<font color='#FF0000'>الحلقه السابعه...
في بيت بو حمدان...البيت ولا كأنه مملكه..من النظام والترتيب وكل شي فيه مبهر وملفت للنظر..يعني صدق شغل متعوب عليه..
عليا: ليندا تعالي يالله بسرعه...
عايشه: شو تبينها..؟؟
عليا: عنبو لو حد يا ما درينا به الباب مبند..خلها تسير تفتحه..
وشوي الا وبيت خالهم يوصل..ودخلوا وسلموا عليهم وضيفوهم...وكان وياهم بنتين فاخره 22 سنه..وسهيله 17 سنه..المهم يسلوا في الصاله وسوالف..
فاخره: ما شاء الله يا عليا عيني عليج بارده والله هاللي بياخذج امه داعية له من الخاطر..
عليا وهي مستحيه: بس عاد خل عنج المبالغات..
فاخره: ما علينا دومج متواضعه..الا اقول منو عازمين اليوم..؟؟
عليا: والله محد بس انتوا وعمتيه عوشه و بيت جيراننا...
فاخره: زين تبونا نسوي شي وياكم ولا مخلصين كل شي..
عليا: قومي عيل بنسير المطبخ نشوف كيف رتبوا الاشياء..
...............................
في بيت بو سيف نزلت ظبيه عند امها..وهي يالسه في الصاله ومنسدحه لروحها..
ظبيه: امايه..
ام سيف: هلا يمه..
ظبيه: امايه بغيت اقولج اني بسير بيت جيراننا عندهم حفله..عادي اروح..
ام سيف: هيه غناتي سيري واستانسي ويا البنات..
وصدت ام سيف بويهها بعيد شوي عن بنتها..ظبيه ما حست ان في شي وطلعت فوق تغير ملابسها وتمت ام سيف تبكي تحت وتتوجع وهي منسدحه ما يدري بها غير رب العباد..ونفسيتها تعبانه وهي كبرت في السن وحاسه ان الكون ضايق عليها..هذا غير الالامها الجسديه..
تلبست ظبيه ونزلت وحطت شوي ميك اب خفيف..
ظبيه: امايه شوفيني جي شكلي مقبول..؟؟
وما صدت ام سيف ولا تحركت وهني عرفت ظبيه ان امها راقده..وما طلعت من البيت تتريا متى تنش لانها ما تبي تظهر قبل لا تقولها انا ظاهره..
وقربت ظبيه راسها من امها وهزتها شوي..
ظبيه: امايه نشي يالله المغرب اذن ما تبين تصلين..؟؟
بس ام سيف ما ردت..
ظبيه بدت تخاف: امايه قومي ...
ودمعت عين ظبيه من الخوف وحست برجفه في جسمها...
وشوي الا وام سيف بطلت عيونها...وقامت مستغربه..
ام سيف: شو فيج غناتي..
ولوت ظبيه على امها وتمت تصيح...
ام سيف مستغربه: ظبيه شو مستوي ليكون حد من اخوانج صار فيه شي.؟؟
ظبيه وهي حاضنه امها : لا امايه ما في شي..امايه انتي تعبانه؟؟؟
ام سيف: خلها على الله يا بنتي والله ظهري بينكسر من الالم..الا ليش ما تروحين..؟؟
ظبيه مبتسمه:الحين بروح ..
وقامت ظبيه وسارت بيت عبد الرحمن..
................................
الشباب متيمعين عند شاطئ الراحه..سوالف وضحك وقت الغيبه..لين ما اذن المغرب..وفي الدرب وهم رادين سيف في سيارته البي ام اللي تصك القلب ويا اخوانه احمد وعيسى..
عيسى: فنان هذا سعيد..
سيف: هيه ما شاء الله عليه راعي سوالف..
ويدق تلفون احمد رنه وحده بس..
احمد: هاه ابويه عافانا الله مسوي لي رنه..
ويضحكون..
يتصل احمد: هلا ابويه..
بو سيف: وينكم انتوا وين تهيتون..؟؟
احمد: نحن هني عند شاطئ الراحه ..خير الحين بنييك..
بو سيف: يالله تعالوا..بسرعه.
احمد: ليش في شي ؟؟
بو سيف: لا تناقشني ما في شي بس تعالوا غابت الشمس وانتوا برا..
وبند بو سيف ..
احمد: شو فيه هذا يتحرانا يهال ولا شو..
سيف: انت لا تقول له أي شي كلما قال لك شي قل له حاضر تم انت امر بس..
عيسى: لين متى ؟؟
احمد: لين...
وسكتوا كلهم..
........................
في بيت بو حمدان الدنيا مشتله و ظبيه يالسه على كنبه بعيده في الصاله بروحها...والكل مشغول..
ويت صوبها سهيله..
سهيله: السلام عليج..
ظبيه مبتسمه: وعليج السلام..
سهيله: اكيد انتي بنت جيرانهم صح؟؟
ظبيه: هيه...
سهيله: انا بنت خالة عليا وعايشه والباقي..
