إذا فتحنا نقاش حول هالموضوع مابنخلص ,
ما شاء الله عليك خنفروش ,, :)
1. وياليت الوالدين يكتفون بالضرب وبس , هذا من غير الكلام الجارح اللي ينقال لأطفالهم (غبي, ما تفهم, خبل ....),
وأعرف أحدهم صارت شخصيته مختلفة عن باقي أخوانه, ودايما يقول عن عمره ما أفهم وووو , وقد أثر هالشي في
دراسته وحياته بشكل سلبي , وكل هذا بسبب الكلام اللي ينقال له وهو صغير!
2. آآآه من مسلسل التحرش بالأطفال , أحس الأهالي ما بينشون من رقادهم إلا يوم يشوفون عيالهم يطيحون
في هالسالفة , بعيد الشر, مثال أن أحدهم ماخذ أجنبية وطول اليوم هو وحرمته مشغولين بالدوام وغيره ومخلين
بناته الصغار في البيت لا رقيب ولا هم يحزنون, يظهرون آخر الليل وماحد يدري عنهم, واستغفر الله الفتن
كثرت, ياما سمعنا عن اللي تحرش بالأولاد, فكيف إذا هالمرضى شافو بنت ولا قولتك بلبس ملفت!
3. التلفزيــووون وما أدراك كما التلفزيون, هالجهاز اللي صدق مااااحـبه, ما أيلس عنه إلا نااادر, يعني بذمتكم كيف تبون عيالكم
يتربون تربية عدلة واتيي لي الأم تقول , دموووع شفتي آخر حلقة من ستار أكاديمي اللي ..... , وأنامول ما يخصني
في هالسوالف , ويوم يلست وياها مرة ماشفت غير لقطات بوسة وحضن وووو , ياااالله , ماعرف شو أقول , صدق اندهشت ,
فإذا الوالدين يعيشون حياتهم على هالبرامج أو المسلسلات الغبية , يوم يكبرون العيال شو بيطلعون؟ كيف تفكيرهم؟ الله المستعــــــااان !
يزاك الله كل خير خنفروش , تراك يبتها عالعوق ع قولتهم ,
بس حتى لو تمينا نرمس ونرمس مابنخلص , وها إذا بنستفيد شي ,
أهم شي التوعية والتذكير , وربي يعيننا على تربية عيالنا مستقبلا إن شاء الله ,, :)
رد مع اقتباس
مواقع النشر (المفضلة)