مطعم وكوفي يستاهل ينسار له

[شمعة أمل]

السلام عليكم


مطاعم .. ياربيييي.. وايد احب أكل برع


مطاعم او كافييس في فنادق
نبدا ..
برج العرب
مطعمهم البناني < كان حلوو اول مانفتح برج العرب بس بعدين حولوه بوفيه ومب لهنااك
والمطعم الى فوق .. ماعرف شو اسمه .. بس لازم تاخذون اللفت وهو في اخر طابق .. مب شي .. ماعيبني ..

مدينة جميرا .. *مينا السلام والقصر*
في فندق القصر .. الكوفي في اللوبي عجييييب والله الشخص يدمن عليه .. الكيكات والكابتشينو والافترنون تيي صدق شييييي من زمان ماودوني
بعدين شي مطعم ايطالي .. لازم تاخذون العبره .. اكلهم وايد راقي .. عيبني
وشي البوفيه الى تحت في الفندق < عجيييب
في مينا السلام شي كوفي في اللوبي بس بصراحه ولاشي مقارنة بالقصر
شي مطعم صيني تحت على اليسار في مينا السلام وااااايد عجيب
في القصر مادري مينا السلام شي مطعم اسبانيا ... مب شــــي .. بس اذا كنتو من اوروبا يمكن يعيبكم

في سوق مدينة جميرا
تبين الصدق شي كل المطاعم الموجوده في المولات بس مابذكرها عشان مادري ليش مب شي في السوق والمنيو ساعات غير لكن شي مطعم واحد عجيييب لالا المطعم مب عجيب بس اكله حلوو .. هو امريكي .. جدام ستاربكس هناك .. الستارترز حلوه وسلطاتهم عجيبه


في الرويال ميراج
olives ايطالي .. بوفيه .. روعه اموت في السلطات هناك او بالاحرى الصلصه:harhar1:
tangine مغربي ... حلووو ... راقي .. هادي
شي بعد مطعم عالبحر .. خايس مب شي:no0:


في ابراج الامارات
الكوفي في اللوبي حلووو عيبني.. ابويه وداني مره بعد تخيلو الى يشتغلون هناك عرب ومواطنين
عندكم بعد مطعم النافوره اللبناني .. مادري ليش مايعيبني .. احس الاوتوماتيك والصفدي وايد احلى ..
شي مطعم امريكي scarelets الهمبرقر عندهم حلوووو

شي مطعم ياباني .. ترومون تسيرون من فوق ولا تحت .. بس اذا سرتو من فوق هو عدال ستاربكس .. روووووووعه .. يخبل هالمطعم وعندهم تابنياكي بعد


في جراند حياه
food market يسلااااااام انا تخبلت عليه .. عباره عن different cuisines في مكان واحد ويعطونكم كرت ومن تاخذون اكل من قسم يسحبون الكرت بعدين في الاخير عشان تدفعين يجوفون كم خسرتو من الكرت مالكم

شي مطعم اسمه crab شي .. كعكعكع .. سوالي رعب هالمطعم .. عاشق القبقووب بيتخبل عليه .. ياربيي .. صدق مت من الزياغ:hist: brgll: اول مره اجوف قبقوب كبر طاوله .. ويلبسونكم لبس عشان ماتخيسون:hist:



---------------------------------


مطاعم عاديه
japengo انترناشونل يعني فيه كل انواع الاكلات من الايطالي للسوشي لللبناني للصيني .. عن نفسي وايد يعيبني اسيرله على قل مره في الشهر واسعاره وايد اوكيه .. موجود تقريبا كل مكان .. في امارات مول .. شارع شيخ زايد.. بالم سترب... بن بطوطه .. وافي.. الستي
bella donna مطعم ايطالي حلوو يعيبني .. موجود في مركاتو والستي
more مطعم انترناشنول حلو اكلهم بس احلى شي الايس كريم:kcl: موجود في المروج ولا القرهود
cocos .. مطعم امريكي مب لهناك بصراحه واكلهم دهني .. موجود في شارع الشيخ زايد
chilis .. كنت اتخبر عليه بس من سنتين مادري لاعت جبدي منه احس وايد دهني .. مطعم امريكي موجود في الستي وجميرا وصحارى و القرهود
zeyara لبناني .. سرتله اليوم .. احلى شي بوفية ريوق كل جمعه ... موجود في شارع شيخ زايد في البنايه الى فيها بنط ابوظبي الوطني بس ورااا ..وشي في ميديا ستي
fridays.. مايعيبني وايد .. مطعم امريكي .. موجود في كراون بلازا واظني شي في امارات مول
armani cafe بيتزتهم تخبللللللللللللللللل والجوكلتس بعد .. موجود في امارات مول عدال محلاته
biella مطعم ايطالي .. هو عادي مافي شي مميز فيه .. موجود في وافي وامارات مول ..
havana cafe .. هو عادي اسيرله يوم اكون ملانه ويا امي .. دايما اسير الى في سبينس .. شي بعد في امارات مول
blues مطعم بحري عند المرسى مال ربيع ابويه .. همم سرتله مره كلهم حبوه بس انا مب وايد لاني اصلن ماحب السييفوود .. بس اسعاره شوي مرتفعه
royal orchid .. ياربييي على هالمطعم .. اتخبل عليه .. صيني على ياباني .. في المرسى .. واسسعاره زينه واكله روعه
johnny rockets امريكي بس يسوي همبرقرات .. حلووووو ودفش بس اكله وايد عوود يعني مابتخلصونه .. موجود في جميرا ولا المرسى وامارات مول
fiesta ايطالي بس احس به قحط مب لهناك .. موجود في مركاتو .. ونولدج فلج
sumo سوشييييي موجود في شارع الشيخ زايد .. ميديا ستي .. وبيكون في تاون سنتر قريب
automatic احــــبه ويا عشقي للأكل اللبنانيييييييي .. وايد احب هالمطعم واكلهم نظيف
ceramique cafe يضحكني ... اكلهم عادي .. بس حلو ترومون تلونون
gelato .. هو اكله عادي .. يستوي تسون مثله في البيت .. ايطالي .. مب وايد وااو
noushi noushi .. عبيط هالمطعم بس وايد احبه .. موجود في البنايه في جميرا الى في كوفي بين اند تي ليف جدام الحديقه
capri حلوو جديييييييم من الخاطر .. عند المركز التجاري .. ايطالي
napoli .. ايطالي وسمبل بس استويت ماطلب منه لانه البشكاره تعرف تطبخ نفس اكلهم بالضبط ف ليش اخسر فلوسي:harhar1: .. موجود في شارع شيخ زايد في المبنى الى فيها محل مال عبي منتصف الليل
الصفدي .. لبناني عجيييب حلوو واكلهم نظيف
البرز .. حلووووووو صدق مطعم ايراني حلوو واكلهم مب دهني


خخخخخخخخ مب جني وايد تفلسفت؟؟؟؟؟ عندي زياده جان تبون بس خلني اسكت الحين:harhar1:

[ذنـيـنـي]

ما شاء الله عليكم ما خليتوا شي


اذا كنتوا من محبين البرغر

انصحكم اتجربون البرغر الي في (( فيدريكرز )) في القرهود,,, بتحصلونه عقب جيليز


و شي مطعم فاست فود في مول الامارات اعتقد اسمه جريل ان جيل grill & chill
بعد وايد يعيبني البرغر مالهم

[دمعة شوق]

جـان تـبـا يـاخوي عنـدك

كـوخ الدجاج
و
كافـتـريا البـسـتـان
و
راشـد علــي

خخخخخ حـديه هذيـلا
بس راشـد علـي اسميه مافيه حيييله
طررر اكله عجيب

سمحليـه يـاخـوي مااعرف وايد
هذيلا قتلك حـديـه
بـس في مول الامارات المطعم الهندي حلو اكلـهـم
والكـوفـي فـي جرانـد حيـاة بعد غـاوي
السمـوحـه ياخوي

[عافك الخاطر]

