وبخطبها...بتيي وياي حياك الله...
محمد:ههههههههه اثقل ياريال...فكر بالموضوع وشاور أهلك..والخطبه لاحقين عليها...وبعدين تعال عزيمتي؟!
ناصركصدقني لو بيدي جان عشيتك في كل المطاعم اللي بالعالم يالغالي...والنعم فيك...
وخذتهم السوالف شوي...وبعدين سكر ناصر عن محمد وقام ناصر وصلى لربه ركعتين شكر لربه...
انتهى الجزء الأول أتمنى يعجبكم وانتظروا التكمله
اختكم
ماوحشتك</font>
رد مع اقتباس
مواقع النشر (المفضلة)