الزواج من أجنبيات ... <img src="http://oasis.bindubai.com/emoticons/devil.gif" border="0" valign="absmiddle" alt=':dev:'>

يمكن اتفلسف وايد في ها النقطة لكنها بصراحة مهمة جدا خصوصا إنها منتشرة في مجتمعنا وايد وسببت الكثير من الخلل .. والعقد .. والاختلاف في الآراء .. وانا بتكلم عن الأجنبيات بشكل عام من عربيات وأجانب ( هنديات وفلبينيات وأمريكيات وأوروبيات والكل )

أولا .. الشباب يتحججون بغلاء المهور .. ويمكن هذي مشكلة كانت كبيرة لكنها صغرت وايد هالأيام .. والبنات في منهم وايد يدورون على الستر والحياة الكريمة .. واللي يدور بيلاقي ..
ثانيا .. الشباب عيونهم اربع وعشرين ساعة على الفضائيات العربية والأجنبية وطبعا اللي يشوفونه يخليهم يعزفون عن بنت البلاد اللي في نظرهم ما تعرف تلبس أو تسوي حركات دلع وغنج مثل الأجنبية .. وما تعرف في الدنيا غير البصل والثوم ..
ثالثا .. الشباب يبون الرخيصة اللي ترضى بأقل شي وهي تحسب ألف حساب للمستقبل كيف بتقشط فيه جيب الريال وهالشي صار وماحد يقدر ينكره .. وشفنا من الأجنبيات اللي مسيطرة على ريلها من الألف للياء وهو مثل القطو جدامها ..

خبروني عاد .. اللي اتزوج من اجنبية كيف حياته؟؟؟ سواء كانت شرقية او غربية .. لما فكر يتزوج هل فكر في المستقبل؟؟ هل كان يبحث عن مجرد جسد يشبع به رغباته او فكر يبني بيت على أسس قوية وقويمة وأطفال بيوون كثمار لهذا الزواج ..
بالنسبة لو حدث مشاكل لا قدر الله .. شو بيصير في الأطفال لو تم الانفصال .. في أي بلد بيكونون .. مع الام او مع الأب .. كيف بتكون تربيتهم في مجتمع غير مجتمعهم؟؟ .. كيف بيواجهوا الحياة و احد الوالدين غايب ؟؟

طيب وبالنسبة للزواجات المستمرة .. وإذا كانت المراة نصرانية .. على أي دين بيتربوا الأطفال .. دين الوالد اللي بيكون في الجواز وهو لاهي عنهم .. ام دين الأم اللي بيكونون معاها في أغلب الوقت ؟؟؟ .. على أي عادات وتقاليد؟؟ شو بتعلمون وهم يشوفون التناقض في التصرفات بين الأم والأب أو المجتمع حواليهم .. كيف التشتت اللي بيكونون يعيشون فيه بيأثر عليهم؟؟ .. كيف بتكون نفسياتهم وتعليقات باقي الأطفال عليهم .. ولما يبداوا يفهموا الحياة شوي شوي .. كيف بيردوا على الأسئلة من اصدقاءهم في المدرسة؟؟ .. امور كثيرة مستقبلية تترتب على هذا الزواج غفل عنها الشباب ..

وانا أعرف ناس ابنهم اتزوج أجنبية نصرانية عن طريق النت وبعد قصة حب كبيرة .. ويابها البلاد وعاشت معاه تقريبا سنة لين ما صار عندهم ولد .. ولما سارت تزور اهلها هناك من خمس او ست شهور .. قالت إنها ما تبي ترجع البلاد لأنها رجعت لحياتها اللي اتعودت عليها طول عمرها .. وألحين شو بيكون مصير الولد؟؟؟

الموضوع كبير وايد ويحتاج نقاش اكثر لكن .. وان شا الله بيكون للحديث بقية بس محتاجين مشاركة الاعضاء.

اختكم عيون السهد <img src="http://oasis.bindubai.com/emoticons/xmas.gif" border="0" valign="absmiddle" alt=':max:'>