ويني بليا وديمه

**بن دبي** · 22-05-03 ||, 04:24 PM

خليفه .. شاب عمره 16 سنه .. من دبي .. من عيله محترمه.. طويل نسبيا و عريض شويه .. و عيونه عسليات و شعره ناعم و لونه بني غامج و مطولنه بعد ... يعني حلو و ذكي و هادي و ما يحب القرقعه و الحشره ..
وديمه.. بنت محترمه من عيلة محترمه ... من هل العين .. عمرها 15 سنه و كنها خطفت الجمال من كل البنات ... طولها كم يسوى ...
...الحلقه الاولى
في يوم من الايام و الدنيا تمطر,خليفه كالعاده يالس في حجرته يشفط من المدواخ و فار كتبه,رن التيلفون ...
حميد : مرحبا الساع ... خلوف يالقاطع ... وين ما تتصل
خليفه(بكل برود) : شو تبا ..
حميد : اخويه عطاني ستيشنه و انا ساير الفايه .. غصبا عليك بتي ويايه
خليفه : انزين انا اخويه عطاني كف و قالي ايلس في البيت ذاكر
حميد : اي اخو..
خليفه : صبوح الهرم
حميد : حووووو قوله اجازه هب راسه كبر علينا هذا .. اونه عاد عرس خلاص يعني ..
خليفه : يوم بتتكلم على اخويه تكلم عدل
حميد : خلك انته.. اخويه .. لو تحترمه جان قلت مصبح ما قلت صبوح .. انزين ماعليه برمسه انا .. اذا وافق بتي اوكيه ..
خليفه :انزين هذا رقمه و اتصل به ...
... طبعا حميد كلم مصبح و رضا ان خليفه يخاويه .. و يروا البانشيات سايرين الفايه ...
ع الدرب ....
حميد : بو دعيي سو شغلك عاد يقولون مزايين هناك ..
خليفه(متجاهلنه) :حد من الربع هناك؟
حميد : اي ربع يا بويه اقولك مزايين هناك .. راشد ولد عمتيه و ربعه هناك
خليفه : و منو بعد؟
حميد : مادري .. يخبرني امس احمد الهاملي انه بيينا هناك .. بس دراجته خربانه مادري به جان بيي ولا ... يمكن بيي و بيأجر
خليفه : انا مالي خاطر العب بالبانشي تعبان وايد ..بيلس روحي
... وقفوا عند محطه و شافوا نيسان عليه رقم العين .. طبعا ما اهتموا اول بدايه بس وقفوا عشان يفولون الموتر و نزلوا يشترون حلويات و شي جذه ياكلونه و دخلوا المحطه ويالله على الي شافوه ..
حميد : بو دعيي شو الحبر متيمعات ..
خليفه : اقنصهن شو تريا مشاور؟
حميد : يا خويه وين بتلقاهن ... هذيلا احلى من الي يظهرن لي في الاحلام والله .. يالله خلوف شوف شغلك( يقصد انزل اشتري هب انزل رقم)
خليفه نازل و هو ماد بوزه شبرين اتقول تيسه متوفي .. و دخل و اشترى الي يباه و البنت هب منتبهه و اصطدمت به و كانت بتطييح و مسكها
خليفه : اتحملي اتحملي هذيلا ما يمثون الكاشي
البنت : مشكور ياخويه
خليفه(و هو ساير جدا مسؤول المحطه و يفاتن عليه) : حووو انته شو هذا ... تعال مث الكاشي .. بنت الناس زين ما طاحت
الهندي رد على خليفه بطريقه ما عجبته و كنه قال شي غلط عن البنت .. و طبعا خليفه مغيض من قبل ... حط قهره في الهندي .. و دخل حميد و مسكه عن يرتكب جريمه ..
حميد : خلوف استهدا بالله يايين نستانس هب يايين نسوي مشاكل قم قم تعال
خليفه : ما تسمعه كيف يتكلم على بنت الناس .. تركني ما بهده
البنت : اخويه دخيلك مافي داعلي .. خله يولي .. اذا هو ما عنده احترام خلنا نحن نظهر احسن منه ..
خليفه هدا من كلام البنت .. خليفه بطبعه يحاول انه ما يطلع مشاعره .. لو شو يستوي يحاول انه يكون اقوى من مشاعره باي طريقه ... البنت دخلت قلب خليفه من اول ما شافها .. بس كان مستحي منها .. و ربك راد انه يطلع مخاوي شما قدامها ..
وصلوا خليفه و حميد الفايه و لعبوا و خلصوا و تلاقوا ويا ربعهم و احين بيردون ...
و هم راجعين ..
خليفه : تصدق الي شفناها في المحطه دخلت قلبي
