<font color='#000000'>بس تبون الصدق ........خالد حلــــــــــــــــــــو !!!
بس احمد ................احلى
............................................
مر اسبوعين من يوم ما تغديت ببيت ريم انشغلت باختبارتي عن الكل
اهلي اللي كنت اقعد معهم على كل الوجبات صرت اشوفهم الصبح فقط!
محمد اللي كل يوم يدق علي واصرفه بحجة اني ابي ادرس!
ريم اللي كانت تجيني بشكل شبه يومي ما عاد صارت تجي!
خالد ........بس خالد! ما شفته من اسبوعين
كلهم وحشوني
باستثناء محمد................مسكين محمد
مظلوم معاي .......بس محظوظ.... يكفيه انه خطيبي
ويقعد معي متى ما بغى ......غيره يطلب الرضى
..........................................
اليوم بمناسبة ان احنا خلصنا اختبارات اتفقنا انا وريم اني ارجع معها من الجامعه على مطعم او قهوة ثم على بيتهم
اول ما طلعنا من الاختبار جاتني ريم وهي تقول ان المخطط حق اليوم تغير !!
هديل : لييييه ؟
ريم : مرام ما في احد يرجعها بيتهم راحت قالت لي ارجعها معاي على الطريق وصدفت ان اليوم ما في سواق يقدر يرجعني وخالد تبرع ان هو بيجي ياخذنا كلنا !!!
هديل: يا ربي ما صدقت على الله نخلص نبي نطلع
ريم : اعوضك عنها الاسبوع الجاي
هديل : نشوف مو تنسين
..........................
قعدنا ساعه نستنى الاخت مرام تقبل بطلتها البهية لبسنا عبايتنا وطلعنا وركبنا بسيارة خالد اللي لأول مره اركبها بحياتي
على كثر ما رجعت مع ريم ما عمري رجعت معها مع خالد دايم مع احمد ولا مع اخونها الصغار
اول مره انتبه لذا الشيء على كثر ارتباطي بعيلة ريم علاقتي بخالد جدا سطحية ما اعرف عنه شيء........... اول مره اركب سيارته............ من اسبوعين فقط اكتشفت انه حلو
عجيب امرك يا خالد !
ركبنا السيارة وكانت مرام في المقعد اللي ورا خالد بالضبط
من اول ما ركبنا والبنت ما سكتت تحكي لخالد عن دكاترتها واختباراتها ودروسها وانا ريم ساكتين وهم يحكون ويضحكون وانا في قمة الاستغراب !!!!
مرام +خالد = سوالف كثيرة وضحك !!!
في شيء غلط بالمعادلة شخصين مختلفين تماما بالسن وبالتفكير وبالعقل
خالد مستبزرها وبس ما يبي يحرجها زي لما احنا نسال الاطفال كيف الروضه
يعني خالد له يشتغل تقريبا 3 سنوات ومرام باول جامعه تقريبا بينهم 7 سنين !!!.......
لا اكيد هو مستبزرها
بعد ما خلصت الاخت مرام سوالف عم الهدوء السيارة لمدة خمس دقايق
بحكم من خطيبي العزيز انا صرت اتغطي
قطع الصمت اللي كنا فيه صوت خالد وهو يقول
خالد : ما شاء الله يا هديل صرتي تتغطين الله يوفقك .....
هديل: الحمد الله .....الغطا ستر
خالد : ما شاء الله عقبال ريم ومرام ان شاء الله
مرام : انا شاء الله قريب راح اصير اتغطي واذا تعودت على الغطا راح احاول البس عباة راس
هديل : .........( مراموه اسكتي لا ادوس ببطنك خليني انبسط لو دقايق )... بس يا مرام انتي حتى لثام ما اظنك تقدرين تصبرين عليه
مرام : لا ان شاء الله بحاول
هديل : انا اقول بالاول وقفي تحطين ميك اب وتلبسين عباة مخصرة بعدين ابدي تغطي
مرام : ..........................
