<font color='#000000'>الهزيمه اسمها خالد
محمد:طيب حبيبتي متى راح اشوفك ؟
هديل : متى تبي
محمد : كويس الخميس المغرب؟
هديل : اللي تشوفه
محمد : خلاص الوعد الخميس اشوفك على خير حبي
هديل :.......مع السلامه
(اول ما انتهت مكالمتي مع محمد لفت على اختي دانه اللي كانت تسمع كل كلمة نقولها)
دانه : انتي من جد حاسبه نفسك من المخطوبات ؟
هديل : دانه مالي خلقك فضيها سيرة
دانه : ما اصدق تبلد الإحساس اللي إنتي فيه يقولك حبيبتي حبي حياتي عمري وانتي حجر طيب ما تعرفين تردين على الاقل اضحكي سوي انك مستحيه مو تسكتين كأن كلامه مو عاجبك والله طريقة معاملتك له قبل الخطبه كانت احسن
هديل: ما تعودت على فكرة انه خطيبي وزوج مستقبل
دانه : ومتى بتتعودين عمتي؟
هديل: الحين مين المخطوبه فينا ؟ ولا كانت عينك عليه وانا ما ادري ؟؟؟
دانه: من زينه ولا من زينك عشان اغار منكم
هديل: طيب طسي ادرسي بدل منتي قاعده تحللين بحياتي انا بروح البس
دانه : ليه وين رايحه ؟
هديل : رايحه عند ريم ادرس وياها
طلعت من الغرفه وانا جد معصبه من كلام دانه والله خطيبي وانا حره في تعاملي معه
..........................
(في بيت ريم)
< وانا داخله البيت كالعاده لازم يصير لي موقف سخيف مع اخوان ريم (الخمسه) !!!!! صحيح ان 3 منهم اصغر مني بس خالد و احمد( الكبار) كانو دايم يحطوني بمواقف محرجه اما ادخل الاقيهم يلعبون كورة يروحون يشوتونها بوجهي !!!
اما يكونون ناوين يطلعون يقعدون يفحطون قدامي ويستعرضون!!!!!
هذا حالهم من يوم ما كنا جيران وانا ما عمري فكرت اهتم بيهم
صحيح ايام المراهقه احمد كان يسحرني ويمثل لي قمة الجمال بس الحين ما عاد اهتم......
هاذي المره وانا داخله البيت مريت بالصاله كالعاده عشان اسلم على ام ريم وكان فيه خالد طنشت وجوده ورحت سلمت على ام ريم.....
وانا طالعه قال طيب قولي السلام عليكم قلت ببرود وعليكم السلام وطلعت من الصالة ورحت على غرفة ريم بكل لا مبالاة>
(في غرفة ريم )
هديل : قد قلت لك اني ما اطيق اخوانك ؟
ريم : كل يوم تقريبا :P
هديل : جد احكي يعصبوني متعتهم بالحياة يفشلوني
ريم : معتبرينك زي اختهم
هديل : محمد جاي لعندي بالبيت يوم الخميس
ريم : طيب ؟
هديل: مالي خلقه
ريم : هديل اذا انتي مو مقتنعه بيه قولي لاهلك من الحين
هديل: محمد ما يعيبه شيء بس هو ولد عمتي وزي اخوي وبين يوم وليلة صار خطيبي !!؟
ريم :انتي مفروض ما استعجلتي بالرد عليهم
هديل : مو هذا موضوعنا ابغاك تدبرين لي طلعه مهمه يوم الخميس عشان اقدر اعتذر منه عشان ما يجي
ريم : وانا من وين اجيب لك طلعه
هديل : اعزمي البنات
ريم : ما اقدر احمد عازم اصدقائه وبتصير خبصه ما اقدر اعزم بنات بيصير البيت كله رجال
هديل: قولي لاحمد ياجل عزيمته خليه يمرض يسافر يسوي أي شيء بس ما اقعد بالبيت يوم الخميس
ريم : صاحيه انتي ؟ له اسبوعين وهو خابصنا على ذا العزيمه ما اقدر اقوله يأجلها
هديل : اففففف يعني غصب اشوف ذا الخطيب
انا ما اقول اني ما احبه بس مدري وشو الي قاعد يصير الحين
ريم : المهم خلك من ذا السوالف انا اصلا يأست منك خلينا بدراستنا ابرك لنا
انا زهقت من ذا الموضوع
.........
( بعدها في بيت ريم )
ريم : يمه اقدر اعزم بنات يوم الخميس ؟
ام ريم : لا نسيتي الخميس عزيمة اخوك احمد وبيصير البيت كله رجال صعبه تعزمين بنات
احمد : لا يا ريم اجليها للاسبوع الجاي ما حلت تعزمين صديقاتك الا ذا الاسبوع
خالد : وشو طاري ذا العزيمه اللي جت فجاءة ؟
ريم : هديل تبيني اعزم البنات
احمد : وهديل ليش ما تعزم البنات في بيتهم؟
ريم: بس هي تبي احد يسوي عزيمه عشان ما تبي تشوف خطيبها يوم الخميس
خالد :خطيبها ؟!!!!!! ليه هي انخطبت ؟
ام ريم : هو مو انا قايله لك من اسبوعين انها انخطبت
احمد : وتخيل لمين؟............ محمدوه اللي ما يعرف يلعب
خالد : افااااااااااا ليكون محمد ولد عمتهم ذا البزق.. بس محمد صغير عليها
ريم : اكبر منها بسنتين
خالد : برضو صغير
احمد: وانت وشو عليك ان شاء الله يكون قدها............. انا صراحه مبسوط عشانها
خالد : الله يوفقها ذكروني لا شفناها ابارك لها
ام ريم : على أي اساس تبارك لها البنت كبرت وما يجوز تحاكيها وشو يقولون عنا اهلها
احمد : عادي انا باركت لها
ام ريم : لانك قليل حيا
خالد : لا لازم نبارك لها البنت زي اختنا
ام ريم : انا ما اشوف ان له داعي تبارك
ريم: اصلا هي ما تطيقك انت يا خالد بالذات وصراحه معها حق انت دايم تفشلها
خالد : والله عاد دامها تقول كذا والله لا اوريها
ريم : طيب والحين يعني ما اقدر اعزم احد ؟
ام ريم: اجليها
..............................................
صعقتني ريم بخبر انها ما تقدر تعزم احد يوم الخميس
فيعني انا تدبست ما في شيء يمنعني من شوفة محمد .