حميد : يا بويه انته قلبك فريج .. الكل يدخله
خليفه :ياخي لا تتهزا انا روحي تعبان بنزل من الموتر و ما بركب وياك لو الموت
حميد (يتغشمر) : انزين انزل شو تتريا
خليفه طبعا خبل فتح الباب بيعفد و مسكه حمد و قاله انه يسوي سوالف وياه و استسمح منه ... و كلن وصل بيته و ليلتها خليفه ما قدر يرقد بس قاعد يفكر فيها الي شافها في المحطه ..
... خلص خليفه امتحانات نص السنه و طلع راسب .. و انحرم من الظهره و انه بييلس في البيت يراجع كل الي طافه..
يوم الخميس بالتحديد بعد صلاة الظهر, يرن تيلفون خليفه ..
خليفه : شو تبا
حميد : ماريد شي ياخويه بس بنتطمن عليك ..
خليفه :اتطمنت يلا باي
حميد : بلاك انته ويا ويهك انا ربيعك من يوم كنا نلعب بالرمل قدام بيتكم احين تسكر تيلفونك عني .. افا ما هقيتها منك ..
خليفه : قول اخر كلمه بسرعه
حميد :انا ساير العين اشتري دوخات جان بتخاويني
خليفه : ويا منو؟
حميد : وياك .. ويا منو بعد ... انا لي غيرك
خليفه : زين انا ما قصدت منو بيسير وياك .. انا قصدي منو بيوديك .. ولا يعني بتسير فوق ظهر الخيل
حميد : بسير ويا الدريول عندك مانع ..
خليفه : انته فايق اتصك لين العين عشان غليون ... و الي في دبي هب يايزن لك يعني ..
حميد : قول حق ابوك لا تقولي انا .. اذا مال دبي هب يايزنله .. جان ما خذله حوطه في حتا عشان الغليون ..
خليفه : انزين محمد محمدي اييب دوخات زينه..
حميد (مقاطعنه) : اقولك انا خاطريه في دوخه من العين بتخاويني ولا شو ..
خليفه : خلاص بيي ... من وين انزين من الجبره؟
حميد : هيه من الجبره و بنخطف بعد نشتري افلام كوبي .. و بخطف اشتري كاونتر سترايك مالتي اختربت ...احين بنطلع بنتغدى على الدرب الوالده مسويه سندويشات اتعيبك ... مادري مالفه اونها تعرف تطبخ ..مسويه سندويج سمج ويا ميونيز عاد انته كل و اشكر لا تتطنز ,,
خليفه : خلاص انشالله .. انا شويه بسير اتمصلح يمكن يشفقون عليه يعطوني بيزات بعد ...
.... حميد ولد خال خليفه ..و هم ربع من يوم كانوا صغار .. و حميد يحب نوره اخت خليفه و هي تحبه .. بس خليفه ما يدري ولا عنده خبر ..يتحراهم يدانون شرات الاخوان ..
المهم خذوا من العين دوخات و خذوا سيديات افلاك مقلده .. و خذوا كاونتر ستراك و العاب ثانيه .. و عقب خطفوا العين مول عسب يتعشون..
خليفه : حميد هذي هذي الي ذاك اليوم شفتها في المحطه يوم اضرب الهندي ..
حميد : يا ريال ... انزين شو اسوي؟
خليفه : بسير اقولها اني احبها ..
حميد : هاهاهاها انته تتمصخر صح .. تباها تضحك عليك هاهاهاها صدق انك بدوي قح .. انا بقولك شو تسوي ... سير جداها و اطالعها .. اذا ذكرتك بتبتسم صدقني جرب جرب ..
خليفه : انزين تعال ويايه انا اول مره امر بهالموقف ..
حميد (مقاطعنه): شووووووه .. اهد هالاكل و الحق .. يلا يلا ..
خليفه سار روحه جداها ... و بالفعل البنت ذكرته و ابتسمت ..
خليفه : ذكرتيني ..
البنت : هلا .. هيه جي ماحيدك .. انت هالي فزعت لي ذاك اليوم .. و الله تسلم ياخويه يوم انك لعن صيره الهندي الهرم ..
خليفه : اقص لسانه انا الا يوم انه بيتكلم على بنات بلادي ..
البنت : انته ياي العين عند حد ..
خليفه : لا و الله ياي ويا ربيعي الي كان ويانا في المحطه .. ياي يبا ياخذ دوخات و بنتعشى و بنرد دبي
البنت : انته من دبي .. ماشالله
خليفه : هيه من دبي
البنت : انزين ما خبرتنا منو الريال؟
خليفه : خليفه ... خليفه ال****
البنت : و نعم الساع والله
خليفه : و انتي ما خبرتينا عنج
