<font color='#F660AB'><FONT size=4><FONT face="arial, helvetica, sans-serif" size=5><FONT color=#996600><FONT size=4><FONT face="arial, helvetica, sans-serif" size=5>&#60;&#33;-- / message --&#62;&nbsp;
<DIV>
<CENTER>ودخل اليوم ياللي يالاربعاء .. وبالليل وفي بيت مطر ..

كان احمد وامه زايرين مطر واهله .. وياين يسلمون على ساره ويشفون احوالها .. ويحددون موعد العرس ..

جلسوا على سوالف وضحك .. في البيت .. الريال في الميلس .. والحريم في الصاله .. في المجلس كان خليفه ومطر واحمد وسعيد وحميد .. وفيه بعض من قرايب احمد .. وفي الميلس .. كانت ساره .. وهند وشوق وام مبارك او ام احمد ..روضه وميثا .. ما كنن فيه حريم كثيره .. بس بدو يتكلمون بسوالف عاديه .. وضحك .. وريحه الدخون في كل مكان.. رغم انه العلاقه بين هند وساره كانت سطحيه جدا .. ما تتعدى الضيف ومضيفه ..كانن يتكلمن بامر عادي .. ولا له دخل بامور الكبار .. يعني عن الدراسه وغيرها .... لين دخلت الساعه عشر .. وطبعا بعد ما تعشوا وسلوفوا .. حسوا انه الوقت ليل .. واحسن شي يسرون لبيتهم ..

خليفه وهو يبتسم .ويطرق الباب على حريم ..وينادي من ورا الباب .. : امي .. يا امي ..

ميثا وهيه تبتسم .: يا لبيك ..

خليفه وهو يبتسم ..: خبري ام مبارك انه احمد يقول لهم كان يبون يسرون ..

ميثا وهيه تبتسم .: زين .. بس خل احمد يجي اسلم عليه .. ما سلمت عليه من وصلوا ..

وتلتفت ميثا في ام مبارك وهيه تقول ..: اسفه انا انشغلت عن احمد ما سلمت عليه ..

خليفه ..: على الله ..

ويطلع خليفه ويخبر احمد انه امه تبي تسلم عليه .. ويجي احمد وطبعا كان مرتبك .. ما توقع انه ميثا تطلبه تبي تسلم عليه .. وهو متعود انه يشوفها اول ما يوصل مثل كل مره .. بس هالمره كانت هيه في المطبخ يوم وصلوا .. فطلبت تسلم عليه .. وطرق احمد الباب في اللحظه ياللي الحريم تغشن .. واعتزلت هند وساره في زاويه الصاله .. ومعاهم سلومي ..ويدخل احمد ..

احمد وهو يبتسم .: السلام عليكم والرحمه

ميثا وهيه ترحب ..: وعليكم السلام والرحمه .. هلا والله احمد ..كيفك عساك بخير ..

احمد وهو عيونه للارض .: الله يسرج الحال يا خالتي .. كيفج ..وعساج بخير ..

ميثا وهيه تبتسم .: يسرك الحال .. وانته شنو علومك .. وشنو الدنيا معاك ..

احمد وهو يبتسم .: والله الحمد لله .. بخير وعافيه .. وكيف ساره وخليفه ..

ميثا وهيه تبتسم .: يسرك حالهم.. بخير وعافيه .. وساره هني كان تبي تسلم عليها ..

وتأشر ميثا صوب ساره .. ولا باحمد يلتفت وهو يسلم ..: السلام عليج يا ساره ..

ساره وهيه ميته من المستحى وهيه تقول بنبره هاديه ....: وعليك السلام ..كيفك يا احمد

احمد قريب ويطيح من المستحى ..: والله طيب طاب حالج.. وكيفكم .. عساكم مرتحاين

ساره وهيه تحس بغصه في قلبها .: والله يسرك الحال .. بخير وعافيه .. وكيف الشغل .. عسى تمام ..

ساره من الربكه ما عرفت تقول شي .. واحمد موب احسن عنها .. هوه الثاني كان خايف .. ومرتبك ..عمره ما كلم ساره .. ودوم يزرهم مع امه بس عمره ما قد قال او كلمه بشي .. وكان مرتبك بشكل غير عادي .. ولاحظ الكل انه ساره بروحها ترتجف ومرتبكه .. ونبره صوتها امبين عليها انها مرتبكه ..

ما لقي شي يقوله .. فالفت في امه وهو يقول .:. تبونا نتسرا يا امي &#33;&#33;

ام مبارك وهيه تبتسم اقرب لها بالضحكه وهيه تشوف احمد مرتبك وحالته لله ..: زين .. بسم الله..

ولا باحمد يلتفت في ساره وهو يقول .: تامرينا بشي يا ساره &#33;&#33;

ساره وهيه قريب لا تبكي من الربكه ..: لا سلامتك يا سعيد .. ما توصينا بشي ..

هند لاحظت انه ساره غلطت وقالت "سعيد " بدل لا تقول "احمد" .. حست هند بغيره تحرق قلبها .. بس ليش تغار .. وشنو هالسبب ياللي يخليها تغار من شي هيه ما لها دخل فيه .. يمكن ساره ارتبكت وقالت سعيد بعفويه.. ولا فيه شي كان في خاطرها وهيه ما تدري ..

ام احمد ضحكت وهيه تقول لميثا بهمس ..: هاهاها.. بنتج من الربكه نست اسم خطيبها .. هاهاهاها

ضحكت وميثا وهيه تقول رغم انه ياللي في خاطرها شي ثاني ..: هاها.. اي والله .. تعرفين ايام الخطوبه كلنا كنا جيه .. يعني .. ربكه وربشه ... وحلتك لله .. هاهاهاها

التفت روضه في ساره وهيه نظرتها حزينه .. هند لمحت ارتباك ميثا.. ونظره روضه .. وعرفت انه اكيد فيه شي ..

احمد وهو يحس بانه ساره مرتبكه مثله .. وقالت اسمه بالغلط لانها مرتبكه .. ابتسم وهو يقول .: سلامتج يا بنت مطر .. نشوفكم على خير ..

ويطلع احمد في اللحظه ياللي لحقته كلمه ساره وهيه تقول ..: الله معاك ..