(جا اليوم الموعود يوم الخميس وانا بس قاعده اتمنى يصير أي شيء يمنعني من شوفة خطيبي ثقيل الطينه)
دانه : هديل محمد جا
هديل : افف تو ما اذن المغرب وشو جابه من الحين ؟
دانه: جايب معاه ورد ههههههههه ذكرني بافلام المصريين
هديل: افففففف طبعا الحين هو متوقع ان بنقعد بالبيت نسولف ونضحك مالي خلق
دانه : قولي له نروح كوفي شوب
هديل : تصدقين فكرة خليني استفيد منه شوي
دانه : وييييين ؟ بتنزلين على الرجال كذا حطي بوجهك شيء
هديل : خليه يشوفني على طبيعتي بكرا لا عرسنا منيب فاضيه له كل يوم اقعد اتزين خليه يتعود من الحين
( نزلت بلبس ابسط من بسيط شعري كان مرتب وعلى طبيعته وجهي كان يخلو من أي نوع من انواع المكياج
ودخلت المجلس واول شيء جات عيني عليه باقة الورد الضخمه اللي كانت محطوطه على الطاولة )
محمد : اهلييييين تور ما نور المجلس
هديل :......... شكرا على الورد
محمد : عفوا كان ودي اجيب لك شيء احلى من كذا بس ان شاء الله المره الجايه
هديل :...................(بعد فيه مره جايه............ اللهم طولك يا روح )
محمد : كيف الدراسه ؟
هديل : ماشيه ................ محمد ما ودك نطلع زهقت من قعدت البيت
محمد : نطلع ؟ ......... طيب بس وين تبين نروح ؟
هديل : قهوة.. مطعم... نتمشى... أي شيء
محمد : اللي تبينه على كيفك يلا
( بالسيارة )
محمد : هديل عمري ما راح تتغطين ؟
هديل : وليه؟ في احد تعرفه جنبنا ؟
محمد : لا بس المفروض تتغطين لا طلعتي....... ليش انتي ما تتغطين بالعاده ؟
هديل : لا انا ما اتغطي واذا كان زحمه تلثمت
محمد: بعد اليوم حبيبتي تتغطين انا اغار عليك
هديل( وهي تتغطي) : ان شاء الله .................(بدينا من الحين الله يستر من تاليتها)
محمد : حبيبتي كلها فترة وتتعودين على الغطى وبتشوفين انه اريح لك
هديل:...........(من وين اريح لي ؟)
( بعدها في المقهى )
محمد: عمري وشو راح تطلبين ؟
هديل: عصير برتقال
محمد : بس ؟
هديل: ايه بس .....( وشو تبيني اقعد آكل لين ما اسمن وانفقع وتطلقني ؟... لا حبيبي عامله حسابي)
محمد :خلاص وانا زيك حبيبتي
لحظة صمت تلاها سؤالي السخيف:
هديل: محمد وين بنسكن ؟ لا تزوجنا
محمد : اول شيء في شقة لين ما نبني الارض اللي جمب بيت امي
هديل : ما ابي اسكن بذاك الحي ....(قلتها بس كذا عناد ابي اشوف ردة فعله)
محمد : وليه ؟
هديل : اول شيء بعيد عن بيت اهلي وبعيد عن الجامعه ...( زي ما بتخليني اتغطي ما بخليك تسكن جمب امك)
محمد : هذا موضوع سابق لاوانه نشوف بعدين
هديل:.............(صرف السالفه لين ما انسى)
سكتنا مدة بعدها محمد قام يبغى يصرف سالفة السكن ويفتح موضوع ثاني ممكن نتناقش فيه
محمد:حياتي ما قلتي متى تبي نملك ؟
هديل: ما اعرف بتناقش مع امي في ذا الموضوع بعدين ارد لك خير
محمد :انا اقول على الصيف يكون زين
هديل:نشوف ........(سديت نفسي الله يسد نفسك ليه متحمس على الزواج ؟ )..... شبعت يلا نحاسب ونروح البيت
محمد: بس حبيبتي تونا بدري
هديل: انا تعبانه شوي وابي ارجع البيت
طلعنا من المطعم وركبنا سايرته والله سيارة محمد شيء وكشخه وتصدقون لاول مره بحياتي اركب قدام
شعور حلو احس اني قويه والشوارع شكلها احلى من قدام
( بعدها عند وحده من الاشارات)
في طريق رجعتنا للبيت انا ومحمد صدفت ان احمد كان واقف جنبنا بسيارته وقعد يزمر ويغمز لمحمد و يستهبل عليه انا بصراحه شكله ضحكني استغربت كيف عرفني وانا متغطيه وعرف انه هذا محمد بعدين قلت لنفسي شكله ما عرفنا بس شاف اثنين مع بعض وقام يستهبل عليهم
محمد :سخيف وحركاته اسخف
هديل: ما عليك منه
محمد: ودي انزل واضربه
هديل: لا تسوي شيء زي كذا وانا معك
محمد: بس شكله مو غريب
هديل: انا عن نفسي اول مره اشوفه.........( بالحييل اول مره اشوفه )
محمد: انا متاكد اني شايفه قبل كذا بس وين ما ادري
هديل : يلا فتحت الاشارة .....( بسرعه قبل لا تعرف مين هو ).......امشي على البيت وما عليك منه
< طبعا احمد المجنون سوا لنا زفة محترمه لين ما وصلنا البيت انواع التزمير والتفحيطد
ومحمد كل شيء يقول انه بيوقف ويضربه وانا اقعد اهدي فيه وانا ميته من الضحك بس صراحه اللي رحمني اني متغطيه ولا كان استغرب الضحك اللي ضحكته
المهم بس وصلنا البيت نزل محمد من السيارة بيضرب احمد بس احمد هرب بسيارته
انا اول ما دخلت البيت رحت ركض على التيلفون اكلم ريم حتى ما فكرت اودع محمد اللي قعد واقف بنص الصالة بروحه مع امي>
هديل : هههههههههههههههه اذا رجع احمد للبيت بوسي راسه عني
ريم : هو وش الطاري ؟
هديل : اساليه وهو يقول لك
ريم : ردينا لسوالف المتوسط انتي واحمد ؟
هديل : هههههههههههه لا اليوم واحنا راجعين انا ومحمد شافنا باصدفه وسوا لنا زفة محترمه ليييين باب البيت
<في هذا الوقت دخل خالد وسال ريم من قاعده تكلم وقالت له هديل وقال عطيني ابي ابارك لها>
ريم : هديل .....خالد يبي يبارك لك
خالد : السلام عليكم
هديل : وعليكم السلام
خالد : مبروووك ما سمعت والله يتمم لك على خير ان شاء الله
هديل : عقبال ما نفرح فيك
خالد : قريب ان شاء الله.............. يلا ما اطول عليك بس حبيت ابارك
<وطلع خالد من الغرفه>
هديل : ريم خالد ناوي يخطب ؟
ريم : ما اتوقع بس ليه السؤال ؟
هديل : لما قلت له عقبالك قال قريب ان شاء الله؟
ريم : الله يسمع منك ان شاء الله زهقنا واحنا نقنع فيه بس هو مو راضي
<دخلت دانه تنادي هديل>
دانه : هديل محمد يبي يسلم عليك قبل لا يروح
هديل : انا قاعده اكلم ريم ومشغوله قولو له نامت وهي تعبانه شوي
دانه : يا ويلك من الله حرام عليك له ساعه يستناك تنزلين
هديل : الله يخليك قولي له أي شيء
دانه : ترا بقوله الصدق انك قاعده تكلمين
هديل : قولي اللي تقولين المهم اطلعي صرفيه
.....
