كلمــــات ،،

[عهد الوداع]

موضوع ولا عالبال

[أنامل قلب]

أخواني ، تسلمون على مروركم الطيب ،
بس الموضوع هذا خلوه حقي ..
أحسني متروسه ، لازم باخذ راحتي بزياده ..!"

+ لو حابين تضيفون كلمة شكر لأحدهم ،
فـ في موضوع قديم لأخونا الطيب ألم ترى من هنا ،
قد يفي بغرض من أحب إبداء كلمة =)

واعذروني جدا ..

,

اختي عهد ، انا كلي على بعضي ولا عالبال ،
أثولف طبعا ، ويزاج الله خير على تحفيزج الدائم لأنامل قلب ..

^-^

[أنامل قلب]

{ عفاريتووو ~ ..

وايد تواصلت مع أعضاء خلف الكواليس عبر الرسائل الخاصه لـ مواضيع عديده ،
والاخت عفاريتوو كانت من هؤلاء اللي يوجبون ويلبون حاجات المواضيع بأجمل الطرق وأكرمها والله ..

ما شاء الله عليها ، هي كذلك من الخوات اللي تحب تلقاهم أنامل قلب جدا بالمواضيع ،
مش استهانة بغيرهم ، لا والله ، لكن في ناس مادري كيف تحسونهم يحتوون أسلوب معين
أكان بالتفكير أم شخصياتهم ككل يذكرونكم بأمور تحبونها ، ممكن يكونون ناس شفنا منهم كل خير ،
وممكن يكون تشابه ابـ جانب فيهم ، وممكن يكون لأمور كثيره نجهلها ..

أحسج جي من النوع الجدي بعمله ، مادري ! / وابـ نفس الوقت أحسبها سوالف لكن مع اللي تعرفهم أكثر ،
ما قمنا نشوفج للأسف بينا بشكل كبير ، وعساج بـ خير وعافيه وسالمه من كل ما يكره ربي ..

اممم ، أحب أشوفها ..

,
,

{ أخوي المحاق المشتعل ~ ..

ذكرته الحين لأنه صارله غايب من مده ليست بالقصيره + أهو احليله من أوائل اللي ابتلو فيني وبردودي الطويلة بواحته ، واحة الرسم ..

أذكر من سجلت بالواحات ربيعتي دموع قلم بعدها بفتره قصيرة نبهتني إن عدنا بالواحات واحة خاصه بالرسم ، وتمت تمدح
الرسوم اللي تنطرح بهالواحة ، وانا وقتها تخبلت لول ، فـ تميت اتواصل بالواحه بشكل احسبه كبير ، ويااااكثر ما كانت لي اضافات قصيره ، احم !

أخ له وزنه بالواحات وقدر طيب عند الكل ما شاء الله ، طيب جدا + جدا لبق بالتعامل لولا إن قليل ما كنا نلقاه يتواصل بالمواضيع بشكل عام ،
ملاحظاته جميله جدا ، أي استفار كان يطرح أكان من قبلي ولا من قبل أي عضو آخر كنا نلقى منه ردود ونصايح كريمة جدا جدا جدا ،
مادري من اللي زعله وخلاه يطفش من الواحات ، ها يالله اعترفو ..!

أحسبه من اللي يحبون يكرمون الغير وايد ، والعكس يتفادى التقليل من قدر أحدهم ولو كانت بملاحظة تطرح على رسمه !
له أسلوب وأفكار طيبه جدا ، حتى كنت استغرب ليش مانلقى منه ذاك التواصل بـ مواضيع الواحات الأخرى ، او يمكن بالوقت اللي
سجلت به في الواحات كان الكل بشكل عام يتواصل بشكل خفيف ^^"

ما شاء الله عليه ، صدق مفتقدين محله بالواحات جدا ، باحترامه باخلاقه بافكاره ، وبحس الرسم عنده ،
عساه بخير ، وربي يوفجه وين ماكان ، وفيما يحب ..

للحين كل أمور الرسم تذكرني فيه ، متى بتعلم وبوصل لـ مثل هالمستويات الطيبه مادري ..!
+ انامل قلب تعتذر من شخصك عالقصور ..

,
,

يايين بالدرب ، اخواني خطاب ومجموعة إنسان ، بخاطري أحط عليهم من زمان ..

[أنامل قلب]

نبدي بالأكبر سنا !

,

{ أخوي هواجيس إنسان ~

اممم بالأول أهو يعتبر من أكثر الأعضاء اللي ينوصفون بالطيبه ، بشهادة كثر كما كنت ولازلت أقرا بعدة فواصل ،
ما أقصد الطيبه اللي ممكن تنوجد ابنا كلنا ، لا لا أقصد طيبه طيبه P= / ووو و هيك يعني ..

