ضرس العقل وزراعة الاسنان

[المزوحي]

السلام عليكم

اشحالكم عساكم طيبين ؟؟

مادري لو هالواحه المناسبه لطرح السؤال !

بغيت استفسر عن شيئين ؟

من أيام أحس بويع في الفك السفلي ، كأنه ضرس العقل بيظهر لي

فأحس بألم بحيث إني ماقدر آكل عدل، قلت خلني اسير اشوف عند دكتور

الاسنان، يسون اشعه وإن شاء الله خير

دخلت جوجل وبحثت عن عيادة ظهرت لي عيادة في مدينة دبي الطبية

وأسمها VERSAILLES Dental Clinic

على أساس عند دكتور اسمه كرون وهو فرنسي

يوم وصلت العياده مب موجود، لكن في دكتور ثاني اسمه David Roze

سويت اشعة وقال هذا مب ضرس العقل ، ضرس العقل فوق ( الفك العلوي )

ويضرب في اللثه يوم اتم آكل وبدا المكان يلتهب فسبب لي ألم، والحين

ماشي غير إنه نجلعه هو وربيعه الصوب الثاني شووو

كل هذا فيني


اقترح عليّه إنه يسوي العمليه البسيطه على قولته في عيادة نيكولاس واسب

في جميرا .. وقال : إنه العمليه ماتاخذ غير ربع ساعه للضرسين ولا تحاتي

وماعليك من اللي يقول يعور ، بما إنه الضرس ظاهر وفوق وحالتك بالذات

ماتبغي أي خوف قلت اصفق وإلا شو ؟؟؟




الشي الثاني إنه عندي فراغ تحت، ضرس مجلوع ونصحني بزراعة سن،

مثل ما نصحني دكتور ثاني من 3 شهور ، وانا اترددت وايد اقصد شردت

وقلت مابسوي يعني مابسوي زراعة


قال يحتاي يسون زراعه ، بس هالمره الدكتور اللي اسمه كرون هو اللي

يسوي الزراعه مب أنا ويمكن ياخذ 3 شهور وانا اللي اعرفه 6 شهور

مادري يعتمد وإلا يبغي يقلل المدة

الحين الزراعه صدق يبالها صلاة الاستخاره



حد منكم جرب هالشيئين وبالأخص الزراعه ؟؟

وشو رايكم بالعيادة او الدكتور ؟؟

ولو تبون تفاصيل عن الدكتور بخبركم

خلصت القصه

[شوق القلوب]

السلام عليكم...

والله يالمزوحي ماعندي فكره عن الموضوع... بس اللي بغيت افيدك فيه انه عياده نيكولا ان اسب وايد زينه و احيد عندهم جراح فرنسي.. ما ادري اذا هو نفسه اللي طريته...

ولو انا منك... بصلي استخاره.. و بتوكل على الله..

..

و ما اتشوف شر

[المزوحي]

مرحبا شوق

أنا شفت العيادة في النت واتصلت بهم وقالوا لي تعال

الدكتور فرنسي اسمه Dominique CARON

بس اللي كشف على أسناني David ROZE

وقالي بيجلع ضرسين فوق ، بس مب في عيادته، في عيادة NICOLAS & ASP


وعلى أساس الزراعة عند دكتور Dominique CARON

الشر ما إييج والله المستعان

[حلم الطفوله]

الله يعينك يا أخوي

كله ولا ألم الضرس ....

إنته استشير أكثر من دكتور بالنسبه لحالتك وإن شاء الله تتعافى

[فرفوش]

أسأل أكثر ولا تكتفي بطبيب واحد
وأسال من حوليك عن عيادة أو مستشفى لهم أمتياز وسمعه طيبه
ولوحبذا مكان يمدحه الناس أفضل من مكان لا يعرف عنه الغير أو سمع به
الصحة والسلامة لك وللجميع

[المزوحي]

حلم الطفوله كل واحد على الاستشاره يبغي 500 درهم

الصحه اهم من الفلوس، لكن صاروا ماديين

[المزوحي]

شكرا أخويه فرفوش

يحتاي أسأل

بس إني أتم من 3 شهور لـ 6 شهور وايد

[شوق القلوب]

هييييه.. اضني هو هذا دومينيك...