حس احمد براحه فيها الكلمه ياللي قالتها ساره ..رغم انها كانت عاديه نوعا ما .. الا انها كانت خفيفه على قلبه .. وطلعت ميثا وام احمد وروضه وبقت شوق وهند وساره في الصاله .. بدت هند تشوف نظرات شوق في ساره ياللي كانت منزله راسها .. حست انه فيه شي هيه مش فاهمته .. شنو هالكلام .. وليش العالم تناظر ساره بهذي الطريقه .. وساره ليش منزله راسها .. هل فيه شي كان بينها وبين سعيد حتى زلت فيه وقالته .. ولا فيه شي هيه مش فامته صح ..

رجع الكل للبيت .. كل وحد دخل بيته.. الا ساره .. ما دخلت المكان ياللي تحس بالراحه فيه .. رغم انها في غرفتها الا انها لين الحين ما تعرف راسها من ريولها .. ليش طرى عليها اسم سعيد .. وكيف وليش .. هل اشتاقت روحها له .. بس قطعت الخيال بالواقع .. وهيه تقول لنفسها انها مخطوبه الحين لانسان يعزها .. ومستحيل تفكر فيه او انها تحلم بانسان بعها وارخص ابها ..

وصلوا في هذي الفتره سعيد وامه وهند وسلوم .. نزلت امه وهند وسلوم وبند سعيد السياره .. وهو يقول لامه ..

سعيد وهو يبتسم .: امي .. انا يمكن اروح المقهى للشباب ..

شوق وهيه شكلها تعبان من الشغل طول اليوم .. : زين .. بس لا تطول ..

سعيد ..وهو ما ينتبه على امه انها تعبانه لانه كان الوقت ظلام .. والبيت اشبه به بالظلام من النور ..: تمام .. بس هذا سويك السياره .. خليه معاج .. وانا بسير مع خليفه ..

شوق وهيه متعجبه .: خليفه بيروح معاك&#33;&#33;

سعيد وهو يبتسم .: هاهاها..الاخ مصر على اني لازم اسير في سيارته .. يقول يوم اكون في سيارتي اكون متحكم وتسلط .. ولا اوديه وين يبا ..

شوق وهيه ما تقدر تقول كلام زياده .. بس ما تبي سعيد يحاتيها ..: زين .. بس ليش ما توديه وين يبا .. افا .. الريال خويك يا سعيد ..

سعيد وهو يضحك ..: هاهاها..امي عليج بالله لين الحين ما تعرفين خليفه&#33;&#33;&#33;...اكيد يبى الدكان .. وييلس ساعه لين يشتري كافي او حلاوه ..

ولا بصوت سلومي يقول ..: ثلومي تبا حلاوه ..

سعيد وهو يضحك.: هاهاهاها.. اقول ...متى راح تكبرين وتتزوجين خليفه .. تلبقون على بعض .. هاهاهاهاها.. المهر 15 كرتون جلكسي .. 20 كرتون بطاطس عمان .. هاهاهاهاها..

هند وهيه تضحك.: هاها..سعيد حرام عليك ... خاف الله .. هذي يهال ما تدري بالعرس وهالكلام ..

شوق وهيه تمشي ..: بسكم كلام .. يالله ..خلونا ندخل .. نص الليل الحين ..

استغربوا سعيد وهند كلام شوق البارد .. كنها تبي تدخل وبس .. بس سعيد ما يلومها .. صار لها مده تشتغل بتعب ولا ارتاحت .. ولا فجأه ينور عليهم ليت من بعيد .. ولا بسعيد يضحك وهو يقول ..: هاهاها.. سلومي وصل خطيبج خلوف ..

هند وهيه تشل سلوم وهيه وببروده تقول ..: اما انك تافه .. ياهل وتقول لها هالكلام ..

سعيد ضحك .. ما عرف شنو يقول .. زلت عليه الكلام.. رغم انه كان يبي الرسميات تختفي بينه وبين هند .. الا انها كل ما يلين لها تصده .. وكل ما تلين له يصدها .. صاروا مثل القطو والفار ..

وصل خليفه وطلعوا للمقهى وهو وسعيد في الوقت ياللي دخلت شوق وهند وسلومي البيت .. وكل وحده دخلت غرفتها .. حست شوق والم في طرف جسمها .. بس قالت في خاطرها انه الالم بيخوز لانها بروحها صارت تحس فيه من مده بسيطه ... تجمع الشباب في المقهى ياللي كان في الصاروج .. او بالاحرى في جبل النقفه .. رغم انه شلت سعيد كانت متجمعه بس على الشاي وسوالف شباب .. وابقي خلق الله على شيشه وسوالف ما لها داعي من لعب بسيارات لتطويرها وغيرها من سوالف الشباب .. في الوقت ياللي محمد ابتسم وهو يقول ..

محمد وهو ابتسامه على وجهه ..: سعيد .. علوم القصيد ..

ولا بخالد يبتسم ..: اي والله .. اشتقنى لقصيدك يا سعيد .. شنو عندك من يديد ..

سعيد وهو مستحي .. : يديد الله يهديكم .. انا بروحي انشغلت بالدنيا ولا حصلت لي فرصه اكتب شي .. الا بنسأل محمد ..محمد شاعرنا .. وله صدى بين الشباب ..

خليفه وهو يبتسم .: طالع هذا .. يبي خلق الله تتحيل فيه .. اقول .. عندك شي قوله .. ما عندك شي .. اكرمنا بسكوتك .. هاهاهاها

محمد وهو يضحك .: خلوف ويا راسك .. يحق للشاعر انه يتمنن بقصيده .. ما دام يسوى .. يستاهل ابوعسكور يتغلى علينا .. هاهاهاها

واحد من الشباب .. : اي والله يا سعيد .. عد شي .. ولو قديم ..

سعيد وهو يبتسم .: والله يا اخوي طلبك على العين والراس .. بس يا خوك ما شي عندي .. لو فيه يديد ما منيتبه عليكم ..

محمد ..وهو يبتسم .: زين .. انا بعد .. بس انته الحين تقول شي .. سواء قديم ولا يديد ..

خالد وهو يضحك ..: هاهاها.. خليفه .. اشوفك سكتت ..شكله محمد قفطك .. هاهاهاهاها.. وييييي ..فشيله .. سكتو خليفه ..