أحسبه من النوع اللي وايد يراعي الغير ، وايد وايد يراعيهم / إلا الغربا طبعا عادي يقطعهم تقطيع ،
وووو شو بعد ، اممم إي صح ، كنت قبل وللحين أقول إنه يملك أشيا ما يظهرها ، مادري ليش !
حتى سبحان الله لدرجة إن من بيتكلم بجدية شوي سيده بنحسبه متغير ، لأنه ما اعتاد يظهر بمثل ذلك ،
وبالتالي تناوله لبعض المواضيع تكون قليله مقارنة بغيرها ، واهني مثل ما سبق وقلت ، مو لأنه ما يملكها ،
لكنه يميل لإظهار جانب دون جانب ..!

وشي بعد ، اممم ما يعيبني فيه إني أحسبه أحيانا وقد يكون عالأغلب من غير قصد ،
يعرض نفسه لحساسيات أهو في غنى عنها ، مثل لمن يسكت بمواضع أشوفها أنا شخصيا غير مناسبه ،
صحيح السكوت جميل والصمت هيبه ، بس مو دوم ، خاصه لمن يكون مثل هذا السكوت ما ينفع كثر ما إنه
قد يترك شيء بنفس الإنسان يضايق ، وهذي ـ عني أنا ـ أحسبها طبيعة فينا ، الاستغناء عنها يتسببلنا
بوقفات كريهه ماتحبذها النفس / وبالمثل لمن يساير أمور ، ما بقول إني أتنرفز ..

ممكن أكون غلطانه ، مادري ، لكنها أشيا أحسبني لاحظتها ، وأمور أشوفها من وجهة نظر أنامل قلب ،
مع إني أحبذ بالمقابل شغله مادري إن كانت بك أخوي ، وإهي عدم الاهتمام واللا مبالاة أحيانا ،
فهي نعمه لأمور بالأخص ، تجعلنا نمسك زمام أمورنا ونتحكم بما نشتهي ونريد ..

أخ ما يقصر وقت الحاجه ، حساس لأمور كثيره ، عملي ويتقن الشي اللي ينحط بين ادينه ما شاء الله ،
يحب يونس الغير ، علاقته ابـ أبوه جميله ، ونحب نشوف تواصل أكبر منه بالشكل اللي يريحه ~ ..

اسمحلي أخوي على أي قصور بدر من اختك أنامل قلب ، وجل تقديري واحترامي لـ شخصك ..

,
,

{ أخوي خــّطاب ~

احم ! ، ماعرف لول
مادري بس ما الحق أقول شي ، كله يقفط ويسكت ويقطع ويزعل ! يعني ما ينفع نقول عنه طيب !

أخ تواصلت معاه بأكثر من موضوع ، وياما كنت أحط عليه ، أحس مادري وايد أغثه من غير قصد ،
واهو بالمثل ما قصر فيني ، كله يقولي ردودج طويله ردودج طويله ، مثل اللي فوق اونه أنامل الحديديه / يحبطون صح ..!

اممم أحسبه من النوع اللي ممكن تلقون منه إضافات البعض قد يتحسس منها ، لكنه ما يكون أساسا بالصورة اللي تنفهم ،
وبالمثل يصير بعكس الأطراف ، ممكن يشد أحيانا على أشيا ما تستحق أو ماتكون بالمعنى اللي يوصله ..!

وأرد أقول ، الحلو به إنه ممكن يشد بأشيا أحيانا ، لكنه يرد يطيب بسرعه ، فيه نوع من السماحه ،
يعني مش مثل اللي يقعد يتم حاط الموضوع ابـ باله بحيث يتم متحسس وحاط اكس على أشيا ..

كذلك ما يحب يسكت عن الأشيا اللي ماتعجبه ، جدي ، لكنه بنفس الوقت سوالف ،
بس نصيحتي لحد يفوت على عمره عصبيته ، بتستانسون وبتستفيدون وبتمر عليكم كل الألوان !
+ أحسبه أحيانا نفس خيو مجموعه يساير أشيا بأوقات ، مادري !!"

وإي صح ، شي مهم جدا ، ماحب لمن يتم يقول تشككيني بعمري ، أقوم أنا أشك بعمري عقب لول
ووايد كان ولازال يذكرني بأخوي ، أو بالأصح في أوجه تلاقي امبينهم بكذا شغله ..

حلو اهتمامه بهله والمواقف اللي يذكرها عنهم ، صدق وايد حلو إن يكون الشخص قريب من هله ،
وووو كنت بقول شي ! ، امممم أحسبه واااااايد يحب يفيد الغير باللي يملكه ، يعني من النوع اللي
إذا تأثر بشي ولا استفاد من شي ولا عنده أفكار ، يحب ينقلها للناس من حوله ، وكذلك اهني بالواحات ..!

أتمنى ما يزعل من أي ملاحظه / أي كلمه ممكن أبديتها ، لأن غرضي منها ما بيكون غير كل خير باذن الله ،
وبالمثل ، اختك أنامل قلب تشكرك على كل ملاحظه ونصيحه مباشره أو غير مباشره أبديتها لها ..

اسمحلي ، وجل احترامي وتقديري لـ شخصك ..

,
,

/

وايد تفاصيل ومواضع نحب نوقف عندها ، ما تحضرنا حاليا ...!