شو الافضل من بين الـــرنج، الــبورش و -------------

[المزوحي]

السلام عليكم

حبيت اعرف رايكم بالمواتر

1- رنج روفر
2-اكس فايف
3-بورش كايين

عن تجربه او حتى لو سمعتوا من اقاربكم

لو خيروكم من بينهن شو بتختار ؟



الواحد وايد يسمع ووايد يقرا ، خلنا نشوف هل الواحات شو رايهم !


اللي يقولك الموتر يكد واللي يقول الموتر خرابه

والاخير يقولك يعتمد على الاستخدام
وإذا ماتحب ولا وحده منهم اذكر السبب

[صريح]

باخذها من ناحية الشخص العادي "صاحب الدخل المحدود"
اللي يحاتي التجيكات و التأمين و الامور الثانية


بالنسبة لي و من خلال تجربة كل المواتر و التعامل مع الوكالات فالصيانة و التجيكات

المواتر تختلف اذا كانت بسوبر او تيربو و لا بدون فتقيمي بناءا على المواتر اللي عدنا

رنج سبورت HSE ــ 2008 ( سعر الشراء 315 الف + السيرفس كونتراكت )
اكس فايف 4.8 ـ 2009 ( طلع علينا اب 300 الف مع مصاريف الشحن - و سعره فالبلاد بنفس المواصفات 390 الف )
كايين اس ( بعناه من 6 شهور ) 2007 ( سعر الشراء 290 الف و سعر البيع 150 الف )



تقيمي من 0 لين 5 ..
0 = لا يوجد
1 = غير مرضي
5 = ممتاز

اول شي السعر متقارب بين السيارات من الـ 300 الف لين الـ 400 الف حسب المواصفات

البورش

الفخامة: 4
سيرفس كونتراكت: 0
سعر البيع: 3
الوكالة: 3

الرنج

الفخامة: 4
سيرفس كونتراكت: 4
سعر البيع: 4
الوكالة ( دبي ): 5


الـ X5

الفخامة: 4
سيرفس كونتراكت: 4
سعر البيع: 3
الوكالة ( دبي ) : 4


ما واجهتنا اي اعطال فالسيارات لين اليوم و الحمد لله
بس الرنج اول ما خذنها كان في عيب مصنعي فالقير و عطونا موتر يديد بدالة

و الاكس فايف شارينه من وكالة البي ام في امريكا على الزيو
و انجيكه في وكالة دبي .. وكالة بوظبي ما تجيك على المواتر الواردة و اذا رضو بيعطونك موعد عقب كمن شهر

و البورش الاهل صارلهم حادث فيه و الموتر تم شهرين فالوكالة لين ما توصل قطع الغيار من برع، بس عطونا اودي لين ما يخلص الموتر



بالنسبة لي و من التجربة

المتعه فالسواقة

1 - البورش
2 - الرنج
3 - الاكس فايف


المكدة

1 - اكس فايف ( الموتر موديل 2009 و ماشي فوق 100 الف كيلو )
2 - رنج
3 - البورش



و اذا حد استشارني عن اي موتر ياخذه

1 - رنج
2 - اكس فايف
3 - الكايين

و السبب السيرفس كونتراكت

[المزوحي]

مشكور صريح الله يطول بعمرك ، هذا الرد يثلج الصدر :) الواحد يفهم شو اللي يباه

تدري إنه قريت تعليقات على المواتر، لكن مب في الواحات، فحبيت اعرف من هل الواحات رايهم في السيارات اللي طريتهم

يعني حد يقول الرنج تكد، وحد يقول الرنج عيبها القير والهيدورلك والسكان يتقشر ، في القومه مب شي ولو إنها سياره رزه في الشارع

حد يقول الاكس فايف تنط لأنها رياضيه ( المكيف تعبان مايبرد في الصيف )

البورش تشرب بترول ولازم عندك مبلغ محترم حق التشييك، حلوه من داخل ومن برع مب شي

في حد يهمه هالكلام وفي اللي مايهمه

وأتمنى من البقيه التفاعل عشان الكل يستفيد !

[شوق القلوب]

السلام عليكم...

ماشاء الله... الواحد اللي يبا ياخذ راي.. يستشير صريح ولا ما يسأل غيره...

..

اسمحلي يا المزوحي... لو عندي خبره جان فدتك فيها

[المزوحي]

شكرا شوق القلوب

لأنه نسمع ألف راي وراي والواحد يحتار

حد يقول هالموتر ماعليه كلام والثاني يقول لاتقرب صوب هالموتر

فراي اهل الواحات يهمنا

[فارس شرجاوي]

افضل الرنج

محرك 5.0 لتر تصل قوته إلى 510 حصان

قويه^^

التعديل الأهم لـ رينج روفر 2010 هو توظيف المحرك LR-V8



لوحة العدادات شاشة 12 بوصة TFT

[الـيـاه]

يمكن الاكس فايف ..

بس الصراحه الكايين اليديده اللي نازله هالسنه وايد حلوه .. خاصه من داخل جنها بانميرا
والشكل ما بيتغير الا بعد 6 سنين

اما الرنج احطها اخر اختيار .. الطاير زفتين
وبعدين خلاص الرنج الحاليه وايد جديمه وبيتغير شكلها اظني في 2012 عقب سنه ونص

P.S
شباب لو حد منكم يحطلنا موضوع خاص عن الكايين اليديده بيسوي خير
نبا نعرف معلومات عنها

[المزوحي]

من فتره سرت وكالة الطاير أشوف الرنج، قال الموظف إنها بتتغير على 2012 أما رنج سبورت بعدها والاسعار

320 ألف

[فرفوش]

الصراحه صريح صارحنا بكل المعلومات المطلوبه وأزود
لو يحطونك مراقب هنا احسن
وعن البورش والسيرفس فلقد أصبت
ولو ودي أخليها بالمستوى ماينس0

[المزوحي]

من كثر ما انتشرت الرنج الواحد مايبغي يمتلك موتر فخم، يتم على سياره عاديه احسن ولو نقول إنه السياره انا بتمتع فيها مب غيري

سياره تكد، لا تش ولا هم يحزنون

[المزوحي]

المواتر المذكورة كلها فخمة، وعيبها الالتزام في موعد الصيانه أو تبديل الآيل والفلتر، يفرحونا بالكونتراكت، يعني يختارون ارخص شي في السياره ويبدلونه على الضمان . أولريدي ماخذين جيمة الموتر وزيادة.

صح محد ضربنا على إيدينا ^_^

القيادة ممتعة + تنقصها الخدمة الطيبة

البورش اليديد مب شي شكله من برع

[المزوحي]

جربة الاكس فايف والرنج

عيبتني سواقة الاكس فايف اكثر

خلنا على التجارب لين مانفكر بالاخير


وشكلنا بنتم جيه