السلام عليكم ورحمة الله وبركاته
جوالع !!! اختياري لهالعنوان بالذات له مغزى في بطن الموضوع !!!
بأمانة ما كنت أعتقد إني أحب التدريس إلا باليوم إلي تعينت فيه !!
حبيت مهنتي وااااااااايد ، خصوصا وإنه الانسان في بداية شغله يكون شعله من الحماس !!
مسؤولية يديده تنضاف لسجلك الوظيفي ...
بس هالأشياء تبتدي تتبخر مع مرور كل هذه السنوات ...
ليش ؟
بخبركم ليش !!
بسبب جوالع التدريس
الدوام اليديد .... أو بالأحرى تأخير الدوام
أنا ما كنت أتذمر ...وحاولت أقتنع فيه ...صدق إني ما اتحملت بس بعد ما كنت أشتكي
بس اليوم سمعت حديث تلميذاتي على نهاية الحصة الأخيره !!!
اسمعوا حوارهن
مريم : ( تتنهد تنهيده جذبت انتباهي ) وتقول : الحين إنتو متى تكتبون الواجب ومتى تلحقون تذاكرون ؟
ميثا : أصلا ماشي وقت
ساره : أنا أوصل البيت على إذان العصر ... أغير ملابسي وأتغدى ويادوب أذن لمغرب !!!
مريم : انا أتغدى بروحي ( غمضنتني والله ) ماماتي وباباتي يتغدون قبلي ، أحلى شيء عندي الإجازه يوم أتغدى وياهم
ميثا : وعقب المعلمات يعصبون علينا يوم ما نكتب الواجب ! ( طاحوا فينا ) أصلا والله ما شيء وقت
ساره : أنا ما أرقد العصر عشان أحل الواجبات وأذاكر وأرقد من وقت من التعب وماماتي تكتب الواجبات عني إذا ما قدرت ( عاشت الأم)
ميثا : أصلا باباه يقول هذا النظام اليديد غلط ( عاش الأبو ) متى بنرتاح ومتى بنذاكر ومتى بنرقد !!
المشكله ...دق الجرس عقبها وما كملوا سالفتهم
شفتو جوالع البنات !!!
الحين اسمعوا جوالع المدرسات
مس عاشه : تعب والله تعب !!! ما بنلوم البنات يوم يقولون تعب وما عدهم وقت في البيت ، الحين أنا أكره حياتي يوم أرد البيت
يادوب أتغدى على إذان العصر ، ورقاد الظهر نسيناه منزمان ، والزيارات انعدمن الحين ، يادوب أذاكر لسلوووم بس ما يستوعب لأنه نصه رقاد !!
أبله سعاد : وين بيستوعب وطاقته كلها استهلكها بالمدرسه !!! قبل يلعبون كره ويتنشطون بلمراكض بالحوي شوي
الحين من يردون نستلمهم بالمذاكره
أبله أسما : هيه والله ، الله يعينهم ويعينا وياهم
أبله موزه : أنا ريلي يباني أستقيل يوم يشوفني متلعوزه امبين التحضير وتدريس لعيال !!! بس الحياه صعبه ومعاشاتنا تساعد
ودق الجرس ... والكل ركيض على الحصص لأنه المناهج لازم تتشطب هالأيام
سمعتو جوالع التدريس !!
من فتره سمعت لقاءات مع المواطنين في أخبار الإمارات بهالخصوص ، والآراء كانت متفاوته بين اموافق ورافض
الحين يا حلوين !! إنتو شو رايكم بهالموضوع
بقولكم رايي أنا بعد ... بس تريوني لين أخلص ( التحضير ) !!
مواقع النشر (المفضلة)