مخططاتكم ورحلاتكم في 2012

[الاسطوري]

السلام عليكم ..

طبعا مثل ما انتوا عارفين ان يوم الاحد الياي إجازة في القطاع العام (الحكومي) والقطاع الخاص يعني الويكند صار 3 أيام للي عندهم بالعادة إجازة يومين ونظامهم مب بالشفتات بجانب أن في أعضاء كل ويكند يكون عندهم طلعه ترفيهيه أو رحله أو كشته خفيفه أو تخييم مثلا الخ وغيره في موسم الشتا بالتحديد سواء كانت مع العائلة أو مع الأصدقاء أو مع جهة العمل مثلا وغيره

فحبيت من خلال هالموضوع نشوف خطط الأعضاء والوجهات، الأماكن اللي بتقضون فيها إجازاتكم ولو صار أن تعرضون لنا بعض الصور بيكون شي جميل عشان ناخذ فكره ونستفيد من تجارب بعض لأن عندنا في البلاد في وايد أماكن حلوه ولكن مب الكل يعرف عنها فحلو أن نتعرف على المعالم الموجوده (يعني نسوي ماركتنغ للأماكن اللي نحبها) ونشجع على بعض على السياحة الداخلية نوعا ما

عن نفسي تأخرت في التخطيط لإجازة رأس السنة وللحين مادري شو بيكون البرنامج بس إحتمال الخميس طلعة عاديه ويه الشباب والجمعه طلعة ويه العائله للبر ويمكن السبت أروح أبات في بوظبي منها تغيير جو منها أشوف يدتي بس للحين مب أكيد وعقب بخبركم عن الأسابيع اليايه

وانتوا؟


الاســـطـــوري
أخوكم

[مزن هتان]

عليكم السلام و رحمة الله و بركاته

وين ما ودانا الهوى، ترانا معاه
للحين ماكو خطة و اظن ما بنطلع برع دبي
جان طلعت منه و الا مناك بنصور =) و بنرفع لكم اياه هون
بإذن الله تعالى


شكراً

[مايهزك ريح]

انا ولله الحمد ساير العمره .. ويا الأهل .. بنسير يوم الخميس وبنرد يوم الأحد إن شاء الله ..

[مزن هتان]

مايد، ما شاء الله
ربي يتقبل منكم مقدماً

[حلم الطفوله]

عااااد أنا إجازتي ثلاث إسابيع ولله الحمد ....بس المناسبات الحلوه خلتنا إنأجل السفر هالفتره


إن شاء الله ....احتمال نسير العمره السبت الياي ( مب أكيد )

ما يهزك ريح ^^ بنتشاوف عيل هناك

[ذنـيـنـي]

انا جدولي بيكون حافل ان شاء الله

الخميس اجازة لأني داومت السبت, و ناوي أهيّص بالخميس,
و الجمعة بإذن الله بنصلي صلاة الاستسقاء الصبح و عقب باذن الله بنتحرك صوب مزرعة ولد عموه في مصفوت, بنبات هناك
و السبت الصبح بتحرك ويا عيال عمي و بعض الاصدقاء الى خصب, بنخيم هناك
و عندنا هناك صديق عزيز جدا علينا, شحي من قرية بخا حليله من متى يقولنا تعالوا
مجهزلنا الطراد و ان شاء الله بندش البحر وياه و بنرجع مساء الاحد
و بينتهي الحلم الجميل و بنرجع للدوام يوم الاثنين

[خيال الحب]

ذنيني مانصحكم تدخلون البحرر هالايام.. انا بخصب شفت المووت بنص البحرر ومن يومها قلت توووبة ارووح بالشتااا البحررر

ربي يحفظكم

عني انااا ماخططت لشي @_@ اليوم نازل من الدوااام ومخي بعده مشوش @__@

احتمال نروح العزبة في عوافي نقعد هناك

[حلم الطفوله]

ذنيني !!! برنامج رحلتك رهيب صراحه ....الله يحفظكم

مشكلتنا يا خياااااااااااال إنه ماشي عدنا خيارات غير عوااااافي ^^

بس برررررد الله يعين إلي بيباتون :)

الله يحفظكم بكل رحلاتكم

[الا انا]

البيت .. المستشفى .. البيت .. المستشفى لول < ها جدولي .. ماروم اتحرك هع

:

بالنسبه لبيتنا ..< حاليا 2 بالمانيا .. ~

الباجين يلي بيكونون فبوظبي ( المزرعه )

وفي مخطط انهم بهالجم يوم يروحون ( الكويت ) < مسابيح ومسابيح !! ماعرف شسالفتهم ..