خليفه اونه العاقل ..: طالع هذا .. اقول يا اخينا .. اذا يكلمك واحد اقل من مستواك .. طنشه .. وخذه على قد عقله .. وانته ومحمد بطنشكم .. موب من مستواي ارد عليكم .. هاهاهاها

محمد وهو يضحك .: خليفه .. انا الحين موب من مستواك .. الا بتطلبني شي اساعدك فيه في البروجكتات .. وبنشوف منوا العاقل يا عاقل انته .. هاهاهاها

خليفه وهويضحك ..: لين يوم البروجكت يستوي خير .. قلبك طيب .. وبتنسى .. يعني بين قوسين ينضحك عليك .. هاهاهاها

سعيد وهو يقاطعهم وهو يضحك .: هاهاها.. خليفه .. قول شي غير الكلام ياللي يالس تقوله .. واحسن شي الحين تكرمنا انته الثاني بسكوتك .. هاهاهاها.. بس محمد نباك تعد علينا شي .. ولو قديم بعد.. وانته لك ياللي يرضيك ..

محمد وهو يضحك ..: هاهاها.. خليفه .. شفت .. مالك امل .. احسن لك انك تسكت .. هاهاها..

خليفه وهو ير بوزه شبر .: خلاص .. ما راح تسمعون كلامي .. اشوفه الكل ضدي ..

محمد ..: ضدك .. هاهاها.. انته العالم كلها معاك .. الا ما تحمد ربك .. .

خليفه وهو يبتسم .: خل عنك .. انته تتهرب ما تبي تقول قصيدتك ..

محمد ..: بقول .. بس انته قطعت بي اكثر عن مره ..

سعيد وهو يضحك ..: هاهاها..انا مع خليفه .. انته تتهرب ..

محمد .. وهو مستغرب .: سعيد .&#33;&#33;.. توك عندي .. شنوف يك .. شنو حل عليك ..

سعيد وهو يضحك .: محمد .. &#33;&#33;.. اعرفك تتهرب .. خل عنك .. بتقول ولا شنو ...

محمد ..هو يضحك .: هاهاهاها.. زين زين .خططي معروفه .. والحين عرفت ليش ما قد ربحت جوله وحده في الشطرنج .. هاهاها..اثاري خططي كلها مكشوفه .. زين بقول ..

خالد وهو يبتسم ..: خلصنا وقول ..

محمد وهو يبتسم .: زين .. اعصابك ..

سعيد وهو يبتسم .: ويش يقول الشاعر ..

محمد وهو يبتسم .: هيه القصيده شوي حزينه .. واقول فيها ..

ودعتك الله لو على قلبي اخطيت ***وحاربتني من دون ذنب وخطيّه
احسبك تذكرني اذا اصبحت وامسيت *** واثرك على فرقاي نفسك هنيّه
الله واكبر كيف عنّي تخليت *** من بعد ما علقت روحي البريّه
وش غيّرك وش بدّلك ليه صدّيت ***وانت الذي بالقلب نبض وهويّه
من هو بقى لي بعدما عنّي اقفيت *** وقدمتني للحزن اثمن هديّه
كل شي تخيلته ولا يوم ظنيت ***انك لحد غيري ولا نتاب ليّه
ويلك من الله كيف بالحب ضحيت *** قلبك حجر ما حنّ يومٍ عليه
اللي بيننا بعمر في يوم هدّيت *** واحلامنا ما عاد منها بقيّه
اتعد غلطاتي اذا يوم زليت *** من دون مدري ...وين ذيك الحميّه
ما فيه معصوم الخطا لو تحريت ***ولا فيه كامل غير رب البريّه
ولو ما احبك ما نشدتك ولا اطريت *** بعدك وصدك وانتخيتك نخيّه
ترجع لقلبٍ يوم بالعقل حبيت *** وتترك هل الاحقاد واهل الوشيّه
خايف عليك وخايفٍ منك يا ليت *** ما يوم حبيتك وصرت الضحّيه
لا نيب حي بعد هجرك ولا ميت*** ولاني مريض ينعرف بالشكيّه
لكني ادري بحالتي لا ترديت*** ولا ينفع الملتاع طبه وكيّه
مالي سوى اللي كلما راح ناديت *** يا كود يسمعني ويرجع اليّه
(35)

سعيد وهو موب مستغرب .: الله عليك يا محمد .. قمه في الروعه .. صحيح القصيده ما عليها كلام ..

خالد وهو عاجبته القصيده .: الله عليك يا بوجسيم .. روعه ..والله روعه .. طلبتك القصيده ..

محمد وهو يبتسم .: حلالك ..

خليفه وهو يضحك.: هاه .ناوي تكذب على خطيبتك وتقولها انك كاتب القصيده فيها .. هاهاهاهاهاها

سعيد وهو يضحك..: خليفه ..هاهاهاها.. يقطع عدوك .. شنو هالكلام .....

خالد وهو يضحك ..: هاهاها.. الظاهر اني انا ومحمد ما نفهم في الشطرنج شي .. اوراقنا مكشوفه واجيوشنا محصوره .. ما تطلع من مكان لمكان ثاني ..هاهاهاهاها

خليفه وهو يتفاخر ..: احم احم.. ونقدم الان لكم الشاعر الكبير .. سعيد .. هاهاها

سعيد وهو يضحك..:هاهاها..ومن قالك اني بعد عليك ويا راسك .. خليفه .. والله ما عندي شي جديد ..

خليفه وهويغمز لمحمد ..: لا تسمع كلامه .. والله عنده مليون شي وشي .. اقل ما فيها .. قوله يعد وحده من القصايد ياللي يكتبها في المحاضرات .. فيه كمن قصيده روعه .. والله ما اتخيل سعيد ما ينشهر اسمه . يا اخي عنده الموهبه وساكت .. مثل ياللي يندفن وسط الصحرا .. الرمال تحاصره .. وتدفن موهبته . حرام والله

محمد وهو يمسك راسه ..كنه مصدع ..:. خليفه .. خليفه .. يا اخي صدعت بنا .. خف شويه من كلامك .. الحين ما مدحت غير سعيد .. وين قصيدي منك &#33;&#33;

خليفه وهو يضحك ..: هاهاها.. انته على زاويه .. وخلك منقلع هناك .. انا اتكلم عن الشخص ياللي انا مدير اعماله .. واباه يشتهر ..