البنت : انا وديمه .. من العين انا ..
خليفه : والنعم وديمه .. انزين مافينا حد هنيه يشوفنا انا بترخص عنج .. انشوفج مره ثانيه انشالله ... يلا فداعة الله
وديمه : ربي يحفظك
... وديمه تفكر ان الي سوته صح ولا غلط انها ردت كلمته .. بس هو دخل قلبها من اول مره شافته .. و ما تدري اذا صدق هو ريال و الا الي سواه كله تمثيل عشانها ... يعني الي سواه في المحطه بيسويه حق اي حد و لا بس هي ..
... رجع خليفه عند حميد ...
حميد : ايالهرم .. ثرك لوتي ... بعد وقفتها ورا اللعبه .. ول ول .. ماحيدك جذه .. خلوف شو الي طرا بك ..
خليفه : ابا ارد البيت بسرعه تعبان ..
حميد : لا يا ريال توا الناس .. خلاص ماعليه سايرين .. اخبرك من احين الاسبوع الياي انا مواعد في الهيلي .. حمدوه بتي الهيلي ويا هلها و انا بسير لها
خليفه : يا رب يزخونك و تنضرب ضرب عشان ما تلحق البنت ويا هلها ..
حميد : انزين ماعليه يا ولد الخال .. يلا قم
... و رجعوا دبي ... و خليفه بعد يفكر في وديمه .. البدويه الي عذبته ..
قام يكتب فيها قصايد .. و دومه يفكر فيها ..
... موعد طلعة العين ..
حميد : ها خلوف زاهب
خليفه : هيه ... غايته
... و طلعوا العين سايرين الهيلي و هم يسولون في الدرب و يحطون على بعض و على الخلق .. هذي حركاتهم دوم .. لان حميد ظريف يحب يتمصخره دوم .. بس خلوف الي يغلس الطلعات ...
حميد : خلوف تخيل انك تشوف هذي الي معذبتنك
خليفه : تعرف لو يبت طاريها مره ثانيه .. بييك شي ما ستوى ولا بيستوي
حميد : بس بس يا بويه لا ما بييب طاريها ما فينا .. جازورا بياكنا
خليفه : جازورا ابوك ..
حميد : ايه لا تغلط .. استح على ويهك زين منه ابويه مناسبنكم و ماخذ عمتك
خليفه : له الشرف اصلا ..
و دخلوا الحديقه و يلس خليفه روحه على كرسي لين ما حميد يرد .. التفت يمينه .. و شاف القمر ... وديمه في الحديقه!!! .. كانت يايه ويا هلها و ربيعتها وياها و قربت منه
وديمه : سلام عليك .. حيا الله هل دبي
خليفه : و عليج سلام .. الله يحييج ..
وديمه : شحالك .. ربك بخير .. علومها دبي من زمان ما زرناها و الله
خليفه : يسرج الحال ربي يعافيج .. و الله دبي شرات ما هي ما تغييرت و حياج الله في اي وقت
وديمه : زين زين .. انا بس حبيت اسلم عليك و انا خاطفه تامرنا على شي
خليفه : خلا برايج .. سلامت راسج و الله .. ان ييتوا دبي مره اتصلوبي و الي بقدر عليه بسويه انشالله.. رقمي كذا كذا
وديمه (تضحك مستحيه منه):انزين ماعليه بتصل بك جان ييت دبي يلا فداعة الله
خليفه : الله وياج .. الا بتخبرج انتي شو قبيلتج ..
وديمه : انا من **** ..
خليفه : بنت عمي .. يا ويل حالي ... بس كيف **** و في العين.. غريبه
وديمه : لا امبونا من دبي بس الوالد ياي هنيه محولينه .. ابويه طيار تراه كان في دبي بس يايبيينه معسكر هنيه
خليفه كان حلمه انه يستوي طيار و يلقا هذي و ابوها طيار صدق اتخبل ..و تحركت عنه و ياه ربيعه و ولد عمته حميد ..
حميد : خلووووف .. فاتك فاتك .. قلت لك تعال ربيعتها وياها ..
خليفه : سر انتحر .. ها متى بنرد الساعه 7 احين متى بنوصل دبي
حميد : يلا سايرين قم ...
و رجعوا البيت .. وتم خليفه سهران طول الليل و فجأه رن التيلفون
خليفه : الووو
صوت وحدة : هلا خليفه شحالك
خليفه : منو؟
وديمه : انا وديمه ..
خليفه ( مستغرب) : وديمه ............
.................................................. ..........................
البقيه في الحلقه الثانيه .........