حرام والله :( انا يعت والوقت اللي شفت فيه الموضوع ابداً مب مناسب:no0:
بعدني اسير هالمطعمItalian connection .. الباستا عندهم خبال وهادي وايد ..
بالاضافة الي تشيليز و ماكدونالدز وبر وبحر و سندويجة دمبي من كافتيريا نسيت اسمها في دبي (الحلو فيها ..ان هي عبارة عن سندويجة فيها برجر و نقانق و كل شي ) > بس مليت منهم
في مطعم اختي اكتشفته ..اسمهapple هو ايطالي ..قالت بتعزمنا ..يوم بسير بقول رايي فيه ان شاء الله ..
ماشاء الله شمعة امل ما خليتي شي .. بس زين نفعتينا ..لانا حالياً ناوين انجدد ف المطاعم :ice:

[شرجاوي]

لا ايطالي ولا بطالي .. سر اضربلك مندي من مطعم التواصل ( قبل دوار الساعه ف دبي ) و بتنسى الاكلات الهنديه و الايطاليه و الافريقيه

[تحفه]

امسات ماكلين مندي من بيت المندي .. كان حلو

[قرموشة]

هـ المندي ما جـد جـربته !!
حـلو ؟!

[لمّــاح]

الســلام عليكم ..

انا عندي هواية اسمها تجربة المطاعم .. أسميني ماخليت مطعم ماجربته :harhar1:

همم معظم المطاعم ذكرتوها مافي داعي اعيد نفس الاسامي لكن شي مطعم ياباني مادري صيني المهم اسمه Wagamama اسميه فنان على شارع الشيخ زايد ..

و عن المندي وايد حلو و اذا اتغديت مندي اتم شبعان ليييين فليل او اليوم الثاني ..

شي مطاعم وايد مجربنها لكن احسن مطعمين هم مطعم المرحباني ( شارع الاتحاد ) و مطعم الجود ( القصيص الصناعية ) و عن بيت المندي بعد اكلهم زين لكن مايعيبني كثر المرحباني و اسميهم حركات اونه مايستوي نشرب جاهي عقب الاكل .. ممنوع

و شي مطعم ( مأكولات بحريه ) خبرونا عنه اسمه فلوج و بياح ( مادري اذا هذا هو الاسم الرسمي للمحل ) في ام القيوين مدحولنا اياه :harhar1:

عموماً لي عودة ... شكلي بعسكر في هالموضوع مابخلي شي مابكتبه

[تحفه]

هـ المندي ما جـد جـربته !!
حـلو ؟!

إذا طابخينه لج و إموصاي عليه .. صدقيني اعطيج قرنتي انج مابتقومين من السفره .. خاصه وي سوالف الاجارات وجي

[شمعة أمل]

اكتشفت انه اسمه الياباني في ابراج الامارات tokyo @ the towers < كعكعكع سرتله من 3 أيام

البارحه سرنا مطعم تايلاندي في المريديان ..الى عند المطار .. هو اوكي .. بس الياباني مال ابراج الامارات احلى D:

[سفير الخيال]

حد جرب مطعم ناندوز اللي في شارع زايد "مجابل الأبراج" ؟

أنا جربته في قطر وهناك قالوا لي إنه مطعم جنوب أفريقي ولما سرت بدبي قالوا لي إنه برتغالي :kkk:

امنو الصح ما أعرف...

بس عندهم مشاوي مع الفلفل .. شــــــي غــــــــــــاوي

شكلي بحفظ اللسته اللي كتبتها شمعة امل وبجربها هذي السنه.

انا احب اتوع بالمطاعم بعد

اشكركم اشفلفل :)

[منصوري الدوله]

اليوم مريض شوي وجبدي لا يعه مالي خاطر ف المطاعـم ولا الاكل
وزعلان على الدنيا لكـن ماعرف ليش يا ف بالي مطعم ( جازيبـو ) اللي في بن سوقات مول
ومرّه كلت ف هذا المطعـم الدوّار اللي اعتقد في فندق حياة ريجنسي ؛ بس اطلبو seafood
مع اني مب وايد مع السي فووود ..

مزوحي انته لقطه ياخوي.

[منصوري الدوله]

مش متأكد من اسم الفندق ...
وشي هذا زعتر وزيت يقولون زين اللي ف شارع الشيخ زايد

[سفير الخيال]

منصوري الدوله

انصحك بأكل البيت.. تراهم يمدحووووونه.. شو اتبا بالمطااعم وواحة المأكولات brgll:

[منصوري الدوله]

يعني انته اتعرف السالفه بعد كيف اكل البيت.!
تنطنطز علي حضرتك !