<font color='#F660AB'><div>
<center><font color=#996600 size=4>ولا بسعيد يبتسم ويقول ..: يا هند انا بكون صريح معاج .. انتي قلتي بما معناه .. اني اسهرج واخليج تسهرين .. صح &#33;&#33; واشياء كثيره سمعتها .. بس خليني اكون صريح معاج .. ان كنتي تسهرين الليل تراني انام .. ولا احد ضايق نومي بشي .. وصدقيني اني اعيش مع الناس عادي .. حالي حالهم .. بس قلبي يخفق بقلب وحده .. انسانه .. من خاطري احبها * ارتسمت الصدمه في عيون هند وهيه تسمع انه فيه انسانه في قلب سعيد .. بس سعيد كمل* ..وازيدج من الشعر بيت ..حروف اسمها منقوشه في قلبي بروحها .. متملكه قلبي ومتعرشه فوقه .. وهيه عمرهما ما فرقتي .. وانا اشتقال لها ...وهيه موجوده هني *ويأشر سعيد على قلبه وهو يقول * .. بس ما فيه احد يعرفها .. او شافها .. لاني اخبيها عن الحساد .. ويا كثرهم .. وازيد في كلامي .. واقولج .. هالانسانه .. مشاركتني في كل شي .. مشاركتني في اكلي .. في شربي .. في كل شي ..حتى ما تصدقين لو اقولج اني لو اغمض عيوني بالليل .. اشوفها ..

هند من سمعت هالكلام انفجرت تبكي .. كانت خايفه من هالجواب .. وبالاصل كانت مرتبكه بسبب محاكمه عبدالله .. وكانت تتوقع انه بكلام سعيد يا اما راح تتعزا وترتفع معنوياتها .. او انها راح تتحطم بالمره .. : هند وهيه تسأل ..وتبكي : منو هذي .. وانته ليش ما رفضت يوم امك قالت هالكلام ..

سعيد وهو يبتسم ببروده .: وحده طيبه اخلافها.. شيخه الزين .. ولو اقولج بانه ياللي تشوفها تتمنى انه تكون هالبنت لودها نسيب فيها ..

اول ما وصل على بال هند كانت ساره .. يعني صحيح ياللي قالته ساره في خيمه الحريم .. انه سعيد يبيها وهيه ياللي رافضته .. مشان جيه سعيد محتفض بالدفتر في كبته وهيه مبطلته .. هلت هند دمعتها بحزن وهيه ترفع راسها بكبرياء وهيه تقول ... : اكيد هذي ساره .. صح .. انا ادري انك تحبها وهيه تحبك .. وانا ما صار ليه مكان في حياتك .. بس مبروك عليك يا سعيد .. ساره فصخت خطوتبها .. وكان انته خايف على مشاعر امك .. لا تخاف .. انا لين الحين ما اعطيت كلمتي لها.. وانا كنت انتظر الفرصه على شان اعرف ياللي في خاطرك .. لاني ما ابا انغصب على شخص على او هوه ينغصب عليه وهو ما يبيني .. وانا راح اقول لشوق اني موب موافقه .. ومبروك عليك مره ثانيه ..

ما درت هند ولا بسعيد يضحك لاول مره وعيونه تدمع ... استغربت هند وهيه تشوف بروده سعيد .. هيه تحترق .. وهو ميت من الضحك ..هند ما قالت شي .. نزلت راسها وهيه تحس بنفسها سخيفه .. ولا بصوت سعيد من ضحك ينقلب جدي وهو بابتسامه ماليه وجهه لانه اخيرا سمع ياللي كان تمناه ..

سعيد وهو يبتسم : هند &#33;&#33;.. من قال لج اني احب ساره .. *وتلتفت هند فيه بغرابه وهيه موب عارفه شنو يقول توه يقول انه يحب .. شنو قلبه لا يكون حس بالشفقه عليها ولا بسعيد يكمل * .. هند .. انتي ياللي في قلبي سكنتي .. انتي اول حب في حياتي واخر احب .. وانا ياللي تكلمت عنها ما كانت ساره .. ولا اعرف ليش يت ساره على بالج .. انا اتكلم عليج انتي .. انتي وبس .. هند ..انا عيوني عمرها ما قد بكت على احد غيرج . ابكي فرقاج .. وتمنى لقاج .. وربي اني صادق في كلامي .. *وهلت دمعه من سعيد تجاوبها دمعه من هند وهو يكمل ويقول* ..وانا كنت ساكت طول هالوقت لاني بروحي كنت خايف من مشاعرج انها ما تكون متقبلتني .. *ابتسم سعيد وهو يمسح دموعه وهند من الفرحه بكت وبدت تمسح دموعها وسعيد يكمل * .. عرفتي الحين منو ياللي انا احبها واشتاق لها .. عرفتي هالملاك ياللي انا اتكلم عليها &#33;&#33;&#33;