**بن دبي** · 22-05-03 ||, 08:44 PM

خيبه محد رد عليها ... بدايتها ممله .. استوت مشاكل عقب بس خلاص ما بكمل القصه .. برايكم جان ما عيبتكم .....

**شوق البدو** · 22-05-03 ||, 11:35 PM

ابليز كمل<img src="http://oasis.bindubai.com/emoticons/blush.gif" border="0" valign="absmiddle" alt=':b:'>

**بن دبي** · 23-05-03 ||, 08:48 PM

كمليها بلييييييييييييييييييز تراها حلوه واااايد صخ ان فيها صدف غريبة شوي لكنها حلوة

**بن دبي** · 24-05-03 ||, 09:45 PM

الحلقه الثانيه ...
خليفه(منصدم ما يعرف شو يقول) : وديمه ...
وديمه : انته خليفه يعني ... شحالك؟
خليفه : بخير يعلج الخير
وديمه : انا متصله اتطمن عليك ... اتولهت عليك الصراحه
خليفه : وانا بعد ...
وديمه :خليفه بصراحه ... انا خايفه منك ..
خليفه : من اي ناحيه
وديمه : اخافك تستغل ضعفي .. و اتقص عليه
خليفه : لا يا وديمه .. هب انا الي اسوي هالشي
وديمه : انته جاد؟ ...
خليفه : هيه نعم جاد .. يعل رقبتيه تندق لو اني كاذب ... وديمه انا معجب فيج ...
من شفتج و انا افكر فيج .. صراحه صرتي لي الاول و التالي يا وديمه .. حياتي تغيرت من عرفتج .. و يعل الوالده ما اتنش الصبح لو كنت كذاب .. انا اول شي كنت شاك في هالشي ... بس عقب هالمده الطويله الشوق ذكرني فيج .. وديمه زبدة كل هالقصه .... انا احبج
وديمه سكتت و ما عرفت شو ترد عليه ... و رجع خليفه و قالها انه يحبها
وديمه : خليفه ... ما ينجبر قلب على قلب صح ... انا بصراحه ماقدر احبك بهالسهوله
خليفه : انا مادري شو اقول لج ... اذا ما تحبيني برايج .. بتمين في قلبي لين ما الدود ياكله ...
وديمه : الصراحه هذا هب رقمي و ماقدر اكلمك زياده .. و اذا انته صدق ولد اصل دخيلك لا تتصل موول
خليفه  و انا اعطييج كلمه اني ما اتصل ... ربي يحفظج
... خليفه شاف نفسه انه تسرع وايد و غلط غلطه كبيره ما تغتفر,خسر اول بنت تدخل قلبه, و طلع من البيت و يلس عن الباب يدوخ و يفكر .. في الامتحانات اليايه الي ما بقى لها غير اسبوع .. و يفكر في هله الي هب راحمينه .. و يفكر في اكبر شي في حياته .. وديمه ..
مرت الايام , و امتحن خليفه و نجح .. و يت امتحانات الثانويه العامه و نجح حميد فيهن و طرشوه ويا البعثه يدرس  في امريكا .. و خليفه قدامه الثانويه العامه ...و هو روحه .. لا صديق و لا قريب.. بيتم عايش روحه بليا ربع و بليا خلان ... و هله بيزيدون عليه و بيتعبونه زياده ...خليفه كان يكره مدرسته .. لو انه البنات حوله و عنده في المدرسه (يدرس في مدرسه خاصه) بس ما كان مرتاح مول فيها و يبا يدرس في حكومه و هله هب راضيين .. على رمستهم ان مستقبله في الخاصه احسن من مستقبله في الحكومه .. وفي مدرستهم ماشي ادبي و علمي ... تدرس الاثنين .. و كل شي بالانجليزي .. يعني اخونا خليفه كاره حياته صدق .. توه عمره 16 سنه و في ثانويه عامه .. المهم نجح خليفه في الفصل الاول بنسبة جيد جدا و عنده اجازة الربيع بطولها يلعب فيها عشان يستعد حق اخر السنه و ياه اتصال بعد الامتحانات ابيومين
خليفه : هلا هلا .. راعي الانجليزيات حي بعدك
حميد : اهليين .. الله اكبر عليك .. تباني اموت يعني
خليفه : شو البنات وياك .. يخبروني وايد مزايين عندكم في امريكا
حميد : وين يا ريال .. انا في سان انتني .. الدنيا حر ي ريال .. و هنيه ما يتكلمون انجليزي عدل .. عيال كاوبويز كلهم ما انروم انرمسهم
خليفه : تستاهل .. ماحد ضربك على ايدييك و قالك سر ادرس في امريكا
حميد : ما عليه يا ريال .. المهم انا باجر راد البلاد .. ما وصيك تعال شلني من المطار
خليفه : فالك طييب
حميد : فالك ما يخيب
و سكر خليفه عن حميد و اليوم الثاني سار له المطار ..
خليفه : حميد .. حميد .. هنيه هنيه وين ساير هناك
حميد : ما تنشاف يا ريال
خليفه ( يتوايه وياه) : حمدلله على السلامه ... شو الرحله ممتعه ولا انطر تاير الطياره على الدرب
حميد : الله يسلمك .. اونك تنكت ويا ويهك .. يلا قم قم .. خاطري في رقاق عمتك ياخوي
خليفه : زين زين .. عيل انا ياي وياك ابا منه بعد
حميد : حياك ..
و وصلوا البيت و كلوا من الرقاق .. و دخلوا الغرفه عشان يرتاح حميد و يسولفون شويه ..
حميد : تعال وين صحيبتك مال العين
خليفه (اينزل راسه) : مادري وينها
حميد : بلاك اتضايجت .. اقولك باجر الخميس ابا اسير السيتي ياخي..ابا اشم عطر البلاد ...
خليفه : خلاص انشالله
و اليوم الثاني طلع خليفه و حميد وياهم سعيد ولد عم خليفه و يبون السيتي سنتر
و يلسوا يتعشون على الطاولات و خليفه يالس يطالع مسجاته (عنده موبايل بو كيمرا) .. و حد رش عصير على ويهه ..
خليفه : هيه بلاج بلاج
البنت : ليش اتصورني ؟
خليفه : منو قال اني صورتج ..
مال التحريات : اخويه انته صورت البنت؟
خليفه : لا يا خويه وين صورتها ..
البنت :شوف تيلفونه عشان تتاكد
مال التحريات :اخويه هات تيلفونك عشان نتاكد
و خليفه عطاه التيلفون .. و هو فاصخ الغتره و يمث بها ويهه الخرسان عصيرو شعره طايح و كندورته خايسه و يطالع مال البنت و الضابط و يترياه شو بيرد عليه
..............................
البقيه في الحلقه الثالثه ...

