<font color='#F660AB'>السلام عليكم ..
اشحالكم ؟؟ عساكم بخير ..
حبيت اني انزل لكم اول كتاباتي وهي(انساك كلمه مالها اية وجود بمرجعي ) و اتمنى انها تنال اعجابكم ..
عائلة عبدالله سعيد( ابوسعيد )
ابو سعيد
ام سعيد
سعيد (24 سنه )
سلامه ( 20 سنه )
عفاري ( 17 سنه )
احمد ( 10 سنوات )
حصه ( 3 سنين )
عائلة راشد سعيد ( ابو حمدان )
حمدان (22 سنه )
عنود ( 17 سنه )
فهد ( 13 سنه )
عائلة خليفه سيف (ابو مريوم )
مريوم ( 18 سنه )
سالم (12 سنه )
عائلة علي سيف ( ابو محمد )
محمد ( 24 سنه )
راشد ( 19 سنه )
ميثوه ( 17 سنه )
ناصر ( 12 سنه )
الشخصيات
عبدالله سعيد ( ابو سعيد ) و راشد سعيد ( ابو حمدان ) يستوون اخوان
عائلة خليفه سيف (ابو مريوم ) و عائلة علي سيف ( ابو محمد ) يستوون اخوان
و ام سعيد و ام مريوم يستون خوات
---------------------------------------------------------------
ام سعيد : عفاري عفاري تعالي وينج ؟ ما تسمعيني ازقرج
عفاري : هاها امايه
( وتطلع عفاري من حجرتها و تنزل تحت الصاله اتشوف امها شو تبا منها )
عفاري : ها امايه بلاج اتصارخين
ام سعيد : اعنبوه سنه لين ما اتوايبين عليه .. تعالي تلفون حقج
عفاري : سوووووري امايه كنت عالنت
( وتاخذ عفاري السماعه و اتروح بعيد عن امها )
عفاري : هلاوالله عاش من سمع هالصوت
مريوم : اهلين شحالج ؟
عفاري : والله تمام و انتي شحالج ؟
مريوم : يسرج الحال
عفاري : وينج البارحه اتصل بيتكم محد يرد
مريوم : هي كنت بيت قوم عمي اذاكر ويا ميثوه
عفاري : هي .. انزين اقولج متى بتوون دبي تولهت عليج
مريوم : ان شاالله باجر
عفاري : هي زين عيل انا الحين بخليج يالسه عالنت و مخليتنه مفتوح
مريوم : اوكي خلاص عيل في داعة الله
عفاري : باي
مريوم : باي
وسكرت عنها و راحت عفاري حجرتها .. و شافت شئ ما توقعت انها اتشوفه
عفاري ( معصبه ) : حصيص الله يغربل بليسج شو اتسويين
( عفاري كانت واصله حدها من اختها الصغيره حصه اللي كانت اتعابل بالكمبيوتر و كانت مبطله فيشت النت .. حليلها ياهل و ما اتعرف شو هالأشياء )
حصوه : عفاالي اثثو فيج
عفاري بعصبيه : لا عيوني ما فيني شئ .. على كل اللي سويتيه و تقولين لي شو فيج يله برع برع
حصوه ( وبدت اتصيح ) : مامااااا ماماااا ثوفي عفاالي
و اتروح عفاري و اتيودها من ايدها و اتطلعها برع الحجره و اتسكر الباب
في بيت ابو مريوم :
مريوم يالسه في الصاله ويا امها و اخوها سالم :
مريوم : امايه باجر بنسير بيت قوم خالوه ام سعيد
ام مريوم : هي ترانا من زمان انعدي بهم .. خلينا انسير انسلم عليهم و انرد
مريوم : اهاا لانه عفاري توها كانت اترمسني و تنشدني اذا بنيهم و لالا
سالم : امايه انا بسير وياكم احمد ولد خالوه قايللي انه شاري اشرطه play station يديده
مريوم : و انته و حمود ما عندكم شغله غير هالــplay station
ام مريوم : يا بنتي برايهم خليهم يستانسون .. تراج سايره لعفاري وخليه يسير لخوها يلعب معاه