خالد : الله يهديكم كلكم
احسن تستاهل محد قال لها تسرق مني الانظار
وخلي خالد يعرف ان هذا شكلها كله ميك اب ولا هي شيفه
تستاهل يا ربي اكرهها متى نوصل بيتها وتنزل ونفتك
خالد: مرام اروح على بيتكم ولا بترجعين معنا عالبيت
مرام : اذا تبوني رجعت معكم
هديل : .........(لا ما نبيك يلا طسي بيتكم )
ريم : كيفك اذا تبين ارجعي معنا هديل راجعه على بيتنا
مرام : ايه والله من زمان ما تغديت مع خالتي خلاص برجع معكم
هديل :.........(يا ربي اللهم طولك يا روح ... انا اليوم يا قاتل يا مقتول)
اخيرا وصلنا بيت ريم بعد ما تحملت مصالة مرام لمدة نصف ساعه !!!
يا ربي ليش جامعتنا بعيدة ؟؟؟ كله من الجامعه الطريق طويل وزهقت من ذا الآدميه!!
الله ياخذ جامعتنا اللي خلتن اتحمل مرام
وصنا بيت ريم قعدنا شوي بالصاله مع ام ريم لين ما نزل احمد واتاذنا انا وريم وطلعنا فوق بقت مرام تحت مع احمد وام ريم
..........................
(غرفة ريم)
هديل: بنت خالتك ان ما وخرتيها عن وجهي ترا برتكب فيها جريمه
ريم : انتي لاحظتي المصاله اللي كانت فيها بالسيارة
اول مره انتبه انها تحتك باخوي خالد
صادقه فيه بينهم سالفة اموت واعرف وشو هي
هديل : ما اتوقع انه فيه سالفه
خالد بس يجملها هي اللي تحتك وتتلصق فيه
ريم : لا حتى خالد ترا كان يحكي عن شغله واصدقائه وناس انا ما اعرفها !!
وشو يعرف مرام بذا الناس ؟
وكانت لما يحكي عنهم كأنها تعرفهم زين
هديل : مشتهيه اضربها قاهرتني
ريم : طيب انا قاهرتني لانها تلصق بأخوي...........
انتي ليه قاهرتك؟
هديل : هاه ........ قاهرتني لانها تقهر وتتنعيم بطريقة مقرفه
ريم سكتت دقيقه وطالعتني ثم صدقت انها بس قاهرتني عشانها تتميلح او.................. حاولت تصدق
صراحه انا غلطت باني تفاعلت مع الموضوع بذا الطريقة الحين البنت وشو بتقول عني ؟
دقايق الا طق باب غرفة ريم ودخلت مرام وقعدت
وقمنا نسوللف باشياء سخيفه
او بالاحرى ريم ومرام كانو يسولفون انا كنت بس اطالع بمرام
وشو الللي عاجب خالد فيها ؟
شعرها مو مره طويل ؟ انا شعري اطول وانعم !!
وهاذي مو طبيعة لون شعرها صابغته ولا هي اصلا مو شقرة
انا اصلا افخر بشعري الاسود ولا افكر اصبغه
بس هي بيضا وما شاء الله جسمها حلو و منسق
حتى انا نحيفه وطويله وجسمي ما يعتبر شين صحيح اني حنطية
بس لوني احلى من لونها
ويا بخت اللي يحب سمرة
واذا هي نعامه ورقيقه انا بعد اقدر اتنعيم
والعب بشعري وانا احكي مو شيء صعب ولا يبغى له فن
قعدت لمدة نصف ساعه بس اقارن بيني وبين مرام
واكتشفت انها مو احلى مني بكثير انا الملح وهي الجمال!
الجمال فتان بس ما يدوم ومع السنين يروح
والملح يجذب بس يبقى مع السنين
يعني انا اللي فزت
قاطع حبل افكاري صوت مرام وهي تقول انا استاذن الحين بروح بيتنا عشان وراي اليوم عرس ولازم اروح اتجهز لبست عباتها وطلعت ولغير رجعه ان شاء الله
..............................