ريم : حرام عليك كان سكرتي ورحت سلمتي عليه
هديل: ما عليك منه بكرا يتعود المهم قولي لي مين نخطب لخالد ؟
ريم :لين شفتك ان شاء الله نقعد نتذكر البنات اللي ينفعون له الحين انا لازم اسكر امي مختبصه اليوم عزيمة احمد ولا نسيتي ؟ وبروح ابوس لك راسه زي ما وصيتيني ههههههههههه وانتي روحي سلمي على خطيبك قبل لا يروح
هديل : طيب يلا مع السلامه
( في بيت ريم )
ريم : احمدوووووووووووه
احمد : نعم
ريم (وهي تبوس راسه): هاذي من هديل ههههههههههههههههه
احمد : الله جاتني بوسه والله توقعت انها بتتوطى في بطني لا شافتني هههههههههههههه
ريم : لا والله متشققه ومبسوطه آخر انبساط
خالد : وشو القصه ؟
ريم: احمد صادف هديل وخطيبها بالشارع راح سوا لهم زفة محترمه لين باب البيت هههههههه
احمد : ههههههههههههههه والله يا ريم ليتك شايفه شكله وهو معصب
خالد : حركة سخيفه احرجت البنت
ريم : لا احرجها ولا شيء بالعكس هي متشققه انه تفشل
خالد : اذا هي تحبه المفروض ما تفرح
احمد : الا تعالي وراها كانت متغطيه ؟ انا بالصدفه عرفتهم
ريم : هديل كانت متغطيه ؟؟؟؟؟؟ غريبه ما قالت لي
خالد : يمكن ربي هداها
ريم: صديقتي واعرفها زين آخر اهتماماتها انها تتغطى اكيد هو غاصبها
خالد : عشان كذا انبسطت انه تفشل لانها مقهورة انه خلاها تتغطي
ريم : الصراحه ماله حق يغطيها
احمد : احسن خليه يأدبها ترا البنت شايفه حالها
خالد : خلو الناس بحالها ويا ريم لا تقعدين تشيشين البنت على زوجها بالعكس شجيعها انها تسمع كلامه
ريم : هالايام انت صاير حكيم على غفلة انواع النصايح
خالد: لا تخربين بين البنت وخطيبها
ريم : الا تعال هنا صدق انك ناوي تخطب خلاص
احمد : ههههههههههههههههه على البركه اخيرا بصير عم
خالد : لا مين قال ؟
ريم : لما هديل قالت لك عقابلك قلت لها قريب ان شاء الله
خالد : بس كذا حبيت اقهرها
ريم :...........( يقهرها ؟ كان انت اكبر همها يا شيخ روح والله ولا جابت خبرك)
.....................................
(بالجامعه)
ريم : هديل ما قلتي لي انك كنتي متغطيه يوم طلعتي مع محمد قبل امس
هديل: اسكتي لا تفتحين معي ذا الموضوع لاني بنفجر
ريم : طيب ما قلتي له اني ما اتغطى ولا تعودت على الغطا ؟
هديل : قلت بس قالي من اليوم ورايح حبيبتي لازم تتغطين انا اغار عليك...... يقهرني لا قال حبيبتي
ريم : ههههههههههه وش اللي يقهر في الموضوع عادي واحد يقول لخطبيته حبيبتي شيء طبيعي
هديل: انا عندي مو طبيعي تونا من كم شهر كان يناديني هديلوه ويوم انخطبنا صرت حبيبتي وينه من اول
ريم : يمكن كان يستحي يقولك انه يحبك وقال امشيها صح واجي اخطبها رسمي
هديل: انا ما ادري كيف ما انتبهت من قبل انهم ناوين يخطبوني له
ريم : عمتك ما كانت تلمح ؟
هديل : ابدا ولا كان يبان عليها شيء
ريم : غريبه يمكن هو ما قال لها الا بعدين
هديل: تقول امي انهم خاطبينك من يومك بالمتوسط بس انا ما حبيت اقولك الا لين كبرتي عشان تصير رسمي
ريم : احححححححححح من المتوسط ؟؟؟ من جد الاخ متيم كان بالثانوي يعني؟
هديل : اسكتي لا تذكريني الله يخليك انا مو قادرة استوعب كيف ما كان يبين عليه
لا كان يستحي ولا كان يمون ولا كان يبين أي شيء
ريم : صراحه محمد انسان عجيب
هديل: كل يوم اكتشف فيه شيء جديد
ريم : تعالي عندك احد يرجعك البيت ولا اوصلك ؟
هديل: لا السواق مع اختي دانه
ريم : انا احمد جاي ياخذني تجين ؟
هديل : ههههههههههههههه احمد مالي خلق طنازه بس معليش عشان نعرف منه تفاصيل سالفة بشاير
............................
(بالسيارة)
احمد : حيا الله من ركب اسفرت وانورت حيا الله حرم محمد
هديل : الله يحيك هههههههههههههههههه
ريم : استحو على وجيهكم انا موجوده
احمد : هديل تغطي اخاف نصادف محمد بالطريق هههههههههه
هديل: هاهاهاها يا خف دمك مو محمد اللي يمشيني على كيفه اصلا ذاك اليوم كنت متغطيه عشان كان فيه هيئه فقط لا غير
احمد : اهاااااااااااااااا قلتيلي كان فيه هيئه فقط لا غير ههههههههههههههههههه ما تغيرتي من يومنا صغار لازم شغل العناد ولا ما تصير هديل
هديل : عندك مانع ؟....... تعال هنا وشو سالفتك مع بشاير؟
احمد ؟ بشاير ؟؟؟ من بشاير
ريم : علينا هالحركات انا اختك وخابزت وعاجنتك بيديني
هديل : ايه وانا صديقتها وحافظين حركاتك بس سالفة بشاير ما وصلتنا كامله نبي التفاصيل الله يخليك
احمد : ول عليكم ما في شيء يفوتكم ما في سالفة ولا شيء
زيها زي أي وحده قبلها رقمتها وكلمتني بس
ريم : بس ؟؟؟؟
وسالفة امها اللي طلعت عليك بالشبشب هههههههههه
هديل : ههههههههههههههه اليوم انت محور حديث الجامعه والشبشب اللي صبخ بوجهك
احمد : صحيح لي قالو حريم وانتو وشو يفهمكم
الام فصخت شبشبها تبي تذبح الصرصور الي قدامها
ريم : لا شيييييخ هههههههههههه
احمد : عاد فصخت شبشبها ولا ما فصخته ضربتني ولا ما ضربتني
المهم اني رقمت بنت حلوة وكلمتني عندكم مانع ؟؟
هديل : لا ما عندنا مانع بس انا اعرف ان الشرع حلل اربع مو ستين ؟؟!!