هند وهيه تضحك بفرح تخلطه دموع وهيه ترمي الكلينكس على سعيد ياللي كان في يدها وهيه تقول .: الله ياخذ عدوك يا سعيد .. ليش انته جيه خقاق وشايف نفسك .. ليش ما تنازلت وقلت لي عما في خاطرك .. وانا ياللي كنت خايفه اني احبك وانته ما تحبني ..

ولا بشوق تنادي من برا .: حوووووووووووووه ..بنتأخر .. شنو فيكم ..

ولا بسعيد يبتسم وهو يقول .: يالله .. ورانا روحه ..

هند وهيه تسال سعيد قبل لا يطلعون .: سعيد قولي .. ليش انته مخبي ياللي في قلبك .. ليش انته ما صارحتني او حتى بينت لي .. ليش كتبت كل شي طول هالمده ..

سعيد وهو يبتسم .: هند .. انا من يوم ما شفتج في المكتب .. عرفت اني تعلقت فيج .. بس سكتت وخصوصا انه منى كانت تقولي كلام عند ..وزاد تعلقي فيج .. بس تبين الصدق .... ما كانت احس اني من مستواكم .. واعرف مليون في الميه اني كنت بنرفض منج او من ابوج .. وسكتت والتزمت الصمت .. وخفت لو قلت لج اني احبج في يوم راح تنتشر القصه ..وانتي شوفي حولج .. ما من عاشق تنتشر قصته الا خسر خله .. وانا مجرد التفكير *ونزل سعيد راسه وهو يكمل* .... اني اخسرج .. كانت روحي تموت الف مره قبلها .. وانا اعرف انه امج بالاصل ما كانت بتوافق على واحد مثلي ياخذ بنتها .. وراح توقف في طريقي .. وخصوصا اني لين هذيج الفتره خايف من ياللي انتي الحين كنتي خايفه منه .. اني احبج ولا تحبيني .. وفيه كمن حاسد يهوى بس يفرق بين الناس.. وانا خفت من جذيه .. ما كان ودي احد يعرف لين اعرف مصير هالقلب لين وين بيوصل .. بس فيه شي اطلبه منج يا هند ..

هند وهيه تمسح دموعها وهيه تبتمس ..: امر يا سعيد ..

سعيد وهو يبتسم .: ساره .. خلي الخبر بينا الحين سر ..يعني لا تخبرين احد .. لين تكون الخطوبه رسميه او بعد الملكه .. لانه فيه ناس ما همهم غير تفريقنا .. وانا ما ابا لهم فرصه .. ولا يغرج واحد ببسمته حتى ولو شاق حلقه بالضحكه .. تراه الحاسد والعدو يقول كلام ويوعد .. بس تنصدم انه خويك ياللي هوه خويك .. اكبر عدوا لك .. ويفشي سرك ولا يكون عند وعده لك بكتامنه للسر .. يعني ياللي اباه باختصار انج ما تخبرين احد لين تكون الخطوبه رسميه من ابوج .. وترجع القلوب لبعضها .. فهمتي علي

هند وهيه تهز راسها في اللحظه ياللي دخلت شوق وهيه محتشره .: لا حول ولا قوه الا بالله .. شنو فيكم دقيتوها سوالف هني .. يالله ورانا خط ومحاكمه .. دعواتكم عسى بس عبدالله يطلع ..

ابتسمت هند في اللحظه ياللي سعيد قال .: يالله بسم الله ..

شوق وهيه مستغربه .: عنوا .. في شنو كنتو تتكلمون في كل الوقت ..

سعيد وهو يبتسم .: ما فيه شي .. بس طلبت من هند تكوي غترتي ..

شوق وهيه مستغربه .: سعيد .. انا خليت لك الغتره على الفراش ..

سعيد وهو يبتسم : يالله بسم الله .. خلونا نطلع ..

ويطلع سعيد في اللحظه ياللي هند باتسمت وعرفت شوق انه سعيد وهند كانوا يتكلمون في امور خاصه بينهم .. فحست انه احسن شي يوم ترجع تفهمهم كل شي .. وعن لا يسوون هالحركات البايخه مره ثانيه ..

ويطلع سعيد وساره وسلومي وشوق لبيت ميثا ..

وتنزل شوق وهيه تقول .: دقيقه .. خلو ميثا تجي ..