[حلم الطفوله]

المزوحي ... بالنسبه لخبرتي بالأسنان ارتحت لعياده لكنها بعيده عليك

عيادة أم القيوين للأسنان ( الدكتوره ستاره - ايرانيه )

وايد ممتازه هالدكتوره والكل يتعنالها من كل مكان ومن الصعب تلاقي مواعيد عدها من زود الزحمه

جان قدرت جرب واستشيرها

[المزوحي]

كلامج صحيح حلم الطفولة

بس كنت ابغي في دبي

تعرفين ممكن يكون 20 دكتور ، و 10 منهم احسن الدكاتر

فيوم أنا أسير عند واحد من هالعشره أحس به هو أحسن واحد

وفلان يوم يسير عند واحد ثاني من هالعشره فيحس هو هذا احسن دكتور

فنتم نمدحهم


أكيد بيكون كذا واحد شاطر، بس يعتمد على المكان والسعر والمواعيد


شكرا على الرد

[حلم الطفوله]

العفو أخوي

[المزوحي]

والله احترت باجر موعدي وابغي اكنسله، عندنا الوالده توسوس، وتقول بيقصون عليك ويمكن هاييل مب ضروس العقل

بس اقولها يبين في الاشعه، وثانيا هي حاطه في بالها إنه لازم الضرس يكون مدفون مايكون ظاهر شرات الاسنان العاديه

وسارت سألت لي ونعتوها على دكتور عراقي في حمر عين

يعني اللي من صوبها زين واللي انا بسير له مب زين ^_^

[طير الغرام]

الله يعينــكـ
لو كان الضرس اللي تحت ظاهر فـ الأشعـه وبيظهـر بتكون فتـره وعقب بيخـف الويع
واذا لازم ينجلـع لاحول ولا قوه اجلعـه ،، ضــرس العقــل عادي هب مهم وايد أهم شي الاثنينه اللي قبله موجوديـن

^_^

[المزوحي]

هلا طير الغرام

انا زرت الدكتور على أساس عندي ويع في اللثه تحت، صوب اليمين، كنت افتكر ضرس العقل مدفون، يوم سويت اشعه، طلع مب ضرس العقل، ضرس العقل فوق، بس يتم يضرب في اللثه تحت

وهو ظاهر ويبين، بس ماكنت اعرف إنه ضرس العقل ، فالدكتور نصحني بإنه يجلعه، لأنه في المقابل ماشي ضرس تحت وهو يسبب لي ألم

ويبغي يجعل الثاني اللي من جهة اليسار فوق بعد

بس الوالده تقول ماعليك من رمستهم الدكاتره اصبحوا تجاريين وهي مب واثقه من رمستهم

فاليوم الصبح اتصلت بهم ولقيت الموعد ، لكن باخ موعد عند دكتور غيره

كأنه هو اللي يعرف وبس

شو نسوي !!!

[المزوحي]

السلام عليكم

من كذا سنة زرت طبيب اسنان، عمل لي السن الامامي ، وبضغط من الاهل

عشان أسوي تقويم، استشرته، فقال ما يحتاي، لأنه مابينفعني ، أو مابيبين

إلا 0.1% فالخلاصه خساره إني أسوي تقويم

خذت الاشعه وسرت عند دكتور ثاني، فقال نفس الكلام ..


والحين برجع لموضوعي الأساسي اللي هو ضرس العقل، وزراعة الاسنان

على طاري ضرس العقل، اليوم سرت عند جراح أسنان وشل ضرس العقل

وتم واحد بيجلعه لي عقب أسبوع

وقبل مايجلعه، راويته الاشعه اللي عندي، فعطاني محاضره ، إني احتاج أركب

تقويم، وقلت له إنه من كذا سنه استشرت دكتور تقويم قال مايحتاي ..

طبعا هو ما اقتنع بكلام الدكتور ، قال عقب ماتركب تقويم ، يحتاي يزرعون

ضرس وأظن هو اللي بيزرعه يالله

طبعا من 3 سنوات سرت عند عيادة دينتال سبا في جميرا وقالوا بيسون

تقويم بــــ 30 ألف

بس ما اقتنعت برمستهم يوم قالوا 30 مب كل شي غالي وراقي ، يكونون

صادقين فيه ...

وطبعا من غير انواع التقويم المخفي وغير مخفي

بس لو تعطوني أسامي دكاتره مرتبين يكون متخصص تقويم وأنا من صوبي

ببحث في النت ، وبشوف

الله يعطيني العافيه وما أشوف شر


حقوق الطبع محفوظة