!i! افـتــح آي فونـك .. وخبـرنـا شـو عنــدك !i!

[العجيبة]

السـلام عليـكم ورحمة الله وبـركـاتـه



جاءتني فكـرة عندمـا كنـت أعـابل آي فونـي الجميـل، ربمـا تكون فكـرة مستهلكـة في أمـاكن أخرى، ولكنهـا لم تطبق في واحاتنـا العزيـزة ،

تشجـعـت للفكـرة لسببيــن :
1 - لأني أمتلـك آي فـون
2 - لأني رأيت شغف الاعضاء في موضوع الأخـت شوق القلوب الذي استفسرت فيه عن الهـاتف ، ولاحظت أن أكثر من عضـو وعضـوة صـاروا آي فونيين

وبالمنـاسبـة ، أحـب أن أبـارك للجميــع اهتمـامهم بالتقنيـة والتكنـولوجيـا الحديثـة ومواكبتهم للتطــور ، بالمختصـر أبـارك لكم انضمامكم لقافـلة زبائـن الشركـة المتميـزة " التفاحـة المأكـولة "





> اسمحولي على الفلسفة أعلاه ... من زمان ما تفلسفت بالعربي وحبيـت أستعرض شويه خخخ <



ندش في صلب الموضوع





الموضوع الله يسلمكم ويجعلكم من الأتقياء والبررة والصالحيين >> قولوا آميين


واضح من عنوانـــه


ببسـاطـــــة :



افتـــــح آي فـونـــك ....


وخـبـــرنـا شـو عنــدك




خبـرونـا عن برامـجكــم ، شو اسم البرنامج، من وين نزلته ، سعـره إذا ما كان مجاني ، وشو فايدتـه أو كيف تستمتع به ...

خبـرونـا عن اكسسوارات هاتفكـم ، صوروهـا اذا تقـدرون ، خبرونا أسعـارهـا ومن وين ، وفائـدتهـا ...


تقــدرون تصـورولنــا صـور من آي فونكم ، واللي ما يعرف يصور

الطريقة : تضغطون على الزرين home + switch off في نفس الوقت على الصفحة اللي تبونهـا وبتسمعون صـوت الكـام وهي تصور + بتلمع الشاشة خخ





بالمختصـر : الموضوع لكم ،
ولكن اتمنى انه ما يكون للمشاكل التقنية أو الفنية في التلفون أو التحديثــات ...


أتمنـى أشـوف مشاركـاتكم وتفاعلكـم



دمـتـم ودامـــت آي فوناتكــم



أختـكمـ
العـجـيـبـة

[العجيبة]

.. خلـونـي أبـدأ ..


بفتح لكم آي فوني وبخبركم عن بعض البرامج اللي عندي
برامجـي كلهـا free ومن Apple store
طبعا لانيي ما قدرت اسوي جيلبريك ، وما أنوي اشتري برامج فالفتره الحالية!




برنامج غنـي عن التعـريف ، الصوت فيه اوضح من المكالمات العادية حتى النفس ينسمع !
بس مشكلته عندي ما يفتح الا اذا عندي وايرلس .. ما ادري هل لأنه مجاني ولا هو جي مصمم أصلا !!
صح ، تقدرون تتصلون لأرقام الهواتف اذا عندكم رصيد فيه ، وطبعا قيمته احسن عن شركات الاتصالات بمليون مره!
وفيه محادثة كتابية ومكالمات مرئية - بس ما جربت المرئية -




- - - - -




palringo

برنامج محادثـة ، تقدر تكلم اللي عندهم هواتف ثانية واللي عندهم نفس البرنامج فالكمبيوتر ، ويسوون فيه قروبات ...
اممم اشتركت في بعض القروبات العامة ، وطفررررت وااايد حشرره والتلفون ما سكت وسوالف شرات الجـات ...
لكن اتوقع بيكون حلو لو قروب لأصـدقاء أو جمـاعة يعرفون بعض ..
محادثة كتابية .. تسجيل صوتي ... وتبادل صور ...
وتقدر تفتح حساباتك مثل قوقل وياهو وهوتميل ... بس ما جربت!





