مكيــاجكم ~ ..

[سبيجة]

السلام عليكم ..


الغاليه ..مهابه ... صدقيني ما بتندمين لو عدلتج كاتيا.. احلى شي تسويه تطلع البشره فرش ....وطبيعيه ..واذا تبين رقمها أو اوصيها عليج انا حاضره ... انا افكر اخذ دورة ميك اب عندها ...


حبيبتي ..شواقه ...انا خبرتي على قدي ... بس بقولج الميك اب اللي انا دوم اسويه ...


الميك الصباحي أو للدوام ...

انا من النوع اللي العب في طريقة وضع الجحال ... استخدم القلم (جفنشي) اذا ما كنت متفيجه وما عندي وقت ...ولازم يكون طرفه مايل للحده ما يكون مدور ومتين ... احيانا ارسم على الرموش اللي فوق بس من فوق وامده لبرع ... وطبعا اتحكم في الطول والعرض بالقطن مال الاذن .... وهالجحال اسهل لو استخدمتي اي شادو أسود .. جربت شانيل ولانكوم ....وبعد ستيلا عندهم محبره حلوه وسهله ... تلاقينها في سيفوار ... وحتى مكياجي نزلوا علبه فيها كل شي اسود ,, وممكن انج تخطين عينج في فرشاه رفيعه اذا تبين خط رفيع ... وفرشاه اعرض اذا بغيتي تعرضين الخط...

النوع الثاني من الجحال اللي اسويه بالايشدو .. هو اني بعد ما ارسم الخط اللي فوق وامده بس مب وايد ... ارسم خط على الرموش اللي تحت .. لين ما اخلي الخط يلتقي بالخط اللي فوق .. وبعدين اسحبه حسب الرغبه ... في هالحاله يكون احلى لو كان الخط اللي تحت رفيع ..وفي ناس تحب تغلضه ..على حسب اللي يناسب عيونج ... وممكن انج ما تلاقين الخطين ..وتخلين رسمة العين مفتوحه ... في هالحاله ممكن تستخدمين بعد القطن مال الاذن عشان ترتبين الفتحه بين الخطين ...(اسمحيلي ما اعرف اشرح عدل وما اعرف احطي صور في نص الموضوع) .. بس شوفي الصور تحت ..... وانا حاضره حق اي استفسار ...


بالنسبه للأيشدوا ..انا افضل اللون المشمشي .. الوردي .. البيج .. يعني الفاتح .. ممكن احط كامل ..على الجفن ... واتجحل .. يطلع بسيط ...
واذا حق مناسبه .. احدد عضمة العين بلون غامج ... مثال: اذا كنت ابا احط بنفسجي ..ممكن احط على الجفن كامل الوردي الفاتج واحدد العضمه بالبنفسجي ... على شكل على اكبر من واصغر من .. تحيدينها ... في الصوره باين هالشي بس مستخدمين البنفسجي والأسود اشويه على الاطراف .انا نادر ما استخدم الاسود افضل استخدام لونين واحد غامج وواحد فاتح ... مثال ثاني ...ممكن تحطين على الجفن لون مشمشي ... وتحددين العظمه بالبني ... يطلع خفيف وحلو ...

شوفي صورة البنت اللي شعرها قصير ... فوق لون ازرق .. هالشي يغنيج عن الايشدوا ..انا احب الجحال الأزرق والأخضر ..والبنفسجي ... وممكن تخلطين تحطين اللون فوق ...والاسود تحت .. أو العكس ..


اتمنى اكون فدتج ...وياريت لو نسمع باجي الخبرات ..