احمد : وانتي وش حارق رزك ؟
ما حصلك الشرف تكونين منهم ؟
هديل : ضااااااااااقت الدنيا من الرجال اخاويك انت
اصلا انا مخطوبة لواحد ما تسوى ظفرة
احمد : لااااااااااا يا شيخه ؟
الحين حبيتيه وصرت انا ما اسوى ظفرة
هديل : من زماااااااان وانت ما تسوى شيء
ريم : اقول بطلو هواش انتو الاثنين
احمد خف حركاتك هاذي شوي صرت اتفشل منك
احمد : يا شيخه ما عليك من احد خليني اعيش حياتي
هديل : الله يخلف عليك يا خالد من البيت للشغل ومن الشغل للبيت
احمد : ياما تحت السواهي دواهي
ريم : بس كلنا عارفين ان خالد مو راعي ذا الحركات
ومو من اهتماماته من الاصل
<يقاطع حديثهم صوت جوال هديل >
هديل : يا ربي ذا محمد ريم ارد ولا لا ؟
ريم : طبعا ردي
هديل : ما راح ارد بسوي كاني في محاضرة وما اقدر ارد
احمد : مو هذا اللي انا ما اسوى ظفرة؟
ورا ما تردين عليه ؟
ريم : احمد بس خلاص صدعتوني انتو الاثنين
صرت اكره اركب وياكم
احمد : يلا سحيله وصلنا بيتكم يلا انزلي ههههههههههههههههههههه
هديل : سحيله ام عيالك مو انا
احمد : لحووووووووول بتدعين على مرتي من قبل ما تجي
بس يلا روحي
هديل : ريم لا وصلتي دقي علي
باااااااااي شكرا على التوصيله احمدوووه
احمد : شدعوووه سحيله هذا واجبنا
......................................
اول ما دخلت قابلتني امي وهي متقطعه من الحماس كان مبين عليها انها تبي تقول شيء وهذا الشيء ميه بالميه له دخل بمحمد
ما في موضوع بالدنيا يخليها تنبسط زي محمد
يا بختك يا محمد نازل عليك الرضا من ست الحبايب
ام هديل : هديل دقت ام محمد وعازمتنا بكرا على العشا عندهم بالبيت وش رايك
هديل : عندي اختبار
ام هديل : معليش روحي جمليهم شوي بعدين ارجعي
هديل : ما اقدر اختباري صعب
ام هديل : المره جامعه حريم وتبي توريهم خطيبة وليدها
هديل : مره ثانيه ان شاء الله
ام هديل: الله يهداك بس انا الحين وشو اقول لها
هديل : قولي لها الصدق وان عندي اختبار
طلعت من الصاله وامي لا زالت تلح وتحاول تغصبني على الروحه انا طنشت كلامها
طلعت على غرفتي اللي من وصلت لها دخلت وراي اختي دانه وهي تهاوش كالعاده دفاعاً عن محمد
....................................
دانه: طبعا سالفة الاختبار كذب × كذب
هديل : والله مالي خلق شيء ذا الايام
لا محمد ولا ام محمد صحيح عمتي على عيني وراسي بس مالي خلق حريم
دانة: مسكين ذا المحمد لو انه ماخذني كان ابرك له
هديل: وانتي كل شيء بتاخذينه مني ؟
حتي رجلي ؟ يمه منك
دانة : انا مو عارفه افهم عليك اللي يسمع كلامك يقول منتيب طايقته خلاص عطيني اياه ونفتك
هديل : لو تموتين ما اعطيك اياه
( ينفتح باب الغرفه ويدخل فارس)
فارس : هديل تعالي ساعديني عندي واجب علوم ما عرفت احله
هديل : شوي وجايه لك
( يرن التيلافون وترد دانه وتطلع ريم )
هديل : فارس حبيبي رح لدانة تساعدك انا عندي مكالمه
فارس : دانه ما تعرف تفهم
هديل : طيب بس اخلص اجي اساعدك
..............................................
ريم : الو هلا هديل اخبارك ؟
هديل : بخير اسمعي ريم بكرا ابيك تجين عندي بحجة ان عندنا اختبا
ر وان احنا بندرس طيب ؟
ريم : وليه
هديل: بس ابي اتهرب من عزيمة ام محمد
ريم : لحوووووووووول
لين متى بتقعدين تتهربين منهم؟
هديل: لين الله يفتح علي واتقبلهم
ريم : طيب يلا عندك شيء ثاني تبينه؟
هديل : ايه تعالي وشو كان يقصد احمد اليوم لما قال عن خالد ان ياما تحت السواهي دواهي؟
ريم : ما اتوقع انه كان يقصد شيء بس كان يمزح
هديل: تصدقين انا بعد اتوقع ان خالد وراه شيء
ريم: لا خالد ما يهتم بذا الاشياء جدي بطريقة جدا سخيفه
هديل: صراحه ما ادري يمكن .........
طيب يلا ما اطول عليك ابي اروح ادرس فارس اشوفك بكرا
ريم : يلا مع السلامه
..............................................
بعد ما درست فارس قعدت في البيت زهقانه ما عندي لا شغله ولا مشغله
ريم كانت مشغوله مع امها يدورون اثاث جديد لغرفة طارق ( اخوهم الصغير)
وانا من كثر الزهق قلت لامي اني بطلع للسوق
وطبعا لاني خوافه وما احب اروح لوحدي ولان دانه كانت مشغوله اخذت معاي فارس !!