لعبـة Pipe mania

بايين من اسمها ، شي لعبة في نوكيا من زمااان اذكرها نفس فكرة هذي ،
توصل بيبـات المـاي مع بعض عشـان ما يتسـرب الماي ...
طبعـا هذي مطورة اكثر عن لعبة النوكيـا ، ملونه وفيها اشياء يديدة ، يعني ممكن بيـب يليّــك وانت تلعـب لازم تصلحه لوول

لعبـه ممتــعــة وتحتاج سرعة وتركيـز





MyGPA
برنـامج يحـسـب لي الـ GPA
يعني أحط فيه كل الـ GPA اللي قبل مثلا
واذا ابا اتوقع الـ GPA مال هالفصل وكم بيكون التراكمي بعده ..
أحط الدرجات اللي اتوقعها وهو بيحـسـب لي ...
برنـامج جميل وبسييط ومفييد للطلاب والطالبـات



أكتفـي هالمـــره ...

[أمطار]

حلـــووو موضوعج وحبيييييت المقدمة وااايد ههههه

للأسف ما عندي آي فون..
لكن منكم نستفيد!

يمكن اتحمس وآخذ لي آي فون والسبة موضوعج ^^

[العجيبة]

ههه انا حبيـت تواجـدج يا أمطـار كأول رد ...

شوفي ... الاي فون حتى وان كان غير مفيد بنظر البعض، أو ممكن البعض يقول انا ابا تلفون اتصل به واطرش مسجات وخلاص!
أوكيي بس مهم جدا ان الوااااحد يصيـر اي فوني ... عشـان يعيش التطور أول ما يحدث ... يعني الواحد ليش يتريـا التقنية هذه يصير عمرها 10 سنوات عقب ياخذها ؟!
مثل الكمبيوتر ( مثال قديم ) ... الناس قالوا عنه مب مهم الراديـو مأدي وظيفته وزود ... ليش ناخذ كمبيووتر وماله داعي وما ادري شو ... الحين شي بيت بدون كمبيوتر؟!!
مثال آخر ( مثال مستقبلي )بتشوفييين الناس شو بيسوون اول ما ينزلن التلفزيونات اليديدة 3d بيقولون مالهـا داعي ، وهذا ويهـي بعد 10 سنواااات بتشوفيهم كلهم عندهم !!!!

الخلاصة ، ان الآي فون هو ( مثـال من الحـاضـر ) ...

عيشي التكنولوجيــــا يا أمطــــار وبتقـولي العجـيـبة قالـت

تخيلي مثلا مثلا يعنيي ... يوم تستوييين يدوه ، أحفـادج يعرفـون يستخدمون الاي فون وانتي لا؟!!!! بتقولي لهم انا ما حبيت استخدمه اول ما نزل ؟!!!


<<< خخخخ ما يسوى علييييج


بس خذي اي فوون وبتحبييينه :)


اسعدني تواجدج واسمحييلي حبيت ادردش معاج

[أمطار]

وأنا حبيت ردج السريع على ردي
المشكله شوو.. أنه تتش وأنا يايتني عقده من التتش !!!


أمطار تواكب التطور بس من الصوب الثاني..
عندي بلاك بيري وأتابع كل يديد فيه!

أتعرفين شو أحساسي للـ آي فون؟!
كأني مشجعة لـ الريال مدريد بس يوم يسجلون برشلونه هدف أشجعهم وأتحمس لهم!

أقولج..
برد أكتب لج رد باجر!

شكلي سطلت بالقو!!!!