ويلست عدالها سهيله وسوالف لين ما يت عليا وعايشه وشمسه واسماء وفاخره..وقعدوا وياهم و كانت ظبيه بتموت من الخجل من نظراتهم صوبها..وخصوصا نظرات فاخره وسهيله الغريبات..
وقامت عليا وعايشه وفاخره المطبخ..
فاخره: استغفر الله شو هالاشكال اللي متعرفين عليها..؟؟
عليا باستغراب: حرام عليج يا فخوور شو هالكلام اللي تقولينه..
عايشه: افا يا فخور نحن الناس اللي يوون بيتنا نعدهم منا وفينا لا ترمسين عنهم ونحن في الاخر سواسيه بس في ناس ظلمتهم الدنيا ..
فاخره: يالله وايد حساسات..
عليا: بليز البنت تونا عارفينها ما في داعي للنظرات والغمزات ..بليز عشان خاطري فخوور..
فاخره: اوكيك..
وردن للصاله ووصلوا بيت عمتهم..وحطوا الاكل على السفره ويوم قامن البنات رمسة فخور..
فاخره تهمس لعليا: شو اسمها ؟؟
عليا: ظبيه..
فاخره تقرب منها: ظبيه لو سمحتي الغاليه ممكن تنزلين عباتج..؟؟
ظبيه بخجل: لا ما في داعي..
فاخره وهي تتكلم بطريقه غير طبيعيه وكأنها تبي تفشل ظبيه: يالله عاد ظبيه كلنا حريم..ولا ما تبينا نشوف لبسج الحلو..
عليا وعايشه كانن قاعدات يطالعن بعض بتوتر...ويشوفن فاخره يالسه تحرج ظبيه..وقامت شمسه الصغيره..
شمسه: فاخره البنت ما تبي ما في داعي تفرضين عليها شي ما تبيه..خليها على راحتها..
وسكتت ظبيه..
فاخره: اوكي سوري..
وسارت ويلست مكانها..وقربوا على الطاوله كلهم..وما مدت ظبيه ايدها وحست العبره خانقتنها..وخاطرها ضايق وتندمت انها يت..
وعقب ربع ساعه عشان محد يحس استأذنت ظبيه من عليا وردت البيت..
وعلى طول دون ما تشوف حد..سارت فوق وطاحت فوق شبريتها وتمت تصيح وهي بعدها لابسه عباتها..ظبيه الانسانه الكتومه الغامضه ما قدرت تتحمل التنغيزات..وكرهت عمرها..وتمت تصيح وتصيح طول الليل لين ما رقدت من التعب النفسي وهي بعدها ما شلت عباتها ولا بدلت ثايبها...

الحلقة الثامنه...
مرت الايام وخطب سيف مريم..وحددوا موعد العرس اللي تقرر انه يكون عائلي..لان بو سيف قال ان ما فيه شده على الضيوف..المهم ان سيف كل يوم والثاني عافد بيت عمه بو مايد ومحتشر..يبي يعرس...وفي بيت بو سيف..
عيسى: ظبيه وين امي .؟؟
ظبيه: صوب الميالس يالسه تنظف..وانا بسير الحقها الحين..
عيسى: ما يسوى علينا هالعرس ..من خطب سوااف وانتوا محتشرين محد بيعرس الا ولدكم..
ظبيه: والله محد مظلوم في هالدنيا الا امايه..اللي وحليلها كبرت وما تروم تشل شغل البيت كله..
عيسى: والله انا روحه راتبي ما يكفيني وهو ياخذ اكثر عن نصه ولا جان عطيتها الباقي ويبنا شغاله...
ظبيه: يا ليتني سجلت صيفي..؟؟
عيسى: مب مشكله السنه اليايه..يالله سيري لامايه اكيد يالسه تشتغل بروحها..
وطلعت ظبية وسارت عند امها واول ما دشت الميلس لقت امها يالسه على الارض تتنفس بسرعه وحاطه ايدها على صدرها...وتتأوه..ولفت صوب كبت كبير حاطين عليه التلفزيون..وشافت انها سحبته بروحها وحركته من مكانه كامل...
ظبيه وبصوت شوي عالي: امايه ليش تسوين جي .؟؟ ليش ما تريتيني..؟؟؟ ليش شليتيه بروحج..امايه انتي كبيره مب حمل هالاشياء...
ام سيف تتنهد بصعوبه: يالله يا ظبيه كملي الباقي لين ما يرد لي نفسي شوي...
وقامت ظبيه تحاول تنظف تحت الكبت..وتمسح الغبار..ويوم خلصت جربت انها تسحب الكبت مكانه...وما قدرت حتى تحركه شبر ولفت على امها اللي قامت تنظف الدرايش وتمسحنه من الغبار..
ظبيه بغرابه: امايه انتي كيف سحبتيه بروحج..انا ما رمت احركه حركه وحده..
ام سيف: ظبيه يالله اشتغلي وخلي الهذربه ورانا شغل وايد..
...............................
في بيت بو مايد..مايد يالس ويا مريم يسولفون في غرفة مريم...
مايد: يا حيك يا سيف والله ..