**بن دبي** · 24-05-03 ||, 09:48 PM

راعية الهوش و البوش .. دكتوره فطيم .. بس عشان خاطركن كملتها
و مشكورين يال 150 زائر يالي ما قدرتوا تكتبون مشكور

**1سكون الليل1** · 25-05-03 ||, 12:09 AM

شكرااا  يا اخوي طير نادر
الله يعطيك الف عافيه
بس لا تنسي اتطلنا الحقله الثالثه

**كبيرة بعيوني** · 25-05-03 ||, 02:56 PM

واااااااايد عيبتني لين احيينه..يالله نبا الباجي..بس لا تطولين علينا <img src="http://oasis.bindubai.com/emoticons/tounge.gif" border="0" valign="absmiddle" alt=':p'>

**محقق كونان** · 26-05-03 ||, 02:44 PM

لوووووول كشخه ...... انتظر التكمله <img src="http://oasis.bindubai.com/emoticons/biggrin.gif" border="0" valign="absmiddle" alt=':D'>

**كبيرة بعيوني** · 26-05-03 ||, 02:58 PM

مـــــــــذله.. <img src="http://oasis.bindubai.com/emoticons/rock.gif" border="0" valign="absmiddle" alt='???'>

طير نادر..وين شردت؟؟؟؟؟؟ <img src="http://oasis.bindubai.com/emoticons/tounge.gif" border="0" valign="absmiddle" alt=':p'>

**ماوحشتك** · 26-05-03 ||, 05:18 PM

والله الصراحه .. القصه حلوه ..