سعيد وهو يضحك.: اي والله .. احسن مدير اعمال .. معاشه ونسبته انك توديه الدكان وفكه .. كنك شال ياهل ابوخمس سنين .. كله يمسك هذاك الكيس .. ويملاه حلاوه وجلكسي .. كنه ما قد شاف خير ..هاهاهاها

ولا الشباب يضحكون وخليفه يار بوزه شبر .. فيك الخير يا سعيد .. هذي قيمتك يوم ترخص بنفسك .. لو اني ماخذ نسبه 99% كان قلت لي حبيب وطيب .. بس هذا الطيب .. هالزمن لا يتواضع لك الطيب يصيرون العالم ضده ..

سعيد وهو يبتسم ..: اسفين يا سيدي .. شنو تبي اكثر من الاسف ..

خليفه وهو يضحك ..ويضرب بكوعه سعيد ..: ما فيه داعي اقولك .. افهمها انته .. هاهاهاهاا

سعيد وهو يضحك .: هاهاها.. من عنوني مثل ما يقولون .. مش من عيوني .. من عنوووووووني ..هاهاهاها

خليفه وهو يضحك .: هاهاها.. شنو فيك خبصت .. اشوفك تقول عنوني بدل عيوني .. وين الياء ..

سعيد ..: ما ادري .. ضاعت .. بس ما عليك بلقاها لك ..

محمد وهو يضحك.. سعيد .. عن اللفه والدوره .. يالله .. عطنا قصيده وحده من الهزين ياللي عندك ..

سعيد وهو يبتسم ..: فالك طيب .. انته تامر يا بوجسيم ..

خالد وهو متحمس .. : ما شاء الله .. مجلس شعراء القبائل .. هاهاهاها

سعيد وهو يبتسم ..: وليش لا .. انته تقدر تقول مجلس شعراء جبل النقفه .. ما عندنا مكان نعد فيه القصيد غير جبل النقفه .. هاهاهاها.. على الاطلال مثل ما يقولون .. بس نحنا على المقاهي ..

ويضحك الكل ولا بمحمد بحماس يطلب .: يا اخي خلصنا .. بسرعه .. نبي قصيده حلوه من القصايد ياللي يعزهن سعيد ..

سعيد وهو يبتسم .. ويعتدل في جلسته ..: ما لك غير طيبه الخاطر ..

خليفه وهويبتسم .: وش يقول ابوعسكور فيها ..

سعيد وهو يبتسم .. قلت فيها ..

انتي معي ولا مع الوقت ضدّي *** يا جارحه قلبي جروحٍ جديده
اتعبني المشوار قيدك بيدّي *** وش لون افكّه وانتي عني بعيده
تمضي سنين العمر ترفض تهدّي *** وانا كما التايه بصحرا عتيده
مدري علامك مستمر بصدّي *** ان كان لي ذنبٍ ذنوبك عديده
لو ما احبك ليه بيحت سدي ***واكشف لك الخافي واكرر واعيده
يا عايشه بالوهم ما كان ودي*** اجرح شعورك او نزيفك ازيده
اغراك من اهداك فستان وردي *** والبسمه الصفرا وحلو النشيده
وخلاّك فوق الشمس نورٍوبعدي *** وصدقتي الكذبه ولو هي بليده
يا حالمه ..والوقت جزرٍ ومدي *** والنوم طول الحلم ما يفيده
مدري متى تضحي وتدرين ودي *** توحي ضميرٍ فيه مثل الوقيده
حبّك سكن قلبي ولا هو بيدي *** مقدر على هجرك ولو انك شديده
نبضي عروق القلب تنزف بجدي *** الى متى تنزف وانتي شهيده
من شان حبك ساكنه وسط نجدي ***اموت واحيا في العيون العنيده
ردي علي الصوت بالله ردي *** وان ما تردي الروح بعدك شهيده

(36)

محمد وهو متعجب ..: ولا .. يقول ما عنده يديد .. سعيد خاف الله .. والله انها قمه في الروعه . احس بعمري ولا شي يوم اسمع قصيدك وطريقه عدك ..

سعيد وهو مستحي .: لا والله ... انته ما شاء الله عليك .. تعتبر استاذ .. وانا بعدني تلميذك ..

خليفه وهو يقاطعهم .. يا جماعه الخير .. ما كنه محمد وسعيد شايفن نفسهم ..

خالد وهو يضحك .: هاهاهاها.. اي والله يا خليفه .. انا معاك .. بالحيل مصدقين عمارهم .. كل واحد يخق على الثاني ..اونه واحد مدرس .. والثاني تلميذ.. لواته عيني عينك .. هاهاهاهاها

وتموا الشباب يعلقون ومحمد وسعيد محتشرين .. وعلى ضحك وسوالف ..

في هذي اللحظه بدت مخلوقه تتعذب .. بدت تمسك على طروف جسمها وهيه تحس بحراره في جسمها وجسدها بدى يذوب من الالم .. قامت شوق على وجع قريب لا يقسم جسمها من الالم وهيه تمسك علىطرف كلوتها .. بدت شوق تحاول تمسك نفسها .. بس ما قدرت .. الالم صار ما يحتمل .. جلست على بالها انها بتقدر تصبر .. بس ما قدرت .. بدت تتوجع بالقو .. قامت وهيه تحبو صوب الباب .. تقربت وكأنها تمشي مسافه اميال موب بس لين الباب ياللي كان بضع خطوات من فراشها .. مسكت شوق طرف الباب وهيه ما تقدر تشوف الدنيا من الوجع ياللي بدت تحس فيه كنه طعن سكاكين في شاكلتها .. بطلعت شوق الباب وهيه قريب لا تصرخ من الالم .. اول ما بطلت الباب طاحت على الارض وهيه ما تقدر تشوف الدنيا .. كل ياللي قدرت تسويه انها تنادي .. على ياسمين .. بس ياسمين من التعب والارهاق نامت ولا حست بالدنيا .. وبدت شوق تتوجع وهيه ما تحس بالدنيا حولها .. وبدت تتقلب كنها على جمر مرمايه ...

ولا بهند من الغرفه تكلم لمحبه ياللي على التلفون ..

