السلام عليكم ورحمة الله وبركاته
يا أهل الخير ... يا شباب الواحات
عيال بلادي ... وإماراتي .. . وأحفاد زايد بن سلطان
كل واحد يتخيل نفسه
قابض الخط ( الطريج )
في عز الضحى العود
أو
تخيل نفسك
راكب السياره وحاس بلهيبها الحارق
لدرجة إنه السكان يلسع شرات لسعة التنور ( كأنكم تسوون خبز ايراني )
أو
تخيل نفسك
وقفت عليك السياره في يوم مشمس ، درجة الحراره فيه وصلت 55
ولا ونيس ولا منقدذ لك في الطريج
ولا دبة ماي تشربها عشان تخفف عليك سهام الظهر
تخيلتو !!
زين
تخيلو هالعمال ... صح نحن مب امكلفين انكد عليهم لأنهم يشتغلون في شركات المفروض توفر لهم كل سبل الراحه أثناء العمل ( تماما مثل اليابان)
بس بما إنهم بشر ...
مثلي ومثلك
وكلنا عيال آدم وحواء
المفروض نفرج عليهم في الدنيا وخصوصا في ظل اللاهوب إلي تتقطع فيه الأنفاس
الزبده يا حلم
حسيت إني وايد لعوزتكم من كثر ما أرمس بس اتحملوني إشوي
الخير منكم وفيكم
حملة الواحات الخيريه أطلقت عليها هالعنوان
وكل شخص يقدر يساهم فيها بيلقى الأجر والثواب من الله سبحانه وتعالي
فكرة الحمله تتلخص بالآتي : إحضار
1- درزن أكياس بلاستيك ( مع إنه البلاستيك مضر بالبيئه بس شو نسوي )
2- درزن دبات مسافي ( صغار )
3- جيسين صمون وكرتون جبن مثلثات
4 - درزن عصير
5- وجان نزل الكرم الحاتمي لا مانع من بعض الإضافات
الطريقة :
1- تحط في كل جيس شيء من هالأشياءات
2- خلال وقوفك عند الإشاره أو مرورك بالشارع أو بجانب مشروع بناء تعطي هالعمال التعبانين من هالأكياس وإنته تبتسم ( من خاطر خاطرك )
3- سبحان الله إذا كان العمل من قلبك وبنيه صادقه بيكون كله في ميزان حسناتك
يمكن الفكره تكون بسيطه ... بس من خلال مشاهداتي لهالفئه من هالعمال حسيت بأنه الله منعم علينا بخير كبير وشغل مريح ( صح نتذمر من الحر ) بس بعد الحمد لله على كل حال
يالله شباب وشابات الواحات ... نشد الهمه ونخلص النيه ونتوكل
ما أقول كل يوم بس حتى ولو أسبوعيا كدفاعة بلا عن نفسكم وأهلكم
وفي ذلك فليتنافس المتنافسون
وربي يبارك فيكم ويجعله في ميزان حسناتكم
يالله !! منو بيشارك ويانا بالحمله ؟
نريد نماذج وصور من الأشياء إلي بتوزعونها في هالموضوع
مب من باب الخقه لا سمح الله ...بس من باب التشجيع للباقين
اموفقين
رد مع اقتباس
مواقع النشر (المفضلة)