           خخخخ هذا ما يعني انك تذلنا .. وما تنزلها بسرعه    <img src="http://oasis.bindubai.com/emoticons/biggrin.gif" border="0" valign="absmiddle" alt=':D'>

**بن دبي** · 26-05-03 ||, 07:56 PM

الحلقه الثالثه ...
خليفه (يكلم حميد) : شكلي ما يتشاهد يا ريال و كملت هذي علينا
حميد : خليفه بيني و بينك صورتها ولا لا
خليفه(يبتسم) : انته ولد عمتيه و دوم ويايه و ما تعرفني عدل .. عيل من بيعرفني
حميد (مستحي من خليفه و يحاول يبرر موقففه) : لا يا ريال افا .. بس انا اتخبرك يعني ادريبك حالات ..
مال التحريات : اختيه ما فيه شي التيلفون .. (تيلفون بدوي يعني فاضي)
البنت : صدقني صورني انا متاكده .. شوف تيلفونات ربعه
خليفه انسان هادي و كتم غيضه لما تبلت عليه البنت لكن حميد و راشد الله يستر
حميد : حوووه وين وين .. تعالي خذي ( و يفر عليها موبايله) شوفيه بس و ربي لو ما طلع شي فيه ياني ماخليج لا انتي و لا هلج في حالكم ...
راشد : استهدا بالله السالفه ما تسوى (يساسره) ريال ريال .. قولها عشان ما عطيناج ويه تسوين جذه  خخخخخخخخ
حميد : انته الثاني اسكت هب فاضي لك .. عطه مبايلك انته بعد
طبعا مبايلات حميد و راشد مافيهن كيمرا .. يعني نو واي نو واي ابأي شكل من الاشكال  يصورونها
مال التحريات : اختي اسمحيلنا ما لقينا شي في الصوره
مال التحريات 2: اخويه تبا تفتح محضر؟
خليفه : هاا ... ليش؟
حميد : رشت على ويهك العصير .. تعرفف في امريكا لو تستوي هالحركه و هي مغلطه بتدفعها 30 مليون .. فما بالك اون بربس (on purpse) يا ويل حالي خلوف بتستوي اغنى من ابوك ب 20 كره بتعيش روحك
مال التحريات : اخويه هذي رشحت العصير في ويهك لو تبا نفتح محضر بنفتح
خليفه (يطالع البنت )
البنت : شو تتريا كلهم وياك سوا الي تباه عادي انا بتحمل
خليفه : لا ماريد افتح محضر .. مابدخل بنت الناس المخافر .. خلاص طاحت الحيه مانبا شي منها ...(يكلم البنت) اختيه يوم بيصورج حد ممكن تخلين ريال يسير يكلم الي مصورنج .. لا تطلعين نفسج قويه ..
و تحرك خليفه و طبهم و لا كنه شي استوى . و هو نازل يرمس الدريول يقوله تعال (مع ان ربعه هم الي يايبينه) و رد ويا الدريول بيتهم و عق ثوبه و انسدح ولا له خاطر يكلم حد .. و يت في باله وديمه .. و شغل اغنية ميحد (بت اسهران الليل و انوح ..و ارضف الونات بصياح... ابكي و دمع العين منضوح .. فوق وجنات الخد و انضاح..كل سببي من مالك الروح ... بو منحرن فيه العطر فاح)
(على ايامها عيضه كان يشل محد يقول شي)و هو يدوخ ... طاح عنه مدواخه من الشبريه .. نزل اييبه رن التيلفون ....
البقيه في الحلقه الرابعه ... توقعوا منو الي متصل و ليش .......:D