جلسنا انا وريم لساعات سولفنا... حشينا.... رقصنا ....غنينا..... ما بقى شيء ما سوينه
قعدنا طول النهار واحنا نحوس الين ما تعبنا
قررنا بعدها نشوف فلم لأن ما عاد فينا نسوي أي شيء يحتاج لأي مجهود
رحنا انا وريم نختار لنا فلم من غرفة احمد اللي كان طبعا طالع
اليوم الاربعاء ومستحيل يكون قاعد في البيت
دخل علينا خالد اللي كان داخل ياخذ غرض ما من غرفة احمد
خالد : وشو تسوون هنا .؟
ريم : نبغى نشوف فلم ...... وشو احلى شيء وما يحتاج تركيز
خالد : وشو تبون نوعه قصة ولا آكشن ولا رومنسي ولا خيال
ريم : لا الله يخليك نبي أي شيء ما يحتاج تفكير لان حيلنا منهد
خالد : وانتي يا هديل وشو تبين ؟
هديل : أي شيء ما تفرق معاي
خالد : احسك راعية افلام رومنسيه
ريم : لا رومنسيه .......هدييل وييييييييين والرومنسيه وين
هديل : ......(يا سخفك يا ريم هذا وقتك تقولين ذا الكلام)....اصلا ما تفرق معاي
خالد : خذو هذا الفلم قصته مره حلو
ورومنسي لراعية الرومنسيه هديل
طلع خالد من الغرفه بعد رمى جملته اللي ذوبتني
وناسه انا رومنسيه !!!
اخس والله اني منيب سهله اذا خالد اللي هو خالد اللي ما ينتبه لشيء قال اني رومنسيه !
اجل الناس الطبيعيه وشو بتقول ؟
والله وجا اليوم الناس اللي تقدر رومنسيتي فيه
والله محد فاهمني الا انت يا خالد
خلص الفلم اللي اختاره لنا خالد بعد ساعتين ونص
واللي كان خالي من أي نوع من انواع الرومنسيه!
مالت عليك يا خويلد تقول رومنسي لراعية الرومنسيه واخرتها ما يصير فيه ولا شيء ؟
ليكون كان يقصد شيء بذا الحركه ؟
صراحه انا تعانه ومالي خلق افكر واحلل وشو كان يقصد بذا الحركه
رجعت لبيتنا ومن حطيت راسي على السرير الا انا في سابع نومه
اليوم استنزفت كل طاقتي في بيت ريم
.................................................. ......
[ريم ]: اليوم طريقة خالد اخوي ومرام بالسيارة كانت غريبه جدا قرررت اني راح اسال خالد عنها اليوم !
بعد ما راحت هديل قررت اني اروح احاكي خالد في الموضوع ورحت لغرفته
دخلت لقيته يكلم تيلافون اول ما شافني بسرعه صرف الشخص اللي كان يكلمه
ما امداني فيها اعرف جنس الشخص اللي كان يكلمه
طالعني باستغراب وخوف وقال خير ؟ فيه شيء ؟
طمنته اني ما فيه شيء واني بس جايه اسولف معه قعدت احكي له عن الدراسه وصاحباتي وهو بدوره حكا عن شغله ومشاكله فيه............
