تجارب

[شمه]

ادري اتأخرت في الرد عليكم..

مشكورة امطار وضحتي لنا رؤيتكم الضبابية.. و اصلا رسالة المعلم تكون ساميه اذا ما كانت من قلبه مستحيل توصل ..


و ان شاء الله الباجين يارب تتخرجون وتمسكون اعلى المناصب


ع العموم اتوقعت اغلب اهل الواحات يشتغلون بحكم ان كنا ندرس ويا بعض في فترة بداية ال 2000 وكنت حابه اعرف وين وصلوا وشو رسالتهم ورؤية مؤسساتهم.. ان كانت حكومية او خاصة .. بس الظاهر الواحات اتجددت الدماء فيها .. واللي موجودين الله يوفقكم وتتخرجون بسرعه..

[سبيجة]

السلام عليكم


اختي الغاليه ,,, شمه حياج وألف مبروك على التخرج والوظيفه ولو إنها متأخره


بالنسبه لي شخصياً ..خضت 4 أماكن عمل ...


أول وظيفه كانت مؤقته وكنت متطوعه لمدة 4 أسابيع ,,, كانت في 2003 وبعد شهر واحد من تخرجي ...

وبعدها بشهرين داومت في مكان شبه حكومي ..وحسيت بمتعه ما بعدها متعه ... مجال حلو ... ومتغيير وفي مجال كبير للإبداع ... وكان في خدمة العملاء والاقتصاد والتجاره وهالسوالف ..كانت الرسالة والرؤيه ... عن الإرتقاء بخدمة العملاء وهالسوالف ..... بس بما إني إنسانه أمل بسرعه ..وما اقدر اتم في نفس المكان ونفس الشغل وادخل في الروتين ....رغم اني اشتغلت في كذا فرع ..واكثر من مكان ..وترقبت مرتين خلال 3 سنوات بس بعد طلعت ورحت لدائره حكومية 100% ... واخترت مجال مختلف ..دخلت في الاستراتيجية والتطوير والتميز وهالسوالف ... حسيت انها جامده مع ذلك استمريت بعد 3 سنين ... ورؤية ورسالة الدائرة كانت خاصة بمجالها وايد كانت محدودة...


وطلعت .... انتقل إمارة ثانية وهذا رابع أسبوع لي في هالدائرة الورقيه انا دوووم جيه اسميها ..... واحس اني رجعت 10 سنين وراء ..ابدا مب متفائله .. العقليات اهني وايد غير عن دبي ولين هاللحظه ما سويت شي غير اني يالسه على النت ..واشوف اللي ويايه ..طالعين يتريقون ...وردين من الغداء ... والزلمات اللي يشتغلون ..وما يرضون يعطونا اي شغل ..والمشكله مديري يديد..وكل ما اكلمه يقولي اصبري ما أدري لين متى...كلحد يقولي احمدي ربج تستلمين هالراتب وما تسوين شي ... انا ما اقول ما ابا هالراتب بس انا ما ابا اتم جيييه مخي واقف ... واحس مالي اي قيمه ...

إن شاء الله خير ...