هند وهيه تحس بأنه كنه احد ينادي ..وتتقول لمحبه .: محبه .. لحظه لحظه خلج على الخط ..

وتبطل الباب ولا بصوت اهات والم .. وتطلع للممر ولا بشوق على الارض تتقلب كنها على نار ..

هند وهيه تربع صوب شوق وتمسكها من يدينها وهيه تحاول تفهم شي ..

ولا بهند ترتبك وهيه تسأل ..: خالتي .. خالتي .. شنوف يج&#33;&#33;&#33;.. شنو حصلج ..

شوق وهيه تصرخ .. ما قدرت تقول شي غير تقول ..: ما اقدر .. ما اقدر .. *وتصرخ شوق بصخره قويه .. قامت منها ياسمين .. وفزت منها سلومي ..

وتبطل ياسمين الباب في اللحظه ياللي هند تربع للتفلون وهيه تقول لمحبه ..: محبه .. بكلمج بعدين .. باي .. باي ..

وتصكر هند في اللحظه ياللي اتغز قلب محبه .. وحست انه فيه شي .. ولا بهند تربع صوب ياسمين وهند .. ولا بسلومي تبكي ..

هند وهيه تقول لياسمين .. : ياسمين ...سيري لسلومي .. وشغلي الليت وجلسي معاها ..

شوق وهيه تصرخ ولا قدرت تتحمل اكثر ...: اخ.. بموت .. بموت .. ما اقدر اصبر .. ااااااااااااااااااااااااا خ ..

هند وهيه مرتبكه .: يا ربي وش اسوي .. خالتي وين السويك .. وين مفاتيح السياره ..

شوق وهيه قريب لا تموت ما قدرت تقول شي .. هند من الربكه دخلت للغرفه وبدت تفتش على السويك وبين ملابس شوق ياللي كانت لابستهن ..

ولا بالسويك على الارض .. بس من الربكه هند ما عرفت شي .. وعلى طول ربعت للسياره وشغلتها .. رغم انها كانت لابسه قلابيته النوم ..الا انها من الربكه ما انتبهت لنفسها انها بدون شيله ولا شي .. وعلى طول رجعت للبيت وهيه تنادي على ياسمين ياللي كانت تحاول تهدي من سلومي ..

هند وهيه مرتجفه .. ولا فجأه تنفجر تبكي وهيه تشوف شوق تتعذب .وهيه تنادي على ياسمين .: ياسمين ..يا ياسمين ..

ياسمين وهيه تطلع سلومي ..: نعم ماما..

ولا بشوق تتقلب عيونها من الوجع .. ما عرفت شنو تقول ..كل ياللي قالته ..: جلسي مع سلومي .. وانا بشل خالتي للمستشفى ..

وتربع هند لغرفتها وتجيب شيلتها وعباتها .. وتشل التلفون وتربع للصاله ..وتقول لياسمين ..: ياسمين . تعالي ساعديني ..

ياسمين وهيه تحط سلومي على الارض بعد ما كانت شالتها وسلومي تبكي ما تدري شنو ياللي مستوي من منظر شوق وهيه تتألم وهيه تقول ..: عموه .. عموه .. ثو نفيها عموه ..

هند ما قالت شي ..غير انها شلت شوق من طرف وياسمين تسند شوق من طرف ويمشونها لين السياره وشوق تتقلب عيونها مره بيض ومره سود من الالم .. ويركبونها الكرسي المساعد .. في اللحظه ياللي هند صرخت على ياسمين..

هند وهيه تصرخ ببكي ..: ياسمين ..هاتي عباه خالتي .. بسرعه .. بسرعه ..

وتربع ياسيمن وتدخل لدقايق وتجيب شيله للشوق وعباتها .. في اللحظه ياللي هند كانت قد صكرت الباب .. وركبت السياره .. ومن الدريشه اخذت العباه والشيله وعلى طول طلعت من البيت وهيه ما تعرف شي .. ما تدري بالمستشفى .. من الربكه بدت ترتجف وهيه ما تعرف وين تسير .. ما كان معاها امل غير انها تضرب لسعيد .. بدت هند تضرب وتضرب بس تلفون سعيد ما ينرد عليه .. وكله الا مطنشه .. وبدت شوق تصرخ من الالم ياللي فيها .. وهند تبكي قهر .. ما لقت قدامها غير انها تضرب على الشرطه .. على ثلاث تسعات ..(999)...وشله الشرطي .. وخبرته هند انها ما تعرف وين تروح .. لانه عندها حاله تعبانه .. الاستعلامات اخذ من وصف هند مكانها وبدى يدللها على المكان .. كان تصرف هند فيه حكمه .. وعلى طول طلعت من الطريق للمستشفى ..قال لها الشرطي انه اقرب مستشفى لها مستشفى توام ...ياللي عافته شوق وعافت اسمه .. بس هوه الاقرب .. وعلى طول طلعت هند للمستشفى .. ودخلت السياره للطوارئ .. وادخلت شوق عندها .. بدت هند من الربكه ترتجف وهيه ما تعرف شنو تسوي ..

وبدت تضرب لسعيد .. وسعيد ما يرد .. وهيه ترتجف .. ما لقت هند امل قدامها غير انها تضرب للبداله وتسألهم عن بيت مطر .. من حسن حضها انه بيت مطر كان مسجل في البداله .. واخذت الرقم .. وبدت من الاربتابك تتصل ..

صاح التلفون .. ولا احد شله .. وبدى يرن ويرن لين فجأه شلته ساره ..

ساره وهيه تتكلم بهدوء ..: الو &#33;&#33;

هند وهيه تبكي .: الو .. هذا بيت مطر ..

ساره وهيه خايفه من نبره الصوت .. : نعم .. خير من معاي

هند وهيه تبكي ..: اكيد انتي ساره ..صح ..

هني انبقض قلب ساره ..: من معاي ..

هند وهيه تبكي ..: ساره .. هذي انا .. هند ..

ساره وهيه متعجبه .:. هند .. خير .. شنو فيه .. عسى ما شر ..

هند وهيه تبكي .: لحقي يا ساره ..خبري امج تجي للتوام .. خالتي شوق تعبانه .. ما ادري شنو فيها ..

