موضوع مهم للغاية .
غريب . مع اني دوم ادش الواحات بس هذي اول مرة تهب علي ريحة الهسس .. صار لي اكثر عن ثلاث شهور ما طلعت البحر .. والظاهر اني برد له جريب والسبة موضوعك يا ولد راعي بحر ..
أنا عن نفسي أقول ان البحر علمني اشياء وايدة كنت اجهلها .. ومن أول مرة أطلع فيها البحر ويا يدي الله يرحمه لين اليوم .. عمري ما حسيت اني شبعت من البحر في مره .. و في كل مرة أرد فيها البرأعزّم على الطلعة اليوم الثاني .. جربت كل الطرق التقليدية في الصيد من الحداق .. التشخيط .. لمحاياه .. الشب .. وابتلشت خلاف بالليخ ( نصب ، هياله ) .. وطبعا كانت لي تجربة معقولة ويا الجراجير بأغلب احجامها .. من البيمة لين الدوباية  .. وبعد ما سدني .. قمت وسويت لي منشلة .. طبعا المنشلة تعرفها يا ولد راعي بحر .. واللي ما يعرفها فهي عبارة عن مجموعة دريات ( طويات ) من لخيوط طولها عقب ما تتوصل ببعض يتفاوت ما بين خمسمية متر و سبعمية .. واحيانا يوصل الطول لكيلومتر .. وعلى هذا الطول يتوزع عدد كبير من الميادير يوصل لستمية ميدار وأكثر ( حسب طول الخيط ) .. وفي بداية المنشلة انحط حصاة ( ثقل ) مربوطه بحبل وفي نهاية الحبل ( علاجه ) يعني بوهه للطفو .. ومثل هذي الحصاة هنتين غيرها وحده في النص والثانية في الطرف الآخر .. فتكون المنشلة عقب ما ننصبها كالاتي : خيط طوله سبعمية متر ( مثلا ) ممدود على شكل مستقيم في القاع ومربوط فيه على كل متر ونص ميدار . ومثبت بثلاث حصي ( اثقال ) من الاطراف والنص .. وكل حصاة مربوطه بحبل ينتهي بعلاجة ( بوهه ) طافية على السطح .. لان اذا انقص الخيط من اي مكان نقدر نرفعه من الصوب الثاني .. وبهذي الطريقة تعودنا نصيد أكثر عن عشر أضعاف السمج اللي نصيده من الحداق .. بس في شي مهم لازم تعرفونه .. ان هذي الطريقة انمنعت في القانون اليديد .. والسبب انها تمثل استنزاف غير طبيعي لثرواتنا البحرية .. ومن يومها قلت حد الله بيني وبينها .. يعني أرد في كل طلعه بسمجة وحدة ولا أضر بلادي في شي .. ترى الوعي مهم في كل حرفة وحتى في الهوايات .
اذا اسمحت الظروف بحاول أعلمكم عن لينون اللي صابني من ورى البحر .. يعني الاختراعات اللي اخترعتها للصيد .. واللي بعدني أفكر فيها .. طبعا في منها اختراعات سخيفة اتضحك .. لان مثل ما تعرفون المحاولات لا تخلوا من الحماقات ..
ومثل ما قالوا .. البحر له ناس لفيّحه .. يعرفون التوح م اليره .. هوب كل من تاح سريّحه .. قال هذا خيط بايرّه .
والسموحة