لحظة صمت اخيرا
استغليت هاذي الللحظه ودخلت في صلب الموضوع مباشرة
ريم : خالد انتا ايش قصتك مع مرام ؟
خالد (وعيونه مفتوحه اوسعها):مرام ؟!!!!...........ايش فيها مرام
ريم : انت عارف ايش فيها قول القصه وريحني لا تلف وتدور
خالد : تدرين مين اللي سكرت التيلافون منها من شوي ؟
ريم : مين ؟
خالد : هاذي كانت مرام
ريم : مرام ؟؟.....وشو تبي منك بعد ؟
خالد : ما تبي من شيء .........بنت خالتي وتحبني واحبها فيها شيء ؟
جملة خالد هاذي صعقتني
مرام !!!!! ما بقى الا مرام عشان تحبها ؟
البنت حليله وطيبه وما عليها وبنت خالتي واولى من غيرها
بس شخصياتهم ابدا ما تتفق
سكت لدقايق وما عرفت وشو اقول رد خالد وقال
خالد : مرام هي الانسانه اللي ابي ارتبط فيها
وان شاء الله كلها كم اسبوع واتقدم لها رسمي من ابوها
امي وحاكيتها في الموضوع و موافقه
ريم : وانا آخر من يعلم ؟
خالد : مو حكاية آخر من يعلم السالفه لسا ما صارت رسمي
ريم : بس مفروض اعرف مو اركب معكم بنفس السيارة زي الطرطورة
خالد : انتي معارضه على مرام ؟
شايفه فيها شيء انا ما اعرفه
عليها كلام ولا شيء ؟
ريم : البنت ما فيها شيء بس ما اشوف انها تناسبك بالمره
خالد : بس انا اشوف العكس
مره عصبني كلام خالد طلعت من الغرفه بدون ما انطق بولا كلمة ورحت لغرفتي وانا في قمة العصبيه
فكرت اكلم هديل واقولها على اللي صار بس كانت نايمه
بعدها قررت اني ما اقولها الا اذا صارت السالفه رسمي لان اكتشفت ان الموضوع ما يعني هديل بالمره
.......................................
[احمد ]: بحكم ان اذاني كبيرة وغرفتي جمب غرفة خالد واني انا ملقوف سمعت الحكي اللي دار بينه وبين ريم
واكتشفت اني انا لازم اتدخل بالموضوع
رحت لغرفة خالد وفتحت معه سالفة خطبة مرام
احمد : طيب وهديل ؟
خالد : وش فيها هديل ؟
احمد :ايش راح تسوي على موضوعها
خالد : الله يوفقها مع خطيبها
هديل فترة وعدت من حياتي
احمد : خالد انت لسا تحبها لا تستهبل على عمرك
خالد : واذا كنت في يوم احبها
البنت خلاص انخطبت واللي صار صار
وحتى لو ما انخطبت هديل انسانه قلبها زي الحجر لا تحب ولا حتى تحرك ساكن
والحين الحمد الله ربي اعطاني مرام تعوضني عنها
البنت تحبني وشاريتني ليش اتركها عشان وحده زي هديل ؟
احمد : واللي يقولك ان هديل تحبك ؟
خالد : يا شيخ خلها تحب نفسها بالاول خلها تحب اللي حولها خلاص انا ياست منها
ويا احمد تكفى انسى موضوع هديل ولا عاد تفتحه انا على وشك اني اخطب مرام لا تخرب علي
ولو سمحت تفضل من غير مطرود
احمد : يا خالد انت تحب هديل ومرام فترة وراح تعدي من حياتك انت ما تحبها
مرام مو الانسانه اللي تناسبك
خالد : مرام موب فترة وتعدي
انا بكرة ان شاء الله رايح لابوها وبخطبها رسمي
عاجبك مو عاجبك رايح اخطبها ولو سمحت تفضل اطلع برا
.......................
انطردت طردة محترمه من غرفة خالد
ما في شيء ينرزفه في الدنيا قد موضوع هديل
خالد مستحيل يتزوج مرام
طلعت من غرفة خالد وانا جد معصب وعلى طول على غرفة ريم
..........
[ريم ] : اول ما طلعت من غرفة خالد كنت مقهورة ومعصبه نوعا ما
مرام ما تستاهل اخوي خالد يستاهل وحده احسن منها
كنت معصبه
بس بعد فترة هديت وفكرت بالموضوع بجديه
واقتنعت بالموضوع
الله يوفقهم انا مبسوطه لهم
وعلى ما يقولون دهنا في مكبتنا
بنت خالتي اولى من الغريبه باخوي
ولو انها ماصله شوي
لحظات الا باب غرفتي ينصفق بالجدار ويدخل احمد وهو جد معصب ويصرخ
احمد :خالد راح يخطب مــــــــــــــــــــرام !!!!
للحظه فكرت ان اخوي احمد كان يحب مرام وانه ناوي يخطبها بس خالد سبقه عليها
بس بعد دقايق اكتشفت انه معارض على الخطبه لسبب ثاني
سبب مخيف !!!