المهم اول ما دخلنا السوق خفت اشوف محمد بالصدفه فقلت خليني احترم نفسي واتغطى احسن ما يصير لي موقف سخيف
شريت لي شوية اغراض انا ابدا ما احتاجها بس من الزهق شريتهم
وانا طالعه من السوق تحرش فيني مجموعة شباب وفارس جا يقال بيستقوي عليهم وصارت هوشه جدا سخيفه
تدخل فيها واحد ابدا ما كنت اتمنى اشوفه بذيك اللحظه { خالد} ولان خالد انسان عبارة عن جدار جداً مخيف العيال هجو اول ما شافوه تدخل
خالد : فارس تعورت؟
فارس : لا ما تعورت اصلا لو ما جيت انا كنت اقدر ابعدهم
هديل :...........( يعني منت ناوي تسالني انا اذا تعورت يا اخ خالد ؟)
خالد : مره ثانيه لا عاد تطلعين بروحك خذي معك دانه ولا امك
ولا خلي خطيبك يطلعك
هديل :............(هذا اللي الله فتح عليك تقوله عناد بوجهك منيب راده عليك)
فارس: شكرا خالد
هديل : يلا فارس تاخرنا
خالد : عفوا هديل ما يحتاج تشكريني
هديل : ...........( امقتك انت وسخافتك وثقل طينتك..... عناد ماني راده ).....فارس يلا تاخرنا
< الموقف كان جدا سخيف وخالد كان رده علي اسخف
وشو قصده خلي خطيبك يطلعك يعني انا ما اعرف ادافع عن نفسي واسخف شيء لما قال عفوا وشو يعني بيمن علي لانه دافع عني ؟...
ليته ما تدخل افف اكرهه ذا الخالد عندي اتفشل مع احمد ولا مع خالد.........
بس الغريب في الموضوع ايش اللي جاب خالد في ذاك السوق
هو مو راعي حركات الدوران ؟... صراحه غريبه انه كان هناك ولا حتى كان معاه احد من خوانه ولا ريم وشو اللي موديه هناك؟
.......................
ريم :[ كنت استنى يجي بكرا بس عشان اقول لهديل على اللي صار اليوم بالليل كنت رايحه اجيب شيء من الصالة
وبطريقي مريت من غرفة خالد شفت النور مشغل والباب مفتوح شوي استغربت ان في احد صاحي بالبيت وخاصة خالد لانه من النوع اللي ينام بدري
سمعت خالد وهو يتكلم وكان صوته مــره واطي قربت من الباب ابي اسمع وشو يقول من اللقافه الزيادة فيني وسمعت كلامه !!!!
وعلى حسب ما فهمته انه كان يكلم بنت !!!!!!
وقفت مدة عند الباب ابي افهم وشو يقول بس ما قدرت اتاكد اذا هي بنت ولا لا
طردت الفكرة السخيفه من مخي وجيت بكمل طريقي للصاله ....
فجأة احمد طلع من غرفته وشافني وانا واقفه اتصنت على خالد
طالعني وغمز لي وقال:
ياما تحت السواهي دواهي
ومشا بطريقة وانا رحت للصاله
وشو كان يقصد احمد مااااااااا ادري ؟؟؟]
.................................................. ......
( في اليوم اللي بعده في بيت هديل )
هديل : كذااااااااااااااااااااااب ه ما اصدق
ريم: اسكتي ويوم جيت بكمل طريقي للصاله طلع احمد وشافني وانا اتسمع
راح غمز لي وقال ياما تحت السواهي دواهي ومشى بطريقة وراح
هديل: وشو قصده احمد ؟...
اتوقع ما عنده سالفة بس يبي يشوه سمعت خالد عندكم
ريم : اتوقع لان امي تقارن بينهم بطريقة مو طبيبعه
تعرفين احمد وتعرفين خالد
احمد مجنون وخالد قمة الثقل والسقامه
هديل: اسكتي بعد سالفة الفيصليه الي صارت لي مع اخوك
اثبت انه اسقم انسان على وجه الارض
ريم: صراحه قمت اشك بخالد رايح الفيصليه لوحده ويكلم وحده شبه بنت بآخر اليل ؟؟؟...
الموضوع فيه إن
هديل: صراحه فكري فيها بالعقل مين الخبله اللي بتكلم خالد ؟
بتحوم كبدها من ثقل طينته
ريم: حرام عليك اخوي خفيف دم بس ثقل
هديل: يا شيخه روحي من ايام ما كنت بزرة وكنا جيرانكم وهو ثقيل دم وسخيف
ريم:اتركينا بس من خالد وخلينا نتكلم بالجد
هديل: وشو ؟
ريم :لين متى بتتهربين من محمد ؟ ....
احكي الصدق انتي تحبينه ولا لا؟
هديل : تبين الصدق لا...
بس مو هذا اللي يخليني اتهرب منه
ريم : اجل وشو؟
هديل: بس انا ما تعودت على فكرة اني مخطوبه له ..
لسا يبغى لي اتعود على الفكرة شوي
ريم: وبعدين بتحبينه ؟
هديل : لا طبعا انا احب !!
ريم : ونسينا ايام احمد ؟؟
هديل: أي احمد كانت خرابيط
ريم : واللي يقولك انك لسا تحبين احمد ؟
هديل: منتب صااااااااااااااحيه احمد !!!!!
لو خلت الدنيا من الرجال ما حبيت احمد
ريم : هديل ترا من ايام ما كنا بالمتوسط وانا ابي اعرف وشو اللي صار بينك وبين احمد لا انتي قلتي لي ولا هو قال لي
وانا ما فكرت اسال ... والحين انا اسالك وش اللي صار ؟
هديل: انا اقولك
يا شيخه اخوك جات فترة كان ساحرني وانتي تعرفين ذا الشيء
هو لسا حلو ما انكر ذا الشيء بس ما عاد يهمني....... المهم طبعا انتي تذكرين سالقة الرساله اللي كتبتها له
ريم : ههههههههههههه كل ما اذكر ذيك الرساله فطست من الضحك ........
لا تقولين لي قصة الرساله قولي لي وشو صار بعد ما رد على الرساله
هديل: طيب اصبري هذا انا جايتك بالحكي
بعد الرساله يوم شفت انه تحمس وجازت له الفكرة
ويقال ان احنا بنعيش قصة حب بعدين بنتزوج هونت وقلت ما ابي
ريم : وليش هونتي ؟
هديل: بس اول شيء كنت صغيره وما افكر
بس برضو ما كنت ابي اعيش قصة حب
ريم : خبلللله............... وايش قلتي لاحمد بعدها ؟
هديل: قلت: له انا ما ابي احب أي احد بالدنيا..... راح قال لي: وليش كتبتي الرساله ؟...قلت: بس اجرب
ريم : وبس ؟؟؟
هديل: وبس من يومها وانا ناسيه السالفه واظن حتى هو
ريم : على العموم الله يوفقك مع محمد
هديل: قولي يا رب تعدي ذا الخطبه على خير
...................................