ساره وهيه مرتبكه وترفع صوتها.: شنو ..&#33;&#33;&#33;.. خالتي شوق .. شنو فيها .. شنو ياللي حصل ..

ولا ميثا تطلع من الغرفه ..: خير خير .. شنو فيه ..

ساره وهيه تقول لامها ...:امي لحقي .. خالتي شوق في المستشفى ..

وتنزل ميثا من السلالم مستعيله .. : بسم الله الرحمن الرحيم .. الله بمسا خير ورزق .. شنو فيه .. الحرمه من دقايق طالعه من عندنا .. عسى ما شر ..

وتشل ميثا التلفون ولا بهند تبكي .: خالتي .. لحقي علي .. ما اعرف اتصرف .. وخالتي شوق في الطوارئ .. وسعيد ما يرد على التلفون ..*وانفجرت هند تبكي من الخوف ..*

ميثا وهيه مرتبكه بس تحاول تهدي من نفسها .: شنو فيها شوق .. وانتي كيف وصلتي للمستشفى &#33;&#33;

هند وهيه تبكي .: ماادري .. تشتكي من كلوتها .. وتقول انها ما تتحمل الالم .. وانا وصلتها بسياره سعيد .. .. *وبدت هند تبكي وهيه تقول * .. خالتي .. ارجوج لا تطولين .. والله خايفه .. ما اعرف اتصرف .. وسعيد ما يرد على تلفونه

ميثا وهيه تاخذ الامر بهدوء : هدي نفسج .. اختج وينها فيه &#33;&#33;

هند وهيه تبكي ..: خليتها عند ياسمين ..

ميثا وهيه تحاول تهدي من ارتباك هند وخوفها .: ما عليج .. هدي نفسج .. وشوق ما بيكون فيها الا الخير .. وانا الحين بسير اييب اختج عندنا تبات الليل وهيه بتكون عند ساره .. لا تحاتينها .. ابنجيج انا ومطر ..

ولا بمطر ينزل وهو في يده الكندوره ..: خير .. خير .. شنو فيه ..

ميثا وهيه توادع هند .: هند... خلج عند شوق ولا تطلعين منها .. ولا تخافين .. ما فيها الا كل خير ..

هند وهيه تبكي .: خالتي .. لا تطولين ..

ميثا : ان شاء الله .. وانتي هدي نفسج عن لا تخلين الاطباء يرتبكون اكثر .. زين يا غناتي ..

هند وهيه تبكي .: زين ..زين .. يالله انتظركم انا ..

وتمسك ميثا التلفون في اللحظه ياللي مطر بدى يسأل ..: خير شنو فيه .. شنو ياللي حصل ..

وتضرب ميثا لخليفه في اللحظه ياللي ساره تقول ..: خالتي شوق تعبت وودتها هند المستشفى ..

مطر وهو متعجب .: تعبت &#33;&#33;. شنو فيها ..

ساره ..مرتبكه وخايفه : والله ما ادري ..

ويصيح تلفون خليفه في اللحظه ياللي ميثا تقول لمطر ..: مطر .. ربي لا يهينك .. ممكن تروح بيت سعيد وتجيب ياسمين وسلمى هني .. البيت ما اظنه بيكون احد فيه هاليوم ..

مطر وهو يلبس ..: ما عليه .. بس انتوا اروح وارجع القيكم متحظرين ..

ساره وهيه تربع لفوق .. : زين ..

ويطلع مطر في اللحظه ياللي خليفه يسمع تلفونه يرن ويرد ..

خليفه وهو يعرف انها امه .: الوه ..

ميثا وهيه تحاول انها ما تزيغ خليفه .: خليفه .. انته بروحك ..

عرف خليفه انه امه تباه في موضوع ضروري ..فابتعد عن الشباب وهو يقول ..: الحين انا بروحي .. شنو فيه ..

ميثا وهيه مرتبكه ..: خليفه .. ما ادري شنو ياللي حصل .. بس انته لا تخوف سعيد ..قوله انك تباه في موضوع ضروري .. وشله للمستشفى التوام ..

خليفه وهو مرتبك .: خالتي ..شوق فيها شي .. ولا احد حصل له شي &#33;&#33;

ميثا وهيه تتكلم بسرعه وهيه تقول .: خليفه .. انا موب ناقصه ارتباك .. يكفي انه هند اربكتني ببكاها .. ايوه .. شوق تعبت وودتها هند للمستشفى .. بس انته لا تقوله لين توصلون هناك .. فهمت عليه ..

خليفه وهو يحاول يهدي من نفسه .: زين .. ما عليه .. انا الحين في الطريق ..

خليفه وهو يرجع وهو يبتسم .: يا الربع .. حلو النوم .. يمدحونه .. هاهاهاها

سعيد وهو مستغرب .: خليفه .. شنو فيك .. من دقايق يالس تعلق على الناس ياللي رايحه تنام وتقول لهم انهم دجاج وينامون من وقت .. شنو فيك انقلبت انته مثلهم .. ولا بس كلام ..

خليفه وهو يضحك.: هاهاها.. يا اخي انا بس اقط كلام .. لا تاخذ الامر بجديه ..

سعيد وهو يعاند..:عيل سير انته .. انا بجلس ..

خليفه وهو يبتسم .: خلاص ..على راحتك .. بس انته الخسران ..

سعيد وهو مستغرب ..: خسران &#33;&#33;.. في شنو &#33;&#33;

خليفه ..: ما فيه شي ..

حس سعيد انه خليفه يتممل عليه مثل العاده .. : خليفه توك متنشط ..شنو هالنعاس ..

فجأه انتبه سعيد على انه اهل خليفه يبونه يرجع البيت لانهم دقوا عليه تلفون وابتعد .. فحس انه احسن شي يروحون للبيت.. وفي نفس الوقت يرتاح هوه الثاني لانه صار له مده يلف ويدور في العين وقل نومه بسببها..

سعيد وهو يقوم من مكانه..: من رخصتكم ياجماعه الخير ..

محمد وهو مستغرب ..: وين سعيد .. &#33;&#33;

سعيد وهو يبتسم .: والله بنسير للبيت .. الحين نص الليل .. واحسن شي انا نطلع للبيت .. ورانا قومه الصبح .. وترتيب احوال ..