هند وهيه تبتسم .: سلومي .. لا تسوين حشره لخالتي ميثا لين نرجع زين ..

سلومي وهيه زعلانه ..: بث انتي ليث بتروحين عني ..

هند وهيه تضحك .: هاهاها.. سلومي .. بنرجع لج .. لا تخافين .. ما بنشرد منج .. ولا تسوين حشره لخليفه وامه ..سمعتي &#33;&#33;..اعرفج ما تستحين وكله تطلبين الدكان

سعيد وهو يضحك .: ما عليج .. خليفه بروحه من يخوز من الدكان واكيد بتكون معاه طول الوقت

وتنزل سلومي ويطلعون الكل لابوظبي والكل في السياره يدعي لعبدالله انه يطلع بخير وسهاله ..

مرت الساعات ..تتبعها الساعات .. والكل خايف ويدعي .. وصلت محاكمه عبدالله .. ودخلوه للمحكمه .. وتمثل المحاميين .. كان هلال هناك وسعيد .. والمحاميين .. والحريم يلسوا برا ينتظرون الحكم .. كانوا ينتظرون في السياره لانهم استحوا يدخلون ... بس من شوقهم لمعرفه النتيجه .. ماصبروا لين يرجع سعيد ولايدق عليهم تلفون .. فانتظروه في السياره .. ولا بعد ثلاث ساعات .. ولا بسعيد يطلع هوه قريب لا يبكي .. انقبض قلب هند .. ولا بشوق تغرغر وترتجف يدها وهيه تنتظر الحكم .. ولا بسعيد من ويوصل وصل يلهث من التعب وقريب لا يبكي ..

شوق وهيه طايح قلبها ..: سعيد .. شنو عندك .. بشر .. بشر

سعيد وهو ينفجر يبكي .: مبروك ..مبروك يا هند .. مبروك ياامي .. عبدالله انحكم عليه بسنه سجن ..

هند من الفرحه انفجرت تبكي في حضن شوق وسعيد يحط ذراعه على وجهه ويبكي .. لاول مره يحس بالراحه .. سنه واحد مقابل العمر كله ولا اعدام كنه حكم بالبرائه ..

هند وهيه تبكي .: اللهم لك الحمد والشكر يا ربي .. اللهم لك الحمد والشكر يا رب ..

شوق وهيه تبكي .: مبروك يا هند .. مبروك .. وعقبال ما نفرح به طالع من السجن

هند وهيه تبكي .: امين يا خالتي امين ..

ولا بهلال يوصل وهو عيونه محمره من الفرحه ...وطلعت عليه اثار الالتزام من تطويل اللحيه.: السلام عليكم ..

هند وهيه ترتمي في حضن ابوها وهيه تبكي .. ما قدرت تقول شي .. ولا بهلال يحضن بنته ويبوس راسها وهو يقول .: على الله ترضين على ابوج الحين يا هند ..

هند وهيه تبكي .: ابوي ..اسمحلي .. لو غلطت او زليت عليك بكلمه ...وادري اني كنت بس انتظر موعد المحاكمه ..

هلال وهو يبتسم .: هاه ..الحين بتروحين معاي ولا بتمين على عنادج &#33;&#33;

بسير معاك .. بس خلني اليوم اسير عند خالتي .. واضب غراضي .. وبكره بكون في بيت خالتي شوق انتظرك يا ابوي ..

شوق وهيه متلهفه وتكلم سعيد .: هاه يا سعيد .. شنو قالوا في المحكمه ..

هلال وهو ينزل راسه .: شوق ....

شوق وهيه تناظر هلال بنظره جفاء كنها موب راضيه عليه .. بس سكتت والتفتت فيه ببروده وهو يقول ..

هلال وهو ينزل راسه .: شوق .. انا وسعيد تصالحنا في المحكمه .. وقررنا ننسى كل شي كبدايه لحياه جديده بينا وبينكم ..

شوق وهيه تنزل راسها .: هلال .. كان سعيد نسى.. يحق له انه يعيش باقي حياته عند اهله .. بس كيف انا انسى عشره عمر مره كانت سببها يدينكم .. لا تنسى يا هلال انه يدك ويد حرمتك ياللي مسكتوا كاس المر وشربتوني اياه ..انا ما امنع سعيد انه يرجع لكم .. بس انا بكون صريحه معاكم .. والكذب خيبه .. لين الحين انا في خاطري شي عليكم ..</font></div>&#60;&#33;-- / message --&#62;

<center><font color=#996600 size=4></font>&nbsp;</center></center></font>