قعدنا نسولف انا وريم طول الليل لين جا احمد وأخذها .....
اليوم فتح ريم لسالفة احمد مره ثانيه.... مره نرفزني وقهرني صحيح اني ما بينت لها ذا الشيء بس شيء سخيف منها انها تعتقد اني لسا احب احمد !!
كأن ما بقى الا اخوها بالبلد عشان احبه !!.... ولا كأني انا من النوع اللي يحب عشان تفكر بذا الشيء ......
بس الشيء الاغرب من اللي صار اليوم سالفة خالد .
.معقوله خالد يكلم بنت ؟ او له علاقة مع بنات ؟ ودي اعرف وشو القصه بالضبط
.................................................. ........................................
..
مرت الايام بدون حدوث أي احداث تذكر ... علاقتي وتعاملي مع محمد ما تقدم ولا خطوة.......
بشاير واحمد ما انفصلو ...
خالد ما عرفنا وشو بقية قصته ...
ريم اليوم عندها عزيمة بنات
وانا قاعده استعد لها دانه ما راح تجي معاي لانها تعبانه وانا بروح بدري عشان اساعد ريم بالترتيب .
(في بيت ريم )
ريم : هديل معليش تروحين تشغلين انوار السور
هديل: ما اعرف من وين ؟
مرام : انا اعرف من وين
(مرام تصير بنت خالة ريم اصغر مني انا وريم بسنه البنت طيبه وما عليها استلطفها في بعض الاحيان
وبعض الاحيان تستفزني انوثتها ودلعها الزايد يعني علاقتي بها شبه سطحيه
بعد ما خلصنا ترتيب المكان لبسنا ثيابنا وتزينا وجلسنا نستنى جية الضيوف )
ريم : اذا كانو البنات دقيقين بالمواعيد مفروض بعد عشر دقايق يجون
هديل: مرام كيف الدراسه معك ؟ ( ابي الطف الجو معها)
مرام: والله ماشيه عندي اختبار صعب يوم الاحد
وهاذي الماده بالذات ما اعرف فيها ولا شيء
ريم : مو قلتي ان خالد بيساعدك في دراستها
مرام: ايه قال لي يوم السبت ان شاء الله بيجيني البيت
هديل: ...... (خالد يدرسها ؟؟ وليه ان شاء الله تجيب مدرسه) ....طيب مرام ليش ما تجيبين مدرسه احسن لك
مرام : والله هذا اللي كان ودي بس يوم درا خالد قال ما في داعي انا ادرسك وقلت اوكي
هديل: .....(طيب حبيبتي زبدة لا تذوبين وانتي تحكين .. )
مرام: على طاري خالد كيفه بعد يوم الحادث ؟؟؟
هديل: حاااادث ؟؟؟ .............
خالد سوا حادث متى ما قلتي لي ريم
ريم : ما كان له داعي اقولك لان ما صار شيء طلع منه زي الشعره من العجين بس السيارة انعجنت وخالد حتى خدش ما جاه
مرام : الحمد الله ربي حفظه ....
بس يقول اكثر شيء متحسف عليه ان ثوبة انشق هههههههههه
هديل : ......(اقول بس وقفي ضحك لا الوحك بعلبة الكلينكس اكره النعومه المصطنعه)...
مرام ما قد احد قالك انك تشبهين حليمة بولند؟
مرام : تسدقين كثير بنات قالو لي حتى خالد قال
بس انا ما اشوف فيه شبه ابدا يمكن نفس طريقة اللبس ؟
هديل : ...... (الا طريقة المصاله وانتي الصادقه)
ذاك اليوم حتى بعد ما جو البنات الاخت مرام ما بطلت حكي عن خالد شكلها وهي تحكي عنه كانها تعرف كل تفاصيل حياته اشياء كثيره انا ما اعرفها ...
كيف ما اعرف ذا الاشياء وانا معاهم من يومي صغيره ... بالنسبه لي كان شيء غريب انها فجاءة صارت تعرف كل ذا الاشياء اول ما كانت تجيب طاريه بالمره .....
.ذاك اليوم مر بسلام بدون ما اضرب مرام........ العزيمة خلصت وكانت جدا
رائعة وراحت مرام بدري لان لازم تنام عشان بكرا عندها اختبار...... استغليت فرصة عدم وجودها وقمت احكي مع ريم عنها
هديل: ريم انتي صديقتي على عيني وراسي بس انا بنت خالتك ذي ما اطيقها بعيشة الله
ريم : تصدقين انا في الفترة الاخيرة صارت تقهرني بزياده من يوم ما طبت الجامعه
وهي النعومه طاقتها بشكل مقرف
هديل: تصدقين هذا حال كل البنات ايام المدرسه تشوفينهم انواع العربجه
بس تطب الجامعه من اول يوم انواااااااااااع الرقه
ريم : بس مرام مو بس صارت ناعمه ما شاء الله صارت حلوه
حتى اخوي خالد اللي ما يحس انتبه انها تغيرت
هديل : خالد ؟ ......( عشان كذا ما بطلت حكي عنه ).... ليه وش قال خالد عنها ؟
ريم : قال انها كبرت وتغيرت....
و لما سالناه كيف تغيرت؟ قال صارت فاتنه على قولته
هديل : الله فاتنه مره وحده ...... غريبه انا اللي اعرفه ان خالد ما ينتبه للاشكال
ريم : بس مرام انتبه لها......
اقول هديل وش رايك اليوم تنامين عندي الوقت تاخر وحرام تطلعين ابوك بذا الوقت يرجعك البيت
هديل : ما اتوقع امي توافق
ريم : اخلي امي تحاكيها
بعد اقناع طويل تم بين امي وام ريم.. امي وافقت على النوم عند ريم بشرط انها آخر مره.....
امي ما تحبني اقعد في بيت ريم دايم بحكم ان بيتهم كله عيال و ان اثنين منهم اكبر مني...... كان شيء غريب منها انها توافق بس هذا اللي صار.......
رتبنا المكان بعد العزيمه....بعدها ريم عطتني وحده من بيجاماتها وجلسنا نسولف بالغرفه عن البنات واشكالهم وبعدها رديت فتحت موضوع مرام
هديل: ريم وشو قصة مرام مع خالد
ريم : قصة ايش ؟
هديل: وشو اللي بينهم ؟
ريم : ما بينهم شيء ليش تقولين كذا ؟
هديل: ما ادري مرام ما بطلت حكي عن خالد وهي تحكي عنه كانها تعرف كل تفاصيل يومياته
وانتي تقولين ان هو قايل انها صارت حلوه
ريم : لا ما اتوقع بينهم شيء ....