محمد وهو يعرف انه سعيد مشغول في امور كثيره ..: زين ..على راحتكم .. الله يحفضكم .

خليفه وهويبتسم .: رتب نفسك لجوله ثانيه من شعراء جبل النقفه .. هاهاهاها

محمد وهو يضحك ..: هاهاها.. وانا لها .. بس انته رتب سعيد .. اباك تهيضه هاليومين على شان يكتب .. ما اوصيك فيه ..

سعيد وهو يضحك .: هاهاهأ.. خير .. بنشوف في الجوله الثانيه .. يالله تامرونا بشي يا شباب

الشباب ..: سلامتك ياسعيد ..

محمد وهو يبتسم ...: سعيد .. دق عليه بكره..لو عندك وقت ..

سعيد وهويبتسم .: ان شاء الله ..

خليفه وهو يبتسم .: يالله سعيد خلصنا انته ما راح تخلص اليوم ..

سعيد وهو يضحك .: هاهاها..يالله يالله ..

ويطلعون سعيد وخليفه في الوقت ياللي مطر وصل بميري وسلوم لبيتهم .. وخلوهن عند ساره .. ياللي يلست تهدي من بكى سلومي وتلاعبها .. وسلومي من النعاس نامت في احضان ساره بعد ما بكت الليل كله

في هذي اللحظه وفي السياره بدى سعيد يشك بخليفه انه فيه شي .. وخصوصا انه اخذ الطريق الاطول لبيتهم ..

سعيد وهو يسأل ..: خليفه &#33;&#33;.. وين انته رايح &#33;&#33;

خليفه وهو يبتسم .: الا هني ..امي موصتني اجيب لها شي ..

سعيد وهو بدى ينكر .: في نص الليالي امك طالبتك تجيب لها شي &#33;&#33;..خليفه انته من صدقك ولا تستعبط

خليفه وهو يتنهد .: سعيد ..لا تحتشر عليه ولا تسوي لي ربشه ..

سعيد وهو بدى ينكر ..: يعني السالفها فيها شي ..

خليفه وهو يلتفت في سعيد بجديه .:. ايوه فيها شي .. وراح تعرفها من نوصل ..

سعيد وهو تنقلب نظراته من استنكار لجديه .: يعني الحين وين رايحين .. وليش ما سرت لبيتنا &#33;&#33;.. وين رايح في نص الليالي ..

خليفه ..وهو متضايق ...: هممم..سعيد..احلف انك ما تربكني ولا تسوي لي حشره .

سعيد وهو يحس بانه فيه شي ..: يعني الحين فيه شي .. ولا تبي تقوله .. خليفه .. هل احد تعب ..ولا حصل شي في اهلنا

خليفه بعد ما كانت عيونه في الطريق قلبها على سعيد وهو يقول ..: ايوه ..قالوا لي اني اسير بك مستشفى التوام .. ما قالوا لي برحي شنو القصه .. بس يمكن سلومي تعبت ..

حس سعيد بقبضه في قلبه ..وبدى يكلم نفسه .: سلومي تعبت &#33;&#33;.. بس اليوم مخليها تضحك وتسولف ..

ما عرف سعيد انه امه هيه ياللي تعبت موب سلومي .. في هذي اللحظه وصلت ميثا ومطر للمستشفى .. ولا بهند تقطع الممر طول وعرض من الربكه .. وهيه تنتظر احد يجي من اهل شوق لانها لاول مره تجي المستشفى بروحها .. وفي حاله طوارئ .. لانه في هذيج المره اتصلت بسعيد ...يوم سلومي .. وعبدالله كان معاها لين طلع الدكتور .. بس هالمره هيه بروحها ما عندها احد .. ولا تنتبه هند بانه ميثا وسلت ومعاها مطر .. ما صدقت على الله انها شافت احد .. وتمشي صوبهم وهيه خايفه ..

ميثا وهيه مرتبكه ..: خير .. خير يا هند .. شنو ياللي حصل ..

ما درت هند غير انها تبكي ..وهيه تحط يدينها على وجهها ..وهيه تقول .: ما ادري .. والله ماادي .. يالسه في غرفتي ولا اسمع صراخ في الممر .. طلعت ولا بخالتي على باب غرفتها تصرخ من الالم .. لو ما ستر الله علينا .. ما طلع سعيد عند خليفه وخلى سيارته عندنا ..

ميثا وهيه تبتسم .: .. يعني تعرفين تسوقين يا هند &#33;&#33;.. انتي ياللي سقتي بشوق هني &#33;&#33;

هند وهيه تبكي وتهز راسها لانه العبره كانت اكبر من انها تقول كلمه ..

مطر وهو يضحك .: هاهاها.. اشهد انج بنت ريال ..

ميثا وهيه تضرب مطر بكوعها .: اما انك متفيج يا مطر ..الحرمه تعبانه وانته يالس حظرتك تمدح .. وتضحك بعد &#33;&#33;

ولا بالدكتور يطلع ..

هند وهيه تسبق الكل ..: هاه بشر يا دكتور &#33;&#33;

ولا تلتفت هند وتشوف مطر وميثا ..استحت .. من خوفها ما عرفت شنو تقول .. التفت في مطر بسرعه وهيه تقول ..

هند وهيه تحاول تهدي من ارتباكها .: اسفه يا خالي تقدمتك .. العذر والسموحه منك ..

وتتوخر هند في اللحظه ياللي ابتسم مطر وهو يقول ...: لا بالحل يا هند .. وانتي ما قلتي غير ياللي ابا اقوله .. *ويلتفت مطر في الدكتور وهو يقول * .. هاه دكتور بشر من حرمتنا &#33;&#33;

الدكتور وهو يناظر فيهم ..: اعطيناها حقنه الحين..بس لازم بكره تجي نسوي لها فحص الظاهر انه فيها حصى في الكلى ..

ميثا وهيه خايفه .: دكتور .. اختي ما فيها فشل كلوي معاذ الله ..لانه امها ماتت بسبب الفشل الكلوي &#33;&#33;

هند انصدمت ..اول مره تعرف انه ام شوق ماتت بفشل كلوي .. يعني الحين لو كانت تدري كان بروحها ماتت من الخوف والبكي .. ولا بكلام الدكتور يقاطع سرحان هند وهو يقول ..