مريوم : اووووه كيفج وياه انا بسير ارقد الحين
ام مريوم : هي سيري و انته وراك مدرسه بعد يله سر ارقد
سالم : امايه انا باجر مب ساير المدرسه
ام مريوم : ويديده و ليش عاد ؟؟
سالم : امايه حمود و لد خالوه يوم يبا يغيب الاّ انا
مريوم : احمد اصغر عنك اهو صف رابع ابتدائي و انته سادس شو وداك له هو ابرايه يغيب
ام مريوم : انتي مالج خص سيري ارقدي انتي وياه و غياب مب غايب ولا والله بخبر ابوك عليك
سالم : افففففف انزين بسير
وكل واحد منهم راح حجرته يرقد
يالسه في حجرتها اتفكر تزقر بنت عمها اتفهمها كم من مسأله في الرياضيات مب فاهمتنهم .. كانت ميثوه وايد و يا مريوم بنت عمها يمكن لانهم في نفس الصف .. و مريوم دايما تيي بيت قوم ميثوه لانه بيت عمها .. وفجاءه حد دق عليها الباب و قطع حبل افكارها :-
ميثوه : امنوه
راشد : ممكن ادخل ؟
ميثوه : تعال راشد حياك
كان راشد اخو ميثوه العود اكبر منها بسنتين وكانت وايد جريبه منه:-
راشد : شو تسويين ؟
ميثوه : ماشئ
راشد : انزين ياي اوصل لج سلام من محمد اخويه
ميثوه : فديته محمد شحاله ؟
راشد : يسرج حاله
ميثوه : وشو الدراسه وياه و شو اخبار بريطانيا
راشد : والله يقول اممشي .. واسبوع و بيرد البلاد
ميثوه : قول والله احلف انته بس .. فديته متولهه عليه مووووووت
راشد : انزين انا بسير الحين
ميثوه : هي و انا برقد وراي مدرسه باجر
وطلع راشد من عند اخته ساير يرقد وراه كليه باجر
وبيت قوم ام سعيد الساعه 7: 30 الصبح
عفاري : امايه انا سايره تامريني بشئ ؟
ام سعيد : لا في داعة الله
عفاري : سلامي يله بسج اكل خلينا انروح
سلامي : انزين يله
عفاري : امايه وين حمود
ام سعيد : يقول تعبان ما بيسير
سلامي : امايه انتي وايد امبزيتنه دووم يغيب
ام سعيد : خلنه على راحته ما ابا اغصبه على شئ
سلامي : انزين مع السلامه
و تطلع سلامي و عفاري مع بعض كل وحده رايحه لدوامها .. سلامي رايحه الكليه اما عفاري رايحه المدرسه اللي هي آخر سنه لها
في المدرسه ( العين ) :
ميثوه و مريوم في نفس الصف وييلسن عدال بعض في الصف و هن كانن بعد ثنويه عامه :
ميثوه : اففف ملل هالحصه
مريوم : هي الحين قولي ملل و باجر اتصلي لي و قولي لي تعالي بيتنا فهميني
ميثوه : مريوم جد عن السخافه
مريوم : اسكتي الله يخليج ابا افهم
ميثوه : اسميه عله هالرياضيات
ابلة الرياضيات : ميسا و ميريم .. ايش فيكنن تيتكلمين اسكتن خلني اشرح الدرس كويس
مريوم و ميثوه : ان شالله ابله
( ويدق الجرس و يطلعن البنات للفسحه )
ميثوه : مريوم تعالي اليوم بيتنا .. ابغيج اتفهميني رياضيات
مريوم : لا عيوني انا بسير دبي اليوم عند عفاري
ميثوه : هي .. عفاري ودي اشوفها من زمان مب شايفتنها حليلها
مريوم : ما عليج انا باجر الصبح بييج و بفهمج و بحاول اييب صورة عفاري
ميثوه : اوكي خلاص خلينا انسير الصف
مريوم: يله
في بيت ابو محمد ( الظهر ) :
كانت العايله كلها متيمعه عالغدا و كانوا وايد مفتقدين محمد اللي كان مسافر بعثه يدرس فيها في بريطانيا من 4 سنين :-