وحتى لو كان بينهم شيء وشو اللي يخليك متضايقه ؟
هديل: لا متضايقه ولا شيء بس ابي اعرف ........... لقافه
ريم : لا تخافين اذا عرفت أي شيء اول وحده بقول لها انتي
هديل :اكيييييد مو تنسين ؟.............
.اقول ابي اروح افرش اسناني
ريم : لا تروحين حمامي مقوطعه المويه فيها روحي حمام احمد
هديل: لا فشله و انا لابسه بيجاما
ريم : اصلا احمد ما يرجع بذا الوقت وخالد نايم من بدري واخواني كلهم نايمين يعني منتيب شايفه احد
طلعت من غرفة ريم وانا رايحه لحمام احمد مريت من غرفة خالد كان الباب مفتوح والنور مولع وكان صوت خالد طالع كانه كاني يحكي بالتيلافون
تذكرت قصة ريم لما قالت انها سمعته يحكي مع بنت على التيلافون بآخر الليل قربت من الباب عشان اتسمع واتاكد من صحة ذاك الكلام ..لكن اول ما قربت من الباب خالد سكت
وفجاءة طلع من الباب .
خالد ( وعيونه مفتوحه اوسعها): هديل ؟؟؟!!!!
هديل : آآآسس .... آسفه ......كنت بطريقي للحمام ....( وشو اللي طلعك من غرفتك يا الملقوف )
خالد : لا عادي وش فيك مرتاعه؟
هديل : روعتني........
حمد الله على سلامتك
خالد : الله يسلمك بس على أيش؟
هديل: قالو لي انك سويت حادثه
خالد : يالله من ذا الريم ما يبقى شيء ما تقوله لك
هديل: مرام اللي قالت لي مو ريم
خالد : آآآآه مرام اللي قالت لك ...
لا الحمد الله ما تعورت بالحادث ابد ربي ستر
هديل: وش فيك وجهك تقلب لونه يوم حكيت عن مرام ؟
خالد : ما فيني شيء انت اللي وش فيك
هديل (وهي تطالعه بطرف عيونها ): ما فيني......... شيء
تركت خالد بعد ما عطيته نظرة سخيفه ان دلت على شيء دلت على تميلح فيني
ومشيت لين غرفة ريم بعد ذا الموقف........... نسيت اروح للحمام
دخلت الغرفه وقلت لريم الي صار رحت صرخت وقالت باعلى صوتها .....
خالد شافك وانتي بدون حجااااااااب وبالبيجاااااااااماااااااا اااا ........
صرخت ريم هاذي ذكرتني بشيء طالعت ملابسي
ومسكت راسي ولمست شعري ابي اتاكد من صحة كلام ريم اني مو لابسه حجاب
وتذكرت كيف انا طلعت له بذا المنظر الحين وشو بيقول عني ؟؟؟
طالعة لي بنص الليل قدام باب غرفتي!!!!! والبيجاااما ؟؟؟؟
موقف اسخف من سخيف!!!!
ولا بعد وقفت اسولف معاه!!!!
وآخر شيء عطيته نظرة سقيمه ومشيت!!!! ...
.يا سخفي
...........................................
بعد عزيمة ريم والموقف السخيف اللي صار لي بالليل مع خالد ما عاد صارت تجيني الجرأة اني اروح بيتهم
اليوم دق علي محمد يبي يوشفني وكالعاده قام يتشره اني ما ادق ولا اسال عنه
ما ادري ليه خطيبي هو آخر اهتماماتي ما ادري متى راح يصير من اولوياتي ...
بس ما اتوقع انه من القريب
قرب موعد جيت محمد رحت وجهزت له شوية كيك وشاي واستعديت لجيته ولاول مره اتزين لخطيبي المبجل
(اول ما دخلت المجلس محمد وقف)
محمد : اهلا حبيبتي نورتي المكان
هديل : .......( نفس الكلام كل مره غير شوي)
محمد: ما شاء الله قمر دايم قمر بس اليوم صراحه شيء ثاني
هديل(وهي تصطنع الابتسامه): .......( بسرعه اللي بعده بديت ازهق)
محمد : كيف زوجتي اليوم.؟
هديل:....( لا تقول زوجتي الكلمه شوي كبيرة عليك )... بخير الله يسلمك انت اخبارك ؟
محمد : دامي جمبك فانا باحسن حال
هديل: .........(افففففف متى بتروح محمد ؟) ....كيف عمتي ؟
محمد : بخير وتسلم عليك
جلس محمد يحكي عن سوالف الشغل واخوانه الصغار وامه و الجيران وانا سرحانه واهز راسي واتصنع الابتسامات كالعاده
واخيرا خلصت السوالف اللي عند محمد وسكتنا لثواني............
بعدها محمد فجر القنبله !!
محمد : هديل انا احبك من يوم واحنا صغار
هديل : ...............(بدينا بالإعترافات الله يستر )
محمد : هديل انتي ما تعرفين انتي ايش تعنين لي
اتمنى بس اني اكون اعنيلك لو الشيء القليل
هديل :.................( الصمت الرهيب........ وشو المفروض اقوله الحين )
محمد : هل انا ............؟
هديل : ...........( هل وشو كمل ؟؟؟).....
محمد : هديل انتي تحبيني ؟
هل تبادليني الشعور ولا وافقتي علي كرهاً ؟
هديل جاوبني الله يخليك
لا تحرقيني بسكوتك
ليش انا اشوفك باردة وجافه في تعاملك معاي ؟
هديل : .....................( الرجال سكت على كثير واليوم انفجر وشو اقول له ذا الحين ؟ )...
محمد انتي ولد عمتي قبل لا تكون خطيبي
اكيد انت عزيز وغالي من قبل لا تكون خطيبي
محمد : والله ؟ .... اشوا طمنيتيني
للحظه حسيت انك ما تبيني
هديل : انا ما عمره احد بالدنيا يقدر يغصبني على شيء
امشي كلمتي لو على جثتي ....( يعني لا تفكر يوم تتأمر علي فاهمني ؟!)
محمد : طيب انا كأني اليوم طولت عليك وانتي شكلك مشغوله ....
استاذن واشوفك على خير
هديل : ............( يلا روح بللي ما يحفظك... نشفت دمي الله ينشف دمك )
محمد وهو طالع من البيت : اتمنى مع الوقت اني اكون اكثر من عزيز وغالي
هديل : (وهي تصطنع الابتسامه كالعاده): .........مع السلامه
.............................
تفجير محمد اليوم للقنبله خبصني ونكد علي يومي حاولت الهي نفسي باشياء كثيرة بس ما قدرت
قعدت افكر هل بيجي يوم بيصير محمد فيه اكثر من ولد عمتي اللي ما يعرف يلعب كورة ؟
هل بصير يوم زي بقية البنات .....