**بن دبي** · 26-05-03 ||, 09:07 PM

الحلقه الرابعه...
التيلفون يرن و خليفه يشوف الرقم .. اول شي اتحراه ولد عمته لان الرقم من دبي .. فرد على التيلفون
وديمه : شو ميس مي (miss me?)
خليفه : و الله عمرج اطول من عمري .. توني افكر فيج .. وين قطعتي عنا قطعه يا بنت الحلال ..
وديمه : الدنيا شغلتني ..
خليفه : انزين و شو الي يابني في بالح عقب كل هالمده ؟
وديمه : ماشي شفتك في السيتي سنتر في دبي اليوم و ذكرتك و اتصل ..
خليفه يا في باله انها اتاكدت انه ريال و هب مال هالحركات ..
خليفه : الحمدلله يوم انكم ذكرتونا عيل ... بس ذكرتونا بالخير و لا بالشر
وديمه : لا فديتك بالخير ... شفتك يوم ترش عليك العصير البنيه
خليفه : هاا......
وديمه : ليش ما ادبتها و رفعت عليها قضيه
خليفه : عديتها مكان اختيه .. انا ما ارضى ان اختيه ايروونها في المخافر ..
بعد دقيقة سكوت ( مادري منو متوفي)
وديمه : خليفه .. تذكر لما قلت لي انك تحبني ؟
خليفه : انا اموت ولا انسى هذا اليوم
وديمه : انا اسفه على الرد المتاخر ... بس على ماظن اني ابادلك هالشعور بس كنت خايفه منك .. بس احين انا وثقت فيك.. انا احبك بعد .. خليفه انا شفت اشكر كنت شهم ويا البنت و محد قالي .. انا احين صدق احبك و ماقدر استغنى عنك
خليفه(و هو طاير من الفرحه بس يكابر) : اوكيه .. انا بعد احبج
وديمه : خليفه تبغي تشوفني .. انا بعدني في دبي ..
خليفه : قولي انج انتي الي تبين تشوفيني .. وين انزين ..
وديمه : وافي .. تعال بسرعه دخيلك الساعه 12 بنطلع
خليفه :20 دقيقه بس
و سكر .. و اتلبس ولا اتسبح خخخخخ مستعيل .. و طلع من البيت و ركب ويا الدريول و على طوووول وافي .. و شاف قلبه الضايع ... وديمه .. واقفه بطولها .. و مطلعه خصله من شعرها على ويهها .. و جمالها طبيعي .. لا لون ولا شي .. خليفه ما قدر يستحمل الوضع .. راح و ركب اللفت الي كانت فيه روحها .. و تم يكلمها و هو عاطنها ظهره عشان محد يشك في السالفه ..
خليفه : وين غبتي عني ..
وديمه : شو اسوي يا خليفه .. يعني تحيدني سبيل اوثق في اي واحد
خليفه : من حقج .. بس خلاص احين احبج انا .. بعد ما توثقين فيني
وديمه : عمري خليفه .. انا احبك بعد .. بس..
خليفه : بس شو؟
وديمه : انته تدري الحرص واجب صح ..
خليفه : صح ..
وديمه : و غلاتك يا خليفه اني طول هالشهور كنت افكر فيك ..
خليفه : انا لا دراستي دراسه ولا حياتي حياه من عقبج يا وديمه ..
وديمه خليفه احين بنوصل .. خلاص يعني بنزل و بروح عنك
خليفه : برايج عمري
..و باست ايدها و حطتها على رقبت خليفه .. و قالت له اشوفك على خير
..بدت المدارس و بدا الشغل الجامد و خلوف جاهز لكل شي .. و درس و شد حيله ..و كانت غايته يكون فوق عشان يكبر في عين حبيبته ...كانت وديمه له مثل الهدف .. و وصلت فترة الامتحانات .. و المصخره بدت في مدرستهم .. البنت يروحن قسم الاولاد .. و الاولاد يروحون قسم البنات .. و خلوف ييلس روحه يدوخ و يذاكر طول الوقت .. حتى البنات ما كان يعجبهن حد من الاولاد غيره .. لان تصرفاته كانت غريبه .. يعني البط السهل طايح جدامه و ما يصيده ... و قامن يعاكسنه و هذا الي شويه اثر في دراسته لكنه اتصرف و لقاله مكان يندس فيه عشان يذاكر على راحته .. و بدت امتحانات .. و خليفه ما كان له وقت لاي شي غير الكتب .. ما كان عنده وقت يحك شعر راسه .. يحس انه مزنوق لو انه مخلص المنهج اكثر من مرتين و مراجعن هقد 3 مرات و ليلة الامتحان بتكون المراجعه ال 4 .. و يروح يمتحن و يطلع مغيض( على قولته ما حليت زين) .. و بعد ما خلصت الامتحانات .. خليفه كان ينام في المسيد يدعي ربه انه ما يضيع عليه .. و طلعت النتايج ...