[ذنـيـنـي]

موضوعج وااايد حلوو يالعجيبه
عجيب

عندي آي فون من شهر و شوي, من يوم رمسنا عن الايفون في موضوع شوق القلوب
و كل يوم يزيد اعجابي بالتيلفون و يزيد كرهي للبلاك بيري الي مافي سبب يخليني احتفظ فيه غير الـ BBM لأني اتواصل مع الكثير من الناس عن طريقه و ينفعني بشكل كبير فالسفر

أتعرفين شو أحساسي للـ آي فون؟!
كأني مشجعة لـ الريال مدريد بس يوم يسجلون برشلونه هدف أشجعهم وأتحمس لهم!

تشبيه بليغ

[ذنـيـنـي]

لي عوده بالبرامج الي عندي

[ذنـيـنـي]

من اهم البرامج الي استعملها

برنامج aNote
و هو عبارة عن مفكره شخصية اقدر احط فيها ملاحظاتي و مواعيدي و اقدر اسوي لستة مشتريات و غيرها من الامور

========

البرنامج الثاني الي غير حياتي اسمه sleep cycle
و هو عبارة عن منبه يتابع مستوى النوم عند الشخص عن طريق الحساسات الموجوده فالجهاز و يقوم بإيقاضه بطريقة تدريجيه و مريحه للشخص

انصح فيه و بشده
و تقييمي للبرنامج 10/10

========

برنامج WorldMate ايضا من البرامج الرائعة جدا الي انصح فيها
و هو مفيد جدا جدا للسفر,, النسخه المجانية منه تفي بالغرض و ما اشوف انه شراء النسخه الكامله من البرنامج له داعي



======

لي عوده مع البرامج الترفيهية و الالعاب

[مجموعة إنسان]

و اللي عندهم ايبود تتش !!
ههه

[أنامل قلب]

حلو الموضوع ،
متابعه للاستفاده ، بس شكلي باخذلي آي فون ،
من متى داش خاطري وكل شوي أأجل !.




يسلمو عالطرح ..

[المزوحي]

عندي برنامج iQURAN فيه المصحف كامل ، وممكن تنزل كذلك صوت المقرئ وللحين اللي موجود للشيخ الحصري

وعندي IPray تشوف توقيت الصلاة ، وأظن تقدر تخليه ينبه على موعد الصلاه لكن ماسويته

وشي pMessenger المعروف إنك تاخذ PMiD مال الشخص وتسوي آد

كذلك برنامج العملات ( تحويل العملات ) وشي 3 ألعاب تقريبا

[مــهــابه]

آنـآ مـآ آذكر شو عندي =p ، بمـا انه الآي فـون ف البيـت " لأن قوانين جامعـتنا تمنع الـتلفون لي فيه كام ، وانا مع القـوانين لوول "


فـ الويك إند ان شاء الله بحط الآلعـآب + البرامج + وكل شي في آي فـوني ..


لـي عوده =)

[شوق القلوب]

السلام عليكم...

حبيت موضوعج وااايد... لانه صدق مفيد...

تسلم الايادي :)

[مايهزك ريح]

الرامج اللي عندي ..

alQibla.. لتحديد القبله واوقات الصلاه في كل مكان ..




Emoji .. icons for smily faces



Bluetooth.. image لتشغيل البلوتوث وتبادل الصور ..



flash for free لأنه الكاميرا ما فيها فلاش ..



وطبعا كلهن ببلاش ..

[مــهــابه]

بـآك


البرآمج والآلعـآب لي عندي


1- بـي مسنجر

للـتوآصل من آيفون لـ آيفون 2 ، حلــوو لكن ماعندي حّد لوول غير 1

2- آذكـآر

طبعـاً بـرنامج الآذكـآر واظن انه مجـآني

3 - بـآك قـرآوند :

لخلفـيـآت الآي فون ، بحكم اني وايد احب اغير وووو

بالنسبه للآلعـآب :

عندي درآيفر

عندي دآنكن دونتس

عندي لعـبه الديـآيه لوول بس ، هذي آحلى لعبه ف الآي فون ، تعيبني وآظن انهــا مب " فــري "



ولــي عوده