احب !........
الفكرة بحد ذاتها سخيفه وما يقبلها عقل ... او بالأصح عقلي
مر اليوم كله وانا بس افكر وما وصلت لنتيجة نمت وانا راسي مليان بالافكار صحيت ما اقدر ارفع راسي
يمكن من كثر الافكار اللي مرت في بالي
ما في شيء يعدل مزاجي ويصحصحني الا ....
ريم
........................................
(ركبت السيارة متجهه لبيت ريم في الطريق انتبهت ان الوقت مره بدري كانت الساعه ما تجاوزت التسعه ونص بس قلت معليش انا في حاجه لصديقتي الحين
وصلت البيت وكان الباب مفتوح دخلت بدون ما ارن الجرس بحكم اني صاحبة بيت !
بس اول ما دخلت صادفت جبل طويل لابس قماشة بيضا فوقها شيء احمر يسمونه شماغ.....
خالد !
خالد : اهلا هديل صباح الخير
هديل : صباح النور......( الله يخليك اخ خالد بعد عني شوي بديت احس اني قزمه)
خالد: غريبه صاحيه بدري وجايتنا خبري فيك نوم لين الظهر
هديل : ........(خبرك فيني ؟؟ ليه وحضرتك ساكن معانا ؟)....اصلا انا اصحى قبل العصافير لا تصحى
خالد: ما شاء الله عليك نشطيه
قعدت اتامل في ملامحه ......تصدقون اول مره اشوف فيها وجه خالد بذا الدقه ما عمري في يوم فكرت اشوفه
عيونه كبيرة ومكحله زي عيون احمد ........ فيه شبه كثير من احمد
وبعد هو احلى من احمد ......... اخس يا خالد والله طلعت منتب سهل
خشمه نحيف ودقيق حواجبه جدا عريضه وغامقه
ما احب الحواجب العريضه!
بس على خالد طالعه شيء ثاني................
سرحت بافكار جدا سخيفه وانا بس اتامل في وجه خالد
قاطعني صوته وهو يقول
خالد : هديل مضيعه شيء في وجهي ؟
هديل : .....هاه ؟( الله من العربجه في بنت بالدنيا تقول هاه ؟؟!)..... لا ...ايش لا كنت اطالع الشجر ما شاء الله طول....(حتى ترقيع زي العالم والناس ما اعرف ارقع !)
خالد : ايه حديقتنا واجد تغيرت خبرك فيها من ايام ما كنا جيران
هديل : ايه من زمان ما طلعت حديقتكم
خالد: الله يرحم ايام اول ايام ما كنت اوصلك انتي وريم للمدرسه
كنتي جدا مزعجه !!
ولازم تخلينا نمر على سيارات الايسكريم
من جد كنتي مزعجه !!!
هديل: .....(هذا اللي الله فتح عليك تقوله لي ؟).....انا من يومي عنيده وما امشي الا اللي براسي
خالد : هذا مو شيء تفخرين بيه ابد
هديل: كلن وطبعه.... وعن اذنك انا داخله
نرفزني كلامه عن عنادي .........انا افحر اني عنيده ......والله احسن ما اكون طرطورة
واللي ما يطول العنب حامض عنه يقول.........
ما ادري وشو دخل ذا المثل بس هو ما يطولني
مشيت لغرفة ريم وانا جد معصبه
............................
ريم : هلا هديل وش فيك طولتي ؟
هديل : قعدت اسولف مع خالد تحت
ريم : والله لك وجه تحاكينه بعد اللي صار يوم العزيمه
هديل : اسكتي لا تذكريني بذاك اليوم الله يخليك
ابي انساه وكأن ولا شي صار
قعدت احكي لريم على اللي صار مع محمد ...... وكالعاده قعدت تعيد علي نفس الاسطوانه
ان محد غصبني عليه وزي ما وافقت عليه اقدر ارفضه واني لسا بأول الطريق ولا اعلق الولد فيني اكثر من كذا
وختمت كلامها بــ
[حرام عليك اللي تسوينه بالرجال !!]
مرالوقت بسرعه جدا كبيرة وجا وقت الغدا ...طلبت مني ام ريم اني انزل واتغدى وياهم
واصرت على اني انزل آكل مع بقية العائله على نفس الطاولة موقفي كان جدا محرج
انا ما عدت بنت جيرانهم البزرة اللي اقدر اقعد معهم على نفس الطاوله حاولت في ريم انها تجيب الاكل وناكل بالغرفه بروحنا بس اصرار امها احرجني كثير
لبست عباتي ولفيت طرحتي كالعاده.....صحيح اني امون على اخوان ريم بس هذا ما يخليني اقدر اقعد معهم بدون حجاب!
...................................
على طاولة الاكل جلسنا انا وكل افراد العائله عدا احمد اللي كان لسا ما صحى من النوم بعد سهرته الطويلة امس
ليت احمد كان موجود عشان يلطف الجو هو الوحيد اللي يمون علي
الكل كان ياكل ويحكي في مواضيع بعضها يحمس وبعضها يجيب النوم
وانا بس قاعده اتامل في ملامح خالد اللي من قريب فقط انتبهت لها
شكلي كان ملفت للنظر تاركه الاكل ومسرحه بوجه خالد !
قاطع كلام الجميع صوت خالد اللي كانت عيونه موجهه لي وهو يقول
خالد : الناس بالناس وعبله بالغنم !!!!!!!
هديل: .................(هذا يقصدني ولا قاعد يسولف !!!)
خالد (وهو يبتسم ابتسامه خبيثه): صح يا هديل ولا انا غلطان ؟
هديل: ..........( انا عبله وهو غنم ؟؟!! وشو قاعد يقول ذا ما فهمت )....ايه صح
ريم (ونظرات الاستغراب تعلو وجهها): وش القصه ؟
خالد : هديل فاهمتني ..... صح يا هديل ولا منتي فاهمه ؟
هديل :.....(فاهمه وشو يا شيخ يا روح )... ايه فاهمتك
بعدها خالد قال باعلى صوته ...الحمد الله وقام من على الطاوله وقبل لا يقوم عطاني نظرة ......
ما فهمت وشو معناها !!!!
(الناس بالناس و عبلة بالغنم ؟؟؟)
خالد انت اغبي واسخف واسذج انسان شفته بحياتي
الشره موب عليك الشره على اللي يتامل بوجهك
بس تبون الصدق ........خالد حلــــــــــــــــــــو !!!
--------------------------------------------------------------------------------</font>
رد مع اقتباس
مواقع النشر (المفضلة)