السلام عليكم ورحمة الله وبركاته
يامرحبا بكم …أهل الواحات كلكم ….كبيركم وصغيركم ….
وش حالكم عساكم بخير وعافية …؟؟؟
<span style='color:Red'>مرحبا بكم في مضارب بني مشغووووب.......</span>
اليوم مشرفتنا في مضاربنا الوالده تراها توها باديه وبتخبرنا عن سفرتا في الصيف ووين سارت …
مشغووووب : مرحبا مليون بالوالده …كيف أنتي عساك الا بخير وعافيه وشو فريجك وعلومهم ؟؟؟
الوالده : يامرحبا بالغالية … بخير ونعمه الحمد لله ويسرك الحال …
مشغووووب : الوالده خبرينا السنة وين سافرتي ؟؟؟
الوالده : يعل يسقى يابنتي على هذي السفره … السنة يالغالية سافرت سفر الأوليين العرب لول في الصيف كيف حياتهم ؟؟؟ عندنا نحن هل البحر … الرياييل يمدون الغوص … والحريم والعيال والشواب ييلسون في البلاد لكن اللي منهم لاحج خير والله مرهي عليه ( يحضر ) يعني ينتقل لبقعه نفاهه بعيد عن جو البحر وأكثر الإماكن اللي الناس يحضرون لها ( عمان * العين * ، الباطنه ،خصب ،شمل ،غمضا ، خران ، دبا ) والسنه حضرت عمان … والعرب لول يوم ينوون يحضرون يتفقون ويا الكري ( الجيم تحتها 3 نقط يعني الجيم المحليه في لهجتنا مثل ما تنطقون المجبوس ) اللي بيوديهم والكري أيي هو وبوشه واللي عنده بقر ياخذهن وياه والهوش يودعونهن عند اللي يالس وما بيحضر … ويتقاطعون ويا الكري على أجره ويسمونها القطوعه حد من الكري يطلب عشر نوقات وحد أكثر وحد أقل مثل ما قلت لج على عدد العرب اللي بيحضرون وتكون بس للسيره ويعتمد المدفوع للكري على عدد اللي بيحضرون وخاصه الحريم لان كل حرمه لها ناقه بروحها ويحضرون العصر يعني يروحون ويباتون في مكان قريب ويكملون سيرهم والكري عارف الدرب زين وخط سيره لازم يمر على الموارد ( جمع مورد وهو بئر الماء )عشان الناس تروي وتسقي ركابها ويشلون وياهم ماي يسدهم ليومين ومن الموارد اللي نمر عليها ( الطف ، بوصلف ، سويحان ، الجرين ) ...
وهل البحر يوم يحضرون يشلون وياهم السمج المالح والعومه للأكل وكان عندهم خير وايد باعوا الباقي وأشتروا بداله سح (تمر ) وشلة المالح = شلتين تمر .
واول ما نوصل عمان ……
وماأسمع إلا الوالده ترحب … يامرحبا يامرحبا بأم عبدالله أقربي …
وهذي عادة أم عبدالله كل يوم العصير المسيان تسير على الوالده لين يجرب المغرب …
الله لا يحرمنا من أم عبدالله ولا من تسيورتا ……
والحين أسمحولنا بنجابل أم عبدالله وبنضيفها
وإن شاء الله زورونـــــــــا مره ثانيه وبنكمل لكم السالفه ....
وحياكم الله دوووووووم
<span style='color:Red'>في مضارب بني مشغووووب.......</span>
والسموحه منكم
رد مع اقتباس
مواقع النشر (المفضلة)