منطقة دبي التعليميه .. المدرسه الفلانيه ... خليفه فلان فلان بن فلان الفلاني
النسبه 98,9 مبروك ... خليفه كان في المسيد و لا يدري شو الساللفه .. رن تيلفونه
مصبح : خلوف تعال البيت بسرعه ابا
خليفه : انشالله
مصبح :بعيد انته اطرش لك الدريول
خليفه : لا لا ياي احين ما عليك
و سكر عنه و يوم وصل خبروه انه يايب 98,9 .. خليفه تينن و ما عرف شو يسوي ... صح انه هب درجات كامله .. بس طار طار من الفرحه .. و لما درا انه يايب في الفيزيا 200 من 200 اتخبل اكثر .. لانه يحب الفيزيا وايد .. وين خليفه الي ما يدق الكتب طول عمر ه.. بس رص على عمره اخر شهرين و ياب 98,9 ... الجماعه قالوا عنه انه غاش و انه مسوي سوا .. المهم ما همه حد قام يربع يبا الحجره بيتصل حق غناته يبشرها ...
خليفه : الووو
وديمه : هلا عمري
خليفه : اهليين حبي
وديمه : مبروووك ..شو النتيجه
خليفه : 98,9 .. يلا اتجهزي عقب كم يوم يايينكم نخطبج
وديمه : والله
خليفه : و الله ... يلا سيري رمسي هلج قولي لهم خليفه ولد فلان ياي يخطب عندكم
وديمه : انشالله ... بس بعدني خلني اخلص ثالث ثانوي عقب .
خليفه : لا تعالي عندي انا بدرسج عشان اتيبيين 100%
وديمه : انشالله ... انزين خبرني وين حاب اتسير؟
خليفه : انا كنت ابا استوي طيار .. بس عقب هالنسبه .. بسير ادرس هندسة اتصالات خاري .. و برد و بدخل العسكريه .. لان واحد من الاهل درس خاري هندسة اتصالات و يوم رد طلبوه الجيس برتبة نقيب و ما رضا .. بس انا برضا سيده <img src="http://oasis.bindubai.com/emoticons/smile.gif" border="0" valign="absmiddle" alt=':)'> ..
وديمه : يا ويلي بتكون عسكري .. و جسمك بيكون غاوي
خليفه : ليش احين جسمي هب غاوي يعني .. لا لا قوليها اني خسف و هب عايبنج
وديمه : انته لو اخسف واحد في الكون .. في عيني احلى واحد
خليفه : ادري .. السبال في عيون امه غزال
وديمه : بس عاد .. اوكيه انته قول عن نفسك انك خسف بس انا اشوفك حلو ..
خليفه : زين حياتي بسكر عنج .. بسافر احين احين مره .. بسير العمره .. بسير اشكر ربي ... يلا فداعة الله
وديمه (تضحك) : برايك حبيبي يلا ربي يحفظك من الشر <img src="http://oasis.bindubai.com/emoticons/smile.gif" border="0" valign="absmiddle" alt=':)'>
و سار خليفه العمره ...و اعتمر ورجع البلاد و يومها ما كان يفكر غير في ودووم عمره و روحه .. ونزل و لقى اهله كلهم يالسين و عمته و حميد عندهم ...
حميد(يتوايه وياه):عمره مبروره يالاقرع ..
خليفه : ما اعرف شو يردون يالغبي
عمته : هلا ولدي خليفه .. وين الشعر .. و الله شكلك احين احلى بوايد ...
خليفه(يبوس عمته على راسها): هلا عمو
و سلم على ابوه و على امه و يلس وياهم
عمته: زين ماشالله خلصت الدراسه و بيطرشونك البعثه تدرس هندسه شرات ما بغيت بس ما باقي غير اندور لك حرمه ..
خليفه ( يضحك): هيه عمو ما بقى غير حرمه
عمته :  انته بس اشر يا خليفه و انا اقولك تم ...
خليفه : ما قصرتي عمو ...الحرمه موجوده ..
عمته : منو سعيدة الحظ
خليفه : بنيه من العين .. جان بتخطبينها لي ..
عمته : تم بس شوف وين بيتها و انا و امك نخطبها
خليفه : انشالله
ونش من عندهم و سار غرفته عشان يتصل بوديمه
خليفه : ودامي حبيبتي شحالج
وديمه(صوتها تعبان) : الحمدلله حبيبي بخير
خليفه : وين بيتكم؟
وديمه : ليش؟
خليفه : شو ليش .. تبيني اخطبج في الشارع عيل .. وين بيتكم؟
وديمه :هيهي بيتنا في العين في عشارج  صوب ..
خليفه : انزين اسبوعين و لا 3 بالكثير و ياينكم
وديمه : فديت روحك انا
خليفه : يلا عمري باي
وديمه : باي
و يا اليوم الي بيسيرون فيه لوديمه ... قبل السفره باسبوع(سفرة البعثه) و ساروا بيتهم وين خبرته و دخلن الحريم ...
البقيه في الحلقه الخامسه ....