وله علاقه بانسانه عزيزه علي
ريم : نعـــــــــــم !!! خالد يحب هديل !!!!!!!!!! !!
احمد : يحبها من قبل لا تنولدين
حرام اللي قاعد يصير اخوي يتزوج ذيك المصاله ما يصير
ريم : يعني خالد وهديل يحبون بعض ؟
وانا آخر من يعلم كالعاده ؟
عشان كذا تصرفات هديل صايرة جدا غريبه مع خالد
وبينهم كلام ما ينفهم
وعشان كذا هي تغار من مرام
الحين بديت افهم اللي قاعد يصير من حولي
احمد : لحظه شوي شوي
انت وشو قاعده تقولين ؟
انا ما قلت انهم يحبون بعض
انا قلت ان خالد يحب هديل...........
انتي وشو تقصدين ان حتى هديل تحب خالد بس هم ما درو عن بعض ؟
ريم : اكيد ما في تفسير لتصرفاتهم الغريبه الا ان هي تحبه
انا متاكده من هديل صديقتي واعرفها
بس كيف ما نتبهت من الاول
يالله .......انا غبيه
انا وشو اسوي الحين هديل راح تتزوج ولد عمتها اللي ما تطيقه
واخوي راح ينتهي مع بنت خالتي الماصله
حرام اللي قاعد يصير
احمد : بكرا تروحين لها وتفهمينها كل اللي قاعد يصير
.................................................. .......
بعد ما طلع احمد من غرفتي استسلمت للنوم على طول لاني كنت جد منهكه من يومي الطويل
صحيت الصبح ونزلت للصاله عشان افطر مع امي
وكان وجها مبسوط وملامحها تبتسم بشكل ينذر ان فيه شيء صاير بالعائله
ريم : اشوفك مبسوطه ووجهك منور
وش اللي صاير بالبلد وانا ما ادري
ام ريم : اخوك اليوم بيخطب مرام بنت خالتك
الله يوفقهم
عقبال ما افرح بيك انتي واحمد وبقية اخوانك يا رب
بعد ما قلت امي جملتها المشؤومه تغيرت ملامح وجهي
ابدا مو هذا الخبر اللي كنت ابي اسمعه
شكل كلامي امس مع خالد خلاه يعند ويخطب مرام على طول
انا لازم اروح لهديل اليوم وافهمها
.................................................. ........................................
صحيت اليوم الصبح بقمة النشاط بعد النومه الغير طبيعيه اللي نمتها امس
شكلي تعبت مره في بيت ريم اللي خلاني انام لين العصر
شفت جوالي لقيت 22 ميسد كول من ريم !!!
غريبه وشو فيها ؟
نزلت الصاله قابلتني امي وهي وتقول دقي على ريم تراها دقت عليك اكثر من مره
مما زاد من استغرابي وش فيها ريم
رحت اكلم ريم من تيلافون المجلس قابلتني دانه في طريقي
وقالت دقي على ريم تراها ازعجتنا تبيك
اكيييد فيه مصيبه صايرة !!!
دقيت على ريم ... مكلمتنا كانت جدا قصيرة انتهت بانها راح تجيني بعد دقايق لان فيه موضوع تبي تحاكيني فيه
انا اول ما خطر ببالي انها مخطوبه
الله يوفقها يا رب
ويا رب يكون اللي فبالي صحيح
البنت ما كذبت خبر كلها كانت دقايق وهي بيتنا طلعنا على غرفتي
وبعدها ريم صعقتني بالخبر المريع
هديل : خـــــــــــالد بيخطب مرام !!!!!!!!!! !!!!!!!
ريم : ايه
واليوم بيروح لابوها واللي العن من كذا ان ...
هديل : اصبري اسكتي شوي خليني استوعب
خالد بيخطب مرام
مرام هذيك بنت خالتك ؟
مرام اللي انا ما احبها بتتزوج اخوك خالد !