الدكتور وهو يبتسم ..: لا .. لا يا اختي .. ما فيها فشل .. يمكن لانها ما تشرب ماي في الفتره الاخيره .. وتتحرك كثير .. وهذا ياللي يمكن سبب لها حصى في الكليه .. لا تخافون امر الحصى صار عادي .. ضربه ليزر وتيروح الحصى ..او بالاشعه الصوتيه كل شي ينحل ..بس نبي نسوي لها تحليل ونتأكد ..بس الحين احسن شي تروح البيت وترتاح ..

ميثا وهيه منقهره .: عنبو .. الحرمه يايتكم بين حياه وموت .. وبتخلونها تروح البيت .. ليش ما ترقدونها عندكم &#33;&#33;

مطر وهو يقاطع ميثا لانها بس يالسه تعاتب .. ما عندها شغله ثانيه .. : اخوي .. الحين نبي نعرف القصه .. شنو رايكم لو ترقدونها عندكم .. وبكره تروح البيت ..

الدكتور وهو يلتفت في مطر .: اخوي ...نحن نتوقع .. سواء جلست الحين عندنا ولا لا .. ما راح يزيد او ينقص عليها .. ونحن اعطيناها ابره .. بس اهم شي انها تشرب ماي كثير .. وسوائل كثير .. هذا ياللين ننصح فيه ..

في اللحظه ياللي الدكتور كان يكلمهم .. انتبهت ميثا على انه هند ما تقول شي .. وانها ورا ..التفتت ولا بهند مختفيه ..تطلعت يمين وشمال .. ولا هند موب موجوده .. شافت باب الغرفه امبطل ....

ميثا وهيه تسأذن الدكتور ..:اخوي ..ممكن اشوفها ..

الدكتور ..: تفضلي يا اختي ..

وبدى الدكتور يشرح لمطر كل شي ..في اللحظه ياللي ميثا راحت للغرفه ياللي فيها شوق . ولا بهند تبكي ..اول مره تحس هند انها خايفه على شخص مثل ما هيه خايفه على شوق .. وليش شوق بالذات .. هل لانها سكنتها معاهم .. ولا لانها تحس بنفسها مقربه منها لطيبتها لسلومي ..رغم انها قاسيه معاها نوعا ما .. بس قسوه بنظره العين .. مش بكلام او بشي ثاني .. كانت هند واقفه فوق شوق .. وهيه تبكي .. ولا بميثا تتقدم صوب شوق وهيه تبتسم . في اللحظه ياللي فتحت شوق عيونها .. ولا بميثا قدامها.. وهند معطيه ظهرها لها .. وتبكي بصوت خفيف ..

شوق وهيه صوتها تعبان ..: ميثا .. وين سعيد .. عسى ما درا ..

ميثا وهيه تبتسم .: لا لين الحين مادرى .. لا تخفين .. وهو في الطريق عند خليفه .. وانا خبرته انه ما يخبره لين يوقفون سيارتهم ..

وتلتفت شوق بتعب حولها وهيه تقول ..: كيف انا وصلت هني ..

في هذي اللحظه انفجرت هند تبكي .. ما تحملت صوت شوق ياللي كان تعبان .. اول مره تبكي على احد .. والغريبه انه ما صار لها مده تعرف شوق .. بس هل لانها كانت خايفه ولا لانها لاول مره تسمع احد يصرخ قدامها وهيه كانت الامل الوحيد لهذا الشخص ..

شوق وهيه تتذكر ..انه هند هيه ياللي وصلتها .. التفتت في ميثا في اللحظه ياللي سمعوا صوت سعيد برا ..

سعيد وهو صوته من برا .: خير .. خير .. شنو السالفه ..

الدكتور وهو يقول لمطر ..: انا شرحت لك كل شي اخوي ... يالله انا استأذن منكم .. عندي امورلازم اخلصها ..

ويطلع الدكتور في اللحظه ياللي مطر التفت في سعيد وهو يقول له ..: ما فيه شي .. شوق تعبت شويه.. ويابوها هني ..

سعيد من سمع هالكلمه عرف انه امه هيه ياللي خليفه بدى خبي عليه امرها ..التفت سعيد حولها وهو يقول .: وينها الحين ..

ولا ميثا تنادي عليه من داخل الغرفه .: سعيد .. امك بخير .. تعال لها.. هيه هني ..

وربع سعيد داخل الغرفه .. ولا لاول مره يشوف امه قدامه بهذا المنظر .. ربع صوبها ومسك يدها بدون شعور وهو يبوسها .. وهو يقول .:. ما تشوفين شر ..

ميثا وهيه تبتسم .: لا بسيطه يا سعيد .. ما فيها الا العافيه .. بس تتغلى علينا شوق .. هاهاها

سعيد وهو يلتفت في امه .: هاه ياامي .. بشري ..عسى ما شي يعورج..

شوق وهيه تهل دمعتها .: لا ما فيني الا العافيه ..

سعيد وهو يسأل : وكيف وصلتي هني &#33;&#33;..

شوق وهيه تأشر ..ولا باصبعها يأشر لهند ياللي انفجرت تبكي وهيه تشوف شوق تبتسم لاول مره لها .. ما عرفت هند شنو ياللي حصل لها .. بدت تبكي بحراره في اللحظه ياللي حست لاول مره بانسانه كبيره تحضنها .. ما درت بنفسها ولا بميثا تحضنها بحنان وهند تبكي في حضنها من الخوف ياللي كانت تشوفه يوم شوق تموت وتحيا بين يدينها .. الامر كان اصعب مما تتوقه .. وخصوصا انها اول مره تعتني بمريض بروحها او انها تسعفه .. وهيه ما تعرف الطريق ..

وقف سعيد وهو عيونه في هند وهيه تكبر في نظرته .. وهو يقول ..: ما قصرتي يا هند ..

هند ما قالت شي .. بس تمت تبكي وميثا تضحك وهيه تقول ..: هاهاها.. شنو فيج يا هند.. بسيطه يا بنتي .. ما حصل الا كل خير ..

هند وهي تبكي...: ما ادري يا خالتي .. خوفي على خالتي شوق لين الحين في عظامي يسري ..</DIV>&#60;&#33;-- / message --&#62;







</CENTER></FONT></FONT></FONT></FONT></FONT></font>