<span style='color:Red'>رحلـــــة لبيـــــت مهجـــــــور</span>
مقال قديم لكاتب و عضو كان ويانا في واحات بن دبي في يوم من الأيام... اسم الكاتب <span style='color:Purple'>ويـــــــل حــــــالي</span> الله يحفظه وين ما كان.. و يعذرني لأني رديت احييت مقاله
حبيت أعيد ذكرى هالمقال الجريب من قلبي وايد .. بسبة كلماته اللي كل ما اقراها تطفر الدمعة من عيني... شفت أنه مناسب لواحة التراث ..
ان شاء الله يعجب الجميع ...
السمــــــــوحة ..
حبيبي لا تخاف ..
انا وياك حبيبي ..
هذا بيت حبيبي لا تخاف
حتى شوف .. هذا باب .. وهذي حجره .. وهذي دريشه .. وشوف هذا حبيبي .. هذا يسمونه ويْل .. كانت فيه سدرة عوده .. عوده وايد .. ونبجها حلو مثل الشكر .. كانوا الناس اييون من كل فريج .. بس على شان ايترسون مخابيهم من نبجها الحمر اللي كان متغريف بركونه من ورى طوفة بيتنا .. وهذا اللي مجابلنا اسمه الصابات .. مثل الشرفه حبيبي .. حتى شوف .. دور ما دايره شرباك .. كنا نتيمع فيه حزة الغدا .. ونتغدى ونشرب لنا كم استكانة شاي .. ونيلس انسولف كلنا لين العصر .. يدك ويدوتك وعمامك وعماتك كلهم كانوا يتيمعون في هذا المكان .. و شوف هذا حبيبي .. هذا يسمونه تنور .. في هذي الحفره كانت يدوتك تسوي غدانا .. الله يرحم يدوتك حبيبي .. ما قصرت فينا .. شلتنا على ظهرها عن الرمضا .. ودستنا في عباتها عن لسعة الشمس بعز القاوايل .. وكانت من عقب لمغرب حبيبي .. اتدور بكعدها من دوشك لي دوشك .. اتغسل ارويلاتنا ونحن ارقود .. كان الصبخ من مداهسنا في الفرجان .. واصل لين اركبنا .. تخيل حبيبي .. وين بتلقى في ايامنا هذي أم تستحمل شقاوة ضناها كثر يدوتك .. بس حبيبي لا اتصيح .. انت مب فاهم شي .. وعمرك ما بتفهم .. ولا بتتخيل كيف كانت طفولتنا حلوه وصافيه مثل قطرة ماي المطر .. لا كان عندنا بلي استيشن ولا سيجا ولا حتى ربع لعبه مكسوره من ألعابك اللي مليت من كثر ما تكسر فيها عل شان نشتري لك غيرها .. تدري حبيبي .. لو بس واحد من صبيان ذاك الزمان طاحت في ايده لعبه من ألعابك .. جان انترس بيتهم من صبيان وبنيات الفريج كله .. وبتلقاهم ميتمعين عليه مثل النمل على حبة شكر ..
حبيبي ..
أنا أحبك صدقني
بس بعد طفولتي غاليه علي .. أحبها .. واحب كل يوم قبل ما احط راسي على المخدة .. أفج حلجي وابتسم وانا اتذكرها .. سكه سكه .. بيت بيت .. حجره حجره .. واتذكر الناس اللي ما تم منهم حد .. اللي مات .. واللي طلع من لبلاد .. واللي اتغير موليه وماتت في داخله مودة ومحبة زمان .. ويوم انك اتشوفه جنك شايف حصاة يبل عوده .. ساده عليك درب الرده .. الرده للماضي بكل تفاصيله .. الماضي اللي كل ليله تعلقه مثل الجفير في صقف الحجرة ام الجبس والثريات الكرستال .. وتسهر وانت مستلقي على ظهرك اطالعه و عيونك مغرغره بلدموع .. طايح وحاط ايدك ورى راسك و مخالف رويلاتك و عينك على الصقف .. واللي ما يدري بشي .. بيتغيبك سهران اتفكر في باجر .. في المشروع اللي بيدخل عليك ملايين مثل ربيعك اللي صاروا الناس في عينه مثل حبات الرمل .. ما يدرون انك سهران وفي راسك صورة جديمه .. صوره فيها صبي اصغير .. يراكض حافي من سكه لي سكه في فريج جديم .. رويلاته مغبره .. وكندورته وصخه .. وويهه محمر من الحر ولسهام .. وكل حرمه في الفريج تستوي أمه .. وكل بنت أخته .. وكل ريال يطوف عليه يزقره أبوي .. الله يا ذاك الزمان ..
بس حبيبي بس ..
لا تصيح
يلا انسير بيبي شوب
بشتري لك لسكيت حبيبي
بشتري لك كل اللي ما رام يدك يشتري لي اياه .. وبغرقك في البحر اللي ماله طعم ولا لون ولا ريحه ..
يلا حبيبي
_
في حويينا .. كل شي يبس
في حويينا .. كل شي مات
اللوزه والتينه والرمانه
وانخلتنا أم حروز مصررات
وسدرتنا اللي صيتها ذاع
في الفرجان والحارات
ماتت من الحسره
وعقت اركونها ورى الطوفه
وهدت ويا الريح ..
أوراقها مهاجرات
في حويينا ما شي بقى
لا أطلال
ولا حتى ذكريات ..
………
في حويينا المحت عيني
جثث منثوره في الصابات
من احلامنا وجثث اكثر
على الرمله من الضحكات
واهناك في ظلة الكسرة
لمحت بعيني التنور
شفته اصغير على كبره
مثل تمثال صبح مكسور
رحلت عن واقعي بصمتي
صرخت يمايه وين انتي
نسيت اني في بيت مهجور
**
في حويينا ( الهرم ) خضّر
وحل محل التين لاشخر
ومحل السدره غويفه
اطعنت عيني بالف خنجر
..
وانا يالس على الصبه
اداري الشوق واتسبر
مرت ساعه يمايه
مر اليوم مر أكثر
ولا حد يا يدق بابنا
ولا احد مر يتخبر
عن اللي صار في غيابنا
سنين اطوال واتغير
..
في حوينا يمايه
كل شي عقبج اتدمّر
السمـــــــــــــوحة <img src="http://oasis.bindubai.com/emoticons/smile.gif" border="0" valign="absmiddle" alt=':)'>
<center><object id=RAOC classid=clsid:CFCDAA03-8BE4-11cf-B84B-0020AFBBCCFA height=55 width=180 ><param name=_ExtentX value=4763><param name=_ExtentY value=1455><param name=AUTOSTART value=-1><param name=SHUFFLE value=0><param name=PREFETCH value=0><param name=NOLABELS value=-1><param name=SRC value=http://www.kubbar.com/Music/jameel-basheer_3ood_3.ram><param name=CONTROLS value=ALL><param name=LOOP value=0><param name=NUMLOOP value=0><param name=CENTER value=0><param name=MAINTAINASPECT value=0><param name=BACKGROUNDCOLOR value=#000000><embed src=http://www.kubbar.com/Music/jameel-basheer_3ood_3.ram height=55 width=180 controls=Default autostart=true console=Clip1></object></center>
رد مع اقتباس
مواقع النشر (المفضلة)