لييييه ؟ ليييه يا خالد تسوي كذا؟
عشان كذا هي كانت تتميلح عليه!
عشان كذا كانت تعرف كل شيء عنه؟
ريم : طلعو يكلمون بعض ومتفقين على الزواج بس الاهم من كذا يا هديل ان خالد ...
هديل : اسكتييييييي لا تحكين خليني افهم اللي قاعد يصير من حولي
لا شعوريا سرحت بعالم ثاني لوحدي ريم كانت قاعده تحاول تقول شيء من الاول بس انا ما اعطيتها فرصه من صراخي
انا ليش قاعده اصرخ ؟
ولو خطب خالد ؟ انا ايش اللي يمسني بذا الموضوع
عيوني بدت تمدع !!
ليش انا قاعده اصيح !!!
هديل ؟ وشو اللي قاعد يصير لك انتي اقوى من كذا ؟
ولو خالد خطب مرام اللي ما تحبينها مرام الماصله
مرام اللي ما تستاهل خالد
خالد اللي انتي تحبينه !
عيوني اللي كانت والافكار الغريبه اللي كانت تدور بمخي
منعتني من اني احس بللي حولي
نسيت مين كان معاي بالغرفه ؟
صح تذكرت ريم معاي بالغرفه
يالله وشو راح تقول عني الحين ؟
وشو راح تفكر فيني بعد ما شافتني اصيح عشان اخوها خطب ؟
ايش موقفي منها كيف راح اوريها وجهي ؟
كيف؟
قاطع افكاري صوت ريم وهي على وشك انها تنفجر باكيه معاي
ريم : لا تخافين يا هديل حتى هو يحبك
حتى هو يتمناك
يا هديل اكيد راح نلقى حل اكيد
لازم انتي وخالد تتزوجون بعض
دموعي منعتني من اني اركز بالكلام اللي قالته ريم !
ريم انتي ايش قلتي خالد يحبني ؟
خالد يحبني انا ؟
هديل : ايش قلتي ؟
خالد يحبني ؟ يحبني انا ؟
ريم : ايه يحبك يا هديل
يحبك من يوم احنا صغار
يحبك بس ما قدر يقولك............ يحبك حيل يا هديل يحبك
هديل : يحبني انا ؟ خالد يحبني انا ؟
اكيد تمزحين؟
طيب وانا ؟ ..... هل انا احب خالد ؟
ريم : ايه انتي تحبينه لا تكابرين على عمرك يا هديل
انتي تحبينه
لازم تسترجعين من تحبين من مرام
هديل : طيب ومحمد ؟
جملتي هاذي خلت ريم تسكت وتجمد بمكانها
كأني ذكرتها بشيء كان لازم تذكره.. كأني ذكرتها باني مخطوبه لواحد يقولون انه ولد عمتي اللي يحبني مني يومي صغيره
ليش انا ما اكتشف ان الناس تحبني الا بعد فوات الاوان ؟
ظلينا انا وريم ساكتين لمدة طويلة انا ابكي بحرقه وهي ساكته ما تعرف وشو تقول
بعدها وقفت من مكانها معلنة الرحيل وقبل لا تطلع من غرفتي قالت
ريم : هديل انتي ادرى بمصلحتك
يا اما تتزوجين واحد تحبينه او لا
انتي لازم تقررين وشو تسوين
انا سويت وقلت اللي علي الباقي عليك انتي
انتي يا هديل
الباقي علي انا !! ؟
انا ايش اسوي الحين
هل انا احب خالد ؟
ها انا ابي اتزوج وانهي حياتي كلها مع محمد
جلست اليوم كله وانا حبيسة غرفتي شوي ابكي شوي افكر واشوف ارتاح من الاثنين
انتهى يومي بقرارين
1_ انا احب خالد
2_ كلمت محمد وطلبت منه انه يجيني بكرا
.................................................. ........................................
..