ابو محمد : ها راشد رمست خوك ؟؟؟
راشد : هي بويه و يسلم عليكم كلكم
ام محمد : وايه فديته والله اني متولهه عليه فديته
ميثوه : ما عليج امايه ما بقى قد اللي راح
ناصر : هي بويه انا بعد يوم بخلص بسافر برا ادرس شرات محمد
راشد : انته خلص ابتدائي اول .. توك سادس عقب فكر في الدراسه برا
ميثوه : هي والله
ام محمد : فديتك ما فينا لا تروح يسد خوك ساير من 4 سنين و تيي انته لالا ما نصبر عليك انته خص آخر العنقود
ميثوه : راشد شوف امك ادلع خوك
راشد : عادي بس انا غلاتي غير .. ما تظهرها تخاف يحسدوني كثر ما انا غالي
ميثوه : حليلك راشد مصدق عمرك
و تمو يسولفون بسوالفهم اللي ما تخلص
كانت يالسه اتعابل في المطبخ تطبخ حق مريوم .. و كانت مستانسه انها بتشوفها :
عفاري : افففففف حرقت لي صبوعي هالكيكه
ام سعيد : محد طلب منج
عفاري : لا امايه مريوم تيي ولا اسوي لها شئ ما يستوي
ويدخل عليهم سالم :
سالم : خالوه انا ييت
عفاري : هلا والله سلوم شحالك ؟
سالم : ايه شو سلوم ؟
عفاري : هههههههاااي
ام سعيد : هلا ولديه شحالك ؟
سالم : بخير .. امايه و مريوم يدورونكم
عفاري : انا بسير لهم
وراحت عفاري الصاله عند مريوم و امها
عفاري : هلا مرااايم شحالج
مريوم : يسرج الحال انتي علومج ؟؟
عفاري : والله طيبه .. شحالج خالوه ؟
ام مريوم : الحمدالله
عفاري : وينكم شو هالقطاعه ؟
ام مريوم : و الله يابنتي مشاغل الدنيا ما تخلص
عفاري : هي والله خالوه
ام مريوم : وين امج ؟
عفاري : هاكي يايه ورايه
ويت ام عفاري و تمو يسولفون الحريم .. اما عفاري و مريوم راحن حجرة عفاري يسولفن
في حجرة عفاري :
مريوم : ميثوه اتسلم عليج واااااااااايد وايد وودها اتشوفج
عفاري : هي حليلها من زمان مب شايفينهم اظني من سافر محمد خوهم
مريوم : بل عليج 4 سنين ليييش ؟
عفاري : ما ادري والله هم ما يقربولي وايد .. من بعيد يعني مافي داعي دايما اسير لهم
مريوم : و امج ما اتسير لهم ؟
عفاري : امبلى امي تسير بس يوم تروح انا يكون شئ وراي يا امتحان او متواعده ويا ربيعاتي
مريوم : اهاا .. شو رايج اتروحين وياي اليوم و تردين يوم الجمعه منها تطلعين من البيت ومنها اتشوفين ميثوه و اتشوفج
عفاري : لا وراي اشياء واايد .. المس طالبه من بحث و عليه امتحانين لا يا بوج ما اروم
مريوم : حرام عشان خاطري و لا مالي خاطر عندج
عفاري : لا والله بس مشغوله بس اوعدج اول ما افضى بيي بيتكم
مريوم : اوكي .. ما راويتيني الصور اللي تصورتيها من اسبوع
عفاري : هي حلوات طلعن .. لحظه بييبهن
مريوم : يله بسررعه
عفاري : هاج يودي
مريوم : ياااااااي جنان و الله ما اصدق انها انتي
عفاري : شو قصدج
مريوم : ههههههههااااااي اقول ها العوده حلوه بشلها
عفاري : لالا اباها
مريوم : يله عاد باخذها
عفاري : انزين بعطيج بس خذي هاي الصورة الشخصيه الصغيره
مريوم : لالا ما ابا هاي .. العوده اللي تبينين فيها كامله برويها ميثوه
عفاري : انزين بس ياويلج اذا راويتي حد غيرها