مريم: على شو ؟؟
مايد: انتي تبينه وهو يبيج..
مريم: وانت ترمس عن ظبيوه الخبله..والله ما ادري شو تحب فيها...
مايد: حرام عليج يا مريم والله اني احبها من كل قلبي فوق ما تتصورين..وليش ترمسين عنها جي..انتي ما تحبينها..؟؟
مريم: والله احبها واشفق عليها بنفس الوقت..بنت كتومه وقلبي يعورني عليها..تحب الصمت وتكره تفضفض لحد..احس قلبها كاتم على كل هموم الدنيا..
مايد: افديتها يا ربي والله خاطري افتح قلبي لها واقول شوفي يا ظبيه ..محد هني غيرج..واراويها كل الجروح واقول لها ترا انتي اللي تجرحينه وانتي اللي تداوينه ...
مريم: الله الله يالشاعر الله عليك..من متى وانت هيمان لهالدرجه...
مايد: ويييييه من زمان..
مريم: اوكي يالله سمعني شي من قصيدك..
مايد: بسمعج شي كتبته فيها يوم شفتها ونحن سايرين عزبة ابويه الله يرحمه..
مريم: يالله انزين ..
مايد: يا حسين اللون والنظره..يا قمر في حزة ظهوره..يا ذهب يا زهرة الاسره..لي شذاها تنفح عطوره..يا بدر خمسه على عشره..لي ينير الكون من نوره..
مريم: صح لسانك يا الشاعر ما فيك حيله يا ولد خادم..
مايد: احم احم صح بدنج اختي الغاليه..سمعينا قصيدج..
مريم: ههههههه وانا شعرفني بالقصيد يا مايد..جانك تبي القصيد سير عند شاعر العربان كلها سيف بن سالم ولد عمك..
مايد: هيه من حقج ..اذا السالفه فيها سيف..اكيد بيكون شاعر حتى لو ما يخصه بالشعر..
مريم: يالله خل عنك الغيره والهذربه قم يالله العشا يأذن بسير اصلي..
وطلع مايد من عند مريم اخته وسار صوب حجرته..وطلع كل الالبومات..ويلس يطالع صوره ويا سيف وعيسى يوم كانوا صغار وبسرعه تم يقلب ويلس يطالع صورته وياغزال حياته..يوم كان ويا ظبيه..ويالس يطالع الصوره بكل لهفه وشوق.."اااه يا ظبيه افديت قلبج..متى بتحسين فيني ..يا ليتني ادري باللي في قلبج بس..وادري ليش عايفتني..ااه افديت روحج والله "وضم الصوره لصدره وتم يتنهد.." والله بعدها هالنظره الغريبه الصامته الكئيبه في عينج من وانتي طفله لليوم.."
ورد الالبوم تحت الكتب واوراق الشغل وسار المسيد يصلي العشا..
.................................
في غرفة حمدان..يالس يرتب الاوراق ويعدل ويوقع على بعض الملفات...دخلت عليه عليا ويلست عنده..
عليا: حمدان فاضي..؟؟
حمدان: يعني ..
عليا: زين انا برمس وانت اسمعني..
حمدان مبتسم : اوكي..
عليا: حمدان ما تبي تعرس..؟؟
رفع راسه وتم يطالعها..باستغراب..
حمدان: ليش عندج عروس..؟؟
عليا: محد معين انت اتخير ونحن بنخطب لك..
حمدان: مب وقته انا الحين ما ابي اخذ وحده واظلمها ..انا ريال مب فاضي للبيت وراي اشغال ما تنعد..
عليا: بس تعرف انا في بالي وحده والله بتعيشك احلى عيشه..هاديه وما تشتكي ابد وفوق كل هذا جامعيه وربة بيت سنعه..وصبوره لابعد الحدود..
حمدان: الله الله..منو هاي الكامله والكمال لله..؟؟ما شي بنت في هالزمن جي..
عليا مبتسمه: بلى ظبيه بنت جيراننا..
تغيرت ملامح حمدان وعقد حياته وتم يطالعها باستغراب وهد اللي في ايديه..
حمدان: شو تقولين انتي..؟؟
عليا: ظبيه بنت سالم بو سيف..
حمدان: شو يالسه تخرفين انتي ..عليووه خل عنج السوالف البطاليه..انا فخور ما خذيتها بنت خالتي بنت الحسب والنسب....تبيني اخذ وحده بنت واحد حافي منتف يموت عالدرهم...
عليا وملامحها بدت عليها العصبيه: انت اللي شو يالس تقول..؟؟انا ما اعرف كيف فتحت معاك الموضوع ما توقعت تفكيرك يوصل لهالدرجه...
وطلعت من عنده وهي متضايقه بتنفجر من القهر..
عليا انسانه بمعنى الكلمه حساسه وطيبه مثل امها المرحومه..ما غرتها الدنيا ولا غرها مال ابوها..كانت متواضعه لابعد الحدود..وربت خواتها الصغار على هالتفكير ..ولا خلتهن يفكرن انهن شي فوق الناس...</font>