امي ناويه عالعمره ان شاء الله ~
:

كشخه طلعت الشباب < ذنيني احس وناسه < جان زين انا ريال جان الحين وياكم لول

[مايهزك ريح]

وايدين معزمين ايسيرون العمره نحنا غصب حصلنا حجز .. وايد ظغط .. عشان اجازه راس السنه ..

[مــهــابه]

^
احنا كنا حاجزين من فتره للعمره لمده ٣ ايام ، وكنا ناوين نروح هالويك اند


لگن المستشفى قدموا موعدي لـ ١-١ ف عطيت ختيه التذاكر ..


.



.


وبالنسبه للمخططات بعدنا ماقررنا

[الاسطوري]

"مزن هتان"

أحيدج ماتفوتين إجازه وإلا رحتي إما راك أو العين، يالله إن شاءالله
تكون إجازتكم حلوه وتغيرين جو فيها ويه الاهل

"مايهزك ريح"

عمره مقبوله إن شاءالله وتروح وترد بالسلامه،
أدعي لنا عاد مب تنسى
:)

اعرف وايدين توهم رادين من العمره هالاسبوع احس جيه موسم لأن
اظن هالفترة بس يفتحونها للخليجين ومافي
زحمه في الحرم

"حلم الطفوله"

حلوه الإجازه في الشتا وانتوا اتوقع اجازتكم تنحط لكم ماتختارونها بروحكم
بس وقتها مناسب ومدتها معقوله، إن شاءالله تترتب
الامور وعمره مقبوله مقدما

"ذنيني"

احلى انك ناوي تهيّص لوووول، جدولكم حلو وانتوا ماشاءالله ماتقطعون خصب وللحين أذكر يوم
سرنا رباعه يوم 1-1-2009 هناك بس الجماعه اللي كانوا وياي طلعوا
يحبون التخييم في البرور أكثر عشان جيه
ماتكررت روحتي هناك

"خيال الحب"

انت اكثر واحد محتاي تطلع وترفه عن نفسك بعد الحبس اللي تكون فيه لمدة طويله نوعا ما،
رتب امورك ترا يلسة البيت بعد مرات اتعب الواحد وهاي
فرصه دام الجو حلو

"إلا أنا"

ماتشوفين شر إن شاءالله، ويروحون ويردون بالسلامه اللي بيسافرون عندكم ..
يلسة البيت حلوه في الحوي خاصه مع وجود
حد يخبز لكم


"مهابه"

ماعليه إن شاءالله التقديم فيه خير والله يسهل عليج، قولي لأختج تروح بشرط تدعي لج ..
انتي لاتخططين الحين ونحن بنروح عنا وعنج وشوفي الصور
عشان تبردين على فوادج

[مزن هتان]

وين اهلنا اللي بـ راك شالين عمارهم و يبيّتون بـ عوافي، وايد برد
بتيبس عليهم هناك. عن العين الوالد ما قام يروح ملّ منها شكله
و الريال في هالزمن ما ينترك لحاله ! يختار لنا خيارات تعجيزية
بوظبي و الا صوب الفجيرة و دبا و الا خورفكان !

انا و امي ما نحب نقعد بدبي أحسن

[حلم الطفوله]

عوافي فليل جليييد .... ليله عن ليله بالاسكيموو صراحه !!

جربنا من يومين وما أتوقع أكررها !!

[الاسطوري]

عدنـــــــــــا

بخبركم عن مخططنا للويكند بعد الياي في ليوا
مهرجان ليوا الدولي "تل مرعب"

المهرجان بدا في البداية بفعاليات تحدي للسيارات من فئات مختلفه مثل ماهو الوضع في
مهرجان عوافي وغيره وعقب تطور وصار عباره عن فعاليات متنوعه
على مدار اسبوع كامل وهذا هو جدولهم
لهذي السنه:

الأحد: 1-1-2012 مسابقة السيارات الكلاسيكية وسيارات الريموت كنترول
الثلاثاء: 3-1-2012 مسابة الصقور الفئتين (جير حر وجير شاهين)
الأربعاء: 4-1-2012 سباق الهجن وسباق الخيول
الخميس: 5-1-2012 بطولة تل مرعب للدراجات
الجمعة: 6-1-2012 بطولة تل مرعب للسيارات

طبعا هاي السنه الخامسه نحضر هالفعاليات، أذكر اول مره كانوا الدوام مسوين رعايه ومطرشيني هناك اتابع بعض الاشياء وحاجزين لنا في فندق ليوا وصادف رأس السنة في 2008 طبعا كنت في اليوم اروح مرتين بس لين تل مرعب اللي يبعد حوالي 25 كيلو او شويه اكثر عن الفندق بس مع ان الدرب مرصوف (شارع) بس شويه متعب لانه متموج وكلها اتفاعات ومنحدرات وتقريبا ياخذ 20 دقيقه