مريوم : اوكي
ومر الوقت عند البنات و صارت الساعه 9 و تعشو وردو العين و قبل ما يسيرون :
مريوم : يلا باي عفاري
عفاري : مع السلامه ما اوصيج لا تراويين حد
مريوم : افاا عليج اعتمدي
عفاري : باي خالوه باي سلوم
سالم : سالم لو سمحتي
عفاري : ههههههههه سلوم على كيفي
وراحو مريوم و اهلها العين
متملله واااااااايد و شكلها واصله حدها .. تتصل حق بنت عمها مريوم بس محد يرد .. معقوله للحين عند عفاري .. بس ميثوه رددت تتصل بس هالمره حد رد عليها :
ابومريوم : الوو
ميثوه : الو هلا عمي شحالك ؟
ابو مريوم : هلا والله ميثانه .. بخير ربي يسلمج شحالج انتي ؟
ميثوه : الحمدالله .. عمي وين مريوم
ابومريوم : ما ردت من عند خالتها
ميثوه : هي قولها اني اتصلت و ابغيها ضروري
ابو مريوم : ان شالله بنتي
وسكرت ميثوه عن عمها و راحت الصاله و لقت ناصر اخوها يجلب هالقنوات .. كانت ادور راشد
اللي كان الوحيد اللي فاهمنها في هالدنيا و يوم اتمل اتسير له
ميثوه : ناصر وين قوم امي و راشد
ناصر : امايه سارت عند يارتنا ام سعود و بويه في الميلس وراشد اظني في حجرته يذاكر
ميثوه : خل اتصل به اشوفه وين
وتتصل به :
راشد : الوو
ميثوه : الو راشد وينك اباك ؟
راشد : هني في حجرتيه
ميثوه : اوكي يايتنك
راشد : اترياج
ميثوه : اوكي
وسارت صوب حجرته ودقت الباب و دشت :
ميثوه تحضن راشد و اتحبه
راشد كان خبال كان توه متسبح و تم يذاكر .. كان خبال شعره طويل شوي .. وقصته مبلله على عيونه ..
راشد : هلا والله وينج مب شايفنج اليوم
ميثوه : متملله من مريوم
راشد : مريوم هههههههههههاااي حليلها بلاها ؟
ميثوه : قاهرتني سايره دبي عند عفاري بنت خالتها و انا متملله بدونها
راشد : ما عليه خل تييج باجر
ميثوه : انزين هي قالت لي جي
راشد : خلاص عيل ما في داعي الحلو يتضايج
ميثوه : اونك عاد انزين شخبارك بعد ؟
وتمو يسولفون سوالف عاديه و يمر الوقت بدون ما يحسون به
يالسه في حجرتها اتذاكر من بعد ما راحت عنها مريوم .. اللي يتها و ما خلتها اتسوي شئ الا يالسه و اتقرقر عليها من سوالفها اللي ما تخلص
بس حد دق عليها الباب :
عفاري : منو؟؟
:......... ( محد رد عليها )
عفاري : منو ؟؟ حمود لا تستهبل ( بس بعد محد رد )
وراحت و فتحت الباب و شافت حصوه اختها الصغيره شاله و ياها ورده و منزله راسها .. بس عفاري كانت بعدها متضايجه منها من سالفة امس :
عفاري : نعم شو تبغين ؟
حصوه : عفالي ثوووووري ( سووري ) والله ثوولي ما اثوي مله ثانيه
عفاري اتسير و تحضن حصوه و اتبوسها : فديتج والله بس ما تسوينها مره ثانيه
حصوه : هي ما اثوي موووول
عفاري : فديتج
حصوه : انتي ما ذعلانه
عفاري : لا مب زعلانه
حصوه : انذيين هاذي ولده ( ورده ) حقج قثيتها ( قصيتها ) من الحديقه برع
عفاري : شكرا حياتي
حصوه :عفوا ( وركضت راحت برع الحجره )
عفاري وااايد استانست من اختها لانها عرفت اتصلح خطأها
انتظروا الحلقه اليايه و احداث يديده ..</font>
رد مع اقتباس
مواقع النشر (المفضلة)