وجا اليوم الموعود
صحيت من النوم تعبانه حيل جلست بالصاله انتظر جية محمد
وجا محمد
استقبلته امي ودخلته بالمجلس وجت نادتني
ودخلت عليه
محمد : هلا حبيبتي نورتي المكان كله
هديل :.........( نفس الكلام يا رب يكون اليوم آخر مره اسمعه ).... هلا فيك
محمد : اخبارك حياتي عساك بخير ؟
هديل : .......( لو سمحت لا تقول حياتي عشان تسهل على الكلام اللي راح اقوله لك اليوم )...... انا بخير انت شخبارك ؟
محمد : انا بالف صحه وعافيه دامي جمبك واسمع صوتك
انا مره مبسوط هاذي اول مره انتي اللي تطلبين فيها انك تشوفيني
العاده انا اللي اقعد اترجي فيك
اكيد انا وحشت حبيبتي ولا عندها شيء تبي تقوله لي
هديل : ..........( محمد انت ابدا مو قاعد تسهل علي )......... ايه انا بغيتك بسالفة
محمد : قولي حياتي
حددتو موعد الملكه ؟
هديل : لا
محمد : اجل وشو ؟
هديل :................( بسم الله توكلنا على الله ).......... محمد انا ابغى افك الخطبه اللي بينا..............
محمد انا ما استهالك
محمد انت تستاهل وحده احسن وحده تقدر حبك لها
وحده تبادلك المشاعر
انا يا محمد اعتبرك زي اخوي ما اقدر اني في اعتبرك زوج لي ما اقدر والله مقدر
محمد حاول تفهمني
يا محمد حرام تضيع مشاعرك على وحده زيي
محمد...................انا آسفه انا ما اقدر اكمل وياك
نزلت كلماتي على محمد زي الثلج
تجمد بمكانه ولا عاد نطق بكلمه
وانا ما قدرت ارفع عيني عن الارض واحطها بعينه
جلسنا ساكتين لمدة خمس دقايق بعدها محمد نطق
ويا ليته ما نطق
محمد: انا كنت متوقع هالشيء
على العموم الله يوفقك مع من بتاخذين بعدي
والله يعينيه على وحده زيك ما تقدر المشاعر وتجرحها
حسبي الله ونعم الوكيل فيك كانك سبب عذابي
حسبي الله ونعم الوكيل
تنرد لك بعيالك يا هديل يا بنت عبد الله
بعدها قام ومشى لين الباب وطول ما هو في طريقه يتحسب علي
.................................................. ........................................
...
مر اسبوعين من بعد ما انفكت خطبتي من محمد انقطعت فيها عن الناس والدنيا
كلمات محمد اثرت فيني واجد وهدتني بالحيل
يا رب تسامحني على اللي سويته بمحمد
يا رب توفقه مع وحده غيري تنسيه الللي سويته فيه
يا رب تغفر لي وترحمني
يا رب يا خالد تستاهل اللي سويته في محمد عشانك
.........................
انا لازم ارجع لحياتي الطبيعيه بعد ما انقطعت عن الناس
لازم ارجع لدراستي
لازم ارجع لاهلي وصديقاتي
ولازم استرجع ما هو ملكي من مرام
خــــــــــــــالد
.................................................. ...........
كلمت ريم وطلبت منها انها تخليني اقابل خالد باي طريقة كانت
لو بالشارع قدام باب بيتهم
ريم ما استساغت الفكرة بالاول ولكن مع اصراري الشديد وافقت
ولكن بعدها قالت
ريم : بس ما يصير اليوم راح تجي مرام هي وامها عندنا اليوم واكيد خالد راح يقعد معهم
هديل : احسن عشان يفك خطبته منها على طول
خالد لي انا وما راح اسمح لوحده زي مرام تاخذه مني
كلامي وتهديدي خوف ريم ولكن وافقت
.................................................. .........................
انا في طريقي لبيت ريم
في طريقي عشان ارد حقي .... ارد ما هو ملكي .... ارد حبي ودنيتي
ارد حبيبي
حبيبي ! اول مره بعمري اقول فيها حبيبي
انا احب !