السنه الثانيه اللي عقبها وتحديدا في شهر 1 سنة 2009 كنا تونا بادين نطلع رحلات تخييم واقترحت عليهم فكرة انه نروح نخيك هناك والبعض استصعبوها والبعض تحمسوا وقررنا نروح نبات هناك ليلة وحده وبالفعل جهزنا عدة للمبيت هناك ورحنا وخيمنا يوم السيارات شامله وجبة العشا (مشاوي) والريوق خفايف نسويها بروحنا الصبح على الحطب وثاني يوم بعدما تريقنا ردينا

السنه الثالثه تطورنا ورحنا ليلتين شهر 2 سنة 2010 بس كان الجو حار في النهار ولان عندنا دراجات وعدة تخييم افضل اكبر استانسنا اكثر عن المرات اللي قبل وطبعا كل الوجبات نحن نسويها فسوينا غدا هناك واظن كان برياني دياي سواه ربيعنا بو أحمد كعزيمة بمناسبة ولادة ولده أحمد وحضرنا يوم الدراجات ويوم السيارات

السنه الرابعه رحنا 3 ليالي من الاربعا لين السبت وصادف المهرجان نهاية سنة 2010 حتى استغربنا انهم في سنة وحده سووا بطولتين بس كان السبب ان شهر 2 وايد متأخر وفترة راس السنه هي الانسب لان الجو يكون بارد ووايد حلول للتخيم حتى للمشاركين من الدولة وخارجها افضل، طبعا هاي كانت الطلعه اللي استنفرنا فيها كل طاقتنا وعدتنا وتجهيزاتنا وكان اكبر مخيم نسويه في طلعاتنا كلها شامله كل الوجبات، هالمره سوينا اول يوم غدا برياني روبيان سبايسي وايد حلو لدرجة ان كلهم كلوا رغم انه زايدين فيه الفلفل والدموع اربع اربع وثاني يوم ربيعي بو احمد سوى عزيمة بمناسبة ولادة ولده خالد وكان عبارة عن ذبيحه يلسنا نحن نشتغل عليها من الصبح لين قريب العصر حطينا الغدا ووزعنا كم صينيه على المخيمات اللي صوبنا لان الكميه كانت كبيره

طبعا كانت في مسابقة أجمل مخيم وربحنا المركز الثالث لأن مب بس عدتنا تأهلنا لا حتى توزيع الخيم والمظلات واليلسات والرواق/سناح ومكان الطبخ والشوي ومكان تجميع زباله وانتوا بكرامه ووقفة السيارات والدراجات مرتبه وعطونا شيك بمبلغ وقدره XX وكان تشجيع لنا انه نستمر

وايد كان تعب هالمره لان العدد فوق 20 شخص ونحن اللي رحنا 3 ليالي من يوم الاربعا لين السبت تركز علينا الشغل اكثر لان في ناس يونا يوم الخميس وفي بعضهم ردوا الجمعه فالليل فقررنا نراجع حساباتنا وندرس الموضوع اكثر عشان نستمتع اكثر قدر ممكن بوجود المخيم فكان القرار انه نلغي وجبات الغدا لانه تاخذ اكبر مجهود من الحضور في وقت ضربة الشمس فتمنعنا من استغلال الوقت من بعد الريوق لين قريب المغرب وهو احلى وقت ان الواحد يمارس فيه هواياته الرياضيه ويطلع ويتحرك في المنطقه

هالسنه اللي بتكون الخامسه ان شاءالله بنروح مثل المره اللي طافت من يوم الاربعا لين السبت يعني مبيت 3 ليالي وبنحاول نخفف من العده وناخذ الضروري بس والعدد بعد بنحصره للشله اللي دوم نطلع ويه بعض ونخلي وجبة الغدا من مكان جاهز عشان نتدارك اخطاء المرات اللي قبل

http://www.admc.ae/ar/default.aspx


هذا موقعهم للي حاب انه ياخذ فكرة اكثر ويشوف صور للمكان من المهرجانات اللي طافت عندي
صور للطلعات الماضيه بس للاسف من 9 شهور ناسي الباسوورد وللحين مافي
جهه او حد قادر يساعدني اني افتحه :( فلو حد يقدر
يساعدني بنزل لكم صور، اتمنى
ماكون طولت عليكم

عقب بخبركم عن طلعة غولف نيوز (فن درايف) اللي بتكون خلال شهر يناير بعد