الفكرة مخيفه
انا ما اقدر احب
انا ما ابي اعيش قصة حب
لا يا هديل لا ..... مو هذا وقته عشان تخافين
لا يا هديل تعيدين اللي سويتيه مع احمد
لا تخافين
كل البنات تحب كل الناس تحب
خالد مو زي احمد
خالد ما ينخاف منه خالد يقدر ...... خالد ما يجرح
خالد يحبني
.................................
وصلت بيت ريم دخلت وجلست بالحديقة استني خالد على حسب اتفاقي مع ريم
جلست انتظر
وطال انتظاري
جلست انتظر مدة طويلة
خمس دقايق
عشرة
ربع ساعه
ثلث ساعه
نص ساعه
وخالد ولا جا
تعبت وانا انتظر
وبعد ساعه الا ربع
اقبل خالد
مشيت باتجاهه واول ما شافني قال بطريقة غريبه
خالد : خير هديل فيه شيء ؟
صاير شيء ؟
هديل : لا ما في شيء بس كنت ابغى احكي معاك بموضوع
خالد : طيب بسرعه لان مرام جايه وما ابي اطول عليها
هديل : خالد انا فكيت خطبتي من محمد
خالد : ايه سمعت ..... خيره
ربي يوفقك مع واحد غيره ويسعدك ان شاء الله
ويهديك ويهدي الجميع
نصيب ومحمد ما كان نصيبك والله يوفقك مع اللي هو احسن منه ان شاء الله
هديل : انت احسن منه...........
خالد : .............نعم ؟
هديل : انت اللي احسن انت اللي انا ابغاه
انت اللي انا تركت محمد عشانه ........... انت اللي انا احبه
خالد انا احبك
خالد انا ...........
خالد : بس يا هديل لا تكملين ..........
هديل انا خاطب مرام واحبها
وانتي الله يوفقك مع واحد غيري
هديل : بس يا خالد انا احبك .......... وانتا تحبني انا اعرف انك تحبني
عارفه انك تحبني من يوم ما احنا صغار
خالد انا حلمك من يومك صغير
خالد انت تبغاني وتحبني وانت عارف هالشيء
خالد لا تنكر لا تكابر
خالد : وتو ما فكرتي تحبيني ؟ .............
تو ما فكرتي تعترفين ؟
تو ما فضيتي ؟........
مو انتي اللي عنيده وتفخرين بعنادك ؟
دامك عارفه اني احبك من زمان ليش انخطبتي لمحمد ؟
هديل للاسف انتي في يوم كنتي تعنين لي شيء
بس الحين انتي فترة وعدت من حياتي
خلاص شمسك غابت
خذتي فرصتك وزياده
وعن اذنك انا تاخرت على مرام
هديل : يا خالد دقيقه بس اسمعني
خالد : وفري كلامك ..... لان انا ما عندي كلام ثاني
مشا خالد وتركني بعد ما هدني بكلماته
مشا وخلاني واقفه بروحي
مشا وراح داخل البيت يبي يشوفها يبي يشوف اللي سرقته مني
وقفت ما اعرف ايش اسوي جلست ابكي من الحره
ابكي من القهر
اتهواني يا خالد ؟
بربك كيف تاذيني ؟
كيف تجرحني ؟
انا انهزمت ؟ انا خالد تركني وفضل علي مرام ؟
كذا يا خالد تسوي فيني ؟
وانا واقفه ابكي لمحت من الشباك اللي قدامي المجلس اللي كان خالد قاعد فيه مع مرام
شفتهم وهم يضحكون ؟
يضحكون علي ؟ ولا يضحكون مبسوطين انهم اجمتعو اخيرا
خالد يحبها هي مو انا ؟
خالد حبها عشان قدرته وقدرت حبه اما انا لا ؟
خانتني دموعي وخانتني قوتي وشجاعتي
وانهزمت
~* جلست اذكر امانينا ودمعي جرح اجفاني تذبحني اغانينا وهو قاعد مع ثاني
تضم ايدينه ايديها كان اليوم ذا عيده وانا دمعي على خدي وهمي والزمن ضدي *~
منقووووووووووووووول</font>
رد مع اقتباس
مواقع النشر (المفضلة)